Author: webrwanda

Umutoza w'Ubufaransa Didier Deschamps yahisemo kizigenza Kylian Mbappé nka Kapiteni mushya w'ikipe y'igihugu 'Les Bleus',iri kwitegura imikino yo gushaka itike ya Euro.

Nyuma yo gusezera kwa Hugo Lloris mu Ikipe y'Igihugu y'u Bufaransa,Umutoza Deschamps yagombaga gushaka kapiteni mushya aho yahisemo kizigenza Kylian Mbappe.

Rutahizamu wa Atletico Madrid,Antoine Griezmann yagizwe umwungiriza wa mbere asimbuye myugariro wa Manchester United,Raphael Varane nawe wasezeye nyuma yo gutsindirwa ku mukino wa nyuma w'igikombe cy'isi mu mpera z'umwaka ushize.

Uyu rutahizamu wa Paris Saint-Germainw'imyaka 24,yemeye iki cyemezo nyuma yo kuganira n'umutoza Didier Deschamps mu gitondo.

Lloris w'imyaka 36, yari amaze imyaka irenga icumi ari kapiteni w'Ubufaransa.

Mbappe,umaze gukinira igihugu cye inshuro 66 yavuzwe cyane kuri uyu mwanya nyuma yo gutsinda ibitego bitatu ku mukino wa nyuma w'igikombe cy'isi baheruka gutsindwamo na Argentine kuri penaliti 4-2 nyuma yo kunganya ibitego 3-3 mu minota 120.

Mbappe yari mu ikipe y'igihugu y'Ubufaransa yatwaye igikombe cy'isi muri 2018.

Uyu wahoze akinira AS Monaco ni kapiteni wungirije muri PSG,inyuma y'umunya Brazil, Marquinhos ndetse yari kapiteni mu mukino baheruka gutsindwamo na Rennes ibitego 2-0.

Umukino wa mbere wa Mbappe nka Kapiteni w'Ubufaransa n'uwo kuwa Gatanu bahatanira itike ya Euro 2024,ubwo bazaba bahanganye n'Ubuholandi kuri Stade de France.

Source : https://umuryango.rw/imyidagaduro/imikino/article/kylian-mbappe-yagizwe-kapiteni-mushya-w-ubufaransa

Abaturage muri segiteri za Mpati, Kibachiro, Bibwe na Nyange muri Bashali, Mokoto ho muri Teritoire ya Masisi muri Kivu ya Ruguru bamaze gutatanira mu mashyamba guhera mu mpera z'icyumweru gishize.

Aba bahunze intambara ikomeje guhanganisha umutwe w'inyeshyamba za M23 na Fardc n'imitwe yitwaje intwaro bafatanya.

Intandaro y'iyi mirwano ngo n'ibitero by'inyeshyamba zagabye ku birindiro bya M23 nyuma yo kwemera kurekura ibice byinshi yari yafashe ngo hatangire inzira y'ibiganiro biganisha ku mahoro arambye.

Amakuru ava mu baturage muri icyo gice avuga ko M23 yari yarekuye ibice bya Kitshanga na Mweso berekera mu bindi bice bya Busumba, Kirumbu na Kibachiro, ahakomereje imirwano n'ingabo za Congo by'umwihariko muri Bibwe, Nyange na Kitso.

Kurundi ruhande, abatanga amakuru bavuga ko M23 ikomeje imirwano ishaka kwigarurira ibice bya Pinga na Lukweti mu buryo bwo kuyobya uburari ko bafite umugambi wo kurambika intwaro hasi nkuko bitangazwa na Radio Okapi dukesha iyi nkuru.

Kugeza ubu ubuzima bw'abaturage muri Kivu ya Ruguru bukomeje kujya mu kaga kuva mu kwezi gushize kubera imirwano yubuye i Kitshanga na Mweso. Aho abaturage bahora biruka bashaka aho bihisha kandi nta butabazi bw'ibiribwa n'imiti bafite kugeza ubu.

Source : https://umuryango.rw/amakuru/mu-mahanga/umutekano/article/rdc-masisi-yubuyemo-imirwano-hagati-ya-m23-na-fard-nyuma-y-agahe-gato

Ibi yabitangaje nyuma y'igihe atangaje ko yabwiwe ko atazabyara ariko nyuma umukunzi we Whozu yavuze ko muri Kanama 2022 Wema Sepetu yari atwite ariko ubwo inda yari ifite amezi 3 ikaza kuvamo kubera ibibazo bombi bagiranye atakekaga ko byagira ikibazo ku nda, ikaza kuvamo.

Nyuma y'uko abantu benshi bagiye bibaza impamvu uyu mukinnyi wa filime yahishe ko atwite, abinyujije ku mbuga nkoranyambaga ze yatanze ubutumwa burimo igisubizo.

Ati “ntabwo ngititwe. Ni yo naba ntwite ukeka nzabivugaho? Imana niba ivuze ngo reka mpe umugisha inda ya we Wema hanyuma nkatwita ntabwo nzabibabwira mwese. Gusa nifuza gutwita.”

Ni nyuma y'uko mu ntangiriro za 2020 Wema Sepetu yatangaje ko yabuze urubyaro akaba ari nyuma y'uko yakuyemo inda 2 z'uwahoze ari umukunzi we akaba n'umukinnyi wa filime Kanumba ariko nyuma akaza kwitaba Imana.

Source : https://umuryango.rw/imyidagaduro/article/wema-sepetu-yahishuye-impamvu-yari-yarahishe-inda-ye-iherutse-kuvamo

Uwahoze ari umukinnyi wa Juventus,Cristian Bunino,yahawe ikarita itukura nyuma yo kwihagarika mu kibuga …ari hafi kwinjira asimbuye.

Umutoza w'uyu mukinnyi yababajwe n'iki gihano gikomeye yahawe kubera ko ngo 'nta muntu n'umwe ibyo yakoze byagizeho ingaruka.

Cristian Bunino w'imyaka 26, yamaze imyaka itatu akinira Juventus ndetse yabonwaga nk'uzaba umukinnyi ukomeye nubwo bitakunze.

Uyu akina mu ikipe yitwa Lecco yo mu cyiciro cya gatatu,Serie C, yagezemo mu ntangiriro z'ukwezi kwa mbere.

Icyakora, Bunino ntabwo yigaragaje muri iyi kipe nkuko byari byitezwe ku munsi cyumweru ubwo banganyaga 0-0 na Piancenza.

Uyu rutahizamu wari ugiye kwinjira mu kibuga asimbuye habura iminota 20 ngo umukino urangire,yashatse kwihagarika ntiyajya mu rwambariro ahubwo abikorera mu kibuga ku ruhande byatumye ahabwa ikarita itukura adakinnye.

Buninio yagerageje kwihisha abasifuzir ariko umusifuzi wo ku ruhande amutera imbona abimenyesha uwo hagati nawe ahita aza amuha ikarita itukura.

Iki cyemezo cyababaje umutoza we Luciano Foschi, wumvaga ko uyu mukinnyi we yagombaga guhabwa umuhondo kuko ntawe yahohoteye.

Foschi ati: 'Ni itegeko rigomba gukurikizwa ariko ndakeka abasifuzi bagomba gukoresha inyurabwenge yabo kuko ntawe yigeze agirira nabi,nta n'uwabibonye.”

Si ubwa mbere hatanzwe ikarita itukura umukinnyi yihagaritse mu kibuga kuko umunyezamu wa Salford City nawe yayihawe muri 2017 ubwo yabikoraga ikipe ye ikina na Bradford.

Muri Nzeri umwaka ushize nabwo,undi munyezamu wo hasi yahawe ikarita itukura kubera ibi mu mukino wa FA Cup.

Source : https://umuryango.rw/ubuzima-115/udushya/article/umukinnyi-wakiniye-juventus-yahawe-igihano-gikomeye-nyuma-yo-kwihagarika-mu

Nyuma y'uruzinduko rw'iminsi 2 Umunyamabanga wa Leta y'Ubwongereza , Madamu Suella Braverman yashoje mu Rwanda kuwa mbere tariki 20 werurwe 2023, yatangaje ko yiboneye ko u Rwanda ari nta makemwa mu kwakira no gufata neza abimukira b'abanyamahanga, yewe ndetse no kurusha uko bafatwa mu bihugu byinshi byo mu Burayi.Amasezerano hagati y'Ubwongereza n'uRwanda azabera ibindi bihugu urugero.

Madamu Braverman wagenzwaga no gushimangira amasezerano Ubwongereza bufitanye n'uRwanda, ateganya ko ruzakira abimukira bari mu Bwongereza mu buryo bunyuranyije n'amategeko, yashoboye kubonana n'abimukira bari mu Rwanda, barimo abavanywe mu bucakara muri Libiya, aho bari barageze bagerageza kwambuka ngo bajye gushakira imibereho ku mugabane w'uBurayi, abavuye muri Afghanistan bahunga ubutegetsi bw'intagondwa z'abatalibani, n'abandi benshi bahisemo gutura mu Rwanda, mu gihe mu bihugu byabo ibintu bitarasubira mu buryo, cyangwa mu gihe amadosiye asaba ubuhungiro mu bindi bihugu byo mu Burayi n'Amerika agisuzumwa.

Abo bose batangarije Madamu Suella Braverman ko bahamwe amacumbi ajyanye n'icyubahiro gikwiye umuntu, bamubwira ko biga uko bikwiye, bakavuzwa neza, bakidagadura, mbese ngo babaye abenegihugu mu bandi.Agisubira mu gihugu cye, Umunyamabanga wa Leta Suella Braverman yabwiye itangazamakuru ndetse n'izindi nzego bireba, ko nta gikwiye gukoma imbere umushinga wo kohereza abimukira mu Rwanda, ko ndetse aya masezerano azabera urugero n'ibindi bihugu bihangayikishijwe n'abimukira binjira muri ibyo bihugu rwihishwa, abenshi ndetse bakanapfira mu nzira batarahagera.

Ubuhamya bwa Suella Braverman bugamburuje abarwanya aya masezerano hagati y'u Rwanda n'Ubwongereza, bikaba byari bisanzwe bizwi ko abo ari abanga u Rwanda n'ubuyobozi bwarwo ku mpamvu zizwi nabo ubwabo gusa, kimwe n'ababonera amaronko ku bimukira, babeshya ngo barabafasha kurengera uburenganzira bwabo. Indege itwaye icyiciro cya mbere cy'abimukira bavuye mu Bwongereza, ishobora kugwa i Kanombe mu minsi mike iri imbere, kuko impande zombi zemeranyijwe kwihutisha gushyira mu bikorwa amasezerano. Kuki abimukira bari mu mudendezo mu Rwanda, nyamara hakaba Abanyarwanda bahisemo kuzapfira ishyanga?

Iyo ushishoje, Abanyarwanda binangiye bakanga gutaha, si uko batazi ko mu Rwanda ari amahoro. Ahubwo biganjemo ababa mu mashyamba ya Kongo no mu bihugu bike by'Afrika, Uburayi n'Amerika, bibwira ko ngo bazataha barasa, baje gufata ubutegetsi mu Rwanda, bagasubizaho leta y'ibigarasha n'abajenosideri.

Abo ni abari mu mitwe y'iterabwoba nka FDLR, RNC, FLN n'indi itagira epfo na ruguru. N'abitwa ko bajijutse, bakiyita' abatavuga rumwe na Leta', bazi neza ko ibyo gufata ubutegetsi mu Rwanda ari inzozi zidashoboka, ariko bagahitamo gushuka ab'ubwenge buke, ngo babahe udufaranga tubasunika mu buzima bubi barimo, iyo rubanda inababere agakingirizo iyo mu mahanga, kuko batinya gutaha kubera ibyaha binyuranye basize bakoze mu Rwanda. Wakwiyita ute'impunzi' kandi uri mu mitwe yitwaje intwaro?

Tumaze iminsi tugaruka ku bukangurambaga bw'abajenosideri n'ibigarasha birimo Ingabire Victoire na FDU-Inkingi ye, Ntaganda Bernard, Faustin Twagiramungu, Anasthase Gasana, Gaspard Musabyimana, abaparimehutu bo Dominiko Mbonyumutwa, n'abandi bacuramye ubwonko, ngo batabariza 'impunzi z'Abanyarwanda ziri muri kongo'.

Ariko se mu by'ukuri, ninde wakwirengagiza ubunryo Leta y'uRwanda, ifatanyje n'Ishami ry'Umuryango w'Abibumbye rishinzwe Impunzi, UNHCR, yewe ndetse n'ibihugu byakiriye impunzi z'Abanyarwanda, nta gihe batabwiye abifuza gutaha ko amarembo afunguye, abashaka kuguma aho bari nabo bakaba bahaguma, ariko batitwa impunzi? Hari ibihumbi byinshi byahisemo gutera umugongo ubuhunzi, abandi batura mu bihugu bahungiyemo, ariko bafite uburenganzira bwo gusura igihugu cyabo, uRwanda. Abatashye ubu baratuye, baratuje, bari mu cyerekezo kizima kimwe n'abo basanze mu Rwanda.

Abinangiye nta mpamvu n'imwe yumvikana batanga, uretse gusa kuvuga ngo mu Rwanda 'nta bwisanzure buhari', ukagirango kubundabunda iw'abandi nibwo bwisanzure bubakwiye.

Bishoboka bite se ko umuntu yakwiyita impunzi atarabujijwe gutaha, agahitamo gufata intwaro no kuyoboka imitwe yica, igasahura,igasambanya abagore ku ngufu, mbese imitwe twagereranya n'iya satani?!Niba umunyamahanga akubwira ko mu Rwanda abayeho neza, kuki wowe wahitamo kubaho nabi mu mahanga kandi ufite iwanyu. Abatarafata icyemezo cyo gutaha murakererwa rwose, kuko abari mu gihugu barakomeza kubasiga muri rwa rugendo rw'iterambere turimo.

Uko imyaka ishira kandi niko musaza, ari nako igihe cyo gukora kibasiga.

N'iyo kandi waba utunze, burya nta shya ry'ishyanga. Bikarushaho kuba bibi iyo uwo mutungo uwukoresha mu kubangamira inyungu z'igihugu cyakubyaye.Amateka atwereka ko burya amahanga ahanda. Igihe kiragera akaguhinduka, cyane cyane iyo yamenye ko utavugwa neza ku ivuko. Witegereza kuzabura amajyo, kandi uRwanda rwawe ruhora rugutegeye yombi ngo rukwakirane ubwuzu.

Taha none, utandukane no kubaho nk'utagira gakondo.

The post Niba abimukira bishimiye uko babayeho mu Rwanda, kuki hari Abanyarwanda bahisemo guhera ishyanga? appeared first on RUSHYASHYA.

Source : https://rushyashya.net/niba-abimukira-bishimiye-uko-babayeho-mu-rwanda-kuki-hari-abanyarwanda-bahisemo-guhera-ishyanga/?utm_source=rss&utm_medium=rss&utm_campaign=niba-abimukira-bishimiye-uko-babayeho-mu-rwanda-kuki-hari-abanyarwanda-bahisemo-guhera-ishyanga

Impuzamashyirahamwe y’umupira w’amaguru muri Afurika, CAF yamaze gutanza abasifuzi 55 barimo umunyarwanda umwe rukumbi, Uwikunda Samuel bari mu cyiciro cya Elite A.

Ni icyiciro umuntu yafata nk’icyo ku rwego rwa mbere rwa CAF aho umusifuzi ukigezemo aba yemerewe gusifura imikino yo ku rwego rwo hejuru nk’igikombe cy’Afurika n’icy’Isi, imikino ya nyuma n’imikino Nyafurika ya CAF Champions League na Confederation Cup.

Aba basifuzi bageze muri iki cyiciro bakaba bafite amasomo azaba tariki ya 14 – 18 Mata 2023 abategurira kuzasifura 1/4 cya Champions League na Confederation Cup.

Muri rusange uru rutonde rw’abasifuzi 55 harimo 30 bo ku ruhande na 25 basifura hagati ari nabo barimo umunyarwanda Uwikunda Samuel. Uru rutonde kandi ruriho abasifuzi 5 ba VAR.

Uwikunda Samuel yazamuwe mu cyiciro gisumba ibindi mu basifuzi ba CAF

Source : http://isimbi.rw/siporo/article/umusifuzi-umwe-rukumbi-w-umunyarwanda-muri-55-bageze-mu-cyiciro-cya-elite-a

UMUHESHA W'INKIKO W'UMWUGA, ARAMENYESHA ABANTU BOSE KO HAZAGURISHWA MURI CYAMUNARA IMITUNGO YIMUKANWA YA GROBAL VENTURES LTD/ADCOMPLIANCE LTD IGIZWE BIGABANYIJE MURI LOT 2 BIHEREREYE MU MUDUGUDU W'AMAJYAMBERE, AKAGALI KA GASHARU, UMURENGE WA KICUKIRO,AKARERE KA KICUKIRO.

IPIGANWA MU CYAMUNARA MU BURYO BW'IKORANABUHANGA RIZATANGIRA TARIKI YA 19/03/2023 I SAA TANU Z'AMANYWA (11H00) KUGEZA TARIKI YA 26/03/2023 I SAA TANU Z'AMANYWA(11H00).

WIFUZA IBINDI BISOBANURO YASOMA ITANGAZO RIRI HANO HASI CYANGWA SE AGAHAMAGARA KURI:+250788734008.

Source : https://umuryango.rw/amatangazo/article/itangazo-rya-cyamunara-y-imitungo-yimukanwa-iherereye-kicukiro-70024

Perezida w'Uburusiya Vladimir Putin yavuze ko azaganira na Perezida Xi Jinping kuri gahunda y'uyu mutegetsi w'Ubushinwa ikubiye mu ngingo 12 yo “gucyemura amakuba akaze yo muri Ukraine”, muri uru ruzinduko rwari rwitezwe cyane rwa Xi i Moscow.

Ubwo aba bategetsi bitanaga “inshuti nkunda”, Putin yagize ati: “Buri gihe tuba twiteguye gahunda y'ibiganiro”.

Mu kwezi gushize, Ubushinwa bwatangaje gahunda yabwo yo gusoza intambara – ikubiyemo “guhagarika imirwano” no gusubukura ibiganiro by'amahoro.

Ariko ku wa gatanu, Amerika yaburiye ko gahunda y'amahoro ishobora kuba ari “amayeri yo gutinza ibintu”.

Minisitiri w'ububanyi n'amahanga w'Amerika Antony Blinken yagize ati: “Isi ntikwiye kubeshywa n'icyemezo cy'amayeri icyo ari cyo cyose cy'Uburusiya, bushyigikiwe n'Ubushinwa cyangwa ikindi gihugu icyo ari cyo cyose, cyo gukonjesha [kuryamisha, guhagarika] intambara hashingiwe ku byo bushaka bwo ubwabwo”.

Yongeyeho ati: “Gusaba ko habaho agahenge katarimo gukura abasirikare b'Uburusiya ku butaka bwa Ukraine urebye byaba ari ugushyigikira icyemezo cy'igitero cy'Uburusiya”.

Gahunda y'Ubushinwa ntabwo yavuze byeruye ko Uburusiya bugomba gukura abasirikare babwo muri Ukraine – ibyo Ukraine yavuze ko ari cyo kintu cya ngombwa mbere yuko habaho ibiganiro ibyo ari byo byose.

Ahubwo, gahunda y'Ubushinwa ivuga ku “kubaha ubusugire bw'ibihugu byose”, ikongeraho ko “impande zose zigomba kuguma zishyira mu gaciro ndetse zikagira kwigengesera” hamwe no “guhosha ibintu gahoro gahoro”.

Iyo gahunda y'Ubushinwa yanamaganye ikoreshwa ry'”ibihano by'uruhande rumwe” – icyabonywe nk'uburyo buteruye bwo kunenga inshuti za Ukraine zo mu burengerazuba.

Ku wa mbere, itsinda rya muzika rya gisirikare ryahaye ikaze Perezida Xi i Moscow. Perezida Putin yashimye Ubushinwa kubera “gukurikiza ihame ry'ubutabera” no guharanira ko habaho “umutekano udacagase [utagabanyije] kuri buri gihugu”.

Ku ruhande rwe, Perezida Xi yabwiye Perezida Putin ati: “Ku butegetsi bukomeye bwawe, Uburusiya bwateye intambwe ikomeye mu iterambere mu burumbuke bwabwo. Mfite icyizere ko Abarusiya bazakomeza kugushyigikira cyane”.

Mbere yuko Xi ahagera, Putin yanditse mu kinyamakuru cya leta y'Ubushinwa People's Daily ko ibi bihugu byombi bitazacibwa intege na gahunda y'Amerika “irimo ubushotoranyi”.

Mu ruhame, abategetsi bo muri Ukraine bakomeje gushimangira icyo bahuriyeho n'Ubushinwa – kubaha ubusugire no kutavogera ubutaka bw'ikindi gihugu.

Ariko ahiherereye, bamaze igihe baca hirya no hino bashaka ko habaho inama – cyangwa ikiganiro cyo kuri telefone – hagati ya Perezida wa Ukraine Volodymyr Zelensky na Perezida Xi.

Ubwoba buri i Kyiv ni uko ubufasha bw'Ubushinwa ku Burusiya – muri iki gihe ni ubufasha bushingiye ku ikoranabuhanga n'ubucuruzi – bushobora guhinduka ubwa gisirikare, bikaba byashoboka ko bubamo no guha Uburusiya ibisasu bya rutura.

Oleksiy Danilov, umunyamabanga w'akanama k'umutekano w'igihugu n'ubwirinzi ka Ukraine, yagize ati: “Niba Ubushinwa bufashe icyemezo cyo ku mugaragaro cyo guha intwaro Uburusiya, mu bikorwa buzaba burimo kugira uruhare mu ntambara ku ruhande rw'umushotoranyi”.

Uburusiya ni ahantu h'ingenzi Ubushinwa bukura ibitoro byo gukoresha mu iterambere ry'ubukungu bugari cyane bwabwo, ndetse bubonwa nk'umufatanyabikorwa w'Ubushinwa mu guhangana n'Amerika.

Iyi nama ya Putin na Xi ibaye hashize iminsi urukiko mpuzamahanga mpanabyaha (ICC/CPI) rusohoye urupapuro rwo guta muri yombi Perezida w'Uburusiya ku birego by'ibyaha byo mu ntambara.

Ibi bivuze ko Putin ashobora gutabwa muri yombi mu bihugu 123 – nubwo Ubushinwa n'Uburusiya bitari kuri urwo rutonde rw'ibihugu.

Minisitiri w'ububanyi n'amahanga w'Amerika Blinken yavuze ko gukorera uruzinduko i Moscow nyuma gato cyane yuko ICC itangaje urwo rupapuro rwo guta muri yombi Putin, byumvikanisha ko Ubushinwa bwumva “nta nshingano bufite yo kuryoza Kremlin [ibiro bya Perezida w'Uburusiya]” ibikorwa by'ubugome byayo byo muri Ukraine.

Kuva mu kwezi kwa kabiri mu mwaka ushize, abategetsi bo mu burengerazuba (Uburayi n'Amerika) bakomeje kugerageza gushyira Uburusiya mu kato, nyuma y'igitero gisesuye bwagabye kuri Ukraine.

Ariko ntibashoboye gushyiraho kuvuga rumwe ku rwego rw'isi. Ubushinwa, Ubuhinde n'ibihugu byinshi byo muri Afurika bikomeje kwigononwa (kudashaka) kwamagana Putin.

BBC

Source : https://umuryango.rw/amakuru/mu-mahanga/politiki/article/perezida-putin-yasezeranyije-mugenzi-we-xi-ikintu-gikomeye

Yaherukaga mu ishuri mu 1983 ubwo yahagaritse kwiga ari mu ishuri ribanza, umwaka ushize, nyuma y'imyaka 39, yafashe icyemezo kidasanzwe, yambara ikabutura n'ishati bya Khaki asubira ku ishuri.

Jean Marie Vianney Rusengamihigo w'imyaka 54, ubu yigana n'abana wagereranya n'abuzukuru be, ari mu mwaka wa gatanu ku ishuri ribanza rya Shangi mu karere ka Nyamasheke mu burengerazuba bw'u Rwanda.

Mukigaaniro yagitanye na BBC dukesha iyi nkuru yagize ati: 'Bambona nk'umunyeshuri nka bo, amasomo tuyatwara kimwe, iyo turi mu ishuri dusubiza kimwe.'

Mu karuhuko, usanga abanyeshuri bashaka kumwegera ngo bamukureho ubundi bumenyi afite nk'umugabo mukuru.

Nyuma y'imyaka hafi 40 ibintu byinshi byarahindutse mu burezi bw'u Rwanda, ku gihe cye byose babyigaga mu Kinyarwanda, ubu barabyiga mu Cyongereza.

Rusengamihigo agerageza gukurikira, ndetse avuga ko atsinda bigereranyije, ariko ngo hari ibikimugora.

Ati: 'Nari nzi ko twiga nka kumwe kwa kera, ariko isomo nka Social n'iyo mbonye amanota sinjya ndenza 10 cyangwa 12 kuri 40, ntegereje kubona igitabo cya Social cy'uwa gatanu kugira ngo nunguke ubumenyi muri yo.'

Mwalimu we Pascal Ruganintwali avuga ko Rusengamihigo agaragaza umuhate mu ishuri ariko ko kwiga akuze cyane bitoroha.

Ruganitwali ati: 'Usanga akurikiye mu ishuri kandi afite n'amatsiko, ariko nk'umuntu wize igihe kirekire mu Kinyarwanda akamara ikindi gihe kirekire atagana ishuri bitewe nuko ubu turimo kwigisha mu Cyongereza, usanga rimwe na rimwe ibyo tumwigisha ashobora kuba yabivanga, nk'imibare urugero turi kwiga ingero z'uburebure yajya kwandika 7 meters agahita yandika metero zirindwi.'

U Rwanda, igihugu cy'abaturage miliyoni 13 [2022], abize amashuri abanza ni 53%, abarangije ayisumbuye ni 6% naho abize kaminuza ni 3%, nk'uko ibarura rusange riheruka kubigaragaza.

Hari impamvu Rusengamihigo yashatse kuva mu mubare w'abatarize, kandi afite intego yo gukomeza akagera kure.

Ati: 'Nabonye imikorere ndimo nta bumenyi mfite, nkagira ngo wenda ndahombeshwa na Covid kuko nari umucuruzi, maze guhomba rero ndavuga nti 'reka nisubirire ku ishuri kuko imirimo nakoraga ntayo ngifite'.

'Naravuze nti 'reka nze nshake ubumenyi bushobora kumfasha mu bikorwa byanjye', kuko ndi umugabo ufite ibikorwa birimo n'amashyamba, nkavuga nti 'rero ndamutse nagurishije ngasubira ku isoko ry'ubucuruzi nagombye kuba nzi imibare'.'

Ku ishuri ntibiga ubumenyi gusa, ahubwo banatozwa imyifatire ikwiriye.

Nubwo Rusengamihigo ari umuntu mukuru ntibyamubujije guhindurwa n'ishuri ugereranyije na mbere atiga, nk'uko umugore we Tamari Nyirasafari yabibwiye BBC.

Ati: '[Kuba yiga] Biranezeza cyane nubwo urugo rundemerera rukandushya, njye natangajwe n'uko kuva ndi umugeni atigeze afata umwenda wanjye ngo awumese, nubwo isabune yaba ihari, ariko ubu hari igihe iyo ntahari nsanga yameshe, agashyira inkono ku ziko, akamenya amatungo, nkumva ndatunguwe.

'Naho ubundi yamaraga umwaka iyo ngiyo akawurangiriza iyo mu kabari.'

Rusengamihigo avuga ubuzima bwe yabweguriye ishuri ndetse ko intego ye ari ukwiga kugeza arangije Kaminuza.

Source : https://umuryango.rw/ubuzima-115/article/ibyo-wamenya-ku-mugabo-w-imyaka-54-wigana-n-abuzukuru-be

Perezida wa Sénégal yahakanye ko byaba binyuranyije n'itegekonshinga mu gihe yaba yiyamamarije manda ya gatatu itavugwaho rumwe.

Ayo magambo ya Macky Sall, yavugiye mu kiganiro yagiranye n'ikinyamakuru L'Express cyo mu Bufaransa, ashobora kwenyegeza ubushyamirane mu rubuga rwa politiki rwa Sénégal rusanzwe rurimo impagarara.

Mu 2016 itegekonshinga rya Sénégal ryaravuguruwe mu rwego rwo kugabanya igihe cya manda ya perezida, kiva ku myaka irindwi gishyirwa kuri itanu.

Rivuga ko nta muntu n'umwe ushobora gutegeka igihe kirenze manda ebyiri zikurikiranye, ibyo abatavuga rumwe n'ubutegetsi bavuga ko bisobanutse neza ko Sall atemerewe kwiyamamaza mu matora ya perezida yo mu mwaka utaha.

Macky Sall, w'imyaka 61, asanzwe ari we ukuriye umuryango w'Ubumwe bw'Afurika, umwanya usimburanwaho buri mwaka n'abakuru b'ibihugu by'Afurika.

Abanenga Sall bashinja leta ye gukoresha inkiko mu kwigizayo umunyapolitiki utavuga rumwe na leta, Ousmane Sonko.

Kuri ubu, Sonko aregwa mu manza ebyiri zishobora gutuma atemererwa kwiyamamaza mu matora.

BBC

Source : https://umuryango.rw/amakuru/mu-mahanga/politiki/article/perezida-wa-senegal-yavuze-amagambo-ashobora-guteza-akavuyo-mu-gihugu-cye