Webrwanda Backend

Author: webrwanda

  • Nyuma y'igihe gito Bijoux wo muri 'Bamenya' asubije impeta Benjamin yerekanye umuhanzi yamusimbuje [AMAFOTO] #rwanda #RwOT

    Mu kwezi kwa Kanama nibwo Aline Bijoux yambitswe impeta n'umusore witwa Abijuru Benjamin amusaba kuzamubera umugore ,gusa nyuma biza kurangira bidakunze ko babana.

    Bijoux yaje gushyira kumugaragaro avuga ko yasubije impeta umusore wari wayimwambitse kuko hari ibyo basanze bitakunda.

    Muri iyi minsi , Bijoux ari guca amarenga ko ari murukundo n'umuhanzi Lionel Sentore usanzwe atuye i Burayi.

    Atangira gushyira uyu musore ku mbuga nkoranyambaga, Munezero yagize ati 'Ni rutikanga igikomye ntatinya itabaro!' amagambo yakurikije udutima tugaragaza amarangamutima y'abakundana.

    Inshuro nyinshi uyu mukobwa akunze gushyira amafoto ku mbuga nkoranyambaga ari kumwe n'uyu musore.

    Kuri uyu wa 10 Kanama 2021, uyu mukobwa yatunguranye avuga amagambo akomeye agaragaza ko ari mu munyenga w'urukundo n'uyu muhanzi.

    Ati 'Gukunda ntacyo bimaze, igifite umumaro ni ugukundwa. Ariko ikiruta byose ni ugukunda ukanakundwa. Ndagukunda Lionel Sentore.'

    Lionel Sentore atangiye kuvugwa mu nkuru z'urukundo na Bijoux, mu gihe uyu musore uririmba umuziki gakondo yari aherutse nawe kwambika impeta inkumi yitwa Mahoro Anesie.

    Uyu mukobwa wambitswe impeta na Lionel Sentore yamenyakanye ubwo yiyamamarizaga muri Miss Rwanda 2014.

    Ni impeta uyu musore yambikiye umukunzi mu Bubiligi muri Gashyantare 2020, icyakora kuva icyo gihe nta yandi makuru y'urukundo rwabo yongeye kuvugwa.

    Inshuro nyinshi twabajije Bijoux ibijyanye n'urukundo rwe na Lionel Sentore, uyu mukobwa yakunze kuvuga ko nta bidasanzwe bibahuza ahubwo ari inshuti zisanzwe.


    Uyu muhanzi Lionel Sentore yari aherutse kwambika impeta inkumi bamenyanye mu 2017

    Source : https://umuryango.rw/imyidagaduro/article/nyuma-y-igihe-gito-bijoux-wo-muri-bamenya-asubije-impeta-benjamin-yerekanye

  • Kicukiro: Urubanza rwa Venant Rutunga woherejwe mu Rwanda n'Ubuholandi rwasubitswe #rwanda #RwOT

    Urubanza rwa Venant Rutunga uburanishwa ku ifunga n'ifungurwa ry'agateganyo mu Rukiko rw'Ibanze rwa Kicukiro, ariko rurasubikwa kubera ko uregwa yatinze kubona dosiye.

    Kuwa 26 Nyakanga 2021 nibwo Ubushinjacyaha bwatangaje ko Ubutabera bw'Ubuholande bwohereje Venant Rutunga, Ucyekwaho icyaha cya Jenoside yakorewe Abatutsi 1994

    Umwirondoro wa Venant Rutunga Umwerekana nk'umuntu ukomoka mu cyahoze ari Peregitura ya Ruhengeri Komine Gakenke ubu ni Mu Karere Ka Gakenke.

    Venant Rutunga mbere ya Jenoside yakorewe Abatutsi 1994 yari umuyobozi w'ikigo cy'ubushakashatsi mu by'ubuhinzi cya ISAR Rubona uyu munsi ni mu Karere ka Huye,muri 1994 hari muri Komine Ruhashya.

    Aha muri ISAR Rubona ninaho bicyekwa ko ariho yakoreye Jenoside.

    Venant Rutunga yatawe muri yombi muri 2019 afungirwa mu Buholandi aho yafashwe yari ahamaze imyaka isaga 10 yafashwe kuko hari hashize igihe ashyiriweho impapuro zimuta muri yombi n'ubushinjacyaha bw'u Rwanda .

    Venant Rutunga ubwo yari umuyobozi wa ISAR Rubona muri 1994 Abatutsi barenga 1000 bari barahungiye muri icyo kigo yari ayoboye bivugwa ko ariwe wahamagaye Interahamwe bakabicira muri ISAR Rubona.

    Venant Rutunga mbere y'uko Ubuhandi bumworereza mu Rwanda yari yarwanije icyemezo cy'inkiko zo mu buholandi cyo kumwohoreza mu Rwanda aho yavugaga ko atizeye ubutabera bw'u Rwanda, ariko yigizaga nkana kuko si we wambere igihugu cy'Ubuharandi cyohereje mu Rwanda kuko muri 2016 Ubuholandi bwohereje Jean Baptiste Mugimba, ndetse na Iyamuremye Jean Claude bose boherejwe n'Ubuhorande aho baregwaga icyaha cya Jenoside yakorewe Abatutsi muri 1994.

    Urubanza rwa Venant Rutunga rwatangiye kuburanishwa ku ifunga n'ifungurwa ry'agateganyo Saa yine n'igice Inteko y'umucamanza umwe n'mwanditsi w'urukiko.

    Uru rubanza rwabaye hifashishijwe ikoranabuhanga rya Skype murwego rwo kwirinda icyorezo cya Coronavirus.

    Ubushinjacyaha bwashinje buri ku bushinjacyaha bukuru mu gihe Venant Rutunga yaburanye ari kuri Gereza ya Nyarugenge ni Ubwambere kuri Gereza haburanishirijwe ifunga n'ifungura umufungwa atambaye impuzangano iranga ifungwa n'abagororwa.

    Umucamanza yatangiye asoma umwirondoro w'uregwa Venant Rutunga w'imyaka 72 ahita abwira urukiko ko Umwirondoro we ari Uwe koko.

    Umucamanza yamumenyesheje icyaha acyekwaho cya Jenoside yakorewe Abatutsi 1994 aho yamumenyesheje ko acyekwaho gukora Jenosise no gushishikariza abandi kuyikora ndetse no kurimbura Abatutsi.

    Umucamanza yamwibukije ko asanzwe yarahamijwe icyaha cya Jenoside n'inkiko Gacaca

    Venant Rutunga yahise abwira urukiko ko atiteguye kuburana kuko Ubushinjacyaha bwatinze kumuha Dosiye yibyo aregwa,asaba Urukiko ko yasubikirwa iburanisha rigashyirwa ikindi gihe akabanza agasoma ibyo aregwa neza.

    Venant Rutunga yabwiye urukiko ko atumva ibivugwa n'ubushinjacyaha kubera ikibazo cy'ibyuma by'ikoranabuhanga.

    Me Sebaziga Sephonie wunganira Rutunga yabwiye urukiko ko ibivuzwe n'umukiriya we ariko nawe abibona ko kandi ibyasanzwe na Venant Rutunga biteganywa n'amategeko y' U Rwanda mungingo ya 75.

    Me Sebaziga yasabye Urukiko ko mu gihe Urubanza rwaba rusubitswe ubutaha rwaburanishirizwa mu rukiko kuko aribwo buryo bwiza yizeye ko uwo yunganira yabona Ubutabera ko kandi n'ikibazo cy'ibyuma by'ikoranabuhanga bikunda gupfa bigatinza urubanza.

    Umucamanza yahaye Umwanya Ubushinjacyaha ngo bugire icyo buvuga ku byavuzwe na Rutunga ndetse n'umwunganira mu mategeko,buvuga ko ibyo Rutunga yavuze atari byo kuko Dossien yayiboneye ku gihe. Ubushinjacyaha bwavuze ko Dosiye yamugezeho kuwa 05 Knama 2021 kandi byakorewe ku gihe.

    Ubushinjacyaha bwagarutse ku busabe by'umunyamategeko wa Rutunga wasabye ko urubanza rwabera mu rukiko,ko bwo nta kibazo bufite ku byerekeye aho urubanza rwabera.

    Ubushinjacyaha bwavuze ko aho urubanza rwabera ubutaha byo byagenwa n'urukiko kuko impamvu rubera kuri SKYPE ari ukubera icyorezo cya COVID-19.

    Umucanzanza yumvishe Impande zombi apfundikira iburanisha ategeka ko Venant Rutunga agomba kuzanwa mu rukiko akaburana ari mu rukiko kubera ko Dosiye ye ari nini ko kandi byanasabwe n'abaregwa ubwabo.

    Umucamanza yanavuze ko Urubanza rwimurwa uregwa akabanza agasoma Dosiye neza kuko ibyo yasabye abyemererwa n'amategeko.

    Umucamanza yavuze ko urubanza kuzakomeza kuwa 12 Knama 2021 Saatatu za mu gitondo.Iburanisha Rya None ryamaze iminota 40.

    Source : https://umuryango.rw/amakuru/mu-rwanda/ubutabera/article/kicukiro-urubanza-rwa-venant-rutunga-woherejwe-mu-rwanda-n-ubuholandi

  • Gasabo-Kinyinya: Abimuwe mu bishanga bategereje ingurane amaso ahera mu kirere #rwanda #RwOT

    Bamwe mu baturage basenyewe kuko bari batuye mu bishanga baravuga ko bategereje ingurane bizejwe n'ubuyobozi bw'Umurenge amaso ahera mu kirere. Ni mu Mudugudu wa Kadobogo, Akagari ka Kagugu mu Murenge wa Kinyinya mu Karere ka Gasabo.

    Itangazamakuru rya Flash ryasanze aba baturage mu matongo basenyewe muri 2019, muri gahunda yo kuvana abantu mu gishanga ku mpamvu yo gukiza ubuzima bwabo.

    Aba baturage bavuga ko muri uwo mwaka ubuyobozi bw'Umurenge bwaje bugasenya amazu yabo bubabwira ko batuye mu gishanga.

    Icyo gihe uwasenyewe wese yahawe amafaranga yo gukodesha amezi abiri, bizezwa ko bazabaha ingurane, ariko ngo barategereje amaso yaheze mu kirere.

    Baganira n'umunyamakuru wa Flash, bamubwiye ko nyuma yo gusenyerwa ubuzima bwahindutse.

    Martha Akimanaati 'Nari mfite inzu y'imiryango 27 yakodeshwaga n'indi y'ibyumba birindwi nabanagamo n'abana banjye, ariko ubu ndi muy'icyumba kimwe n'uruganiriro kandi nayo tudakwirwamo.'

    Ndayisaba Martinyagize ati 'Namaze imyaka myinshi ntunda imicanga nza kugura ikibanza ndubaka. Nyuma y'igihe gito baraza baradusenyera baduha ibihumbi mirongo ine byo gukodesha amezi abiri, batwizeza ko bazaduha ingurane, none dore imyaka ibaye ibiri.'

    Iki kibazo abaturage bavuga ko gifitwe n'imiryango 7 nk'uko umunyamakuru yayisuye.

    Iyi miryango yavanwe mu gishanga bakodesha n'ubundi muri uyu mudugudu wa Kadobogo, ariko bagira ubwo baza gusura aho bahoze.

    Buri muryango utuye mu nzu y'icyumba kimwe n'uruganiriro.

     Hari abagaragaza ko badakwirwamo, ariko abandi barimutse bajya gushaka aho baba nko mu Ntara.

    Barasaba Leta ko yabafasha ikabaha ingurane bijejwe cyangwa se bagasubizwa ibyabo byangijwe.

    Martha Akimana ati 'Ndasaba ngo mutuvuganire kuko mbayeho ubuzima bubi ku buryo n'abana bamwe bavuye mu ishuri.'

    Martin Ndayisaba aragira ati 'Ndumva bansubiza ikibanza cyanjye bakanyemerera ko nubaka, kuko mbayeho nabi simfite aho mba n'abana banjye uko ari bane.'

    Umunyamabanga Nshingwabikorwa w'Umurenge wa Kinyinya, Nduwayezu Alfred, yagaragaje ko iki kibazo cyarenze ubushobozi bw'Umurenge ubu kikaba kiri mu maboko y'Akarere ndetse n'umujyi wa Kigali.

    Ariko ngo uwaba afite ikibazo cy'amashuri y'abana yabegera bakumufasha kumushakira ishuri.

    Nduwayezu yagize ati 'Iki kibazo inzego zituyoboye zirakizi kandi bazaduha umurongo wacyo. Nta mwana wari ukwiye kuba atiga, hari abo twafashije babona amashuri n'abandi rero bafite ikibazo baza ku murenge tukabafasha.'

    Aba baturage bavuga ko nubwo basenyewe kuko bari batuye mu gishanga ibyangombwa bafite byanditseho ko ari mu miturire.

    Ikindi kibatera urujijo ariko ni uko bavuga ko hari abandi bantu bari kubaka aho bo basenyewe babwirwa ko ari mu gishanga.

    CYUBAHIRO GASABIRA Gad

    The post Gasabo-Kinyinya: Abimuwe mu bishanga bategereje ingurane amaso ahera mu kirere appeared first on Flash Radio TV.

    Source : https://flash.rw/2021/08/10/gasabo-kinyinya-abimuwe-mu-bishanga-betegereje-ingurane-amaso-ahera-mu-kirere/?utm_source=rss&utm_medium=rss&utm_campaign=gasabo-kinyinya-abimuwe-mu-bishanga-betegereje-ingurane-amaso-ahera-mu-kirere

  • Afurika ishobora gucikamo ibice kubera Isiraheli #rwanda #RwOT

    Impuguke muri Politiki Mpuzamahanga zisanga mu Muryango wa Afurika yunze Ubumwe(AU) hashobora kuvuka umwuka mubi wa Politiki, biturutse ku bwumvikane bucye hagati y'ibihugu binyamuryango, ku ngingo yo kwinjiza Isiraheli muri AU nk'indorerezi.

    Amahari mu Muryango wa Afurika yunze Ubumwe yazamutse muri Nyakanga  ubwo Komisiyo y'uyu muryango  yemezaga ko nyuma y'imyaka 20, Isiraheli igiye kugaruka mu muryango nk'indorerezi.

    Ibihugu Botswana, Afurika y'Epfo, Namibia n'ibindi, ni bimwe mu byikomye  Perezida wa Komisiyo ya Afurika yunze Ubumwe (AU), Moussa Faki Mahamat, bimushinja gufata icyemezo cyo kwakira Isiraheli nk'indorerezi mu muryango, nta we agishije inama.

    Imyitwarire ya Isiraheli ku gihugu gituranyi cya Palestine ni imwe mu mpamvu igaragazwa nk'ituma hari ibihugu bya Afurika  bitifuza  kubona Isiraheli iba indorerezi mu Muryango wa  Afurika yunze Ubumwe.

    Dr Ismael BUCHANAN ni mpuguke muri Politiki mpuzamahanga yagize ati'Indorerezi ntabwo ari ikibazo ni itegeko riteganwa rirahari, ariko  ugasanga abenshi ntibabivugaho rumwe  bakurikije nuko bavuga ko Isiraheli kuba isa nk'itsikamira Palestine biragaragaza ko  kuyizana muri Afurika, itari n'igihigu cyo muri Afurika, ni ukuvuga ngo ntabwo yubahiriza uburenganzira bw'ikiremwamuntu, ntabwo yubahiriza ihame rya demokarasi, ni byinshi cyane bagenda barega.'

    Dr. Buchanan yakomeje agira ati 'Nibyo wenda bashingiraho bavuga ko hari itegeko yishe (Perezida wa AU). Kubera ko indorerezi iyo ufite ikibazo mu gihugu cyawe, tuvuge warahiritse ubutegetsi cyangwa se hari ikibazo cy'umutekano mucye, ntabwo bashobora kukwemerera kuba indorerezi kubera ko  hari amahame uba utujuje.'

    Ubusanzwe igihugu cya Isiraheli cyahoranye umwanya w'indorerezi muri AU ariko kiza kuwutakaza muri muri 2002, ubwo icyitwaga Umuryango w'Ubumwe bwa Afurika (OUA) cyasenyukaga, gisimburwa na Afurika yunze Ubumwe (AU).

    Tariki 22 Nyakanga 2021, ni bwo Ambasaderi wa Israel muri Ethiopia, Aleligne Admasu, yatanze ubusabe bw'igihugu cye bwo kongera kwinjira muri AU nk'indorerezi.

    Flash yabajije impuguke mubabanyi n'Amahanga icyo Afurika yunze Ubumwe yungukira  mu kugira Isiraheli mu muryango nk'indorerezi.

    Dr. Buchanan yagize ati 'Isi ni ubufatanye nicyo ibereyeho. Si no muri AU, no mu muryango mukuru tujya twumva wa UN, harimo naho ibihugu by'indorerezi. Na Palestine mujya mwumva buriya nayo iri muri biriya, Vatican nayo irimo. Nkumva rero atari muri Afurika bibaye  ahubwo no ku Isi hose  bigenda biba.'

    'Ariko  rero ikigaragara ni uko icyo gihugu  kiza kubana n'uwo muryango  kubera inyungu bagikuraho, kubera ibitekerezo n'ubunararibonye  icyo gihugu kiba gifite  kugira ngo gifashe iyo miryango  kiba kigiyemo.' Dr. Buchanan niwe ukomeza

    Abanditsi batandukanye bagaragaza ko Isiraheli isanzwe ifitanye umubano mu bya diplomasi n'ibihugu 46 bya Afurika, ndetse bikaba bifitanye ubufatanye mu nzego zitandukanye z'iterambere n'ubucuruzi.

    Kubw'ibyo hari abanga ibihugu bigize Afurika yunze Ubumwe bikwiye kwicarana bikaganira bikumva kimwe inyungu iri mu kugira Isiraheli mu muryango nk'indorerezi.

    Dr. Ismael Buchanan impuguke muri Politiki mpuzamahanga arakomeza abisobanura 'Bishobora guteza ikibazo kuko bishobora gucamo ibice ibihugu bigize Umuryango wa Afurika yunze Ubumwe. Ahubwo nibarebe ibiganiro byahaba  mu kumvisha ibi bihugu  inyungu Isiraheli  ifite atari inyungu y'Ibihugu bimwe mu muryango wa AU ku buryo byabangamira  ibindi bisigaye.'

    Dr. Buchanan akomeza agira ati' Ubwo rero bitangiye kugenda biba 7,8,9,10 bikazamuka, hari ikibazo bagomba kwicara bagacyemura nk'umuryango wa Afurika yunze Ubumwe. Batarebye inyungu za buri gihugu ahubwo barebye  inyungu rusange icyo Isiraheli  mu kuza muri AU icyo bivuze ku Banyafurika no ku mugabane wa Afurika.'

    Umubano wa Isiraheli na Afurika wakunze gukomwa mu nkkora n'agatotsi kakunze kuvuga mu mubano wayo n'ibihugu bya Afurika bituwe ahanini n'Abayisilamu benshi.

    Icyakora mu myaka yashize, Isiraheli yagiye ivugurura umubano wayo n'ibihugu bya Chad, Guinea, na Sudani kuri ubu byanamaze kwinjira mu masezerano yitiriwe 'Abraham Accords' mu mezi macye ashize, ndetse bitangaza ko byavuguruye umubano wabyo n'iki gihugu.

    Guha ikaze Isiraheli muri AU nk'indorerezi  bigaragzwa nkibizafasha impande zombi, mu gufatanya mu rugamba rwo guhangana n'icyorezo cya Covid-19, ndetse n'intambara z'iterabwoba zugarije umugabane wa Afurika.

    Daniel Hakizimana

    The post Afurika ishobora gucikamo ibice kubera Isiraheli appeared first on Flash Radio TV.

    Source : https://flash.rw/2021/08/10/afurika-ishobora-gucikamo-ibice-kubera-isiraheli/?utm_source=rss&utm_medium=rss&utm_campaign=afurika-ishobora-gucikamo-ibice-kubera-isiraheli

  • Nyamasheke: Hashize imyaka 7 batarahabwa ibyangombwa by'ubutaka basigiwe n'Abasekuruza #rwanda #RwOT

    Bamwe mu baturage bo mu mu Murenge wa Karambi mu karere ka Nyamasheke, baravuga ko ubuyobozi bw'aka Karere bwabimye ibyangombwa by'ubutaka basigiwe na besekuruza, Akarere ngo kabwita ubwako kandi babufitiye ibyangombwa byo hambere kuko kuva ku nzego z'Umudugudu kugera ku Murenge zemeza ko ari ubwabo.

    Ni abaturage 39 basanzwe batuye mu Kagari ka Kabuga, bavuga ko aya masambu bayarazwe na basekuru babo mu myaka yo mu gihe cy'ubwami bwa Rudahigwa (1957) ariko mu gihe cy'ibarura ry'ubutaka, bagahabwa ibyemezo byabwo kuva ku mudugudu kugera ku Murenge ariko bagera ku rwego rw'Akarere ntibabihabwe, imyaka irindwi ikaba yihiritse.

    Sarathiel Munyentama yagize ati 'Rudahigwa yapfuye muri 57 nararebaga icyo gihe, twari dutuye muri aya masambu nyuma baza kutubwira ngo tujye ku midugudu, maze duteraho amashyamba. None Akarere katwimye ibyangombwa.'

    Damien Nsengimana yunzemo ati 'Twashatse kugira ngo tugurishe ubutaka, tujya ku Kagari baradusinyira na njyanama kugera ku Murenge, tugeze ku Karere biradindira. Dutegereza ko baduha igisubizo turaheba.'

    Kubura ubu butaka ngo byabateje igihombo mu mibereho yabo ya buri munsi, bakaba basaba ko barenganurwa bagahabwa ibyangombwa by'ubutaka bwabo nk'uko Zacharie Ntamakiriro umwe muri bo abyemeza.

    Yagize ati 'Twarahingaga ishyamba tukiteza imbere, ndetse hari naho twari dufite ibiti bya kawa n'iby'imyumbati, ariko urumva ko twahombye cyane, kuko uruganda rwari rugiye kutugurira ariko tubura ibyangombwa.'

    Ubuyobozi bw'Akarere buvuga ko muri uriya Murenge hari ibibazo by'abaturage bagiye batwara ubutaka bwa Leta ariko ko aho bigaragaye ko umuturage afite ibyangombwa by'isambu ye yo mu gihe cy'amakomine, aza agahabwa icyemezo nk'uko byemezwa n'Umuyobozi w'Akarere ka Nyamasheke wungirije ushinzwe iterambere ry'ubukungu Ntaganira Josue Michael.

    Ati 'Benshi hariya bagiye biha ubutaka kandi ari ubutaka bwa Leta. Ariko abafite ibyemezo by'ubucyebe, ubucyebe bwatanzwe mu gihe cy'Amakomine, bazana ubwo bucyebe bwabo noneho tukabusuzuma. Hanyuma ubutaka bwabo burashakwa bakabusubizwa kuko ubundi buba bugihari.'

    Ubu butaka busaga hegitare 46 bwagize agaciro cyane ubwo uruganda rw'icyayi rwa Gatare Tea Company bwatangiraga kugura ubutaka bwo guteraho amashyamba n'ubuhinzi bw'icyayi, bukagurira abandi baturage bwagera kuri aba bugasanga nta byangombwa bafite, bukabagurira ibyo bahinzeho gusa birimo amashyamba n'ikawa.

     Sitio NDOLI

    The post Nyamasheke: Hashize imyaka 7 batarahabwa ibyangombwa by'ubutaka basigiwe n'Abasekuruza appeared first on Flash Radio TV.

    Source : https://flash.rw/2021/08/10/nyamasheke-hashize-imyaka-7-batarahabwa-ibyangombwa-byubutaka-basigiwe-na-basekuruza/?utm_source=rss&utm_medium=rss&utm_campaign=nyamasheke-hashize-imyaka-7-batarahabwa-ibyangombwa-byubutaka-basigiwe-na-basekuruza

  • Raporo ya LONI ijyanye n’igipimo cy’ubushyuhe ivuze iki ku Rwanda? #Rwanda #RwOT via @kigalitoday #rwanda #RwOT

    Iryo teganyagihe rishingiye ku kuba igipimo cy’ubushyuhe ku isi gishobora kurenga 1.5 cyangwa se 2 (degrees Celsius) mu kinyejana cya 21, keretse habayeho igabanuka rikomeye kandi ryihuse ry’ikoreshwa ry’ibyuka bihumanya ikirere mu myaka iri imbere.

    Ibyo ni ibivugwa muri Raporo ya LONI ku bijyanye n’imihindagurikire y’ikirere (UN Intergovernmental Panel on Climate Change ‘IPCC’).

    Mu masezerano ya isi yari yihaye intego yo kutazarenza igipimo cy’ubushyuhe ku isi cya 1.5 mu 2040 na 2 ‘degrees Celsius’ mu kinyejana cya 21.

    Muri iyo Raporo ya ‘IPCC’ bavuga ko iyo ntego itazashobora kuzagerwaho mu myaka 20 nk’uko ibihugu byari byiyemeje muri ayo masezerano y’i Paris, niba hatagize igikorwa byihuse mu bijyanye no kugabanya ibyuka bihumanya ikirere.

    Inzobere mu bijyanye n’ikirere zivuga ko igipimo cy’ubushyuhe ku isi nigikomeza kuzamuka, bizagira ingaruka no ku batuye mu Mijyi yo mu Rwanda, igashyuha cyane ndetse abayituye bakagira ingaruka ziterwa n’ubwo bushyuhe bukabije.

    Impuzandengo y’igipimo cy’ubushyuhe mu Rwanda igeze kuri 1.4 ‘Degrees Celsius’ guhera mu 1970, ibyo bivuze ko igipimo cy’ubushyuhe ku isi nikigera kuri 1.5 ‘degrees celsius’, bizagira ingaruka no ku gipimo cy’ubushyuhe mu Rwanda, hagashyuha cyane nk’uko bisobanurwa n’inzobere.

    Nk’ uko bivugwa na Karere Patrick, Umunyamabanga uhoraho muri Minisiteri y’ibidukikije, amakuru akubiye muri Raporo ya ‘IPCC’ yibutsa buri wese kugira icyo akora ku bijyanye n’imihindagurikire y’ikirere.

    Yagize ati “By’amahirwe, icyerekezo cy’u Rwanda cyo muri 2050 (vision 2050), harimo ibiteganyijwe gukorwa mu rwego rwo guhangana n’ imihindagurikire y’ ikirere. Ariko kubikora ku buryo bwihuse, ubu ni byo bikenewe kurushaho”.

    Yavuze ko intego u Rwanda rwihaye zizwi nka ‘Nationally Determined Contributions'(NDCs), ari zo zizafasha u Rwanda rugana k’ugukoresha ibintu bitangiza ikirere.

    Gahunda y’imyaka 10 u Rwanda rwihaye mu bijyanye no guhangana n’ingaruka z’imihindagurikire y’ikirere, harimo kugabanya ibyuka bihumanya ikirere bigera kuri Toni Miliyoni 4.6 bitarenze umwaka 2030.

    Kugira ngo u Rwanda rushobore gushyira mu bikorwa iyo gahunda rwihaye, rukanayishyikiriza LONI (United Nations Framework convention on Climate Change ‘UNFCC’), hakenewe Miliyari 11 z’Amadolari ya Amerika. Kugeza ubu, u Rwanda rumaze kubona agera kuri Miliyoni 216 z’Amadolari.

    Iyo Raporo ya 6 ku mihindagurikire y’ikirere, isohotse hasigaye igihe gito mbere y’uko inama ya LONI ku mihindagurikire y’ikirere iterana. Iyo nama iteganyijwe kubera mu Bwongereza ku itariki 31 Ukwakira kugeza ku itariki 12 Ugushyingo 2021.

    Tariki 9 Kanama 2021, Umunyamabanga Mukuru w’Umuryango w’Abibumbye, Antonio Guteres, yavuze ko gukwirakwiza ibyuka bihumanya ikirere ndetse no kwangiza amashyamba biri mu bihungabanya Isi, bigashyira ubuzima bw’abantu bagera kuri za Miliyari mu kaga.

    Yongeraho ko hakenewe kugira igikorwa mu buryo bwihuse, kugira ngo isi itagera ku gipimo cy’ubushyuhe cya 1.5 kuko ubu ngo kigeze kuri 1.2 ‘Degrees Celsius’. Ubu nihatagira igikorwa byihuse, ngo na 1.5 ‘Degrees Celsius’ izarenga mu gihe kiri imbere.

    source : https://ift.tt/2VH3LBo

  • Musanze: Abaturage barataka inkoni zikabije bari gukubitwa n'abayobozi babo #rwanda #RwOT

    Aba baturage bavuga ko bakubiswe by'indengakamere n'abo mu nzego z'ubuyobozi babaziza kutubahiriza amabwiriza yo kwirinda ikwirakwira rya COVID-19.

    Munyazikwiye Jean Nepomuscene wigisha muri G.S Muko wagaragaje inguma yatewe n'inkoni yakubiswe, avuga ko yahuye n'abakorerabushake yasinze, ubundi bakamuhata igiti ubu akaba afite inguma mu mugongo wose.

    Uretse uyu muturage, hari kandi uwitwa Uwimana Florence n'umugabo we Mbitezimana Léonard n'umwana wabo w'umukobwa bakubiswe by'indengakamere.

    Aba baturage bavuga ko barambiwe inkoni z'aba bayobozi kuko n'iyo umuntu yaba ari mu makosa yahanishwa ibindi bitarimo inkoni kuko ubusanzwe inkoni ivuna igufwa itavura ingeso.

    Murekatete Thriphose uyobora Umurenge wa Muko,yatangaje ko atumva impamvu abaturage bahohoterwa bene kariya kageni ariko ntibitabaze inzego zisumbuyeho ngo zibarenganure.

    Yagize ati 'Sinibaza uburyo yakubitwa ntaze ku buyobozi ngo tumufashe kurenganurwa kuko uretse na we n'undi wese wahohotewe araza tugakurikirana ikibazo byaba ngombwa ko tugishyikiriza RIB tukabikora ku buryo mba nkeka ko byaba bimaze igihe.'

    Uyu muyobozi avuga ko ikibazo cya bariya baturage bakubiswe, yakimenye ari mu kiruhuko gusa yizeza ko agiye kugikurikirana kandi ko uzagaragara ko yakoze amakosa muri bariya bayobozi, azabiryozwa.

    Source: Ukwezi

    Source : https://umuryango.rw/amakuru/mu-rwanda/umutekano/article/musanze-abaturage-barataka-inkoni-zikabije-bari-gukubitwa-n-abayobozi-babo

  • Lionel Messi yamaze kumvikana na PSG yamuhaye akayabo #rwanda #RwOT

    Kuwa Kane w'icyumweru gishize,nibwo FC Barcelona yatangaje ko itanduknye na Lionel Messi kubera amategeko ya La Liga.

    Lionel Messi ategerejwe i Paris uyu munsi kuza gushira umukono ku masezerano y'imyaka 2 akinira PSG aho azajya ahembwa umushahara wa Miliyoni 35 z'amayero buri mwaka.

    Lionel Messi yashakag kuguma muri FC Barcelona ndetse yari yemeye amasezerano y'imyaka 5 yari yahawe no kugabanya umushahara we kugera kuri 50%.

    Messi umaze gutwara Ballon d'Or esheshatu,yari afite amakipe abiri yamwifuzaga ariko yahisemo kwerekeza muri PSG gukinana na Neymar Jr.

    Amakuru aravuga ko Messi w'imyaka 34 arakora ikizamini cy'ubuzima uyu munsi I Paris,hanyuma ku munsi w'ejo yerekwe itangazamakuru.

    Messi abaye umukinnyi wa 4 werekeje muri PSG ku buntu muri iyi mpeshyi nyuma ya Gianluigi Donnarumma, Sergio Ramos na Georginio Wijnaldum.Aba biyongera kuri Achraf Hakimi waguzwe akayabo akuwe muri Inter Milan.

    Source : https://umuryango.rw/imyidagaduro/imikino/article/lionel-messi-yamaze-kumvikana-na-psg-yamuhaye-akayabo

  • Igihozo witabiriye irushanwa rya Miss Rwanda yarongowe (Amafoto) – YEGOB #rwanda #RwOT

    Igihozo Mireille witabiriye Miss Rwanda ndetse na Miss Career Africa mu 2019, yarushinze n'umukunzi we, Obey Gardens, bamaze igihe kinini bakundana.

    Uyu mukobwa w'imyaka 23 y'amavuko yakoze ubukwe mu mpera z'icyumweru cyashize n'umukunzi we w'igihe kirekire. Hari amakuru yizewe avuga ko uyu mukobwa yakoreye ubukwe muri Norvège aho amaze iminsi aba.

    Abinyujije kuri instagram ye, Igihozo yagaragaje ko yishimiye kuba yabaye umugore ashimira umugabo we.

    Ati 'Ndujujwe. Ndanyuze. Warakoze kungira umuntu ukunzwe, wishimirwa, witabwaho, uhabwa icyubahiro w'umunyamugisha nkaba umugenzi wagiriwe ubuntu ku mubumbe wose mwami wanjye.'

    Igihozo ubusanzwe yize Ubugenge, Imibare n'Ubumenyi bw'Isi muri Lycée Notre-Dame de Cîteaux. Igihozo afite impano nyinshi zitandukanye zirimo kuririmba, kumurika imideli, kuyobora inama, guhanga imyenda, kwandika ndetse no gufotora.

    Igihozo yitabiriye Miss Rwanda ndetse na Miss Career Africa mu 2019 ariko hombi ntiyagize amahirwe yo kwegukana ikamba.

    Dore uko byari bimeze mu mafoto:

     

    Source : https://yegob.rw/igihozo-witabiriye-irushanwa-rya-miss-rwanda-yarongowe-amafoto/

  • Dore uburyo 6 wamurikirwamo n’Itabaza (Ijambo ry’Imana)-Pst Habyarimana Desire #rwanda #RwOT

    “Ijambo ryawe ni itabaza ry’ibirenge byanjye, Ni umucyo umurikira inzira yanjye.” Zaburi 119:105

    Iri tabaza iyo rikumurikiye bwa mbere usobanukirwa ko uri umunyabyaha

    Urasobanukirwa ukagira agahinda gatera kwihana kuticuzwa. Kuva Adamu akoze icyaha kugeza uyu munsi umuntu ni umunyabya, ni mubi kuva kuri Adamu. Yesu yaje ari itabaza rimurikira abari mu mwijima. Yona igice cya mbere haravuga ngo 'Yaje ari umucyo, ariko umwijima ntiwabasha kwakira uwo mucyo. Ngo Yaje mu be ntibamwakira'. Ariko abamwemeye, abamwizeye, abamwiringiye, yabahaye imbaraga zibahindura kuba abana b’Imana.

    Muri Kristo Yesu ni ho honyine umuntu ashobora kumurikirwa, akamenya ko ari umunyabyaha. Iyo umuntu ataramurikirwa ngo amenye ububi bwe akubwira ko ari umwere kandi ubuzima ariho ntacyo butwaye! Ariko iyo yamurikiwe n’iri tabaza, asobanukirwa ko ari umunyabyaha.

    Kwezwa no guhiduka ku ngeso

    Kwakira Yesu nk’Umwami n’Umukiza, ntabwo bihagije. Abantu benshi barakijijwe ariko ntibarahinduka ku ngeso. Hari igihe idini ritubwira ko twera, rikatubwira ko turi abatagatifu, abapasiteri bo wagira ngo twungirije Imana! Ariko nagira ngo mbamenyeshe ko kwezwa biratureba twese, uhereye ku bashumba kugeza ku munyagice waje uwo munsi. Kuko umuririmbyi yararimbye ngo' Ngerageza uko nshoboye kwibuza inama mbi z’ibyaha nkajya mbyibonamo, aravuga ngo buri munsi jya umboneza. Ingeso za wa mubi zihora zishaka kubyuka uzirimbure uzice pe! Mpore nihariwe n’ibya Yesu.”Kwezwa nta muntu n’umwe bitareba.

    Iyo umuntu yinjiye mu nzira yo kwezwa no guhinduka, amenya ingeso ze zitari nziza akazibamba ku musaraba kugira ngo arusheho kugira umutima nk’uwari muri Kristo Yesu. Aha hantu naho, ujye ubwira Yesu uti'Umurikire n’ahatabona, aho umwijima uba, umpe umutima ukangutse uzinutswe ibyaha'.

    Gukira imvune zo mu mutima

    Yesu ntakiza ibyaha gusa, avura n’imvune zo mu mutima! Mu yindi mvugo tubyita ibyumba by’umwijima. Nzi abantu benshi biyanga kubera ubuzima baciyemo: Hari abantu bambara ibijipo bikubura ukagira ngo ni uko Umwuka wabibategetse, ari uko bamubwiye ko utuguru twe tumeze nk’uduti. Hari abantu banga uko bateye bitewe n’ibikomere bakuye mu miryango no muri sosiyete, bakabaho baremerewe. Uzarebe abarokore benshi bafite ibyishimo bike mu maso, ukibaza ko twageze aho Imana itangira ibyishimo kuki tutishima?

    Barakijijwe yego, ariko hari ibyumba by’umwijima, hari ibintu bagendana kubera amateka banyuzemo. Hari inkuru nziza ko Yesu adakiza ibyaha gusa, ahubwo yaje no kuvura imvune zo mu mutima.

    Kumenya ko waremewe gukora imirimo myiza muri Kristo Yesu

    Hari abantu benshi babaho batazi ko Imana yabaremeye gukora imirimo myiza muri Kristo Yesu. Akabaho ubuzima bwe akubanganya no kunywa no kurya, kurongorwa, kurongora, no kubaka inzu gusa, ntamenye ko turi abo Imana yaremye ituremeye imirimo myiza yose kandi muri Kristo Yesu. Hari umunsi tuzahagarara imbere y’Idacurwakibera, itubaze icyo yadutumye gukora mu isi niba twaragikoze!

    Niba udasobanukiwe icyo Iman ayakuremeye ngo unagikore, uzaba uhombye cyane kuko uwo munsi nugera imbere y’Imana uzabibazwa. Iyo iri tabaza(Ijambo ry’Imana) rikumurikiye uhita usobanukirwa icyo waremewe kandi Imana ikaguha imbaraga zo kugikra. Ese waba warasobanukiwe icyo Imana yakuremeye? Niba utaragisobanukirwa Imana iguhe ubwo buntu uzaba ugiriwe neza.

    Imana itumurikira idukura mu bibazo, itujyana mu bisubizo

    Urugero: Abisiraheli bamaze imyaka 430 muri Egiputa, umunsi umwe irababwira iti 'Igihe cy’umubabaro wanyu kirarangiye, muzamuke mu gihugu cy’isezerano! Kumanywa yababereye inking y’igicu, nijoro ikababera inking y’umuriro, irabamurikira kugeza mu gihugu cy’isezerano. Hari umunsi umwe Petero yaraye aroba ijoro ryose ntiyagira icyo afata, hanyuma umucyo w’Itabaza Umwana w’Imana, Yesu araza arababaza ngo 'Bana hari icyo kurya mufite?' Arababwira ngo nibakure urushundura ibumoso, berekeze iburyo bararoba. Bararoba ifi nyinshi!

    Bwari bwo bwa mbere barobye amafi angana nk’ayo barobye. Igitangaje iyi nyanja ya Garilaya kuva umunsi Yesu avuga ngo barobe kumanywa, baracyaroba kubera ijambo Yesu yavuze! Iyo tumurikiwe n’ijambo rya Kristo Yesu, Imana idukura mu bibazo.

    Kumurikirwa kudukura mu bujiji, kutujyana mu bwenge

    Murabizi ko kubaha Uwiteka aribwo bwenge, ariko hari ubundi bujiji tubitse mu buzima bwacu, Yesu iyo atumurikiye tubuvamo. Abaroma 12:2 haravuga ngo'

    Ntimwishushanye n’abikigihe nyamara muhinduke rwose', izindi Bibiliya ziravuga ngo ' Muhindure imyumvire'. Kera muntu yajyaga kubwiriza yitwa misiyoneri, ari pastieri atwaye Bibiliya. Ariko nitudahindura imyumvire, ntabwo pastieri bikigezweho, no kuba misiyoneri ntabwo bikigezweho ahubwo ikigezweho ni ukugenda witwa dogiteri ugiye kuvura, ugatwara ijambo ry’Imana.

    Ni ukugenda uri umwubatsi, ukagenda uri umu misiyoneri wo mu mutima, ni bwo bazakwakira. Muri iki gihe isi iri ku muvuduko uri hejuru, biradusaba guhindura imyumvire.

    Wareba hano iyi nyigisho yose

    [email protected]

    Source : https://agakiza.org/Dore-uburyo-6-wamurikirwamo-n-Itabaza-Ijambo-ry-Imana-Pst-Habyarimana-Desire.html