Source : https://yegob.rw/imico-iragwira-ihere-ijisho-imico-utigeze-ubona/
Author: webrwanda
-
RIB yamuritse impuzankano yayo – #rwanda #RwOT
Ni ubwa mbere mu gihe RIB imaze, igiye kugira impuzankano yihariye iranga abakozi bayo.
Impuzankano nshya za RIB ziri mu byiciro bibiri; hari izo mu biro n'izo mu kazi hanze y'ibiro.
Imyambaro yo mu kazi igizwe n'umupira w'ubururu w'amaboko magufi n'ijile iriho izina rya nyirayo ku ruhande rw'iburyo na nimero imuranga ibumoso ndetse n'ipantalo ijya gusa n'ivu n'inkweto z'umukara.
Impuzankano yagenewe ibirori n'abakozi bo mu biro igizwe n'ikote ry'umukara, ishati y'ikijuju na karuvati y'umukara iriho ikirango cya RIB ndetse n'inkweto z'umukara.
Ikote ririho amazina y'umugenzacyaha ku ruhande rw'iburyo mu gituza mu gihe ipantalo cyangwa ijipo nabyo ari umukara.
Umuvugizi wa RIB, Dr. Murangira B. Thierry, yabwiye IGIHE ko impamvu y'iyi mpuzankano, ari ukorohereza abaturage kumenya Abagenzacyaha no kubaha serivisi.
Ati 'Impamvu ni ukugumya kunoza imikorere n'imitangire ya serivisi z'ubugenzacyaha kugira ngo abagana RIB babashe gutandukanya abagenzacyaha n'abandi bantu. Ibi ni mu rwego rwo kunoza imitangire ya serivisi.'
Ibi kandi bizafasha abaturage gutandukanya abakozi ba RIB n'abatari abayo. Nubwo hashyizweho impuzankano, birashoboka ko umukozi wa RIB yajya mu kazi atayambaye.
Dr Murangira yavuze ko mu gihe umukozi wa RIB atambaye umwenda umuranga bitewe n'akazi, yerekana ikarita.
IGIHE yifuje kumenya niba kwambara imyenda kw'abakozi ba RIB, bitazorohereza abakekwaho ibyaha kuba batoroka cyangwa bakihisha Abagenzacyaha, Dr Murangira asobanura ko nta mpungenge zihari.
Ati 'Gufatwa k'ukekwaho icyaha bigira uburyo bwemewe n'amategeko bikorwamo. Uwihisha na we agira uburyo ashakwamo kandi agafatwa. Nta mpungenge biduteye kuko hari uburyo bwinshi bunyuranye kandi bwemewe n'Amategeko RIB ikoresha mu gutahura ibyaha, gufata no gufunga abakekwaho kugira uruhare muri byo.'
Ntabwo higeze hatangazwa ingengo y'imari yakoreshejwe mu gukora iyi mpuzankano.
Itegeko ribemerera gukoresha imbunda
Amategeko yemerera Umugenzacyaha kuba yakoresha cyangwa akitwaza imbunda mu gihe biri ngombwa.
Bigaragara mu ngingo ya 10 mu gika cyayo cya 11 cy'itegeko rishyiraho RIB, byose bigamije kugira ngo urwo rwego rubashe kuzuza inshingano rwahawe.
Dr Murangira ati 'Muri ubwo bubasha Umugenzacyaha ahabwa n'itegeko harimo gukoresha imbunda igihe cyose biri ngombwa. Itegeko ryongeraho ko usibye n'imbunda, Umugenzacyaha yemerewe n'ibindi bikoresho by'umutekano bya ngombwa mu gushyira mu bikorwa inshingano z'Urwego kandi Abagenzacyaha baba barahuguwe kuzikoresha.'
Ihame ry'Uburinganire rirubahirizwa muri RIB
Kuri ubu RIB ifite abakozi 1.279 bavuye kuri 869 yatangiranye. Iteka rishyiraho imbonerahamwe y'imyanya y'imirimo ya RIB, riteganya ko urwo rwego rugira abakozi bagera ku 1.579.
Dr. Murangira yagize ati 'Ihame ry'uburinganire riri mu byitaweho mu ishyirwa mu myanya ry'abakozi ba RIB, kuko kuri ubu abakozi b'igitsinagore bageze kuri 27% kandi bari no mu myanya ifata ibyemezo naho ab'igitsinagabo ni 73%. RIB izakomeza kongera umubare w'abagenzacyaha hubahirizwa ihame ry'uburinganire.'
Yongeyeho ati 'Uyu ni Umwanya mwiza wo gushishikariza abakobwa kwitabira kujya mu kazi k'ubugenzacyaha.'
RIB yatangaje ko biteze ko ab'igitsinagore bazava kuri 27% bakarenga 30% by'abakozi bose.
Ku mpuzankano yo hanze y'ibiro igizwe n'umupira w'ubururu w'amaboko magufi n'ijile iriho izina rya nyirayo ku ruhande rw'iburyo na nimero imuranga ibumoso ndetse n'ipantalo ijya gusa n'ivu, n'inkweto z'umukara
Byitezwe ko iyi mpuzankano izajya yorohereza abaturage kumenya byihuse abakozi ba RIB mu kazi
Abakozi ba RIB n’Abagenzacyaha ni uko bazajya bambara mu kazi ko hanze y’ibiro
Impuzankano yo hanze y’ibiro iriho ibirango bya RIB mu nyuguti nini
Buri jile handitseho izina rya nyirayo
Impuzankano zigizwe n’imipira y’ubururu n’amapantalo ajya gusa nk’umukara w’ivu ni yo azajya yambarwa n’abakozi ba RIB hanze y’ibiro bari mu kazi
Abagabo ni uko bazajya bambara mu gihe bari mu biro
Izi mpuzankano zibereye ijisho
Abakozi ba RIB mu mwambaro w'akazi mushya wagenewe kwambarwa mu biro
Inkweto z’umukara ziteye gutya ni zo zizajya zambarwa kuri iyi mpuzankanoSource : http://igihe.com/amakuru/u-rwanda/article/rib-yamuritse-impuzankano-yayo
-
Perezida Kagame yasobanuye isomo Afurika yigiye mu bihe bya Covid-19 – #rwanda #RwOT
Ibi Umukuru w'Igihugu yabigarutseho mu Nama ya 39 y'Abakuru b'Ibihugu byibumbiye mu Ihuriro ry'Ibihugu bya Afurika rigamije Ubufatanye n'Iterambere, NEPAD.
Perezida Kagame uyoboye iri huriro, yavuze ko Afurika ikomeje gutera imbere no gukemura ibibazo biyugarije.
Yagize ati 'Turi mu nzira nziza kuko Afurika ikomeje kuzamura urwego rwayo mu kwikemurira ibibazo.'
Perezida Kagame yongeyeho ko Afurika yigiye amasomo akomeye mu Cyorezo cya Covid-19.
Yakomeje ati 'Imbogamizi zatewe n'icyorezo cya Covid-19 ziracyari kumwe natwe, nubwo icyorezo cyatumye Afurika ifata amahirwe yo kwigira.'
Mu bandi bitabiriye iyi nama harimo Perezida wa Repubulika Iharanira Demokarasi ya Congo, Félix Tshisekedi, yavuze ko Afurika ikwiriye kwishakamo ibisubizo bizayifasha gukemura ibibazo ifite.
Ati 'Dukwiriye gushaka amikoro no kongera ubufatanye mu by'ubucuruzi ku Mugabane [wa Afurika], kugira ngo tuzagere ku ntego twihaye za Afurika twifuza dukoresheje ikoranabuhanga, inovasiyo no gushora imari mu kongera ubushobozi bw'abaturage.'
Umuyobozi wa Komisiyo y'Umuryango wa Afurika Yunze Ubumwe, Moussa Faki Mahamat, yavuze ko Afurika ifite ubushobozi bwo kwikemurira byinshi mu bibazo ifite, asaba abayobozi b'uyu mugabane kongera ubushake mu gushyiraho ingamba zayifasha kwiteza imbere binyuze mu kwihuza.
Perezida Kagame yavuze ko icyorezo cya Covid-19 kigishije Afurika kwishakamo ibisubizo
Perezida Kagame yayoboye Inama ya 39 ya NEPAD -
Rubavu: Batatu bakurikiranyweho gutobora inzu z'abaturage bakabiba – #rwanda #RwOT
Aba bagabo bafatiwe mu Murenge wa Rubavu, Akagari ka Byahi ku wa 31 Mutarama 2022.
Umuvugizi wa Polisi mu Ntara y'Iburengerazuba, Superintendent of Police (SP) Bonaventure Twizere Karekezi yavuze ko bafashwe mu ijoro bamaze kwiba umuturage. Bafashwe nyuma y'amakuru yatanzwe n'uyu muturage barimo kwiba.
Ati 'Baje ari batatu nijoro bapfumura inzu y'umuturage, babiri basigaye hanze y'urugo umwe yinjira mu nzu ariko nyiri urugo ntiyamenye ko hari uwinjiyemo. Yatabaje Polisi iraza ihageze abasigaye hanze bahita bahunga, uwari mu nzu ari yasohokanye televiziyo ya rutura (Flat Screen) ayiha abashinzwe umutekano bari hanze y'urugo azi ko ayihaye bagenzi be. Amaze kuyibaha yuriye urugo ngo asohoke ako kanya abashinzwe umutekano bahita bamufata.'
SP Karekezi akomeza avuga ko Niyomugabo amaze gufatwa yahise avuga bariya bagenzi be na bo barakurikiranwa barafatwa. Bamaze gufatwa bavuze ko bari basanzwe biba, bagiye kwerekana ibyo bari baribye ahandi.
Polisi yasanze barabikaga ibyo bibye mu nzu ya Niyomugabo Emmanuel.
Ati 'Bariya bantu bamaze gufatwa bavuze ko bari basanzwe biba, bajyanye Polisi aho bari basanzwe babika ibyo biba ndetse n'ibikoresho bifashishaga biba. Mu nzu y'umwe muri bo hafatiwe televiziyo ebyiri nini, ibikoresho gakondo bifashishaga biba ndetse bakabitera abantu birimo imipanga, inyundo, 'tourne-vis' n'ibindi bitandukanye.'
Yashoje aburira abafite ingeso mbi y'ubujura kubicikaho bagasha indi mirimo bakora, abagura ibyo bibye na bo abasaba kubyirinda ahubwo bakagira uruhare mu gutanga amakuru atuma abajura bafatwa.
Abafashwe bahise bashyikirizwa Urwego rw'Ubugenzacyaha (RIB) kugira ngo hatangire iperereza.
Bimwe mu bikoresho aba bagabo bafatanywe -
U Rwanda rwatangije ukwezi kwahariwe umuco mu mashuri – #rwanda #RwOT
Uku kwezi kwatangijwe ku mugaragaro n'Umunyamabanga wa Leta muri Minisiteri y'Uburezi ushinzwe Amashuri Abanza n'Ayisumbuye, Twagirayezu Gaspard. Ni igikorwa cyabereye mu Ishuri ryisumbuye rya Lycée Notre Dame de Cîteaux, kuri uyu wa 2 Gashyantare 2022
Bimwe mu bikorwa biteganyijwe muri uku kwezi ni ukwigisha abanyeshuri indangagaciro enye fatizo z'umuco Nyarwanda zirimo gukunda igihugu, ubumwe, ubupfura n'umurimo, aho buri munsi bazajya bazirikana imwe muri izi, bigishwe za kirazira n'amateka y'u Rwanda ndetse bakore n'ibitaramo bya Kinyarwanda.
Twagirayezu yavuze ko ikigamijwe ahanini ari ugufasha abanyeshuri kuzirikana umuco w'Abanyarwanda kuko ari wo ubahuza.
Ati 'Uku kwezi kuzafasha abanyeshuri kuzirikana ko icya mbere ari Abanyarwanda, noneho ibindi byose twiga mu mashuri, ari ubumenyi ari ikoranabuhanga n'ibindi bifata ku Bunyarwanda.'
Umunyamabanga wa Leta muri Minisiteri y'Urubyiruko n'Umuco, Bamporiki Edouard, witabiriye igikorwa nk'iki muri Groupe Scolaire Kampanga mu Karere ka Musanze, yasabye abarezi gushyira imbere umuco w'u Rwanda mu byo bigisha kuruta ibindi.
Ati 'Abarezi bo mu gihugu hose ni ababyeyi, ni amizero y'iki gihugu kuko bafite ubukungu bw'u Rwanda, ari bwo bana b'u Rwanda, turabasaba ko mu byo bakora byose basasira u Rwanda, bakarubanza. Nibamara kurubatamika na siyansi izemera n'ibindi byose bazashaka kurenzaho bizemera.'
Mukamisha Gaju Divine Chloé wiga mu mwaka wa Gatandatu w'Amashuri Yisumbuye muri LNDC yavuze ko imbogamizi bahuraga na zo zigatuma batikamaza umuco Nyarwanda yizeye ko zigiye gukemuka.
Ati 'Ntabwo ubusanzwe tubona igihe kirekire cyo kwiga ibyerekeye umuco Nyarwanda kuko tumara umwanya munini twiga ibijyanye na siyansi ariko twizeye ko igihe gito twabonaga kigiye kongerwa bitewe n'uko turi mu kwezi k'umuco.'
Umwarimu wigisha Ikinyarwanda muri iri shuri, Ndayisaba Innocent, yasabye ko muri uku kwezi k'umuco Minisiteri y'Uburezi yabafasha gukemura ibibazo bikigaragara mu myigishirize y'Ikinyarwanda birimo ibitabo bike, amasaha make n'abarimu bakigisha batabifitiye ubushobozi.
Uku kwezi k'umuco biteganyijwe ko kuzakorerwa mu mashuri yose kuva ku yisumbuye kumanura, aho nyuma yako buri shuri rizajya rigira umunsi umwe mu kwezi wo kuzirikana Umuco Nyarwanda.
Ukwezi k’Umuco mu mashuri kwatangijwe ku mugaragaro n’Umunyamabanga wa Leta muri Mineduc ushinzwe Amashuri Abanza n’Ayisumbuye, Twagirayezu Gaspard
Abanyeshuri bazajya bigishwa indangagaciro na kirazira by’umuco Nyarwanda buri munsi mu gihe cy’ukwezi
Mukamisha yavuze ko ukwezi k’umuco kuzabafasha kurushaho kumenya Umuco Nyarwanda kuko ubusanzwe bagiraga igihe gito cyo kuwiga
Ndayisaba wigisha Ikinyarwanda muri Lycée Notre Dame de Cîteaux yasabye ko imyigishirize y’ururimi rw’Ikinyarwanda yashyirwamo ingufu
Nyuma y’uku kwezi amashuri azajya afata umunsi umwe mu kwezi wo kuzirikana umuco Nyarwanda
Uku kwezi kwatangirijwe muri Lycée Notre Dame de Cîteaux muri Kigali
Umunyamabanga wa Leta muri Minisiteri y'Urubyiruko n'Umuco, Bamporiki Edouard, yatangije ukwezi k’umuco mu Ishuri rya Kampanga mu Karere ka Musanze
Yasabye abarezi gutamika abana u RwandaAmafoto ya IGIHE: Shumbusho Djasiri
Andi: MyCulture
Source : http://igihe.com/amakuru/u-rwanda/article/u-rwanda-rwatangije-ukwezi-kwahariwe-umuco-mu-mashuri
-
MTN yahiguye umuhigo wo gufasha Kankindi wari waraburanye n'umuryango we – #rwanda #RwOT
Tariki ya 12 Mata 2021 yabaye umunsi w'igitangaza kuri Kankindi. Uyu mukobwa wari umaze imyaka 27 yitwa Uwamahoro Rosine, ni bwo yamenye ko umuryango we uhari nyuma y'inkuru yakozwe na IGIHE.
Uyu mukobwa yanyuze mu buzima bumugoye kubera kutagira umuryango, abaho nk'imfubyi itagira shinge na rugero kuko yari yaraburanye n'abe mu gihe cya Jenoside yakorerwe Abatutsi mu 1994.
Nyuma yo kumenya ko afite nyina n'abavandimwe be, hateguwe ibirori byo kongera kubahuza byabaye 18 Mata 2021, mu Karere ka Huye. Uwo munsi yaherekejwe na MTN Rwanda.
Iyi sosiyete yabonye inkuru nziza y'uyu mukobwa ko yabonye umuryango kandi asanzwe ari umu-agent wayo yifuza kwifatanya na we muri ibyo birori, ihitamo kumuherekeza.
Icyo gihe yashyikirije umubyeyi we inka ndetse inavuga ko izongerera Kankindi igishoro cy'ibihumbi 200 Frw, ikanamuha inzu yo gukoreramo nk'umwana wahuye n'ibibazo ariko agashaka icyamuteza imbere.
Mu mpera za Mutarama 2022, MTN yashyikirije Kankindi inzu yo gukoreramo yashyizwe mu Murenge wa Gahanga mu Karere ka Kicukiro aho asanzwe akorera akazi ke ndetse ahabwa n'ibihumbi 200 Frw yemerewe byo kongera igishoro.
Kankindi yavuze ko MTN yamubereye umubyeyi, yizeza ko inkunga yahawe azayibyaza umusaruro.Ati 'Ndashimira MTN ko yamperekeje ubwo najyaga guhura n'umuryango wanjye ndetse ibikora nk'umubyeyi. Yampaye ibyo kurya, imyambaro none iracyantekerezaho nk'ababyeyi.'
'Yanyemereye inkunga y'ibihumbi 200 Frw narabibonye, baravuze ngo umwana wacu ntakwiye kwicara ku muhanda bampa inzu, none nayibonye. Ndashimira MTN mbikuye ku mutima.'
Umukozi w'Ishami rishinzwe Imikoranire n'izindi nzego muri MTN Rwanda, Kayitare David, yavuze ko bashishikajwe n'iterambere rye, anamusaba gukora cyane akabasha kwiteza imbere.
Ati 'Icyo tumusaba ni ukubyaza umusaruro inkunga ahawe ikamufasha kwiteza imbere kandi tumwijeje kuzakomeza kumukurikirana mu bikorwa bye nk'umu-agent.'
Kankindi nyuma yo kubonana n'umuryango we yakomeje ubuzima ndetse n'akazi ke. Yemeza ko nyuma y'amezi atandatu inkunga yahawe na MTN azaba amaze kuyibyaza umusaruro ugaragara.
Indi nkuru wasoma: Byari amarira y'ibyishimo, ubwo Uwamahoro yabonanaga n'umuryango we nyuma y'imyaka 27 (Video)
Byari ibyishimo ubwo Kankindi yashyikirizwaga inkunga yemerewe na MTN Rwanda -
Perezida Kagame yakiriye Prof John Latham uyobora Kaminuza ya Coventry – #rwanda #RwOT
Umukuru w'Igihugu yakiriye Prof Latham wari uherekejwe n'Umuyobozi w'ishami ry'iyi kaminuza muri Afurika, Prof Silas Lwakabamba.
Ibiro by'Umukuru w'Igihugu, Village Urugwiro byatangaje ko Perezida Kagame yakiriye aba bayobozi kuri uyu wa Gatatu tariki 2 Gashyantare 2022.
Ibiganiro aba bombi bagiranye byanitabiriwe na Minisitiri w'Uburezi, Dr Uwamariya Valentine ndetse n'Umuyobozi Wungirije w'Urwego rw'Igihugu rw'Iterambere (RDB), Niyonkuru Zephanie.
Muri Nyakanga 2021, nibwo Kaminuza ya Coventry, yashyizeho Prof Silas Lwakabamba nk'Umuyobozi Mukuru wayo ku Mugabane wa Afurika.
Kaminuza ya Coventry [L'université de Coventry/ Coventry University] ni ishuri ryo mu Bwongereza ryashinzwe mu 1843 riherereye mu Mujyi wa wa Coventry.
Ubu yakira abanyeshuri basaga ibihumbi 17 biga ibijyanye n'ubwubatsi bugezweho cyane ku bijyanye no gukora imodoka [l'ingéniérie et du design automobile].
Kaminuza ya Coventry kandi ifite abasaga ibihumbi 19 biga mu cyiciro cya kabiri cya kaminuza.
Mu 2017 iri shuri ryatoranyijwe nka kaminuza isumba izindi mu zigezweho [modern university] mu Bwongereza nkuko byatangajwe n'ikinyamakuru Guardian University Guide.
Iri shuri rikoresha ingengo y'imari isaga miliyoni 787.5 $ ni ukuvuga asaga miliyari 787 mu mafaranga y'u Rwanda.
Perezida Kagame yakiriye Umuyobozi wa Kaminuza ya Coventry, Prof. John Latham -
Sadio Mane yafashije Senegal kugera ku mukino wa nyuma wa AFCON2021 ku nshuro ya 2 yikurikiranya #rwanda #RwOT
Senegal yaherukaga kugera ku mukino wa nyuma muri AFCON iheruka 2019 igatsindwa na Algeria igitego 1-0,yongeye kugera kuri iyi ntwambwe ikomeye ibifashijwemo na kizigenza Sadio Mane wagize umukino mwiza cyane.
Ikipe ya Burkina Faso yagize irushanwa ryiza ritagomba kwibagirana, ariko babuze abakinnyi bari ku rwego nk'urw'iyi Senegal bakinaga.
Senegal niyo yatangiye umukino itera ubwoba mukeba,ubwo Saliou Ciss w'inyuma ku ruhande rw'ibumoso yateraga ishoti rica hejuru y'izamu ku munota wa 15.
Nyuma yigihe gito Mane yabonye uburyo bwa mbere bwo kubona igitego, aariko ishoti rye ritari rifite imbaraga rifitwa n'umuzamu wa Burkina Faso Herve Koffi.
Ku munota wa 26 Cheikhou Kouyate yabonye amahirwe akomeye ku mupira wari uturutse muri koroneri,awukoraho ujya mu izamu ariko Issa Kabore awukuraho.
Hashize akanya, Bamba Dieng yateye umupira n'umutwe mu rubuga rw'amahina nyuma yo guhura n'umupira wari utewe neza na Ciss ibumoso.
Burkina Faso yagize ikibazo gikomeye cy'imvune nyuma y'igice cy'isaha ubwo Koffi yagonganaga na Kouyate mu kirere mazeakurwa mu kibuga bamuteruye. Ku munota wa 35, Farid Ouedraogo yamusimbuye.
Burkina Faso yateye ishoti ryayo rya mbere rigana mu izamu ku munota 39, ubwo umupira watewe na Bertrand Traore wahagaritswe na myugariro maze usanga Hassan Bande,atera ishoti rikomeye,umunyezamu Mendy awukuramo.
Senegal yasabye penaliti ku munota 42 ubwo Mane yahanganiraga umupira na Kabore akagwa hasi mu rubuga rw'amahina,ariko umusifuzi wabibonye yanga iki icyifuzo cyabo.
Ubwo igice cya mbere cyari kigiye kurangira,Senegal yahawe umupira ubwo umupira byavugwaga ko Tapsoba yawukozeho gusa isuzuma rya VAR ryemeje umusifuzi Bamlak Tessem Wetesa ko iki cyemezo atari cyo yanga iyo penaliti.
Igice cya mbere cyarangiye ari 0-0 ariko Senegal iri hejuru ya Burkina Faso.
Amahirwe yisutse cyane mu gice cya kabiri kuri Senegal yakomeje kotsa igitutu Burkina Faso,amaherezo ibona igitego ku munota wa 70 gitsinzwe na Abdou Diallo ku mupira yahawe na Kalidou Koulibaly wari ugerageje gushaka umupira yirakaraze ahubwo usanga mugenzi we ahagaze neza awushyira mu rushundura.
Hashize iminota 6,Senegal yinjije igitego cya kabiri gitsinzwe na Bamba Dieng ku mupira mwiza yahawe na Sadio Mane wacenze myugariro wa Burkina Faso yinjira mu rubuga rw'amahina ahereza Dieng wari kumwe na Gana Gueye awushyira mu izamu.
Ku munota wa 82,Burkina Faso yabonye igitego cyatsinzwe na Blati Toure n'ivi nyuma y'umupira mwiza yahawe na Tapsoba mu rubuga rw'amahina.
Ku munota wa 87,Sadio Mane yakuyeho icyizere cya Burkina Faso ubwo yatsindaga igitego cya 3 cyaturutse ku burangare bwa ba myugariro b'iki gihugu bihereye umupira Ismaila Sarr,ahereza Mane asigarana n'izamu wenyne aratsinda.
Kuri uyu wa kane nijoro, hazaba kimwe cya kabiri cya kabiri ubwo Kameruni izahura na Misiri.Uzatsinda akazahangana na Senegal ku mukino wa nyuma kuri Stade Olembe i Yaounde ku cyumweru, tariki ya 6 Gashyantare.
-
U Rwanda na Leta Zunze Ubumwe z'Abarabu byemeranyije ubufatanye mu bya politiki – #rwanda #RwOT
Aya masezerano yasinyiwe i Dubai mu gitondo cyo kuri uyu wa Gatatu tariki 2 Gashyantare 2022, aho u Rwanda rwitabiriye Imurika Mpuzamahanga rya Dubai Expo.
Mu isinywa ry'aya masezerano, u Rwanda rwari ruhagarariwe n'Umunyamabanga wa Leta muri Minisiteri y'Ububanyi n'Amahanga n'Ubutwererane, ushinzwe Umuryango wa Afurika y'Uburasirazuba, Prof Nshuti Manasseh.
Ni mu gihe UAE yari ihagarariwe n'Umunyamabanga wa Leta muri Minisiteri y'Ububanyi n'Amahanga n'Ubutwererane, Sheikh Shakhbout Nahyan Al Nahyan.
Ibihugu byombi byemeranyije ubufatanye n'imikoranire mu bijyanye n'ubujyanama mu bya politiki nk'uko byatangajwe na Minisiteri z'Ububanyi n'Amahanga ku mpande zombi.
Umuhango wo gusinya amasezerano ku mpande zombi kandi witabirwe na Minisitiri w'Ubucuruzi n'Inganda, Habyarimana Béata.
Ibihugu byombi bisanzwe bifitanye umubano n'ubufatanye mu nzego zirimo uburezi aho nko mu 2002 Umuryango Al Maktoun Foundation, wafashishe ibigo by'amashuri birimo Hamdan Bin Rashid Al Maktoum Girls Secondary School for Sciences giherereye i Muhanga na Hamdan Bin Rachid Kimisange Secondary School kiri muri Kigali.
Hatanzwe n'amahirwe atandukanye ku banyeshyuri b'Abanyarwanda bajya kwiga muri ibi bihugu bigize UAE, aho mu 2018 hagiye 20 naho mu 2019 hagenda 10.
U Rwanda na Leta Zunze Ubumwe z'Abarabu kandi bifatanye mu bindi birimo ishoramari, ubucuruzi, ubukerarugendo no gutwara abantu n'ibintu mu kirere.
U Rwanda kandi ni kimwe mu bihugu 192 byitabiriye iri murikagurisha ryatangiye tariki 1 Ukwakira 2021 rikaba rizasozwa ku wa 31 Werurwe 2022 mu Mujyi wa Dubai.
Prof Nshuti Manasseh ubwo yashyiraga umukono ku masezerano
Umunyamabanga wa Leta muri Minisiteri y'Ububanyi n'Amahanga n'Ubutwererane muri UAE, Sheikh Shakhbout Nahyan Al Nahyan ashyira umukono kuri aya masezerano
U Rwanda na Leta Zunze Ubumwe z’Abarabu byemeranyije ubufatanye mu bya politiki
Abayobozi ku mpande zombi bagiranye ibiganiro nyuma y’isinywa ry’amasezerano
Minisitiri w’Ubucuruzi n’Inganda w’u Rwanda yitabiriye umuhango w’isinywa ry’amasezerano hagati y’u Rwanda na UAE
Prof Nshuti Manasseh yahagarariye u Rwanda mu isinywa ry’amasezerano hagati yarwo na Leta Zunze Ubumwe z’AbarabuAmafoto: Mucyo Serge