Mu mashusho yanyujije ku rukuta rwe rwa Instagram akurikirwaho n'abarenga n'ibihumbi 542 , yasangije abamukurikira inzu y'umutamenwa ndende yujuje maze ashimira n'abmufashije kuyubaka .
Yagize ati 'Mama nabigezeho ,niyubakiye inzu yanjye bwite ,asoza ashimira abayubatse avuka ko bamukoreye akazi kadasanzwe'.
Ni ishuri ryitwa 'Read Nursery School', riherereye mu nkengero z’umujyi wa Musanze mu Kagari ka Mpenge mu Murenge wa Cyuve ku muhanda Musanze-Cyanika.
Uwo musore ufite impamyabumenyi y’icyiciro cya kabiri cya Kaminuza (A0) mu ishami rijyanye no kuba Rwiyemezamirimo, avuga ko gushinga ishuri ari igikorwa yatekereje kuva kera mu rwego rwo gushyira itafari rye ku burezi bufite ireme mu Rwanda, hategurwa umwana akiri muto.
Byose ngo yabyigiye kuri Parezida Paul Kagame, ati 'Nkiri umwana muto, ndibuka ko natekerezaga kubaka igihugu cyanjye binyuze mu burezi, dore ko dufite ingero nyinshi nka Nyakubahwa Parezida Paul Kagame wateye intambwe atubera intangarugero, atwereka ko natwe urubyiruko tugomba kugira uruhare rufatika mu kubaka igihugu cyacu, ni ho nahereye mpitamo gutanga umusanzu wanjye mpereye mu burezi'.
Ngo ikindi cyamuteye gushinga ishuri ry’incuke, ni uko mu gace atuyemo mu Kagari ka Mpenge yabonaga ababyeyi bakora ingendo ndende, bajyana abana ku ishuri akababazwa n’iyo mvune bagira.
Ati 'Muri aka gace mu by’ukuri hari hakenewe ishuri, dore ko na cyane cyane icyatumye ndishinga kwari ugufasha ababyeyi bakoraga ingendo ndende bajyana abana babo ku mashuri, ibyo bikabananiza bigatuma n’abana biga nabi ndetse nkagira n’impungenge z’ubucucike mu mashuri muri ibi bihe bya Covid-19'.
Ni umusore usanzwe ari mu rubyiruko rw’abakorerabushake mu urenge wa Muhoza, uvuga ko imirimo y’iryo shuri ayifatanya n’umurimo wo gukorera ubushake afatanyije n’urubyiruko bagenzi be.
Ati 'Nsanzwe ndi mu rubyiruko rw’abakorerabushake mu Murenge wa Muhoza, aho dufasha abaturage mu kwirinda Covid-19. Dukora n’ibindi bikorwa bifitiye igihugu akamaro, nabonye nabifatanya na gahunda z’uburezi niyemeza kurerera igihugu, ndashimira ababyeyi dufatanyije kurerera u Rwanda uburyo bamba hafi, dufite na gahunda twatangije aho mu biruhuko dufasha n’abakuze kwiga indimi z’amahanga'.
Ni ishuri ryatangiranye n’uyu mwaka w’amashuri n’abana 55, biga mu byiciro bitatu binyuranye bigize amashuri y’inshuke, aho mu gihembwe kimwe abana bamaze biga, bamaze kugira ubumenyi bwo kuvuga mu rurimi rw’Icyongereza n’Igifaransa.
Ubwo bumenyi bwiyongeraho n’ubujyanye n’uburere mboneragihugu nk’uko abivuga, ati 'Muri gahunda yacu, dutoza abana no gukunda igihugu kugira ngo ejo hazaza tugire abayobozi bazima, kandi bafite intego yo gukunda igihugu no kucyitangira'.
Uwo musore ukomeje gushimwa n’ababyeyi barerera muri iryo shuri, arasaba Leta ubufasha bwo kwagura iryo shuri, ngo ribashe kwakira abana benshi kandi mu byiciro binyuranye, dore ko akorera mu nyubako akodesha.
Ku bw’ababyeyi bigishiriza muri iryo shuri, bo bumva rikomeje gutanga uburezi bufite ireme ryakwaguka rikakira n’ibindi byiciro, dore ko ngo baruhutse ingendo ndende bakoraga bajyana abana kwiga, bishimira ubumenyi ritanga.
Uwitwa Gwiza Yvette ati 'Iri shuri riziye igihe, riratanga uburezi bufite ireme bikatunyura, natunguwe no kubona umwana wanjye avuga Igifaransa n’Icyongereza neza mu gihe gito amaze muri iri shuri, uzi ko atuvugisha Igifaransa bigashaka kutunanira kumusubiza kandi turi bakuru! Turishimira n’imyitwarire myiza ikomeje kuranga abana bacu, abarimu ni beza bakunda abana'.
Uwo mubyeyi aragira icyo asaba Leta, ati 'Turasaba inkunga ya Leta kuko hagiye primaire byaba akarusho. Iyo urebye uburezi abana bahabwa, birasaba ko bahakomereza primaire, ndetse bibaye na ngombwa Perezida wa Repubulika yarimenya akadushyigikira, dukunda uburyo iri shuri ryorohereza n’ababyeyi, minerival ni nke cyane'.
Uwo mubyeyi avuga ko batazahwema gushyigikira uwo musore witangiye uburezi ari muto, akabafasha kubona aho abana babo bigira mu gihe byajyaga bibavuna bakora ingendo ndende, akaba asaba n’ubuyobozi bw’Akarere ka Musanze gusura iryo shuri bakaritera n’inkunga kugira ngo ryakire abana mu byiciro binyuranye.
Jumurex akomeje gushishikariza urubyiruko bagenzi be gutinyuka, bagakorera igihugu mu rwego rwo kurushaho kugiteza imbere.
Mbere yo kuburanisha ubujurire bw’Ubushinjacyaha, urukiko rw’Ubujurire rwabanje gusobanuza impamvu Paul rusesabagina atitabiriye iburanisha.
Kuri iyo ngingo, ubushinjacyaha bwavuze ko uyu muburanyi yamenyeshejwe kimwe na bagenzi be binyuze ku ikoranabuhanga, ariko ngo Paul Rusesabagina we yanga gushyira umukono ku mpampuro zimumenyesha umunsi w’iburanisha.
Ndetse ngo gereza acumbikiwemo, yanatanze raporo ko Rusesabagina yanze kwipimisha COVID-19 nk’uko bagenzi be babikoze mbere yo kwitabira iburanisha. Ibyo ngo bigaragaza ko agikomeye ku cyemezo cye cyo kutitaba urukiko.
Ubushinjacyaha bwo bukavuga ko ibyo bitabuza iburanisha gukomeza. Ikitari icyo, ngo byaba ari ugushaka gutinza urubanza.
Icyakora bamwe mu bunganira abaregwa mu rubanza rumwe na Paul Rusebagina, barimo nka Me Jean Rugeyo wunganira Nsabimana Callixte, uzwi, Me Ngamije Kirabo Guido wunganira abandi 3 mu baregwa muri uru rubanza na Me. Mugabo Shariff Yussufu, bavuze ko uburyo bwakoreshejwe mu kumenyesha Paul Rusesabagina ngo ntibusobanutse.
Bavuga ko Ubushinjacyaha bugaragaza ko ubuyobozi bwa gereza ya Nyarugenge ari bwo bwatanze raporo igaragaza ko rusesabagina yanze kwitaba ; kandi ngo ntategeko ribaha ububasha bwo guhamagaza umuburanyi.
Aba banyamategeko bavuga ko byakozwe n’urwego rutabifitiye ububasha. Aba bose bavuga ko bifuza ko urubanza rwihuta, ariko ngo rugomba kubanza kuvamo inenge kugira ngo rutazagera imbere bigasaba ko rusubira inyuma.
Ikindi ngo n’ubwo abandi baburanyi bitabye, ngo nta gihamya ko Rusesabagina yahamagajwe mu buryo bwubahirije amategeko. Ikindi ngo kwitaba kw’ababuranyi bamwe, ntibikuraho uburenganzira bw’undi. Basaba ko iburanisha risubikwa.
Ibi ni nako byagenze, kuko nyuma y’iminota 27 iburanisha ritangiye ; urukiko rwanzuye ko iburanisha risubikwa, bakajya gusesengura ibyavuzwe n’impande zose.
Urukiko rwavuze ko ruzamenyesha ababuranyi umwanzuro warwo ku wa Kabiri w’iki cyumweru.
Mu kwezi kwa Nzeri k’Umwaka ushize wa 2021, Urukiko Rukuru, Urugereko ruburanisha Imanza z’ibyaha byambukiranya imipaka, rwategetse ko Rusesabagina ahanishwa igifungo cy’imyaka 25, mu gihe Ubushinjacyaha bwari bwamusabiye gufungwa burundu.
Ubushinjacyaha Bukuru bw’u Rwanda hamwe na bamwe mu baregera indishyi z’ibyabo n’ababo biciwe mu bitero bya FLN byagabwe i Nyaruguru na Nyamagabe mu myaka ya 2018-2019, bahise bajuririra iki cyemezo mu Rukiko rw’Ubujurire.
Abaregwa bose uko ari 20 barimo Nsabimana Callixte na Nsengimana Herman bari abavugizi b’Umutwe wa FLN bitabye urubanza, uretse Paul Rusesabagina wagumye muri gereza.
Ubushinjacyaha bwasobanuye ko Rusesabagina ufungiwe muri Gereza ya Mageragere yanze gusinya ku nyandiko yahawe n’Ubuyobozi bwa gereza imuhamagaza kuzaburana kuri uyu wa Mbere, aho ngo avuga ko yahamagawe mu buryo bunyuranyije n’amategeko.
Ubushinjacyaha bwagaragaje uburyo uregwa yahamagajwe mu buryo bwubahirije amategeko, kuko ngo inyandiko yanditswe n’Umwanditsi Mukuru w’Urukiko Rusesabagina yagombaga gushyiraho umukono, yayishyikirijwe tariki 17 Ukuboza 2021.
Ubushinjacyaha n’abaregera indishyi bahise basaba Urukiko gukomeza kuburanisha urubanza kabone n’ubwo Rusesabagina adahari, kuko ngo Itegeko rigenga imiburanishirize y’imanza z’inshinjabyaha mu ngingo yaryo ya 128 ribyemeza.
Impaka zahise zivuka ubwo urukiko rwasabaga abunganira abaregwa kugira icyo babivugaho, bo bakomeje bagaragaza uburyo ihamagarwa mu rubanza rwa Rusesabagina ryagombaga kumugezwaho n’Umuhesha w’Inkiko aho kuba Ubuyobozi bwa gereza.
Me Ngamije Kirabo Guido wunganira bamwe mu baregwa yashimangiye ibyo bagenzi be bavugaga ati “Twumva ku bwacu igifite ishingiro mu gihe urukiko ruza kuba rwiherereye, ko rwasuzuma niba gereza koko ifite ububasha bwo kumenyesha (uregwa ko agomba kujya kuburana), ko tuzi ko Abanditsi cyangwa Abahesha b’Inkiko b’Umwuga ari bo bamenyesha, mu gihe hagaragaye ko gereza ari yo yamenyesheje twumva byaba bitakurikije amategeko”.
Ubushinjacyaha bwavuze ko ihamagara ryakozwe n’Umwanditsi Mukuru w’Urukiko rigashyirwa mu ikoranabuhanga inzego zose zirabimenya, ubuyobozi bwa gereza icyo bwakoze akaba ari ugusohora iyo nyandiko ku mpapuro igahabwa abaregwa bose kugira ngo bashyireho umukono bemeza ko bazitaba urubanza.
Umushinjacyaha Ruberwa Bonaventure yagize ati “Ntabwo kumenyesha ababuranyi byakozwe na gereza ahubwo ni Umwanditsi wabikoze hashingiwe ku ngingo ya 98 y’Itegeko rigena imiburanishirize y’imanza z’inshinjabyaha, iteganya y’uko guhamagarwa bishobora gukoresha ikoranabuhanga, tugasanga rero igihe cyose uregwa yabimenyeshejwe muri ubu buryo, ihamagarwa riba rikurikije amategeko”.
Umucamanza wari uyoboye iburanisha mu rubanza rwabereye mu cyumba cy’Urukiko rw’Ikirenga yahise atangaza ko Urukiko ruzatangaza umwanzuro kuri izi mpaka kuri uyu wa Kabiri tariki 18 Mutarama 2022 saa kumi z’igicamunsi.
Yanatangaje ko ibijyanye n’igihe urubanza ruzasubukurirwa na byo abantu bazabimenyeshwa.
Source : https://www.kigalitoday.com/ubutabera/imanza/article/rusesabagina-ntiyitabye-urubanza-rw-ubujurire
Ijambo 'Mfite inzozi' rya Martin Luther King, asaba ko habaho uburinganire bw'amoko yose muri Leta Zunze Ubumwe z'Amerika, ni rimwe mu magambo afatirwaho urugero cyane, yatanze ubutumwa bukomeye cyane ndetse yamamaye cyane yo muri ibi bihe.
Ariko uyu munsi, ibyo yaharaniraga biracyari ibyo gukorwaho; imbogamizi nshya mu gutora, by'umwihariko zigira ingaruka ku batora b'abirabura n'abacyene, ni ikimenyetso cyuko inzozi za Dr King zitaraba impamo (zitaragerwaho), nkuko bivugwa muri iyi nkuru y'umunyamakuru Pablo Uchoa wo mu Ishami ry'Isi rya BBC.
Ku itariki ya 28 y'ukwezi kwa munani mu 1963, abantu bagera hafi ku 250,000 bateraniye ku nyubako y'urwibutso ya Lincoln Memorial i Washington DC ngo bumve umugabo avuga ijambo.
Izina rye ni Dr Martin Luther King Jr ndetse amagambo yavuze aracyafite agaciro ku isi na n'uyu munsi.
Dr King, umuhungu w'umukuru w'idini wo muri leta ya Georgia yo mu majyepfo y'Amerika, yagize inzozi zuko ubuzima bw'abana be bushobora kuzaba butandukanye n'uko ubwe bwagenze (bwari bumeze).
Ivanguramoko, cyangwa gutandukanya abazungu n'abatari abazungu, ryari rigikurikizwa mu mategeko mu majyepfo y'Amerika.
Abirabura n'abazungu baratandukanywaga: babaga mu turere dutandukanye, bakarira muri za resitora zitandukanye, bakanywa amazi yo mu mariba atandukanye ndetse bakagenda bicaye mu bice bitandukanye mu modoka za bisi.
Muri icyo gihe, amategeko yagenaga byinshi mu bigize ubuzima bw'abirabura, agatuma bahembwa amafaranga macyeya ku kazi kabo, bakabaho mu buryo bubi cyane ndetse bagahabwa uburezi budafite ireme.
By'umwihariko, amategeko avangura yatumaga bigorana ku batora b'abirabura kuba batora abadepite bashoboraga kuba bahindura ayo mategeko.
Ariko, niba wibwira ko inzozi za Dr King zitakijyanye n'igihe, bishobora kugusaba kongera kubitekerezaho.
Nkuko umuryango we bwite ubivuga, amezi macyeya ashize yibukije ko nyinshi mu nzozi za Dr King zitaraba impamo.
Muri za leta zigeze kubamo ivangura, inteko zishingamategeko ziyobowe n'abo mu ishyaka ry'abarepubulikani zatumye hajyaho amategeko impirimbanyi zivuga ko aheza ba nyamucye â” n'abatora b'abirabura, by'umwihariko.
Aya arimo ibisabwa bikaze byo kugira ngo umuntu abone indangamuntu ndetse harimo no kubuza guha ibiribwa cyangwa amazi abantu bamara amasaha batonze umurongo bategereje gutora.
Inkubiri y'amategeko nk'aya yemejwe muri za leta 19, zirimo Florida, Texas na Arizona, nyuma yo gutorwa kwa Perezida Joe Biden mu 2020.
Uwamubanjirije, Donald Trump, avuga ko Biden yibye amatora, nubwo ikirego cyo mu nkiko cyananiwe kugaragaza ko habayeho uburiganya bwajyaga gutuma ibyavuye mu matora biba ibindi.
Rero, mu gihe Amerika yibuka Umunsi witiriwe Martin Luther King kuri iyi tariki ya 17 y'ukwezi kwa mbere mu 2022, abahungu n'abakobwa b'iyi ntangarugero barimo gusaba abantu kutibuka se gusa â” ahubwo bagakurikiza amagambo ye ndetse bakagira icyo bakora mu kurinda uburenganzira bw'abirabura, babinyujije mu gushyigikira amategeko arinda ubwisanzure bwo gutora.
Muri videwo yatangaje kuri Twitter, umukobwa we Bernice King, unakuriye ikigo Martin Luther King Jr Center for Nonviolent Social Change, yagize ati: 'Tuzaba twibuka ikiruhuko cya King, kandi turashishikariza mwebwe mwese gukomeza kwibuka kwanyu namwe'.
'Ariko, niba uburenganzira bwo gutora bukomeje kuba mu gihirahiro⦠rero twebwe, ni ukuvuga twebwe twese, tugomba gukoresha kwibuka gutandukanye kwacu twese ndetse n'imbuga zacu kuri uwo munsi nyirizina mu gukora icyo Dr King yagakoze.
'Papa wanjye yakavuze ndetse agakora mu buryo butuma iki gihugu kigera ku isezerano ryacyo rya demokarasi gishyira igitutu kuri sena yacu ya Leta Zunze Ubumwe [z'Amerika]⦠aho gufata ikiruhuko cya King, bakwiye kugikoresha, bemeza Itegeko ry'Uburenganzira bwo Gutora'.
Ubu bushyamirane burimo gufatwa nk’'igihe cy'amahina' kuri demokarasi y'Amerika, nkuko bivugwa n'umuyobozi ukomeye mu bijyanye n'uburenganzira bwa muntu, Pasiteri Al Sharpton.
Ubwo yavugaga ijambo ku wa kabiri (ku itariki ya 11 y'uku kwezi kwa mbere) mu mujyi wa Atlanta, Martin Luther King yahoze atuyemo, Biden yavuze ko ikibazo cy'uburenganzira bwo gutora ari 'urugamba rwa roho [ishingiro] y'Amerika'.
Akomoza ku wahoze ari Guverineri uvangura wa leta ya Alabama, Biden yarabajije ati: 'Murashaka kuba ku ruhande rwa Martin Luther King cyangwa George Wallace?'
SRC:BBCÂ
The post Martin Luther King yarapfuye ariko ijambo rye riracyari rizima nyuma y'imyaka 59 appeared first on IRIBA NEWS.
Ni ibikoresho bigizwe n’ibiryamirwa, ibiribwa n’ibikoresho byo mu nzu byo kwifashisha mu gutegura amafunguro.
Ubuyobozi bw’Akarere ka Rubavu bubikoze nyuma y’uko iki kibazo cy’aba abana kimaze imyaka ine bibana kigaragaye mu itangazamakuru, Minisitiri w’Ubutegetsi bw’igihugu, Jean Marie Vianney Gatabazi, agasaba Akarere ka Rubavu kubafasha.
Umuyobozi w’Akarere ka Rubavu wungirije ushinzwe imibereho myiza y’abaturage, Ishimwe Pacifique, yasuye uyu muryango w’abana batandatu batawe n’ababyeyi babo basigaranwa na Nyirasenge, Marie Chantal Barayavuga, abashyikiriza ubufasha bw’ibiribwa, ibiryamirwa ndetse n’ibikoresho byo mu gikoni ndetse n’iby’isuku.
Uwo muyobozi avuga ko abayobozi mu nzego z’ibanze bafite inshingano zo kureberera abaturage no kubaba hafi.
Agira ati “Abayobozi ntibakwiye kuzarira mu gihe bafite umuturage ufite ikibazo kandi babona ko kibarenze ubushobozi, bakwiye kukigeza ku buyobozi bubakuriye kugira ngo gishakirwe igisubizo mu buryo bwihuse.”
Ikibazo cy’abana batandatu bibana mu nzu cyatangiye muri 2018, nibwo batangiye gufashwa na Nyirasenge Barayavuga Marie Chantal uturanye nabo, nyuma y’uko se ubabyara Twizerimana Jean Paul na nyina Uzamukunda Claudine bagiranye amakimbirane bakabata.
Barayavuga avuga ko umugabo yataye urugo mu kwezi kwa kabiri 2018, ariko umugore yabanje kugenda amara amezi atanu aza kugaruka, muri 2019 nibwo yagiye ntiyagaruka abana basigara mu nzu bonyine.
Ati “Baba mu nzu yabo idakinze, naho ku manywa ndabagaburira, mu gihe nijoro batekera iwabo kugira ngo inzu yabo ishyuhe kuko harakonja.”
Akomeza agira ati “Abana bose bariga, ariko bafite ibibazo bitandukanye birimo kutagira ubwiherero, inzu irarangaye ntikinze, na ho imirima ntayo, bavoma ku wa Gatandatu ubundi bagakoresha amazi twavomye.”
Uyu muryango w’abana batandatu bibana umukuru afite imyaka 16 akaba agorwa no kubona ibikoresho by’isuku.
Ati “Byarananiye kumufasha kuko iyo agiye mu kwezi biragorana ndetse agasiba ishuri kuko ntabushobozi, ikindi gikomeje kugora uyu mwana mukuru, ubu yiga mu mwaka wa kabiri w’amashuri abanza yigana n’abana batangana, iyo byiyongereyeho ibibazo byo mu rugo ntakurikira neza.”
Barayavuga yongeraho ko abana biga batagira ikweto n’ibikoresho by’ishuri mbese biga nabi.
Ubuyobozi bw’Akarere ka Rubavu bwasuye uyu muryango bwasize bukuye abana mu nzu yabo idakinze, basaba Barayavuga kuba abacumbikiye mu gihe akarere kagiye kuyisana.
Barayavuga ahamya ko ibibazo bimugoye asabira ubufasha burimo kubona imyenda, inkweto ibikoresho by’ishuri hamwe n’iby’isuku.
Kutumvikana mu miryango byatumye abana benshi bayita bajya kwibera mu mihanda, ariko kubera ibibazo bikomeza kwiyongera, hari ababyeyi bata ingo n’inshingano z’ububyeyi bagasiga abana bonyine.
Charles McGee, umupilote w'Umunyamerika wahawe imidende/imidari myinshi y'ishimwe warwanyije ivanguramoko mu gisirikare, yapfuye ku myaka 102. Yapfuye ari mu bitotsi bye kuri iki cyumweru mu gitondo, nk'uko umuryango we ubivuga. Itangazo ryawo rivuga ko 'Ikiganza cye cy'iburyo cyari kiri ku mutima we kandi amwenyuye'.
Charles McGee, yari umwe mu itsinda rya mbere ry'abirabura gusa binjiye mu mutwe w'abapilote w'ingabo za Amerika. McGee yatwaye indege mu butumwa burenga 400 mu myaka 20 y'akazi. Yarwanye mu ntambara ya kabiri y'isi, muri Vietnam no muri Korea.
Minisitiri w'ingabo za Amerika Lloyd Austin yahise atangaza ati:' Uyu munsi, twatakaje intwari ya Amerika. Mu gihe mbabajwe no kugenda kwe, ndanashima cyane ubwitange bwe, umurage we n'ubumuntu bwe'.
McGee, wagiye mu zabukuru ku ipeti rya Brigadier General, yahamagawe mu gisirikare mu 1942 afite imyaka 23. Yari umwe mu birabura ba mbere mu batwaye indege za gisirikare, unité ye yari izwi nka Tuskegee Airmen.
Mu ntambara ya kabiri y'isi, igisirikare cya Amerika cyabaye urwego rurusha izindi guha akazi ba nyamucye. Ariko, imitwe y'ingabo imwe, n'amahugurwa byakomeje kubamo ivangura. Mu 1941, inteko ishingamategeko yategetse igisirikare cyo mu kirere gushinga unité igizwe n'abirabura gusa. Cyabyemeye cyanga ariko cyohereza iryo tsinda rya mbere mu bibuga by'imyitozo biri kure cyane ahitwa Tuskegee, muri Alabama, aho bari batandukanye n'abandi basirikare.
Aho hantu nyuma haje kuba ahakorerwa imyitozo y'abapilote, abakanishi, n'abandi bafasha mu ntambara. Mu 2007, ubwo abari bagize itsinda rye bahawe imidari ya zahabu n'Inteko ya Amerika, McGee yabwiye BBC dukesha iyi nkuru ati: 'Twerekanye ikintu cyihariye, atari gusa mu mateka y'iby'indege ahubwo no mu mateka y'imibereho y'Abanyamerika'. Yavuze ko we na bagenzi be ubwo boherezwaga aho hantu habi, bo bari bazi ko batangije urubuga rushya rwo guharanira uburenganzira bungana kuri bose.
Yagize ati: 'Abantu bose mu gihugu bifuzaga kwemerwa kubera abo ari bo, guhabwa amahirwe mbere yo kubwirwa ko hari ikintu udashoboye kubera uko wavutse'.
Ibikorwa bikomeye byagezweho na Tuskegee Airmen bivugwa ko ari byo byatumye uwari perezida mu 1948 afata icyemezo cyo guhagarika ivangura iryo ari ryo ryose mu gisirikare.
McGee yagize ati: '[Ibyo twagezeho] Byatumye Perezida Truman ategeka ko serivisi zose zijyamo abantu bose'.
Mu 2011, yashyizwe mu rwego rw'ibihangange mu by'indege, 'National Aviation Hall of Fame'. Nyuma yo kujya mu kiruhuko cy'izabukuru, McGee yeguriye ubuzima bwe gutanga amasomo y'ubuzima ya Tuskegee Airmen no gushishikariza urubyiruko kwinjira mu by'indege. Kandi ubwo yuzuzaga imyaka 100 y'amavuko yakoze ibyo yakundaga kurusha ibindi, kugurutsa indege.
intyoza
Source : https://www.intyoza.com/umupilote-wa-mbere-wumwirabura-muri-america-yapfuye-ku-myaka-102/
Justina Bassey, umugore w’imyaka 51 y’amavuko ari mu byishimo byinshi nyuma yo kwibaruka impanga y’umuhungu n’umukobwa, yari amaze imyaka 20 yarabuze urubyaro. Uyu mugore uvuga ko ari ibitangaza Imana yamukoreye ikamusubiriza icyifuzo cyo kumugira umubyeyi, yatangaje ko yasamye izi mpanga mu gihe yari amaze gucika intege yarihebye kuko yabonaga igihe cyaramusize cyo kubyara gusa Imana ikamutungura ikamuha impanga.
Nyuma y’aho Justina Bassey yibarutse impanga, umwe mu nshuti ze witwa Felicia Simon Odey yanditse ku rukuta rwa Facebook ye ndetse anerekana amafoto ari kumwe na Justina Bassey ateruye impanga ze maze yandikaho ati: ”Icyo Imana itabasha gukora koko ntikibaho. Mumfashe kwishimana n’uyu muvandimwe akaba inshuti twiganye, Imana yamwibutse imuha umugisha wo kubyara impanga hari hashize imyaka 20 ategereje urubyaro, afite imyaka 51. Umuryango wanjye urashima Imana kandi wishimanye n’umuryango wawe Justina Bassey”.
Ikinyamakuru Naija Pals cyo muri Nigeria cyegereye Justina Bassey bagirana ikiganiro nyuma y’aho inkuru ye yo kwibaruka ku myaka 51 iciye ibintu muri iki gihugu. Justina Bassey yavuze ko byari ibintu bikomeye kandi bibabaje kubaho nta mwana afite. Mu magambo ye yagize ati: ”Ibyishimo mfite ku mutima sinzi uko nabisobanura.Imana yankoreye ibitangaza impa kubyara impanga mu gihe nari naramaze gucika intege kuko numvaga ko ku myaka 51 ntabasha gusama”.
Justina Bassey yakomeje agira ati: ”Byari bikomeye binababaje kuba nari maze imyaka 20 nkoze ubukwe ariko nta mwana ndabyara. Umuryango w’umugabo wanjye wakoze ibishoboka ngo udutandukanye gusa biranga kuko twabanye dukundana. Ndashima cyane umugabo wanjye wihanganye akababarana nanjye ntantererane mu myaka 20 yari ishize twarabuze urubyaro. Imana yansubirije rimwe kuko nahoraga mvuga ko nzabyara abana 2 gusa, umuhungu n’umukobwa none Imana ibampereye rimwe”. Ibi bikaba ari byo Justina Bassey yatangaje nyuma yo kwibaruka impanga yari amaze imyaka 20 yarabuze urubyaro.
Muri iryo murikagurisha, u Rwanda rwari ruhagarariwe na sosiyete esheshatu zihinga zikanohereza ikawa mu mahanga.
Ni ku nshuro ya mbere iri murikagurisha mpuzamahanga rya kawa ribera mu Burasirazuba bwo hagati.
Ikawa yo mu Rwanda, iri mu zaciye agahigo muri iri murikagurisha ryitabiriwe n’abamurika barenga 1.000 baturutse ku migabane itandatu no mu bihugu birenga 44, aho abakunzi bayo basuraga aho u Rwanda rwamurikiraga, basogongezwaga ku ikawa izwiho uburyohe bwihariye.
Ambasaderi w’u Rwanda muri Leta Zunze Ubumwe z’Abarabu, Emmanuel Hategeka, yavuze ko iryo murikagurisha ryatanze amahirwe yo guhura n’abantu batandukanye bagira uruhare mu rwego rwa kawa.
Yagize ati 'U Rwanda rwaboneyeho umwanya wo kwerekana umwihariko wa kawa, guhura no kuganira n’abaguzi ndetse n’abakunzi b’ikawa byose bigamije kuzamura isoko rya Kawa, bikagira uruhare mu bukungu bw’igihugu no guteza imbere Urwego rw’ubuhinzi bwayo rutunze abarenga ibihumbi 400.
Ambasaderi Hategeka yakomeje agira ati: 'Imurikagurisha nk’iri, turateganya kongera no kwagura isoko ry’ikawa y’u Rwanda muri UAE ndetse no hanze yaho.”
Ubutumburuke bw’igihugu n’ikirere kiza bijyanye n’ubutaka bukungahaye, ni bimwe mu bituma u Rwanda ruba ahantu heza ho guhinga kawa.
Ikigo cya Mordor Intelligence kivuga ko udukombe turenga miliyari 2.25 tunyobwa ku isi buri munsi, mu gihe biteganijwe ko uyu mubare uzazamuka hafi inshuro ebyiri mu bihe biri imbere.
Umutoza w’agateganyo wa Rayon Sports, Lomami Marcel avuga ko kwirukana abakinnyi babiri b’abanya-Maroc, Youssef Rharb na Ayoub Ait bari baratijwe na Raja Casablanca atari icyemezo cyoroshye kuko nubwo bari abakinnyi beza ariko batari bashobotse.
Ku wa Gatanu w’icyumweru gishize nibwo Rayon Sports yemeje ko aba bakinnyi batakiri aba Rayon Sports bamaze usubizwa ikipe ya Raja Casablanca, ni nyuma y’ibyo bari batangarije iwabo ko mu Rwanda babayeho nabi.
Aganira n’itangazamakuru nyuma y’umukino wa Rayon Sports yanganyijemo na Musanze FC ku wa Gatandatu, Lomami Marcel yavuze ko icyuho cya Youssef wari umaze igihe afasha iyi kipe cyagaragaye ariko na none abakinnye bakoze ibyo bari bashoboye.
Ati 'Yego, byagaragaye. Ariko n’abandi bari bahari bakoze ibyo bashoboye.'
Yakomeje avuga ko ari we watangiye raporo aba bakinnyi kuko bari barabuze batakiza mu myitozo, nyuma ngo nibwo babonye baje gufata ibintu byabo.
Ati 'Oya, ntabwo bigeze bangisha inama ahubwo ni njye wabatangiye raporo kuko ntibitabiraga imyitozo. Bari barabuze, ubwo bafite impamvu bari bararetse imyitozo, ntabwo twigeze tubabona mu myitozo ahubwo twababonye ejo [ku wa Gatanu] baza mu Nzove baje gufata ibintu byabo bagenda. Ntabwo twamenye icyabaye, twabyumvise kuri radiyo, kugeza ubu nta muyobozi turavugana ku kibazo cyabo, ariko nta kundi.'
Lomami Marcel yemeje ko aba bakinnyi nubwo bari abakinnyi beza ariko na none bari bafite imyitwarire idahwitse umuntu atapfa kumenya atabana nabo umunsi ku munsi.
Ati 'Youssef na Ayoub, yego baje ari abakinnyi twari dukeneye, hari ibyo badufashije kuko kuri ubu ntabwo turi kumwe na bo. Ni igihombo, ariko n’abandi bahari bazakora kuko bari abakinnyi beza. Kuba umukinnyi mwiza ni byo, ariko ukaba umukinnyi mwiza na indiscipline [nta kinyabupfura] ni ibintu bibiri bitandukanye.'
'Mwebwe muri hanze, ntabwo mwamenya ibibera mu ikipe kuko mu muryango haberamo ibintu byinshi, ntabwo nabivuga ngo mbirangize. Kuba ubuyobozi bwafashe kiriya cyemezo, ntimubone ko ari icyemezo cyaje cyoroshye. Byari bikwiye ko perezida w’ikipe afata icyemezo nka kiriya kuko hari aho byari bigeze.'
Youssef Rharb ngo si we mukinnyi wenyine Rayon Sports yagenderagaho, ariko hari abandi bari gushakwa ku buryo bakongerwamo muri uku kwezi.
Ati 'Yousef ntabwo ari we mukinnyi gusa wafashaga Rayon Sports kuko yafashwaga n’abakinnyi benshi, kuba atakinnye cyangwa adahari ntabwo wavuga ngo izagira ibibazo. Nk’abakinnyi bahari bazakora. Turacyafite imyanya ibiri yo kongeramo abandi bashya, hari ibiganiro bihari ku buryo haza umuntu ukina hariya hagati n’undi ukina imbere.'
Youssef na Ayoub baje muri Rayon Sports muri Nzeri 2021, ni nyuma y’amasezerano y’ubufatanye ikipe ya Raja Casablanca yasinyanye na Rayon Sports muri Nyakanga 2021.
