Author: webrwanda

Maj Gen (Rtd) Yaache ukomoka muri Ghana, ni umwe mu basirikare bahoze ari ab'Umuryango w'Abibumbye (Loni) b'Abanyafurika bari mu butumwa bw'amahoro mu Rwanda mu 1994.

Ubwo Akanama Gashinzwe Umutekano ka Loni kafataga umwanzuro wo kugabanya umubare w'ingabo uyu muryango wari ufite mu Rwanda mu 1994 ukagera kuri 270, Gen Dallaire na Gen Anyidoho wo muri Ghana bari mu batarabyakiriye neza kuko babonaga akaga Abatutsi barimo guhura na ko.

Baje kugabanywa, gusa bamwe muri bo banga gutaha. Muri bo, harimo abo muri Ghana bari bayobowe na Gen Anyidoho, bagize ubutwari bwo gukomera ku Batutsi nubwo bari bake kandi badafite ibikoresho bihagije.

Mu gihe Jenoside yamaze, aba basirikare ba Ghana babashije kurokora abagera ku bihumbi 30.

Bwa mbere Maj Gen (Rtd) Yaache yageze mu Rwanda muri Gashyantare 1994, amezi abiri mbere y'uko Jenoside itangira. Yari ashinzwe gukurikirana ibikorwa muri Perefegitura ya Byumba, agace katagerwamo n'intambara [Demilitarized Zone].

Nyuma y'aho Jenoside itangiriye, yagize uruhare rukomeye mu bikorwa binyuranye birimo gutabara Abatutsi, kubashakira ibiribwa no kubajyana ahantu hari umutekano wizewe, igikorwa bakoraga mu buryo bwo kubimurira ahantu hatandukanye.

Aganira n'urubyiruko ndetse n'Ingabo z'u Rwanda, Maj Gen (Rtd) Yaache, yavuze ko Ingabo z'Umuryango w'Abibumbye zari zaje kugarura amahoro mu Rwanda [MINUAR], zari zishinzwe kubuza kurwana ku ruhande rwa Guverinoma yari iyobowe na Perezida Juvenal Habyarimana ndetse na FPR Inkotanyi n'andi mashyaka yari ayishyigikiye.

Izo ngabo kandi zagombaga kureba ibishobora kubangamira iyo nzira y'amahoro yari imaze imyaka ine ishakishwa, bakamenyesha Loni igafata ingamba zikwiriye.

Ati 'Gusa hagati aho, hari igihe twatangiye kubona ibimenyetso by'ibyashoboraga kuba. Byari byatangiye kugaragara.'

'Nanjye ubwanjye aho nari ndi muri Byumba nabonaga ibiteye amakenga ni na ko byari bimeze mu Murwa Mukuru Kigali. Jenerali [Gen Romeo Dallaire] na we yarabibonye atangira gutakambira Loni I New York ko hari ibimenyetso by'uko hari ibyago biri imbere.'

Yavuze ko Gen Romeo Dallaire yagerageje gusaba ubufasha buturutse ku Cyicaro Gikuru ariko yirengagijwe.

Ati 'Yabikoze kenshi kandi mu nzira zemewe, aburira Loni buri munsi ku byago byashoboraga kuba. Ndabizi yoherezaga ubutumwa bwihariye i New York abamenyesha ibyo. Higeze kuboneka amakuru y'uko igisirikare cya FAR cyatoje umutwe w'abicanyi kandi banafite intwaro zihishe ahantu runaka.'

Yakomeje agira ati 'Yasabye uburenganzira mu i New York bwo kujya aho hahishwe intwaro ngo azifate ariko Loni yamusubije ko ibyo bitari mu nshingano ze. Yasubijwe ko ibyo bitagize akazi ke. Ibi byagaragazaga ko koko ibyari biri gututumba mu Rwanda byari byizwi.'

Maj Gen (Rtd) Yaache yashimangiye ko ibyo ari bimwe mu bimenyetso babonaga ko hari ikiri gutegurwa, nubwo nta bufasha bahawe ngo bagihagarike.

Maj Gen (Rtd) Yaache, yavuze ko Ingabo z'Umuryango w'Abibumbye zari zaje kugarura amahoro mu Rwanda [MINUAR] zabonye ibimenyetso bya Jenoside ariko zimwa ububasha bwo kugira icyo zikora

Gen Dallaire ntako atagize..

Tariki 10 Mutarama 1994 nibwo Lt Gen Romeo Dallaire wari uyoboye MINUAR, yandikiye ubutumwa [Fax] abamukuriye ku Cyicaro cya Loni, abamenyesha ko mu Rwanda hari gutegurwa Jenoside.

Yasabaga uburenganzira bwo kugira icyo akora nyuma y'amakuru ateye ubwoba yari amaze guhabwa, aho kumuha uburenganzira bamubuza kugira icyo akora ndetse ategekwa gushyira ayo makuru abari bari gutegura 'Jenoside'.

Ibaruwa Dallaile yandikiye abamukuriye muri Loni barimo Kofi Annan waje kuyobora uwo muryango nyuma, yasabaga uburenganzira bwo kujya gushakisha ahantu yari yabwiwe ko hahishe intwaro zagenewe Interahamwe kwica Abatutsi muri Kigali.

Impamvu ni uko ibyo byari bihabanye n'amasezerano yo gufata Kigali nk'agace gakwiriye gukumirwamo intwaro nyinshi ndetse gutoza Interahamwe byo bikaba byari bihabanye n'amasezerano ya Arusha.

Ubusabe bwe bwateshejwe agaciro kuko aho gutanga ubufasha, Loni yahisemo guhungisha ingabo zayo.

Lt Gen Romeo Dallaire wari uyoboye MINUAR, yandikiye ubutumwa [Fax] abamukuriye ku Cyicaro cya Loni, abamenyesha ko mu Rwanda hari gutegurwa Jenoside, bamubwira ko bitari mu nshingano ze

Yahawe gasopo

Tariki 11 Mutarama 1994, Lt Gen Dallaire yasubijwe na Kofi Annan, amwihanangiriza kutibeshya ngo ajye gushakisha aho izo mbunda z'Interahamwe zihishe muri Kigali.

Yabwiwe ko bitari mu bubasha bwe kujya gushakisha izo ntwaro, ahubwo agirwa inama yo kujya kureba Perezida Habyarimana bwangu, akamumenyesha ibyo bintu.

Gen Romeo Dallaire yigeze gutangaza ko igihe cyose yagerageje gusaba ubufasha ngo hakumirwe Jenoside, yagiye yibutswa ko mu Rwanda nta peteroli, diyama cyangwa ibintu by'agaciro bihari byatuma hoherezwa ingabo.

Ati 'U Rwanda n'abaturage barwo, n'ingabo nari nyoboye mu butumwa bwa Loni bwo kugarura amahoro baratereranywe kugeza igihe bishwe. Igihe nasabaga ubufasha nibutswaga ko nta peteroli iri mu Rwanda, nta diyama, nta n'ikindi kintu cy'ingirakamaro gihari. Hari ikiremwamuntu gusa, ubuzima bw'abirabura butari bufite agaciro na gato.'

Gen Romeo Dallaire yigeze gutangaza ko igihe cyose yagerageje gusaba ubufasha ngo hakumirwe Jenoside, yagiye yibutswa ko mu Rwanda nta peteroli, diyama cyangwa ibintu by'agaciro bihari

Loni yari yaramenyeshejwe ntiyagira icyo ikora. Nk'aho bidahagije, Jenoside yakorewe Abatutsi itangiye, irongera yigira ntibindeba, ubwicanyi buba ingabo zayo zirebera ndetse no kwemeza ko ibiri kuba mu Rwanda ari Jenoside bifata iminsi.

Byarushijeho kuba bibi ubwo ingabo z'Ababiligi zari muri MINUAR zitashye, zigasiga ibihumbi by'Abatutsi mu maboko y'Interahamwe zari zigose ET'O Kicukiro.

Ku gitutu cy'u Bubiligi, ku itariki ya 21 Mata 1994, Akanama k'Umutekano ka LONI kahisemo gukura MINUAR mu Rwanda, bya nyirarureshwa hasigara abasirikare bake gusa.

Icyicaro gikuru cya Loni cyandikiwe ibaruwa hasabwa ubuhungiro bwa Jean Pierre wabahaye amakuru y’uko Jenoside yari iri gutegurwa biba iby’ubusa

Northern Plains Ethnic Festival ni iserukiramuco riba buri mwaka, rikagaruka ku muco w'ibihugu, indyo zabyo, n'ibindi by'umwihariko birangwa muri ibyo bihugu. Ni igikorwa kimaze hafi imyaka 40 gitegurwa.

Ni iserukiramuco rihuriramo Abanyamerika bafite inkomoko mu bindi bihugu, rikabera mu Mujyi wa Dickinson muri Leta ya North Dakota buri Kanama.

Kuri iyi nshuro iki gikorwa cyabaye ku wa 16 Kanama 2025 cyitabirwa n'Abanyamerika bafite inkomoko mu bindi bihugu bitandukanye nk'u Rwanda, u Budage, ibihugu byo mu Majyaruguru y'u Burayi, abo muri Repubulika ya Tchèque, Ukraine n'ahandi.

Buri gihugu cyari cyahawe aho kugaragariza umwihariko wacyo haba mu muco n'uw'amafunguro atandukanye abarizwa muri ibi bihugu.

Abanyarwanda baba muri Amerika by'umwihariko muri Leta ya North Dakota na bo batumiwe, berekana ibyiza by'u Rwanda n'impamvu umuntu ushaka gutembera akwiriye guhera ku Rwanda.

Mu kiganiro na IGIHE, Umunyamabanga w'Umuryango w'Abanyarwanda baba muri North Dakota, Spiridio Turikumana, yavuze ko bagaragaje neza isura y'u Rwanda uko bikwiriye.

Ati 'Twari twahateguye neza mu isura igaragaza u Rwanda ndetse na gahunda ya Visit Rwanda. Mu bikorwa twagaragaje harimo imbyino Nyarwanda, ibikorerwa mu Rwanda ndetse tubasangiza na bimwe mu bicuruzwa byaturutse mu Rwanda nk'ikawa, icyayi, hari n'imitako n'ibindi byakunzwe cyane.'

Yakomeje ati 'Ikindi kandi twasobanuriye abitabiriye iri serukanamuco gahunda za Visit Rwanda ndetse n'uburyo bakwibonera amakuru n'amahirwe ari mu Rwanda bashobora kubyaza umusaruro banyuze ku rubuga rw'Urwego rw'Igihugu rw'Iterambere.'

Ibi bikorwa byateguwe n'abayobozi b'Umuryango w'Abanyarwanda baba muri North Dakota, bafatanyije n'abanyamuryango bayo.

Muri North Dakota hatuye Abanyarwanda babarirwa mu 120 abenshi bakaba batuye mu Mujyi wa Dickinson ari na ho habereye iri serukanamuco.

Abanyarwanda baba muri iyi leta kandi bakora ibikorwa bitandukanye bijyanye na gahunda za Guverinoma y'u Rwanda.

Nko ku wa 28 Mata 2024, bo n'inshuti zabo bahuriye mu gikorwa cyo kwibuka ku nshuro ya 30 Jenoside yakorewe Abatutsi mu 1994, cyabereye muri Kaminuza ya Dickinson State University.

Mu myaka ishize kandi bahuje imbaraga bakusanya ubushobozi bwifashishijwe mu kwishyura Mituweli ku miryango itishoboye yo mu Murenge wa Mukura muri Rutsiro.

Abanyarwanda baba muri North Dakota bagaragaje umwihariko w’umuco Nyarwanda

Umunyamabanga w'Umuryango w'Abanyarwanda baba muri North Dakota, Spiridio Turikumana yavuze ko bagaragaje ibyiza by’u Rwanda muri Northern Plains Ethnic Festival

Abanyarwanda baba muri North Dakota, Spiridio Turikumana bitabiriye iserukiramuco rya Northern Plains Ethnic Festival

Northern Plains Ethnic Festival ni iserukiramuco ryitabirwa n’Abanyamerika bafite inkomoko mu bindi bihugu

U Rwanda na rwo rwahagarariwe mu iserukiramuco ryabereye muri Leta ya North Dakota

[email protected]

Urupfu rw'uyu rwamenyekanya ku wa 16 Kanama 2025 mu masaha y'ijoro, rubereye mu Mudugudu wa Nombe, Akagari ka Nyagishubi, Umurenge wa Nyarubaka, rukomotse ku rugomo yakorewe n'abasore ubwo yajyaga gukiza bamwe muri bo barwanaga, nyuma bakajya kumutegera mu nzira ari gutaha bakamutera icyuma hafi y'umutima, bimuviramo urupfu naho mugenzi we arakomereka ku kuboko.

Umuvugizi wa Polisi mu Ntara y'Amajyepfo, CIP Hassan Kamanzi, yabwiye IGIHE ko intandaro ya byose ari uko nyakwigandera yari avuye kureba umupira mu kabari, mu gihe yiteguraga gutaha akumva mu kandi kabari harimo intonganya, yajya kureba ikibaye agasanga ni abantu b'urubyiruko bari kurwana maze akabakiza afatanyije na mugenzi we.

Nyuma yakomeje inzira atahana na mugenzi we basanga abo yari yagiye gukiza bamutegeye mu nzira, ni ko kumutera icyuma ku mutima, maze abatabaye bagerageza kumujyana kwa muganga bahamugeza amaraso yamushizemo ahita apfa.

CIP Kamanzi, yakomeje avuga ko kuva icyo gihe iperereza ryahise ritangira maze nyuma y'umunsi umwe hafatwa batanu bakekwaho uruhare muri ubwo bwicanyi, ndetse no ku wa 18 Kanama 2025 hafatwa abandi batatu, bose hamwe baba umunani.

Ati 'Mu bakekwa bafashwe harimo nyir'akabari nyakwigendera yagiye gukizamo abarwanaga, abanze gutangira amakuru ku gihe, n'abakekwaho uruhare mu gutera icyuma nyakwigendera. Ubu bose bafungiye kuri Polisi, Sitasiyo ya Runda, naho umurambo wa nyakwigendera wo wajyanywe mu Bitaro bya Kacyiru, mu Karere ka Gasabo.'

Uyu muvugizi wa Polisi mu Majyepfo, yaboneyeho umwanya wo guhwitura abakora urugomo kubicikaho, anasaba cyane cyane urubyiruko kwirinda kunywa inzoga nyinshi kuko ziri mu bibakururira mu rugomo runateza impfu zitandukanye.

Ibiro by’Akarere ka Kamonyi ahabereye iki cyaha cy’ubwicanyi

Nubwo ari ikibazo gikomeje guhangayikisha ibyo bihugu, ku ruhande rw'abashakashatsi n'inzego z'ibidukikije, bavuga ko ikibazo atari imbeba ubwazo, ahubwo ari imico y'abantu ituma zibona umwanya n'ibiryo byo gutuma zororoka.

Mu ntara ya Brabant mu Buholandi, abaturage bakunze kubona imbeba mu busitani no mu bindi bice, Piet Maas ukunze kuba ari kuzihiga yavuze ko ibibazo biterwa n'inyamaswa z'ishyamba byoroshye ugereranyije n'ibishobora guterwa n'imbeba.

Mu Bwongereza, mu mujyi wa Eston, habonetse imbeba idasanzwe ifite uburebure bwa santimetero 56 aho ishobora kungana n'injangwe. Ni ibintu byateye ubwoba abatuye muri ako gace.

Mu Buholandi ho abaturage bavuga ko imbeba ziri kurushaho kuba ikibazo gikomeye aho mu 2024 gusa, Amsterdam yakiriye raporo zirenga 6.800 zirebana n'akaga gatezwa n'imbeba.

Mu Mujyi wa Berlin mu Budage habarurwa imbeba nibura miliyoni ebyiri, ubu abakerarugendo bashobora gucibwa amande ya €25.000 mu gihe baramuka bataye ibiryo mu mihanda kuko bifatwa nko guha ibiribwa imbeba.

I Paris na ho bibarwa ko hari imbeba zirenga miliyoni enye ziri mu murwa mukuru mu gihe mu Bubiligi ho bivugwa ko nibura Umujyi wa Bruxelles utuwemo n'imbeba miliyoni 2,5 bivuze ko nibura buri muturage atunze imbeba ebyiri.

Akenshi iyo imbeba imaze gutura ahantu, irororoka cyane.

Umuryango muto w'imbebe ushobora kubyara inshuro 15 mu mwaka, mu myaka mike ugahinduka umuryango munini w'imbeba uzwi nka 'Rattopolis.'

Ibi bitera ibyago bikomeye ku buzima bw'abaturage.

Imbeba ziza ku isonga mu gukwirakwiza indwara zandura ku bantu zitandukanye zirimo nka hantavirus na leptospirose.

Inzego z'ubuzima n'ibidukikije zisaba abaturage kwirinda kugira aho bahurira n'imbeba, haba izigifite ubuzima cyangwa izapfuye, kuko n'inkari zazo zishobora kugira uburozi.

Bagaragaje ko mu gihe abantu baba bashaka gukemura ikibazo cy'imbeba nabo bakwiye guhindura imico yabo irimo gufata nabi ibintu, kunyanyagiza ibiribwa aho babonye, kudatunganya neza aho batuye n'ibindi bishobora guha urwaho imbeba.

Imbeba zikomeje kurikoroza i Burayi

Kuva muri Nyakanga 2025 hatangiye kugwa imvura mu gihe byari bimenyerewe ko ibihe by'impeshyi nta mvura igwamo yanagwa ikaba nke cyane.

Muri Kanama ho abenshi bavugaga ko imvura igwa ku wa 15 gusa, umunsi Abakirisitu Gatolika bizihizaho Ijyanwa mu Ijuru rya Mariya ariko mu 2025 yaguye ari nyinshi ku wa 16 na 17 Kanama.

Umunyamabanga Uhoraho muri Minisiteri Ishinzwe Ibikorwa by'Ubutabazi, Ngonga Aristarque yabwiye RBA ko iyo igihugu kiva mu gihe cy'Icyi cyinjira mu Muhindo utangira muri Nzeri, ibihe biba biva mu bushyuhe bijya mu bukonje burimo imvura bityo hakabamo inkuba nyinshi.

Ati ''Ejo nimugoroba habaye inkuba nyinshi zatumye abantu batatu bitaba Imana abandi 11 barakomereka.''

Yavuze ko nta mvura nyinshi imenyerewe muri Kanama ariko nanone ibiza biturutse ku nkuba n'imiyaga bijya bibaho.

Ati ''Ubusanzwe ntabwo ukwezi kwa Kanama ntabwo kurangwamo imvura…ariko ku wa 16 Kanama twagize imvura igwa hirya no hino mu gihugu ndetse no mu ijoro ryacyeye yaguye igeza no mu gitondo, icyo navuga ni uko muri icyo cyumweru cyose twagize impfu z'abantu zigera kuri eshanu, bane muri bo bishwe n'inkuba, umwe ni inzu yamugwiriye.''

Abapfuye barimo abo mu karere ka Burera babiri, aka Gicumbi hapfuye umwe, mu Karere ka Ngororero hapfuye umwe n'umwe wo mu Karere ka Rusizi.

Ibiza bikomoka kuri iyi mvura kandi byakomerekeje abantu 25 barimo abo mu Karere ka Gicumbi, Gisagara, Kamonyi, Musanze, na Nyamasheke. Hangiritse kandi inzu 15.

Ngoga yasabye abantu ''kwitwararika kugira ngo yaba inkuba n'ibindi bitabatwara ubuzima.''

Ati ''Ikindi ni imihindagurikire y'ibihe, na byo ntabwo twareka kubivuga. Ubusanzwe tumenyereye ko umuhindo ari wo ugaragaramo imvura utangira muri Nzeri. Kuba rero haguye iyi mvura yaguye hafi ijoro ryose ni cya kindi kinahamya ko ibihe bigenda bihinduka.''

Ngoga yavuze ko uretse abantu n'inzu zangiritse hari n'ahagiye hagaragara umwuzure ariko udakanganye.

Ati ''Ibindi ni ukuba habaho amazi yuzura agafunga umuhanda, twabibonye nko muri Gatenga uyu munsi muri Kigali n'ahandi hirya no hino mu bishanga kubera imvura yaguye umwanya munini amazi yagiye azamuka ariko navuga ko ku bijyanye n'imigezi ntabwo yazamutse ku rwego ruri hejuru. Ni ukuzamuka by'umwanya muto ukongera ukamanuka.''

Yahamije ko nubwo imvura yagwaga ari nyinshi ariko yacishagamo igahita, bituma nta myuzure yo ku rwego rwo hejuru yabayeho mu Rwanda hose.

Ngoga yashimangiye ko MINEMA ifatanyije n'uturere ifasha abangirijwe n'ibiza, hakabaho kwihanganisha ababuze ababo no kubafata mu mugongo.

MINEMA kandi isaba Abaturarwanda kwitwararika mu gihe imvura iguye umuntu ari hanze akinjira mu nzu, ugeze mu nzu akirinda gukoresha ibyuma bikoresha amashanyarazi mu gihe hari inkuba zikubita, kwirinda kujya kureka amazi yo hanze n'ibindi.

Inasaba kandi kuzirika ibisenge neza ku buryo zidasamburwa n'umuyaga, no gusiburura imiyoboro itwara amazi y'imvura kugira ngo igihe imvura iguye amazi abone aho anyura yisanzuye.

Bane mu bapfuye bishwe n’inkuba mu gihe umwe yagwiriwe n’inzu

Yafatiwe mu Mudugudu wa Bukiro, Akagari ka Ngoma, tariki 17 Kanama 2025, biturutse ku makuru yatanzwe n'abaturage babonye uyu mugabo ari kugurisha inyama z'ingurube bakagira amakenga kuko adasanzwe acuruzwa inyama.

Uwahaye amakuru IGIHE yavuze ko abaturage babajije uyu mugabo akavuga ko ari ingurube ye yapfuye, abaturage bamwibutsa ko nta ngurube asanzwe atunze.

Yakomeje avuga ko uyu mugabo yahise ahindura imvugo, atangira kuvuga ko ari iyo yaguze kwa nyirabukwe mu Murenge wa Nyabitekeri, ibyo bigahurirana n'uko aho iyo ngurube yari yibwe mu Murenge wa Nyabitekeri bamaze gutanga amakuru mu buyobozi bayirangisha.

Umunyabanga Nshingwabikorwa w'agateganyo w'Umurenge wa Bushekeli, Habarurema Cyprien yabwiye IGIHE ko uyu mugabo yageze aho yemera ko iyo ngurube yayibye mu Murenge wa Nyabitekeri.

Ati 'Yemeye ko yayibye ashaka no kuriha ba nyirayo ibihumbi 200 Frw ariko kuko twari twabimenye nk'ubuyobozi uwo mugabo yahise atabwa muri yombi, uwibwe ajya gutanga ikirego kuri RIB'.

Mu rugo rw'uyu mugabo hasanzwe indi ngurube nayo bikekwa ko yibye kuko yari ihamaze iminsi ibiri, ariko akaba atagaragaza aho yayiguze, ari nabyo byatumye ubuyobozi butanga amatangazo busaba uwaba yarabuze ingurube ko yajya kureba niba ari iye.

Umugabo watawe muri yombi afunguye kuri RIB sitasiyo ya Ruharambuga mu gihe hagishakishwa abo bakoranye iki cyaha.

Benegusenga Alpha w'imyaka 14 wo mu Murenge wa Nemba, Akagari ka Kivumu ho mu Mudugudu wa Nyamusanze, inkuba yamukubitiye mu muryango w'inzu ya sekuru, ubwo yari avuye gucyura amatungo Saa 18:00.

Ni mu gihe Nyamugira Bernard w'imyaka 67, wo mu Murenge wa Gitovu, Akagari ka Mariba ho mu Mudugudu wa Kiboga, nawe inkuba yamukubise mu mvura yagwaga ahita apfa.

Umuyobozi w'Akarere ka Burera yabwiye IGIHE ko amakuru y'izi mpfu bayamenye, ndetse bazikoreye raporo.

Umukozi ushinzwe guhuza ibikorwa by'ubutabazi muri MINEMA, Nizeyimana Aime Adrien, mu kiganiro na IGIHE yasabye abaturage kubahiriza amabwiriza y'ubwirinzi yashyizweho.

Ati 'Igihe imvura irimo igwa abaturage bagomba kuba bari mu nzu badafite aho bahurira n'amazi, abari mu nzira bagomba gushaka aho bugama bakirinda kugama munsi y'ibiti, mu buvumo no munsi y'imikingo, ndetse n'abari mu mirimo y'ubuhinzi bakwiriye guhita bayivamo.'

Yakomeje asaba abaturage kwirinda gukorakora inzugi n'amadirishya by'ibyuma kuko hari ubwo inkuba ikubita bikajyamo amashanyarazi yayo ikaba yamukubita.

Ni amasezerano yasinyiwe i Doha muri Qatar, ku wa 17 Kanama 2025, ashyirwaho umukono n'umuyobozi Mukuru wa LABOPHAR, Gatete Pascal ari kumwe n'Umuyobozi Mukuru ku ruhande rwa Philex, Waseem Hamad.

Ni amasezarano u Rwanda rufata nk'intambwe ikomeye mu kuzamura serivisi z'ubuzima ndetse n'ubufatanye muri uru rwego hagati y'u Rwanda na Qatar nyuma y'uko basanzwe bafatanya muri byinshi birimo ibikorwaremezo, ubwikorezi n'ibindi.

Ibi bibaye mu gihe LABOPHAR yari yatangiye ibikorwa byo kwagura no kunagura imikorere yayo, imirimo yashowemo asaga miliyari 27 Frw.

Umuyobozi wa LABOPHAR, Gatete Pascal aherutse kubwira IGIHE ko mu mikorere mishya yabo, bazaziba icyuho mu miti imwe n'imwe yatumizwaga mu mahanga, bagahaza isoko ry'u Rwanda na Afurika.

Yavuze ko mu miti bazakora harimo iy'amazi izwi nka 'syrops' ikunze guhabwa abana, imiti y'uruhu, ibinini n'indi.

Mu gusubukura imikorere, ku ikubitiro bahereye ku miti ya cancer yihutirwaga cyane, aho kuva muri Nyakanga 2025, uru ruganda rwatangiye gukora imiti ifasha mu kugabanya ububabare bwa cancer izwi na 'morphine', mu gihe gahunda yo gukora imiti mu buryo bwagutse, yo izatangira mu Ukuboza 2025, bikazanakomeza hongerwamo indi mu 2026.

LABOPHAR, ni Uruganda Nyarwanda rwubatswe mu 1983, mu Mujyi wa Huye, mu marembo ya Kaminuza y'u Rwanda, Ishami rya Huye ndetse rukaba ruhana imbibi na NIRDA.

Uru ruganda rwakunze kugira ibizazane mu mikorere ndetse ruza guhagarara, ariko Leta irwegurira abikorera mu 2024.

Rwongeye kubura ibikorwa byarwo mu 2025, aho rwitezweho guteza imbere urwego rw'imiti imbere mu gihugu no mu karere u Rwanda ruherereyemo.

Amasezerano yasinywe na Gatete Pascal uyobora LABOPHAR na Waseem Hamad, ukuriye Philex

LABOPHAR isanzwe imenyerewe mu gukora imiti mu Rwanda nubwo yari imaze igihe idakora

Iki gikorwa cyari cyitabiriwe kandi n’ubuyobozi bwa RMS ndetse n’ubwa Ambasade y’u Rwanda muri Qatar