Author: webrwanda

Ni nyuma y'uko atunganyije amashusho y'indirimbo 'Why' The Ben yakoranye na Diamond, imaze kurebwa n'abantu barenga miliyoni 4 kuri Youtube.

Mu Ukwakira 2021, nibwo Julien yatangiye urugendo rwo guhuriza abahanzi mu ndirimbo imwe, mu rwego rwo kuzamura izina rye na shene ye ya Youtube.

Yahereye ku ndirimbo yise 'Kamwe' ikoze mu njyana y'amapiano irimo abahanzi nka Social Mula, Kenny Sol, Davis D, Bushali, Bull Dogg, B-Threy, Khalfan, Confy, Alyn Sano, Li john na Papa Cyangwe.

Ni indirimbo yihariye impera za 2021 kugeza n'uyu munsi, kuko icyumvikana ahantu hatandukanye icurangwa, ikomeza kwizihira abanyabirori.

Julien ni Producer w'Umunyarwanda ariko ukorera mu Bubiligi, afata amashusho y'indirimbo, filime n'ibindi bigendanye na cinema.

Indirimbo 'Why' yakoreye The Ben na Diamond yatumye umwe mu bareberera inyungu za Alikiba amwandikira, amushimira ku kazi katoroshye yakoze.

Uyu ni nawe wamuhuje na Alikiba batangira kuganira ku ndirimbo yifuzaga ko bakorana. Julien yabwiye INYARWANDA ko yari yabanje gutekereza gukorana iyi ndirimbo n'umwe mu bahanzi bo muri Wasafi, ariko abona bitatanga umusaruro bitewe n'uko The Ben yari amaze gukorana na Diamond.

Ati “Naravuze nti byaba byiza nkoranye n’umuhanzi wo hanze kandi ufite izina ryihagazeho. Ni uko rero Ali Kiba naje kumugezaho igitekerezo aracyakira.”

Julien avuga ko aba asanzwe afite injyana z'indirimbo yacurishije zifite na 'melody'. Rimwe na rimwe ngo umuhanzi ashobora gusanga yanateguriwe amagambo aza kuririmba, we akagenda ashyiramo ijwi rye gusa.

Ati 'Ni muri ubwo buryo rero indirimbo yitwa iyanjye. Ubundi urebye nkora nka Dj Khaled, Dj Snake. Hari aba Dj ubona bakora muri ubu buryo agakorana n’abahanzi ariko bataririmbamo. Nshobora kuvugamo nko mu ntangiriro y’indirimbo cyangwa se nkavugamo ijambo runaka, kugira ngo nsinye ku ndirimbo umuntu uzajya ayumva azajye avuga ati uyu ni Julien.'

'Si njyewe njyenyine waba ubikoze ariko ndacyeka ari njye ‘Director’ wa mbere waba ubikoze, kuko nabikoze kuri ‘Kamwe’ bwa mbere.”

Julien avuga ko yafashe umwanya uhagije wo kumvisha Alikiba indirimbo afite, hanyuma Alikiba ahitamo indirimbo imwe yemera ko ariyo bazakorana.

Akomeza avuga ko ubu ari kwitegura gutangira gukora iyi ndirimbo mu buryo bw’amajwi n’amashusho, kandi ko bitazamugora kuko ‘maze kugaragaza ko nshoboye ndamutse mpawe umwanya’.

Producer Julien avuga ko umushinga w'iyi ndirimbo ye uzajya hanze mu mpeshyi ya 2022. Ati 'Umushinga w’indirimbo uri gukorwa, nditegura kuyakira nibura muri Gicurasi ikajya hanze mu mpeshyi ya 2022, kuko ndashaka ko izaba indirimbo y’impeshyi.”

Julien ni we watunganyije amashusho y'indirimbo 'Only You' ya The Ben yakoranye na Ben Kayiranga yakomeje izina rye.

Mu 2014, nibwo uyu musore yashinze studio ye y'umuziki yise 'BproudMusic' iherereye mu Bubiligi, aho amaze gukorana n'abahanzi barimo Marina, Social Mula, Big Fizzo, Bull Dog, Mico The Best n'abandi.

Julien yavukiye kandi akurira mu Rwanda. Nyuma yo kurangiza amashuri abanza, yagiye kwiga kuri ESAPAG kugeza mu 2011 aho yavuye we n'umuryango we bajya gutura mu Bubiligi.

Yakomereje amashuri ye mu Bubiligi ku kigo cyitwa Vilgo asoza amasomo mu Ishami rya 'Computer Science Management and Accouting'. 

Julien yavuze ko yari yabanje gutekereza gukorana indirimbo n'umuhanzi wo muri Wasafi ariko asanga bitatanga umusaruro cyane, ahitamo Alikiba Alikiba yemereye Julien Bmjizzo ko bazakorana indirimbo igomba gusohoka mu mpeshyi ya 2022 

Julien avuga ko gukorera indirimbo The Ben na Diamond byamwongereye ubumenyi no kwizerwa mu kazi ke ka buri munsi

KANDA HANO UREBE AMASHUSHO Y'INDIRIMBO 'KAMWE'

 “>

KANDA HANO UREBE INDIRIMBO 'WHY' YATHE BEN NA DIAMOND

 “>

Ibihano byari byafatiwe KNC byagumyeho

Komisiyo y’Ubujurire muri FERWAFA yateranye kuri uyu wa gatanu tariki ya 04 Gashyantare 2022 mu rwego rwo gusuzuma no gufata ibyemezo ku bujurire bwatanzwe ku byemezo Komisiyo ishinzwe imyitwarire iherutse gufatira Bwana KAKOOZA NKURIZA Charles, ikipe ya Etincelles FC n’abakinnyi bayo ndetse n’Ikemezo cy’Akanama Gashinzwe Gukemura amakimbirane ku kibazo cy’umukinnyi Armel Ghislain hagati ya Kiyovu na Gasogi utd.

1. Ubujurire bwa KAKOOZA NKURIZA Charles

Komisiyo y’Ubujurire yasanze kuba Bwana KAKOOZA NKURIZA Charles ataritabye ku wa 29/01/2022 Komisiyo nyuma yo gutumizwa mu buryo bwemewe n’amategeko kandi ariwe wajuriye bigaragaza ko nta nyungu abona agifite kukuba yajurira bityo yanzura ko Ikemezo cya Komisiyo ishinzwe imyitwarire kigumyeho mu ngingo zacyo zose.

Komisiyo ishinzwe imyitwarire yari yahanishije Bwana KAKOOZA NKURIZA Charles igihano cyo guhagarikwa imikino 8 harimo 2 isubitse ndetse n’ihazabu ry’ibihumbi ijana na mirongo itanu (150,000 Frw) nyuma yo kwemeza ko yakoze amakosa yo gusebya Perezida wa Kiyovu SC no gutesha agaciro umusifuzi.

2. Ubujurire bwa Etincelles FC

Nyuma yo kujuririra ikemezo cya Komisiyo y’imyitwarire cyo kudakinira umukino umwe ku kibuga cyayo ndetse n’ikirebana no guhagarika abakinnyi bayo BIZIMANA Omar, MUDEYI Souleyman na UWIHOREYE Ismael kubera imyitwarire idahwitse bagaragaje ku mukino Ikipe ya Etincelles FC yakinnye na AS Kigali ku itariki ya 12 Ukuboza 2021. Komisiyo y’Ubujurire yasanze nubwo ETINCELLES FC amakosa ayihama yaragerageje kwitwara neza mu kurinda ko abasifuzi basagarirwa bityo ikaba ari impamvu yo kugabanyirizwa ibihano aho kudakinira umukino ku kibuga cyayo ikaba yahanishijwe gukina umukino umwe wayo ukurikira nta bafana.

Ku birebana n’ibihano byari byahawe abakinnyi, Komisiyo yasanze BIZIMANA Omar na UWIHOREYE Ismael barasagariye abasifuzi nk’uko binagaragara mu mashusho yafashwe ku mukino bityo ibihano bari bafatiwe na Komisiyo y’Imytwarire ibigumishaho mu gihe MUDEYI Souleyman yakuriweho ibihano nyuma yo kubona ko ntaho agaragara mu makosa yo gusagagarira abasifuzi.

3. Ubujurire bwa Kiyovu ku kibazo cy’umukinnyi Ghislain Armel

Ku bijyanye n’ubujurire bwa Kiyovu ku kemezo cy’Akanama Gashinzwe Gukemura amakimbirane cyo ku wa 24/11/2022 kirebana n’ikibazo cy’umukinnyi Ghislain Armel iyo kipe ivuga ko Gasogi yamusinyishije mu buryo butemewe n’amategeko kuko amasezerano ye yaratararangira aho Akanama kemeje ko ibyo Gasogi yakoze nta makosa arimo kuko umukinnyi yayisinyiye asigaje amezi 2 ngo amasezerano ye arangire, Komisiyo yasanze nta nyungu uwajuriye ku bujurire bwe nyuma yo kubona ko atitabye ntanagaragaze impamvu yatumye atitaba, bityo yemeza ko ikemezo cy’Akanakama Nkemuramakimbirane kigumyeho

Umunyamabanga Uhoraho muri Minisiteri y’Ubutegetsi bw’Igihugu, Dusengiyumva Samuel, wasoje ayo mahugurwa, yasabye abo ba DASSO gushyira imbaraga mu gusigasira umutekano, binyuze mu gutanga serivisi nziza mu baturage.

Yabasabye kandi gufasha Inzego z’Ibanze gushyira mu bikorwa gahunda zitandukanye zo kuzamura imibereho myiza, harimo gukura abana mu muhanda bagasubizwa mu ishuri.

Hari kandi kurwanya ibiyobwabwenge n’ibindi bibazo bibangamiye imibereho myiza y’abaturage.

Abayobozi batandukanye bitabiriye uwo muhango

José Maria Bakero ategerejwe mu Rwanda

Urwo ruzinduko rukaba ruje mu rwego rw’ubufatanye mu iterambere ry’umupira w’amaguru, hamwe n’Ishyirahamwe ry’Umupira w’Amaguru mu Rwanda (FERWAFA), nk’umwe mu bashinzwe gushakira abakinnyi ikipe ya Barcelona (Scouting director).

FERWAFA) yatangaje ko tariki 8 Gashyantare 2022, uwo munyabigwi azagirana umwiherero n’abatoza b’amakipe yo mu kiciro cya mbere mu bagabo no mu bagore, ndetse n’abagize 'staff technique’ y’ikipe y’igihugu.

Biteganyijwe kandi ko azasura amarerero y’umupira w’amaguru atandukanye, ndetse akanitabira imikino inyuranye ya Shampiyona mu gihe azaba ari mu Rwanda.

Uwo munyabigwi kandi azasura Pariki y’Ibirunga n’iy’Akagera ndetse n’Urwibutso rwa Jenoside rwa Kigali ruherereye ku Gisozi, mu rwego rwo kunamira abazize Jenoside yakorewe Abatutsi mu 1994.

José Maria Bakero Escudero, yamenyekanye cyane mu ikipe ya FC Barcelona izwi nka Dream Team, hagati y’umwaka wa 1988 na 1997, akayikinira imikino 329 atwara ibikombe 13.

José Maria Bakero yatwaye ibikombe bitari bike

Izo ndwara zitwa indwara zititaweho kuko zigira ingaruka zikomeye ku buzima bw’abatuye mu bihugu bikennye n’ibikiri mu nzira y’amajyambere, nyamara zikaba zaramaze igihe kinini mu mateka y’Isi zidahabwa uburemere bwazo.

Zibonekamo ubuganga (dengue), inzoka zo mu nda (schistosomiasis/bilharziasis), indwara iterwa n’udukoko dushobora gutera ubuhumyi (trachoma), indwara yitwa leishmaniasis, ibisazi biterwa no kurumwa n’imbwa (rabies), indwara y’ibisebe (Buruli ulcer) n’uruheri (yaws).

Hari kandi ibibembe (Hansen disease), Chagas disease, indwara y’umusinziro (Human Afurican Trypanosomiasis), cysticercosis, dracunculiasis (guinea-worm disease), echinococcosis, indwara ziterwa n’ibyo kurya byanduye (foodborne trematode infections), imidido (lymphatic filariasis) n’ubuhumyi buterwa n’umwijima (onchocerciasis).

Minisiteri y’Ubuzima ivuga ko izamaze kurandurwa mu Rwanda uko ari esheshatu zirimo indwara z’uruhu eshanu zirimo iy’uruheri (yaws), ubuhumyi buterwa n’umwijima (onchocerciasis), imidido (lymphatic filariasis), ibibembe (leprosy), n’imyate (Mycetoma) n’indwara y’umusinziro (Human Afurican Trypanosomiasis).

Udukoko dutera ubwo burwayi akenshi duterwa no kuba bakoresha amazi yanduye, kuba bafite imiturire idahwitse kandi yuzuye umwanda. Abana ni bo bakunze kwibasirwa n’indwara nyinshi muri zo aho usanga zica amamiliyoni buri mwaka, rimwe na rimwe zigatera ububabare, ubumuga n’ihungabana rituruka ku guhezwa muri sosiyete.

Minisiteri y’Ubuzima ishimangira ko uwo ari umusaruro w’imbaraga Leta y’u Rwanda ishyira mu guteza imbere inzego z’ubuzima no guhindura imibereho y’abaturage ikarushaho kunoga no kujyana n’igihe.

Ni muri urwo rwego u Rwanda rwiyemeje kuba rwaranduye n’izindi ndwara zititaweho zikigaragara mu gihugu nk’inzoka zo mu nda n’izindi, bitarenze mu mwaka wa 2030.

Amakuru y’indwara zimaze kurandurwa yagarutsweho ku Cyumweru taliki ya 30 Mutarama, na Minisitiri w’Ubuzima Dr. Ngamije Daniel, ubwo hizihizwaga Umunsi Mpuzamahanga washyiriweho kurwanya indwara zititaweho uko bikwiye.

Madamu Jeannette Kagame we asanga guhangana n’ibibazo by’ubuzima bisaba kubaka inzego zifite ubushobozi kandi zihora zihanga udushya nk’uko yabigarutseho mu butumwa yatanze kuri uwo munsi.

Madamu Jeannette Kagame yagize ati: 'Nubwo tucyugarijwe n’icyorezo cya COVID-19, indwara zititaweho uko bikwiriye (NTDs) nazo ziracyari ikibazo gikomeye ku mibereho y’abaturage bacu. Kugira ngo tubashe guhangana n’ibi bibazo by’ubuzima ntacyo dusize inyuma, tugomba kubaka inzego zifite ubushobozi kandi zihora zihanga udushya.'

Yavuze ko inzira ikiri ndende ariko hashimwa umurimo mwiza umaze gukorwa ku bufatanye n’abakora mu nzego z’ubuzima, abayobozi mu nzego z’ibanze n’abafatanyabikorwa bandi.

Ati: 'Biduha icyizere ko bitarenze 2030 tuzaba twamaze kugera ku ntego z’amasezerano yiswe Kigali Declaration ku bijyanye n’indwara zititaweho uko bikwiriye (NTDs).'

Itangazo rya Kigali ku kurandura indwara zititaweho uko bikwiye (Kigali Declaration on neglected tropical diseases (NTDs), ryashyizweho umukono mu mpera z’ukwezi gushize.

Iryo tangazo rije rikurikira irya London ryasinywe ku ya 30 Mutarama 2012, rikaba ryarafashije kugera ku ntego z’Ishami ry’Umuryango w’Abibumbye ryita ku Buzima (OMS/WHO) z’icyerekezo 2020.

Itangazo rya Kigali ryitezweho gufasha Isi kugera ku ntego z’icyerekezo 2030 n’Intego z’Iterambere Rirambye (SDGs) aho OMS yashushanyije icyerekezo cyo kurandura burundu ku Isi indwara zititaweho uko bikwiye.

Icyo gishushanyo mbonera cya OMS kigaragaza ibisabwa mu buryo bwa tekiniki, ariko Itangazo rya Kigali ryo rirashimangira ubushake bwa Politiki bwo gukora ibisabwa kugira ngo intego zigerweho.

Kuri uyu wa Gatanu ni bwo hasozwaga imikino ibanza ya shampiyona y’icyiciro cya mbere mu Rwanda, aho ikipe ya Rutsiro kuri Stade Umuganda yari yakiriye APR FC mu mukino w’ikirarane.

APR FC yatsinze igitego cya mbere ku munota wa 45 w’igice cya mbere, ku ishoti rikomeye ryatewe na Mugisha Gilbert umunyezamu wa Rutsiro ntiyabasha kugarura umupira.

Ku munota wa 61 APR FC yatsinze igitego cya kabiri cyatsinzwe na Bizimana Yannick. Ikipe ya Rutsiro yabonye amahirwe yo kwishyura aho penaliti ku munota wa 82 n’uwa 86, ariko zose irazihusha.

APR FC isoje imikino ibanza iyoboye urutonde rwa shampiyona n’amanota 34, igakurikirwa na Kiyovu Sports ifite 29, Rayon Sports ikaza ku mwanya wa gatatu n’amanota 26.