Author: webrwanda

APR FC yongeye gutsinda Rayon Sports, iyisatira ku rutonde rwa Shampiyona y’icyiciro cya mbere, mu gihe hasigaye umukino umwe ngo imikino ibanza (Phase Aller) ya Shampiyona ishyirweho akadomo.

Igitego kimwe cyatsinzwe na Bizimana Yannick nicyo cyatandukanyije amakipe yombi, mu mukino waranzwe no gucunga amazamu cyane ku bugarizi b’impande zombi.

UKO UMUKINO WAGENZE UMUNOTA KU WUNDI

16:55′ UMUKINO URARANGIYE

90+5′ Abugarizi ba APR FC bakomeje guhagarara neza bakiza izamu ryabo ridaheruka kwinjizwamo igitego n’umukinnyi wa Rayon Sports

Mutesi Jolly wabaye Miss Rwanda 2016 yitabiriye umukino

90+4′ Paul Were wa Rayon Sports ahannye ikosa yerekeza umupira ku izamu rya APR FC, abugarizi b’ikipe y’ingabo bayobowe na Buregeya Prince bakiza izamu ryabo.

90+2′ Bamwe mu bafana ba Rayon Sports batangiye gusohokera mu marembo manini ya Stade ya Kigali bataha. Umupira wo urakinirwa mu kibuga hagati. 

90′ Abasifuzi bemeje ko iminota isanzwe y’umukino yongerwaho itanu.

Izuba riri i Nyamirambo ntiryigeze rihumbya, Gutsindwa wanakubiswe n’izuba bibabaje kabiri.

Abafana ba Rayon Sports batangiye kwiheba kuko APR FC yabonye igitego cyayo

85′ Mugisha Gilbert wa APR FC afunze nabi umupira yari ahawe na Ishimwe Anicet, atakaza uburyo bw’igitego bwari gutuma APR FC iyobora umukino yisanzuye.

83′ GUSIMBUZA; Rudasingwa Prince wa Rayon Sports yinjiye mu kibuga ahita anahabwa ikarita y’umuhondo kuko yinjiye asimbuye Mugisha François ariko Umusifuzi atabimenyeshejwe.

82′ Mugisha François wa Rayon Sports na Mugisha Bonheur wa APR FC bahawe amakarita y’umuhondo bazira gutangiza ubushyamirane muri bagenzi babo.

80′ Mugisha François wa Rayon Sports akiniye nabi Niyomugabo Claude wa APR FC, abakinnyi ku mpande zombi bahita bashyamirana ari benshi, abasifuzi bajya kwitambika.

78′ GUSIMBUZA; Kwitonda Alain ‘Bacca’ na Mugunga Yves binjiye mu kibuga basimbura Bizimana Yannick na Niyibizi Ramadhan ku ruhande rwa APR FC.

Bizimana Yannick agenzura umupira

76′ Rayon Sports iragerageza amasshoti menshi imbere y’izamu rya APR FC ishaka kwishyura igitego yatsinzwe na Bizimana Yannick wahoze ayikinira.

73′ GUSIMBUZA; Bavakure Ndekwe Felix asimbuye Nishimwe Blaise ku ruhande rwa Rayon Sports ishaka kwishyura igitego.

72′ GOAAAAAAAALLLLLLLL…….

Bizimana Yannick wa APR FC yinjiye mu rubuga rw’amahina rwa Rayon Sports, ahita aboneza mu izamu umupira mwiza yari ahawe na Ishimwe Anicet.

70′ Rayon Sports ibonye uburyo bwa ‘Contre-Attaque’ Moussa Camara ateye umupira kwa Nishimwe Blaise uba muremure urarenga.

69′ Niyibizi Ramadan wa APR FC arekuye ishoti riremereye cyane, Hakizimana Adolphe uri mu izamu rya Rayon Sports yerekeza umupira muri Koruneri itagize Icyo itanga.

APR FC iri gutozwa na Ben Moussa mu gihe umutoza mukuru Adil Mohammed yahagaritswe n’ikipe azira imyitwarire mibi.

67′ Ngendahimana Eric wa Rayon Sports asimbuye Ndizeye Samuel ugaragaza ko ababara umugongo, ari na ko Iraguha Hadji asimburwa na Paul Ooko Were.

64′ Ndizeye Samuel wa Rayon Sports aryamye hasi, agaragaza ko akeneye kwitabwaho n’abaganga.

60′ Leandre Onana wa Rayon Sports ahawe ikarita y’umuhondo azira gukinira nabi Ishimwe Anicet wa APR FC

GUSIMBUZA; Ishimwe Anicet asimbuye Manishimwe Djabel, Byiringiro Lague asimburwa na Mugisha Gilbert ku ruhande rwa APR FC.

59′ Ndizeye Samuel ateye umupira akiza izamu rya Rayon Sports awerekeza ku kuboko kwa Ganijuru Elie, abafana ba APR FC baburana ko bari guhabwa Penaliti, abasifuzi babyima amatwi kuko Ganijuru yatewe umupira atawureba.

56′ Byiringiro Lague wa APR FC aryamye hasi ari kwitabwaho n’abaganga ngo barebe Icyo yabaye.

54′ Mucyo Didier Junior, Iraguha Hadji na Moussa Camara ba Rayon Sports bahererekanyije neza umupira ariko birangira bawuteye hanze y’izamu rya APR FC ririnzwe na Ishimwe Pierre.

52′ Moussa Camara w’imbaraga nyinshi akubitaniye na Niyigena Clement mu rubuga rw’amahina aragwa, Aba-Rayon basigara baburana ko bakagombye guhabwa Penaliti, Umusifuzi Ishimwe Claude arabihorera.

49′ Niyibizi Ramadan ateye umupira yerekeza ku izamu rya Rayon Sports, umupira ujya muri Koruneri.

48′ Mbirizi Eric wa Rayon Sports ahannye ikosaz arenza umupira.

16:03′ Umukino irakomeje. Abakinnyi ba Rayon Sports berekeza ku izamu rya ‘Gitinyiro’.

16:00 Abakinnyi b’amakipe yombi, abatoza babo ndetse n’abasifuzi bari kugaruka mu kibuga bitegura gukomereza umukino mu gice cya kabiri.

Haringingo Francis utoza Rayon Sports yambaye bya gisirimu nk’uko amenyerewe

15:47′ Igice cya mbere kirarangiye, abakinnyi bagiye kuruhuka.

45′ Iminota isanzwe y’igice cya mbere yarangiye, hongejweho umwe.

44′ Rayon Sports yongeye guhomba uburyo bukomeye bw’igitego, aho Leandre Onana asize abugarizi ba APR FC, ahinduye umupira neza usanga Buregeya Prince wa APR FC yiteguye neza ahita awusubiza hagati.

Abafana ba Rayon Sports baragaragaza kwishimira Leandre Essomba Onana, kuko ari gusatira kenshi ndetse agafasha bagenzi be gukiza izamu mu gihe bugarijwe.

40′ Rayon Sports ibonye Indi ‘Coup-Franc’ bahana ikosa rikorewe Iraguha Hadji, Ndizeye Samuel ateye umupira n’umutwe, uca hanze y’izamu gato.

38′ Onana wa Rayon Sports ahannye ikosa, ishoti rye rikomeye ryerekeza umupira hanze gato y’izamu rya APR FC

37′ Niyigenda Clement wa APR FC ahawe ikarita y’umuhondo azira gutega Leandre Onana wa Rayon Sports wari ucenze abakinnyi 3.

33′ Ganijuru Elie wa Rayon Sports agerageje ishoti rirerire, umupira unyura Hejuru y’izamu.

Iminota 30 ya mbere y’umukino urangiye amakipe yombi anganya Ubusa ku busa. Abanyezamu bombi borohewe n’akazi n’ubwo mu minota itanu ya mbere Rayon Sports yabonye Koruneri ebyiri.

30′ Manishimwe Djabel wa APR FC ateye ‘Coup-Franc’ aha umupira Niyomugabo Claude, undi na we atera ishoti Hejuru y’izamu, umupira urenga Stade ya Kigali ujya ku muhanda.

28′ Ganijuru Elie uri gukina ku ruhande rw’ibumoso muri Rayon Sports akoreye ikosa Ombolenga Fitina, ahita ahabwa ikarita y’umuhondo.

24′ Byiringiro Lague aragerageza gucenga yerekeza ku izamu rya Rayon Sports ariko abugarizi bamubereye ibamba.

21′ Niyomugabo Claude wa APR FC ahawe ikarita y’umuhondo ari nayo ya mbere ibonetse mu mukino, azira gukinira nabi Ndizeye Samuel wa Rayon Sports. Hatanzwe umwanya w’abahanga ngo bavure Samuel

18′ Nishimwe Blaise wa Rayon Sports atakaje umupira ndetse ahita akorera ikosa Bizimana Yannick wari uwumwambuye yihuta. Umupira urakinirwa mu kibuga hagati.

17′ Mucyo Didier Junior wa Rayon Sports agerageje guhindura umupira awuvana mu Nguni y’iburyo awerekeza ku izamu rya APR FC, ariko urenga izamu utageze ku bataha izamu ba ‘Gikundiro’.

15′ Umupira uri gukinirwa mu kibuga hagati, abakina inyuma ku mpande zombi bawurenza ikibuga kenshi.

Abafana bicara mu myanya isanzwe ni benshi

Muri uyu mukino, kwinjira byasabye amafaranga nibura 5000FRW ku bicara mu myanya isanzwe, 10000FRW ku bicara ahasakaye, 30000FRW ku bicara muri VIP n’ibihumbi 100 ku bicara mu myanya ya VVIP.

11′ Manishimwe Djabel udaheruka ibihe byiza, ateye ishoti rito cyane rijya hanze y’izamu, nyuma y’umupira mwiza yari aherewe mu rubuga rw’amahina na Niyibizi Ramadan. Amakipe yombi arasatirana ku rwego rumwe.

09′ Rayon Sports inaniwe kubyaza umusaruro uburyo bwa kabiri bw’igitego bukomeye, aho Leandre Onana na Moussa Camara basiganiye gutera umupira bari bahawe na Iraguha Hadji, kugeza wigiriye hanze y’izamu.

06′ Bizimana Yannick wa APR FC agonganya na Hakizimana Adolphe uri mu izamu rya Rayon Sports, Umusifuzi Ishimwe Claude avuga ko Rayon Sports ihana ikosa.

Abakinnyi babanje mu kibuga ku ruhande rwa Rayon Sports ni; Hakizimana Adolphe (GK), Mitoma Isaac, Ndizeye Samuel, Ganijuru Elie, Mucyo Didier, Mugisha ‘Master’, Nishimwe Blaise, Mbirizi Eric, Leandre Onana, Iraguha Hadji na Moussa Camara.

03′ Nishimwe Blaise wa Rayon Sports ateye ishoti rikomeye, Umunyezamu Ishimwe Pierre wa APR FC ariterera yohereza umupira muri Koruneri itagize Icyo ibyara.

APR FC yambaye imyenda ifite amabara y’umukara n’umwe nk’uko bisanzwe, mu gihe Rayon Sports yambaye imyenda y’umweru n’ubururu.

15:00′ Bizimana Yannick na Manishimwe Djabel batangiye umukino ku ruhande rwa APR FC. abafana b’impande zombi baracyafite ubwitonzi.

14:55′ Abakinnyi b’amakipe yombi basohotse mu rwambariro ndetse n’abasifuzi bayobowe na Ishimwe Claude ‘Cucuri’ bari kwifotoza.

Abakinnyi ba APR FC babanza mu kibuga ni; Ishimwe Pierre (GK), Ombolenga Fitina, Buregeya Prince, Niyigena Clement, Niyomugabo Claude, Mugisha Bonheur, Ruboneka Bosco, Byiringiro Lague, Niyibizi Ramadan, Manishimwe Djabel na Bizimana Yannick.

Umutoza: Ben Moussa Abdessattar

14:50′ Abakinnyi b’amakipe yombi baritegura gusohoka mu rwambariro, mu gihe abafana nabo bakomeje kwinjira muri Stade ya Kigali ku bwinshi, bitegura umukino utangira i Saa Cyenda (15:00′) zuzuye.

Abakinnyi ba Rayon Sports bishyushya

Rayon Sports na APR FC bagiye guhurira mu mukino wa 97 w’amateka, aho bahataniye gusoreza ku mwanya wa mbere imikino ibanza ya Shampiyona ya 2022-2023, mu rwego rwo kwiyorohereza mu rugendo rw’imikino yo kwishyura, izatagira muri Mutarama 2023.

Igitego kimwe rukumbi cya Bizimana Yannick, cyafashije APR FC gutsinda Rayon Sports ibura amahirwe yo kwisubiza umwanya wa mbere.

Rayon Sports ni yo yari yakiriye uyu mukino, yashakaga gutsinda kugira ngo irebe ko yakwisubiza umwanya wa mbere yaraye yambuwe na AS Kigali, ni mu gihe APR FC na yo yashakaga gusatira aya makipe kuko yasaga n’ayayisize.

Rayon Sports yabonye amahirwe ya mbere ku munota wa 3 nyuma y’uko Camara na Nishimwe Blaise bahererekanyije neza ariko umupira Ishimwe Pierre awukuramo.

Aya mahirwe yakurikiwe n’ayo ku munota 7 ubwo Iraguha Hadji yahinduraga umupira mwiza imbere y’izamu ariko Mbirizi awurwanira na Onana wahise anawutera hanze y’izamu.

Ku munota wa 9 Manishimwe Djabel yagerageje ishoti nyuma y’umupira wari uhinduwe na Lague ariko unyura hanze y’izamu.

Kuva kuri uyu munota nta yandi mahirwe APR FC yongeye kubona, ni mu gihe aya Rayon Sports imipira myinshi yabonye ari imipira y’imiterekano itabyaje umusaruro. Amakipe yagiye kuruhuka ari 0-0.

APR FC yakoze impinduka za mbere 2 ku munota wa 60, Byiringiro Lague wavunitse na Manishimwe Djabel basimbuwe na Ishimwe Anicet ndetse na Mugisha Gilbert.

Rayon Sports yakoze impinduka zitateguwe ku munota wa 65 ubwo Ndizeye Samuel yagiraga ikibazo cy’imvune amaranye iminsi asimburwa na Mitima Isaac.

Ishimwe Anicet yahinduye umukino ku ruhande rwa APR FC, irasatira ndetse aza no gutanga umupira wavuyemo igitego cya mbere ku ruhande rwa APR FC ku munota wa 71 cyatsinzwe na Bizimana Yannick wari wahuye na Rayon Sports yahozemo.

Nishimwe Blaise utari mu mukino yahaye umwanya Ndekwe Felix ku munota wa 75.

Ni nako kandi Mugisha François Master wakoraga amakosa menshi mu kibuga yasimbuwe na Rudasingwa Prince. Ni nako kandi Bizimana Yannick yahaye umwanya Mugunga Yves.

Uyu mukino warebwe n’abarimo Nyampinga w’u Rwanda 2016, Mutesi Jolly warangiye APR FC iwutsinze ku gitego 1-0.

Nyuma y’uyu mukino w’umunsi wa 14, AS Kigali ni yo iyoboye urutonde n’amanota 30, Rayon Sports ifite 28, Kiyovu Sports na APR FC zifite 27.

Uko umunsi wa 16 wagenze

Ku wa Gatanu, tariki ya 16 Ukuboza 2022

AS Kigali 1-0 Gorilla FC
Marines FC 2-2 Sunrise FC

Ku wa Gatandatu, tariki ya 17 Ukuboza 2022

Rayon Sports 0-1 APR FC
Rutsiro FC 0-1 Gasogi United
Musanze FC 0-0 Bugesera FC
Rwamagana City FC 1-2 Kiyovu Sports
Mukura VS&L 1-0 Police FC
Espoir FC 0-2 Etincelles FC

Umukuru w’Igihugu yabitangarije mu kiganiro cyateguwe n’Ikinyamakuru Semafor cyabereye i Washington DC muri Leta Zunze Ubumwe za Amerika, ku wa Gatatu tariki 14 Ukuboza 2022.

I Washington Perezida Kagame yahitabiriye inama y’iminsi itatu yahuzaga Amerika n’umugabane wa Afurika.

Muri icyo kiganiro, Perezida Kagame yavuze ko abenshi mu bahoze ari abarwanyi ba FDLR bamaze gutahuka ndetse basubizwa mu buzima busanzwe.

Umukuru w’Igihugu cyakora cyo yavuze ko “hari abarwanyi basigaye inyuma ; ntibazigera baruhuka kugeza igihe bazaterera cyangwa bagakora impinduka mu gihugu.”

Kuri ubu imyaka irarenga 20 FDLR ikorera mu ntara za Kivu y’Amajyaruguru n’iy’Amajyepfo mu burasirazuba bwa Repubulika Iharanira Demokarasi ya Congo, aho ushinjwa gukorera ubwicanyi n’imiryango irimo iharanira uburenganzira bwa muntu.

Uyu mutwe ushinjwa kandi kuva mu mashyamba ya Congo ukambuka mu Rwanda aho wagiye ugaba ibitero byagiye bihitana abasivile.

Leta y’u Rwanda yakunze kuwugaragaza nk’umuzi w’umutekano muke uri mu burasirazuba bwa Congo ndetse n’uw’umwuka mubi uri hagati y’ibihugu byombi, dore ko FDLR imaze igihe ikoranira hafi na FARDC (Igisirikare cya Congo).

Ku bwa Perezida Kagame, “Ibigaragara neza ni uko FDLR imaze igihe ihabwa intwaro ndetse ikanafatanya mu mirwano n’ingabo za Guverinoma ya RDC. Twabibagejejeho (RDC) inshuro nyinshi.”

Perezida Paul Kagame kandi yunzemo ko ikibazo cya FDLR kitigeze kinirengagizwa n’Umuryango Mpuzamahanga utarahwemye gusaba Leta ya Congo kureka gukorana n’uriya mutwe.

Ni Leta ya Congo yo yakunze kugaragaza ko nta bufasha iha FDLR, ndetse ko uriya mutwe utakiri ikibazo ku Rwanda.

Perezida Félix Antoine Tshisekedi muri Nzeri uyu mwaka ubwo yaganiraga na France 24, yatangaje ko umutwe wa FDLR utakibaho, ko ahubwo usigaye ugizwe n’amabandi yishakira ibyo kurya.

Ati : “Ntabwo ari abantu bafite intumbero za politiki zo gushaka kwigarurira ubutegetsi i Kigali. Muri make rero, ibyo u Rwanda ruvuga ni ikinyoma.'

Umuvugizi wa FDLR, Cure Ngoma mu kiganiro yagiranye na BBC Gahuzamiryango mu Ugushyingo uyu mwaka, yanyomoje Tshisekedi avuga ko abarwanyi b’uriya mutwe atari amabandi.

Ati : “Turahari, ababivuga ubwo bafite aho babikura, tubaye tudahari ntabwo twaba turi kuvugana. Ingabo zacu zirahari zihagaze bwuma.”

Raporo Itsinda ry’impuguke za Loni zasohoye mu minsi ishize yagaragaje ko FARDC ifatanya mu buryo bweruye na FDLR ndetse bigakorana mu bikorwa byo guhungabanya umutekano w’u Rwanda.

Guhera muri Werurwe 2022 kugeza mu Ugushyingo, FARDC ku bufatanye na FDLR barashe mu Rwanda inshuro eshatu ibisasu bitandukanye.

Ku wa 19 Werurwe 2022 mu Murenge wa Kinigi haguye ibisasu bibiri byatewe n’ingabo za Congo biturutse mu duce twa Tchanzu na Runyoni, ubwo FARDC yagabaga igitero ku mutwe wa M23.

Ibisasu kandi byongeye kuraswa ku butaka bw’u Rwanda tariki 23 Gicurasi ndetse na tariki 10 Kamena, mu mirenge ya Kinigi na Nyange muri Musanze n’uwa Gahunga muri Burera, bikomeretsa abantu byangiza n’imitungo yabo.

Amakuru avuga ko mu gitondo cyo kuri uyu wa Gatanu, mu bilometero bitanu uvuye aho umutwe wa M23 ukambitse mu gace ka Bwiza, habereye imirwano ikomeye yaguyemo Gavana.

Ni imirwano bivugwa ko yashojwe na FARDC ifatanyije n’Umutwe wa FDLR ndetse n’uwa Mai Mai.

Maj Nshimiyimana ni we wayoboye ibitero byo mu Kinigi mu ijoro ryo ku wa 3-4 Ukwakira 2019 byahitanye abantu 14.

M23 yasohoye itangazo rivuga ko FARDC yagabye igitero ku birindiro byayo biri mu gace ka Bwiza kandi ko byakozwe mu buryo buhonyora ibyemejwe n’Inama y’Abakuru b’Ibihugu ya Luanda muri Angola ku wa 23 Ugushyingo 2023.

Iryo tangazo rivuga ko mu bigaragara Ingabo za FARDC zidashaka ko amahoro yimakazwa mu Burasirazuba bwa Congo.

Harabura amasaha make rukambikana hagati ya APR FC na Rayon Sports mu mukino w’umunsi wa 14 wa shampiyona ya 2022-23.

Ni umukino Rayon Sports iri bwakirire kuri Stade Regional i Nyamirambo saa 15h, witezwe n’abantu benshi.

Rayon Sports ya kabiri ku rutonde rwa shampiyona n’amanota 28 irabizi ko gutsinda uyu mukino biri buyifashe kwisubiza umwanya wa mbere yaraye yambuwe na AS Kigali ifite 30.

Irabura abakinnyi barimo Rwatubyaye Abdul, Osalue Raphael bose kubera ibibazo by’imvune, ni mu gihe Ndizeye Samuel we agishidikanywaho ariko amahirwe menshi ni uko agomba kuba ayoboye ubwugarizi bw’iyi kipe.

APR FC nta kibazo na kimwe ifite, abakinnyi ba yo bose bakaba bahari. Iyi kipe ikaba isabwa gutsinda ngo yegere andi makipe aho iri ku mwanya 3 n’amanota 24 inganya na Kiyovu Sports.

Abakinnyi buri kipe ishobora kubanza mu kibuga

Rayon Sports: Hakizimana Adolphe, Ganijuru Elie, Mucyo Junior Didier, Ndizeye Samuel, Mitima Isaac, Ngendahimana Eric, Mbirizi Eric, Ndekwe Felix, Onana Léandre, Paul Were na Moussa Camara

APR FC: Ishimwe Pierre, Omborenga Fitina, Niyomugabo Claude, Buregeya Prince, Ruboneka Bosco, Mugisha Bonheur, Manishimwe Djabel, Byiringiro Lague, Niyibizi Ramadhan na Mugunga Yves