Author: webrwanda

Kuri uyu wa Gatatu ni bwo Perezida Ruto yasoje uruzinduko rw'iminsi ibiri mu Rwanda, rwaranzwe n'ibihe byiza birimo amasezerano 10 u Rwanda na Kenya byasinyanye, hiyongeraho n'umwanya yagize wo kunywa icyayi i Nyamata mu Bugesera.

Mbere yo gusubira muri Kenya, Perezida Ruto yahuye n'abaturage be bari mu Rwanda, dore ko ari na benshi kuko haba ishoramari rikomeye rikomoka muri Kenya nka BPR Bank, Equity Bank, I&M Bank, Fusion Capital, Serena Hotels, Mount Kenya University, East African (Rwanda Today) n'ibindi byinshi.

Minisiiri w'Ububanyi n'Amahanga wa Kenya, Dr. Alfred Mutua, yavuze ko abaturage ba Kenya bari mu mahanga (diaspora), bagomba kwiyumva mu gihugu cyabo kandi ko kibazirikana.

Yavuze ko hagenda hakorwa impinduka zigamije kuborohereza ubuzima, za ambasade zikababa hafi zikabakemurira ibibazo, ku buryo “igihe muri hanze y'igihugu mutaba muri mwenyine”.

Yakomeje ati “Twifuza ko mukora ibikorwa bibyara inyungu, mugacuruza, mugashora imari, atari mu bihugu murimo gusa, ahubwo munashore imari muri Kenya. Iyo tuje hano tukavuga ko dukeneye abashoramari baturuka mu mahanga, tunifuza ko Abanyakenya bari mu mahanga bashora imari no mui Kenya.”

“Mwishyire hamwe, dufatanye, mushore imari mu rugo, muzane ibyo bitekerezo, mukorere amafaranga hano, mushore muri Kenya, muhe akazi abanyakenya, maze twese dutere imbere.”

Perezida William Ruto yabwiye abaturage ba Kenya ko ubuyobozi burimo gukora ibishoboka byose, ku buryo serivisi za Leta umuntu azajya akenera ashobora kuzibona atavuye aho ari.

Ni icyemezo yavuze ko kizaba cyashyizwe mu bikorwa 'bitarenze mu mpera z'uyu mwaka,' haba ku bantu bari mu gihugu cyangwa mu mahanga.

Yavuze ko igihugu kidashobora kubona iterambere cyifuza hatifashishijwe ikoranabuhanga uko bikwiye, kuko iyo ibintu byinshi bikorwa abantu bahererekanya amafaranga mu ntoki, haba hari ibyago byinshi bya ruswa.

Yakomeje ati “Ubwo najyaga ku butegetsi mu mezi atandatu ashize twari dufite serivisi 320 zonyine zikoreshwa mu ikoranabuhanga. Ni intego nihaye ko mu yandi mezi atandatu ari imbere, serivisi zose za Leta zizaba zikoreshwa mu ikoranabuhanga, ushobora kuzikoresha utavuye aho uri.”

Perezida Ruto yabwiye abaturage bakomoka muri Kenya bakorera mu Rwanda, ko nibura mu byumweru bibiri biri imbere bazatangiza gahunda bise 'Boma Yangu', izafasha abantu kugura inzu ziciriritse muri Kenya, nubwo waba uri mu Rwanda, kandi ukayigura mu gice icyo ari cyo cyose cy'igihugu.

Yakomeje ati “Indi nkuru nziza ni uko hari ubutaka bwagenewe iyi gahunda, urebye ikintu gituma gutunga inzu muri Kenya bigorana, ni igiciro cy'ubutaka. Icyemezo twafashe ni uko tuzatanga ubutaka ku buntu, bikazatuma inzu yaguraga miliyoni 3-4 z'amashillingi (hafi miliyoni 25Frw), ishobora kuvurwa miliyoni 1- 1.5 Ksh.”

Yavuze ko bamaze kubona ubutaka mu Ntara 41, aho ubu busaga hegitari 1600 mu mijyi minini, ubwinshi bukaba busanzwe ari ubwa Leta.

Yavuze ko Leta irimo kureba uburyo abantu babasha kubona inguzanyo zatuma babasha kugura izi nzu, bidasabye ko umuntu aba afite amafaranga yose icyarimwe.

Perezida Ruto kandi yavuze ko hari ubwo abantu bari mu mahanga boherereza amafaranga bene wabo ngo bubake inzu, bakajya babaha amafoto y'inzu z'abandi, bazagera mu gihugu bagasanga izo nzu nta zihari.

Ati 'Dushaka kubakemurira iki kibazo. Ntabwo mukeneye kugirana ibibazo n'inshuti n'umuryango, mukwiye kwizera Guverinoma ya Kenya ikabubakira inzu, kandi ni uburyo bwizewe bwo kugira umutungo mu gihugu. Ntabwo ndimo kubaca intege ngo ntimugire imitungo mu Rwanda.'

Perezida Ruto yanakomoje ku nama aheruka kugirana n'ibigo bikomeye byo muri Leta Zunze Ubumwe za Amerika birimo Amazon, Google, MasterCard n'ibindi, aho barimo kugerageza kugira Kenya igicumbi cy'ikoranabuhanga, ariko hakaba n'ahantu hashorwa imari nyinshi n'abanyamahanga.

Ati 'Mukwiye kumenya ko, yego dushobora guteza imbere igihugu cyacu dukoresheje imisoro yacu, yego dushobora kongeraho amafaranga tuguza mu nzego zitandukanye ariko tugomba kuba mu mwanya utuma mu rwego rw'abikorera, dukurura ishoramari ryinshi ry'abanyamahanga.'

'Dushobora gukoresha ayo mafaranga y'abikorera mu guteza imbere inganda zacu, mu kuzana ibigo byongera agaciro mu gihugu cyacu, ishoramari ry'abikorera n'amahirwe yo gukorera mu nganda ibintu bitandukanye mu gihugu cyacu.'

Ni amahirwe yavuze ko azatanga imirimo muri Kenya, aho nk'uruganda rw'inkingo rwa Moderna rwamaze gusinya amasezerano yo gushora miliyoni $500 muri iki gihugu.

Yakomeje ati 'Muri rusange, ku wa Kane w'icyumweru gishize twasinye amasezerano n'ibigo bigiye kutuzanira imirimo hafi 100,000 muri Kenya.'

Ni ibikorwa ngo bizaba bishingiye ku mafaranga y'aba bashoramari, aho kuba imisoro y'abaturage cyangwa inguzayo leta yafashe.

Yakomeje ati 'Kugira ngo tubashe kubigeraho, turabakeneye muri diaspora kugira ngo mukomeze kuba ba ambasaderi beza ba Kenya, kugira ngo umuntu wese, aho ari ho hose ku isi, abashe kumenya ngo niba uyu mugabo cyangwa umugore aturuka muri Kenya, ukaba ubona ibintu akora biri ku rwego rwo hejuru, Kenya igomba kuba ari ahantu heza ho gushora imari.'

'Reka mbisubiremo, iyo mukora imirimo yanyu yose, mugomba kumenya ko mutabyikorera ubwanyu gusa cyangwa imiryango yanyu, muba mubikorera n'igihugu.'

Perezida Ruto yanavuze ko uretse kuba akeneye ko igihugu gikora cyane kikabona n'imisoro myinshi, na yo igomba gukoreshwa neza, ntiyibwe cyangwa ngo ikoreshwe nabi.

Perezida Ruto yagiranye ibiganiro birambuye n’Abanyakenya baba mu Rwanda, muri Kigali Serena Hotel

Umwana yegereye Perezida Ruto wahuraga n’Abanyakenya baba mu Rwanda, baraganira

Minisitiri w'Ububanyi n'Amahanga wa Kenya, Dr. Alfred Mutua, yavuze ko abaturage ba Kenya bari muri diaspora bagomba kwiyumva mu gihugu cyabo kandi ko kibazirikana

Abanyakenya bafite ishoramari ryinshi mu Rwanda haba mu mabanki, ubwishingizi, amahoteli, itangazamakuru n’ibindi

Perezida Ruto yasabye abashoramari bo muri Kenya bakorera mu Rwanda, kongera ishoramari iwabo

Abanyakenya bakorera ubucuruzi mu Rwanda bamaze kuba benshi

Abaturage ba Kenya beretswe ko hari ishoramari ribategereje mu gihugu cyabo

Perezida Ruto yagiranye ibihe byiza n’Abanyakenya baba mu Rwanda

Perezida Kagame yaherekeje Ruto wasoje uruzinduko rwe rwa mbere mu Rwanda nka Perezida wa Kenya

Abayobozi bakuru b’inzego z’umutekano basezera kuri Perezida Ruto. Aha yaherezaga umukono Umunyamabanga Mukuru w’Urwego rushinzwe Iperereza n’Umutekano w’Igihugu, Maj Gen Joseph Nzabamwita, naho Umuyobozi Mukuru wa Polisi y’u Rwanda DCG Felix Namuhoranye n’Umugaba Mukuru w’Ingabo z’u Rwanda, Gen Jean Bosco Kazura, barategereje

Perezida Kagame yitegereza indege ya Perezida William Ruto, igiye guhaguruka i Kigali

Uyu ni umwe mu bafotozi bafite ubunararibonye mu gufotora intambara n'amakimbirane hirya no hino ku Isi, kuko yabikoze mu ntambara zirimo iyo muri Somalia, Iraq, Syria, Yemen n'ahandi.

Uyu mugabo wari umusore ubwo Jenoside yakorerwa Abatutsi yabaga, avuka muri Leta ya Iowa muri Leta Zunze Ubumwe za Amerika. Ni ho yakuriye, yize n'amashuri ye kugeza ubwo yajyaga muri Kaminuza, agahitamo kwiga amasomo aha abanyeshuri kujya kwihugura mu zindi kaminuza mpuzamahanga bafitanye ubufatanye.

Iyo gahunda yo koherezwa mu mahanga ni yo yamugejeje muri Tanzania mu gihe cy'umwaka n'igice, yimenyereza byinshi ku rurimi n'umuco wa Tanzania mu gihe yahamaze.

Mu buhamya yahaye National Geographic, David Guttenfelder yavuze ko ubwo Jenoside yakorewe Abatutsi mu Rwanda yatangiraga, yari yarasubiye iwabo ari umunyamakuru ufotora kuri kimwe mu binyamakuru byo muri Leta y'iwabo.

Ibibera mu Rwanda yabikurikiranye kuri televiziyo z'iwabo, aza kwigira inama yo gushaka amafaranga akaza kwirebera ibiri kuba, agafata amafoto ari nayo yaje kumufasha kumenyekana ku rwego mpuzamahanga.

Ati 'Nasezeye akazi, mpakira buri kimwe mu byo nari mfite. Icyo gihe ubanza nari mfite nk'amadolari ari hagati ya 5000 na 3000. Camera zanjye n'ibindi nabishyize mu gikapu ku mugongo, ntangira gukuruza inda mfotora ngo nimenyereze uko nzabigenza ningerayo, nkafotora imizigo yanjye iri ku mugongo.'

David Guttenfelder yafashe indege umugeza i Nairobi muri Kenya, akomereza i Bujumbura ari naho imodoka z'Ishami ry'Umuryango w'Abibumbye ryita ku Mpunzi (HCR) zamukuye zimugeza i Kigali.

Akigera mu Rwanda, David Guttenfelder avuga ko yabonye ibintu amaso atari yarigeze abona .

Ati 'Ntabwo nari narigeze mbona umuntu wapfuye. Mvuye mu nkambi z'impunzi, ikindi kintu nagiye kureba mu Rwanda ni gereza ya Kigali yafungirwagamo abakekwaho uruhare muri Jenoside. Nari mbizi ko nta wundi mufotozi wahageze, ndagenda ndakomanga umuhungu umwe arakingura. Yahise ambwira ko nindamuka ninjiye, nta muntu uzankingurira ngo nsohoke.'

'Narabyemeye ndinjira, mara iminsi itatu mfotora gereza, imibereho yaho yari iteye ubwoba. Abantu bari benshi, abantu baryama aho babonye hose.'

David Guttenfelder wageze mu Rwanda Jenoside irangira, yavuze ko avuye muri gereza yakomereje mu nsengero zari zariciwemo Abatutsi muri Jenoside ziri mu karere ka Bugesera, ari zo Ntarama na Nyamata.

Imibiri myinshi y'abishwe yari itarashyingurwa mu cyubahiro. Ni zimwe mu nsengero zabereyemo ubwicanyi ndengakamere, aho abatutsi bari bazihungiyemo bishwe bunyamaswa n'Interahamwe ndetse n'ingabo za Leta.

Ati ' Mu buzima bwanjye nta bindi bintu bibi nk'ibyo nari narigeze mbona, nta n'ubwo mba nshaka kubigarukaho. Ninjiye mu rusengero rumwe, rwari rwuzuye abishwe muri Jenoside.'

Yakomeje agira ati 'Nagiye mu Rwanda ntekereza ko nzahamara ibyumweru bike amadolari 3000 najyanye yashira ngataha, ariko byarangiye bibaye intangiriro yo gukora akazi nk'ako ubuzima bwanjye bwose. Hafi imyaka y'ubusore bwanjye nayimaze nkorera muri Afurika, mfotora intambara gusa.'

David Guttenfelder muri Afurika yafotoye mu Rwanda, mu Burundi, Somalia, Sierra Leone, Liberia, Zaire n'ahandi.

Hamwe mu hari hashyinguye imibiri y’abazize Jenoside yakorewe Abatutsi mu 1994

Ifoto ya Guttenfelder ya bamwe mu bahunze ubwo Jenoside yakorewe Abatutsi yabaga mu Rwanda

Guttenfelder yavuze ko ubugome yabonye muri Jenoside yakorewe Abatutsi, bwari buteye ubwoba

Ibi byagarutsweho n'Umunyamabanga Uhoraho muri iyi Minisiteri, Munezero Clarisse, ubwo yaganiraga n'Itangazamakuru mu kiganiro cyibanze ku kurebera hamwe imyiteguro yo kwibuka ku nshuro ya 29 Jenoside yakorewe Abatutsi kuri uyu wa 5 Mata 2023.

Munezero yavuze ko urugendo rwo kwandika dosiye z'inkiko gacaca mu buryo bw'ikoranabuhanga rugeze ahashimishije cyane ko icyiciro cy'ibanze cyamaze kurangira.

Ati 'Ni umushinga watangiye muri 2015, kubera ko inyandiko za gacaca twari tuzifite ari nyinshi zibitse mu makarito ariko tugira ikibazo ko zishobora kwangirika. Navuga ko icyiciro cya mbere cyari kigamije kuba twazandika mu buryo bw'ikoranabuhanga cyarangiye.'

'Inyandiko zose zijyanye n'inkiko gacaca ubu ngubu turazifite yaba mu buryo bw'impapuro ndetse no mu ikoranabuhanga ku buryo nta kibazo dushobora kugira zibitse neza.'

Yagaragaje ko icyiciro kigezweho kuri ubu ari uguhuza amakuru y'izi nyandiko zamaze kwandikwa n'abarezwe muri gacaca.

Ati 'Ubu ibyo turi gukora ni ugufata za nyandiko tukazihuza n'abarezwe.Turashaka gufata buri muntu warezwe tugahuza n'inyandiko zijyanye n'urubanza rwe.'

Yavuze ko Minisiteri y'Ubumwe bw'Abanyarwanda n'inshingano Mboneragihugu iri kubaka uburyo buzafasha abashaka kumenya amakuru ku mikorere y'Inkiko Gacaca cyangwa abashakashatsi.

Ati 'Turateganya ko tuzubaka uburyo umuntu ashobora kuba yabigeraho. Yaba abashaka kumenya amakuru y'uko inkiko gacaca zaciwe no kuba bazikoresha mu bushakashatsi ku buryo ushobora kwandikamo izina ry'umuntu amakuru arebana na we yose agahita aza.'

Iki cyiciro kandi ngo kigeze ahantu hashimishije kuko hari dosiye zimwe zamaze guhuzwa n'abaregwa nubwo ingengo y'imari yagiye ikoma mu nkokora imirimo y'ibi bikorwa.

Ati 'Aha na ho tugeze ku rwego rwiza kuko hari umubare w'inyandiko zamaze guhuzwa n'abarezwe gusa twagize ikibazo cy'ingengo y'imari itari nini cyane ku buryo twabirangiza ariko duteganya ko mu mwaka umwe cyangwa ibiri izaba yarangiye. Ku buryo umuntu ashobora kuzajya akenera ayo makuru ashoibora kuyifashisha.'

Ubusanzwe izi nyandiko zinyura mu byiciro byinshi ngo zibikwe mu buryo bw'ikoranabuhanga, birimo kubanza kuzitandukanya ku buryo iza buri karere zijya ukwazo, umurenge bikaba uko, zigahabwa ibimenyetso bizitandukanya; ziranagororwa zigafotorwa.

Uretse impapuro, hari n'amakaye Manini yandikwagamo gahunda n'ibindi bikorwa by'Inyangamugayo zaburanishaga imanza za gacaca, nayo agomba kubikwa.

Ayo makayi abarirwa mu bihumbi 52. Hari kandi 'Cassettes' 8000 zafatiweho amashusho mu gihe cy'Inkiko Gacaca zigomba kubikwa neza.

Aya makuru abitswe mu buryo bw'ikoranabuhanga ngo ashobora kumara nibura imyaka 500.

Nk'abashaka gusubirishamo imanza z'imitungo bisaba ko begera Minisiteri ikabaha kopi y'izo bifuza.

Inkiko Gacaca zaciye imanza zigera kuri milioni ebyiri mu gihe cy'imyaka 10 zamazeho, zikoresha ingengo y'imari igera kuri milioni 52 z'amadolari ya Amerika.

Amadosiye y’Inkiko Gacaca akomeje kubikwa hakoreshejwe ikoranabuhanga hagamijwe kwirinda ko hari ayakwangirika

Umunyamabanga Uhoraho muri MINUBUMWE, Munezero Clarisse, yagaragaje ko gahunda yo kubika amadosiye y’Inkiko Gacaca mu buryo bw’ikoranabuhanga igeze ahashimishije

Liliane wamaye nka Lilly ku mbuga nkoranyambaga urukundo rugeze kure n’umunyezamu wa Police FC, Kwizera Janvier uzwi nka Rihungu aho banitegura kwibaruka.

Amakuru avuga ko aba bombi basigaye banabana mu nzu imwe aho ndetse uyu mukobwa atwitiye uyu munyezamu wa mbere w’ikipe ya Police FC.

Urukundo rw’aba bombi rwatangiye kuvugwa mu ntangiriro z’uyu mwaka wa 2023 aho batangiraga gusangiza ababakurikira amashusho bagiranye ibihe byiza.

Ndetse uyu munyezamu aherutse kubyemeza abinyujije ku rukuta rwe rwa Instagram ahajya ubutumwa bumara amasaha 24 aho yavuze ko Liliane ari umugore we.

Mu Kwakira 2022 uyu mukobwa yashyize hanze amashusho yishimanye na Karera Hassan ku isabukuru ye y’amavuko ndetse ayo mashusho agaherekezwa n’amagambo agira ati “umuhungu wagize isabukuru, ntidushaka abadutesha umutwe.”

Icyo gihe byavuzwe ko ari mu rukundo n’uyu mukobwa aho yanashinjwe gusenya urugo rwa Karera Hassan na Umutoni Diane babanaga muri Finland.

Nyuma y’ukwezi kumwe, mu Gushyingo 2022 Lilly yongeye kurikoroza ashyira hanze amashusho ya Rwatubyaye Abdul barimo basomana maze aherekezwa n’amagambo agira ati “I miss my baby”.

Nyuma yo kuzenguruka muri abo bakinnyi bose, Lilly byaje kurangira yegukanywe n’umunyezamu wa Police FC, Kwizera Janvier.

Urukundo rwa bo rwafashe indi ntera

Lilly biravugwa ko anatwitiye Rihungu

Yemeje ko Lilly ari umugore we

Urukiko rwo muri Nigeria rwategetse ko isake ibagwa ku wa Gatanu, nyuma y’uko abaturanyi batanze ikirego ko ibasakuriza, nk’uko amakuru yo mu bitangazamakuru byaho abivuga.

Urukiko rwo mu mujyi wa Kano mu Majyaruguru y’igihugu rwatangaje ko iyo sake ibangamiye abaturanye na yo kubera kubika kwayo kwa buri kanya, nk’uko bitangazwa n’urubuga rw’amakuru Premium Times. Abaturanyi babiri bayireze bavuze ko bibabuza gusinzira.

Yusuf Muhammed, umwe muri abo baturanyi bayo, yabwiye urukiko ko kubika ubutaruhuka kw’iyo sake ari uguhonyora uburenganzira bwe bwo gusinzira mu ituze.

Isyaku Shu'aibu yabwiye urukiko ko yaguze iyo sake ayiteganyiriza kuyirya ku wa Gatanu Mutagatifu, asaba ko urukiko rumwihanganira kugeza kuri uwo munsi mutagatifu ku bakristu akazaba ari bwo ayibagira umuryango we.

Umucamanza Halima Wali ku wa kabiri yemeye ubwo busabe, ariko amwihanangiriza ko agomba kuyibuza kugendagenda muri ako gace no kubangamira abahatuye, nk’uko bitangazwa n’urubuga rw’amakuru Daily Trust.

Nyiri iyo sake yanategetswe kuzayibaga ku wa Gatanu nk’uko yabisezeranyije, bitaba ibyo agahanwa.