Author: webrwanda

Ijwi ry'abanyamuziki mu myaka 10 ryumvikanaga rivuga ko kimwe mu bituma umuziki w'u Rwanda udatera imbere, harimo n'inyubako zitoroshya kwidagadura.

Bashingiraga ku bitaramo bimwe na bimwe byagiye bifungwa kubera urusaku byatezaga muri rubanda, bityo Polisi igashyiraho ingufuri abantu bagataha.

N'ubwo bimeze gutya ariko hari ibyo Umujyi wa Kigali ugenderaho, wemerera gukorera igitaramo mu nyubako z'imyidagaduro zabugenewe cyangwa ahandi.

Tariki 22 Ukuboza 2022, Umuyobozi w’Umujyi wa Kigali, Rubingisa Pudence yagiranye ikiganiro n'itangazamakuru yahuriyemo n'izindi nzego za Leta, cyagarukaga ku gutanga ubutumwa ku batuye uyu mujyi n’abawugenda mu bihe by’iminsi mikuru yaherekeje 2022.

Asubiza ikibazo cy'umunyamakuru wa InyaRwanda, Pudence Rubingisa yavuze ko hari ibigenderwaho mu gutanga uruhushya kuri aba bantu bategura ibitaramo, bihuriza hamwe abantu benshi.

Rubingisa yavuze ko uruhushya rusabwa kandi rugatangwa mu gihe cy'icyumweru kimwe, kandi hari itsinda ryashyizweho risuzuma niba uwaka uruhushya yujuje ibisabwa.

Iri tsinda rigizwe n'abakozi b'Umujyi wa Kigali; Polisi, abakozi bo mu Ikigo cy'Igihugu cy'Iterambere (RDB) cyane cyane abo muri Ikigo gishinzwe kumenyekanisha Ubukerarugendo bushingiye ku Nama (Rwanda Convention Bureau-RCB), ndetse rimwe na rimwe iri tsinda rishyirwamo n'abashinzwe ubuvuzi.

Umuhanzikazi Spice Diana wo muri Uganda, mu mpera za Weekend yahuye n'isaganya ubwo Polisi yamufungiraga igitaramo saa sita z'ijoro, ni mu gihe we yari yabwiye abafana be n'abakunzi b'umuziki ko igitaramo kirangira saa saba z'ijoro.

Icyorezo cya Covid-19 cyajegeje ubuzima bwa muntu nguni zose. Cyashyize akadomo ku bikorwa byinshi by'abahanzi, ibitaramo birahagarikwa mu rwego rwo kurengera ubuzima bw'abantu.

Abanyarwanda baherukaga gutaramirwa n'abahanzi mu ntangiriro za 2020. Bongeye gusoma ku mutobe bidagadura, baririmbirwa n'abahanzi muri Mutarama 2022.

Muri Werurwe 2022, Umuyobozi ukuriye ishami rishinzwe ubukerarugendo muri RDB, Kageruka Ariella yabwiye Televiziyo y'u Rwanda ko urwego rw’imyidagaduro rwagizweho ingaruka na Covid-19 kimwe n’izindi nzego, 'bityo ko rukeneye kuzahurwa no kongera kwiyubaka binyuze mu kwinjiza amafaranga ava mu bikorwa by’imyidagaduro bitandukanye, gusa nanone bigakorwa hatabangamiwe ubuzima rusange bw’abaturage'.

Ibitaramo byinshi byabaye mu 2022 byabereye muri BK Arena, ibindi Camp Kigali, Canal Olympia ku i Rebero, M Hotel na Kigali Convention Center. Gukorera igitaramo aha hantu tuvuze haruguru, bisaba umugabo bigasiba undi.

Hari aho usaba gukorera igitaramo, ugasanga serivisi nyinshi ukenera barazifitiye. Ugategekwa gukoresha Application yabo yo kuguriraho amatike, uhabwa abashinzwe umutekano w'ahabera igitaramo (Bouncers), abashinzwe kwakira abantu (Protocol), aho abahanzi bitegurira (Back Stage) n'ibindi.

1. Camp Kigali

Kigali Conference and Exhibition Village ahazwi nka Camp Kigali, ni hamwe mu hantu hazwi cyane ahanini biturutse ku mahema arenga ane yashyizwemo, afasha buri wese guhitamo aho akorera igitaramo bitewe n'uko yifite-Iherereye mu rubavu rwa Kigali Serena Hotel.

Niho hakiriye igitaramo 'Yavuze Yego' cya Papi Clever n'umugore we Dorcas, bamurikiyemo album y'indirimbo zihimbaza Imana 300. Mbere yaho hari habereyemo igitaramo 'Nahawe Ijambo' cya Vestine na Dorcas.

Ntawakwirengagiza kandi ko ihema rinini cya Camp Kigali ari ryo ryakiriye igitaramo gikomeye cya Chorale de Kigali, ifatwa nka nimero ya mbere muri Kiliziya Gatolika.

Ni naho habereye umuhango wo gusezera bwa nyuma ku muririmbyi Yvan Buravan, witabiriwe n'ibihumbi by'abantu.

Nari nibagiwe ko ari naho habereye ibirori bya Bianca Fashion Hub byaririmbyemo Eddy Kenzo, eeeh hanabereye Seka Live yarimo Anne Kansiime, ni byinshi ntiwarondora!

Ikindi ni uko uruganda rwa SKOL rwifashishije imbuga ngari ya Camp Kigali, berekana imikino y'igikombe cy'Isi giheruka kubera muri Qatar.

InyaRwanda yabonye amakuru avuga ko kugira ngo ukorere igitaramo Camp Kigali, ku munsi umwe wishyura Miliyoni 3.5 Frw. Ariko hari igihe bagutera inkunga aya mafaranga akajya munsi.

2. Intare Conference Arena

Iherereye i Rusororo mu Karere ka Gasabo-Ni imwe mu nyubako zagutse yihariye mu kwakira inama n'ibirori, yaba ibyateguwe n'Abanyarwanda cyangwa abanyamahanga.

Igizwe n'ibikoresho byagutse, n'ibyumba byinshi bitatse mu buryo bunyuranye. Ifite icyumba kinini gishobora kwakira abantu 2500 bicaye neza, ishobora no kwakira ibirori nk'ibitaramo by'abahanzi by'abantu nibura 3000 bose batekanye.

Iyi nyubako ikunze kuberamo Inama za Biro Politike z'Umuryango FPR Inkotanyi.

Mu bijyanye n'ibitaramo yakunze kwakira cyane amarushanwa ya nyuma y'irushanwa rya Miss Rwanda-Uyu mushinga ubu urabitse mu kabati kuko ryahagaritswe.

Niho habereye igitaramo cya Adrien Misigaro yise 'Each One Reach One'- Umunya-Senegal w'Umunyamuziki Youssou N’Dour aherutse kuhakorera igitaramo asanganirwa ku rubyiniro n'itsinda rya Sauti Sol, imbere ya Perezida Paul Kagame n'abandi.

Si ubwa mbere kuko imyaka ibiri ishize nabwo Sauti Sol yari yahataramiye. Bwa mbere rurangiranwa mu muziki wa Afurika Burna Boy ataramira i Kigali, yaririmbiye mu Intare Conference Arena (mu 2019)- Icyo gihe yari kumwe na Ya Levis.

Iyi nyubako irakubita ikuzura-Iyo uwateguye ashyizeho uburyo bworohereza abantu kuhagera- Nk'imodoka zivana abantu kuri Stade zikabagezayo.

Ntiwibagirwe ko igitaramo gisoza ihuriro nyafrika ry’urubyiruko, Youth Connekt Africa, cyaririmbyemo Patoranking cyabereye muri iyi nyubako.

InyaRwanda yabonye amakuru avuga ko ku munsi umwe ushaka kuhakorera igitaramo, wishyura nibura Miliyoni 4 Frw. Ariko kenshi bakunze gutera inkunga abahanzi, bakahakorera ku mafaranga macye cyane ugereranyije n'ayo bakabaye batanga.

3. Canal Olympia

Canal Olympia iri mu mushinga wa 'Kigali Cultural Village' aho yatashywe tariki 03 Ukuboza 2020, mu muhango witabiriwe n'abayobozi mu nzego zitandukanye, abahanzi barimo Ruti Joel, Peace Jolis, abakinnyi ba filime barimo Isabelle Kabano wakinnye muri filime 'Petit Pays, abanyarwenya barimo Ntaringwa Diogene [Atome] n'abandi batandukanye bafite aho bahuriye n'inganda Ndangamuco.

Ni umushinga mugari wuzuye utwaye agera kuri miliyoni 40$, wubatswe ku bufatanye na Leta y'u Rwanda ibinyujije mu Ikigo cy'Igihugu cy'Iterambere, RDB, na kompanyi yitwa Vivendi Africa.

Igizwe n'ibice bitandukanye by'ahantu ho kwidagadurira, harimo na Canal Olympia yerekaniwemo filime 'Petit Pays' ya Gaël Faye.

Canal Olympia yubatse mu buryo bw'ikoranabuhanga, haba mu majwi no mu mashusho. Afite inyerekanamashusho (Ecran) ya metero 14, isohora amajwi kuri 7.1 ku ikoranabuhanga rya 3D mu cyumba cy'umutuzo ujyanye no kunogerwa na filime zitandukanye n'ibindi bishamikiyeho.

Iyi nzu ikoreshwa n'amashanyarazi aturuka ku izuba. Ifite ibyuma 400 biyifasha gufata amashanyarazi y'izuba. Ibi bituma igabanya imyuka ya gaze karubonike (C02) ingana n'ibiro 416. Ku mwaka ni hafi toni 150 za C02 igabanya, kubera gukoresha amashanyarazi aturuka ku izuba.

Ifite igice kinini gitwikiriye kiri mu ihema gishobora kwakira abantu ibihumbi 20 nko mu gitaramo n'ibindi, ikanagira Parikingi yisanzuye yakira imodoka zigera kuri 500 icyarimwe. Izengurutswe n'ubusitani bugitoha.

Ni hamwe mu hantu hakiriye ibitaramo bikomeye mu 2022. Ibuka ko ariho habereye iserukiramuco rya MTN|ATHF ryaririmbyemo Sheebah Karungi na Kizz Daniel, ibitaramo by'abahanzi b'indirimbo ziramya zigahimbaza Imana 'Rwanda Gospel Stars'.

Igitaramo cy'abaraperi Trappish Concert II, iserukiramuco rya Oldies Music Festival n'ibindi.

Amakuru agera kuri InyaRwanda avuga ko aha hantu hakodeshwa Miliyoni 2.4 Frw, igihe ushaka kuhakorera igitaramo mu gihe cy'umunsi umwe.

4. Kigali Convention Center

Iyi nyubako irihariye mu kwakira ibirori n'inama zikomeye-Iri mu zabereyemo Inama izwi nka CHOGM y’Abakuru b’Ibihugu na za Guverinoma bibumbiye mu muryango w’Ibihugu bivuga ururimi rw’Icyongereza “Commonwealth, u Rwanda rwakiriye mu 2022.

Niyo yabereyemo ibitaramo itsinda rya Kassav' ryakoreye i Kigali mu minsi yirukiranya. Haherutse kubera iserukiramuco ry'urwenya na Seka Fest.

Habereye ibitaramo bibiri byateguwe n'umuryango Irere Network, byaririmbyemo abahanzi b'indirimbo zo kuramya no guhimbaza Imana.

Bwa mbere umunya-Nigeria Simi aririmbira i Kigali yaririmbiye muri iyi nyubako-Icyo gihe yari kumwe na Patoranking. Ku rubyiniro banahuriyemo na Charly&Nina.

Iyi nyubako kandi yagiye yakira ibirori birimo nk'iby'uruganda rwa Bralirwa binyuze muri Coca-Cola, aho yafashaga abakunzi b'umupira kureba igikombe cy'Isi giheruka kubera muri Qatar.

Symphony Band niho yakoreye igitaramo cyabo cya mbere bari batumiye Rich Hassani wo muri Nigeria, Yemi Alade na Sauti Sol niho bataramiye… Yewe ni byinshi.

Amakuru avuga ko iyi nyubako ikodeshwa Miliyoni 3 Frw, mu gihe ushaka kuhakorera igitaramo mu gihe cy'umunsi umwe.

5. BK Arena

Kuva Banki ya Kigali yashora Miliyari 7 Frw ikagura kwitirirwa iyi nyubako mu gihe cy'imyaka irindwi iri imbere, yabaye isibaniro ry'ibitaramo by'abahanzi.

Ifite ubushobozi bwo kwakira abantu ibihumbi 10 bitegeye neza urubyiniro. Kuva mu 2022, yiganje cyane mu hantu havuzwe habereye ibitaramo bikomeye.

Ingero ni nyinshi, nawe uribuka nk'igitaramo cya Israel Mbonyi yamurikiyemo album ze ebyiri, aca agahigo ko kuba umuhanzi wa mbere wo mu Rwanda wujuje iyi nyubako.

Yewe n'igitaramo cya Diamond cyari kuba ku wa 23 Ukuboza 2022, niho cyari kubera n'ubwo cyasubitswe ku munota wa nyuma.

InyaRwanda ifite amakuru avuga ko Miliyoni 33 Frw zari zimaze kwinjira, zivuye mu bantu baguze amatike. Bamaze kuyasubizwa!

Itsinda rya Hill Song, ishami ryo mu Bwongereza niho ryongeye gukorera igitaramo. Binjije Miliyoni 50 Frw yavuye mu baguze amatike.

Intumwa y'Imana Apôtre Dr. Paul Gitwaza aherutse kuhakorera amasengesho, yambukiranyije umwaka wa 2022 ari kumwe n'abakristu ba Zion Temple.

James na Daniella bamamaye mu ndirimbo 'Mpa amavuta', niho bakoreye igitaramo cyabo cya mbere.

Habereye igitaramo cya Rap City, 'Rwanda Rebirth Celebration' cyatumiwemo The Ben, icy'umufaransa Tayc yakoreye i Kigali nyuma yo kwishyurwa Miliyoni 80 Frw, Chop Life umunya-Nigeria Tecno yaririmbyemo atasuzumye ibyuma kubera ko yigeze kwamburirwa i Kigali, icya Bruce Melodie yizihiza imyaka 10 mu muziki.

East African Party yahariwe abahanzi 12 bo mu Rwanda, Sauti Sol yasize ibyishimo i Kigali n'ibindi umuntu atarondora. Iyi nyubako yanabereyemo imikino ya Basketball n'iya Volleyball.

Iyi nyubako ikodeshwa nibura Miliyoni 17 Frw ku munsi umwe- Ibiganiro mugirana n'ubuyobozi bishobora kuba imbarutso yo kugabanyirizwa.

Hari ahandi hantu habera ibitaramo kandi tutirengagije nka Kigali Serena Hotel, M Hotel hakodeshwa hagati ya Miliyoni 1-1.5 Frw, Marriott Hotel, L'Espace Kacyiru n'ahandi. 

Okapi yatangaje ko uko kuva muri Rutshuru byatangiriye mu Burasirazuba bw’agace ka Kiwanja nk’uko abaturage baho babibwiye iki gitangazamakuru cy’ishami ry’umuryango w’Abibumbye MONUSCO.

Amakuru yizewe ni uko icyo cyemezo bagifashe mu rwego rwo gushyira mu bikorwa imyanzuro y’inama yahuje abakuru b’ibihugu ba Afurika y’Iburasirazuba yabereye i Luanda.

Tariki ya 15 Mutarama 2023, nk’ igihe ntarengwa cyo kuba yavuye mu duce yari yarafashe dutandukanye two muri Rutshuru na Nyiragongo na Masisi mu rwego rwo kugira ngo basubire mu birindiro bahozemo muri Sabyinyo na Chanzu.

Kugeza ubu uyu mutwe umaze kurekura ibice bya Nyamilima, Buramba na Kisharo.

Abaturiye Kiwanja kimwe na sosiyeye sivile bavuga ko babonye umurongo w’inyeshyamba za M23 bikoreye amasasu n’ibindi bikoresho.

M23 iri kuva mu duce yirukanyemo ingabo za Leta mu rwego rwo kubahiriza ibyo yasabwe n’amasezerano ya Luanda no kwerekana ko ishaka amahoro arambye mu burasirazuba bwa Congo.

Uyu murambo wabonywe mu gitondo cyo kuri iki Cyumweru tariki 15 Mutarama 2023, mu Mudugudu wa Cyabitana mu Kagari ka Nkamba.

Abaturage babonye uyu murambo,bavuze

ko ari uw’umukobwa ukiri muto uri hagati y’imyaka 18 na 20 y’amavuko ariko ko badasanzwe bamuzi muri aka gace.

Umwe mu bawubonye yagize ati 'Twaje duhuruye dusanga umuntu aryamye mu muhanda yubamye, bamukase mu ijosi no ku zuru.'

Uyu muturage avuga ko uyu mukobwa bigaragara ko yari inzobe dore ko banasanze irangamuntu ye muri aka gace.

Mugenzi we yagize ati 'Ni umukobwa w’umwana rwose uko bigaragara yari akiri inkumi, yari yubamye, yambaye ubusa, imyenda ye twayitoraguye mu ngarani.'

Aba baturage bavuga ko nyakwigendera ashobora kuba yishwe n’abagizi ba nabi kuko bagerageje no gusibanganya ibimenyetso.

Undi ati 'Imyenda ntayo yari yambaye, bamwishe bamwubika hasi, ntiwabashaga kumenya neza ariko aho bamukoreye isuku umuntu yamubonye ariko n’ubundi ntabwo twamumenye.'

Aba baturage bavuga ko aha basanze uyu murambo bikekwa ko yahiciwe, hasanzwe hateye ubwoba kuko hadatuwe, bagasaba ko hashyirirwaho uburyo bwihariye bwo kuhacungira umutekano no kuhatunganya hakagaragara.

Umwe yagize ati 'Kuva na cyera babanje kujya bahahotorera, kuko dutuye haruguru tukajya twumva induru.'

Umunyamabanga Nshingwabikorwa w’Umurenge wa Ruramira, Bisangwa Emmanuel yavuze ko amakuru y’urupfu rw’uyu mukobwa bayamenye, agasaba abatuye muri aka gace gukaza irondo.

Yasabye abatuye muri aka gace kandi kwirinda kuhakorera ingendo mu masaha akuze, ati 'Ntibatindeyo cyane ngo wenda baveyo mu gicuku kuko bigaragara ko ari ahantu habi hatari ingo cyangwa umuntu ahuye n’ikibazo adashobora kubona abahamutaraba.'

Umurambo wa nyakwigendera wahise ujyanwa mu Bitaro bya Rwinkwavu kugira ngo ukorerwe isuzuma, ndetse n’inzego zishinzwe iperereza zikaba zahise ziritangira.

Ivomo:RADIOTV10

Uwo nta wundi ni Kayije Kagame ukomeje gukangaranya isi ya sinema kuva i Hollywood muri Amerika, kugera mu bindi bihugu bikomeye muri sinema y'i Burayi.

Uyu mukobwa w'imyaka 36 ukomoka mu Rwanda ubusanzwe ni umukinnyi w'ikinamico, akaba umunyarwenya, umubyinnyi wa 'Dance contemporaine' n'ibindi.

Yavukiye i Genève mu Busuwisi ku babyeyi b'abanyarwanda. Yize ibijyanye no gukina filime n'amakinamico muri Ecole Nationale Supérieure des Arts et Technique du Théâtre de Lyon mu 2014, nyuma mu 2015 ajya kuba mu nyubako yagenewe abahanzi ya Watermill International Summer Program iba i New York muri Amerika.

Uyu mukobwa yagaragaye muri filime iri kubica yiswe '''Saint Omer'', yagiye hanze ku wa 23 Ugushyingo 2022 mu Bufaransa.

Akomeje guhesha ishema u Rwanda!

Mu minsi ishize Kayije Kagame yashyizwe ku rutonde rw'abakinnyi 10 ba filime bitwaye neza mu 2022 ku mugabane w'u Burayi, bityo kubera impano zabo bakazahabwa amahirwe muri Porogaramu yiswe 'European Shooting Stars' ikorerwa mu iserukiramuco rya filime ribera mu Mujyi wa Berlin mu Budage.

Abajya muri iyi porogaramu batoranywa bigizwemo uruhare na European Film Promotion (EFP), isanzwe ihuriyemo ibigo bitandukanye bikora akazi ko kumenyekanisha ubuhanzi bwo muri sinema mu bihugu 37 byo mu Burayi.

Abatoranyijwe iyo bageze muri 'Berlin International Film Festival' bahabwa umwanya uhagije wo guhura n'abantu b'ingeri zitandukanye muri sinema, bafite icyo babafasha muri uyu mwuga.

Aba barimo aba-agents b'impano, abatunganya filime bakomeye [producers], abayobozi ba filime n'abandi.

Uwabonye aya mahirwe aba ahawe rugari ngo yigaragaze, ndetse bimufungurire amarembo amenyekane ku rwego mpuzamahanga no ku isi yose muri rusange.

Abantu bahiriwe no kunyura muri 'European Shooting Stars', barimo Umwongerezakazi Michaela Coel uheruka kugaragara muri 'Black Panther: Wakanda Forever' yitwa Aneka, Umutaliyani Luca Marinelli, Umunya-Suède Alica Vikander umaze kubaka izina mu buryo bukomeye n'abandi benshi.

'Berlin International Film Festival' izaberamo iki gikorwa, uyu mwaka izaba muri Gashyantare 2023. Izatangira guhera ku wa 16 kugeza ku wa 26 uko kwezi.

Kayije Kagame yahawe aya mahirwe kuba mu bakinnyi ba filime 10 bagaragaye kuri uru rutonde, nyuma yo gukina mu yitwa 'Saint Omer' ya Alice Diop imara amasaha abiri n'iminota ibiri.

Muri iyi filime, Kayije Kagame akina yitwa Rama. Aba ari umwanditsi w’ibitabo utwite witabiriye urubanza rwa Laurence Coly, umugore wo muri Senegal ushinjwa kwica umwana we w’amezi 15 akamusiga ku mucanga kugira ngo atwarwe n’umuraba.

Aba yagiye muri uru rubanza kugira ngo azabone uko abara inkuru ya nyayo y'ibyabaye.

Iyi filime ishingiye ku nkuru nyayo y'urubanza rwabereye mu Bufaransa mu 2016 rwa Fabienne Kabou, wahamwe n’icyaha nk'iki. Alice Diop wayoboye akanagira uruhare mu kwandika iyi film, yari yitabiriye uru rubanza rwa Kabou.

Kayije mu mwaka ushize mu Bufaransa yahawe igihembo gitangwa na Académie des Arts et Techniques du Cinéma, kizwi nka Césars. Iki yagihawe nk'umukinnyi utanga icyizere mu mwaka wa 2023.

Saint Omer yakinwemo na Kayije Kagame muri Amerika yahajegeje…

'Saint Omer' iheruka kwerekanwa muri Leta Zunze Ubumwe za America, ku wa 13 Mutarama 2023.

Iyi filime kuva yakerekanwa yakiriwe neza muri iki gihugu cy'igihangange ku isi by'umwihariko muri sinema, cyane ko uruganda rwayo rutazirwa izina rwa Hollywood ruri mu za mbere zubahwa cyane ku isi.

Iyi filime iheruka kwegukana igihembo yahawe n'akanama nkemurampaka cyatanzwe muri Palm Springs International Film Festival (PSIFF). Iri serukiramuco riri mu yakomeye muri Amerika ryabaga ku nshuro ya 34.

Akanama nkemurampaka kavuze ko Alice Diop wanditse akanayobora iyi filime, ari umuntu wabashije kugaragaza ibintu bitandukanye ku mwiraburakazi ku Bufaransa bw'ubu.

Kagaragaje ko yabashije gukinisha neza Kayije Kagame na Guslagie Malanga bakina ari abakinnyi b'imena.

Muri Cannes Film Festival ibera mu Bufaransa umwaka ushize iri muri filime z'icyubahiro, ndetse muri Venice International Film Festival uwo mwaka nabwo ihabwa igihembo nyamukuru n'akanama nkemurampaka.

Amaso ahanzwe 'Oscars'

Kuva 'Saint Omer' yajya hanze muri Amerika, ibinyamakuru bikomeye muri icyo gihugu byayisamiye hejuru bimwe biha ibiganiro Alice Diop wayikoze.

Ibinyamakuru byayanditseho harimo nka TheWrap, The New York Times, Variety, Rolling Stone, Deadline Hollywood, Vogue, The New Yorker. Byose icyo bihurizaho ni uko yakinanywe ubuhanga ndetse bimwe bigera kuri Kayije Kagame ukinamo yitwa Rama bikamutindaho bivuga ko afite impano ntagereranywa.

Iyi filime iri muri filime mpuzamahanga zatanzwe zizatoranywamo izizahatana mu bihembo bya  Academy Awards cyangwa se Oscars, bizatangirwa muri Amerika muri Werurwe.

Filime zizahatanira ibihembo ku nshuro ya 95 muri Oscars zishobora kugaragaramo n'iyi ya 'Saint Omer' yakinnyemo Kayije Kagame, zizamenyekana ku wa 24 Gashyantare 2023.

Ikinyamakuru Rolling Stone cyanditse inkuru cyahaye umutwe ugira uti ''Saint Omer' Is an Unforgettable Film That Deserves Oscars Attention'' mu rurimi rw'Ikinyarwanda bishatse kugaragaza ko iyi filime idakwiriye kurenzwa ingohe mu bihembo bya Oscars kubera ubwiza ntagereranywa bwayo.

Bigaragara ko iyi filime yakunzwe muri Amerika ishobora kugira amahirwe igahatana muri ibi bihembo, bikomeye ku isi muri sinema.

Kayije Kagame ni umwe mu bakinnyi b’imena b’iyi filime Alice Diop wagize uruhare mu iyandikwa n’iyoborwa ry’iyi filime akomoka muri Senegal ariko aba mu BufaransaGuslagie Malanda ukina muri iyi filime ari umubyeyi wataye umwana we 

REBA AGACE GATO KA ‘SAINT OMER’ FILIME IGARAGARAMO UMUNYARWANDAKAZI IRI KUBICA MURI AMERIKA

“>
 

Gutsindwa kwa Paris Saint-Germain muri shampiyona y’u Bufaransa, biri gutuma abakinnyi bayo bakina ku ruhande rw’ubusatirizi batukwa. Kuva iyi mikino yatangira iyi kipe imaze gutsindwa imikino 2. 

Ejo yatsinzwe na Rennes igitego 1-0 ndetse yanatsinzwe na Lens ibitego 3-1, ku itariki 6 z'ukwezi kwa 1 muri uyu mwaka. Ejo bakimara gutsindwa abafana bararakaye cyane banatuka abakinnyi babo, barimo Neymar bavuga ko ntacyo abafasha.

Umunyamakuru w’umufaransa witwa Daniel Riolo nawe niko abibona. Abona Neymar yarabaye igihombo gikomeye ndetse anavuga ko kuva yava mu gikombe cy’isi asezerewe muri 1/4, nta musaruro agitanga muri Paris Saint-Germain nk'uwo yatangaga bitegura kujya kugikina. 

Mu magambo y’uyu munyamakuru yagize ati “Mu mikino ya mbere ya shampiyona yafashije Paris Saint-Germain, kubera ko yiteguraga igikombe cy’Isi. Ugendeye ku mafaranga yaguzwe ndetse n'ayo ahembwa, ni igihombo gikomeye isi y’umupira w’amaguru yagize”. 

Neymar ejo mu mukino byari byanze burundu

Mbere y’uko uyu mukinnyi yerekeza muri Qatar kujya gukina igikombe cy’Isi yari amaze gutsinda ibitego 15, ndetse yari yaranatanze imipira 12 ivamo ibitego ariko nyuma yaho amaze gutanga umupira umwe gusa uvamo igitego, nta gitego na 1 aratsinda. Iyo urebye ibyo byose watekereza ko Neymar ashobora kuba atsinda iyo abishaka gusa.

Christophe Galtier ubwo ejo yari ari mu kiganiro n’itangazamakuru, yagize acyo avuga ku bakinnyi be bataka barimo na Neymar. Yagize ati “Abakinnyi banjye bataka nta bushake n’injyana yo gutsinda bafite”.

Nk'uko ibinyamakuru byo ku mugabane w’i Burayi byagiye bikunda kubyandika, Neymar ashobora kuzahosoka muri Paris Saint-Germain mu mpeshyi y’uyu mwaka bitewe n'uko atumvikana na Kylian Mbappé. Uyu mukinnyi wahoze akinira Fc Barcelona afite amasezerano azamugeza muri 2026, ariko Paris Saint-Germain ishobora kuzamutangira kuri make. 

Neymar yaje muri Paris Saint-Germain mu mwaka wa 2017 aguzwe ibifurumba by’amafaranga, yaguzwe miliyoni 222 z’amayero. Amaze gukinira Paris Saint-Germain imikino 167, yatsinzemo ibitego 115 ndetse anatanga imipira 73 ivamo ibitego. Neymar yafashije Paris Saint-Germain mu bikombe bikinirwa mu Bufaransa gusa, kuko ntabwo arabafasha kwegukana Champions League bamaze igihe biruka inyuma.

Neymar arashinjwa kuba igihombo gikomeye mu mateka y’umupira w’amaguru