Webrwanda Backend

Author: webrwanda

  • Amasasu yavuze i Manhattan! umugabo yishe batanu barimo umupolisi amasaha yomurucyerera #rwanda #RwOT

    Mu gace ka Manhattan, Shane Tamura yakoze igitero gitunguranye mu rukerera akoresheje imbunda ya M4, yica abantu batanu, abandi barakomereka—impamvu y'ubwicanyi ikiri urujijo.

    Mu rukerera rwo kuri uyu wa Kabiri, tariki 29 Nyakanga 2025, mu Mujyi wa New York muri Leta Zunze Ubumwe za Amerika, haravugwa igikorwa cy'ubugizi bwa nabi cyahitanye ubuzima bw'abantu batanu, barimo n'umupolisi utari uri mu kazi, abandi benshi barakomereka.

    Iki gitero cyabereye mu gace ka Manhattan, ahari inyubako ikoreramo abantu batandukanye, ubwo umuntu witwaje imbunda yo mu bwoko bwa M4 yateye aho hantu, atangira kurasa abantu ku buryo butunguranye.

    Amakuru dukesha televiziyo mpuzamahanga France 24, avuga ko uwakoze icyo gitero ari Shane Tamura, waje kwiyahura nyuma yo gukora ubwo bwicanyi bw'indengakamere. Tamura yahise yirasa akoresheje iyo mbunda ye, ahita apfa ako kanya.

    Meya w'Umujyi wa New York, Eric Adams

    Meya w'Umujyi wa New York, Eric Adams, yahise agira icyo atangaza ku byabaye, yemeza ko uretse abishwe, hari n'abandi bantu benshi bakomeretse bikomeye, bajyanwa kwa muganga.

    Mu bishwe harimo umupolisi wari uri mu biruhuko, bivugwa ko atari mu kazi ubwo yicwaga, kimwe n'abandi bantu bane bari muri iyo nyubako.

    Kugeza ubu, inzego z'umutekano ziri gukurikirana icyo gikorwa cy'ubugizi bwa nabi, ariko impamvu zaba zarateye Shane Tamura gukora icyo gitero ntiziramenyekana.

    Ibi bibaye mu gihe muri Leta Zunze Ubumwe za Amerika ikibazo cy'ubwicanyi bukorwa hifashishijwe imbunda gikomeje gufata indi ntera. Guhera mu kwezi kwa Mutarama kugeza muri Kamena 2025, muri icyo gihugu hamaze kugaragara ibikorwa 205 by'ubugizi bwa nabi hifashishijwe imbunda, byahitanye abantu 198 naho abarenga 880 bagakomereka.

    Inzego z'umutekano n'ubuyobozi bwa Leta ya New York bakomeje gukora iperereza kuri iki kibazo, mu gihe abaturage basabwa gukomeza kuba maso no gutanga amakuru ku gihe mu gihe babonye ibimenyetso by'ibikorwa nk'ibi.

    Source : https://kasukumedia.com/amasasu-yavuze-i-manhattan-umugabo-yishe-batanu-barimo-umupolisi-amasaha-yomurucyerera/

  • Ibiro bishya by'Akarere ka Karongi ntibizubakwa uyu mwaka – #rwanda #RwOT

    Mu 2022 ni bwo ubuyobozi bw'aka Karere bwatangaje ko bugiye kubaka ibiro bishya by'Akarere ariko uyu mushinga uza guhagarara, kabone nubwo inyigo yari yararangije gukorwa ndetse n'ikibanza cyarateguwe.

    Mu kiganiro na IGIHE, Umuyobozi w'Akarere ka Karongi, Muzungu Gelard, yavuze ko impamvu umushinga wo kubaka ibiro bishya by'Akarere ka Karongi wahagaze ari uko aka karere kari katarabona ingengo y'imari.

    Ati 'Ni uyu munsi ntabwo ingengo y'imari iraboneka. Twabanje gushyira imbaraga mu gukemura ibibazo bibangamiye imibereho myiza y'abaturage. Twagize ibibazo by'ibiza ntabwo twakubaka ibiro bishya by'Akarere tutabanje kubakira abaturage cyane ko abakozi b'Akarere bafite aho bakorera'.

    Inyigo yari yateganyije ko ibiro bishya by'Akarere ka Karongi bizuzura bitwaye arenga miliyari 2,5Frw.

    Mu byo ibiro bishya by'Akarere ka Karongi byitezweho harimo no kongera ubwiza bw'Umujyi, aho ubuyobozi bw'aka karere bwari bwatangaje ko Karongi nk'Akarere k'ubukerarugendo gakwiye gutangira serivisi ahantu hasobanutse.

    Ibiro by’Akarere ka Karongi benshi bavuga ko bitakijyanye n’igihe

    Ikibanza kizubakamo ibiro bishya by’Akarere ka Karongi

    Uko ibiro bishya by’Akarere ka Karongi bizaba bimeze

    Source : http://igihe.com/amakuru/u-rwanda/article/ibiro-bishya-by-akarere-ka-karongi-ntibizubakwa-uyu-mwaka

  • 'Nyamabara' ya Okkama: EP imugaragaza uko atigeze amenyekana mbere. #rwanda #RwOT

    Izumvikanisha ibyo nshoboye abantu batazi — Okkama kuri EP ye yahurijeho abarimo Bull Dogg

    Umuhanzi Ossama Masut Khalid wamamaye nka Okkama uri mu bahanzi bakiri bato bari kuzamuka bafite icyerekezo mu muziki nyarwanda, yatangiye gusohora indirimbo zigize Extended Play (EP) yise 'Nyamabara', igizwe n'indirimbo umunani (8).

    Mu kiganiro na InyaRwanda, Okkama yavuze ko iyi EP igaruka ku rugendo rwe mu muziki n'ubuzima bwe bwa buri munsi, aho izagenda isohoka mu byiciro, buri ndirimbo ikazajya iherekezwa n'ibisobanuro byayo n'abafatanyabikorwa bayigizemo uruhare.

    Indirimbo ya mbere yasohotse mu ijoro ryo kuri uyu wa Mbere tariki 28 Nyakanga 2025, yayikoranye n'umuraperi Bull Dogg, umwe mu bantu bafite izina rikomeye mu njyana ya Hip Hop mu Rwanda.

    Bull Dogg

    Iyi ndirimbo yabaye intangiriro y'urugendo rwo gutanga EP mu buryo butandukanye n'uko abahanzi benshi basohora imishinga yabo.

    Okkama yumvikanisha ko gutangirira kuri Bull Dogg byashingiye cyane mu kuba yaramubereye urugero mu gutinyuka gukora ibirenze 'ibyo nari nsanzwe ndirimba'.

    Source : https://kasukumedia.com/nyamabara-ya-okkama-ep-imugaragaza-uko-atigeze-amenyekana-mbere/

  • Pep Guardiola yemeje ko nyuma yo gutoza Manchester City azahita asezera ubutoza #rwanda #RwOT

    Umutoza w'umunya-Espagne, Pep Guardiola, yatangaje ku mugaragaro ko ari hafi gusoza urugendo rwe nk'umutoza wabigize umwuga, avuga ko nyuma yo kuva muri Manchester City azahita asezera burundu ku mwuga wo gutoza. Ibi yabivuze mu kiganiro yagiranye na GQ España, aho yatangaje ko yamaze gufata uwo mwanzuro n'ubwo atazi neza igihe azamara muri City.

    Mu magambo ye bwite yagize ati: 'Ndabizi ko nyuma y'aka kazi muri City nzahita mpagarika gutoza, uko niko bimeze, umwanzuro narawufashe. Sinzi ngo nzamara igihe kingana gute, umwaka se, imyaka ibiri, itatu, itanu, icumi, cumi n'itanu ntabwo mbizi.' Aya magambo yatumye benshi mu bakunzi b'umupira w'amaguru batangira gutekereza ku hazaza h'uyu mugabo wagize uruhare rukomeye mu mpinduka za ruhago y'i Burayi.

    Pep Guardiola, w'imyaka 54, amaze imyaka 8 atoza Manchester City, kuva mu 2016 ubwo yasimburaga Manuel Pellegrini. Muri iyo myaka, yakoze amateka yihariye, atwara ibikombe 18 birimo 6 bya Premier League, 2 bya FA Cup, 4 bya Carabao Cup, 2 bya Community Shield ndetse na 1 cya UEFA Champions League.

    Ni umwe mu batoza bake babashije kwegukana treble mu mateka ya ruhago y'Abongereza mu mwaka wa 2023.

    Guardiola azwiho kuba umutoza uharanira gukinisha abakinnyi be umupira mwiza kandi ugezweho, wubakiye ku guhererekanya umupira, kwihuta no guhindura umukino mu buryo bushya.

    Abakinnyi benshi bavuga ko yababereye umubyeyi ndetse n'inararibonye yabahaye icyerekezo cy'umwuga. Kuri bamwe, asezeranye kureka gutoza bizasiga icyuho kinini mu mupira w'i Burayi.

    Bamwe mu bashyigikiye Guardiola bavuga ko niba koko yafashe umwanzuro, ari uburenganzira bwe nk'umuntu umaze gutanga byinshi mu mupira w'amaguru. Ariko hari n'abasanga igihe cye kitaragera, ko byaba byiza aretse iby bitekerezo byo kureka gutoza.

    Nubwo atatangaje igihe azasezerera ku mugaragaro, amagambo ye agaragaza ko ari mu rugendo rwo gutegura ishyingurwa ry'umwuga we nk'umutoza. Abakunzi ba Manchester City n'abakunzi ba ruhago muri rusange batangiye gutekereza ku bazamusimbura n'uko ikipe izahinduka nyuma y'igihe cye.

    Guardiola yaherukaga kuvuga amagambo nk'aya ubwo yari mu ikipe ya FC Barcelona, aho na bwo yavugaga ko umutoza akwiye igihe cyo kuruhuka kugira ngo yitekerezeho. Ubu noneho, asa nk'uwamaze gufata umwanzuro ntakuka.

    Pep Guardiola, w'imyaka 54, amaze imyaka 8 atoza Manchester City, kuva mu 2016 ubwo yasimburaga Manuel Pellegrini
    Bamwe mu bashyigikiye Guardiola bavuga ko niba koko yafashe umwanzuro, ntawe ugomba kumuvuguruza
    Umutoza w'umunya-Espagne, Pep Guardiola, yatangaje ku mugaragaro ko ari hafi gusoza urugendo rwe nk'umutoza wabigize umwuga

    Source : https://kasukumedia.com/pep-guardiola-yemeje-ko-nyuma-yo-gutoza-manchester-city-azahita-asezera-ubutoza/

  • Minisiteri ya Siporo yahakanye amakuru y'iseswa ry'amatora ya FERWAFA y'uzayiyobora mu myaka ine iri imbere #rwanda #RwOT

    Minisiteri ya Siporo yahakanye amakuru y'iseswa ry'amatora y'uzayobora Ishyirahamwe ry'Umupira w'Amaguru mu Rwanda (FERWAFA) mu gihe cy'imyaka ine iri imbere, Iyi Minisiteri ivuga ko ayo makuru ari ibihuha ko nta shingiro afite.

    Ibi kandi byakurikiwe n'itangazo ry'ishyirahamwe ry'umupira w'Amaguru mu Rwanda, FERWAFA ryemeza ko amatora azakomeza nk'uko byari byateganyijwe.

    FERWAFA yatangaje ko amatora y'ubuyobozi ateganyijwe ku itariki ya 30 Kanama 2025 azakomeza uko byari byemejwe, nyuma y'amakuru yakwirakwiye ku mbuga nkoranyambaga yavugaga ko Minisiteri ya Siporo yaba yasabye guhagarika ayo matora.

    Mu itangazo ryasohowe kuri uyu wa Mbere, FERWAFA yemeje ko ayo makuru ari ibihuha, yizeza abanyamuryango ko gahunda yose y'amatora izakurikizwa nk'uko byari byateganijwe, ikazabera mu Nteko Rusange Isanzwe ya FERWAFA.

    FERWAFA iti 'Iyi nkuru siyo, amatora azakomeza nk'uko byari byateganyijwe,'.

    Na Minisiteri ya Siporo yanyomoje ayo makuru, itangaza ko amatora atigeze ahagarikwa. Mu butumwa bwayo bwatangajwe, Minisiteri yagize iti: 

    'Minisiteri ya Siporo ntiyigeze ihagarika amatora ya Komite Nyobozi ya FERWAFA. Aya ni amakuru y'ibihuha adakwiriye guhabwa agaciro.'

    Mu gihe Komisiyo y'Amatora yashyiraga ahagaragara urutonde rw'agateganyo rw'abakandida bujuje ibisabwa, Komite yari iyobowe na Hunde Walter wari wiyemeje guhatana ku mwanya wa Perezida wa FERWAFA, ntabwo we yosanze ku rutonde rw'abemerewe kwiyamamaza.

    Impamvu nyamukuru yatumye Hunde Walter n'itsinda rye batemererwa kwiyamamaza, ni uko batujuje ibisabwa n'amategeko agenga amatora ya FERWAFA nk'uko Komisiyo y'Amatora yabitangaje.

    Urutonde rw'Abakandida Bemerewe Kwiyamamaza

    Perezida (uyoboye urutonde):

    • SHEMA NGOGA Fabrice

    Abari ku rutonde rwa Perezida:

    • Me GASARABWE Claudine — Visi Perezida wa mbere ushinzwe ubutegetsi n'imari

    • MUGISHA Richard — Visi Perezida wa kabiri ushinzwe tekiniki

    • NSHUTI Thierry — Komiseri ushinzwe imari

    Abakandida ku yindi myanya:

    • NIKITA GICANDA Vervelde — Komiseri ushinzwe umupira w'abagore

    • NIYITANGA Désiré — Komiseri ushinzwe gutegura amarushanwa ya FERWAFA

    • KANAMUGIRE Fidèle — Komiseri ushinzwe tekiniki n'iterambere ry'umupira

    • NDENGEYINGOMA Louise — Komiseri ushinzwe amategeko n'imiyoborere

    • Dr. GATSINZI Herbert — Komiseri ushinzwe ubuvuzi.

    FERWAFA yatangaje ko abatanyuzwe n'imyanzuro ya Komisiyo y'Amatora ku rutonde rw'agateganyo bemerewe kujurira hagati ya 30 Nyakanga na 4 Kanama 2025, nk'uko bikubiye mu ngengabihe y'amatora.

    Iri tangazo ryashyizweho umukono na Perezida wa Komisiyo y'Amatora, RUGERA Jean Claude, risoza ryemeza ko amatora azakomeza nk'uko byari byateganyijwe kandi ko uru rutonde rw'abakandida rwemewe.

    The post Minisiteri ya Siporo yahakanye amakuru y'iseswa ry'amatora ya FERWAFA y'uzayiyobora mu myaka ine iri imbere appeared first on RUSHYASHYA.

    Source : https://rushyashya.net/minisiteri-ya-siporo-yahakanye-amakuru-yiseswa-ryamatora-ya-ferwafa-yuzayiyobora-mu-myaka-ine-iri-imbere/?utm_source=rss&utm_medium=rss&utm_campaign=minisiteri-ya-siporo-yahakanye-amakuru-yiseswa-ryamatora-ya-ferwafa-yuzayiyobora-mu-myaka-ine-iri-imbere

  • Abarimo Minisitiri Habimana na Dr. Arakwiye bakoze ihererekanyabubasha – #rwanda #RwOT

    Minisitiri Habimana na mugenzi we Arakwiye ni bo ba Minisitiri bashya bagaragaye muri Guverinoma nshya yashyizweho ku wa 24 Nyakanga 2025 na Perezida Kagame.

    Uretse abaminisitiri bashya, hagaragaye n'Abanyamabanga bashya barimo na Jean de Dieu Uwihanganye wagizwe Umunyamabanga wa Leta ushinzwe Ibikorwaremezo asimbuye Olivier Kabera wari umaze hafi umwaka kuri uyu mwanya.

    Umuhango wo guhererekanya ububasha hagati y'aba bayobozi bashya n'ababasimbuye wabaye ku wa 28 Nyakanga 2025.

    Nyuma yo gushyirwaho, Minisitiri Habimana yavuze ko agiye kongera imbaraga mu kwimakaza imibereho myiza no kubakira ku musingi uhamye w'ibyagezweho.

    Yagize ati 'Ni ikintu twakiriye neza kandi twiteguye gukora uko dushoboye kugira ngo turusheho gushyira imbaraga no kwimakaza imiyoborere myiza.'

    Minisitiri Habimana yavuze ko nyuma y'imyaka 31 Jenoside yakorewe Abatutsi ihagaritswe, hamaze kubakwa umusingi ufatika mu bijyanye n'imiyoborere y'u Rwanda bigizwemo uruhare na Perezida Kagame, we akaba aje gukomeza icyerekezo cy'u Rwanda.

    Ati “Icyo abantu bagomba kunyitegaho ni ugukorana n'abo nsanze, twimakaze imiyoborere myiza dushyire umuturage ku isonga, abone serivisi zimwegereye kandi nziza. Ibibazo by'abaturage bikemurwe vuba bishoboka kandi neza ndetse serivisi zituma umuturage abasha kwihuta mu iterambere zimugereho neza ariko kandi ahawe uruhare mu kubishyira mu bikorwa.”

    Dr. Mugenzi amaze kumenya ko yasimbujwe na we yashimiye Perezida Kagame wamugiriye icyizere mu mezi umunani yari amaze muri Minisiteri y'Ubutegetsi bw'Igihugu.

    Icyo gihe yarakomeje ati “Nabigiyeho byinshi kandi ndacyaharanira gukorera u Rwanda n'Abanyarwanda.'

    Dr. Arakwiye yavuze ko yishimiye cyane icyizere yagiriwe na Perezida Kagame wamugize Minisitiri w'Ibidukikije, arakomeza ati 'Niteguye gutanga umusanzu wanjye mu guteza imbere gahunda z'u Rwanda zijyanye n'ibidukikije. Imana ibimfashemo.'

    Dr. Uwamariya yavuze ko atabona amagambo ashimira Umukuru w'Igihugu mu buryo bukwiye, ati ' Kuba muri Guverinoma muyoboye byanyigishije byinshi kandi bizakomeza kumbera impamba.'

    Minisitiri Habimana yari asanzwe ari Umunyamabanga Mukuru w'Ishyirahamwe rihuza Inzego z'Ibanze n'Umujyi wa Kigali (RALGA) kuva muri Kamena 2024.

    Mbere yo kujya muri RALGA, yakoreye mu Ikigo cy'Abasuwisi gishinzwe Iterambere n'Imikoranire mu gihe cy'imyaka itandatu, kuva mu 2018.

    Kuva mu 2013 kugeza mu 2015, yakoze mu kigo GIZ cy'Abadage, nk'impuguke ishinzwe uruhare rw'umuturage mu bimukorerwa, aho yari ashinzwe gukorana n'imiryango itari iya Leta, gutanga ubujyanama ku bafatanyabikorwa no guhanga udushya.

    Kuva mu 2016 kugeza mu 2018 yakoze muri GIZ Rwanda nk'Umujyanama Mukuru mu bijyanye n'imiyoborere ishingiye ku muturage n'ahandi.

    Afite impamyabumenyi y'icyiciro cya gatatu cya kaminuza mu bijyanye n'iterambere yakuye muri Kaminuza y'u Rwanda n'indi mu bijyanye no gukemura amakimbirane yakuye muri Geneva Graduate Institute mu Busuwisi.

    Ni mu gihe Minisitiri Dr. Arakwiye yari amaze imyaka icyenda akorera muri World Resource Institute (WRI), ikigo mpuzamahanga gishinzwe kubungabunga ibidukikije.

    Kuva mu 2023 yari umuyobozi muri WRI ushinzwe imishinga yo kuzahura ubutaka bwangiritse muri Afurika.

    Mbere yo kujya muri WRI, yakoze ubushakashatsi butandukanye ku miterere y'ubutaka bwo muri Afurika, akorana n'ikigo Conservation International kibungabunga ibidukikije muri Amerika n'izindi nshingano.

    Uwihanganye Jean de Dieu yagizwe Umunyamabanga wa Leta ushinzwe Ibikorwaremezo muri Minisiteri y'Ibikorwaremezo, yari asanzwe ari Ambasaderi w'u Rwanda muri Singapore, inshingano yahawe ku wa 15 Nyakanga 2019.

    Mbere yaho yari Umunyamabanga wa Leta ushinzwe Ubwikorezi muri Minisiteri y'Ibikorwaremezo kuva ku wa 30 Kanama 2017. Hari hashize imyaka mike ari Umuyobozi mu Kigo gikora iby'Ubwubatsi, NPD-COTRACO, ashinzwe gutegura Imishinga n'Iterambere.

    Minisitiri Habimana (ibumoso) nyuma yo guhererekanya ububasha na Dr. Mugenzi asimbuye

    Abakozi ba Minisiteri y’Ubutegetsi bw’Igihugu basezeye kuri Dr. Mugenzi bari bamaranye amezi umunani

    Dr. Bernadette Arakwiye (iburyo) yinjiye mu kazi nyuma yo guhererekanya ububasha na Dr. Valentine Uwamariya muri Minisiteri y'Ibidukikije

    Abakozi ba Minisiteri y’Ibidukikije basezeye kuri Dr. Uwamariya wari umaze hafi umwaka abayoboye

    Jean de Dieu Uwihanganye wagizwe Umunyamabanga wa Leta ushinzwe Ibikorwaremezo (ibumoso) yahererekanyije ububasha na Olivier Kabera asimbuye

    Minisitiri w’Ibikorwaremezo, Dr. Jimmy Gasore (ibumoso) yashimiye Olivier Kabera wari Umunyamabanga wa Leta ushinzwe Ibikorwaremezo, aha ikaze Jean de Dieu Uwihanganye wamusimbuye

    Abo muri Minisiteri y’Ibikorwaremezo basezeye kuri Olivier Kabera wari Umunyamabanga wa Leta ushinzwe ibikorwaremezo baha ikaze Jean de Dieu Uwihanganye wamusimbuye

    Source : http://igihe.com/amakuru/u-rwanda/article/minisitiri-habimana-na-dr-arakwiye-binjiye-mu-kazi

  • Perezida Kagame yashimye umuhate wa Aliko Dangote mu guteza imbere Afurika – #rwanda #RwOT

    Umusanzu wa Dangote mu iterambere rya Afurika wagarutsweho na Perezida Kagame ku mugoroba wo kuri uyu wa Mbere, ubwo bombi bahuriraga mu gikorwa cyo gutaha inyubako yagenewe ibikorwa by'imyidagaduro n'imikino izwi nka 'Zaria Courts.'

    Iyi nyubako yuzuye mu Mujyi wa Kigali yubatswe na Masai Ujiri ufite izina rikomeye mu mukino wa Basketball ku Isi, aho yamenyekanye cyane ubwo yari Perezida wa Toronto Raptors.

    Nyuma yo gutaha Zaria Courts, Perezida Kagame yagejeje ikiganiro ku bitabiriye uyu muhango, cyagarutse ku ngingo zitandukanye. Cyayobowe na Masai Ujiri.

    Perezida Kagame yavuze ko ashima by'umwihariko Aliko Dangote kuba ari mu Rwanda ndetse yitabiriye uyu muhango.

    Ati “Ndashaka gushima kuba Aliko Dangote ari hano.”

    Yakomeje avuga ko kimwe mu byo ashima ari igitekerezo cya 'Africa Renaissance' cyongerewe imbaraga n'uyu mukire, agamije guharanira iterambere rya Afurika.

    Iki gitekerezo si gishya kuko cyavutse hagati mu kinyejana cya 20 bigizwemo uruhare n'umuhanga mu mateka ukomoka muri Senegal, Cheikh Anta Diop nyuma kiza kwamamazwa cyane na Thabo Mbeki wayoboye Afurika y'Epfo.

    Ni igitekerezo cyagutse kigamije guhindura amateka y'Umugabane wa Afurika ukaba ahantu hari iterambere, imibereho myiza, aho kumenyekana nk'ahantu haba urugomo, ruswa n'ubukene.

    Kuri ubu Dangote yihaye intego yo kubyutsa iki gitekerezo ndetse muri Nzeri 2024 yateguye icyiswe 'African Renaissance Retreat', umwiherero wahurije i Kigali abagera kuri 40 bafite ijambo ku Mugabane wa Afurika. Wari ugamije kurebera hamwe uko amateka mabi ya Afurika yahinduka.

    Muri uyu muhango, Perezida Kagame yashimye uyu muhate wa Dangote.

    Ati “Ari inyuma y'icyo gitekerezo, nashakaga kugaragaza ko bamwe muri twe twishimira gukorana nawe n'abandi bayobozi, hari inama bakoreye hano i Kigali, hari n'izindi nama nyinshi zizaba, wakoze cyane Alhaji Aliko Dangote ku bw'ibyo.”

    Aliko Dangote afite umutungo ubarirwa muri miliyari 28$. Ni umwe mu bakize muri Afurika.

    Afite ibigo n'inganda bitandukanye birimo Dangote Cement Plc ikora sima, Dangote Sugar Refinery Plc ikora isukari, Dangote Refinery & Petrochemicals itunganya ibikomoka kuri peteroli na Dangote Fertilizer ikora ifumbire mvaruganda.

    Mu 2024 ubwo yari yitabiriye inama ya CEO Africa yabereye i Kigali, Dangote yagaragaje ko Afurika ifite byose bisabwa kugira ngo igere ku iterambere rihambaye, kandi ko mu gihe Abanyafurika bakora ishoramari kuri uyu Mugabane biboroheye, bashobora gukoresha amahirwe yose ahari, bakayifasha kugera kuri iki cyerekezo.

    Uyu mushoramari yasobanuriye abitabiriye iyi nama ko yiyemeje gushora imbaraga ze zose kugira ngo yifatanye n'abandi Banyafurika guteza imbere uyu Mugabane.

    Yagize ati 'Dufite ibisabwa byose kugira ngo Afurika ikomere kandi ntekereza ko ari yo mpamvu ntari gushoramo amafaranga gusa, ahubwo ndi gushoramo n'ubugingo n'ubuzima bwanjye kugira ngo Afurika ikomere. Afurika ni nk'ikarita iharurwa. Utayiharuye, ntabwo wamenya umubare wanditseho kugira ngo uyikoreshe.”

    Mu rwego rwo gushaka ibisubizo by'ibibazo Afurika ifite, Dangote yatangaje ko mu myaka irindwi ishize Dangote Group yashoye miliyari 25 z'amadolari mu nganda zayo zitunganya ifumbire, ibikomoka kuri peteroli na sima.

    Yagize ati 'Mu myaka irindwi ishize, twashoye miliyari 25 z'amadolari kugira ngo Afurika igire ifumbire ihagije, mu bikomoka kuri peteroli, mu gutunganya ibikoresho no kwagura ishoramari ryacu rya sima.'

    Perezida Kagame yashimye umuhate w'umukire Dangote (uri iburyo bwe) mu guteza imbere Afurika

    Source : http://igihe.com/amakuru/u-rwanda/article/perezida-kagame-yashimye-umuhate-w-umukire-dangote-mu-guteza-imbere-afurika

  • Ubuhamya: Uko Abarundi bahungiye i Butare benyegeje urwango ku Batutsi, bijandika no muri Jenoside – #rwanda #RwOT

    Impunzi z'Abarundi zari zarahungiye mu Karere ka Huye ku musozi wa Kabutare, kuva mu 1972 zakomeje gukongeza urwango kugeza mu 1994 ubwo zijanditse muri Jenoside yakorewe Abatutsi.

    Abatangabuhamya batifuje ko amazina yabo atangazwa bagaragaje ko amateka atangirira mu 1972 ubwo mu Burundi habaga ubwicanyi bwibasiye abo mu bwoko bw'Abahutu, abahungiye mu Rwanda barimo n'abahungiye ku Kabutare, barimo abigaga mu mashuri yisumbuye bahungishijwe n'Abafere b'Urukundo bakomereza amashuri yabo kuri G.S Officiel de Butare na EAV Kabutare kugeza barangije ndetse batangira no kuhakora.

    Uwaduhaye amakuru wanabonye impunzi z'Abarundi ziga muri aya mashuri kugeza mu 1978, yavuze ko bari barirunduriyemo ingengabitekerezo y'urwango bahita bisanisha na PARMEHUTU yakoreraga mu Rwanda ndetse banayiyumvamo.

    Mu 1990 ubwo Inkotanyi zatangiraga urugamba rwo kubohora igihugu, Abarundi babaga ku Kabutare barimo benshi bigishaga muri G.S.Officiel de Butare bari mu bakomezaga kubiba urwango bakanabigaragaza mu kabari kitwaga Corbillar, bakishimira kubona Abatutsi bitwaga ibyitso bafatwa, n'ibindi.

    Mu 1993, Perezida w'u Burundi Ndadaye Melchior amaze gutsinda amatora amatora, impunzi z'Abarundi zarishimye zivuza ingoma ziyobowe n'abarimu barimo Nzorubara Mathias na Wagara Melchior.

    Urupfu rwa Ndadaye mu Ukwakira 1993 rwagize ingaruka no ku Batutsi babaga mu Rwanda, aho abo Barundi bagize uburakari bakajya bacunaguza abaturanyi babo ndetse batangira kwigwizaho intwaro.

    Uyu mutangabuhamya yavuze ko mu nkundura y'amashyaka menshi mu Rwanda, wabonaga n'Abarundi barafashe uruhande, bashyigikiye amashyaka y'abateguraga Jenoside.

    Ati 'Gahunda ya 'Hutu power' wabonaga Abarundi bayumva cyane kandi bayishyigikiye, bitandukanye n'abandi banyamahanga.'

    Jenoside itangiye abandi banyamahanga bazinze utwangushye burira indege barataha ariko , Abarundi bo barasigara

    Uyu mutangabuhamya yavuze ko mu gihe cya Jenoside impunzi z'Abarundi zirimo izatangiye kujya kuri za bariyeri zinafite imbunda nshya zishakiye, abaturage bagatangazwa no kubona batazakwa kandi ari abanyamahanga b'abasivili.

    Ku wa 8 no ku wa 9 Mata 1994, Leta yacyuye abanyamahanga babaga i Butare ariko Abarundi barahaguma.

    Ati ''Ku wa 9 Mata twabonye abanyamahanga bose barimo n'Abazayirwa (AbanyeCongo b'ubu) batahanwa n'amabisi ya Leta kandi bari basanzwe ari abantu nkatwe, dutangira kubona ko ari ibintu bidasanzwe, ariko kandi tubona Abarundi bo bagumye aho.''

    Ku wa 20 Mata 1994, ubwo Jenoside yatangiraga i Huye, Abarundi bihutiye kujya kuri za bariyeri, ndetse ku wa 22 Mata ubwo hatangwaga intwaro kuri Sitade Kamena, bikozwe na Burugumesitiri Kanyabashi, Dr. Rwamucyo n'abandi n'abo Barundi bari bahari banafite intwaro zabo.

    Aha banahatangirije ubwicanyi umugore w'Umututsikazi yakubitiwe umutwe muri Sitade Kamena, ubwonko buca mu mazuru, ahita apfa.

    Ati ''Abarundi bari basanganywe inararibonye mu bugome kuko n'iyo bafataga igisambo mu gace ka Kabutare ni bo bazanaga udushya two kukibabaza. Uretse kugikubita, wabonaga bazanye nk'urusenda rwo gusuka mu bisebe by'igisambo ngo kirusheho kubabara, ukibaza aho bakuye ubwo bugome.''

    Uyu mutangabuhamya yavuze ko impunzi z'Abarundi zagize uruhare mu bwicanyi bwakozwe hagati ya 21 na 29 Mata 1994, muri G.S. Officel de Butare, EAV Kabutare ahari hahungiye abanyeshuri bavuye muri GS de la Salle i Byumba n'ahitwaga muri Home Uruyange.

    Impunzi z'Abarundi zizwi cyane zishe Abatutsi harimo Wagara, Ntibatingeso Severin, Mathias, Jean Marie, Majoro Albert wari ushinzwe siporo muri GSOB.

    Uwatanze amakuru yibuka uburyo hari abakobwa bakuwe muri Home Uruyange mu ntangiriro za Gicurasi 1994 bashyirwa hanze mu kibuga, bagafatwa ku ngufu n'abagabo bahagarikiwe n'abagore babo bari bariyise abapawakazi, nyuma bakwicwa.

    Mu bandi Barundi bagize uruhare muri Jenoside harimo n'ababaga i Save, batijwe umurindi n'ababaga ku Kabutare.

    Umusozi wa Kabutare (ubu isigaye ari izina ry'umudugudu), udatuweho n'imiryango myinshi cyane kuko igice kinini cyawo kigizwe n'ibigo bitandukanye, ariko bigaragara ko mu gihe cya Jenoside hari hatuye imiryango y'Abarundi ibarirwa muri 20.

    Bivugwa ko ku Kabutare haguye abantu benshi cyane, bikaninyongeraho ko ari ho abicanyi bo mu mujyi wa Butare bajyaga kujugunya abishwe.

    Abatangabuhamya bababazwa no kuba amakuru yaratanzwe mu gihe cy'Inkiko Gacaca ariko abavuzwemo bose batigeze babiryozwa, nyamara bamwe bagiye no mu nshingano z'ubuyobozi mu Burundi, mu gihe abiciwe ababo bo bagitakamba basaba ubutabera.

    Ishuri ry’imyuga riri ahahoze Home Uruyange, ryiciwemo abakobwa b’Abatutsikazi babanje gusambanywa n’abarimo Abarundi

    Ishyamba rya Kabutare ryajungunywemo imibiri y’Abatutsi myinshi yakurwaga hirya no hino mu Mujyi wa Butare

    Ahazwi nko kuri Procure ya Diyosezi Gatolika ya Butare na ho hiciwe Abatutsi bigizwemo uruhare n’Abarundi bigishaga muri GSOB

    Source : http://igihe.com/amakuru/u-rwanda/article/abarundi-bahungiye-i-butare-benyegeje-urwango-ku-batutsi-kugeza-bakoze-jenoside

  • Trump yiyise umucunguzi mu kibazo cy'u Rwanda na RDC – #rwanda #RwOT

    Perezida Trump ari mu rugendo muri Ecosse aho yagiranye ibiganiro n'abarimo Minisitiri w'Intebe w'u Bwongereza, Keir Starmer.

    Ubwo baganiraga n'itangazamakuru, Perezida Trump yavuze ko yagize uruhare mu guhagarika intambara esheshatu.

    Ku kibazo cy'u Rwanda na RDC, Perezida Trump yavuze ko gukemura ikibazo kiri hagati y'ibihugu byombi byaturutse ahanini ku ruhare rwe.

    Ati 'Iyo ntinjira mu buhuza, ntabwo ibihugu byombi [byari kwinjira mu biganiro bigamije gushaka amahoro], nta n'ubwo batekerezaga uburyo bwo kumvikana. Byari ibintu bikomeza kubaho kandi nta muntu wari kujya muri ibyo bice kuko yari kwicwa.'

    Uyu muyobozi yakomeje avuga ko kimwe mu byamufashije gukemura ibibazo by'intambara harimo n'ikijyanye n'uko ibihugu byombi byifuzaga gukorana ubucuruzi na Amerika.

    Ati 'Bakunda Trump, barifuza gukorana ubucuruzi na Trump, barifuza ko tugura umutungo kamere wabo, barashaka kuduha umutungo kamere wabo.'

    Perezida Trump yavuze ko nyuma yo kumenya iby'iki kibazo, yafashe icyemezo cyo guhamagara bagenzi be, baganira ku buryo bwo gukemura ibibazo biri hagati y'ibihugu byombi.

    Ati 'Nari mbazi mu buryo buziguye, ndabahamagara ndababwira nti 'mureke turangize intambara. Nta kintu kindi nshaka iyi ntambara igikomeje.''
    Yaboneyeho kwibutsa ko mu minsi mike iri imbere azahura n'abayobozi b'ibihugu byombi, mu ruzinduko bazagirira muri Amerika.

    Ati 'None ubu twarangije intambara, nk'uko mubizi ba Minisitiri b'Ububanyi n'Amahanga [b'u Rwanda na RDC] baje hano mu bihe bishize ndetse na ba Perezida b'u Rwanda na Repubulika Iharanira Demokarasi ya Congo bagiye kuza [muri Amerika] mu bihe biri imbere.'

    Ku wa 27 Kamena, u Rwanda na Repubulika Iharanira Demokarasi ya Congo byashyize umukono ku masezerano y'amahoro, hagamijwe gushakira umuti ikibazo cy'umutekano muke umaze igihe mu Burasirazuba bwa RDC.

    Icyo gihe, Minisitiri w'Ububanyi n'Amahanga w'u Rwanda, Ambasaderi Olivier Nduhungirehe, yikije ku kibazo cya FDLR mbere yo kuyashyiraho umukono.

    Iki kibazo kiri mu bigomba kubanza gukemurwa aho RDC igomba gusenya umutwe w'iterabwoba wa FDLR, u Rwanda rukabona gukuraho ingamba z'ubwirinzi rwashyizeho.

    Mu masezerano yasinyiwe i Washington, impande zombi zashyigikiye ibiganiro hagati y'Ihuriro AFC/M23 na Leta ya RDC biri kubera i Doha muri Qatar.

    Muri ibyo biganiro, amahame yashyizweho umukono hagati y'impande zombi, hagaragajwe ko yuzuzanya n'amasezerano yasinyiwe i Washington.

    Mu gihe ibintu byose byaba biri ku murongo, byitezwe ko abakuru b'ibihugu by'u Rwanda na RDC bazahurira i Washington bagashyira umukono ku masezerano agamije amahoro.

    Perezida Kagame na Perezida Tshisekedi bagiye guhurira muri Leta Zunze Ubumwe za Amerika nyuma yo guhurira i Doha muri Qatar

    Source : http://igihe.com/amakuru/u-rwanda/article/trump-yavuze-ko-u-rwanda-na-rdc-bitari-kwinjira-mu-biganiro-atabigizemo-uruhare

  • Urwego rwagaragayemo imicungire mibi y'imari rushobora kuyikosora ntirwitabe Inteko? – #rwanda #RwOT

    Mu kiganiro yagiranye na Televiziyo y'Igihugu muri Gicurasi 2025, Kamuhire yavuze ko Umugenzuzi Mukuru w'Imari ya Leta yibanda ku ngingo eshatu harimo ibyerekeye kuzuza ibitabo by'ibaruramari, kubahiriza amategeko n'imikoreshereze y'umutungo wa Leta.

    Kuri buri ngingo hatangwa amanota ari mu byiciro bitatu harimo nta makemwa, byakwihanganirwa na biragayitse.

    Kamuhire yavuze ko mu gukora ubugenzuzi haba hari amezi abiri ibigo n'inzego bigenzurwa bihabwa amahirwe yo gukosora amakosa ashoboka yagaragaye mbere yo gukorerwa raporo.

    Yagaragaje ko icyiciro gikunze kubonekamo amakosa akosorwa mbere raporo igatangazwa ari nta makemwa ari icyo kuzuza ibitabo by'ibaruramari.

    Ati 'Iyo tugiye gukora igenzura ahenshi dusanga hari ibyo bagomba gukosora. Turababwira tuti 'hari ibyo mugomba gukosora, nimubikosore nonaha tutarasinya raporo yanyu'.'

    'Baragenda bakajya muri Minisiteri y'Imari n'Igenamigambi bakabafasha gufungura 'system' ya IFMIS bakabitunganya bakabitugarurira. Iyo tubonye babikoze neza nk'uko twabivuze turabyemera ubwo bikaba bibaye nta makemwa.'

    Kamuhire yagaraje ko icyiciro kijyanye no gukurikiza amategeko cyo iyo kigaragayemo amakosa kuyakosora bidashoboka uretse gutegereza mu igenzura ry'umwaka ukurikiraho kuko itegeko nyine riba ritarubahirijwe byararangiye.

    Hari kandi n'imwe mu mishinga n'imikoreshereze y'umutungo iyo igaragayemo amakosa bigoye ko yakosoka muri icyo gihe cy'amezi abiri mbere yo gukora iyo raporo ngo ishyikirizwe Inteko Ishinga Amategeko.

    Ati 'Niba dusanze igikoresho cyaguzwe kidakoreshwa cyangwa umushinga waradindiye, guhita ubikosora muri ayo mezi abiri turi aho ngaho ntabwo bihita bikunda.'

    Perezida wa Komisiyo Ishinzwe Gukurikirana Imikoreshereze y'Imari n'Umutungo by'Igihugu mu Nteko Ishinga Amategeko (PAC), Muhakwa Valens yavuze ko nyuma yo kwakira raporo y'Umugenzuzi Mukuru w'Imari ya Leta abadafite nta makemwa bose bakwa ibisobanuro.

    Muhakwa yagaragaje ko inzego n'ibigo bya Leta biri mu cyiciro cya byakwihanganirwa byandikirwa bisabwa ibisobanuro by'amakosa bifite ndetse n'ingamba zo kuyakosora.

    Ni mu gihe ibiri mu cyiciro cya biragayitse byose byitaba PAC bigatanga ibisobanuro ku bagize komisiyo bose.

    Mu 2025 ariko hiyongeyemo no kubaza bimwe mu bigo n'inzego bifite nta makemwa ariko harimo ikibazo kimwe cyangwa bibiri byo kwitondera aho na byo bisabwa kugaragaza ingamba z'uko ibyo bibazo bizakemurwa.

    Perezida wa PAC, Depite Muhakwa Valens yavuze ko ikigo kigaragaza biragayitse muri raporo yacyo gihamagazwa kigasobanura icyabiteye n’ingamba gifite zo kubikosora

    Source : http://igihe.com/amakuru/u-rwanda/article/urwego-rwagaragayemo-imicungire-mibi-y-imari-rushobora-kuyikosora-ntirwitabe