Author: webrwanda

  • CHOGM: Uko imihanda izakoreshwa ku wa 21 Kamena 2022 – #rwanda #RwOT

    Imihanda izakoreshwa n'abitabiriye CHOGM ni Serena Hotel-Payage-Sopetrad- Kimicanga – Kimihurura- Gishushu-Gisimenti-Giporoso-Nyandungu – Kuri 15 – Mulindi —Ku ruganda 'Inyange'- Intare Arena.

    Hari kandi umuhanda uva ku Kibuga cy'indege – Giporoso – Gisementi — Kigali Convention Centre – Serena Hotel hakaniyongeraho uwo ku Kibuga cy'indege – Kabeza – Giporoso – Gisementi — KCC – Serena Hotel.

    Abazaba bakoresha umuhanda baragirwa inama yo gukoresha ibindi byerecyezo.

    Nk'abaturuka i Kabuga no mu ntara y'Iburasirazuba berekeza mu mujyi wa Kigali bazanyura ku Musambi – inyuma ya parking ya Intare Arena – Mulindi – Gasogi – Musave – Special Economic Zone – Kwa Nayinzira – Kimironko – Controle technique – Nyabisindu – Gishushu – Mu Kabuga ka Nyarutarama – Utexrwa — Kinamba.

    Bahobora no kunyura ku Mulindi – Kanombe ukomeza mu Kajagali — Ikigo Nderabuzima cya Nyarugunga -Busanza – Itunda/Rubirizi – Kabeza – Niboye – Kicukiro Centre — Kwa Gitwaza -Rwandex – Kanogo — Kinamba- Yamaha – Gereza — Onatracom.

    Imihanda wakoresha wambukiranya mu gihe uhawe uburenganzira n'abapolisi ni: Payage-Gishushu – Gisimenti – Prince house -Kuri 12 – Kuri 15 – Mulindi.
    Iyi mihanda ishobora gufungurirwa urujya n'uruza igihe icyo ari cyo cyose itazaba irimo gukoreshwa n'abitabiriye CHOGM.

    Abakoresha umuhanda barasabwa kwihanganira impinduka no kwirinda amakosa yateza umuvundo w'ibinyabiziga n'impanuka kandi bagakurikiza amabwiriza bazahabwa n'abapolisi bazaba bari ku mihanda kugira ngo babayobore.


    Source : http://igihe.com/amakuru/u-rwanda/article/chogm-uko-imihanda-izakoreshwa-ku-wa-21-kamena-2022

  • APR FC idafite Adil ikomeje imyitozo #rwanda #RwOT

    APR FC yasubukuye imyitozo yitegura umukino wa nyuma w’igikombe cy’Amahoro na AS Kigali, ni imyitozo irimo gukoreshwa n’umutoza wungirije mu gihe Adil Erradi Mohammed we atari mu Rwanda.

    Nyuma y’akaruhuko k’iminsi mike, APR FC yaraye isubukuye imyitozo i Shyorongi ari n’aho irimo gukorera umwiherero yitegura uyu mukino wa nyuma.

    Nyuma yo kwegukana igikombe cya shampiyona, abasore ba APR FC intego ni ukwegukana n’igikombe cy’Amahoro.

    Ni imyitozo ariko itakoreshejwe n’umutoza Adil Erradi Mohammed kubera ko atari mu Rwanda, amakuru avuga ko yafashe akaruhuko k’iminsi mike mu rwego rwo gukurikirana ibyangombwa bye by’ubutoza byatumaga adatoza imikino Nyafurika, bivugwa ko azagaruka mu Rwanda abizanye.

    Uyu mutoza nubwo byavuzwe kenshi ko azatandukana na APR FC, andi makuru avuga ko yamaze kongera amasezerano.

    Umukino wa nyuma w’igikombe cy’Amahoro uteganyijwe ku wa Kabiri w’icyumweru gitaha tariki ya 28 Kamena 2022 ukaba uzahuza APR FC na AS Kigali.

    Umutoza wungirije ni we wayoboye imyitozo

    Umunyezamu Heritier mu myitozo

    Ishimwe Pierre na we ariteguye neza cyane

    Ishimwe Anicet

    Rutahizamu Mugunga Yves

    Mugisha Gilbert uheruka gutsinda ibitego 2 byahesheje APR FC igikombe cya shampiyona

    Nzotanga umwe mu bakinnyi bazamuye urwego muri APR FC

    Myugariro Omborenga Fitina

    Kwitonda Alain Bacca

    Kapiteni wa APR FC, Manishimwe Djabel

    Rutahizamu Bizimana Yannick

    Ruboneka Bosco ariteguye

    Rwabuhihi Aime Placide

    Itangishaka Blaise nyuma y’imvune na we yasubukuye imyitozo ahagaze neza

    Niyomugabo Claude ukina yugarira ku ruhande rw’ibumoso

    Source : http://isimbi.rw/siporo/article/apr-fc-idafite-adil-ikomeje-imyitozo

  • Inkambi ya Gashora yongerewe ubushobozi bwo kwakira impunzi n'abimukira – #rwanda #RwOT

    Iyi nzu yubatswe ku nkunga y'Umuryango w'Ubumwe bw'u Burayi (EU) n'abandi bafatanyabikorwa, iteganyirijwe kwakira impunzi n'abimukira bazanwa mu Rwanda.

    Tariki ya 10 Nzeri 2019 ni bwo Guverinoma y'u Rwanda, Umuryango w'Ubumwe bwa Afurika (AU) na UNHCR byashyize umukono ku masezerano y'imyaka itatu, yo kwakira impunzi n'abimukira i Gashora mu Karere ka Bugesera.

    Binyuze muri aya masezerano ni bwo u Rwanda rwakiriye impunzi z'Abanyafurika zageze muri Libya zishakisha uko zakwerekeza ku Mugabane w'u Burayi.

    Amasezerano yabanje yavugaga ko Inkambi ya Gashora igomba kwakira abantu 500 nyuma aza kuvugururwa hanzurwa ko yazajya yakira 700, ni bwo hubatswe iyi nzu mu kuyongerera ubushobozi.

    Iyi nzu yiswe 'Ikaze Residence' yuzuye itwaye asaga miliyari 1 Frw, ifite ibyumba bitandukanye buri kimwe kirimo ibitanda bine, hari abatangiye kuyibamo ariko bari mu igorofa ryo hasi ahandi hasigaye hazashyirwa abandi bazagezwa mu Rwanda.

    Kuri uyu wa Mbere, tariki ya 20 Kamena 2022, ubwo hizihizwaga Umunsi Mpuzamahanga w'Impunzi, ku rwego rw'igihugu wizihirijwe i Gashora ari bwo batashye ku mugaragaro iyi nzu.

    Minisitiri w'Ibikorwa by'Ubutabazi, Kayisire Marie Solange, yavuze ko impunzi ziri mu Rwanda ubu ziri kwitabwaho kandi hari gukorwa ibishoboka byose kugira ngo zibashe kubaho ubuzima busanzwe.

    Ati 'Uyu munsi mu Rwanda dufite impunzi zitandukanye, zimeze neza aho ziri mu nkambi hirya no hino. Uyu munsi usanze twaratangiye gushaka ibisubizo birambye kugira ngo zikomeze kwigira zibeho mu gihugu, zidategereje inkunga.'

    Ambasaderi uhagarariye Umuryango w'Ibihugu by'u Burayi mu Rwanda, Nicola Bellomo, yavuze ko uyu muryango uzahora ukora ibikorwa byo gufasha impunzi ngo nazo zigire ubuzima bwiza.

    Ati 'Uyu munsi twishimiye kwifatanya na guverinoma y'u Rwanda n'abandi bafatanyabikorwa n'impunzi ziri mu Rwanda kuri uyu munsi. Nejejwe no kuba turi hano Gashora kuko hasobanuye byinshi mu kurengera ikeremwa muntu ari nabyo EU ishyize imbere.'

    Yakomeje avuga ko uyu muryango uzakomeza ibikorwa bitandukanye byo kwita ku mpunzi n'abandi bari mu bibazo kugira ngo ubuzima bwabo burusheho kugenda neza.

    Ku ruhande rw'umwe mu mpunzi ziri mu Nkambi ya Gashora, Peter Niyuoni, yavuze ko yanejejwe no kuba ari mu Rwanda kuko aho yahoze nta cyizere cy'ubuzima yari afite ubu akaba yarakibonye.

    Ati 'Ngereranyije uko narimbayeho muri Libya n'uko ndi hano mu Rwanda navuga ko umutekano wanjye wizewe 100%, kuko nabagaho nta cyizere cy'ejo mfite. Ubu ndashima Imana ko mbasha kubaho nta nkomyi, nkarya, nkaryama nta muntu umputaje.'

    Yakomeje ashimira Guverinoma y'u Rwanda kuba yarabahaye ahantu heza ho kuba no kuba idasiba kubashyiriraho ibikorwaremezo bituma babaho mu buzima bwiza.

    Kugeza ubu mu Rwanda habarirwa impunzi 127.369, zirimo abavuye muri Repubulika Iharanira Demokarasi ya Congo 76.968, i Burundi bangana na 49 859, naho abari mu Nkambi ya Gashora ni 444.

    Muri rusange kuva mu 2019, Inkambi ya Gashora, imaze kunyuramo abimukira n'abasaba ubuhunzi 1055, muri bo abarenga 630 bamaze kubona ibihugu bibakira mu gihe abandi na bo bategereje.

    Iyi nzu yiswe 'Ikaze Residence' yuzuye itwaye asaga miliyari 1 Frw

    Iyi nzu izatuma Inkambi ya Gashora ibasha kwakira impunzi n’abimukira 700

    Minisitiri w'Ibikorwa by'Ubutabazi, Kayisire Marie Solange, yavuze ko impunzi ziri mu Rwanda zitabwaho neza

    Ubwo hizihizwaga Umunsi Mpuzamahanga w’Impunzi, Minisitiri Kayisire yishimanye n’impunzi zitandukanye

    Impunzi z’Abarundi zasusurukije abitabiriye uyu muhango mu muco gakondo w’iwabo


    Source : http://igihe.com/amakuru/u-rwanda/article/inkambi-ya-gashora-yongerewe-ubushobozi-bwo-kwakira-impunzi-n-abimukira

  • Yateye benshi ikiniga! Shabana Basij-Rasikh yatabaje Commonwealth ku burezi bw'umukobwa muri Afghanistan – #rwanda #RwOT

    Ni amagambo yakoze ku mutima benshi mu bitabiriye iri huriro rishamikiye ku nama y'abakuru b'ibihugu na za guverinoma bigize umuryango wa Commonwealth (CHOGM) irimo kubera mu Rwanda.

    SOLA (School of Leadership Afghanistan) ni ishuri rukumbi ryigamo abakobwa gusa muri Afghanistan, rikaba ryarimuriwe mu Rwanda by'agateganyo. Abakobwa 250 bo muri iri shuri rikuru n'imiryango yabo bageze mu Mujyi wa Kigali ku wa 24 Kanama 2021.

    Ni nyuma y'uko Aba-Taliban bafashe Umurwa Mukuru wa Afghanistan, Kabul, ibintu bikaba bibi ku bantu bose bari basanzwe bafitanye imikoranire n'abanyamahanga cyane cyane Leta Zunze Ubumwe za Amerika.

    Mu kiganiro cyagarukaga ku ruhare rw'abagore mu miyoborere kuri uyu wa Mbere tariki 20 Kamena 2022, Shabana Basij-Rasikh, yashimiye cyane u Rwanda kuba rwarabakiriye, bakabasha gukomeza amasomo mu gihe byari bimaze kugaragara ko kwiga bitagishoboka.

    Ati “Abakobwa bo muri Afghanistan uyu munsi bemerewe kwiga amashuri makuru ni abari hano mu Rwanda gusa, mbikuye ku mutima ndashimira urugwiro rw'u Rwanda n'abanyarwanda batwakiranye kuva muri Kanama umwaka ushize ubwo Aba-Taliban bafataga Afghanistan, ubwo kwiga byahindukaga ibidashoboka ku bakobwa. Abakobwa bacu barimo gutera imbere kandi barimo kwitwara neza”.

    Shabana Basij-Rasikh yagarutse ku buryo bibabaje kuba uyu munsi Afghanistan ari cyo gihugu cyonyine ku Isi abakobwa batemerewe kwiga atari ukubura ubushobozi cyangwa izindi mpamvu zashakirwa igisubizo, ahubwo ari impamvu z'amahame n'imyumvire y'aba-Taliban.

    Ati “Nturuka mu gihugu cyonyine ku Isi aho kwiga k'umukobwa bitemewe n'amategeko kandi turi mu 2022. Iyo tuganira imibare ingana na miliyoni 250 z'abana biganjemo abakobwa batiga, usanga biterwa n'impamvu zishobora gukemuka, ariko biratandukanye cyane no kuba 'tuvuga ko hari igihugu ku Isi aho uburezi bw'umukobwa butemewe”.

    Yasabye abayobozi ba Commonwealth n'abitabiriye iri huriro”kuvuga mu ijwi riranguruye bagasaba impinduka kuko ntabwo twata igihe kuko dukeneye ko abakobwa biga”.

    Ati “Iyo abanyeshuri bakuwe mu ishuri amezi abiri, imyigire yabo isubira inyuma ho imyaka itanu. Ntabwo dushobora gutakaza igihe”.

    Shabana Basij-Rasikh yasangije abitabiriye ihuriro uburyo hari imiryango myinshi muri Afghanistan imuhamagara ikamubwira ko abakobwa babo baramutse bagize amahirwe yo kwemererwa kwiga na SOLA, biteguye kuba impunzi mu gihugu cyabemerera. Ni ikintu cyumvikanisha akababaro ko kuba abakobwa batemererwa kwiga.

    Yibukije ko hari ibimenyetso by'uko kwigisha umukobwa birandura ubukene, bigafasha mu guhangana n'ibibazo by'ubuzima ku isi, imihindagurikire y'ibihe n'ibindi. Yasabye buri wese gufatanya n'abagabo muri Afghanistan bakomeje guharanira ko abakobwa biga.

    Tariki ya 15 Kanama 2021 nibwo Aba-Taliban bafashe ubutegetsi nyuma y'imyaka 20 bahiritswe ku butegetsi bigizwemo uruhare na Leta Zunze Ubumwe za Amerika.

    Shabana Basij-Rasikh washinze Ishuri ry'Abanya-Afghanistan ryigisha Imiyoborere, SOLA yasabye Commonwealth gufasha abakobwa bo mu gihugu cye kwiga

    Abakobwa 250 bo muri SOLA bigira mu Rwanda nyuma y’uko aba-Taliban bafashe ubutegetsi

    Bashima cyane uko u Rwanda rwabakiriye rukabaha amahirwe yo gukomeza kwiga


    Source : http://igihe.com/amakuru/u-rwanda/article/yateye-benshi-ikiniga-shabana-basij-rasikh-yatabaje-commonwealth-ku-burezi-bw

  • Perezida Museveni agiye kugirira uruzinduko mu Rwanda nyuma y'imyaka itanu atahagera – #rwanda #RwOT

    Perezida Museveni yaherukaga mu Rwanda mu 2017 ubwo habaga ibirori byo kurahira kwa Perezida Kagame.

    Kutagenderera u Rwanda kwa Perezida Museveni kwaturutse ahanini ku kuba ibihugu byombi byari bimaze igihe bidacana uwaka, aho u Rwanda rwashinjaga Uganda guhohotera Abanyarwanda no gukorana n'abagamije kuruhungabanyiriza umutekano.

    Nyuma y'iki gihe cyari gishize Museveni atagera mu Rwanda, amakuru dukesha Chimpreports avuga ko Museveni ageze kure yitegura uru ruzinduko azagirira mu Rwanda mu mpera z'iki cyumweru.

    Iki kinyamakuru gikomeza kivuga ko amakuru yizewe gifite avuga ko abashinzwe umutekano wa Perezida Museveni bamaze kugera i Kigali mu rwego rwo gutegura uruzinduko rwe.

    Biteganyijwe ko ku wa Gatanu tariki 25 Kamena 2022 ari bwo Abakuru b'Ibihugu na za Guverinoma zo muri Commonwealth bazahurira i Kigali muri iyi nama ya CHOGM.

    Perezida Museveni agiye kugirira uruzinduko mu Rwanda nyuma y'amezi abiri yari ashize Perezida Kagame na we agiriye uruzinduko muri Uganda mu birori by'isabukuru y'umuhungu we Lt Gen Muhoozi Kainerugaba.

    Umubano wa Uganda n'u Rwanda umaze imyaka itanu urimo agatotsi. Guhera muri Gashyantare uyu mwaka, ibimenyetso byo kuwubyutsa byaragaragaye ku ruhande rwa Uganda binyuze kuri Lt Gen Muhoozi Kainerugaba, Umugaba Mukuru w'Ingabo zirwanira ku butaka akaba n'umuhungu wa Perezida Yoweri Museveni.

    Tariki 22 Mutarama 2022, Gen Muhoozi yasesekaye i Kigali agirana ibiganiro na Perezida Kagame, byatumye abanya-Uganda n'Abanyarwanda bamuha akabyiniriro k'Intumwa idasanzwe, kuko yavuye i Kigali umupaka wa Gatuna wongera gufungurwa.

    Ku itariki ya 14 Werurwe 2022, nibwo Gen Muhoozi yageze mu Rwanda mu ruzinduko rwa kabiri yari ahagiriye. Ku munsi wa mbere w'uruzinduko rwe yakiriwe na Perezida Kagame baganira ku gukemura ibibazo bisigaye mu mubano w'u Rwanda na Uganda.

    Perezida Museveni agiye kugirira uruzinduko mu Rwanda nyuma y’imyaka itanu atahagera


    Source : http://igihe.com/amakuru/u-rwanda/article/perezida-museveni-agiye-kugirira-uruzinduko-mu-rwanda-nyuma-y-imyaka-itanu

  • #COVID19: Abanduye 40 babonetse mu bipimo 3,158 #Rwanda #RwOT via @kigalitoday #rwanda #RwOT

    Minisiteri y’Ubuzima (MINISANTE) yatangaje ko ku wa Mbere tariki 20 Kamena 2022 mu Rwanda habonetse abanduye Covid-19 bashya 40, bakaba babonetse mu bipimo (…)

    Source : https://www.kigalitoday.com/ubuzima/indwara/article/covid19-abanduye-40-babonetse-mu-bipimo-3-158

  • Rwanda: Nyina yishwe na 'diarrhea' bituma agira umuhate wo kuyirwanya yivuye inyuma #rwanda #RwOT

    Mu 2014 ubwo Shomy Chowdhury yari afite imyaka 19 yapfushije nyina azize impiswi (diarrhea), avuga ko agahinda yagize katumye ahaguruka ngo 'ntihagire undi uzaca mu bihe nk'ibyo nanyuzemo'.

    Shomy ni uwo muri Bangladesh, ni umwe mu rubyiruko amagana ruri i Kigali mu nama ya Youth Forum iruhande rw'inama izahuza abakuru b'ibihugu bigize Commonwealth, CHOGM.

    Abo barimo kwiga no gushakira umuti ibibazo byinshi byugarije urubyiruko rurenga miliyari 1.5 rwo mu bihugu bigize umuryango wa Commonwealth.

    Urwo rubyiruko, cyane cyane urwo muri Africa, ruracyugarijwe n'ibibazo by'ubukene ubushomeri, n'imibereho mibi.

    Shomy ati: 'Ntiwakwibaza ko mu kinyejana cya 21 hari umuntu waba ukicwa n'impiswi, ariko mama amaze gupfa nararebye nsanga ahubwo ni agatonyanga mu nyanja.

    'Abantu ibihumbi amagana baracyicwa n'indwara nk'impiswi na korera, indwara zose zishobora kwirindwa byoroshye.

    'Rero nahagurukijwe cyane cyane n'agahinda nagize, niyemeza kugira icyo nkora ngo ntihagire undi uzaca mu bihe nk'ibyo nanyuzemo'.

    Shomy Chowdhury yashinze ikigo Awareness 360 ubu gifite ibikorwa mu bihugu 30 bya Aziya, Uburayi, n'ibigera ku 10 bya Africa nk'u Burundi, Kenya, Nigeria na Zimbabwe.

    Umuhate we mu kwigisha urubyiruko kurwanya indwara zishingiye ku mwanda n'amazi mabi watumye ahabwa ibihembo byinshi, birimo kuba umunya-Bangladesh wa mbere wahawe 'Princess Diana Legacy Award' mu 2019.

    Shomy yabwiye BBC ati: 'Twibanda ku bantu b'urubyiruko bibagirana, bagowe, kandi banenwa bo muri ibyo bihugu, nk'indaya, abamugaye, abataye amashuri…tubigisha akamaro k'isuku n'isukura.'

    Ariko urubyiruko rwa Africa rukeneye amafaranga!

    Ubushomeri, ubukene, ikimenyane, n'icyenewabo bituma hari urubyiruko rwinshi rutabona amahirwe rukwiye, ibyo ni bimwe mu bibazo bikomeye birwugarije.

    Sylvia Makario, umunya-Kenya ukora mu kigo cy'ubucuruzi Hepta Analytics, nawe ari muri iyi nama i Kigali, ni inzobere mu bijyanye na 'Data', azi uburyo ibyo byaba isoko y'akazi n'amafaranga ku rubyiruko.

    Sylvia amaze imyaka ine aba mu Rwanda, ubushoramari bw'ikigo akorera bushingiye ku gushyira amakuru (data) kuri internet mu ndimi nyinshi zishoboka za Africa.

    Mu kiganiro na BBC, avuga ko ibigendanye na 'data' n'uko ikoreshwa ari isoko y'akazi ku rubyiruko rwa Africa rugowe n'ubushomeri.

    Ati: 'Ushobora guhuza data nini zishoboka ukazikorera isesengura, ukareba igitera ikibazo runaka uhereye kuri data, ukagena imirongo y'uko leta cyangwa imiryango yigenga byakwinjira mu gukemura ikibazo runaka mbere y'uko kirenga imbibi, ukoresheje data.

    'Urubyiruko rwize ibintu bitandukanye; yaba ubuhinzi, ubwikorezi, ubuvuzi…aho hose harimo data ushobora gukoresha mu kugena uburyo bwo gutanga serivisi neza kurushaho cyangwa ukabwira leta uko yakora igenamigambi ryafasha abaturage, ubwo ni uburyo wakoresha data mu gukorera amafaranga.'

    Ibibazo ni byinshi byugarije urubyiruko rw'ibihugu bya Commonwealth, by'umwihariko urwo muri Africa, ariko benshi bari mu bagomba kubibonera ibisubizo barifuza kubihunga.

    Ubushakashatsi bwa African Youth Survey 2022 bwakorewe mu bihugu 15 bya Africa bwerekanye ko 52% by'urubyiruko ruri hagati y'imyaka 18 — 24 rwifuza kwigira ahandi, kubera ibibazo by'ubukungu, imibereho, kubura amahirwe, uburenganzira bwa muntu, n'ibindi.

    Sylvia Makario ati: 'Birakenewe ko dukomeza kubaka ibihugu byacu aho kwimukira ku yindi migabane, dukwiye guhangana nabyo [ibibazo] tukabikemura.'

    @BBC

    The post Rwanda: Nyina yishwe na 'diarrhea' bituma agira umuhate wo kuyirwanya yivuye inyuma appeared first on IRIBA NEWS.

    Source : https://iribanews.rw/2022/06/20/rwanda-nyina-yishwe-na-diarrhea-bituma-agira-umuhate-wo-kuyirwanya-yivuye-inyuma/

  • Muhanga: Umuryango FPR-Inkotanyi ugiye kubaka  icyicaro kizatwara asaga Miliyari 1 y'u Rwanda #rwanda #RwOT

    Umuyobozi(Chairperson) w'Umuryango FPR-Inkotanyi mu karere ka Muhanga, akaba n'umuyobozi w'aka karere, Kayitare Jacqueline yemeza ko bitarenze ukwezi kwa Nyakanga 2022 ibikorwa byo kubaka icyicaro cy'uyu muryango bizatangira. Kizubakwa hafi ya sitasiyo ya Polisi ya Nyamabuye, inyuma y'Ikigo cy'imisoro n'amahoro ishami rya Muhanga. Meya Kayitare, ahamya ko amaboko y'abanyamuryango bayizeye muri iki gikorwa.

    Meya Kayitare, ibi yabitangarije abanyamuryango ba FPR-Inkotanyi mu nama y'Ubukangurambaga yahuje abagize urwego rw'ubukangurambaga kuva ku kagali kugera ku rwego rw'Akarere ka Muhanga, inama yabahurije i Kabgayi.

    Yagize ati' Aho umuryango wacu ukorera ni hato, dukeneye kubaka inzu igezweho yajya yifashishwa mu gihe twagize inama. kandi tukagira icyicaro cyacu twigengaho'. Akomeza avuga ko aho bakoreye iyi nama ari heza, ariko ko bibasaba kuhishyura. Avuga ko mu bushishozi, barebye bagasanga ingufu z'abanyamuryango ba RPF-Inkotanyi nkuko bisanzwe zishyizwe hamwe zakora iki gikorwa bakishakamo ibisubizo.

    Meya Kayitare, yemeza ko mu kwezi kwa Nyakanga 2022 iyi mirimo bizera ko izatangira. Yibutsa abanyamuryango ko imikorere y'umunyamuryango ikwiye kugaragarira mu bikorwa kuko bituma n'abandi babigira ibyabo bagakora ntawe basigana kuko ibyo bakora baba babyishimiye kandi babishyizeho umutima.

    Yagize ati' Nibyo biracyari mu nyigo, ariko birarangira vuba ku buryo ahagana mu kwezi kwa 7 (Nyakanga), ariko ntabwo ari iby'umuntu ku giti cye buri munyamuryango agomba kugira uruhare kugirango dukomeze ibikorwa byacu, kandi tubigizemo uruhare ntawe dusigana, buri wese agomba gukora uko ashoboye tukabishyira ku mutima kugirango imikorere yacu ikomeze kugerwaho'.

    Nsengimana Osward, umukangurambaga mu murenge wa Nyabinoni witabiriye ubu bukangurambaga avuga ko ubusanzwe abanyamurya go ba FPR- Inkotanyi basanzwe bitanga bityo ko nta kabuza ibyo biyemeje babigeraho kandi bakazabikora nta kabuza.

    Yagize ati' Nibyo icyo twiyemeje tukigeraho dufatanyije, ariko ntakabuza ko tugomba kubigeraho, kuko ubwitange bahorana butuma byinshi biyemeje babigeraho'.

    Habyarimana Alfred, akuriye Komisiyo y'Ubukungu mu muryango FPR -Inkotanyi. Yabwiye intyoza ko bafite icyizere cy'uko iki cyicaro kizuzura vuba ndetse akemeza ko binashoboka ko amafaranga yanajya munsi ya Miliyari 1 nubwo hari abazitanga bagatanga ubushobozi, abandi bagatanga imibyizi cyangwa ibikoresho mu rwego rwo kwishakamo ibisubizo. Yemeza ko byanashoboka abantu bakanafata ideni muri Banki.

    Iki cyicaro kigiye kubakwa, kizajya cyakira inama z'umuryango ndetse amakuru yandi twamenye ni uko hazajya hanakoreshwa n'abafite ibirori, bajya binjiza amafaranga yajya afasha umuryango gukemura ibindi bibazo.

    Akimana Jean de Dieu

    Source : https://www.intyoza.com/muhanga-umuryango-fpr-inkotanyi-ugiye-kubaka-icyicaro-kizatwara-asaga-miliyari-1-yu-rwanda/

  • Hari abikanze ko imihanda ifunze kubera CHOGM baguma mu rugo; leta yatanze umucyo – #rwanda #RwOT

    Ugeze mu Mujyi wa Kigali hamwe na hamwe, nta rujya n'uruza ruhari wakeka ko imirimo itari gukorwa nk'ibisanzwe, cyane ko bamwe bumvise ko imihanda imwe izakoreshwa n'abayobozi, bagakeka ko batazaba bemerewe kuyinyuramo.

    Ni mu gihe ariko imihanda yatangajwe ko izajya ikoreshwa n'abayobozi, ifungwa by'igihe gito bagiye gutambuka, nyuma ikongera kuba nyabagendwa ku bantu. Umuntu ashobora kuva ku Kibuga cy'Indege i Kanombe akagera mu Mujyi wa Kigali rwagati nk'ibisanzwe gusa mu gihe hari abashyitsi bagiye gutambuka, imodoka zihagarara iminota mike.

    Uretse amashuri yafunzwe mu gihe cy'icyumweru, amaduka manini aranguza ibicuruzwa mu mujyi rwagati, imodoka zitwara abagenzi n'ibiro bitandukanye bikomeje imirimo.

    Ibikorwa bya CHOGM ariko ntibirashyuha cyane kuko bikiri mu nama zigaragiye iy'abakuru b'ibihugu na za guverinoma, izafungurwa ku mugaragaro ku wa Gatanu, tariki 24 Kamena, inama zo ku rwego rwo hejuru zigakomeza ku wa Gatandatu tariki 25 Kamena 2022.

    Uko inama ya CHOGM yagendaga yegereza, abantu bamwe bibwiraga ko ubuzima bushobora guhagaragara mu mujyi, imihanda minini igafungwa mu buryo buhoraho, ntibyorohere umuntu kugira aho atarabukira.

    Ni nabyo benshi bari bacyibwira kugeza mu gitondo cyo kuri uyu wa Mbere.

    Benshi bagendaga batungurwa no kugera mu mihanda minini bagasanga ni nyabagendwa, ahubwo ubwoba bushingiye gusa ku byo barimo kubwirana hagati yabo.

    Kuri uyu wa Mbere, Polisi y'u Rwanda yatangaje ko mu gihe imirimo y'Inama ya CHOGM ikomeje, “imwe mu mihanda yo mu mujyi wa Kigali izaharirwa abitabiriye iyo nama nk'uko bisanzwe.”

    Yatangaje ko imihanda izakoreshwa n'abitabiriye CHOGM kuri uyu wa 20 Kamena ari Serena Hotel – Payage – Sopetrade- Kimicanga – Kimihurura -Gishushu – Gisimenti – Giporoso – Nyandungu – Kuri 15 – Mulindi – Ku Ruganda rw'Inyange – Intare Arena.

    Yakomeje iti “Abakoresha umuhanda baragirwa inama yo gukoresha indi mihanda.”

    Yavuze ko abava i Kabuga cyangwa mu Ntara y'Iburasirazuba bashobora kunyura ku Musambi – inyuma ya Parking ya Intare Arena – Mulindi – Gasogi – Musave – Special Economic Zone – Kwa Nayinzira – Kimironko – Controle technique – Nyabisindu – Gishushu – Mu Kabuga ka Nyarutarama – Utexrwa – Kinamba.

    Polisi yatangaje ko undi muhanda uzaba ufunguye ku rujya n'uruza rw'ibinyabiziga ni uva ku Mulindi – Kanombe ugakomeza mu Kajagali – Nyarugunga Health Center -Busanza – Itunda/Rubirizi – Kabeza – Alpha Palace – Sonatubes – Rwandex – Kanogo – Kinamba.

    Guverinoma y'u Rwanda isobanuye ko kuba Kigali yakiriye CHOGM bidasobanuye ko ubuzima mu mujyi buza guhagaragara, ahubwo ibikorwa n'indi mirimo y'ubucuruzi bigomba gukomeza.

    Iti “Imihanda irafunguye ndetse ibikorwa muri Kigali bigomba gukomeza. Imihanda imwe minini izajya ifungwa igihe gito gusa imodoka z'abayobozi zigiye gutambuka. Naho ubundi nta mihanda ifunze – abantu bashobora kujya aho bashaka ndetse bagakomeza imirimo yabo isanzwe.”

    Impungenge z'abatuye umurwa mukuru zari zabaye nyinshi ubwo Minisiteri y'Uburezi yatangazaga mu cyumweru cyo ku wa 20-25 Kamena, amashuri yose yo mu Mujyi wa Kigali azaba afunzwe.

    Ibyo byatumye benshi bakeka ko ari integuza y'uko muri CHOGM yose nta we uzaba ubona aho apfumurira.

    Umuyobozi w'Umujyi wa Kigali, Pudence Rubingisa, aheruka kubwira abanyamakuru ko iyi mihanda izajya iba ifunze igihe gito, abagenzi bakazajya bamenyeshwa iri bukoreshwe uwo munsi.

    Yakomeje ati “Icyo dukomeje kuvuga muri iyi minsi, ibikorwa byo mu mujyi bigomba gukomeza, turagira ngo tunakangurire rwose n'ababikora kubikomeza, ntihagire n'uwabangamirwa, kuko aba bashyitsi baje bazakenera kugira aho bahahira, amahoteli abacumbikiye na yo azakenera kugira aho ahahira.”

    “Birasaba rero ko amasoko akomeza gukora, ahubwo nayo akitegura bihagije, n'abajya kuyakoreramo bagakora. Nta bindi bikorwa rero biteganyijwe ko byahagarara ahubwo abantu bakore kurushaho kuko iyo tugize amahirwe y'abantu nk'aba baje mu gihugu cyacu, utanabirebeye mu ndorerwamo y'ubukerarugendo gusa, ahubwo no mu ndorerwamo y'ubukungu, ni abantu baba bazasiga amadolari cyangwa amadovize yabo.”

    Mu rwego rwo gutuma abazitabira iyi nama barushaho kwishimira Kigali, hateguwe ibikorwa bizahuza abantu benshi barimo abahanzi, nk'icyiswe Choplife Kigali, Kigali People's Festival, Street Festival n'ibindi.

    Ni ibikorwa bizatuma abagenda Umujyi wa Kigali n'abawutuye barushaho kwishimira ubuzima, n'iminsi yose bazamara mu Rwanda.

    CHOGM igiye kumara icyumweru cyose ibera mu Rwanda

    Ingeri zitandukanye z’abakozi zazindukiye mu mirimo

    Imodoka zitwara abagenzi zikomeje imirimo yazo

    Abantu benshi bazindukiye mu mirimo, nubwo bamwe bagendaga biguru ntege bakeka ko batagera ku kazi

    Abacuruzi bazindukiye ku maduka yabo mu Mujyi wa Kigali rwagati

    Urujya n’uruza rwagabanutse cyane mu Mujyi wa Kigali, ku munsi wa mbere wa CHOGM


    Source : http://igihe.com/amakuru/u-rwanda/article/ubuzima-i-kigali-ku-munsi-wa-mbere-wa-chogm