Author: webrwanda

Perezida Paul Kagame uri mu ruzinduko muri Qatar, yahuye n'Umuyobozi w'Ikirenga w'iki gihugu, Amir Sheikh Tamim bin Hamad Al-Thani, baganira ku mubano w'ibihugu byombi mu nzego zinyuranye zirimo ubukungu n'ishoramari.

Perezida Kagame yageze I Doha kuri uyu wa Kabiri tariki 21 Werurwe 2023.

Mu mishinga ikomeye ibihugu byombi bifitanye, harimo iyubakwa ry'ikibuga cy'Indege cya Bugesera ndetse n'Ishoramari muri Sosiyete ya RwandAir.

Qatar yashoye imari mu mushinga w'iyubakwa ry'Ikibuga cy'Indege cya Bugesera, aho ubu imirimo yo kubaka icyiciro cya mbere igeze kuri 66%.

Muri uyu mushinga, Qatar Airways ifitemo imigabane ingana na 60%, wose hamwe ufite agaciro ka miliyari $1,3.

Iki kibuga kizahabwa ubushobozi bwo kwakira abagenzi bagera kuri miliyoni zirindwi ku mwaka mu cyiciro cya mbere, icyiciro cya kabiri kizaha iki kibuga ubushobozi bwo kwakira abagenzi miliyoni 14.

Qatar Airways iri mu biganiro na RwandAir hagamijwe kugura 49% by'imigabane muri iyi sosiyete nyarwanda. Ibiganiro ntibiragana ku musozo ariko impande zombi zivuga ko bikomeje kugenda neza.

The post <strong>Perezida Kagame yaganiriye na Amir wa Qatar ku bukungu n'ishoramari</strong> appeared first on FLASH RADIO&TV.

Source : https://flash.rw/2023/03/21/perezida-kagame-yaganiriye-na-amir-wa-qatar-ku-bukungu-nishoramari/?utm_source=rss&utm_medium=rss&utm_campaign=perezida-kagame-yaganiriye-na-amir-wa-qatar-ku-bukungu-nishoramari

Amakuru aturuka kumbuga nkoranyambaga aravuga ko Mama Nick yakoze impanuka ari hafi yiwe murugo agonzwe n'igare bakahamukura amerewe nabi cyane. Iyi mpanuka yayikoze mu mpera za kiriya cy'umeru ku ya 17 Werurwe 2023.

Ubusanzwe uyu mubyeyi yamenyekanye muri filime zitandukanye nka Gica, Intare y'Ingore, Giramata n'izindi nyinshi zirimo na filime y'uruhererekane ya City Maid aho akina ari Maman wa Nick na Diane. Ubusanzwe yitwa Beathe Mukakamanzi ni umubyeyi ndetse aranuzukuruje. Ahamya ko filime yatunga umuntu rwose ku bakuze n'abato akabashishikariza kurushaho kudacika intege no kuzamura uwo mwuga, ugatera imbere ukamamara.

Mu mwaka wa 2020 Mama Nick yahawe igihembo cy'umukinnyi wa filime uhiga abandi mu bagore 'Best Actress people Choice' muri Rwanda international Movie Awards People's mu birori byabereye muri Kigali Convention center . Iki gihembo yatsindiye kiri kurwego mpuzamahanga dore ko ibyo bihemboo byari byitiriwe n'abafite aho bahuriye na Cinema bo muri Kenya Uganda ndetse n'u Burundi. Icyo sinacyo gusa ahubwo anafite ikindi gihembo yahawe muri Isango Star nk'umukinnyikazi mwiza wa firime mu gihugu(Best Actress 2020).

Source : https://umuryango.rw/imyidagaduro/article/biravugwa-ko-mama-nick-yakoze-impanuka-ikomeye

Umugore w'Umwongereza yatangaje ko yahisemo kwicwa n'inzara nk'ikiguzi cyo kugumana injangwe ze esheshatu.

Madamu Yasemn Kaptan w'imyaka 46 yavuze ko arya ifunguro rimwe gusa mu cyumweru rigizwe n'imboga, igitunguru,urusenda na salade.

Yasemn ukomoka ahitwa Tottenham mu majyaruguru ya London, mu Bwongereza yavuze ko anywa icyayi mu gitondo, saa sita na nimugoroba kugira ngo inzara itamuhitana, kandi yatakaje ibiro byinshi mu mwaka ushize.

Yasemn yagize ati: 'Nta mafaranga mfite yo gushora – ariko sinshobora kureka injangwe zanjye ngo zigende.

'Zakuranye natwe. Nari nzifite kuva zikiri nto.

'Natanze amafaranga menshi yo kuzitunga,ziri mu mpera y'ubuzima bwazo.Mu by'ukuri, ntibikwiye kuzireka zikagenda.

'Iyo ndiye aba ari ibintu byoroshye nka yogurt cyangwa imboga. Ndarira iminsi yose, ngerageza kwishakamo ibyishimo ariko ndababaye kandi ndarushye.

'Ibyumweru bimwe na bimwe sindya neza uko bikwiriye,mba mfite amazi gusa kugira ngo nkomeze kubaho.'

Yasemn yabonye izi njangwe ubwo yacuruzaga kandi 'yashoboraga' kuzitunga neza, ariko avuga ko ibintu byabaye bibi ubwo yavaga mu kazi umwaka ushize nyuma yo gufatwa n'indwara ya osteoporosis.

Ubu burwayi bwatumye agenerwa inkunga y'amapawundi 400 buri kwezi kugira ngo amufashe kwishyura ubukode n'ibindi nkenerwa.

Uyu kandi ngo abona amapawundi 69 yo kwita ku mugabo we Erdinc Hassain w'imyaka 46, nawe urwaye ,sclerosis.

Uyu avuga ko akenera amapawundi 60 yo kwita kuri izi njangwe kandi ko atayabona aramutse atigomwe ibyokurya bye.

Source : https://umuryango.rw/ubuzima-115/udushya/article/umugore-yemeye-kwicwa-n-inzara-kugira-ngo-atunge-injangwe-ze-eshatu

Umunyeshuri wigaga mu mwaka wa 3 wa kaminuza muri Kenya izwi nka Maseno University, niwe waraye arasiwe mu myigaragambyo y'abamagana ubutegetsi bwa William Ruto.

N'imyigaragambyo yateguwe na Raila Odinga ukuriye ishyaka Azimio la Umoja One Kenya Alliance ritavuga rumwe n'ubutegetsi bwa Ruto.

Amazina ye ni William Mayange, yarashwe ahagana mu ijosi ubwo abigaragambyaga birukankanaga igipolisi cya Kenya cyageragezaga gukumira abigaragambya , aza gupfira mu bitaro ubwo abaganga bageragezaga ku mutabara.

Police muri Kenya yatangaje ko usibye uwo munyeshuri wishwe arashwe, hari n'aba polisi bagera kuri 6 bakomerekeye muri iyo myigaragambyo.

Police yavuze ko icyayiteye kurasa ariko urubyiruko rw'abanyeshuri n'insoresore batatse umurongo wa Polisi ya Maseno police line ubwo bigaragambyaga bashaka kubagiriranabi, bituma birwanaho bakoresheje amasasu.

Imyigaragambyo muri Kenya y'abashyigikiye Odinga urwanya ubutegetsi ,yatumye kugeza ubu ubuzima buhagarara muri Kenya kuburyo ubu nta gikorwa cy'ubucuruzi na kimwe kiri gukorwa.

Itangazo rya Polisi muri icyo gihugu rivuga ko urubyiruko rwabo rwagaragaje imyitwarire yuzuye uburakari bukabije.

Urwo rubyiruko rwafuze umuhanda wa Kisumu-Busia rusahura amaguriro ya Sairam Supermarket n'ibindi bikorwa remezo.

The east African yavuze ko urwo rubyiruko rwakomeje no kurwanya I Gipolisi cya Kenya bigaragara ko rwa maramaje mu kwihimura ku nzego zishinzwe umutekano, byaruviriyemo kuraswa umwe akahasiga ubuzima.

Source : https://umuryango.rw/amakuru/mu-mahanga/umutekano/article/kenya-umunyeshuri-wa-kaminuza-yarashwe-arapfa-mu-myigaragambyo-yamagana

Ibiribwa bifasha umuntu ushaka kureka cyangwa wamaze kureka inzoga

1.Inkeri

Inkeri kimwe n'izindi mbuto zose ziri mu bwoko bumwe, zifasha umubiri kubona isukari y'umwimerere ifasha umuntu kudakomeza gushaka ibintu byongewemo isukari yo mu ruganda. Inkeri kandi zikungahaye no ku zindi vitamine n'imyungu ngugu ikenewe mu mubiri.

2.Ibinyampeke

Ibi ni ibiribwa bikize ku ntungamubiri zizwi nka 'fibre' zituma bitinda mu rwungano ngogozi kandi bigatinda kurekura isukari, bityo umuntu ntasonze vuba ngo abe yashaka kurya bya hato na hato. Ibiribwa by'ibinyampeke birimo: umuceri utaranyuze mu ruganda, ibikomoka ku ngano zitanyuze mu nganda (umugati na biswi), ibigori cyangwa injugu.

3.Imbogarwatsi

Izi mboga ziri mu biribwa by'ingenzi cyane ushobora gufata igihe icyo ari cyo cyose, ari yo mpamvu nazo ziza mu by'ibanze bifasha umuntu urimo kuva ku nzoga by'umwihariko kubera ko zikungahaye kuri vitamine B izirana n'inzoga.

4.Urusenda rwa kamurari

Uru rusenda rufasha umuntu kutongera kurarikira inzoga cyangwa ibyo yumva bishobora kuzisimbura mu mubiri we ngo agire amahoro. Urusenda kandi rutera umuntu kumva ashaka amafunguro, bikaba ari ingenzi cyane igihe umuntu waretse inzoga yumva afite isesemi ituma atabasha kurya.

5.Amafi afite ibinure

Vitamine D ni intungamubiri yangizwa no kunywa inzoga zisindisha, kandi iyi vitamine iboneka cyane mu biribwa bifite ibinure bitangiza umubiri, bikagira uruhare mu gufasha umuntu kutagirira amerwe ibiribwa biba byaraciye mu nganda bityo bikanamurinda ingaruka ziterwa no kurya ibinure byinshi bitari byiza.

Amafi yo mu bwoko bwa mackerel na salmon ni yo ahanini akize kuri vitamine D n'ibinure bitangiza umubiri byo mu bwoko bwa omega-3. Hejuru y'ibyo kandi, ayo mafi akungahaye no kuri protein ifasha umubiri kongera kwiyubaka kandi ukumva uguwe neza nyuma yo gufata ifunguro.

6.Imbuto z'ibihwagari

Kubera ko ibisindisha biri mu bya mbere bigabanya imisemburo ya dopamine mu mubiri bigatuma umuntu ahora yumva ashaka inzoga, kurya imbuto z'ibihwagari ku bwinshi ni imwe mu nzira nziza zo kurwanya icyaka cyabaye cyorezo. Ni kimwe n'imbuto z'urumogi aho rwemewe, imbuto za watermelon n'iza pumpkin kuko zikungahaye ku byuka umubiri bizwi nka fibre kandi zikagira isukari nke cyane.

7.Amafunguro akize kuri Zinc

Muri aya mafunguro hagarukamo ibiribwa bikomoka ku binyampeke bitaciye mu nganda (ingano n'umuceri), hakabamo n'imbuto nka avoka, inkeri z'umukara, iz'ubururu n'imbuto zitwa pomegranates. Ibi byose bikaba bikungahaye ku ntungamubiri ya fibre ituma umuntu atagirwaho ingaruka no kureka inzoga, cyangwa gusonza bya hato na hato akaba yasubira ku byo yaretse.

8.Imineke

Imineke kimwe n'imbuto z'ibihwagari, nayo ifasha kuzamura imisemburo ya dopamine no kurwanya kumva umuntu ashaka gusubira cyo yaretse. Imineke ikize ku myunyu ya potasiyumu (potassium) ifite akamaro kanini ku buzima bw'umutima n'imikorere yawo kandi mwibuke ko kunywa inzoga zisembuye igihe kirekire byangiza umutima.

9.Umugati w'ingano gusa

Umugati w'ingano zitavangiye ntukize gusa ku ntungamubiri za fibre kimwe n'ibinyampeke ubwabyo, ahubwo wuzuyemo n'imyunyu ya manyeziyumu (magnesium) kandi ukaba uzwiho guhaza byihuse. Bityo rero gusimbuza umugati w'umweru uw'ingano zonyine, byongera intungamubiri za fibre kandi bikakurinda kwifuza inzoga kurusha uko umugati w'umweri ubigenza.

10.Amafunguro akize ku myunyu ya fer (iron)

Imyunyu ya fer ni yo ifasha gutembereza umwuka mwiza (oxygen) mu mubiri, kandi inzoga zisindisha zikaba zangiza iyo myunyu. Ni yo mpamvu igihe iyo myunyu ibaye mike mu mubiri umwuka wa Oxygen uba utakibasha kugera mu bice byose uko bikwiye. Amafunguro akungahaye kuri iyo myunyu ni inyama y'inkoko, tofu, ibishyimbo na lentiye.

Niba warabashije kureka inzoga zisembuye cyangwa ukiri muri urwo rugamba rutoroshye, gerageza urebe ko wabasha kujya ubona aya mafunguro yose uko ari 10 kenshi gashoboka, kugira ngo ubuzima bwawe bwongere burangwe no kuzira umuze.

Source : https://umuryango.rw/ubuzima-115/article/dore-ibiribwa-umuntu-wifuza-kureka-inzoga-ashobora-gufata-bikamworohera-nta

Uwitwa GASINZIGWA Janviere yasabye guhindura amazina mu buryo bwemewe n'amategeko akitwa JANVIERE CHRISTINE UWAMAHORO mu bitabo by'irangamimerere.

Impamvu atanga zituma asaba guhindura amazina akaba ari uko ari amazina afite kuri Passport.

Source : https://umuryango.rw/amatangazo/article/itangazo-gasinzigwa-janviere-yasabye-guhindura-amazina-akitwa-janviere

Abapolisi bo mu Karere ka Kabale, muri Uganda barimo gukora iperereza ku rupfu rw'umupolisi w'umugore w'imyaka 23 warashwe n'umukunzi we w'umusivili.

Nk'uko abapolisi babitangaza, PC Caroline Komuhangi wakoraga ku ishami rya polisi rya Kabale yishwe mu gitondo cyo ku cyumweru, tariki ya 19 Werurwe 2023, mu rugo rwe

Umuvugizi wa polisi mu karere ka Kigezi, Elly Maate, yatangarije Daily Monitor ati: 'Bivugwa ko ku ya 18 Werurwe 2023 ahagana mu ma saa kumi n'ebyiri z'umugoroba, nyakwigendera yasinyiye imbunda akajya ku kazi nijoro.

Ku ya 19 Werurwe ahagana mu ma saa kumi n'ebyiri n'igice za mu gitondo, bivugwa ko yavuye ku kazi kandi mu gihe yari mu kiruhuko, inshuti ye y'umugabo Denis Arinaitwe yamusanze mu rugo maze bombi baratongana. '

Bwana Maate yakomeje agira ati: “Ubwo Komuhangi yageragezaga kumuhunga, uyu mukunzi we yafashe imbunda ye,amurasa isasu rimwe inyuma n'andi abiri ku rutugu, ahita amwica.”

Ku cyumweru, abapolisi baturanye n'aba bombi bafashe uyu musivili bamujyana mu bitaro by'akarere ka Kabale (KRRH) arinzwe.

Maate yagize ati: “Ibi byatewe nuko na we yakomeretse ubwo yageragezaga kwiyahura yirasa anyujijje mu izuru”.

Bwana Maate yavuze ko ibisigazwa by'amasasu hamwe n'imbunda yariho amaraso byavumbuwe kandi ikirego cy'ubwicanyi cyageze kuri sitasiyo ya polisi ya Kabale.

Ku Cyumweru, umurambo wa nyakwigendera wakuwe aho yiciwe ujyanwa mu bitaro KRRH gusuzumwa.

Source : https://umuryango.rw/ubuzima-115/udushya/article/umupolisikazi-yishwe-n-umukunzi-we-wakoresheje-imbunda-ye-akamurasa

Ibi Umuvugizi wa Leta y'u Rwanda yabigarutseho mu kiganiro yagiranye n'umunyamakuru wa The New Times dukesha iyi nkuru ko ubufatanye bushingiye ku masezerano y'ibihugu byombi byagiranye muri Mata 2022,agamaije gushakira umuti ikibazo cy'abimukira bakomeje kwinjira mu Bwongereza mu buryo butemewe n'amategeko , bigashyira ubuzima bwabo mu kaga gakomeye dore ko iyo baza babanza kunyura mu nzira zigoye .

Ku nshuro ya mbere u Rwanda ruzahabwa amafaranga angana na miliyoni 140 z'amapawundi ,azazifashishwa mu gufasha no kwitegura abaimukira bazahagera mbere ,ibihugu byombi bikazakomeza gukorana kugira ngo iyo gahunda izanozwe neza.

Yolande Makolo yabajijwe niba muri iyo gahunda nta mafaranga azava mu isanduku ya Leta y'u Rwanda, mu gihe igihugu gifite ibindi bibazo bicyugarije cyakabaye gihanganye nabyo.

Mu gusubiza yagize ati “Ku bijyanye n'amafaranga avuye mu misoro y'abaturage, ni oya. Hari ishoramari rishya u Bwongereza buri gushyira muri iyi gahunda, rizafasha ahubwo amafaranga ava mu misoro y'abaturage gukora ibirenzeho mu gufasha izindi gahunda dusanganywe.”

U Bwongereza mu mwaka ushize bwatangaje ko nibura ku munsi bukoresha miliyoni 7 z'amapawundi yo kwita ku bimukira binjiye muri icyo gihugu binyuranyije n'amategeko. Ubaze ku mwaka, nibura u Bwongereza butakaza miliyari 2.5 z'amapawundi yo kwita kuri abo bantu.

Yolande Makolo yavuze ko u Bwongereza bwiteguye gufasha u Rwanda kubaka ubushobozi buzatuma abo bimukira babishaka baguma mu Rwanda, bakahabona amahirwe atuma bagera ku nzozi zabo.

Yakomeje ati “Icyo u Bwongereza burimo gukora ni ukubaka ubushobozi bwacu kugira ngo tubashe kwita kuri aba bimukira, noneho hejuru y'iyo nkunga u Bwongereza buzanashora imari mu guteza imbere ubukungu bw'u Rwanda, kugira ngo tubashe gukora byinshi ku byo dukora haba mu bikorwa remezo, guteza imbere urwego rwa serivisi, guteza imbere uburezi, mu gutanga amahugurwa menshi haba ku banyarwanda ndetse n'abimukira.”

Makolo yabajijwe uburyo u Rwanda nk'igihugu gikennye cyakwemera gufasha u Bwongereza muri iki kibazo, aho kubureka ngo bukorane n'inzego bireba nk'ishami ryita ku mpunzi risanzwe ribifitemo ubunararibonye.

Yagize ati “U Rwanda rubikora kubera ko Abanyafurika ntabwo turi isoko y'ibibazo gusa dushobora no kuba isoko y'ibisubizo. Muzi ko u Rwanda rufite ubufatanye bwinshi mu nzego zitandukanye, tuzwi mu bikorwa byo kugarura amahoro mu bice bitandukanye by'isi, dufitanye amasezerano ajyanye n'umutekano n'ibihugu bitandukanye muri Afurika, tubasha kugira uruhare no gutanga umusanzu mu gukemura ibibazo zitandukanye bireba isi.”

“Ibyo turimo gukora ubu ku bimukira ni uko ari ikibazo gihangayikishije isi. Niba gikeneye igisubizo gihuriweho n'isi yose, twiteguye kugira uruhare mu gushaka uburyo bushya bwo gukemura ikibazo cy'abimukira, mu buryo budafasha isi mu kugikemura gusa, ahubwo bunadufasha natwe nk'abanyarwanda.”

Makolo yavuze ko ubufatanye bw'u Rwanda n'u Bwongereza mu guhangana n'ikibazo cy'abimukira ari bushya, bityo abantu bakwiriye kubuha amahirwe bakareba ko butanga umusaruro.

Ati “Abantu bakwiye kubuha amahirwe kandi butanze umusaruro bwagera no ku bihugu byinshi. Yego turimo gufasha u Bwongereza gukemura ikibazo bufite, ariko u Bwongereza nabwo burimo gushyira ubushobozi hano mu Rwanda, ku buryo dushobora kubwifashisha mu kubaka u Rwanda rwiza twifuriza Abanyarwanda.”

Inkunga u Bwongereza buzajya buha u Rwanda yagenewe ibikorwa birimo imyiteguro yo kwakira aba bimukira, hakaba n'igice cyagenewe gutera inkunga iterambere ry'ubukungu nko mu bikorwa remezo, imyubakire, uburezi n'ibindi.
Yolande Makolo yavuze ko u Bwongereza bwiteguye gutanga andi mafaranga bitewe n'abimukira buzajya bwohereza.

Ati “Nitumara kubona neza umubare w'abimukira bazaza n'igihe bazazira, hazatangwa ubushobozi bw'inyongera kugira ngo babashe kwakirwa neza mu baturage, bahabwe amahugurwa bakeneye bafashwe gutangira ubucuruzi, kubasha kubona ubutaka, bizaterwa n'umubare w'abimukira bazoherezwa hano n'igihe bazazira.”

Yongeyeho ati “Tuzakira aba bimukira mu ngo zitandukanye muri Kigali, si inkambi, gereza cyangwa ibigo bifungirwamo by'igihe gito, tuzabashakira aho kuba mu muri Kigali no mu Mijyi yunganira Kigali. Bazatuzwa mu baturage ku nkunga ya Guverinoma mu myaka runaka, twizera ko bazaba bamaze kumenyera ku buryo babasha gukomeza ubuzima bwabo.”

Muri icyo gihe ngo bazafashwa kwiga, bahabwe amahugurwa atandukanye yabafasha gutangira ubucuruzi, ndetse no kwiga indimi zikoreshwa mu Rwanda.
Ibikorwa bya mbere byo kwitegura abo bimukira byaratangiye aho kuri iki Cyumweru tariki 19 Werurwe Minisitiri w'Umutekano mu Bwongereza, Suella Braverman yashyize ibuye ry'ifatizo ahagiye kubakwa inzu zizatuzwamo abo bimukira mu karere ka Kicukiro.

Ni inyubako biteganyijwe ko zizatwara miliyari 60 Frw aho hagiye kubakwa inzu 528 zikazuzura mu gihe cy'amezi atandatu.

Abimukira ba mbere bagombaga kugera mu Rwanda mu mwaka ushize, icyakora byatindijwe n'ikirego cyatanzwe mu nkiko zo mu Bwongereza, bamwe bagaragaza ko kohereza abo bantu binyuranyije n'amategeko. Haracyategerejwe umwanzuro ku bujurire.

Source : https://umuryango.rw/amakuru/mu-rwanda/article/goverinoma-y-u-rwanda-yakuyeho-urujijo-kubizatunga-abamimukira-bazava-mu

Iyi mpuruza itanzwe nyuma yuko uyu mutwe usanzwe urwanya ubutegetsi bwa Uganda ukaba ufite ibirindiro muri Congo, ukomeje kugaba ibitero byinshi mu baturage bo mu gace ka Beni, bigahitana abaturage benshi.

Icyizere cyo kongera kwizera umutekano wabo bagitegereje ku bikorwa bihuriweho na FARDC ndetse na UPDF, basaba ko byongera imbaraga mu guhangana n'umutwe wa ADF ukomeje koreka imbaga.

Saddam Patanguli uri mu bayobozi bo muri Sheferi ya Bashu, yagize ati 'Niba koko ihuriro ryita ku baturage, ntabwo ryari gutangirira mu gihuru ngo ryirukane inyeshyamba mu migi minini. Ahubwo, yashoboraga gutangirira mu midugudu minini hanyuma agakora inzira yerekeza mu gihuru kugira ngo imirwano ibere mu gihuru. Ubu ni bwo bwoba bwacu. Twumva ko Uganda ishaka gukuraho akaga ku mipaka yayo kandi abaturage ba Bashu ni bo barimbuka.'

Yakomeje agira ati 'Kuva mu kanya kamwe kugeza ku wundi urashobora kumva ko ADF iri ku rwego rwa Lubero kuko hamwe ni iterambere ryabo kugera ku rwego rwa Mabuku, Maboya, Mukondi, hafi y'ubutaka bwa Lubero. Ibyo ari byo byose, ni ibintu biteye ubwoba. Byaba ngombwa kongera gusobanura agace kagira uruhare muri ubu bufatanye bwa FARDC-UPDF kugira ngo harebwe urugero abaturage b'abasivili bazarindwa.'

Umuvugizi w'ibikorwa bihuriweho na FARDC-UPDF, Lt Col Mack Hazukay yerekana ko hari gukorwa inyigo y'uburyo bwo kujya guhashya ibikorwa by'iterabwoba bya ADF byimukiye mu tundi duce.

Source : https://umuryango.rw/amakuru/mu-mahanga/umutekano/article/rdc-abategetsi-muri-beni-baratabaza-leta-nyuma-y-igiterocy-ibyihebe-bya-adf

Uwitwa UWANGE Claudine yasabye guhindura amazina mu buryo bwemewe n'amategeko akitwa UWASE Claudine mu bitabo by'irangamimerere.

Impamvu atanga zituma asaba guhindura amazina akaba ari uko ari izina Ry'irigenurano rikaba riteye ipfunnwe.

Source : https://umuryango.rw/amatangazo/article/itangazo-uwange-claudine-yasabye-guhindura-amazina-akitwa-uwase-claudine