Author: webrwanda

Kapiteni wa APR FC, Niyomugabo Claude yasabye imbabazi rutahizamu wa Nigeria, Victor Osimhen nyuma yo kugongana mu mukino Super Eagles yatsinzemo Amavubi 1-0.

Ni umukino wabaye ku wa Gatandatu tariki ya 6 Nzeri 2025, wabereye muri Leta ya Uyo muri Nigeria hari mu gushaka itike y’Igikombe cy’Isi cya 2026.

Mbere gato y’uko igice cya mbere kirangira, uyu rutahuzamu yahuye na Niyomugabo Claude inyuma gato y’urubuga rw’amahina rw’ikipe y’igihugu Amavubi, maze bigagaraga ko uyu myugariro usanzwe ari kapiteni wa APR FC amukiniye nabi.

Ibi byaje kuviramo uyu rutahizamu guhita asohoka mu kibuga aho yagaragaye ko yagize ikibazo cya ‘cheville’.

Nyuma y’umukino hagaragaye amashusho ya Niyomugabo Claude arimo amusaba imbabazi. Nta magambo yumvikanye amubwira ariko ibimenyetso yakoraga byagaragaza ko arimo gusaba imbabazi uyu rutahizamu amubwira ko atabishakaga.

Ntabwo Niyomugabo Claude yorohewe n’imbuga nkoranyamabaga kuko yaba afafana ba Galatasaray S.K yo muri Turikiya akinira ndetse n’ikipe y’igihugu ya Nigeria bavuga ko uyu rutahizamu adakorwaho.

View this post on Instagram

A post shared by Canisius Kagabo (@canisius1kagabo)

Munyakazi Sadate wahoze ayobora Rayon Sports, yahishuye uko ubwo yari umuyobozi wa Rayon Sports, perezida wa Yanga yaje kumugisha inama y’icyo bakora kugira ngo bamere nka Rayon Sports kuko yabonaga barabasize, inama yamuhaye yazishyize mu bikorwa none yabanyuzeho.

Ni mu butuma yageneye abitabiriye Inama y’Inteko Rusange ya Rayon Sports yabaye ejo hashize ku Cyumweru kuko we ntiyari ahari yari hanze y’u Rwanda.

Mu butumwa yageneye abitabiriye iyi nama, yatangiye abibutsa amahitamo 3 Nyakubahwa Perezida wa Repubulika Paul Kagame yahaye abaturage ko na bo ari yo agomba kubaranga.

Ati “ndabibutsa amagambo ya Nyakubahwa Perezida Paul Kagame yatubwiye aho tugomba guhitamo amahitamo 3, icya mbere tugomba kuba umwe, icya kabiri tugomba kwemera kubazwa inshingano, icya gatatu ni ukureba kure.”

Yakomeje asaba ko iyi nama y’Inteko Rusange yagasigiye Rayon Sports akamaro, igashyigikira ubuyobozi buriho.

Sadate kandi yavuze ko kugira ngo ugere ku kintu gikomeye bigusaba kunyura mu bintu bikomeye.

Ati “nta na rimwe dushobora kugera mu bikomeye tudaciye mu bikomeye, ibikomeye twabiciyemo nkeka ko ubu ngubu igikenewe ari ugushyira hamwe tukaba umwe, tugakora ibikwriye.”

Yakomeje avuga ubwo yari perezida wa Rayon Sports, umuyobozi wa Yanga yaje kumureba amubaza icyo bakoresheje ngo bashyire hamwe abakunzi ba Rayon, ngo yabonaga Rayon Sports yarabasize, inama yamuhaye ni zo yakoresheje none bamaze kubasiga.

Ati “perezida wa Yanga yaje kundeba ambaza icyo twakoresheje ngo dushyire hamwe abakunzi ba Rayon, uyu munsi ibyo namuganirije yaragiye abishyira mu bikorwa nimurebe aho Yanga igeze, natwe nka Rayon Sports uko twari twarasize amakipe yose yo mu Rwanda, tugasiga amakipe yose mu Karere mureke uyu munsi dufate icyemezo cy’urukundo gituma twongera tukagaruka mu mwanya wacu, umwanya w’intsinzi, umwanya wo kuririmba Murera igihugu cyose na Afurika yose ikatwumva.”

Yabasabye kwiga neza ku mategeko agenga Umuryango wa Rayon Sports bakayahuza n’ibyo Urwego rw’Igihugu rw’Imiyoborere (RGB) rwifuza.

Mu gitondo cyo kuri uyu wa Mbere, Ikipe y’Igihugu y’u Rwanda nibwo yageze muri Afurika y’Epfo aho izakinira na Zimbabwe mu mukino w’Umunsi wa 8 wo mu Itsinda C ryo gushaka itike y’Igikombe cy’Isi cya 2026.

Ni nyuma y’uko ku wa Gatandatu bari batsinzwe na Nigeria 1-0, ejo bakaba bazakina Zimbabwe muri Afurika y’epfo bahageze mu rukerera rwo kuri uyu wa Mbere, tariki ya 8 Nzeri 2025, bakaba bacumbitse muri Radisson RED Hotel muri Johannesburg.

Nyuma yo kuruhuka, biteganyijwe ko berekeza ku kibuga cya Orlando Stadium, aho bagomba gukorera imyitozo itegura umukino uteganyijwe ku wa Kabiri, tariki ya 9 Nzeri 2025.

Ikipe y’u Rwanda ifite amanota umunani mu itsinda C n’iya Zimbabwe ifite ane, ziheruka guhurira mu mukino wabereye mu Rwanda kuri Stade ya Huye, aho zanganyirije 0-0.

Ni umukino ugiye gukinwa nyuma y’uko u Rwanda rutsindiwe muri Nigeria na Super Eagles igitego 1-0, cyatumye imibare yo kujya mu Gikombe cy’Isi kizabera muri Mexique, Canada na Leta Zunze Ubumwe za Amerika igorana.

Rayon Sports nyuma y’imyaka 6 yongeye gutangaza ko izakoresha Ingengo y’Imari idafite mu ntoki cyangwa kuri konti ahubwo ari imishinga.

Ibi byatangajwe ejo hashize ku Cyumweru tariki ya 7 Nzeri 2025 nyuma y’Inama y’Inteko Rusange isanzwe yabaye itegura umwaka w’imikino wa 2025-26.

Murenzi Abdallah wayoboye iyi kipe akaba ari umunyamabanga w’Inama y’Ubutegetsi ya Rayon Sports, yavuze ko iyi kipe izakoresha ingengo y’imari ya miliyari 2 z’amafaranga y’u Rwanda.

Abajijwe aho azava yavuze ko ari ayo bateganya kuzakura mu bafana, mu mikino Nyafurika ya CAF Confederation Cup bazakina, abaterankunga bafite n’abo bateganya ndetse n’azinjira ku kibuga.

Ati “turateganya gukoresha ingengo y’imari ya miliyari 2 Frw, azaturuka ku bafatanyabikorwa bacu, azaturuka ku bibuga bitandukanye, azaturuka ku bihembo bitandukanye tuzagenda tubona bitewe n’amarushanwa tuzagenda dukina, muri ariya marushanwa ya Confederation tuzakina harimo ibihembo ariko uruhare rukomeye ruzava mu bafana, aho hose ni ho duteganya gukura umutungo ungana na miliyari 2.”

Abajijwe ayo bafite bazaheraho yavuze ko ari miliyoni 400 na zo zizava mu bafatanyabikorwa ba yo barimo Skol, Canal, Akarere ka Nyanza n’abandi.

Ibi bikaba ntaho bitaniye n’ibyo Munyakazi Sadate yigeze gutangaza muri 2019 agitorwa benshi bakamuseka, bakumuha inkwenene ngo arimo gupangira amafaranga adafite, icyo gihe yari yavuze ko azinjiza arenga miliyari 1.5 Frw muri aya ikazakoreshamo arenga. miliyari 1.3 Frw.

Mu kiganiro yagiranye n’itangazamakuru tariki ya 8 Kanama 2025, Munyakazi Sadate agaruka ku ngengo y’imari ikipe izakoresha mu mwaka utaha w’imikino n’amafaranga iteganya kubona, yavuze ko Rayon Sports yihaye intego yo kwinjiza 1, 540, 800,000 Frw.

Aya mafaranga azaba arimo agera kuri miliyoni 800 Frw zizava mu irushanwa rya CAF Champions League izakina guhera mu mpera z’icyumweru mu gihe byitezwe ko abafana bazatanga agera kuri miliyoni 77 Frw.

Rayon Sports iteganya kwinjiza kandi miliyoni 49.5 Frw zivuye mu Gikombe cy’Amahoro, miliyoni 336 Frw zivuye mu bafatanyabikorwa, 128.8 Frw zizava mu kugurisha abakinnyi n’ayandi azava mu yandi marushanwa arimo shampiyona, n’ibindi bikorwa by’ikipe.

Amafaranga ikipe iteganya kuzakoresha mu mwaka utaha w’imikino ni 1,338,150,000 Frw, aho hateganyijwemo amafaranga yo kugenda hishyurwa umwenda wa Miliyoni 600 Frw ikipe ifite.

Ikigo cy’Igihugu cy’Imisoro (RRA) kizishyurwa miliyoni 70 Frw, Imodoka y’ikipe itangweho izindi miliyoni 32 Frw mu gihe hari n’abandi bafitiwe imyenda bazahabwa miliyoni 50 Frw.

Inkuru y'urupfu rwe yashenguye benshi mu bari bamuzi, bahamya ko yari umugabo ugira ubupfura n'ubumuntu, ndetse akaba umutiganda mu kazi.

Mu butumwa yanyujije ku rubuga X, Ambasaderi w'u Rwanda muri Leta Zunze Ubumwe za Amerika, Mukantabana Mathilde, yagaragaje ko Lt Gen Kabandana yari umuntu udasanzwe.

Yagize ati 'Mbabajwe bikomeye no kubura inshuti, gusa nishimira igihe twamaranye ari Defense Attaché muri Ambasade i Washington, D.C. ubwo nari nkijya ku mwanya wa Ambasaderi, Lt Gen Innocent Kabandana yari arenze kuba uwo dukorana, yari umufatanyabikorwa wo kwizerwa ndetse wo kugisha inama. Imitekerereze ye iganisha ku bisubozo, ubuhanga mu mibanire n'abandi n'ubwitange budacogora ku Rwanda byagaragazaga indangagaciro nyazo z'umusirikare w'u Rwanda.'

'Icyantunguraga cyane kuri Lt Gen Kabandana ni uburyo atigeze ahagarika guharanira kumenya no kwiyungura ubumenyi, byose abigirira inyungu z'u Rwanda. No mu bihe bikomeye, yakomeza gushimira ubuyobozi bw'igihugu cye ku bw'ubufasha no kumwitaho. Urukundo rwe ku Rwanda ndetse no ku muryango we rwari ndengamipaka, ndetse rwari magirirane inshuro ibihumbi.'

Yakomeje asobanura ko umugore we, Sabine, yamubaye hafi mu byiza n'ibibi, yerekana igisobanuro cya nyacyo cy'isezerano rivuga ngo 'kugeza ubwo tuzatandukanywa n'urupfu.' yongeyeho ko 'bombi baberaga urugero buri wese wari iruhande rwabo bivuye ku kwizera kwabo no kudacogora.'

Yavuze ko ibigwi bya Lt Gen Kabandana bikiri bizima binyuze mu mugore we ndetse n'abana babo, kuri ubu bakuze na bo babaye abantu batangaje.

Today marks the end of an extraordinary chapter in the life of a truly remarkable individual, Lt.Gen. Innocent Kabandana! I feel deeply saddened to lose a friend, yet I’m grateful for the time we shared.
As Defense Attaché at the Embassy in Washington, D.C., during my early days… pic.twitter.com/QhWT7Z5UlK

— Mathilde Mukantabana (@AmbMukantabana) September 7, 2025

Undi wagaragaje ko yashenguwe n'urupfu rwa Lt Gen Kabandana, ni Louise Mushikiwabo, Umunyamabanga Mukuru w'Umuryango w'Ibihugu bikoresha Igifaransa, OIF, na we wavuze ko yaranzwe n'ubupfura, ubuhanga n'urukundo.

Yagize ati 'Gen Kabandana yaranzwe n'ubupfura, n'ubuhanga, n'urukundo rutagabanije, ku be no ku gihugu cye. Ababanye na we n'abakoranye na we tubabajwe n'uko atuvuyemo vuba, gusa kwibuka izina ryiza asize kuri iyi Si biraduhumuriza! Kuri Sabine n'abana: mwihangane, mukomere!! Imana imwakire hafi yayo!'

Gen. Kabandana yaranzwe n’ubupfura, n’ubuhanga, n’urukundo rutagabanije, ku be no ku gihugu cye. Ababanye na we n’abakoranye nawe tubabajwe nuko atuvuyemo vuba, gusa kwibuka izina ryiza asize kuri iyi si biraduhumuriza! Kuri Sabine n’abana: mwihangane, mukomere!! Imana imwakire… https://t.co/ynT9rxHCdS

— Louise Mushikiwabo (@LMushikiwabo) September 7, 2025

Gen Kabandana yinjiye mu Ngabo z'u Rwanda mu 1990, aza kuba umwe mu bagize uruhare mu kubohora u Rwanda no guhagarika Jenoside yakorewe Abatutsi mu 1994.

Ni umugabo wari ufite ubunararibonye mu bya gisirikare n'ubuyobozi bw'Ingabo kuko yanabaye umuyobozi ushinzwe ubufatanye mu bya gisirikare muri ambasade y'u Rwanda i Washington's DC.

Mu zindi nshingano kandi yabaye Umuyobozi w'amasomo ku Ishuri rya Gisirikare rya Gako aba n'Umuyobozi wungirije w'Ingabo mu butumwa bw'Umuryango w'Abibumbye muri Sudani y'Epfo, UNMISS.

Yanabaye umuyobozi muri RDF ushinzwe ibikoresho, Umuyobozi w'ishuri rya gisirikare, Rwanda Peace Academy, ndetse n'Umuyobozi wa 'special forces'.

Mu mwaka Lt Gen Innocent Kabandana yamaze ayoboye ingabo muri Mozambique, hakozwe byinshi mu kwirukana ibyihebe mu Ntara ya Cabo Delgado.

Lt Gen Innocent Kabandana yitabye Imana kuri uyu wa 7 Nzeri

Ubwo Lt Gen Kabandana yari Lt Gen Innocent Kabandana muri Ambasade muri Amerika

Amb. Mukantabana yagaragaje ko Lt Gen Kabandana yari umuntu udasanzwe

Iyi hoteli iri ku mwigimbakirwa muri metero nke uvuye mu mujyi wa Karongi, ikaba imwe mu zubatswe kera muri ako gace yashyizeho igabanyirizwa rya 20% ku miryango mishya yifuza kuhakorera ukwezi kwa buki n'abandi bashaka kuhizihiriza isabukuru y'amavuko.

Umuyobozi wa Bethany Investment Group ifite hoteli eshanu mu bice bitandukanye by'u Rwanda, Ntwali Janvier ko byakozwe mu rwego rwo kurushaho guteza imbere ubukerarugendo muri Karongi.

Ati 'Twashyizeho igabanyirizwa rya 20% ku baje mu kwezi kwa buki no kwizihiza isabukuru y'amavuko. Byose biri mu mujyo wo gukundisha abantu ubukerarugendo by'umwihariko muri Karongi.'

Ntwali Janvier yongeyeho ko Karongi ifite umwihariko wo kuba ari ahantu hatuje, hakaba ibirwa byinshi byiza uba witegeye mu kiyaga cya Kivu.

Ati'Dufite ubwato butwara ba mukerarugendo aho tubatembereza ibyiza nyaburanga bibarizwa mu kiyaga cya Kivu, nko ku karwa ka Napoléon, akarwa k'Amahoro. Abantu bashobora kuza kureba uburyo ibijyanye n'uburobyi bikorwa mu masaha y'ijoro muri Karongi (Night fishing).'
Bethany Hotel itanga serivisi zitandukanye za hoteli zirimo kwakira inama, ibirori, amacumbi, restaurant iteka indyo z'ubwoko bitandukanye n'ibindi.
Ati 'Nko mu karere ka Karongi hari restaurant yo hafi y'amazi ikurura abanyamahanga mu buryo bwiza na Coffe Shop. Hari serivisi zindi tugira nka salle zakira inama zitandukanye, ubukwe, amasabukuru n'ibindi.'

Bethany Hotel Karongi ni imwe mu mahoteli yashinzwe bwa mbere mu yahoze ari Kibuye mu myaka ya 1980. Kugeza ubu iracyari mu zikomeye zibarizwa muri ako karere kazwiho ubukerarugendo.

Ku bindi bisobanuro: Email Bethany Hotel karongi: [email protected]
0784957945/ 0784007292 /0788306517

Mu 2024 ni bwo abasore batatu n'umukobwa umwe bose bo mu Karere ka Nyamasheke bahuje imbaraga batangiza ikigo gitanga serivisi zitandukanye z'ikoranabuhanga nyuma yo kubona ko abaturage ba Nyamasheke, Rusizi na Karongi bagikora ingendo ndende bajya gushakira izi serivisi mu mujyi wa Kigali.

Kwizera Honore w'imyaka 24 uri mu bashinze ikigo One & Only designer Ltd gikorera mu i Tyazo mu Karere ka Nyamasheke, mu kiganiro na IGIHE yavuze icyatumye iki kigo bakijyana i Nyamasheke ari uko babonaga abaturage ba Karongi, Nyamasheke na Rusizi izi serivisi bajya kuzishakira mu mujyi wa Kigali.

Ati 'Umuturage wo muri utu turere yakeneraga kwandika ku mwenda, ku ikaramu, gukoresha ifoto nini, icyapa cyamamaza akajya i Kigali, duhitamo kubibegereza'.

Iki kigo kivuga ko uretse urugendo rurerure aba baturage bakoraga, ahandi kikibona icyuho ari mu ruganda rwa sinema ari na byo byatumye kiha intego ko mu myaka iri imbere kizatangira gukora filimi ziri ku rwego mpuzamahanga.

Ati 'Mu ruganda rwa filime zikorerwa mu Rwanda harimo icyuho kuko iyo ubirebye ubona byose bisa. Ikibazo kiri mu bakinankuru no mu bayobora ikorwa rya filime. Mu bituraje ishinga harimo no gukosora ayo makosa akorwa mu ruganda rwa sinema'.

Umuyobozi w'Akarere ka Nyamasheke wungirije ushinzwe iterambere ry'ubukungu, Muhayeyezu Joseph Desire, yavuze ko ari ibyishimo bikomeye ku karere kuba urubyiruko rwishyira hamwe rugatangiza ikigo cyorohereza abaturage kubona serivisi z'ikoranabuhanga.

Ati 'Mbere iri koranabuhanga ryo gutunganya amafoto, kwandika ku myenda, gukora ibyapa n'ibindi Abanyarwanda babikeneraga bajyaga kubikorera muri Uganda, bigera aho biza I Kigali none ubu natwe turabifite mu i Tyazo. Amafaranga yajyaga i Kigali yose asigara hano imbere mu karere'.

Visi Meya yavuze ko kuba iki kigo cy'ikoranabuhanga cyorohereje abaturage.

Ati 'Mbere wakeneraga gukoresha ifoto ukajya i Kigali, mbere yaho hari n'abajyaga Uganda, ariko ubu bayigukorera mu i Tyazo udatanze amatike. Ni ibintu rero dushima cyane kuko ni iterambere ry'igihugu muri rusange ni iterambere ry'Akarere ka Nyamasheke by'umwihariko'.

Ikigo One&Only Designer Ltd nyuma y'umwaka umwe gitangiye gikoresha kimaze guha akazi abakozi 9 bahoraho utabariyemo abagishinze, gitekanya ko mu myaka itanu iri imbere kizaba gikoresha abakozi 1000 biganjemo urubyiruko.

Mu karere ka Nyamasheke urubyiruko rwatangije Ikigo cy’ikoranabuhanga cya miliyoni 80 Frw