Author: webrwanda

Yasubije ikuzo n'icyubahiro iki gihugu cy'igihangange ku Isi, kuko imyaka 10 yari yuzuye nta mukobwa uhakomoka wegukana ikamba rya Miss Universe. Baherukaga ikamba rya Miss Universe mu 2012, icyo gihe ryegukanwe na Olivia Culpoa.

Gabriel yatangajwe mu birori byabaye mu rukerera rwo kuri iki Cyumweru tariki 14 Mutarama 2023, byabereye mu nyubako y'imyidagaduro ya Morial Convention Center mu Mujyi wa New Orleans, aho abakobwa barenga 80 aribo bari bahataniye iri kamba.

Ni ku nshuro ya 71 iri rushanwa ryari ribaye. Riri mu marushanwa ane akomeye ku Isi, kandi u Rwanda ntirurabasha kuryitabira n'umunsi n'umwe.    

Abakobwa bahatanye mu byiciro bitandukanye birimo nko kwiyerekana mu myambaro gakondo, ibiganiro mpaka, kwiyerekana mu makanzu maremare, mu mwambaro wo kogana (Bikini), icyo batekereza cyakorwa mu guhindura Isi nziza n'ibindi.

Ibi byose byasize Akanama Nkemurampaka kemeje ko R’bonney Gabriel wo muri Amerika, ari we wahize abandi mu bwenge, ubwiza n'ibindi. Yambitswe ikamba na Harnaaz Sandhu yasimbuye.

R’Bonney Gabriel wegukanye ikamba rya Miss Universe afite imyaka 28 y'amavuko. Asanzwe ari umuhangamideli ubarizwa muri Leta ya Texas. Kugira ngo yitabire iri rushanwa yatwaye imodoka mu gihe cy'amasaha ane avuye iwabo, kugira ngo abashe kugera aho ryabereye.

Uyu mukobwa asanzwe afite ikamba rya Leta Zunze Ubumwe za Amerika. Asanzwe afite kandi Impamyabumenyi y'icyiciro cya Kabiri yakuye muri Kaminuza ya North Texas mu bijyanye no guhanga imideli, kandi afite iduka ry'imideli.

Ubwo yari ageze muri batanu ba mbere bavuyemo Miss Universe, Gabriel yabajijwe n'umwe mu bagize Akanama Nkemurampaka impinduka yifuza muri iri rushanwa.

Yabwiwe ko mu gihe gishize komite itegura iri rushanwa yakuyeho ingingo yabuzaga abarushinze kwitabira iri rushanwa.

Uyu mukobwa yatanze igisubizo cyatumye ahita ajya muri batatu ba mbere. Yavuze ko imyaka y'abakobwa bitabira iri rushanwa ikwiye kuzamurwa, kuko ubu ugomba kuba utarengeje imyaka 28 kandi nawe akaba ariyo yahatanye afite.

Ati 'Kuri njye ndifuza ko imyaka yazamurwa, kuko ubu mfite imyaka 28. Iyi niyo myaka fatizo kugeza ubu kugira ngo uhatane. Ndatekereza rero cyaba ari ikintu kinini.' Yavuze ko nk'umukobwa yizera neza ko imyaka atari yo 'idusobanura'.     

Yabajije kandi icyo azakora aramutse yegukanye iri kamba ry'agaciro kanini ku Isi.

Yavuze ko imyaka 13 ishize yunze ubumwe n'umwuga wo kudoda. Avuga ko azakoresha ubuhanzi mu kugaragaza ibyiza no kuba umuyobozi uzana impinduka.

Uyu mukobwa yavuze ko afite abagore n'abakobwa bahuye n'ikibazo cyo gucuruzwa, gufatwa ku ngufu n'ihohoterwa ry'umubiri yigisha kudoda.

Avuga kandi ko ibikoresho byinshi akoresha mu kudoda bidahumanya ikirere. Yavuze ko buri wese akwiye gukoresha ububasha yifitemo mu guhindura sosiyete.

Ati 'Buri wese yifitemo ibidasanzwe muri we. Iyo duteye izo mbuto mu bandi tubahindurira ubuzima.'

Amanda Dudamel wo muri Venezuela ni we wambitswe ikamba ry'igisonga cya Mbere, ni mu gihe Andreina Martinez Founier wo muri Dominican Republic ari we wambitswe ikamba ry'igisonga cya Kabiri.

Sofía Depassier wo muri Chile ndetse na Maxine Formosa Gruppetta, buri umwe yegukanye ikamba ryo kubanira neza abandi (Miss Congeniality).

Umuhango wo gutangaza Miss Universe 2022 watambutse imbonankubone ku bitangazamakuru bikomeye, uyobowe n'abashyushyarugamba Olivia Culpo na Jeannie Mai Jenkins.

Akanama Nkemurampaka kari kagizwe na Ximena Navarrete, Big Freedia, Mara Martin, Wendy Fitzwilliam, Emily Austin, Olivia Quido, Myrka Dellanos, Sweta Patel, Kathleen Ventrella ndetse na Olivia Jordan.

Umuhango wo gutangaza Miss Universe kandi waririmbyemo abahanzi barimo Big Freedia, Big Sam Funky Nation, Amanda Shaw, Yolanda Adams & Tank na the Bangas.

Inseko ya Gabriel wo muri Leta Zunze Ubumwe za Amerika nyuma yo kwambikwa ikamba rya Miss Universe kuri uyu wa 13 Mutarama 2023 

Gabriel yishimanye n'abakobwa bari bahatanye nyuma yo gutangazwa nka Miss Universe wa 71, mu birori byabereye mu Mujyi wa New Orleans 

Gabriel yashyize ikiganza mu gituza nyuma yo gutangazwa ko ari we uhigitse abakobwa barenga 80 bari bahatanye 

Amanda wabaye igisonga cya Mbere 

Martinez wabaye igisonga cya Kabiri 

Gabriel yazamuye amashimwe nyuma yo kwambikwa ikamba rya Miss Universe 2022 

R'bonney Gabriel [Amerika] na Amanda Dudamel [Venezuela] ubwo bari bategereje itangazwa ry'uwegukana ikamba rya Miss Universe 

Uhereye ibumoso: Amanda Dudamel wo muri Venezuela wabaye igisonga cya Mbere, R'bonney Gabriel wegukanye ikamba rya Miss Universe na Andreína Martínez wabaye igisonga cya Kabiri cya Miss Universe 

Sandhu wabaye Miss Universe 2021 yishimira mugenzi we wegukanye ikamba

Kuri iki Cyumweru tariki 15 Mutarama 2023 Marine FC yari yakiriye APR FC kuri sitade Umuganda, umukino watangiye ku isaha ya saa 15:00. 

Marine FC yari igihe gukina umukino wa kabiri nyuma yo kunganya na Musanze FC ibitego 2-2 nyuma yo gutizwa abakinnyi bagera kuri 4 bavuye muri APR FC, Marine FC yari yabanje mu kibuga Mbonyumwami Taiba na Nkundimana Fabio.

APR FC yari yabanje mu kibuga ikipe twakita iya mbere, usibye Nka Mugunga Yves na Nshuti Innocent bari ku ntebe y’abasimbira. Ku munota wa 2 gusa Marine FC yahise ifungura amazamu ku gitego cyatsinzwe na Gitego Arthur, ku mupira yari ahawe na Nkundimana Fabio. 

Marine FC yihariye igice cya mbere, APR FC yiharira igice cya kabiri 

Marine FC yihariye igice cya mbere ndetse ikomeza kubona uburyo bw’igitego, ariko gutereka mu izamu bikanga. Bizimana Yannick yabonye uburyo bubiri mu gice cya mbere bukomeye, aho yasigaranaga n’umunyezamu umupira akawumukuraho. Mu gice cya kabiri amakipe yakoze impinduka, Marine FC ikuramo abakinnyi 10 mu gihe APR FC nayo yakoze impinduka. 

Ku munota wa 51 APR FC yishyuye igitego ku mupira Ishimwe Fiston yahaye Mugunga Yves wari wasimbuye Byiringiro Lague ku bukapiteni, ahita atsinda igitego. Uburyo Marine FC yari yihariye igice cya mbere, ni nako APR FC yihariye igice cya kabiri ariko nayo ibitego bikanga.

Ku munota wa 88 umukino wenda kurangira, Nsanzimfura Keddy yazamukanye umupira bamukorera ikosa inyuma y’urubuga rw’amahina, batanga kufura Nsanzimfura Keddy yateye neza Marine FC ibona igitego cya kabiri. 

Iminota 90 y’umukino yarangiye Marine FC iyoboye, ndetse umusifuzi yongeraho iminota 4 itagize icyo itanga, APR FC itsindwa umukino wa kabiri muri uyu mwaka w’imikino nyuma y’umukino Bugesera FC yayitsinzemo ibitego 2-1.

Ni mu gitaramo cyabaye kuri uyu wa Gatandatu  tariki 14 Mutarama 2023, muri Kigali Convention Center.  Cyabaye nyuma y'icyo baherukaga gukora mu 2019, icyo gihe bari bacyise 'Intango Kanywabahizi.'

Kiri mu bitaramo byubakiye ku muco w'u Rwanda byaherekeje umwaka wa 2019, wakurikiwe n'inkundura y'icyorezo cya Covid-19 cyamaze  imyaka ibiri cyica ibihumbi by'abantu ku Isi.

Iki gitaramo iri torero ryafashijwemo na Ruti Joel, wasogonjeje abari bitabiriye album ye nshya yise 'Musomandera'. Iyi akaba ari album yitiriye umubyeyi we. Hari kandi na Impakanizi uri mu bahanzi bari kuzamuka neza mu muziki gakondo.

Uyu yaririmbye ibihangano bye bitandukanye, birimo 'Umunyabigwi' n'ibindi byinshi. Uyu musore yanyuzagamo agacinya akadiho, bigashimisha benshi.

Iki gitaramo cyari kigizwe n'ibice bibiri. Icya mbere cyanaririmbyemo aba bahanzi twavuze, ryakinnyemo umukino ugaragaza ko abantu bakwiriye guharanira kuba intwari kuko 'wanga kumenera igihugu amaraso, imbwa zikayasinda!'

Bakinnyemo umukino ushingiye ku nkuru mpamo, y'umugabo witwa Muvunyi wa Karema. Aha bagaragaje ukuntu Umwami Ruganzu n'ingabo ze zitwaga 'Ibisumizi' bateye uwitwaga Bwogo, nyuma bamwe muri izi ngabo bakaza gufatwa mpiri nyuma yo gutsindwa.

Ngo nyuma y'ibi Ruganzu yasabye imishyikirano, ariko asabwa ko yatanga inka ye yakundaga yitwaga 'Iguriro'. Icyo gihe yarabyemeye ateranya ingabo ze abagisha inama biyemeza gutanga ya nka. Muvunyi wa Karema yasabye Umwami kujyana ya nka ariko Ruganzu kubera amahane yari azi kuri uyu mugabo, amusaba ko yagenda nta ntwaro cyangwa ingabo bari kumwe.

Ibi yarabyemeye aragenda ariko ageze mu nzira aca inkoni arayitwaza. Yagezeyo aravunyisha bamuha ikaze.

Bwogo yabonye uyu mugabo aje wenyine yemera kumwegera, yagaza ya nka atwarwa n'ubwiza bwayo, ashiduka Muvunyi wa Karema yamukubise inkoni muri nyiramivumbi undi arapfa. Aha hahita hakomoka umugani uvuga kuri Muvunyi wa Karema.

Igice cya kabiri cyaganjwe n'imbyino njyarugamba gakondo. Iri torero ryamaze igihe kigera ku isaha riri gutaramira abari bitabiriye, mu mbyino zitandukanye gakondo.

Igitaramo cyari icyo kwakira Buravan witabye Imana…

Itorero Ibihame by'Imana ryakoze iki gitaramo, n'ubundi ryari ryagiteguye rigamije kumurikiramo Yvan Buravan nk'Intore nshya, ariko aza kwitaba Imana kitabaye.

Ni igitaramo bise 'Rurasugiye' cyabaye kuri uyu wa 14 Mutarama 2023, kibera muri Kigali Convention Centre.

Burabyo Yvan (Yvan Buravan) wagombaga kumurikwa nk'umunyamuryango mushya w'Ibihame muri iki gitaramo,  yitabye Imana mu rukerera rwo ku wa 17 Kanama 2022 aguye mu bitaro byo mu Buhinde aho yari yaragiye kwivuriza.

Ibihame muri iki gitaramo bakoze bavuze ko bagiye bagira ibihe byiza n'ibibi, ibi bibi bikaba byaratwaye umuvandimwe Buravan. Bati 'Twagiye tugira ibihe byiza n'ibibi. Kuri uyu munsi twifuje kuzirikana Buravan, ntabwo tumubabaye ahubwo turasingiza ibigwi yasize. Uyu mwanya turashaka guhamagara ababyeyi ba Buravan, kugira ngo tubashyikirize impano twabageneye.'

Bahise babaha umwambaro wa gakondo Buravan iyaba ahari yari kwambara, yinjizwa mu banyamuryango b'Ibihame. Barangije bati 'Uyu munsi yakabaye ari kumwe natwe. Niyo mpamvu twahisemo ko umwenda Buravan yamaze igihe kinini yitoreza, tuwushyikize ababyeyi be.'

Bahise baririmba indirimbo iri mu zo uyu muhanzi yasize akoze kuri album yitwa 'Twaje' yitwa  'Gusaakaara', barahamiriza basezerera abari bitabiriye babasengera, banabasabira kugera mu rugo amahoro.

Ni ku nshuro ya kabiri Ibihame bateguye igitaramo, kuva bakwihuza ari abahungu 22. Ibihame by'Imana bamaze kubyina mu bitaramo bitandukanye nko muri Hobe Rwanda, igitaramo 'Inganzo yaratabaye' cya Jules Sentore n'ibindi bitaramo bitandukanye.

Iri torero ryatangiye mu 2013 ritangijwe na Bahizi Aimable, hamwe na Igihangange Emery usanzwe ari Mukuru wa Massamba Intore hamwe na Burigo Olivier. Aba bagabo bashimiwe na bamwe mu rubyiruko rw'Ibihame, babaha inkoni y'ubushumba yo kubayobora. Barangije bati 'Kuri uyu munsi bacaniwe uruti, tubahaye inkoni y'ubushumba kandi tuzabumvira. Ntibadutoje gusa baratugaburiye. Ibyo badutoje nibyo bidutunze.'

Rigamije kwigisha umuco nyarwanda kuko abaritangije ni abantu bakuriye muri uwo muco, bakoze amateka menshi cyane cyane mu kubyina ikinyarwanda.Abagize uruhare mu gutangiza Ibihame bashimiweItorero Ibihame rimaze gushinga imizi muri gakondo

Iki gitaramo cyitabiriwe cyane Akanyamuneza kari kose Ruti Joel yasusurukije abari bitabiriye Ibihame byaherukaga gukora igitaramo kera Ababyeyi ba Buravan muri iki gitaramoImpakanizi yataramiye abari bitabiriye 

AMAFOTO-Rwigema Freddy

Ku nshuro yayo ya 28 amasengesho yo gusabira igihugu azwi nka 'National Prayer Breakfast' kuri iki Cyumweru tariki ya 15 Mutarama 2023, yongeye kuba aho yabereye muri Kigali Convention Center.

Mu byamamare byagiriwe umugisha wo kuyitabira harimo Miss Jolly, wagaragaje amarangamutima akomeye ashimangira ko mu gihe Imana iri mu ruhande rw'u Rwanda ntawarunesha bibaho.

Mu butumwa yashyize ku mbuga nkoranyambaga yagize ati: 'Byari icyubahiro kwifatanya na Nyakubahwa Perezida Paul Kagame, abayobozi n'inshuti z'u Rwanda mu masengesho yo gusabira igihugu.'

Akomeza asabira u Rwanda umugisha anashimangira ko ntacyaruhungabanya kuko rwubakiye ku Mana ati: 'Nta ntwaro ibaho yabasha kunesha igihugu ubuzima bwacyo bwubakiye ku mubano n'Imana. Umutima wacu ufatiye muri Kristo. Imana ihe imigisha u Rwanda.'

Aya masengesho akaba ategurwa na Rwanda Leaders Fellowship, kuyitabira bikaba biba ari umugisha ndetse akaba afite igisobanuro gikomeye kuko yongera guhuriza hamwe abayobozi bakuru b'igihugu, abayobozi b'amadini n'amatorero, ibyamamare n'abandi bavuga rikijyana.

Miss Mutesi Jolly akaba ari mu byamamare byabashije kwitabira aya masengesho no mu bato bari bayarimo, dore ko kugeza ubu uyu mukobwa yatangiye umwaka wa 27.

Mutesi Jolly yishimiye kuba umwe mu bitabiye amasengesho yo gusabira igihuguYifurije umugisha igihugu ahamya ko kuko cyubakiye ku Mana ntacyagihungabanya