Author: webrwanda

Amashusho ya Alikiba arimo kuririmba indirimbo ya The Ben, yazamuye amarangamutima ya benshi cyane ko Alikiba ari umwe mu bahanzi bakomeye muri Afurika y’Iburasirazuba ndetse akaba ari n’umwe mu bahanzi binjiye mu muziki cyera bakanagira igikundiro gihambaye.

The Ben yifashishije amashusho ya Alikiba yicaye mu mudoka ari kugenda yumva indirimbo ye yitwa ‘I’m in love’, abantu batungurwa no gusanga atari kumva ‘Why’ ya The Ben Ft Diamond imwe mu ndirimbo zigezweho mu Karere aho imaze kurebwa n’abarenga Miliyoni 3 n’ibihumbi 200. Icyakora impamvu ishobora kuba yabiteye ni uko ubusanzwe Alikiba adacana uwaka na Diamond.

Indirimbo ya The Ben I’M IN LOVE yasohotse mu 2012 ni yo yaryoheye Alikiba

Indirimbo ‘Why’ The Ben yakoranye na Diamond yazamuye urwego rw’umuziki w’uyu muhanzi nyarwanda kuko urebye nko kuri iyi ndirimbo ye ‘I’m in love’ yo mu 2012 yiyongereyeho abantu barenga ibihumbi 700 by’abayirebye, ibintu neza neza The Ben yifuzaga ndetse akabyifuriza umuziki nyarwanda kuko abantu benshi bakomeje kumushaka no kwibaza uyu muhanzi w’ijwi ritangaje aturuka mu kihe gihugu.

AliKiba Saleh Kiba wamamaye muri Tanzaniya na Afurika ku izina ‘Ali Kiba’ mu ndirimbo zitandukanye si ubwa mbere abikoze akagaragara ari mu rukundo n’indirimbo nyarwanda kuko yigeze kugaragaza ko akunda byimazeyo zimwe mu ndirimbo z’umuhanzi w’Umunyarwanda ‘Meddy’ kuri ubu ubarizwa muri Leta Zunze Ubumwe za Amerika.

Mu mashusho magufi Meddy yigeze gusangiza abakunzi be kuri Instagram, yagaragaje Ali Kiba wogeye muri Afurika mu gihe indirimbo nka ‘Chekecha Cheketua, ‘Mwana’ zari zigezweho muri iyo minsi nanone yicaye mu modoka ye yumva indirimbo za Meddy ubona ko yatwawe anagerageza kuziririmba. Ali Kiba ni umuhanzi ukunzwe cyane muri Tanzania mu ndirimbo ziri mu njyana ya Bongo Flava, akaba yaramamaye mu Rwanda cyane cyane kubera indirimbo Cinderela.

Alikiba amaze kwerekana ko akunda umuziki nyarwanda

Ali Kiba yamaze imyaka igera kuri 3 atari gusohora indirimbo kuva mu mwaka wa 2012 aho yavugaga ko yashakaga guharira umwanya munini abana be (ni umuselibateri ufite abana batatu yabyaye ku bagore batandukanye). Ibyo byatumye adakomeza kwigaragaraza ku buryo muri icyo gihe Diamond Platinumz yazamutse akamusiga inyuma, ariko kuri ubu na we yagarutse mu kibuga ku buryo buri umwe yiyita Umwami w’umuziki wa Tanzania.

Kugeza ubu The Ben ntaratangaza niba hari igikorwa cya muzika ateganya gukorana n’uyu muhanzi wo muri Tanzania, gusa hari amakuru yavugaga ko abareberera inyungu za Ali Kiba bari barasabye itsinda rya Charly na Nina gusubiranamo n’uyu muhanzi indirimbo ‘Indoro’ bitewe n’uburyo yari ikunzwe mu Karere ariko iri tsinda rikaba ritakiriho.

Alikiba yari aherutse kwerekana ko yanyuzwe n’indirimbo za Meddy

KANDA HANO UREBE INDIRIMBO WHY THE BEN YAKORANYE NA DIAMOND

KANDA HANO UREBE INDIRIMBO I’M IN LOVE YA THE BEN, ALIKIBA YASUBIYEMO

 Nubwo byatangiye gucicikana ku mbuga nkoranyambaga kuri iki Cyumweru tariki ya 23 Mutarama 2022, gusa byavuzwe ko Mutabazi Yves ukinira Ikipe y'Igihugu ya Volleyball, wanakiniraga ikipe ya Al Jazira SC yo muri Leta Zunze Ubumwe z'Abarabu, hashize icyumweru kirenga yaraburiwe irengero.

Umuryango wa Yves Mutabazi watangaje ko uhangayikishijwe cyane no kuba uyu mukinnyi amaze icyumweru kirenga batazi aho aherereye ndetse bakaba baratabaje Ambasade y'u Rwanda muri Leta Zunze Ubumwe z'Abarabu.

Ambasade yatangaje ko yamenye amakuru y'uko uyu mukinnyi w'Umunyarwanda yaba yaburiwe irengero muri UAE, ndetse yashyize imbaraga zose zishoboka mu kumushakisha.

Yongeyeho iti “Nitubona amakuru yisumbuye turayabamenyesha”.

Iyi nkuru yakomeje gutera benshi ubwoba ndetse bahangayikishwa n'ubuzima bw'uyu mukinnyi uri mu beza u Rwanda rufite mu mukino wa Volleyball.

Ku mugoroba wo kuri uyu wa Mbere tariki ya 24 Mutarama 2022, amakuru meza yavuye muri Ambasade y'u Rwanda muri Leta Zunze Ubumwe z'Abarabu, yavuze ko Mutabazi Yves yabonetse ndetse ari muzima.

Itangazo ryasohowe na Ambasade y'u Rwanda muri Leta Zunze Ubumwe z'Abarabu rigira riti:

Ambasade y'u Rwanda muri Leta Zunze Ubumwe z'Abarabu, yashakishije ndetse isanga Yves Mutabazi Abu Dhabi, umukinnyi w'umunyarwanda byari byatangajwe ko yaburiwe irengero.

Yaburiye mu ruvunge rw'abantu kubera uburwayi, gusa ubu ameze neza. Ku mpamvu z'ubuzima bwite bwe, Yves Mutabazi azatangaza byinshi ku ibura rye igihe azaba ameze neza kandi asahaka kubikora.

Dushimiye ubuyobozi bwa UAE ku bufasha baduhaye, tunashimiye kandi buri wese watanze amakuru mu gihe twashakishaga uyu mukinnyi'.

Mutabazi w'imyaka 27 y'amavuko wagaragaje ko afite impano idasanzwe muri Volleyball, yatangiye gukinira Ikipe y'Igihugu nkuru afite imyaka 19. Yatwaye Shampiyona y'imbere mu gihugu ari muri APR mu 2014 mu gihe kandi yakiniye Ikipe y'Igihugu y'Abatarengeje imyaka 21.

Mu Ugushyingo umwaka ushize yari yahawe igihembo na Madamu Jeannette Kagame nk'umwe mu rubyiruko rw'Indashyikirwa mu muhango wo kwizihiza Isabukuru y'Imyaka 20 Umuryango Imbuto Foundation umaze ushinzwe.

Mutabazi Yves yanyuze mu makipe atandukanye arimo REG na Gisagara VC.

Itangazo rya Ambasade y’u Rwanda muri UAE rimenyesha ko Yves Mutabazi yabonetse ari muzima

Hari hashize icyumweru kirenga Yves Mutabazi yaraburiwe irengero

New Paradise Family Choir igizwe n’abaririmbyi bagera kuri 18 n’abanyamuryango bagera ku 100. Ni korali irimo urubyiruko ndetse n’abashatse (Harimo couple zigera kuri enye ziririmbamo). Yatangiye umurimo w’Imana mu 2003, icyo gihe ikaba yari igizwe n’urubyiruko rw’abana babaga mu gace ka Mont Kigali.  

Yakomeje kwaguka n’ubwo byari ibihe bigoye cyane, kuko abari bayigize bari bafite amateka yihariye – abenshi muri bo bari imfubyi, abandi ari abashomeri. Ibyo byose byatumaga iterambere ryayo rigorana. Icyakora bakomezaga guhura bagahumurizanya binyuze mu ndirimbo.

Mu 2009 ni bwo binjiye muri studio bwa mbere batangira gukora Album ya mbere y’amajwi (Audio). Aba baririmbyi bigeze kunyura mu bihe bikomeye cyane barwana n’ibitero bagabweho n’umwanzi satani wakoze uko ashoboye ngo akome mu nkokora umurimo, “bigeza n’ubwo korali isenyutse. Hashira igihe kingana n’umwaka”.

New Paradise Family Choir ni korali ikomeye mu gihe yigeze kumara umwaka yarasenyutse

Muri 2011 ni bwo korali yongeye kugaruka, hazamo amaraso mashya. Ibyo byatumye mu 2017 bashyira hanze Album ya 2 y’amajwi (Audio) ikaba na Album ya 1 y’amashusho (Video). Kuri ubu bamaze gushyira hanze Album yabo ya gatatu y’amajwi igizwe n’indirimbo 10. Iyi Album ishyizwe hanze ni iya gatatu, ikaba yitwa ‘Ndi uw’agaciro’.

Ni Album yakozwe mu bihe bitoroshye ubwo isi yose yari ihanganye n’icyorezo cya Coronavirus cyahungabanije ubukungu kidasize ubuzima bw’abantu. Igizwe n’indirimbo 10 zirimo; Hari icyo ndi, Halleluya, Uwitanze, Turagukeneye ubu, Akara, Hosiana n’izindi. Iri kuboneka kuri Auvis Studio (Kabeza), kuri Horeb SDA Church (Nyamirambo), kuri Youtube n’ahandi.

Eric Kwizera (K3-Music) Umutoza akaba na Producer w’indirimbo mu majwi n’amashusho wa Korali New Paradise Family Choir, yabwiye InyaRwanda.com ko nyuma yo gushyira hanze iyi Album ya 3, bateganya gukora ibitaramo 4 muri uyu mwaka wa 2022. Ati “Nyuma y’uko tumaze gukora iyi Album, hatangiye ibikorwa byo gutunganya amashusho yayo. Uretse ibyo kandi ibihe nibigenda neza, hari ibitaramo biteganijwe bigera kuri 4 muri uyu mwaka”.

Yasoje avuga ko iyi Album yabo nshya bayikoze mu rwego rwo kwamamaza inkuru nziza ya Yesu Kristo akaba ariyo mpamvu umuntu wese uyishaka bari kuyimuhera ubuntu, icyo asabwa gusa no ukwitwaza ikintu (Device) cyo kuyitwaraho. Ati: “Ntabwo tuyigurisha, umuntu arasabwa kwishakira device gusa. Donc yakozwe mu rwego rwo kwamamaza inkuru nziza”.

New Paradise Family Choir bashyize hanze album nshya y’indirimbo 10

Eric Kwizera (K3-Music) niwe utunganya indirimbo za New Paradise Family Choir

Bamwe mu baririmbyi ba New Paradise Family Choir

Album yabo nshya ‘Ndi uw’agaciro’ bari kuyitangira ubuntu mu rwego rwo kwamamaza ubutumwa bwa Yesu Kristo

REBA HANO INDIRIMBO ‘NDI UW’AGACIRO’ NEW PARDISE FAMILY CHOIR BITIRIYE ALBUM YABO YA 3

Adekunle ashima MC Tino uburyo akomeje kumushyigikira yagize ati 'Urakoze cyane muvandimwe ku bwo gukomeza kunshyigikira. Imana iguhe umugisha.'

Ku wa 21 Mutarama 2022, Adekunle Gold yasohoye indirimbo ye nshya yise 'Mercy'. We n'ikipe imufasha mu muziki boherereje iyi ndirimbo MC Tino bamusaba kuyicuranga kuri KT Radio akorera n'ahandi mu rwego rwo kuyimenyekanisha.

Uyu munyamakuru avuga ko ubwo yacurangaga iyi ndirimbo kuri Radio yifashe amashusho hanyuma Adekunle ayashyira kuri instagram ye amushimira.

Ati “Ibi ni isomo ku bahanzi nyarwanda, ku banyarwanda n’abandi bantu muri rusange. Gushima ni byiza.”

Tino yabwiye INYARWANDA ko ari inshuti y'igihe kirekire ya Adekunle Gold, kandi ko ubushuti bwabo bwarenze gufashanya mu muziki gusa.

Avuga ko bakunze kuganira amushimira ukuntu amushyigikira mu muziki we. Tino avuga ko bitewe n'ibiganiro yagiranye na Adekunle Gold yifuje kwereka abantu kugira umutima ushima.

Ati “Impamvu nashyizeho ubutumwa nagira ngo mbyereke n’Abanyarwanda muri rusange n’umuntu uwo ari we wese bamenye kugira umuco wo gushima.”

“Umuco wo gushima ubundi ni uw’abanyarwanda, cyera umuntu yakugabiraga inka ukamushima ukamubwira uti njyewe nguhaye umwana wanjye bitavuze ngo aramutwaye ahubwo biri mu buryo bwo kugaragaza ibyishimo,'

Tino avuga ko mbere y'uko Adekunle Gold ataramira mu Rwanda mu Ugushyingo 2021 bavuganye amubaza niba azabasha kwitabira igitaramo cye, undi amubwira ko adahari.

Ati 'Na mbere y’uko aza mu Rwanda mu gitaramo cya Kigali Jazz Junction yambajije niba ndi i Kigali mubwira ko ntahari bitewe n’akazi nari mfite, ariko namwifurije amahirwe masa kandi yitwaye neza.'

Muri muzika, MC Tino aherutse gusohora indirimbo ye nshya yise 'Mama Cita'. Ni yo ndirimbo ya mbere uyu muhanzi yasohoye muri uyu mwaka. Mu buryo bw'amajwi (Audio) yakozwe na Papito muri Switch Music n'aho 'Video Lyrics' yatunganyijwe na Snowlin.

Mu Ugushyingo 2021, Adekunle Gold yataramiye mu Rwanda, yari yabanje kubaza MC Tino niba azitabira igitaramo cye 

MC Tino avuga ko abahanzi n'abandi bakwiye kwiga gushima igihe umuntu yabafashije

 

MC Tino avuga ko yagaragaje ubu butumwa mu rwego rwo kubwira n'abandi kumenya gushima

MC TINO AHERUTSE GUSOHORA INDIRIMBO YISE 'MAMA CITA'

 

ADEKUNLE AHERUTSE GUSOHORA INDIRIMBO 'MERCY'

“>

Minisitiri Bamporiki ahamya ko Abanyarwanda bari hanze ari amahitamo yabo

Yabitangaje ubwo yari mu kiganiro cyatambutse kuri Televiziyo y’u Rwanda, cyari gifite umutwe ugira uti 'Kwizihiza Intwali z’Igihugu’, aho yagaragaje ko hari itandukaniro hagati y’Abanyarwanda bari barimwe uburenganzira ku gihugu cyabo n’Abanyarwanda bari hanze muri iki gihe, barimo n’abari mu mitwe irwanya u Rwanda.

Yavuze ko abakuru babisobanukiwe, abwira abakiri bato ko icyo bakwiye kumenya ari uko iyo igihugu gihari, Umukuru w’igihugu akavuga ko ari iwanyu wahaza igihe ushakiye ugatemberera ahandi ukagaruka, ariko ukaba utahakorera ibyo wishakiye bibangamiye abandi.

Ibyo bitandukanye n’abantu babayeho bazi neza ko igihugu ari icyabo, ukiyoboye azi ko abo ayoboye ari abacyo ariko badashobora kukigeramo.

Minisitiri Bamporiki avuga ko uyu munsi abaturarwanda bari hanze y’u Rwanda abenshi ari amahitamo yabo, ndetse ko bamwe inyota bafite ari iy’ubutegetsi kuko bashaka kukizamo ari uko baje gutegeka.

Yongeraho ko mbere hari ingorane nyinshi aho byari bigoye gutaha mu Rwanda rwababyaye ku bari batuye Zaire, Uganda n’ahandi, nyamara kuri ubu umuntu akaba asaba kuza mu gihugu cye aturutse kure y’umugabane, agahita abihabwa ako kanya anyuze mu kirere ndetse agataha aririmba 'Ndi Umunyarwanda’ ntacyo yikanga.

Uwo muyobozi ashimangira ko izo ngorane zariho icyo gihe utazigereranya n’iz’uyu munsi, kuko izihari kuri ubu ari umurengwe, ibyaha, imiteto n’inyota y’ubutegetsi y’abashaka gutaha ari uko baza basumba abahari, ndetse n’ingengabitekerezo yarwanyijwe na RPF yo gukuraho itonesha, kuvangura no kumunga ubukungu bw’igihugu, aho guharanira inyungu z’Abanyarwanda.

Akomeza avuga ko hari udutsiko dushaka inyungu zatwo bwite tutazabigeraho kuko igihugu cy’ubatse mu nyungu z’Abanyarwanda, ndetse akibutsa ko utwo dutsiko tuzavunwa no kubitekereza ariko tutazigera tubigeraho.

Umunsi wa 14 wa shampiyona usize Kiyovu Sports ariyo kipe yonyine yo muri Kigali itsinze ikipe iyo mu ntara. Ku wa 6 tariki 22 Mutarama 2022 ni bwo Kiyovu Sports yakinaga na Espoir FC umukino wari wabereye i Nyamirambo. Iminota 90 yarangiye Kiyovu Sports ibabaje Espoir FC ku bitego 2-1. Umukino wakurikiyeho wahuje As Kigali na APR FC urangira amakipe yombi anganyije ubusa ku busa.

Kiyovu Sports niyo kipe yo muri Kigali yabonye amanota 3 imbumbe

Kuri iki cyumweru ku izuba ry’igikatu, Rayon Sports yahuye n’uruva gusenya itsindwa na Marine FC iturutse mu mujyi wa Gisenyi ibitego 3-0 byari bibaye ubwa mbere Marine FC itsinda Rayon Sports ibitego birenze 3 mu mukino umwe.

Rayon Sports yaraye mu buzima bugoye

Ntabwo byagarukiye aho kuko Gasogi United yashakaga intsinzi nyuma yo gukuba itako i Musanze, nayo yaje gukubitwa itareba inyuma ibitego 2 n’ikipe ivuye mu mujyi wa Gisenyi.

APR FC na As Kigali zaguye miswi

Kuri uyu wa Mbere urwishe ya nka rwagumye kuyibamo, Gorilla FC mu minota 43 gusa yari imaze gutsindwa na Etoile de L’Est yari ivuye mu Karere ka Ngoma. Umukino warangiye Etoile de L’Est yuriranye amanota 3, bituma indi kipe yo muri wa Kigali isigara amara masa. Umukino wasoreje ihomba ry’amakipe yo muri Kigali, n’itsindwa rya Police FC yakubiswe na Bugesera FC ibitego 2-1, amanota atatu ataha mu mujyi wa Nyamata.

Ubutumwa bwa mbere uturutse hasi burerekana ko Gasogi United yiteguye neza ariko ibyakurikiyeho hejuru murabibona

Kuri uyu munsi wa 14 amakipe yo mu mujyi wa Kigali yagombaga gukinira ku manota 18 ariko atahanye amanota 5 gusa harimo 3 ya Kiyovu Sports ndetse n’andi 2 APR FC na As Kigali zagabanye. Ikipe zo mu mujyi wa Kigali zinjijwe ibitego 11 zinjiza 5. 

Igirikare cyatangaje ko cyahiritse ubutegetsi muri Burukina Faso

Ibi byatangajwe kuri televiziyo ya Leta, n’umusirikare mukuru wavuze ko Guverinoma n’Inteko Ishinga Amategeko byasheshwe, iryo tangazo rikaba ryashyizweho umukono na Lt Col Paul-Henri Sandaogo Damiba.

Kugeza ubu aho Kaboré aherereye ntiramenyekana neza, ariko muri iri tangazo ryasomwe n’uyu musirikare, rivuga ko abafunzwe bose bari ahantu hizewe.

Ihirikwa ry’ubutegetsi muri Burkina Faso rije nyuma y’umunsi umwe, ubw mu ijoro ryo ku Cyumweru urugo rwa Kaboré ruri i Ouagadougou rugoswe n’abasirikare bari bafite imbunda za rutura.

Gusa Guverinoma y’icyo gihugu yari yahakanye amakuru yo guhirika ubutegetsi bwa Perezida Roch Kaboré, ivuga ko ari ibihuha.

Perezida Roch Kaboré ubu afungiye ahantu hatazwi

Igisirikare cya Burkina Faso cyari kimaze iminsi kitavuga rumwe n’ubuyobozi bwa Perezida Roch Kaboré, kivuga ko Guverinoma ye yananiwe kurwanya imitwe ivuga ko igendera ku mahame ya Kisilamu irimo Al Qaeda na Islamic State, yakomeje guhitana abasivili ndetse n’abasirikare.

Komisiyo ishinzwe imyitwarire ya FERWAFA, yafatiye perezida wa Gasogi United, Kakooza Nkuriza Charles [KNC] ibihano byo gusiba imikino 4 n’ihazabu y’ibihumbi 100 kubera gusebya perezida wa Kiyovu Sports, Mvukiyehe Juvenal.

Inama ya Komisiyo ishinzwe imyitwarire muri FERWAFA yateranye ku wa Gatatu tariki ya 19 Mutarama 2022 yasanze Perezida wa Gasogi United bwana Kakooza Nkuriza Charles yarakoze amakosa yo gusebya Perezida wa Kiyovu SC bwana Mvukiyehe Juvenal nyuma y’umukino wahuje Ikipe ya Gasogi United na Gorilla FC.

Komisiyo yamuhanishije gusiba imikino ine (4) n’ihazabu y’ibihumbi ijana (100.000 FRW).

Uyu mukino wabaye tariki ya 17 Ukuboza 2021 ubwo wari urangiye Gasogi United itsinzwe na Gorilla FC, perezida wa Gasogi United yabajijwe niba ataba yagurishije umukino nk’uko bivugwa ko hari abayobozi b’amakipe bagurisha imikino, yasubije ko ibyo byabazwa perezida wa Kiyovu Sports kuko ari we bivugwa ko ubikora.

Komisiyo kandi yasanze Perezida wa Gasogi United, bwana Kakooza Nkuriza Charles yaratesheje agaciro umusifuzi wo hagati bwana Ahishakiye Balthazar ku mukino ikipe abereye umuyobozi yahuyemo na Police FC tariki ya 29 Ukuboza 2021 bityo akaba ahanishijwe guhagarikwa imikino ine (4) mu mupira w’amaguru isubitsweho ibiri (2) n’ihazabu y’ibihumbi mirongo itanu (50.000 FRW).

Inama kandi ya Komisiyo ishinzwe imyitwarire muri FERWAFA yateranye ku wa Gatandatu tariki ya 8 Mutarama 2022 yafatiye ibihano ikipe ya Etincelles FC ndetse n’abakinnyi bayo Bizimana Omar, Mudeyi Souleyman na Uwihoreye Ismael kubera imyitwarire idahwitse bagaragaje ku mukino Etincelles FC yakinnye na AS Kigali ku itariki ya 12 Ukuboza 2021.

Banganyije 1-1, ntibishimiye ko umusifuzi yongeyeho iminota 10 nayo ikarangira maze AS Kigali ikishyura igitego ku munota wa 13 w’inyongera, Etincelles yose yahise yirundira ku basifuzi bawusifuye polisi iratabara ni nayo yasohotse ibaherekeje muri Stade Umuganda ahari habereye uyu mukino.

Komisiyo ishinzwe imyitwarire yasanze abafana b’Ikipe ya Etincelles FC bararengereye bagashaka kwihanira amakosa y’abasifuzi kandi hari inzego zishinzwe kugenzura imisifurire bityo ikipe ikaba yahanishijwe igihano cyo kudakinira umukino umwe ku kibuga isanzwe yakiriraho nyuma yo kumenyeshwa iki cyemezo.

Komisiyo kandi yasanze abakinnyi batatu ba Etincelles FC bararengereye bagashaka kwihanira amakosa y’abasifuzi kandi hari inzego zishinzwe kugenzura imisifurire bityo abakinnyi Bizimana Omar, Mudeyi Souleyman na Uwihoreye Ismael bakaba bahanishijwe buri wese kudakina imikino ibiri (2) hamwe n’ihazabu y’ibihumbi icumi (10.000 FRW).