Author: webrwanda

Dore ibyo ukwiye kwirinda mu rwego rwo kurinda impyiko zawe ubuzima bwawe bukarushaho kuba bwiza.

1.Kutanywa amazi ahagije

Amazi ni ingenzi cyane ku buzima. Impyiko zikenera amazi menshi cyane kugira ngo zibashe gukora neza.

Mu gihe utanywa amazi ahagije, bishobora gutera uburozi (toxins) bwinshi kwirundira mu maraso, ahanini bitewe nuko nta mazi ahagije agera ku mpyiko, ngo zibashe kubusohora.

2.Kurya umunyu mwinshi

Nubwo umubiri ukenera sodium (umunyu) kugira ngo ukore neza, gusa kurya umunyu mwinshi byongera ibyago byo kwangirika kw'impyiko, bikanazamura umuvuduko w'amaraso (high blood pressure).

Ku munsi ntugomba kurenza garama 5 z'umunyu!

Ibi bijyana n'isukari; abantu bafata isukari nyinshi, byongera ibyago cyane byo kugira proteyine mu nkari.

Proteyine mu nkari ni ikimenyetso cy'uko impyiko zawe zangiritse, gusa iyo ubimenye hakiri kare, ibi bishobora kuvurwa.

3.Gufunga inkari kenshi

Gufunga inkari biremerera cyane impyiko bikanazangiza
Kuzifunga kenshi buri gihe byongera ibyago byo kuba wazana utubuye mu mpyiko (kidney stones) cg se zikangirika burundu (kidney failure).

Ni byiza ko igihe ushakiye kwihagarika ukwiye guhita ujyayo udatinze.

Soma hano ingaruka zo gufunga inkari Ese hari ingaruka gufunga inkari bigira ku mubiri?

4.Kunywa inzoga bikabije

Inzoga nubwo zemewe, kandi ushobora kuzisanga ahantu hose. Ariko burya ni uburozi bukomeye ku mwijima n'impyiko, igihe uzinyweye ku rugero rwo hejuru.

Kuba wanywa agacupa kamwe cg ikirahuri kimwe mu gihe runaka, ntacyo byangiza, ariko kunywa nyinshi cyane, uba wangiza bikomeye impyiko zawe.

Soma birambuye hano ibyo kunywa inzoga nyinshi byangiza ku mubiri Ibintu 5 kunywa inzoga cyane bihindura ku mikorere y'umubiri

5.Kudasinzira bihagije

Gusinzira neza bihagije ntibifasha umubiri wawe gusa kuruhuka, ahubwo birinda n'impyiko kwangirika.

Agahu kazo kiyuburura ari uko wasinziriye neza, mu gihe udasinzira bihagije bishobora kwangiza izi ngingo.

Soma hano ingaruka mbi zo gusinzira igihe gito kenshi Ingaruka mbi ziterwa no gusinzira igihe gito kenshi nijoro

6.Kubura imyunyungugu na vitamins

Ifunguro rikungahaye ku mbuto n'imboga ni ingenzi cyane ku mikorere myiza y'impyiko n'umubiri wose muri rusange.

Manyesiyumu na vitamin B6 ni ingenzi cyane mu kugabanya ibyago byo kugira utubuye mu mpyiko, dushobora guterwa no kubura iyi vitamin n'imyunyungugu.

7.Kurya proteyine nyinshi zikomoka ku matungo

Kurya ibibonekamo proteyine nyinshi, nk'inyama z'umutuku byongerera cyane akazi impyiko.

Uko izi proteyine ziyongera bivuze ko impyiko zisabwa gukora akazi kenshi kandi gakomeye, bikaba byazitera kwangirika burundu cg kudakora neza.

Source : https://umuryango.rw/ubuzima-115/article/dore-ibyo-ukwiye-kwirinda-kuko-bishobora-kwangiza-impyiko-zawe-mu-buryo

Urukiko rwo muri Nigeria rwategetse ko isake ibagwa ku wa gatanu, nyuma yuko abaturanyi batanze ikirego ko ibasakuriza, nkuko amakuru yo mu bitangazamakuru byaho abivuga.

Urukiko rwo mu mujyi wa Kano mu majyaruguru y'igihugu rwatangaje ko iyo sake ibangamiye abaturanye na yo kubera kubika kwayo kwa buri kanya, nkuko bitangazwa n'urubuga rw'amakuru Premium Times.

Abaturanyi babiri bavuze ko bibabuza gusinzira.

Yusuf Muhammed, umwe muri abo baturanyi bayo, yabwiye urukiko ko kubika ubutaruhuka kw'iyo sake ari uguhonyora uburenganzira bwe bwo gusinzira mu ituze.

Isyaku Shu'aibu yabwiye urukiko ko yaguze iyo sake ayiteganyiriza kuyirya ku wa Gatanu Mutagatifu, asaba ko urukiko rumwihanganira kugeza kuri uwo munsi mutagatifu ku bakristu akazaba ari bwo ayibagira umuryango we.

Umucamanza Halima Wali ku wa kabiri yemeye ubwo busabe, ariko amwihanangiriza ko agomba kuyibuza kugendagenda muri ako gace no kubangamira abahatuye, nkuko bitangazwa n'urubuga rw'amakuru Daily Trust.

Nyir'iyo sake yanategetswe kuzayibaga ku wa gatanu nkuko yabisezeranyije, bitaba ibyo agahanwa.

BBC

Source : https://umuryango.rw/ubuzima-115/udushya/article/isake-yakatiwe-urwo-kubagwa-nyuma-yo-kuregwa-mu-rukiko-ishinjwa-urusaku

Ibihugu by'u Rwanda na Kenya, byiyemeje gutahiriza umugozi umwe mu guteza imbere ubuhinzi n'ubworozi binyuze mu gusangira ubumenyi n'ubunararibonye muri urwo rwego.

Ibi byagarutsweho kuri uyu wa Gatatu ubwo Perezida wa Kenya William Ruto ari kumwe na mugenzi we w'u Rwanda, Paul Kagame basuraga Kaminuza yigisha ubuhinzi n'ubworozi yitwa RICA iri mu Karere ka Bugesera.

Ishuri rikuru ry'ubuhinzi n'ubworozi butangiza ibidukikije, Rwanda Institute of Conservation Agriculture, RICA, niryo ryasuwe na Perezida Willian Ruto ari kumwe na mugenzi we w'u Rwanda Paul Kagame.

Iyi Kaminuza mpuzamahanga ifite umwihariko wo kuba ari yo ya mbere muri Afurika yigisha ubumenyi-ngiro mu by'ubuhinzi n'ubworozi bubungabunga ubutaka n'ibidukikije muri rusange.

Mu butumwa yanditse mu gitabo cy'abashyitsi, Perezida William Ruto yashimye iyi Kaminuza ku kazi keza ikora ko kurera urubyiruko rwitezweho kuba umusemburo w'impinduka nziza mu rwego rw'ubuhinzi n'ubworozi.

Minisitiri w'ubuhinzi n'ubworozi, Dr. Musafiri Ildephonse avuga ko ibihugu by'u Rwanda na Kenya byiyemeje gufatanya muri uru rwego ari nayo mpamvu abakuru b'ibihugu byombi basuye iyi Kaminuza.

Abakuru b'ibihugu byombi basobanuriwe amasomo atangwa n'iyi Kaminuza mu mashami arimo ikoranabuhanga mu kuhira imyaka, kongerera agaciro umusaruro w'ibiribwa, kongera umusaruro w'ibihingwa ndetse n'ikoranabuhanga mu bworozi.

Kaminuza ya RICA iri ku butaka bwa hegitari zisaga 1 300 aho igice kinini cyabwo ari imirima ari nayo abanyeshuri bigiraho ndetse Perezida wa Kenya Dr. William Ruto akaba yagerageje gukoresha imwe mu mashini iyi Kaminuza ikoresha mu buhinzi.

Source : https://umuryango.rw/amakuru/mu-rwanda/ubukungu/article/u-rwanda-na-kenya-byiyemeje-gutahiriza-umugozi-umwe-mu-guteza-imbere-ubuhinzi-n

Mu gihugu cya Nigeria haravugwa inkuru itangaje y'isake yakatiwe n'urukiko igihano cyo kubagwa kubera icyaha gitangaje yahamijwe n'umucamanza.

Iyi sake y'uwitwa Isyaku Shu'aibu yarezwe mu rukiko rwo mu mujyi wa Kano n'abaturanyi 2, bayirega ko ibabuza amahwemo kubera urusaku rwayo, bavuga ko ibika buri gihe kandi igasakuza cyane ku buryo inababuza kubona ibitotsi.

Isyaku Shu'aibu we yabwiye urukiko ko iyo sake ateganya kuyirya ku wa Gatanu Mutagatifu, anasaba ko urukiko ko rumwihanganira kugeza kuri uwo munsi akazaba aribwo ayibagira umuryango we.

Gusa ariko umucamanza Halima Wali ku wa kabiri yemeye ubwo busabe, ariko amwihanangiriza ko agomba kuyibuza kugendagenda muri ako gace no kubangamira abahatuye. Ariko Isyaku Shu'aibu yategetswe ko naramuka atabikoze azahanwa.

Source : https://yegob.rw/umucamanza-yakatiye-igihano-cyurupfu-isake-kubera-icyaha-gitangaje-ishinzwa/

Bamwe mu bakorera ubucuruzi mu mujyi wa Muhanga ndetse n'abaturage batwarirwa imyanda na Kompanyi ya Agruni, baranenga imikorere yayo muri serivise ibaha. Bayishinja kwikorera amasezerano no kugena ibiciro uko ibishaka nuko ibyumva nta ruhare abatwarirwa imyanda babifitemo. Ubuyobozi bw'Akarere buri mu bahabwa serivise mbi, buvuga ko bwatanze igihe cyo gukosora ibyanenzwe.

Ibyinubirwa n'abo iyi Kompanyi itwarira imyanda, byagarutsweho na bamwe mu bikorera ndetse n'abaturage baganiriye n' umunyamakuru wa intyoza.com bagaragaza ko usanga ibaha amasezerano ikayahindura uko ishaka n'igihe ishaka nta ruhare abishyuzwa babigizemo.

Umuyobozi w'Akarere ka Muhanga, Kayitare Jacqueline yavuze ko bidakwiye ko abakorana na Agruni bakorerwa amasezano impande ziyavugwamo zitabigizemo uruhare. Yemera ko amakosa yakozwe ndetse ko na Kampanyi iyemera, ko kandi nk'ubuyobozi batanze igihe ntarengwa ngo bikosorwe.

Yagize Ati' Iyi Kompanyi ya Agruni ikwiye kujya itanga amasezerano yayumvikanyeho n'abo itwarira imyanda. Twarabaganirije bemera ko habayemo amakosa. Twabahaye igihe ntarengwa kingana n'amezi atandatu azageza mu kwezi kwa Cyenda (Nzeli 2023) tukazasuzuma uko serivisi baha abaturage ihagaze, babone uko bazahabwa andi masezerano'.

Meya Kayitare, akomeza yibutsa iyi Kompanyi ko mu gihe cyo kongera amafaranga yo gutwara imyanda cyangwa ibishingwe bagomba kuvugana n'abo baha Serivise ndetse bakabikora ubuyobozi bubizi, bityo abantu bakajyanamo ntawuhejwe ngo yimwe uburenganzira bwe.

Muragijimana Theonas, umuturage utuye mu Murenge wa Nyamabuye akaba atwarirwa imyanda yagize Ati' Njyewe bantwarira imyanda ariko nagiye kubona mbona bambwiye ko amafaranga igihumbi kimwe (1000 frw) natangaga batazongera ku cyemera kandi narakoranye nabo amasezerano, nkurikiranye nsanga hari abo bongereye abandi barabareka ukibaza icyabibateye'.

Umuhoza Brigitte, avuga ko bibabaje kubona Kompanyi igena igiciro kitumvikanyweho, igahindura amasezerano uko ibishaka n'igihe ishaka. Yemeza ko gutwara imyanda no gukora isuku iyi Kompanyi itabibashije. Ahamya ko n'igihe biyemeje kuza gutwara imyanda kenshi batacyubahiriza, ugasanga ahubwo imyanda yabaye indi myanda iteza ibibazo.

Umucuruzi utashatse ko amazina ye akoreshwa muri iyi nkuru, yabwiye umunyamakuru ko kuba nta yindi kompanyi ibateye icyugazi bituma aba birara ugasanga barakoresha abantu badafite intege nyazo zabafasha gukora umunsi wose kandi neza. Ahamya kandi ko kuba hari imodoka imwe itwara imyanda y'uyu mujyi idahagije, ko ubuyobozi bukwiye kubirebera hafi kuko ahubwo usanga bashaka gukira batavunitse.

Umukozi wa Kompanyi ya Agrouni mu karere ka Muhanga, Karumuna Augustin yemera ko hari ibitaranogejwe mu bihe bishize ariko ko hari ibirimo gukosorwa ndetse hakaba hari ibikoresho birimo imodoka ndetse n'imashini ikata ibyatsi bigomba kuza kuri uyu wa Kane tariki ya 6 Mata 2023.

Avuga ku mpamvu bazamuye ibiciro byo gutwara imyanda, ahamya ko byatewe n'izamuka ry'ibikomoka kuri Peteroli bikaba byarateye izamuka ry'amafaranga. Yemera ko aribo bigeneye ibiciro ntawe babajije mubo batwarira imyanda.

Perezida w'Urugaga rw'Abikorera mu karere ka Muhanga, Kimonyo Juvenal avuga ko abacuruzi bagiye bagaragaza impungenge z'uko ibiciro bishyirwaho uko baramutse, ariko ku rundi ruhande akavuga ko ibyo bitazasubira, ko naho byakwiyongera iyi kompanyi nayo ifite byinshi igomba kubanza guhindura birimo na Serivisi itanga.

Agrouni, yatangiye gutwara imyanda ahagana mu mwaka wa 2017. Ikoresha abakozi 60 mu mirenge ya Shyogwe na Nyamabuye, aho ifite imodoka 1 nayo bigaragara ko ishaje. Ikora isuku yo gutwara imyanda mu ngo ndetse ikanakora isuku ku nkengero z'imihanda, aho Akarere ubwako bivugwa ko kayishyura Miliyoni 4 ku kwezi.

Akimana Jean de Dieu

Source : https://www.intyoza.com/2023/04/06/muhanga-abatwarirwa-imyanda-na-agruni-binubira-imikorere-yayo-idahwitse/

Ishyirahamwe ry’umupira w’amaguru mu Rwanda (FERWAFA) ryamaze gutangaza igihe umukino wo kwishyura wa 1/8 mu gikombe cy’Amahoro 2023 uzahuza Rayon Sports na Intare FC uzabera.

Hari nyuma y’uko Intare FC yifuzaga ko Rayon Sports iterwa mpaga ariko Komisiyo y’Ubujurire ifata umwanzuro ko uyu mukino ugomba gukinwa.

FERWAFA yatangaje ko uyu mukino wo kwishyura wa 1/8 ugomba gukinwa tariki ya 19 Mata 2023.

Nubwo FERWAFA yatangaje igihe uyu mukino uzabera, Intare FC ntabwo irafata umwanzuro niba izakina uyu mukino cyangwa itazawukina.

Umunyamabanga wa Intare FC, Hagengimana Philbert yabwiye ISIMBI ati “ntabwo umwanzuro wo gukina uyu mukino cyangwa kutawukina turawufata.”

Ni mu gihe iyi kipe yari yatangaje ko yo ititeguye gukina uyu mukino kubera ko Rayon Sports yishe amategeko igomba gusezererwa maze yo igakina na Police FC muri 1/4.

Umukino ubanza wa 1/8 warangiye ikipe ya Rayon Sports itsindiye Inatre FC iwayo ibitego 2-1.

Umukino wa Rayon Sports na Intare FC washyizwe tariki ya 19 Mata

Source : http://isimbi.rw/siporo/article/ferwafa-yatangaje-igihe-umukino-wa-rayon-na-intare-fc-itarafata-umwanzuro-uzabera

Leta ya Tchad ivuga ko yababariye ndetse irekura inyeshyamba 380 zari zarakatiwe gufungwa burundu kubera urupfu rw'uwahoze ari Perezida Idriss Déby.

Maréchal Idriss Déby yiciwe ku rugamba muri Mata (4) mu 2021, aho yari yagiye kurwana n'inyeshyamba zo mu mutwe uzwi nka 'Front pour l'Alternance et la Concorde au Tchad' (FACT) wo muri icyo gihugu.

Muri Werurwe (3) uyu mwaka, inyeshyamba zirenga 400 zakatiwe mu rubanza zaburanishijwemo hamwe ku byaha by'iterabwoba, gushyira abana mu gisirikare no kugaba igitero ku mukuru w'igihugu.

Nyinshi muri izo nyeshyamba zababariwe na Perezida w'inzibacyuho wa Tchad, Jenerali Mahamat Idriss Déby, umuhungu w'uwari Perezida Idriss Déby.

Jenerali Mahamat yagiye ku butegetsi nyuma y'urupfu rwa se.

Izo mbabazi ntizireba umukuru w'inyeshyamba Mahamat Mahdi Ali, ukirimo gushakishwa.

BBC

Source : https://umuryango.rw/amakuru/mu-mahanga/ubutabera/article/tchad-yababariye-inyeshyamba-zahamijwe-kwica-uwari-perezida

Perezida wa Uganda yahamagariye Afurika 'gukiza isi abaryamana bahuje ibitsina' nyuma y'iminsi mike umushinga w'itegeko utavugwaho rumwe wo gufunga abaryamana bahuje ibitsina bose unyuze mu nteko ishinga amategeko ya Uganda.

Perezida Yoweri Museveni azashyira umukono ku mushinga w'iryo tegeko ritangaje, rishyiraho igihano cy'urupfu k'ubutinganyi bukabije', mu mategeko ya Uganda.

Abanya Uganda bazabuzwa 'guteza imbere no gushigikira' abaryamana bahuje ibitsina kimwe no gucura umugambi wo kwishora mu mibonano mpuzabitsina y'abahuje ibitsina nk'uko amategeko abivuga.Imiryango iharanira uburenganzira bwa muntu yamaganye 'bikomeye' iri tegeko.

Ku cyumweru, tariki ya 2 Mata, Museveni yavuze ko kuryamana kw'abahuje ibitsina ari 'iterabwoba rikomeye n'akaga ku kiremwamuntu'.

Perezida yagize ati: 'Afurika igomba gutanga icyerekezo mu gukiza isi uku kwangirika no kugwa,kuko ari akaga gakomeye cyane ku kiremwamuntu.'

'Ubwo abantu badahuje igitsina baretse kwishimirana none ikiremwamuntu cyakororoka gute?'

Umushinga w'itegeko rirwanya abaryamana bahuje ibitsina watowe ku ya 21 Werurwe mu cyumba cy'abadepite cyuzuye mu murwa mukuru Kampala,muri Uganda.

Amnesty International yaje gusaba Museveni guhagarika umushinga w'itegeko rirwanya abaryamana bahuje ibitsina, aburira ko ari 'igitero gikomeye' ku bantu ba LGBTQ.

Source : https://umuryango.rw/amakuru/mu-mahanga/politiki/article/perezida-museveni-yasabye-afurika-gukiza-isi-ubutinganyi

Donald Trump yitabye urukiko nyuma yo guhamagazwa n'icyitwa 'New York grand jury' ku byaha bijyanye n'amafaranga yishyuye mbere gato y'amatora ya Perezida wa Repubulika yo mu 2016.

Trump wifuza kongera kwiyamamaza ku mwanya wa Perezida wa Leta zunze ubumwe za Amerika mu matora yo mu mwaka utaha wa 2024, yaburanye ahakana ibyaha 34 ashinjwa mu rukiko rwa Manhattan, nyuma asubira mu rugo rwe muri Florida kuganira n'abamushyigikiye bari bamutegerereje iwe.

Abashinjacyaha bagaragaje ko Trump akurikiranyweho ibyaha 34 birimo ibyo gukoresha impapuro mpimbano, zakoreshejwe mu rwego rwo kugira ngo haburizwemo amakuru yashoboraga kubuza Trump kuba umukandida ku mwanya wa Perezida wa Repubulika mu 2016, hishyurwa amafaranga atarashoboye gusobanurwa impamvu nyakuri yatumye atangwa. Ayo mafaranga ngo yishyuwe abagore babiri, harimo umukinnyi wa filimi z'urukozasoni, wavuze ko baryamanye, n'umugabo wavugaga ko hari amakuru afite ku mwana Trump yabyaye hanze y'urugo, nk'uko byatangajwe n'ibiro by'Ubushinjacyaha mu Karere ka Manhattan.

Trump yinjira mu rukiko, yagiye kwicarana n'abanyamategeko be, akajya akomeza guhanga amaso abanyamakuru bafotora kuko bari bemerewe gufata amafoto, nyuma umwanya wose w'iburanisha warangiye yicaye areba imbere akurikira.

Trump yavuze gake mu rukiko, abwira umucamanza ko ahakana ibyo aregwa (not guilty) kandi ko yagiriwe inama ku birebana n'uburenganzira bwe. Umucamanza yabwiye Trump ko aramutse yitwaye nabi yasohorwa mu rukiko. Trump ntacyo yongeye kuvuga kugeza asohotse mu rukiko.

Umunyamateko wa Trump witwa Todd Blanche, yabwiye urukiko ko Trump ababaye cyane kandi ko azi ko hari akarengane gakomeye karimo kuba.

Aganira n'amagana y'abamushyigikiye bari bari iwe muri Florida, Mar-a-Lago, ku mugoroba nyuma yo kuva mu rukiko, Trump yasubiyemo ko iperereza ryakozwe ryari ririmo politiki.

Trump yagize ati 'Icyaha cyonyine nakoze, ni ukurwana ku gihugu cyacu ntatinya, nkirinda abashaka kugisenya' .

Trump yagombaga kuzagaruka mu rukiko mu Kwezi k'Ukuboza 2023, ariko abanyamategeko be, basabye ko yazihanganirwa ntagaragare mu rukiko icyo gihe kubera ko kugira ngo yitabe urukiko bisaba umutekano udasanzwe. Abashinjacyaha basabye urukiko gushyira iburanisha muri Mutarama 2024, mu gihe abanyamategeko ba Trump basabaga ko iburanisha ryakwigizwa inyuma. Umucamanza ntiyahise avuga itariki urubanza ruzakomerezaho.

Source : https://umuryango.rw/amakuru/mu-mahanga/article/nyuma-yo-gushinjwa-n-abakobwa-2-donald-trump-yahakanye-ibyo-aregwa

Rutahizamu Karim Benzema yafashiej Real Madrid kunyagira FC Barcelona ibitego 4-0 anayigeza ku mukino wa nyuma wa Copa del Rey mu ijoro ryo kuri uyu wa Gatatu tariki ya 5 Mata 2023.

Barca,yashakaga gutsinda umukino wa kane wikurikiranya Real Madrid muri uyu mwaka w'imikino,ntabwo yorohewe kuko uyu mukeba wayo waje ameze nk'intare yakomeretse yayinyagiye kakahava.

Igendeye kuko umukino ubanza wari warangiye ari igitego 1-0 cya Barcelona,Real Madrid yaje ibizi neza ko igomba gutsinda ibitego birenze kimwe kugira ngo yongere igere ku mukino wa nyuma wa Copa del Rey iherukaho muri 2014.

Vinicius Jr yatsindiye Real igitego cya mbere ku munota wa 44 w'umukino nyuma yo kwiruka we na bagenzi be bagasiga ubwugarizi bwa FC Barcelona.

Igice cya kimwe cya kabiri cyatangiye neza kuri Madrid ubwo Benzema yatsindaga igitego cya kabiri hashize iminota gitangiye,ku mupira mwiza yahawe na Luka Modric wongeye kugaragaza ko ari kizigenza acenga abakinnyi ba FC Barcelona akamuha umupira ahagaze wenyine.

Nyuma y'iminota umunani,Vinicius yakorewe ikosa mu rubuga rw'amahina na Kessie hanyuma Benzema atera penaliti nziza,umunyezamu Marc-Andre Ter Stegen ntiyamenya aho umupira unyuze.

Imbere y'abafana bayo i Nou Camp, Barcelona yagerageje gushaka igitego cy'impozamarira biranga.

Ku munota wa 80,Karim Benzema yatsinze agashinguracumu ku mupira mwiza yahawe na Vinicius Jr yuzuza ibitego bitatu muri uyu mukino yatsinze wenyine.

Benzema yashimangiye ko ari mu bihe byiza cyane kuko no ku cyumweru yatsinze ibitego 3 muri 6-0 batsinze Real Valladolid.

Real izaba ishakira gutwara igikombe cya Copa del Rey ku nshuro ya 20 nikina na Osasuna ku mukino wa nyuma.

Ku wa kabiri, Osasuna yageze ku mukino wa nyuma w'iki gikombe nyuma yo gutsinda Athletic Bilbao ibitego 2-1 mu mikino yombi.

Real Madrid iracyafite amahirwe yo gutwara ibikombe bibiri muri uyu mwaka w'imikino,kuko nayo iri muri kimwe cya kane cy'irangiza muri Champions League aho izahura na Chelsea.

Igikombe cya shampiyona cyo gisa n'icyayicitse kuko irushwa amanota 12 na FC Barcelona habura imikino 11 gusa ngo irangire.

Mu mikino 6 baheruka guhura,FC Barcelona yatsinze Real Madrid inshuro eshanu ariyo mpamvu Madrid yaje muri uyu mukino ishaka kwihimura.

Vini Jr na Gavi baranzwe n'amahane muri uyu mukino

Source : https://umuryango.rw/imyidagaduro/imikino/article/real-madrid-yigaranzuye-fc-barcelona-yongera-kugera-ku-mukino-wa-nyuma-wa-copa