Author: webrwanda

  • Perezida wa Sri Lanka uheruka kurokoka abaturage yahunze n'indege ya gisirikare #rwanda #RwOT

    Perezida wa Sri Lanka Gotabaya Rajapaksa yahunze igihugu mu ndege ya gisirikare, mu gihe hari imyigaragambyo ikomeye ishingiye ku izahara ry'ubukungu bw'iki gihugu cyo muri Aziya y'amajyepfo.

    Igisirikare cy'iki gihugu kirwanira mu kirere cyemeje ko uyu mugabo w'imyaka 73 yahungiye mu birwa (amazinga mu Kirundi) bya Maldives ari kumwe n'umugore we n'abashinzwe umutekano babiri.

    Bageze mu murwa mukuru Malé wa Maldives ahagana saa cyenda z'ijoro (03:00) zo ku isaha yaho, ni ko ishami rya BBC ritangaza ibiganiro mu rurimi rwa Sinhala ruvugwa muri Sri Lanka ribyumva.

    Kugenda kwa Rajapaksa gusoje isimburana ku butegetsi ry'umuryango umwe wategetse Sri Lanka mu gihe cy'imyaka ibarirwa muri za mirongo.

    Yari amaze igihe yihishe nyuma yuko imbaga y'abigaragambya yiraye mu nyubako atuyemo ku wa gatandatu w'icyumweru gishize.

    Mbere, Perezida Rajapaksa yari yasezeranyije ko yegura kuri uyu wa gatatu ku itariki ya 13 y'ukwezi kwa karindwi.

    Mu gitondo cyo kuri uyu wa gatatu, abategetsi babwiye ibiro ntaramakuru Reuters ko atari yagatanze ibaruwa ye y'ubwegure ngo ayihe umukuru w'inteko ishingamategeko.

    Umuvandimwe we, Basil Rajapaksa, wahoze ari Minisitiri w'imari, na we yahunze igihugu, nkuko abatanze amakuru babibwiye BBC. Bivugwa ko arimo kwerekeza muri Amerika.

    Mu gihe Abanya-Sri Lanka babyukaga bumva iyi nkuru yuko Perezida yahunze, ababarirwa mu bihumbi biraye mu mihanda yo mu murwa mukuru Colombo.

    Benshi bateraniye ahantu h'ibanze habera imyigaragambyo hitwa Galle Face Green. Bamwe bumvaga amagambo avugirwa ahahise hategurwa kugira ngo abaturage basanzwe bavuge ijambo.

    Mu rurimi rwa Sinhala, abavuga ijambo banyuzagamo bagatera hejuru bati “Intsinzi ku rugamba”, iyi ikaba ari intero yagiye isubirwamo mu myigaragambyo, mu kwamagana leta n'abategetsi rubanda ibona ko barananiwe kuyikorera.

    Abandi bari barakajwe no kuba Rajapaksa yagiye, bakabibona nko kuba nta buryo buhari mu gihugu bwo kuryoza umuntu ibyo yakoze.

    GP Nimal, uri mu bigaragambya, yagize ati: “Ntitubikunze. Turashaka kumugumana. Turashaka ko agarura amafaranga yacu! Turanashaka gushyira ba Rajapaksa bose [umuryango w'aba Rajapaksa] muri gereza ifunguye aho bashobora gukora akazi k'ubuhinzi”.

    Ariko Reshani Samarakoon, umunyeshuri muri kaminuza w'imyaka 23, yabwiye BBC ko ihunga ry'uyu wari Perezida ryatanze “icyizere ko mu gihe kiri imbere dushobora kugeraho tukaba igihugu giteye imbere, mu bukungu no mu mibereho”.

    Abanya-Sri Lanka begeka ku butegetsi bwa Perezida Rajapaksa izahara ry'ubukungu rya mbere ribi cyane ribayeho mu myaka ibarirwa muri za mirongo ishize.

    Hashize amezi bagorwa n'ibura ry'umuriro rya buri munsi n'ubucye bw'ibyibanze nk'ibitoro, ibiribwa n'imiti.

    Rajapaksa, ufite ubudahangarwa bwo kudakurikiranwa mu nkiko mu gihe akiri Perezida, byemezwa ko yari yarashatse guhungira mu mahanga mbere yuko ava ku butegetsi, kugira ngo yirinde ko ashobora gutabwa muri yombi n'ubutegetsi bushya.

    BBC

    Source : https://umuryango.rw/amakuru/mu-mahanga/umutekano/article/perezida-wa-sri-lanka-uheruka-kurokoka-abaturage-yahunze-n-indege-ya-gisirikare

  • Byahinduye Isura i Cabo Delgado : Ibyakozwe n’Ingabo z’u Rwanda bitangiye kwangizwa, Ubwoba ni bwose kuri TotalEnergies #rwanda #RwOT

    Amakuru avuga ko icyo gitero cyagabwe ku wa Gatandatu, tariki 9 Nyakanga 2022, cyari icya gatatu kigabwe n’ibyihebe mu gihe cy’amezi abiri. Bivugwa ko ibyo byihebe byari bigiye gushaka intwaro n’ibyo kurya.

    Icyo gihe bivugwa ko habaye imirwano, igakomerekeramo Ingabo za Mozambique n’ibyihebe byari bikigabye. Ku rundi ruhande ngo abasirikare ba Mozambique, FADM, bari muri icyo kigo bahungiye mu nkambi iri hafi y’Umujyi wa Palma.

    Amakuru yizewe avuga ko ibyo byihebe byateye ibirindiro by’Ingabo za Mozambique biri mu Gace ka Pundanhar ku buryo byabaye ngombwa ko zihunga.

    Ni nyuma y’uko na none ku wa 29 Kamena 2022 ibyihebe byari byagabye igitero mu Gace ka Mandimba bikahiba intwaro aho bivugwa ko ari zo byifashishije mu cya Pundanhar.

    Mu ntangiriro z’uyu mwaka, Ingabo z’u Rwanda zifatanyije n’iza Mozambique, zagabye ibitero ku byihebe mu bice bya Pundanhar na Nhica do Rovuma zibivana mu birindiro.

    Ni ibitero byagabwe hagati y’itariki 6 Gashyantare na 16 uko kwezi. Ibyihebe byambuwe utwo duce, bikwira imishwaro mu mashyamba, bigana mu duce twa Nangade.

    Ako gace kagaruwemo umutekano maze nyuma Ingabo z’u Rwanda zigashyikiriza iza Mozambique, zo zikomeza urugendo rugana mu bice bya Macomia kuko ari ho ibyihebe byari byahungiye.

    Urugamba rwo muri Macomia rwatangiye nyuma y’amasezerano Ingabo z’u Rwanda zagiranye n’iza Mozambique hamwe n’iza SADC, aho impande zose zemeranyije ko zigiye gufatanya kurwanyiriza hamwe ibyo byihebe.

    Byabaye ngombwa ko Ingabo z’u Rwanda zari Pundanhar na Nhica do Rovuma zihavanwa, kuko hari hatekanye, hasigara mu maboko ya FADM, zo zikomeza urugamba mu bice ibyihebe byahungiyemo.

    Zageze mu bice bya Macomia ku wa 30 Werurwe, zitangira urugamba mu mashyamba y’inzitane y’ahitwa Chai. Ni amashyamba agoye cyane kubera imiterere yayo gusa zabashije kuyahashyamo umwanzi zinabohora abaturage bari barafashwe bugwate.

    Ku wa 13 Gicurasi, zamurikiye Leta ya Mozambique abaturage 800 bari barashimuswe n’ibyihebe. Byahise bitangira gukwira imishwaro, byambuka bihungira mu Ntara ya Nampula yari imaze igihe itarangwamo umutekano muke.

    Urugamba rwo kurwanya ibi byihebe ruracyakomeje mu mashyamba ya Chai ndetse ibitero byo kubihashya bigabwa umunsi ku wundi. Ni mu gihe kandi hari gutekerezwa uburyo Ingabo z’u Rwanda, iza FADM n’iza SADC zahuriza hamwe imbaraga zigatsintsura ibyo byihebe muri ayo mashyamba.

    Hagati aho hari amakuru amaze iminsi atangazwa ko TotalEnergies, ifite impungenge zo kongera gusubukura ibikorwa byayo byo gucukura Gaz mu Ntara ya Cabo Delgado mu Gace ka Afungi.

    Muri Afungi mu nkengero y’Inyanja y’Abahinde, TotalEnergies yahashoye imari mu mushinga wo gutunganya gaz ihaboneka. Ni umushinga washowemo asaga miliyari 20 z’Amadolari ariko ashobora kwiyongera akagera kuri miliyari 50$.

    Ubwo gaz yari imaze kuvumburwa muri ako gace, TotalEnergies yabaye imwe muri sosiyete zahise zihashinga amatako. Yimuye abaturage benshi bari batuye hafi aho, ibubakira inzu zigezweho ahitwa Quitunda hanyuma yo yubaka inzu zizajya zikorerwamo n’abakozi bayo ndetse ishyira n’imbibi mu cyanya cyayo.

    Mbere y’uko ibyihebe byigabiza Cabo Delgado, abakozi ibihumbi bitatu bari bamaze guhabwa akazi muri uwo mushinga mu gihe muri rusange byari biteganyijwe ko abazagahabwa bose bagera ku bihumbi 15.

    Andi makuru IGIHE dukesha iyi nkuru ifite ni uko abakozi bamwe b’abanyamahanga batangiye gusubira i Cabo Delgado bitegura gutangira imirimo nubwo hakiri ingingimira.

    Urugamba rwo kurwanya ibyihebe byigabije Intara ya Cabo Delgado rukomeje guhindura isura umunsi ku wundi, aho mu duce tumwe hongeye kumvikana ibikorwa by’ubugizi bwa nabi cyane cyane ahagenzurwa n’Ingabo za Leta ya Mozambique.

    Mu miterere y’uru rugamba inzego z’umutekano z’u Rwanda ziri kurwana guhera muri Nyakanga 2021, agace zibohoye zigasiga mu maboko y’Ingabo za Mozambique (FADM), ngo abe arizo zigacungira umutekano.

    Ubwo Ingabo z’u Rwanda zabohoraga uduce zahawe nka Palma na Mocimboa da Praia twari indiri zikomeye z’ibyihebe bizwi nka Ahlu al-Sunnah wal-Jamaah cyangwa al-Shabaab, byahungiye mu gice cyari mu maboko y’Ingabo z’Umuryango wa Afurika y’Amajyepfo, SADC.

    Muri ibyo bice hashize iminsi ibitero by’ibyihebe biba umunsi ku wundi. Urugero nko ku wa 23 Kamena, igitero cyagabwe mu gace ka Nkoe, bukeye ikindi kigabwa mu gace ka Nanjaba mu Karere ka Macomia.

    Ku wa 22 Kamena, umusirikare wa Tanzania yiciwe mu gitero cy’ibyihebe mu Karere ka Nangade.

    Nyuma yo kubona ko ibyihebe byahungiye muri Macomia, muri Werurwe Ingabo z’u Rwanda zagiranye amasezerano n’iza SADC, agamije gufatanya mu guhashya ibi byihebe.

    Ku wa 30 Werurwe Ingabo z’u Rwanda zageze mu Karere ka Macomia aho ibyihebe byari byarahungiye, zitangira kubikurikirana bundi bushya.

    Urugamba rwafashe indi sura

    Mu gukomeza guhunga, ibyihebe byerekeje mu Ntara ya Nampula, ahantu hatarangwaga umutekano muke kuva mu 2017 ubwo ubugizi bwa nabi bwatangiraga muri Mozambique.

    Mu ntangiriro za 2022, ibyihebe byize amayeri mashya bitangira kwisuganyiriza i Nampula, byongera guteza umutekano muke mu majyepfo ya Cabo Delgado.

    Nko muri Mutarama, mu Karere ka Meluco mu ntara ya Cabo Delgado habereye ibitero 14, biza gukaza umurego muri Gicurasi.

    Muri Kamena ntibyahagaze, ahubwo bifata indi ntera mu Majyepfo ya Cabo Delgado mu duce twa Quissange, Ancuabe, Chiure na Mecufi no ku mupaka wa Nampula ku wa 17 Kamena.

    Hagati aho, muri Gashyantare Ingabo z’u Rwanda n’iza Mozambique zahize bukware ibyihebe byari mu gace ka Nhica do Rovuma na Pundanhar, bimwe biricwa ibindi birahunga. Ibyahunze byerekeje mu gace ka Nangade.

    Ingabo z’u Rwanda zibonye ko utwo duce dutekanye [Nhica do Rovuma na Pundanhar], zadushyikirije Igisirikare cya Mozambique, zikomereza mu gace ka Macomia kari kamaze kuba indiri y’ibyihebe.

    Ibyihebe byamenye amakuru y’uko Ingabo z’u Rwanda zimukiye Macomia kuko zabonaga ko ibyihebe, bishaka kongera gucengera bijya mu duce twa Siri I na Siri II.

    Ni uduce tugoye cyane kurwaniramo, ku buryo ubwo byirukanwagamo mu mwaka ushize byahuye n’igihombo gikomeye, kuko hari mu mashyamba rwagati, ashobora kubifasha kwihisha.

    Ubwo Ingabo z’u Rwanda zari zigeze Macomia, ibyihebe byarabimenye bitangira kugaba ibitero shuma mu duce zavuyemo, tugenzurwa n’Ingabo za Leta.

    Biherutse gutera Ingabo za leta mu duce twa Maparanganha, aho mu minsi ishize byatwitse imodoka z’abaturage.

    Bikekwa ko muri Macomia ariho hari abayobozi bakuru b’ibyihebe, barimo aba-sheihk bane bakomeye. Ni ho hari indwanyi uyu mutwe wa Al Shabaab ucungiraho.

    Ingabo z’u Rwanda zikigera muri Macomia, zahise zibohora agace ka Chai, ubu imidugudu irenga itanu iri mu mahoro. Zambuye ibyihebe abaturage barenga ibihumbi bitatu bari mu mashyamba.

    Ku wa 13 Gicurasi bamurikiwe leta ya Mozambique, basubizwa mu ngo zabo.

    Hafi aho niho Ingabo z’u Rwanda zashyize ibirindiro, ku buryo ibitero byo kugarura umutekano muri ako gace bigabwa umunsi ku wundi.

    Muri iki Cyumweru zateze igico ibyihebe bivuye gushaka ibyo kurya, zicamo bitatu, ibindi birahunga. Hari mu masaha y’umugoroba ahagana saa kumi n’imwe.

    Hashobora kuba impinduka muri gahunda yo gusimbuza Ingabo ziri muri Cabo Delgado

    Amakuru yizewe yemeza ko kubera imiterere y’urugamba muri iyi minsi, gahunda yo gusimbuza Ingabo ziri muri Cabo Delgado ishobora kwigizwa inyuma gato.

    Ingabo zagiye mu Ntara ya Cabo Delgado muri Nyakanga umwaka ushize, bivuze ko zimaze hafi kuzuza umwaka muri uru rugamba.

    Muri iki gihe aho Ingabo z’u Rwanda zirimo gutirimuka harimo kwibasirwa n’ibyihebe, kubera intege nke z’Ingabo za Mozambique zisigara ziharinze.

    Source : http://www.ukwezi.rw/1-1/Amakuru-anyuranye/article/Byahinduye-Isura-i-Cabo-Delgado-Ibyakozwe-n-Ingabo-z-u-Rwanda-bitangiye-kwangizwa-Ubwoba-ni-bwose-kuri-TotalEnergies

  • Igihe shampiyona y’umwaka utaha izatangirira… – #rwanda #RwOT

    Inama yahuje abanyamuryango ba FERWAFA bo mu cyiciro cya mbere ndetse n’abayobozi n’amakipe bari kumwe n’abatoza babo, yateranye kuri uyu wa kabiri tariki 12 yemeje ko shampiyona y’icyiciro cya mbere mu bagabo izatangira tariki 19 Kanama 2022.

    Iyi nama kandi yemeje ko umukino uruta iyindi yose uzaba mbere ho icyumweru tariki 14 Kanama 2022, ukazahuza APR FC yegukanye igikombe cya shampiyona na As Kigali yatwaye igikombe cy’Amahoro.

    Biteganyijwe ko umwaka w’imikino uzarangira tariki 4 Kamena 2023, igikombe cy’Amahoro kizatangira tariki 6 Ukuboza 2022- gisozwe tariki 21 Gicurasi 2023. Biteganyijwe kandi ko uyu mwaka w’imikino FERWAFA izategura imikino yo kwibuka ikazaba muri Kamena.

    Shampiyona y’icyiciro cya mbere mu Rwanda irabura ukwezi ngo itangire

    Source : https://inyarwanda.com/inkuru/118942/igihe-shampiyona-yumwaka-utaha-izatangirira-cyamenyekanye-118942.html

  • Skol yashyizeho irushanwa ryabaririmbyi riza… – #rwanda #RwOT

    Ibyumweru 15 byari bishize abahanzi Ariel Wazy, Gabiro Guitar na Ish Kevin ft Memo, bahataniye gukora indirimbo ikunzwe y'ikinyobwa cya Skol Pulse.

    Binyuze mu matora yabereye kuri internet, indirimbo 'Bring Pulse to your Life' ya Ariel Wayz niyo yahize izindi binyuze kubayitoye kuri murandasi www.skolpulse.rw , ndetse n'ababashije kuyitora binyuze mu bikorwa SKOL yakoreye mu tubari dutandukanye bumvisha abantu izi ndirimbo zose uko ari 3. Abagera ku 10,000 nibo babashije gutora muri rusange.

    Skol ivuga ko iyi ndirimbo ari cyo kirango cy'iyi nzoga yageze ku isoko mu Ukuboza 2021.

    Aba bahanzi Ariel Wayz, Gabiro Guitar na Ish Kevin bahatanye muri iri rushanwa baririmbira ku njyana 'beat' yakozwe na Producer Davydenko.

    Ariel Wayz yabwiye INYARWANDA ko yanyuzwe no gutsinda iri rushanwa nyuma y'igihe cyari gishize ahatanye.

    Yavuze ati 'Ndumva binshimishije cyane, ndabyishimiye cyane. Ikindi ntabwo nari kubikora nta bafana banjye, kuko habagaho amatora. Barantoye ni njye wari ufite amajwi menshi, ndashimira abafana banjye muri rusange nanabashimira ku bwo gukomeza kunshyigikira mu bikorwa byanjye byose, kandi ibyiza biri imbere.'

    SKOL ivuga ko nyuma yo gusoza iri rushanwa, yateguye irindi rushanwa rizaha amahirwe abantu bafite impano yo kuririmba, bakaba bazaririmbira mu njyana (beat) yakozwe na Davydenko.

    Uru ruganda ruvuga ko umunyamahirwe uzatsinda azahembwa urugendo rujya mu Mujyi wa Lagos muri Nigeria, agakorerayo indirimbo ye muri imwe muri studio zikomeye muri Africa aho ibyamamare nka Davido na Wizkid bakorera indirimbo.

    Ibijyanye n'amabwiriza agenga iri rushanwa n'ibindi bizakomeza gutangazwa binyuze kuri paji ya Facebook ya Skol Pulse, ari yo @skolpulserwanda cyangwa se kuri website (www.skolpulse.rw)  

    Uruganda rwa Skol rwatangaje irushanwa rigiye gutangira, rizahemba umuririmbyi umwe gukorera indirimbo muri imwe muri studio zikomeye muri Nigeria

    Source : https://inyarwanda.com/inkuru/118941/skol-yashyizeho-irushanwa-ryabaririmbyi-rizahemba-kujya-muri-nigeria-no-gukorerayo-indirim-118941.html

  • Itsinda Kataleya na Kandle ryaje mu Rwanda, b… – #rwanda #RwOT

    Ku gicamunsi cyo kuri uyu wa Kabiri tariki 12 Nyakanga 2022, nibwo aba bakobwa bageze ku kibuga cy'indege Mpuzamahanga cya Kigali i Kanombe, aho bari kumwe n'umujyanama wabo.

    Aba bakobwa bakiriwe n'abarimo umuhanzi Afrique, Producer Fayzo, Alex Muyoboke n'abandi.

    Afrique yabwiye INYARWANDA ko indirimbo 'Nyash' ari umusaruro w'urugendo yakoreye muri Uganda muri Gicuasi 2021, ubwo yari kumwe n'abandi bahanzi bo mu Rwanda n'abo muri Uganda.

    Ati 'Nk'uko mwabibonye ntabwo nari nagiye gukora ubusa muri Uganda. Naragiye nkora 'collabo' na bano bakobwa babiri, yitwa 'Nyash'. Twarayisohoye, barayibonye, hanyuma abakobwa barahari, bagiye kubona noneho byinshi babafitiye.'

    Kandle yabwiye INYARWANDA ko baje mu Rwanda 'muri gahunda yo kumenyekanisha ibihangano byacu, cyane cyane iyi ndirimbo twakoranye na Afrique'.

    Uyu mukobwa yavuze ko baje no guhura n'abafana babo bari mu Rwanda 'kuko tubona ukuntu badushyigikira cyane'.

    Kandeleya yavuze ko bahisemo kuza mu Rwanda kumenyekanisha ibihangano byabo 'kubera ko dukunda u Rwanda kandi dufite abafana benshi hano'. Ati 'Ikindi ni uko dufitanye indirimbo na Afrique, rero turi hano mu kumenyekanisha ibihangano byacu.'

    Yavuze ko bahisemo gukorana indirimbo na Afrique, kubera ko ari 'umuhanzi uri mu kigero kimwe natwe kandi turi inshuti'. Ati 'Ibyo rero byaratworoheje mu gukorana.'

    Kandle avuga ko ubu nta mbogamizi bahura nazo mu muziki 'n'ubwo atari ikibuga cyoroshye.'

    Namakula Hadijah [Kataleya] yavutse ku wa 19 Ukuboza 1999, aho yize amashuri abanza kuri Mengo ayisumbuye yiga muri Noah mu gace ka Rubaga.

    Nabatuusa Rebecca [Kandle], yize amashuri abanza ahitwa Bunamwaya, ayisumbuye yiga Kyambogo College.

    Ibinyamakuru birimo Ugandanbuzz, bivuga ko aba bombi bahuye ubwo Kandle yari aherekeje inshuti ye igiye mu isabukuru y'amavuko ya Kataleya.

    Icyo gihe Kandle yasuhuzanyije na Kataleya bahana nimero, kuva ubwo umubano wabo uraguka kugeza biyemeje gukora umuziki.

    Kandle avuga ko binjiye mu muziki hagati ya 2017 na 2018, nyuma yo kubona nta tsinda ry'abakobwa muri Uganda rikora umuziki. Ati 'Igitekerezo cyari ukuziba icyuho cyariho icyo gihe.'

    Binjiye mu muziki bafashwa na Theron Music. Bombi bavuga ko umuziki utari inzozi, kuko Kataleya yashakaga kuba umupilote w'indege naho Kandle agashaka gukora mu ndege.

    Aba bakobwa bavuga ko kuva bakwinjira mu muziki, bahise biyemeza kugeza umuziki wabo ku rwego mpuzamahanga. 


    Abahanzikazi Kataleya na Kandle bo muri Uganda bageze mu Rwanda muri gahunda yo kumenyakanisha ibihangano byabo 

    Umuhanzikazi Kataleya yavuze ko bahisemo gukorana indirimbo na Afrique kubera ko ari inshuti yabo 

    Kandle yavuze ko baje guhura n’abafana babo babarizwa mu Rwanda


     

    Kataleya na Kandle bakiriwe n’abakobwa babarizwa muri Kigali Protocal 

    Ubwo Afrique yakiraga ku kibuga cy’indege aba bahanzikazi bo muri Uganda 

    Producer Fayzo watunganyije amashusho y'indirimbo 'Nyash' afatanyije na Taher Visual


    Umuhanzi Afrique ubwo yari ku kibuga cy’indege Mpuzamahanga cya Kigali ategereje kwakira Kataleya na Kandle bakoranye indirimbo ‘Nyash’ 

    Producer Niz Beat umaze gukora nyinshi mu ndirimbo za Afrique zirimo ‘Agatunda’

    REBA. HANO KATALEYA NA KANDLE UBWO BARI BAGEZE I KIGALI



    KANDA HANO UREBE INDIRIMBO 'NYASH' YA KATALEYA NA KANDLE BAFATANYIJE NA AFRIQUE


    AMAFOTO & VIDEO: Iradukunda Jean de Dieu-INYARWANDA.COM

    Source : https://inyarwanda.com/inkuru/118936/itsinda-kataleya-na-kandle-ryaje-mu-rwanda-bavuga-impamvu-bakoranye-indirimbo-na-afrique-a-118936.html

  • Niba ushaka kuba umugabo mwiza ku mugore wawe… – #rwanda #RwOT

    1. Mubere umukunzi: Umugore wawe ni umukunzi wawe ntabwo ari umugore gusa. Ujye ugaragariza umugore wawe ko umukunda cyane. Ujye umukunda n'umutima wawe wose.

    2. Mubere inshuti: Umugore wawe ni n'inshuti yawe burya. Mujyemo, umugire uko ushaka, umwishimire wenyine, umunezererwe unasekane nawe.

    3. Umubere umwana (Baby): Ujye umubera nk'umwana kandi unamufate nk'umwana. Ujye umuterura, umwambike, umugaburire,… Rimwe na rimwe ajye akuryamaho, agukoresha icyo ashaka kuko uri uwe.

    4. Mujye murara ku gitanda kimwe: Ntugire gushidikanya, hari abantu benshi bakora ubukwe ndetse bakanabana ariko nyuma y'igihe runaka bakajya barara ukubiri. Ahari wakwibaza ngo mbese bibaho? Igisubizo ni Yego.

    5. Mubere inkoramutima: Umudamu wawe mubere inkoramutima, mubere inshuti magara (Soulmate). Ni inshuti magara yawe. Ntukamuhe ibiganza gusa ahubwo umuhe n'umutima wawe, ntukagire na kimwe umuhisha. Ujye umwishimira kuko ni umwamikazi wawe.

    6. Mujye mufatanya mu gihe cyo gutera akabariro: Nibyo, niba ushaka kuba umugabo mwiza kuri madamu wawe mujye mufatanya no mu gihe cyo gutera akabariro.

    7. Ujye ureka akubere mama wawe: Reka umugore wawe akubere mama wawe. Urukundo wakundaga mama wawe rumuhe.

    8. Reka akubere umunyeshuri: Umugore wawe mureke akubere umunyeshuri, maze umwigishe ibintu byose ushakako yiga. Ujye utuma agira ibyo akwigiraho kuko ni wowe mwarimu we wa mbere.


    Inkomoko: Lovelife

    Source : https://inyarwanda.com/inkuru/118914/niba-ushaka-kuba-umugabo-mwiza-ku-mugore-wawe-kora-ibi-bintu-118914.html

  • Breaking News: Igihe shampiyona y'icyiciro cya mbere mu Rwanda izatangirira cyamenyekanye – YEGOB #rwanda #RwOT

    Inama yahuzaga abanyamuryango ba FERWAFA mu cyiciro cya mbere n'abayobozi b'amakipe bari kumwe n'abatoza irarangiye hemejwe ibi bikurikira.

    Iyi nama yemejwe ko super Cup izahuza As Kigali na Apr Fc izaba tariki ya 14 Kanama 2022.

    Mu nama kandi bemeje ko shampiyona y'icyiciro cya mbere mu Rwanda (PRIMUS National League) iztangira Tariki 19 Kamena 2022.

    Umunsi wa 2 wa shampiyona uzashakirwa igihe uzabera hagati kuko igihe wari kubera, usimbujwe umunsi wa mbere, indi calendar ntabwo ihinduka.

    Bemeje ko kandi igikombe cy'Amahoro (Peace cup) izatangira Tariki ya 06 Ukuboza 2022,  igasozwa 21 Gicurasi 2023.

    Umwaka w'imikino muri rusange (Season) uzarangira tariki ya 04 Kamena 2023.

    Iyi myanzuro yose yashyikirijwe EXCOM, akaba ari yo isigaje kubiha umugisha.

    Source : https://yegob.rw/breaking-news-igihe-shampiyona-yicyiciro-cya-mbere-mu-rwanda-izatangirira-cyamenyekanye/

  • Abanyeshuri biga mu yisumbuye basomaniye mu ishuri bigamo karahava (Videwo) – YEGOB #rwanda #RwOT

    Abanyeshuri basomaniye mu ishuri bigamo karahava nyuma yo gusoza amasomo bitegura gusubira iwabo.

    Ni amashusho yasakaye ku rubuga rwa rwa Tik Tok, aho umusore n'umukobwa batatangaje ikigo bigamo bari gusomana byacitse.

    Muri ayo mashusho umusore aba ateruye iyo nkumi mu gihe bakora icyo gikorwa cyo gusomana.

    Uwari uri gufata amashusho aba banyeshuri yageragezaje kuzengurutsa terefone maze yisanga yafashe amashusho abandi banyeshuri bari biryamiye inyuma mu ntebe na bo bari gusomana.

    Ababonye ayo mashusho bibajije ibyo aba banyeshuri baba bagiye kwiga mu gihe abandi bavugaga ko isi yarangiye.

    Reba amashusho bari gusomana 

     

    Source : https://yegob.rw/abanyeshuri-biga-mu-yisumbuye-basomaniye-mu-ishuri-bigamo-karahava-videwo/

  • Paris: Laurent Bucyibaruta yahamijwe ubufatanyacyaha mu byaha bya Jenoside akatirwa imyaka 20 y'igifungo #rwanda #RwOT

    Umunyarwanda Laurent Bucyibaruta w'imyaka 78 y'amavuko wabaye Perefe wa Perefegitura ya Gikongoro kugera mu gihe cya Jenoside yakorewe Abatutsi, kuri uyu wa 12 Nyakanga 2022 nibwo urukiko rwa rubanda i Paris mu Gihugu cy'u Bufaransa rwapfundikiye urubanza rwe rwari rumaze amezi 2. Urukiko, rwamuhamije ubufatanyacyaha mu byaha bya Jenoside rumukatira imyaka 20 y'igifungo ariko ahabwa iminsi 10 yo kuba yajurira.

    Mbere y'uko inteko iburanisha yiherera ngo ifate umwanzuro kuri uru rubanza, Laurent Bucyibaruta yabanje ahabwa ijambo, maze mu buryo butarambiranye agira ati' Mbashimiye ko mumpaye akanya ko kuvuga kuri uru rubanza rumaze amezi abiri( 2 mois). Nagira ngo mbwire abacitse ku icumu ko bitigeze binjyamo mu kubatererana ku bicanyi. Nahoraga nibaza nti nabafasha nte? Ni ibibazo na remord(kwicuza) bimporamo durant les 28 ans( imyaka 28 ishize). Ariko ukuri sinigeze nifuriza akababaro Abatutsi ba Perefegiture, sinigeze mbasha kubafasha n'imiryango n'inshuti zabo, ariko sinigeze nifuza kubaha abicanyi. Ukuri kuri jyewe sinigeze nifuza ko bababara, sinigeze nifatanya n'abicanyi, sinigeze nifuza izo atrocite. Nibyo nifuzaga kuvuga. Murakoze'.

    Nyuma yo kuva kwiherera kw'inteko iburanisha, Urukiko rwa rubanda i Paris rwahamije Laurent Bucyibaruta ubufatanyacyaha mu byaha bya Jenoside yakorewe Abatutsi mu cyahoze ari Perefegitura ya Gikongoro yayoboraga. Rwamukatiye imyaka 20 y'igifungo, rumuha iminsi 10 gusa yo kujuririra igihano yahawe.

    Ni urubanza rwagiye rugaruka ku ruhare rwe mu iyicwa ry'Abatutsi muri Perefegitura ya Gikongoro yayoboraga, by'umwihariko ahantu hatandukanye nk'i Murambi, Cyanika, Kaduha, Kibeho no mubindi bice bitandukanye by'icyari Gikongoro.

    Mu byaha bya Jenoside Laurent Bucyibaruta yari akurikiranyweho, birimo; Ubufatanyacyaha muri Jenoside, Ubufatanyacyaha mu byaha byibasiye inyokomuntu muri Jenoside yakorewe Abatutsi mu yahoze ari Perefegitura ya Gikongoro yayoboraga.

    Bucyibaruta Laurent, yavukiye mu cyahoze cyitwa Komini Musange mu 1944, yakoze imirimo itandukanye irimo kuba Burugumesitiri, Superefe, ndetse aza no kuba Perefe wa Kibungo kuva 1985 kugeza 1992 ari nabwo yagiye kuba Perefe wa Gikongoro kugeza muri Nyakanga 1994. Kuyobora Perefegitura ya Gikongo kandi yabifatanyaga no kuba umuyobozi wa komite ya Perefegitura y'umutwe w'urubyiruko rw'Interahamwe. Yaje guhungira mu cyahoze cyitwa Zaire (DRC y'ubu), ahava yerekeza muri Centrafrique mbere yo kujya mu gihugu cy'Ubufaransa aho yageze mu 1997 ari naho yafatiwe.

    Urubanza rwa Bucyibaruta Laurent, mu rukiko rwa rubanda i Paris mu Gihugu cy'u Bufaransa, rwatangiye Tariki ya 09 Gicurasi 2022, rukaba rwapfundikiwe kuri uyu wa 12 Nyakanga 2022. Ni nawe kandi mu tegetsi mu bahoze bakomeye mu gihe cya Jenoside yakorewe Abatutsi mu Rwanda ugejejwe imbere y'Ubutabera bw'Ubufaransa.

    Munyaneza Theogene

    Source : https://www.intyoza.com/paris-laurent-bucyibaruta-yahamijwe-ubufatanyacyaha-mu-byaha-bya-jenoside-akatirwa-imyaka-20-yigifungo/