Author: webrwanda

Ku cyumweru taliki 8 Mutarama 2023 habaye ibirori byo kwakira Uwamariya Chantal, umwana wa Mukarurangwa Josepha na Ruremesha Joseph bishwe muri Jenoside yakorewe Abatutsi mu 1994.

Nyuma yo kuburana kw'imiryango kubera umwijima w'icuraburindi n'iyicwarubozo by'abatutsi, uyu mwana ari mu baburanye n'umuryango kuko yari akiri muto. Umuryango wa Chantal wari utuye mu karere ka Bugesera, Umurenge wa Mayange, Akagali ka Kibenga, Umudugudu wa Rwarusaku. 

Bamwe mu bitabiriye ibi birori byo kwakira Chantal Uwamariya mu muryango we, harimo abo mu muryango we, inzego z'ubuyobozi zitandukanye, inshuti ndetse n’abaturanyi. Bamwe mu bo mu muryango we baduhaye ubuhamya bw’uko barokotse Jenoside yakorewe Abatutsi.

Bavuze ko muri Jenoside yakorewe Abatutsi, batangiye guhigwa, bafata inzira barahunga. Ariko ntaho bari bafite ho guhungira kuko interahamwe zari zagose ahantu hose ziri kwica Abatutsi baturutse imihanda yose. Kubera gutatana bahunga, abana baburanye n'ababyeyi babo.

Mukantwari Mediatrice ni mukuru wa Chantal Uwamariya. Ubwo baburanaga n'ababyeyi, Mediatrice yibonye asigaranye na murumuna we Chantal, maze amushyira mu mugongo aramuheka aramuhungana. Nawe yari muto ariko yari mukuru kuri Chantal kuko yari afite imyaka 16.

Mediatrice yumvaga bavuga ko abantu bose bari guhungira mu rufunzo, bakabicirayo ariko kuko babaga ari benshi, iyo babicaga harokokaga bake mu mirambo myinshi. Yahise yibwira ati 'Reka mpungire mu rufunzo n'uyu mwana mpetse tujye gupfana na benewacu cyangwa turokokere muri bake bari kurokokerayo.'

Ubwo bahungaga yageze ku gitero cy'interahamwe cyari hafi y'igihuru kirabahamagara kirababwira ngo bicare hasi bicwe kuko iherezo ryabo rirangiye. Mediatrice yagize ubwoba bwinshi kuko ariwe wari uzi ubwenge ukurikije murumuna we.

Nubwo Chantal yari umwana nawe yari afite ubwoba kubera amaraso y'abantu yagendaga abona y'abantu babaga bishwe. Bose batangiye gutengurwa kuko bumvaga ibyabo birangiye bagiye kwicwa.

Mediatrice nk'umwana mukuru yumvise ijwi rimubwira ngo abasabe ajye kwiherera kandi koko yumvaga abishaka ariko bwari ubwoba kubera amagambo icyo gitero cyavugaga ukuntu bagiye kubica bombi urw'agashinyaguro. Yarababwiye ati 'Mumbabarire njye ku bwiherero.'

Babanje kumwangira ariko nyuma baremera aragenda ageze hirya yigira inama yo gucika akiruka. Yaribwiye ati 'Reka niruke mbatere umujinya banyiruke ho nshobora kubacika bakanyirukaho maze bagasiga murumuna wanjye nawe ntapfe, Imana igaca muriyo nzira iturokora twese”.

Mediatrice yafashe inzira ariruka, murumuna we abonye yirutse arataka avuga ko mukuru we amusize igitero cyose kimwiruka inyuma basiga murumuna we. Mediatrice yarirutse arabacika. Ni uko Imana yabarokoye. Gusa kubera ko yumvise Chantal ataka, yaketse ko bahise bamwica akirukanka.

Chantal yari umwana muto ku buryo atibuka ibyabaye byose ndetse ntazi n'uwamutabaye akamukura aho Mediatrice mukuru we yamusize.

Ubwo yaganiraga na inyaRwanda Tv, Chantal yagize ati 'Nari meze nk'uwataye ubwenge mbona umuntu ansanze aho ndi, maze arampagurutsa anshyira mu mugongo arantwara, nyuma nisanga mu muryango ntazi wamfashije nkawukuriramo ari nawo nkirimo n'ubu mfata nk'ababyeyi banjye.'

Nyuma yo gutatanira kure, buri umwe yumvaga asigaye wenyine kuko ntawari uzi aho undi aherereye. Ariko abarokotse baje guhura uko ari abana bane. Gusa bumvaga Chantal yarapfuye kuko Mediatrice iyo yibukaga induru umwana yavugije ubwo yirukaga, yumvaga baramwishe icyo gihe, bararira barihanagura.

Mediatrice yatubwiye ati 'Numvaga yarapfuye kirya gihe kuko iyo taliki 7 mu kwa 4 igihe cyo kunamira abacu cyageraga, naragendaga nkamwunamira aho namusize numvaga atarabashije kuharenga.'

Bamwe mu bahutu babonye uyu mwana bifuza kumurokora ni bwo bamutwaye ariko birabagora kuko bene wabo baravugaga ngo bamuzane bamwice, bigira inama yo kumuhungisha bakamuha umuntu utazwi aho wa kure.

Ni bwo bamushyikirije umuryango wa Nsekantaribuze Petero ndetse uyu mugabo umwakirana yombi, agambirira mu mutima we kuzarera uwo mwana atazi ndetse akamurera nk'umwana we”.

Petero wahishe uyu mwana w’umukobwa yagize ati “Uwamariya namuhawe n’Imana dore ko yaje yitiranwa n’umwana wanjye mfite witwa Uwamariya, namufashe nk’impano mpawe n’Imana.”

Ubwo umuryango wa Chantal Uwamariya wari warihebye ndetse bumva yarapfuye, abantu bahamagaye Mutangana Emmanuel bamubwira ko bumvise itangazo ryatanzwe n'umuryango witwa CCMC uhuza abantu, aho Uwamariya Chantal yabaririzaga abavandimwe be.

Musaza we yabibwiye Mediatrice ahita avuga ko ibyo bidashoboka kuko yumvaga Chantal yarapfuye. Mutangana yihutiye ku Kiliziya kubaza iby’iryo tangazo ryatanzwe mu Kiliziya, maze arindira ko Misa irangira asaba ko basubiramo iryo tangazo ryamuzeho.

Nyuma yo kuryumva yatangiye gukeka ko mushiki we yaba akiriho maze we n'abavandimwe be barokotse Jenoside yakorewe Abatutsi batangira kubaririza no gushaka inzira bacamo ngo barebe ko ari Chantal umuvandimwe wabo. Baje guhura na Chantal Uwamariya murumuna wabo babifashijwemo n'umuryango SSMS.

Muri ibi birori byo kwakira Uwamariya Chantal mu muryango we, benshi bashimye Imana ku bwo guhura kw'imiryango. Byari ibyishimo ku bavandimwe ba Chantal, abaturanyi babo bari baramubuze bazi ko yapfuye ndetse byari ibyishimo ku muryango wahishe Chantal akarokoka.

Pastor Butera Alex wari uhagaririye umuryango wa Ruremesha Joseph muri ibi birori, yashimye abitabiriye bose ndetse n'umuryango wihutiye gushaka umwana nyuma yo kumva itangazo ko ashobora kuba akiriho.

Mu ijambo rye yagize ati 'Umwaka mushya kandi Imana ibahe umugisha ku bwo kuza kwifatanya natwe. Ndashimira Petero n'umuryango we mwaturereye umwana mukamuhisha akarokoka, akaba yaravuyemo umubyeyi mwiza witeguye gutanga uburere no ku bana yabyaye kuko uko asa tubikesha mwe. Ubu Chantal ntabwo afite umuryango umwe ahubwo afite imiryango ibiri, uwacu ndetse n'uwanyu, Imana izaguhe umugisha ku bw’ibyo wadukoreye.'

Uwaje ahagarariye Komite y'Abarokotse Jenoside yakorewe Abatutsi mu murenge wa Nyamata, yashimiye uyu muryango ko witaye ku bavandimwe ba Chantal muri rusange.

Mukantwari Mediatrice yashimye by’umwihariko mukuru wabo wasigaye abitaho nyuma ya Jenoside yakorewe Abatutsi nubwo nawe yari afite igikomere cyo gupfakara akiri muto kuko umugabo we yari amaze kwicwa bakimara gushakana. Mukuru wabo yaje gukura ariko bari mu buzima bugoranye bw'ubupfubyi, aza gushaka umugabo wamubereye inshuti ndetse aba n'umubyeyi mwiza w'abana be.

Mukantwari Mediatrice yishimiye kongera kubona umuvandimwe we nyuma yimyaka 28

Mediatrice yagize ati 'Ndashima umugabo wanjye kuko yankunze atitaye ku bibazo mfite, ntiyankunze njyenyine ahubwo yankunze n'umuryango wanjye aribo bana tuvukana.'

Yakomeje ashima Imana avuga ko yamuhaye urubyaro, abana 6 ari bo: Liliane, Josiane, Umwari, Uwera, Mucyo na Sam. Yagize ati 'Umutima wahoraga uncira urubanza numva ko ari njye ntandaro y'urupfu rwa murumuna wanjye, nkumva nari kugumana nawe bakatwicana ariko simusige!

Ariko Imana yari ibizi ko igihe kizagera ikampuza na murumuna wanjye nakundaga, ndetse ikanshumbusha uru rubyaro yampaye, hiyongereyeho umugabo w'umunyamahoro waduhindukiye nka Papa, atwitaho twese umuryango wacu.'

Mediatrice, umugabo we n’abana babo bishimiye ibi birori

Mediatrice yavuze ko baje kubona nyinawabo nawe bamenye ko yabashije kurokoka bishimira ko umuryango wose utazimye, ahubwo hari ababashije kurokoka Jenoside yakorewe Abatutsi.

Uwayezu Viviane yakiriye mu byishimo byinshi Uwamariya Chantal abereye Nyinawabo

Umunyamabanga Nshingwabikorwa w'Umurenge wa Nyamata, Mushenyi Innocent, yashimiye abayobozi bose bitabiriye ibi birori byo kwakira uyu mwana wabo Chantal, ndetse ashimira Nsekantaribuze Petero wahishe uyu mwana akaba amugaruye mu muryango ari muzima.

Gitifu Mushenyi Innocent atambutsa ijambo imbere y’abitabiriye ibi birori

Yagize ati 'Iyo tuza kugira ba Petero benshi, imbanga nyamwinshi y'Abatutsi bishwe, nibura haba hararokowe benshi.'

Werabe François, umugabo washakanye na Mediatrice, mu ijambo rye yavuze ko yishimiye gushakana n'umugore w'intwari kabone nubwo yari afite ibikomere ariko yabaye umubyeyi mwiza kandi akarera abana be neza abatoza kuba imfura no kwiga amateka bakaniyubaka.

Uwamariya Chantal wakorewe ibi birori, yari afite ibyishimo byinshi, yifuriza imigisha itangwa n’Imana abantu benshi bari bamukikije baje kumwakira. Mu ijambo ryateye menshi amarira y'ibyishimo yagize ati:

Si nari nzi ko nzongera kubona umuryango wanjye kuko sinabibukaga ariko amashusho ataramvaga mu mutwe ni musaza wanjye Mutangana kuko niwe twakinaga turi abana munsi y'igiti cy'umuvumu, we nakomezaga kumva andi mu mutwe. Abandi bo sinabibukaga neza amasura bancaga mu maso ariko simbibuke. Ndashima Imana yongeye kumpuza n'umuryango.

Yakomeje ashima, avuga ko ashimiye abavandimwe be ko bakimenya ko ariho batatuje kugeza igihe bamugezeho. Yashimiye umuryango wamuhishe ndetse n'ubuyobozi bw'aho yakuriye bwamufashije kubona aho aba bakamushakira n'amafaranga akabona icyo akora ngo yibesheho. Yashimye umugabo we bashakanye akamubera umubyeyi akaba afite umuryango ushima Imana.

Nsekantaribuze Petero wahungishije Uwamariya Chantal

Uwamariya Chantal yagize ati 'Petero ni Papa wanjye ibihe byose kuko ubuzima mfite ni we mbukesha, iyo atanyitangira ngo ampishe mba narapfuye kandi iyo umuryango utanshaka babifashijwemo na Leta y'u Rwanda ntabwo mba nongeye guhura n'umuryango.'

Hitimana Selemani washakanye na Uwamariya Chantal nawe yatambukije ijambo ashimira abari aho muri rusange, ndetse n'umuryango umugore we akomokamo, ko wabakiriye neza kandi yizeza abari aho bose ko azakomeza kumubera umugabo mwiza.

Hitimana umugabo wa Uwamariya Chantal bashakanye, ubu bafitanye n’abana 2

Nzabamwita JMV ushinzwe imibereho myiza y’abaturage mu Murenge wa Muhanda, waje ahagarariye Umunyamabanga Nshingwabikorwa w’Umurenge, yashimye abari aho bose kuba baje kwakira umwana wabo Chantal Uwamariya.

Ati 'Ndabashimiye, umutima mwagaragaje muza aha, kandi nshimiye byimazeyo Uwamariya Chantal kuko yabaye umuturage mwiza w'intangarugero mu murenge wacu. Ubu Chantal ari mu bagore bahagarara imbere y'abandi bagore, bagakomeza abandi ndetse bakabashishikariza kwiteza imbere.'

Yavuze ko mu bushobozi Umurenge ndetse n'Akarere bari bafite, bashakiye Chantal inzu yo kuba akodesha ubuzima bukisunika, nyuma baza kumwubakira iye bwite, kandi kugeza ubu akaba ari umuturage buri wese yifuza guturana na we.

Umuyobozi uhagarariye IBUKA mu Karere ka Bugesera, Bankundiye Chantal, yashimiye Imana yarokoye Uwamariya ndetse avuga ko ari Malayika wamurokoye akurikije urugendo rwavuzwe yaciyemo.

Bankundiye Chantal umuyobozi uhagarariye Ibuka mu Karere ka Bugesera

Madamu Bankundiye Chantal yagize ati 'Pete warakoze kuduhishira umwana akarokoka! Ariko turakwinginze kandi turagusaba ko wadufasha tukabona n'abandi bantu bacu twabuze.' Yashimiye abantu muri rusange bagize umutima ukomeye bagahisha Abatutsi mu 1994 kabone nubwo bari bafite ubushobozi bwo kubica.

Mu gusoza ibi birori, Pastor Butera Alex, yashimiye abagize uruhare muri ibi birori n'imiryango itandukanye yaherekeje Chantal aje guhura n'umuryango we ndetse asabira buri muntu wese kugira umutima wa kimuntu udafitwe na benshi ndetse bagakundana kuko ari cyo Imana ibasaba.

Pastor Butera wari uhagarariye umuryango wa Ruremesha Joseph

Mu itangazo ryashyizwe hanze mu masaha macye ashize ku mugoroba w’uyu wa Gatatu, inzu y'imideli ya Moshions yagize iti: 'Turimo turakusanya tunagura imyambaro yose imaze imyaka itatu irenga iguriwe hano hagamijwe kuyivugurura no kuyibika.'

Bakomeza batangaza uko ibiciro bya buri mwambaro bizaba bihagaze mu kuyigura, ubwabo bati: 'Ishati ibihumbi 60Frw, ikanzu ibihumbi 45Frw, ikabutura cyangwa ijipo ibihumbi 35 Frw n'ipanaro ibihumbi 45Frw.'

Basoza bagira bati:'Muzane imyamabro yose ya Moshions ku muhanda wa 43 KN 16 Ave mwanahamagara kuri +250788645543 tukarebera hamwe uko yatugeraho.'

Ibi bizakorwa kugera ku itariki ya 26 Mutarama 2023 nk’uko itsinda ry'abahuriye muri Moshions ryabitangaje.

Ibi bije nyuma y’uko uwayishinze akomeje kwamamara mu bikorwa by'uburaya no kwambara ubusa, ibintu hataramenyekana neza imvano yabyo.

Itangazo ryashyizwe hanze n’inzu y’imideli ya Moshions

Ubu wagurisha umwambaro waguze muri Moshions umaranye imyaka 3 kuzamura

Muri videwo French Montana yasangije ku rubuga rwa Twitter ubwo yamamazaga amashusho y’indirimbo nshya ya Max B ufunze, yise ‘Lemonade,’ (Iri kuri alubumu ya ‘Coke Boys’, French aherutse gusohora), yahise aboneyeho gutangaza ko Max yamusabye kumutangira ubutumwa bw’uko azasohoka muri gereza muri Mata.

French Montana yatangaje ko umuraperi Max B azafungurwa muri Mata

Umuraperi Charley Wingate uzwi ku mazina ya Max B yafunzwe muri 2009 nyuma yo gukatirwa igifungo cy'imyaka 75, akurikiranyweho ibyaha by'ubugambanyi bujyanye n'ubujura bwitwaje intwaro, gushimuta, gukomeretsa bikabije n'ubwicanyi. 

French Montana mu itangazo rye yagize ati “Umuvandimwe wanjye yari yarakatiwe imyaka 75. Yambwiye kubabwira mwese ko azaba ari mu rugo muri Mata !!”. Yakomeje kandi ashishikariza abantu kujya kureba amashusho y’indirimbo ‘Lemonade’ iri ku mbuga zose. 

Max B wavukiye i Harlem yakatiwe igifungo cy’imyaka 75 muri Nzeri 2009 ahamijwe ibyaha icyenda muri 11 yashinjwaga. 

Nk’uko HIPHOP Dx ibitangaza, uyu muraperi yahamijwe icyaha cy’ubwambuzi bwakorewe abagabo babiri i New Jersey, muri 2006, abifashijwemo n’umuvandimwe we, Kelvin Leerdam, n'uwahoze ari umukunzi we, Gina Conway, ndetse bikarangira umwe muri aba bagabo arashwe agapfa.  

Muri Nzeri 2016, igihano cya Max cyaragabanijwe gishyirwa ku myaka 20, nyuma yo kujurira ku kirego cy’ubwicanyi, ndetse igihano cye cyaje kugabanywa kugeza ku myaka 12 muri 2019, kubera impamvu zitaramenyekana.

Igihe cyawe ni kimwe mu bintu bigira uruhare mu kuba uwo uri we. Bivuze ko igihe utakaza ukora ibikorwa bikubyarira inyungu, ni cyo kigaragaza uburambe bwabyo n'inyungu bizakubyarira.

Uwangije igihe cyawe ajye aguha amafaranga

Benshi bashoye imbaraga zabo, amafaranga yabo n’imwe mu mitungo yabo kubera ubwoba bw'ahazaza ariko ntibatekereza kabiri ku byo bajyanyemo ishoramani ryabo cyangwa niba aho bashoye hazakuraho ubwoba bafite bw'ahazaza. Nyuma babuze ibishoro byabo, babura n'ibikorwa bashoyemo.

Biba byiza mu guhitamo ibyo umuntu akora atekereje kabiri ku bintu by'ingenzi ari byo: Igihe ndetse n'igikorwa nyirizina agiye gukora.

Bamwe bavuga ko igihe ari amafaranga ku buryo umuntu uzi agaciro k'igihe cye iyo umwangirije igihe umwishyura amafaranga nyuma agatekereza ko atataye igihe kuko cyamubyariye inyungu, ariyo mafaranga wamwishyuye.

Benshi bataye igihe cyabo bajya gukora kugira ngo babeho. Ariko babara igihe bamaze bakora bagasanga ibyo barimo ntacyo byabunguye kandi bikabagora guhita babireka kuko babara igihe bataye, amafaranga n'ibindi.

Ibyo ni amakosa kuko nubwo igihe cyatakaye kitagaruka, ariko igihe ubonye ko wayobye ukwiriye kwigarura vuba ugakora ibiguha umusaruro.

Nelson Rolihlahla Mandela yari umunyamerika wo muri Afurika y’Epfo urwanya ivanguramoko. Yabaye Perezida wa mbere wa Afurika y’Epfo mu 1994-1999. Yabaye umukuru wa mbere w'abirabura muri iki gihugu kandi ni we watowe bwa mbere mu matora ya Demokarasi akayobora igihugu ari umwirabura. 

Mu biganiro yatangaga bitandukanye, yagarukaga ku gihe ndetse agashishikariza abantu guha agaciro igihe basigaranye ku isi. Nelson Mandela yabaye umwarimu w’isi yose cyane cyane kwigisha abantu gukoresha igihe neza

Yigeze kuvuga ati: 'Tugomba gukoresha igihe neza kandi tukamenya iteka ko igihe cyose cyatakajwe cyungutse kugira ngo dukore ibyiza. Gucunga igihe ni ubuhanga, mu gihe igihe cyacunzwe neza kikuyobora ku mahirwe.'

Urasabwa gutekereza ku byo ugiye gutaho igihe ukora mbere yo kuzatekereza ku byaguhombeye ubabazwa n'igihe wataye. Igihe wamaze kubona ko watakaje igihe ku bidafite akamaro, ba intwari uhindure ibikorwa bigishoboka kuko igihe ni umutungo ufite uhambaye kurenza ibindi byose byashorwa.

Niba hari inkumi ivugishije benshi cyane mu gisata cya Siporo, ni Lilly aho mu mezi 3 gusa agaragaye yahuje urugwiro n’abakinnyi 3 harimo na Karera Hassan bivugwa ko yasenyeye ubu hakaba hagezweho umunyezamu wa Police FC, Rihungu.

Byatangiye mu Kwakira 2022 ubwo uyu mukobwa yashyiraga hanze amashusho yishimanye na Karera Hassan ku isabukuru ye y’amavuko ndetse ayo mashusho agaherekezwa n’amagambo agira ati “umuhungu wagize isabukuru, ntidushaka abadutesha umutwe.”

Ni nabwo Umutoni Diane wari umugore wa Karera Hassan, wanamufashije kubona ibyangombwa byo kujya muri Finland atuye yahise avuga ko yatandukanye n’uyu mukinnyi, ndetse bikekwa ko ari Lilly watumye batandukana.

Mu gihe benshi bumvaga ko urukundo rwa Lilly na Hassan rumeze neza, ari amata n’ubuki batunguwe no kubona uyu mukobwa mu Gushyingo 2022 ashyira hanze amashusho ya Rwatubyaye Abdul barimo basomana maze aherekezwa n’amaambo agira ati “I miss my baby”.

Nyuma yo gusa n’utera ishoti aba ba myugariro, ugezweho ni umunyezamu wa Police FC, Kwizera Janvier benshi bita Rihungu.

Uyu munyezamu noneho ni we wasangije abamukurikira aya mashusho bishimanye barimo banasangira bombo.

Ni nyuma y’uko uyu mukobwa yari yaraciye amarenga y’urukundo n’uyu munyezamu aho tariki ya 30 Ukuboza 2022 yashyize ifoto ya Rihungu kuri Instagram ye maze iherekezwa n’umutima ndetse n’ijambo ‘Baby’.

Ikindi kandi ni uko uyu mukobwa wari usanzwe ukoresha amazina ya U_Lilly2 kuri Instagram, 2 ihera yayikuyeho ashyiraho 18, nimero uyu munyezamu yambara muri Police FC.

Rutahizamu wahoze akinira amakipe arimo APR FC, Lomami André avuga ko koko amarozi avugwa mu mupira w’u Rwanda abamo ndetse ko amakipe menshi yakiniye yamusabye kuyakoresha.

Uyu mugabo w’abana 3 yabyaranye n’umugore we umaze imyaka 7 yitabye Imana, gukina yarabihagaritse ubu akaba yarayobotse gutoza aho atoza abana mu gihe ategereje ko license C y’ubutoza yakoreye isohoka.

Lomami w’imyaak 36 yakiniye amakipe akomeye mu Rwanda aho yahereye muri Police FC ayikinira umwaka umwe maze 2004 yerekeza muri APR FC yakiniye kugeza 2008, yayivuyemo ajya muri Atraco FC ayikinira imyaka 2 ari na bwo yasenyukaga ahita yerekeza muri Macedonia mu ikipe ya FK Škendija.

Yayikinnyemo umwaka umwe agaruka mu Rwanda muri Police FC atatinzemo kuko yahise ajya muri La Jeunesse baza gutandukana akinira amakipe arimo Espoir FC, Kiyovu Sports, AS Muhanga na Gorilla FC yasorejemo gukina umupira w’amaguru.

Mu kiganiro yahaye ikinyamakuru ISIMBI cyagarutse ku buzima bwe bwite no mu kibuga, ku ngingo y’amarozi avugwa mu mupira w’amaguru mu Rwanda, Lomami André adashidikanyije yemeje ko mu mupira w’amaguru mu Rwanda amarozi arimo ndetse yayakoresheje nubwo atari abyizeye.

Ati 'Amarozi muri ruhago abamo, no mu buzima busanzwe muri sosiyete abaho ariko byose bijyana n’imyumvire y’umuntu ariko mu mupira w’amaguru ndabizi ko bihari kuko mfite ubuhamya, narabyiboneye ndetse no mu makipe amwe n’amwe narabikoresheje ariko nyine ni ukubikoresha utabyizeye kugira ngo gusa utiteranya n’abatoza ba we gusa.'

Yirinze kujya muri byinshi, yaba abantu bamusabye kuyakoresha (amazina ya bo), amazina y’amakipe aho avuga ko akazi kose kagira ibanga umuntu atapfa kumena.

Ati 'Habaho ibanga ry’akazi ntabwo ari ibintu byose umuntu ajya kuri televiziyo akavuga, narabikoreseje mu makipe si ikipe imwe, amakipe menshi ya hano mu Rwanda twarabikoresheje ntabwo ari ibanga, ariko njyewe kwijyana ngo njye kubisaba ntaho nagiye ariko mu makipe nagiye mbikoresha cyane.'

Gusa yakomeje avuga ko hari ibyo bamuhaye bimutera ubwoba ndetse birangira atabikoresheje kandi aza no gutsinda igitego, icyo gihe bari muri CECAFA yabereye muri Sudani, nubwo ikipe atayivuze ariko yari Atraco FC.

Ati 'Hari ibyo bampaye bintera ubwoba, twari mu irushanwa barabimpaye bintera ubwoba ndavuga nti iki kintu ni igiki, bampaye ikintu bita 'Hirizi’ (akantu yagombaga kwambara mu isogisi), turi mu irushanwa hanze kandi n’umutoza atabizi ni umukinnyi mugenzi wanjye, yari yabikoze kugira ngo abihishe umutoza muri CECAFA arabimpa ngo ni wowe mwataka ukambare.'

'Naragafashe mpita njya mu cyumba mbwra mugenzi wanjye arambwira ngo niba utari kwiyumva neza ako kantu wagakuramo nta kibazo, yari umuntu wanjye ndagenda nkakuramo nkashyira munsi y’igitanda, ndavuga ngo reka ngende nkine cyane noneho bagire ngo byakoze, icyo gihe natsinze n’igitego, umukino urangiye ndaza muha akantu ke arambwira ngo urabona ibyo nakubwiraga, ndamubwira nti nta kibazo, nagiye mpura nabyo bakanyambika ibintu.'

Mu rugendo rwe rwa ruhago ashimira cyane umuyobozi w’icyubahiro wa APR FC, Gen James Kabarebe kuko uretse na we hari benshi yagiye afasha cyane.

Ati 'Uriya ni papa, tumwita papa, umubyeyi wacu w’ibihe byose, umubyeyi w’abasiporutifu, iyo numvise izina rye ngira ishema kuko nkora ubukwe yabigizemo uruhare kuko mu gusaba no gukwa ndetse n’ubukwe bwose Afande yabigizemo uruhare, ndabimushimira cyane.'

Lomami André avuga ko ikintu cyamubabaje ari urupfu rwa nyina umubyara ndetse n’umugore we wamusigiye abana 3.

Lomami André yavutse mu 1987 avukira mu Mujyi wa Kigali mu Karere ka Nyarugenge muri Nyamirambo mu gace ka Nyakabanda, avuka mu muryango w’abana 7 akaba ari uwa 4 mu bakobwa 2 n’abahungu 5 bose bakaba bariho. Abahungu 5 bose bakurikije se Lomami André Pere gukina umupira w’amaguru ari bo; Lomami Jean, Lomami Marcel, Lomami André, Lomami Frank na Lomami Felix. Bashiki be ni Mado Lomami na Lynda Lomami.

Byemerejwe mu Nteko Rusange ya Sena yateranye mu gitondo cyo kuri uyu wa Gatanu tariki 09 Ukuboza 2022.

Iyi nteko rusange yemeje ubwegure bwa Dr Iyamuremye Augustin waraye yanditse asaba kwegura kubera impamvu z’uburwayi.

Nyuma yuko iyi Nteko Rusange y’Abasenateri iteranye, hashyizwe hanze itangazo rivuga ko 'Inteko Rusange ya Sena yemeje ko Dr Iyamuremye Augustin avuye burundu mu mwanya wa Perezida wa Sena ku bwiganze burunduye bw’amajwi y’Abasenateri bitabiriye Inteko rusange.'

Dr Iyamuremye Augustin yeguye kuri uyu mwanya wa Perezida wa Sena n’uw’Ubusenateri yari amazeho imyaka itatu dore ko yinjiye mu Nteko Ishinga Amategejo y’u Rwanda muri 2019, ashyizweho na Perezida Paul Kagame.

Muri iyi baruwa yavuze ko yeguye ku mwanya w’ubuyobozi bwa sena no ku busenateri kubera impamvu z’uburwayiakaba akeneye gufata umwanya wo gukomeza kwivuza bitabangamiye inshingano ashinzwe.

Yeguye ku mpamvu z’uburwayi

Mu kiganiro yagiranye na BBC, Umuvugizi wugirije wa Guverinoma y’u Rwanda Alain Mukuralinda, yashimangiye ko u Rwanda ruzakomeza kwakira impunzi zose zaruhungiraho.
Yavuze ko no mu gihe yakoraga icyo kiganiro, iyo aramuka asabye raporo yari gusanga hari abamaze kwakirwa.

Yakomeje ati “U Rwanda rwubahiriza amasezerano mpuzamahanga, u Rwanda rwubahiriza amategeko agenga impunzi, kandi u Rwanda mu muco warwo nk’uko nabivuze ngitangira, twiteguye kwakira abantu bose batugana.”

“Tuzakomeza kwakira impunzi, ariko tuzakomeza no gusaba umuryango mpuzamahanga, Guverinoma ya Congo […] Biratangaje kuba mu myaka 20 ishize tutarigeze twumva Guverinoma ya Congo ivuga ku baturage bayo bari hano, mu gihe mu minsi ishize u Burundi bwohereje itsinda ry’abayobozi bakuru baje gusura inkambi zitandukanye z’impunzi z’Abarundi, babashishikariza gutaha.”

Mukuralinda yavuze ko mu gihe u Burundi bwabikoze, Congo itigeze ibigerageza.
Yakomeje ati “Ibyo ntabwo babivuga, ahubwo bashishikajwe gusa n’u Rwanda na M23. Icyo ni igice kimwe cy’ikibazo, nk’uko nabivuze. Igihe ikibazo kidakemuwe haherewe mu mizi, bizamara indi myaka itanu cyangwa icumi.”

“Muri make mu gushyira ibintu mu mucyo, u Rwanda ntabwo ruzigera rwanga kwakira impunzi, kandi u Rwanda ntabwo ruzigera rwirukana impunzi ku gahato, zizataha ari uko zumva hari umutekano.”

Iki kibazo Perezida Kagame yakigarutseho kuri uyu wa Mbere ubwo yakiraga indahiro ya Perezida mushya wa Sena, Dr Kalinda François Xavier.

Mu ijambo rye, Perezida Kagame yagarutse ku bibazo bitandukanye byugarije igihugu, haba iby’imbere ndetse n’ibyo mu karere birimo n’umwuka mubi umaze igihe hagati y’u Rwanda na Repubulika Iharanira Demokarasi ya Congo.

Yavuze ko u Rwanda rutazakomeza kurebera iki kibazo cy’impunzi z’Abanye-Congo rucumbikiye rukomeza kuryozwa kandi mu by’ukuri bari mu gihugu kuko iwabo bimwe uburenganzira bwabo.

Ati 'Ndashaka guhera ku kibazo tumaranye igihe. Twagiye twakira impunzi ziturutse mu bice bitandukanye ku bw’impamvu zitandukanye ariko hari ubwoko bumwe bw’impunzi ntekereza ko tutazakomeza kwemera.'

'Ntitwakomeza gucumbikira impunzi, duhindukira tukaryozwa, impunzi zatewe n’ivangura rishingiye ku moko riri mu kindi gihugu ariko tugahindukira tukaba ahantu ho kujugunya abo bantu bari kuvutswa uburenganzira bwabo.'

Perezida Kagame yakomeje avuga ko ikibazo cy’izi mpunzi z’Abanye-Congo ziri mu Rwanda yakigejeje kuri Perezida Félix Antoine Tshisekedi ubwo yari amaze igihe gito ageze ku buyobozi.

Ati 'Ducumbikiye izi mpunzi zavuye muri RDC mu gihe kirenga imyaka 20, ndetse Perezida wa Congo uriho ubu ubwo twari tukiganira, iki kibazo nakimugejejeho ubwo yageraga ku butegetsi ndetse mubwira inkuru ndende y’ibi byose irimo n’ibyo twagiye tugerageza gukora mu gukemura iki kibazo.'

'Namubwiye ko ndetse twanatekereje ku kuba twakwakira aba bantu tukabagira abaturage bacu kugira ngo baruhuke nk’uburyo bwo gukemura ikibazo ariko nanamubwiye ikibazo cyari kuba muri iyo gahunda.'

Perezida Kagame yavuze ko iyi gahunda yo guha ubwenegihugu impunzi z’Abanye-Congo yazitiwe n’impamvu nyinshi. Iya mbere ngo ni uko izi mpunzi ubwazo zitashakaga ubu bwenegihugu ahubwo zashakaga gutaha iwabo.

Uretse izi mpunzi zashakaga gutaha iwabo ngo hari n’irindi tsinda ryagaragaje ko ridashaka ubwenegihugu bw’u Rwanda, ahubwo zumva zajyanwa i Burayi, Amerika na Canada.

Ati 'Ubwo twashakaga kubaha ubwenegihugu twababwiye ko badashobora gukomeza guteza ibibazo muri RDC kubera ko iyo baramuka bakoze ibyo, twari gushinjwa ko abantu twahaye ubwenegihugu bari kubyuririraho bagateza ibibazo mu gihugu cyabo cy’amavuko.'

Perezida Kagame yavuze ko yagejeje iki kibazo kuri mugenzi we wa RDC kugira ngo agishakire igisubizo kandi amwizeza ko azamufasha.

Ati 'Mu ntangiriro yasaga nk’umuntu wabyumvise kandi ushobora kugira icyo akora, none nimurebe aho ibintu bigeze.'

Ni mu gihe ubugizi bwa nabi bukomeje muri RDC ndetse hari ubwoba ko bushobora kuvamo Jenoside yibasira Abatutsi n’abavuga Ikinyarwanda by’ubwihariko. Ku rundi ruhande, impunzi z’Abanye-Congo bari mu Rwanda bamaze iminsi basaba Guverinoma yabo kwita ku bibazo bafite.

Kugeza muri Gicurasi 2022, mu Rwanda hari impunzi 127.369, harimo Abanye-Congo 76,968 bangana na 60,43% n’Abarundi 49.859 bangana na 39,15%.

Leta ya Congo iherutse gushinja u Rwanda guba ari rwo rushuka abaturage bayo bo mu bwoko bw’Abatutsi guhunga kugira ngo amahanga abone koko iki gice cy’abaturage gisumbirijwe.

Abatutsi bo muri Masisi baherutse gutangaza ko hari Bariyeri ziswe 'Nyirantarengwa’zabashyiriweho aho bagirirwa nabi bagafungwa bakagwa mu magereza bashinjwa ko ari abarwanyi b’umutwe wa M23.

Uyu aba mu nkambi y’Impunzi ya Kigeme, Musaza we aherutse kwicirwa muri Congo azira ko ari Umututsi

Moses Turahirwa usanzwe ari umuhanga mu byo guhanga imideri akaba yaranashinze inzu yayo izwi nka Moshions yambika abakomeye, mu minsi ishize yateje impaka kubera amashusho yagaragayemo.

Ni amashusho yagiye hanze mu cyumweru gishize, ndetse uyu musore we yiyemerera ko ari we ugaragaramo, aboneraho gusaba imbabazi abo byakomerekeje.

Moses Turahirwa ubu noneho yashyize hanze ifoto ari mu Murwa mukuru w’u Bufarana i Paris, arangije ashyiraho ubutumwa bugira buti 'La prostituée à Paris.' Bishatse kuvuga ngo 'Indaya [y’umukobwa] i Paris.'

Bamwe bongeye guhagurukana uyu musore wiyise 'Indayakazi’, bavuga ko akomeje guhonyora umuco nyarwanda, mu gihe hari n’abavuga ko bamushyigikiye.
Ubwo uyu musore yasabaga imbabazi ku mashusho agaragaramo akora ibiteye isoni, yavuze ko ariya mashusho ari ayagize film igamije ubushakashati ku myororokere y’Ingagi.

Rutangarwamaboko wiyita Imandwa Nkuru y’u Rwanda, umwe mu batanze ibitekerezo kuri ariya mashusho, yavuze ko inzego zishinzwe kurengera umuco, zikwiye guhaguruka zikamaganira kure ibi byakozwe n’uyu musore, na we yizeza ko agiye gutura igitambo cyo gusaba intsinzi kuri ibi yise 'Guhenera u Rwanda’.

Uyu Mupfumu wakoresheje ikinyarwanda kiremereye, yagize ati 'Guhenera Igihugu ni amahano matindi yatera ubuvukasi, amahano agomba kamaramahano i Rwanda, utitambiriye ntanagire gitambirirwa yatera amatega mu nzira ngo aha ni uburenganzira kandi ayirenze nyine ? None ni akadogo. Nyagasani Imandwa Nkuru y’u Rwanda aratura igitambo cyo gutsinda akabi.'

Umunyemari KNC na we ari mu bamaganye ariya mashusho, avuga ko yari asanzwe afite ishati yaguze mu nzu y’imideri ya Moshions, bityo ko agiye guhita ayitwika.