Author: webrwanda

Nyuma y’umukino Rayon yatsinzwemo na Kiyovu Sports Jorge Paixão Santos utoza Rayon Sports yatangaje ko yifuza kugarura Rayon Sports ku gasongero ariko bikazaba umwaka utaha. Yagize ati” Igitekerezo cyanjye ubu ni ukongera gufasha Rayon Sports kongera kujya ku gasongero, bisaba igihe, bizanasaba kurangiza iyi shampiyona, tugategura neza ahazaza.”

Rayon Sports ntirabasha kubona intsinzi mu mikino 4 iheruka ya shampiyona aho yanganyije na APR FC, inganya na Etoile de L’Est, inganya na Espoir FC none itsinzwe na Kiyovu.

Umuyobozi wa Rayon Sports ubwo yerekanaga umutoza mukuru yatangaje ko Rayon Sports igomba kwegukana ibikombe byose bikinirwa mu Rwanda gusa bisa naho Shampiyona itangiye kwanga kuko ubu Rayon Sports na Kiyovu Sports harimo amanota 15 kandi Rayon Sports ikomeje kubura intsinzi.

Source : https://inyarwanda.com/inkuru/115627/jorge-paixao-utoza-rayon-sports-arashaka-kuyisubiza-ku-gasongero-115627.html

Ibi byemejwe mu nama yahuje aba bayobozi ku mpande zombi yabereye mu Mujyi wa Goma aho Umuyobozi w'Akarere ka Rubavu, Kambogo Ildephonse yari yasuye mugenzi we w'Umujyi wa Goma, Commissaire Superieur Kabeya François Makosa.

Muri iyi nama bemeje gushyiraho uburyo bwo guhuza imikoranire bagahana amakuru ku buryo bwa hafi bareba imbogamizi zishobora kubangamira ubucuruzi bwambukiranya umupaka no gukorera hamwe mu kurwanya magendu n'ubujura.

Commissaire Superieur Kabeya François Makosa yavuze ko iyi mikoranire igomba guhoraho bikagera ku iterambere ry'Akarere k'Ibiyaga Bigari muri rusange.

Ati 'Iyi mikoranire nifuza ko yavamo umurongo w'ibiganiro bihoraho bizana amahoro n'umutekano biganisha ku iterambere mu Karere k'Ibiyaga Bigari.'

Umuyobozi w'Akarere ka Rubavu Kambogo Ildephonse agendeye ku iruka ry'ikirunga cya Nyiragongo aho abaturage ba Goma bahungiye i Rubavu yavuze ko amateka yerekana ko hari byinshi bakwiye gukorera hamwe.

Nk'uko imibare ituruka mu Karere ka Rubavu ibigaragaza kuri ubu abambuka ku mupaka muto wa Petite Barrière ni 13.800 mu gihe mbere ya Covid-19 hambukaga 55.000 ku munsi.

Ku mupaka wa La Corniche (Grande Barrière) hambuka abantu hagati ya 800 na 1200 mu gihe hanyuraga hagati ya 8000 na 10.000 na ho umupaka wa Kabuhanga ho hanyura abantu hagati ya 400 na 600 ku munsi.

Abayobozi ku mpande zombi bahuriye mu biganiro bigamije kunoza imikoranire

Intumwa z’u Rwanda zakiriwe ku mupaka munini

Commissaire Superieur Kabeya François Makosa yavuze ko iyi mikoranire igomba guhoraho bikagera ku iterambere ry'Akarere k'Ibiyaga Bigari muri rusange

Meya Kambogo yatemberejwe Umujyi wa Goma

Umuyobozi w’Akarere ka Rubavu, Kambogo Ildephonse, yavuze ko Nyiragongo yerekanye ko Imijyi yombi igomba gufatanya

---

Source : http://igihe.com/amakuru/u-rwanda/article/abayobozi-ba-goma-na-rubavu-bemeranyijwe-ubufatanye-mu-kurwanya-magendu-n

Umutoza wa Rayon Sports Jorge Paixão nyuma yo gutsindwa na Kiyovu Sports, yavuze ko iyi kipe ikomeye ikwiye igikombe ndetse abaye ari we ugitanga yakiyiha.

Ibitego bya Bigirimana Abedi na Muhozi Fred byafashije Kiyovu Sports gutsinda mukeba Rayon Sports mu mukino w’umunsi wa 22 wa shampiyona ibitego 2-0, ni umukino wabaye ku gicamunsi cyo ku wa Gatandatu tariki 19 Werurwe 2022.

Nyuma yo gutsindwa uyu mukino, umutoza wa Rayon Sports , Jorge Paixão bavuze ko batsinzwe n’ikipe ikomeye ndetse ku giti cye abona ari yo ikwiye igikombe cya shampiyona.

Ati “Ku bwanjye Kiyovu Sports niyo nziza muri shampiyona yatwara igikombe kuko ni nziza, itegurwa neza cyane, abakinnyi beza cyane, umutoza mwiza, bakoze akazi keza niyo mpamvu bari ku mwanya wa mbere.”

Kugeza ubu Kiyovu Sports iri ku mwanya wa mbere n’amanota 50 irusha APR FC ya kabiri amanota 5, gusa yo ntirakina umukino w’umunsi wa 22.

Umutoza wa Rayon Sports yasabiye Kiyovu Sports igikombe

Source : http://isimbi.rw/siporo/article/umutoza-wa-rayon-sports-yayamanitse-asabira-kiyovu-sports-igikombe

Minisiteri y'Abakozi ba Leta n'Umurimo (MIFOTRA), iratangaza ko nta kigo cya Leta kizongera gukoresha ikizamini cy'akazi cyanditse hatifashishijwe ikoranabuhanga, mu rwego rwo koroheraza abapiganirwa imyanya y'akazi.

Ubusanzwe ikizamini cy'akazi cyanditse cyakorwaga abapiganirwa bahabwa uruparo ruriho ibibazo hamwe n'ikaye yo gusubirizamo, barangiza bakabishyikiriza abahagarariye ibizamini, ikaye basubirijemo ikabikwa ahabugenewe, bakazategereza igihe bizakosorerwa, hakabaho n'igihe cyo gutangaza amanota.

Ni uburyo bwatwaraga igihe kitari munsi y'ukwezi, kugira ngo uwapiganiwe umwanya w'akazi amenye amonota yabonye mu kizamini cyo kwandika, ibintu bitavugwaho rumwe na benshi mu bapiganirwaga imyanya y'akazi, bagaragazaga impungenge zirimo ko habaho uburiganya.

Kuri ubu ikizamini cyanditse kirakorerwa kuri mudasobwa kandi irimo murandasi, ariko ku buryo bikoranye ikoranabuhanga, ntawe ushobora kugira ikindi afungura kuko imashini ihita ihagarara bigafatwa nko kugerageza gukopera.

Ibi bizamara impungenge zagaragazwaga n'abapiganirwa imyanya y'akazi, bakora ibizamini byanditse, zirimo kutanyurwa n'imikosorere y'ikizamini, kuko umuntu akirangiza gukora ahita abona amanota uwo mwanya, agataha amenye niba yemerewe gukomeza gupiganirwa uwo mwanya cyangwa yatsinzwe.

Uretse kuba ubu buryo buzagabanya umwanya byafataga hakosorwa ibizamini, bizanakuraho ikiguzi cy'impapuro zatwaraga amafaranga atari macye.

Umunyamabanga Uhoraho muri MIFOTRA, Fidel Abimana, avuga ko ubu buryo bwatumye habaho gukorera mu mucyo kurusha mbere, binagabanya umwanya byafataga ugereranyije n'uko byakorwaga mbere.

Ati 'Niba umuntu ari i Rusizi ashaka akazi muri Minisiteri y'ibikorwa remezo bikamusaba ko agomba kuzana impapuro akazikura i Rusizi akazizana kuri Minisiteri, ubwabyo harimo amafaranga ndetse no gutakaza umwanya ku bakandida basaba'.

Akomeza agira ati 'Ikindi twavuga nanone, inzego byarazorohereje kuko ntabwo bagifata umwanya wo gukoresha za mpapuro zigurwa amafaranga, bategura ibizamini, ikindi harimo no gukererwa ugasanga ikizamini kirakozwe,umuntu agategereza ukwezi, abiri cyangwa atatu hakirimo gukosora ibizamini. Ubu sisiteme irakosora uwo mwanya umuntu agisoza ikizamini akabona amanota, bikagabanya na za mpungenge aho abakandida bibazaga bati ese kuki ibi bintu byatinze'.

Uyu muyobozi anavuga ko umutekano w'iryo koranabuhanga rikoreshwa wizewe, kuko nta muntu ushobora gukopera yifashishije murandasi ngo bikunde nk'uko abisobanura.

Ati 'Iyo wafunguye ipaji y'ikizamini, sisiteme iteguye ku buryo imashini itakwemerera kugira ikindi kintu wafungura, yaba inyandiko ziri kuri iyo mashini, cyangwa se kujya kuri murandasi, ku zindi mbuga nkoranyambaga, ntabwo byemera, kuko ikizami kiza kuri mudasobwa yawe, hanyuma kikakwereka ibibazo, ukagenda uhitamo igisubizo nyacyo. Ikizami kiba kigizwe n'ibibazo 50, iyo umaze kubikora, sisiteme ihita iguha amanota ako kanya'.

Inzego za Leta zose zategetswe gukoresha ibizamini byanditse by'akazi muri ubwo buryo bw'ikoranabuhanga, cyeretse mu gihe habayeho impamvu ariko nabwo zikabanza kumenyeshwa komisiyo ishinzwe abakozi ba Leta.

Ahakorerwa ibizamini hagomba kuba hari mudasobwa zujuje ibisabwa, murandasi, umuriro w'amashanyarazi hamwe na moteri yo kwifashisha igihe umuriro waramuka ugiye, kugira ngo ikizamini kidahagarara.

Iryo koranabuhanga rimaze gukoreshwa n'inzego za Leta 44, zishaka abakozi ku myanya 1865, abamaze kurisabiraho akazi bagera ku 541.955, naho abemerewe gukora ibizamini ni 245000, mu gihe abakabonye ari 12.041, n'ubwo ritaramenywa na benshi kuko ryatangiye gukoreshwa muri Mata 2021.

@KT

The post Impinduka mu mikorere y'ibizamini byanditse by'akazi muri Leta appeared first on IRIBA NEWS.

Source : https://iribanews.rw/2022/03/19/impinduka-mu-mikorere-yibizamini-byanditse-byakazi-muri-leta/

Kuri uyu wa Gatandatu tariki 19 Werurwe 2022 hakomeje shampiyona y'icyiciro cya mbere mu Rwanda hakinwa imikino ibiri, Kiyovu Sports ishimangira umwanya wa mbere nyuma yo gutsinda Rayon Sports ibitego 2-0.

Ni umukino wabereye kuri stade ya Kigali i Nyamirambo, Rayon Sports yakira Kiyovu Sports yari yarayitsinze mu mukino ubanza irongera irayisubira.

Iminota 10 ya mbere yaranzwe no gusatirana ku makipe yombi, aho Rayon Sports binyuze ku ruhande rw'iburyo rwa Nizigiyimana Karim, yagiye ahindura imipira ariko itagize icyo ibyara imbere y'izamu rya Kimenyi Yves, mu gihe Kiyovu Sports nayo uruhande rw'iburyo rwayo imbere rwari ruriho Bizimana Khamis yagiye ahindura nawe uburyo butagize icyo bubyara.

Ku munota wa 13 Mugenzi Bienvenue yashatse kuroba umuzamu Hakizinana Adolphe, amurenza umupira wakubise umutambiko w'izamu ugarukira Bizimana Khamis, ariko Iranzi Jean Claude umupira awushyira muri koruneri, uyu musore umaze iminsi yitwara neza, ku munota wa 16 yongeye guterera ishoti rikomeye hagati mu kibuga rirongera rifata igiti cy'izamu.

Rayon sports yongeye kugerageza uburyo ku munota wa 22 ku mupira Kwizera Pierrot yahawe na Muhire Kevin, maze agerageza gutera ishoti ariko ryanyuze hejuru y'izamu rya Kimenyi Yves. Ku munota wa 29 ariko Kiyovu Sports yabonye uburyo aho Mugenzi Bienvenue yahaye umupira Emmanuke Okwi ku ruhande rw'ibumoso, agerageza kuroba umuzamu Hakizinana Adolphe ariko umupira awukuramo.

Kiyovu Sports yabonye igitego ku munota wa 34 binyuze kuri kufura yaturutse ku ikosa myugariro Ndizeye Samuel ryakoreye Emmanuel Okwi, inyuma y'urubuga rw'amahina maze kufura iterwa neza na Bigirimana Abedi awushyira mu izamu rya Rayon Sports bibanza gutera urujijo kuri bamwe, kuko inshundura zari zacitse bamwe bagira ngo umupira wagiye hanze ariko umusifuzi Ruzindana Nsoro yemeza ko ari igitego .

Mbere yuko igice cya mbere kirangira Nizigiyimana Karim yahinduye umupira imbere y'izamu rya Kiyovu Sports Musa Essenu ashyizeho umutwe uca ku ruhande, Kiyovu Sports yahise ibona uburyo bwahushijwe na Mugenzi Bienvenue warengeje umupira umuzamu wa Rayon Sports, ariko mu izamu ryambaye ubusa ugarurwa na ba myugwriro ba Rayon Sports, igice cya mbere kirangira ku ntsinzi ya Kiyovu Spots y'igitego 1-0.

Rayon Sports yakinnye neza mu gice cya kabiri yagitangiye isatira maze ku munota wa 46 ibona koruneri ya mbere mu mukino maze yatewe na Muhire Kevin, umupira umuzamu Kimenyi Yves awukuramo usubira kwa Muhire Kevin wateye ishoti umuzamu arongera awukuramo.

Ku munota wa 64 Kiyovu Sports yabonye uburyo bw'igitego ku ishoti ryatewe na Emmanuel Okwi, ariko umupira Hakizinana Adolphe awushyira muri koruneri, uyu musore ukomoka mu gihugu cya Uganda, yongeye kubona uburyo imbere y'izamu ashobora gutera mu izamu ariko ahitamo guha umupira Mugenzi Bienvenue, birangira ba myugariro ba Rayon Sports bawukuyeho.

Musa Essenu yashoboraga kwishyurira Rayon Sports ku munota wa 88, ariko wenyine ari hamwe n'umuzamu Kimenyi Yves, umupira awutera hejuru y'izamu kure. Mu minota ine y'inyongera yongewe ku mukino, Fred Muhozi yatsinze igitego cye cya mbere muri Kiyovu Sports, cyari icya kabiri mu mukino ku mupira yahawe na Emmanuel Okwi witwaye neza muri uyu mukino, maze nawe aroba umuzamu Hakizinana Adolphe, Kiyovu Sports itahukana amanota atatu ashimangira umwanya wa mbere n'amanota 50.

Mu wundi mukino Mukura VS yanganyije na Etoile de l'Est 0-0, yuzuza umukino wa 11 idatsindwa.

@KT

 

The post Kiyovu Sports yanyangiye Rayon Sports appeared first on IRIBA NEWS.

Source : https://iribanews.rw/2022/03/19/kiyovu-sports-yanyangiye-rayon-sports/

Nyampinga w’u Rwanda 2016, Miss Mutesi Jolly yerekanye inkweto zihagaze miliyoni 4 aserukana muri Miss Rwanda 2022.

Uyu munsi nibwo hateganyijwe umuhango wo gutanga ikamba kuri Nyampinga w’u Rwanda 2022 urusha abandi ubwiza, ubwenge n’umuco.

Nyampinga w’u Rwanda 2016 utegerejwe mu bagize akanama nkemurampaka muri uyu muhango ubera muri Intare Conference Arena, yatunguye benshi yerekana inkweto ari buserukane.

Ni inkweto z’agatangaza zihagaze amadorali y’Amerika ibihumbi 3950 ni ukuvuga miliyoni 4 z’amafaranga y’u Rwanda.

Uyu mukobwa uzwiho kurimba, abinyujije kuri Instagram yagize ati “Kwambara neza ni kimwe mu bintu bigaragaza imyitwarire iboneye. Byose ni ukubera umuhango wa nyuma wa Miss Rwanda, ni iki kindi utegereje. “

Izi nkweto zikaba zikozwe mu mitako itandukanye irimo umuringa na zahabu.

View this post on Instagram

A post shared by Miss Rwanda2016 (@mutesi_jolly)

Inkweto yaserukanye muri Miss Rwanda

Miss Mutesi Jolly araseruka asa neza

Source : http://isimbi.rw/imyidagaduro/article/miliyoni-4-mu-birenge-miss-mutesi-jolly-yatunguye-benshi

Ikipe ya Kiyovu Sports yongeye kwerekana ko ishaka guhagarika imyaka 29 imaze idatwara shampiyona y'u Rwanda aho yatsinze mukeba wayo ukomeye Rayon Sports ibitego 2-0 biyifasha kwicara yemye ku mwanya wa mbere muri shampiyona.

Muri uyu mukino w'umunsi wa 22 wa shampiyona wabereye kuri stade ya Kigali i Nyamirambo,Kiyovu Sports yongeye gusubira uyu mukeba wayo barambanye Rayon Sports iyitsinda iyirusha ibitego 2-0.

Ikipe ya Kiyovu Sports yatangiye umukino iri hejuru cyane ariko iza kurangara gato ku munota wa 11 Musa Essenu ahabwa umupira mwiza asigarana n'umunyezamu Kimenyi Yves ariko amuroba nabi uca hejuru.

Ku munota wa 15,ba rutahizamu ba Kiyovu Sports basatiriye izamu,Mugenzi Bienvenue ateye umupira ugarurwa n'igiti cy'izamu.

Ku munota wa 17 w'umukino,Mugenzi Bienvenue yateye ishoti rikomeye ari kure,umupira uragenda ugonga igiti cy'izamu uvamo habura mugenzi we uri hafi ngo asongemo.

Ku munota wa 22,Kwizera Pierrot yagerageje ishoti rikomeye kure ariko umupira uca hejuru y'izamu.

Ku munota wa 28 w'umukino,Okwi yacomekewe umupira mwiza mu rubuga rw'amahina na Mugenzi ariko ateye mu izamu, Adolphe Hakizimana awukuramo.

Ku munota wa 31 w'umukino, ba myugariro ba Rayon Sports bari ku rwego rwo hasi barangaye maze Okwi arabasiga ariko Ndizeye Samuel ahita amutega bituma umusifuzi Ruzindana Nsoro atanga Coup fRnac nziza ya Kiyovu hafi y'urubuga rw'amahina na Ndizeye Samuel ahabwa umuhondo.

Iyi coup Franc yaje guterwa neza na Bigirimana Abedi ku munota wa 34 ayiboza mu izamu umunyezamu Adolphe ntiyabasha kuwukuramo,kiba kibaye igitego cya mbere cya Kiyovu Sports.

Iki gitego cyajijishije benshi kuko umupira wa Abedi wagiye mu izamu uca aho inshundura zari zacitse uvamo bamwe babanza kugira ngo si igitego ariko umusifuzi yari yabibonye neza aracyemeza.

Gutsindwa iki gitego byatumye umutoza wa Rayon Sports abona ko hagati ye hapfuye ahita asimbuza aho Mushimiyimana Mohammed yasimbuwe na Sekamana Maxime ku munota wa 38 kugira ngo asatire.

ku munota wa 41,Musa Esenu yahinduriwe umupira mwiza imbere y'izamu ariko ananirwa kuwushyira mu izamu ryari ririnzwe na Kimenyi Yves.

Ku munota wa 44, Mugenzi Bienvenue yongeye kubona andi mahirwe ku mupira muremure yari acomekewe, aroba umunyezamu Adolphe Hakizimana ariko Habimana Hussein arahagoboka awukuramo. Igice cya mbere cyarangiye ari igitego 1-0.

Rayon Sports yatangiranye impinduka mu gice cya kabiri aho Jean Claude IRANZI yasimbuwe na JMV Muvandimwe mu gihe Mael Dindjek yahaye umwanya Ishimwe Kevin.

Izi mpinduka zahise zigaragaza ko Rayon Sports ije gusatira ndetse bidatinze ku munota wa 47 Muhire Kevin atera ishoti ryakuwemo n'umunyezamu Kimenyi.

Ku munota wa 62,yagerageje ishoti rikomeye ariko umunyezamu Hakizimana Adolphe awukuramo.

Ku munota wa 64,Emmanuel Okwi yasigaranye n'umunyezamu nyuma y'umupira yahererekanyije na Mugenzi Bienvenue basigaranye na myugariro umwe,birangira batakaje aya mahirwe.

Ku munota wa 69, Ishimwe Kevin yahinduye umupira mwiza imbere y'izamu, Musa Esenu ashyiraho umutwe ariko umupira uruhukira mu ntoki za Kimenyi Yves.

Ku munota wa 70, Kiyovu Sports yakoze impinduka za mbere, Bizimana Amisi Coutinho yasimbuwe na Muhoozi Fred, ni nako ku munota wa 76, Mutyaba yasimbuye Benedata Janvier.

Rayon Sports yabonye amahirwe akomeye ku munota wa 88 ubwo abakinnyi bayo bahinduraga umupira imbere y'izamu,uca hagati ya ba myugariro 2 ba Kiyovu,usanga Essenu asigaranye na Kimenyi bonyine ariko amupira awutera nabi cyane, uca hejuru y'izamu.

Aya mahirwe Rayon Sports yateye inyoni yaje kuyazira kuko ku munota wa 2 w'inyongera kuri 4 bashyizeho,Okwi yambuye umupira Hussein awucomekera Muhoozi Fred wasize ab'inyuma ba Rayon Sports atsindira Kiyovu Sports igitego cyiza cyane.

Umukino wahise urangira ari 2-0, Kiyovu Sports ikomeza kuyobora urutonde n'amanota 50 aho iruhije APR FC ya kabiri amanota 5 igomba gukina na Rutsiro FC.

Kuva Juvenal yatangira kuyobora KIYOVU Sports ikinnye na Rayon Sports imikino 5, ayitsinzemo 4 banganya 1.Ku munsi wa karindwi wa shampiyona,nabwo Kiyovu yatsinze Rayon Sports ibitego 2-0

Undi mukino wabaye uyu munsi Etoile de l'Est yanganyije 0-0 na Mukura VS.

Abakinnyi 11 babanjemo ku mpande zombi:

Rayon Sports: Hakizimana Adolphe, Nizigiyimana Karim Makeckenzie, Iranzi Jean Claude, Ndizeye Samuel, Habimana Hussein, Nishimwe Blaise, Kwizera Pierrot, Muhire Kevin, Mushimiyimana Mohammed, Mael Dinjeke na Musa Esenu

Kiyovu Sports: Kimenyi Yves, Serumodo Ally, Dusingizimana Gilbert, Ngendahimana Eric, Ndayishimiye Thierry, Nshimirimana Ismail [Pitchou], Bigirimana Abedi, Bizimana Amisi [Coutinho], Mugenzi Bienvenue na Benedata Janvier

Imikino y'umunsi wa 22 izakomeza ejo

Gicumbi FC vs Police FC
Musanze FC vs AS Kigali
Bugesera FC vs Marines FC
Espoir FC vs Gasogi United
APR FC vs Rutsiro FC
Etincelles FC vs Gorilla FC

Source : https://umuryango.rw/imyidagaduro/imikino/article/kiyovu-sports-yashegeshe-mukeba-wayo-rayon-sports-irushaho-gushimangira-umwanya

Ubuzima bubi gusa nibwo niberamo agahinda kadashira mu maso yanjye Niko kihoreramo.

Nyuma y'imyaka irenga 15 mbuze ababyeyi banjye Bose ngasigarana na barumuna banjye ndetse na bashiki banjye bati.

Kumugoroba natashye naniwe cyane numva nacitse intege ndetse cyane umubiri wanjye wacitse intege bidasanzwe ariko nkomeza kwirwanaho niyumanganya gusa biza kunanira bituma nerekeza Kwa muganga.

Mugitondo cyakare rero nerekeje kwamuganga baransuzuma babura indwara gusa muganga umwe muri bo afata icyemezo cyo kumpima virusi itera SIDA numva nta bwoba mfite kuko nari niyizeye ko nagerageje kwigaya.

Nabaye sohotse mu isuzumiro maze mukanya gato muganga wari wampimye yarampamagaye maze abwira ibintu ntigeze nizera nubu ntarizera ahari nzanarinda nsanga abanyibarutse mu ijuru ntarabyemera.

Muganga yagize ati''ERIC wihangane ukomere kuko ni ibintu bisanzwe bibaho rero ihangane utuze nkubwire ufite ubwandu bwa virus itera SIDA''

Muga ugize uti ngwiki Sinari nasambana narimwe sibyumva nukuri ooooh! Mana yanjye kuki arinjye wahisemo natangiye kuganira na muganga maze ndamubwira si namuhisha antega amatwi nubwo narimfite amarira menshi gusa yarambwiye ngo komeza ube umugabo wibuke uzazane n'abandi bana Bose.

Naratashye mfite agahinda ubwoba amaganya mushiki wanjye muto yaje kumpobera abona meze uko ntarisanzwe arambaza ati ese Dadi bite ko utishimye ndamusubiza nti mfite umunaniro.

Bwarakeye Bose tujyana Kwa muganga maze 2 muri 4 dusanga nabi bafite ubwandu bwa virus itera SIDA.

Nibajije impamvu ababyeyi bacu batatubwiye ibi bintu maze nibaza ukuntu tugiye kujya tubaho gute ntawuhoza undi nahise mbona ukuntu ababyeyi bacu baduhemukiye ndetse cyane.

Babyeyi bacu dukunda namwe mudukunda turabinginze muge mutubwiza ukuri mukiriho tumenye uko twitwara.

Iyi nkuru nyiguhaye ngirango ikwigishe.

Source : https://yegob.rw/ababyeyi-bacu-baraduhemukiye-cyane/

Abakobwa 3 baza guhatanira igihembo cy'umunyempano wahize abandi mu irushanwa rya Miss Rwanda 2022 bamaze kumenyekana aho barakurwamo umwe kuri uyu munsi harasozwa iri rushanwa.

Abakobwa batatu batsinze ni Uwimana Marlene waherukaga gukenyerera ku kayabo k'uwahize abandi muri siporo,Kayumba Darina na Saro Amanda.

Uratsinda muri aba 3 arahembwa akayabo ka 2,400,000 Frw.

Uwimana Marlène yerekanye impano yo gukina 'Karate' aho anafite umukandara wa gatandatu 'Marron' muri uyu mukino.

Kayumba Darina we yagaragaje impano yo kuririmba aho yavanze injyana zitandukanye mu buhanga bwinshi anyura abakunzi b'umuziki nk'uko banakunze kubigaragaza ku mbuga nkoranyambaga.

Uwa gatatu muri aba babashije kugera mu cyiciro cya nyuma ni Saro Amanda,waririmbye anicurangira indirimbo Holy Spirit na Ngirira ubuntu za Meddy.

Uyu mukobwa usanzwe ari Producer no mu buzima busanzwe.

Mu ijoro ryo kuri uyu wa Gatandatu tariki 19 Werurwe 2022 nibwo hatangazwa Nyampinga w'u Rwanda w'uyu mwaka.

Abakobwa 3 baravamo uwahize abandi mu kugaragaza impano muri Miss Rwanda 2022

Source : https://umuryango.rw/imyidagaduro/article/miss-rwanda-2022-abakobwa-3-barahatanira-akayabo-mu-kugaragaza-impano

Kiyovu Sports ikomeje kuyobora urutonde rwa shampiyona, ni nyuma yo gutsinda mukeba wayo mu mukino w’agapingane igitego 2-0 ni ibitego byatsinzwe na Bigirimana Abedi na Muhoozi Fred.

Wari umukino w’umunsi wa 22 washampiyona y’icyiciro cya mbere mu Rwanda umwaka w’imikino wa 2021-22.

Ni umukino amakipe yombi yagiye gukina Kiyovu Sports iyoboye urutonde n’amanota 47 mu gihe Rayon Sports yari iya 5 na 35.

Ni umukino w’agapingane gakomeye kuko nyuma y’uko Rayon Sports iyitsinze muri 2017 ibitego 2-1 ikayimanura mu cyiciro cya kabiri (nubwo itagikinnye), igakurizaho umuhango wo kuyishyingura, uyu munsi byari byitezwe kureba niba yongera kuyitsinda ikayibangamira mu rugamba rw’igikombe irimo.

Kiyovu Sports yigeze kubika Rayon Sports kuri Radio ko yari umugore wayo akaba yapfuye, yagiye gukina uyu mukino nta kibazo na kimwe ifite kuko abakinnyi bayo bose bari bahari.

Ku rundi ruhande Rayon Sports yari yakiriye uyu mukino, yari ifite ibibazo by’imvune aho myugariro Niyigena Clement, Manace Mutatu batakinnye bakaba biyongeraga kuri Onana Willy Essomba Léandre umaze igihe afite ikibazo cy’imvune.

Iminota ya mbere y’umukino, Kiyovu Sports niyo yihariye iminota ubona ko ibonana kurusha Rayon Sports, gusa mu minota 10 ya mbere nta mahirwe afatika yabonetse ku mpande zombi.

Amahirwe ya mbere akomeye muri uyu mukino yabonetse ku munota wa 11 ubwo abakinnyi ba Kiyovu Sports batakazaga umupira ugafatwa na Musa Esenu ateye mu izamu unyura hejuru yaryo.

Ku munota wa 13, Bigirimana Abedi yagerageje ishoti yatereye inyuma y’urubuga rw’amahina ariko umupira unyura hejuru y’izamu ryari ririnzwe na Hakizimana Adolphe.

Ku munota wa 14, Mugenzi Bienvenue yabonye amahirwe ariko ateye mu izamu ukubita igiti cy’izamu, Habimana Hussein wari wakurikiye ahita awukuraho.

Mugenzi Bienvenue, umwe mu bssore ba Kiyovu Sports bahagaze neza, ku munota 16 yagerageje ishoti rikomeye yatereye nko muri metero 26 ariko ku bw’amahirwe make ukubita igiti cy’izamu.

Rayon Sports wabonaga irimo kurushwa, Kwizera Pierrot yaje kugerageza amahirwe ku munota wa 22 ariko ishoti yateye rinyura hejuru y’izamu.

Nyuma yo guhererekanya neza kwa Okwi na Bienvenue, Okwi yacomekewe umupira mwiza mu rubuga rw’amahina ku munota wa 29 ariko ateye mu izamu, Adolphe Hakizimana awukuramo.

Ku munota wa 32 umusifuzi Ruzindana Nsoro nibwo yatanze ikarita ya mbere y’umuhondo yahawe Ndizeye Samuel ku ikosa yakoreye Emmanuel Okwi inyuma gato y’urubuga rw’amahina.

Iri kosa ryahanwe na Bigirimana Abedi wahise ushyira umupira mu rishundura.

Ni igitego cyateje impaka kuko abarayon bavugaga ko umupira wagiye hanze, ni mu gihe umusifuzi Nsoro we yavuze ko umupira wanyuze mu rushundura aho rwacitse. Umukino wahagazeho gato basana aho rwacitse.

Ku munota wa 38, Rayon Sports yakoze impinduka za mbere havamo Mushimiyimana Mohammed hinjiramo Sekamana Maxime.

Iranzi Jean Claude yahawe ikarita y’umuhondo nyuma yo gushaka gukubita umupira Benedata Janvier ku munota wa 40.

Musa Esenu yahinduriwe umupira mwiza imbere y’izamu ku munota wa 41 ariko ananirwa kuwushyira mu izamu ryari ririnzwe na Kimenyi Yves.

Ku munota wa 44, Mugenzi Bienvenue yongeye kubona andi mahirwe ku mupira muremure yari acomekewe, aroba umunyezamu Adolphe Hakizimana ariko Habimana Hussein arahagoboka awukuramo. Amakipe yagiye kuruhuka ari 1-0.

Rayon Sports yatangiye igice cya kabiri ikora impinduka 2, Iranzi Jean Claude na Mael Dinjeke bavuyemo hinjiramo Muvandimwe JMV na Ishimwe Kevin.

Izi mpinduka zafashije Rayon Sports kuko bashyize igitutu kuri Kiyovu aho banabonye amahirwe mu minota ya mbere y’igice cya kabiri ariko ntibayabyaza umusaruro.

Ku munota wa 61, Ishimwe Kevin yacomekewe umupira mwiza yinjira mu rubuga rw’amahina ariko ateye ubwugarizi bwa Kiyovu Sports buwohereza muri Koruneri itagize icyo itanga.

Ku munota wa 63, Pitchou yagerageje ishoti rikomeye ariko umunyezamu Hakizimana Adolphe awukuramo.

Aya mahirwe yakurikiwe n’andi yo ku munota wa 65, ku mupira mwiza wacomekewe Okwi akisanga arebana n’umunyezamu Adolphe wahise wohereza umupira muri koruneri.

Nyuma y’umunota 2, Kiyovu Sports yongeye kubona amahirwe akomeye nabwo Okwi yisanze asigaranye n’umunyezamu ariko aho gutera mu izamu aha Mugenzi Bienvenue, ateye mu izamu ugarurwa n’ubwugarizi.

Ku munota wa 69, Ishimwe Kevin yahinduye umupira mwiza imbere y’izamu, Musa Esenu ashyiraho umutwe ariko umupira uruhukira mu ntoki za Kimenyi Yves.

Ku munota wa 70, Kiyovu Sports yakoze impinduka za mbere, Bizimana Amisi Coutinho yasimbuwe na Muhoozi Fred, ni nako ku munota wa 76, Mutyaba yasimbuye Benedata Janvier.

Rayon Sports yakoze impinduka za nyuma ku munota wa 81, Kwizera Pierrot na Nizigiyimana Karim Mackenzie bahaye umwanya Mico Justin na Rudasingwa Prince.

Ku munota wa 82, Muvandimwe JMV yahinduye umupira mwiza ariko Esenu agiye gushyiraho umutwe Kimenyi amutanga umupira arawufata.

Myugariro wa Kiyovu Sports, Dusingizimana Gilbert yagize ikibazo cy’imvune asimburwa na Mbonyingabo Regis ku munota wa 88.

Rayon Sports yabonye amahirwe akomeye ku munota wa 89 ubwo bahinduraga umupira imbere y’izamu, Esenu yisanga asigaranye na Kimenyi ariko amupira awuteye uca hejuru y’izamu.

Ku munota wa nyuma w’umukino, Muhoozi Fred yatsindiye Kiyovu Sports igitego cy’agashinguracumu ku mupira yari ahawe na Emmanuel Okwi. Umukino warangiye ari 2-0, Kiyovu Sports ikomeza kuyobora urutonde n’amanota 50.

Undi mukino w’umunsi wa 22 wabaye, Mukura VS yanganyirije na Etoile del’Est i Ngoma. Indi mikino y’umunsi wa 22 izakomeza ku munsi w’ejo ku Cyumweru

Abakinnyi 11 buri ruhande rwabanjemo

Rayon Sports: Hakizimana Adolphe, Nizigiyimana Karim Makeckenzie, Iranzi Jean Claude, Ndizeye Samuel, Habimana Hussein, Nishimwe Blaise, Kwizera Pierrot, Muhire Kevin, Mushimiyimana Mohammed, Mael Dinjeke na Musa Esenu

Kiyovu Sports: Kimenyi Yves, Serumodo Ally, Dusingizimana Gilbert, Ngendahimana Eric, Ndayishimiye Thierry, Nshimirimana Ismail [Pitchou], Bigirimana Abedi, Bizimana Amisi [Coutinho], Mugenzi Bienvenue na Benedata Janvier

Indi mikino y’umunsi wa 22 iteganyijwe ku munsi w’ejo

Gicumbi FC vs Police FC
Musanze FC vs AS Kigali
Bugesera FC vs Marines FC
Espoir FC vs Gasogi United
APR FC vs Rutsiro FC
Etincelles FC vs Gorilla FC

Kiyovu Sports yishimira igitego cya Bigirimana Abedi

Abafana ba Kiyovu Sports bari baje ku bwinshi

Source : http://isimbi.rw/siporo/article/kiyovu-sports-yatsinze-rayon-sports-ikomeza-kuyobora-urutonde-rwa-shampiyona