Author: webrwanda

Byatangajwe ku wa 19 Nzeli 2025, ubwo hasozwaga amahugurwa y'iminsi ibiri yahawe aba-DASSO mu Karere ka Rusizi.

Ni amahugurwa yateguwe n'Akarere ka Rusizi ku bufatanye n'Umushinga “Uhaki bila mipaka ushyirwa mu bikorwa n'Umuryango Alert International. Aya mahugurwa yari agamije kongerera abadaso ubumenyi mu bijyanye no kubahiriza uburenganzira bwa muntu.

Ibiganiro byatanzwe byibanze ku mategeko n'amabwiriza arebana n'uburenganzira bw'ukekwaho icyaha, uburenganzira bw'urwego rugiye kumufata, n'amategeko agenga urujya n'uruza ku mibi z'ibihugu.

By'umwihariko aba-DASSO bagaragarijwe ko mu makosa bagenzi babo bakora harimo guhamagara ukekwaho amakosa cyangwa ibyaha bakamubwira ko inzego zigiye kuza kumufata bigatuma atoroka. Basabwa kubyirinda kuko bigaragaza kudakora akazi kinyamwuga

Niyonsenga Elysee, ushinzwe ibikorwa byo gukura abana mu muhanda yavuze ko yari atarasobanukirwa ibijyanye n'uburenganzira bw'umuturage.

Ati 'Byateraga ikibazo, hari aho twageragaho bitewe n'uko tutazi itegeko rirengera umuturage tukaba twamutwara nabi twibwira ko turi mukuri. Uyu munsi nyuma yo guhugurwa twamenye uko dushobora gufasha umuturage ukekwaho ibyaha tutamuhutaje ndetse n'uko twafasha umuturage kwirinda kugwa mu byaha'.

Uwiringiyimana Patience, ukorera mu Murenge wa Kamembe, ugiye kumara ukwezi yinjiye mu rwego rwa DASSO yavuze ko aya mahugurwa yatumye yunguka ubumenyi buzamufasha gushyira umuturage ku isonga no gufasha abaturage mu iterambere.

Umuyobozi wungirije w'Umushinga Uhaki biba Mipaka, Yvonne Nyiramugwaneza yavuze ko aya mahugurwa yatanzwe binyuze muri gahunda yo kubakira inzego ubushobozi ikorwa n'uyu munshinga uharanira ubutabera ku baturage baturiye imipaka n'abambukiranya imipaka.

Ati 'Mu baturage bambukiranya imipaka habamo ibibazo byinshi birimo kwambuka badakurikije amategeko, kwambutsa ibicuruzwa bidatanze imisoro, bagiye bagaragaza ko rimwe na rimwe bahutazwa n'urwego rwa DASSO ubuyobozi bw'Akarere budusaba ko DASSO twayongerera ubumenyi'.

Umuyobozi w'Akarere ka Rusizi, Sindayiheba Phanuel yavuze ko DASSO ari urwego rukorana n'abaturage umunsi ku munsi bityo ko byari ngombwa ko rusobanukirwa uburenganzira bw'umuturage kugira ngo bamenye uko bamufasha batamuhutaje.

Ati 'Turabasaba gukomeza gukora kinyamwuga bakibuka ko ibyo dukora byose tubikora ku bw'inyungu z'umuturage. Umurimo w'umutekano w'abaturage usaba kububaha, kutabahutaza no gukorana na bo mu bwubahane. Abaturage icyo twababwira ni uko gukora neza n'inzego ari byo bizatuma bagera ku iterambere n'imibereho myiza irambye'.

Aba-DASSO bakorera mu Karere ka Rusizi bose uko ari 141 bitabiriye aya mahugurwa, mu byo bayitezeho hakaba harimo gukumira ubushyamirane hagati y'aba-DASSO n'abaturage.

Aba-DASSO b’i Rusizi bavuze ko hari bumwe mu burenganzira bw’abakekwaho ibyaha batari bazi

Nyuma y’uko Muhoza Trivia Elle atorewe kuba Nyampimga wa Uganda, impaka zabaye nyinshi bavuga ko ari Umunyarwandakazi.

Ni impaka zavutse ku mbuga nkoranyambaga, ni nyuma yo kubona ko ari we wegukanye ikamba ry’Umukobwa uhiga abandi mu buranga n’ubwenge (Miss Uganda 2025).

Benshi bavugaga ko nubwo atowe akaba ari we ubaye Miss Uganda 2025 ariko ari Umunyarwandakazi.

Ikinyamakuru Mbu cyatangaje ko Muhoza Trivia Elle abaye Miss Rwanda, kuri post yashyize kuri Instagram uwitwa Vanessa Kamara yagize ati “Miss Uganda? Cyangwa ni Miss Rwanda?”

Winnie Renne we ati 'Miss Rwanda muri Uganda!',

Farha Eid Monteza, ati 'Abanyarwanda bamaze kwigarurira byose muri Uganda, murebe n’abari kwiyamamariza imyanya mu nteko ishinga amategeko.'

Si Muhoza Trivia Elle wegukanye ikamba rya Miss Uganda akavugwaho kuba Umunyarwandakazi kuko n’uwo asimbuye Natasha Nyonyozi byamuvuzweho, ni mu gihe na Miss Uganda 2023, Hannah Karema na we byavuzwe ko ari Umunyarwandakazi.

Rutahizamu wa Rayon Sports ukomoka mu gihugu cy’u Burundi, Asman Ndikumana yabwiye abakunzi b’iyi kipe ko azagaruka akomeye, ni nyuma y’imvune ikomeye yagize.

Ndikumana Asman yagize imvune y’ukuboko ku mukino Rayon Sports yatsinzwemo na Singida Black Stars 1-0 ku wa Gatandatu w’icyumweru gishize tariki ya 20 Nzeri 3025.

Hari mu mukino ubanza w’ijonjora ry’ibanze rya CAF Confederation Cup 2025-26.

Ubwo umukino wari ugeze ku munota wa 90 bamaze kongeraho iminota 5, Ndikumana Asman yagize ikibazo cy’imvune y’ukuboko kw’ibumoso.

Hari nyuma yo gusimbuka ashaka umupira yisanga hagati y’abakinnyi babiri ba Singida Black Stars, Anthony Tra Bi Tra na Kenedy Wilson Juma Ambasa akaboko ke gafatwa hagati yabo aba aravunitse.

Byabaye ngombwa ko imbangukiragutabara (Ambulance) yinjira mu kibuga imuha ubutabazi bw’ibanze mbere yo kujyanwa kwa muganga.

Nyuma yo kunyura mu cyuma basanze igufa ry’ukuboko ryavunitse akaba agomba kubagwa.

Mu butumwa yanyujije ku mbuga nkoranyambaga ze, yaremye agatima abakunzi ba Rayon Sports ko azagaruka akomeye.

Ati “nzagaruka nkomeye kurushaho. Imana n’ibishaka.”

Bidasubirwaho akaba atazakina umukino wo kwishyura w’ijonjora ry’ibanze Rayon Sports izasuramo Singida Black Stars tariki ya 26 Nzeri 2025 muri Tanzania.

Amakuru avuga ko uyu rutahizamu umaze kwigarurira imitima y’abakunzi ba Rayon Sports azamara hanze y’ikibuga byibura hagati y’amezi abiri n’atatu.

Ndikumana Asman yinjiye muri Rayon Sports ku munsi wa nyuma w’isoko ry’igura n’igurishwa aho yasinyiye Gikundiro imyaka 2. Mu mikino itatu amaze gukinira iyi kipe yambara ubururu n’umweru yayitsindiye ibitego 4.

Aba bagore batatu bafashwe ku wa 19 Nzeri 2025, ku bufatanye n'ubuyobozi by'Akagari na DASSO, aho bari mu Mudugudu wa Gitondorero, Akagari ka Gitondorero, Umurenge wa Mugano, ho mu Karere ka Nyamagabe.

barimo uw'imyaka 57 usanzwe atuye mu Murenge wa Kaduha, mu Kagari ka Kavumu, uw'imya 46 utuye mu Mujyi wa Kigali, mu Karere ka Kicukiro, n'uw'imyaka 64 ubarizwa mu Murenge wa Kaduha, mu Kagari ka Nyabisindu.

Aba bose bafashwe bashinjwa gusenya inzu y'umwisengeneza wabo w'imyaka 22 wayibagamo ari imfubyi asigaranye na musaza we, kuko se yapfuye akayibasigamo.

Umuyobozi w'Akarere ka Nyamagabe Wungirije ushinzwe Imibereho myiza y'Abaturage, Uwamariya Agnes, yabwiye IGIHE ko iyi nzu uyu mukobwa yabagamo ibarirwa mu irage ry'umuryango mugari, ndetse no mu cyangombwa cy'ubutaka ikaba ari ho yanditse n'ubwo umubyeyi we wapfuye ari ho yakoreraga yaranahahawe ndetse akaba yarasize ahabahayeho umurage n'ubwo bitagaragara mu nyandiko zemewe.

Visi Meya Uwamariya, yakomeje avuga ko ariko umuryango mugari utabyemeranyaho, kandi mu buryo bw'amategeko bikaba nta handi bigaragara, ariko uwo mukobwa yagiriwe inama yo kujyana ikibazo cye mu butabera akagaragaza ibimenyetso byose afite bishimangira ko ari ah'umubyeyi we, n'uburyo agomba kuhasigarana mu gihe umubyeyi we atakiriho, noneho akahandikwaho byemewe, we n'umuvandimwe basigaranye.

Ati 'Biriya babikoze bashaka kwikemurira ikibazo birengagije ubuyobozi. Nta wakagombye kurenga ku mategeko, ibikorwa bibi bakoze byo gusenyera umwana babereye nyirasenge byatumye bakurikiranwa mu butabera, ubu RIB iri kubakurikirana, umwana na we arahumurizwa.'

Visi Meya Uwamariya, yakomeje avuga ko ubuyobozi bugiye gukurikirana iki kibazo by'umwihariko kugira ngo gikemuke, asaba abaturage kwirinda amakimbirane no kwirinda gutakaza indangagaciro z'umuco nyarwanda, aho gutatanya imbaraga ahubwo bakwiye gusenyera umugozi umwe birinda gushyamirana.

Hari amakuru avuga ko aba babyeyi kakoze ibi nyuma y'uko musaza w'uriya mukobwa agiye guhahira mu bindi bice by'igihugu, ibyatumye bamufatirana bagatangira kumubuza umutekano birimo no kumusakamburiraho inzu ngo akunde agende.

Kugeza ubu, aba bashenye iyi nzu bafungiye ku Rwego rw'Igihugu rw'Ubugenzacyaha (RIB), Sitasiyo ya Kaduha.

Abashenye inzu bahise batabwa muri yombi ngo bakurikiranwe

Lydia Mutyebele Ngoi, yanditse ku rubuga rwa X, agaragaza ko u Rwanda rutari rukwiye kwemererwa kwakira Shampiyona y'Isi y'Amagare arushinja guhonyora uburenganzira bwa muntu, akifuza ko ruhabwa akato mu mikino nk'uko byakorewe u Burusiya.

Mu kumusubiza, Minisitiri Nduhungirehe yagize ati “Madamu Mudepite, Ababiligi bagenzi bawe bari i Kigali baragutashya. Umukinnyi wanyu w'indashyikirwa, Remco Evenepoel, na we yatsinze, ku nshuro ya gatatu yikurikiranya, mu bagabo mu gusiganwa n'ibihe.”

Yongeyeho ati “Ahasigaye, usome ku mazi ashyushye, ubundi biraza gushira”.

Shampiyona y'Isi y'Amagare iri kubera i Kigali kuva kuri uyu wa 21 Nzeri kugeza ku wa 28 Nzeri 2025, ikaba ari ubwa mbere ibereye ku mugabane wa Afurika mu myaka 104 imaze gukinwa.

Ku wa 18 Nzeri 2025, Ababiligi barimo abagabo n'abagore bahagurutse ku kibuga cy'indege cya Zaventem (Bruxelles) bitabiriye Shampiyona y'Isi y'Amagare babwiye IGIHE ko bafite amatsiko menshi yo kugera i Kigali bagatangira ingendo z'igare rya VTT bakanakurikirana irushanwa.

Kuri uyu wa 21 Nzeri 2025, ni bwo hakinwe icyiciro cya mbere cy'iri rushanwa, ari cyo gusiganwa n'ibihe mu bagabo no mu bagore (Individual Time Trial: ITT), aho Umubiligi, Remco Evenepoel, yegukanye umwanya wa mbere, ndetse na mugenzi we Van Wilder Ilan yegukana umwanya wa gatatu.

Ni ibintu byashimishije Ababiligi benshi baje gushyigikira abakinnyi babo, aho wabonaga amabendera y'u Bubiligi menshi afitwe n'abafana aho isiganwa ryasorejwe kuri Kigali Convention Centre, ndetse abaganiriye n'itangazamakuru bagaragaje ko bishimiye kugera mu Rwanda, ndetse basanze ari igihugu cyiza, gifite abantu beza bitandukanye n'ibyo babwirwaga.

Hashize igihe u Rwanda ruzanye umubano n'u Bubiligi mu bya dipolomasi, bitewe n'uko icyo gihugu cy'i Burayi cyakoze iyo bwabaga gishaka gukomanyiriza u Rwanda ku rwego mpuzamahanga, kirushinja guhungabanya umutekano wa Repubulika Iharanira Demokarasi ya Congo, ibintu u Rwanda rutahwemye kuvuga ko nta shingiro bifite.

Kuva u Rwanda rwakwemererwa kwakira Shampiyona y'Isi y'Amagare yanatangiye kuri iki Cyumweru, na bwo bamwe mu bayobozi mu nzego zitandukanye mu Bubiligi bagaragaje kutabyishimira, ndetse byamenyekanye ko bakoze ibishoboka kugira ngo u Rwanda rwamburwe iri rushanwa ariko byabaye iby'ubusa.

Minisitiri Nduhungirehe yasubije Umudepite w’Umubiligi wibasiye u Rwanda

Ababiligi baje gufana abakinnyi babo bari benshi kuri Kigali Convention Centre

Remco Evenepoel yatsinze ITT ku nshuro ya gatatu yikurikiranya

Byashyizwe mu itangazo RwandAir yashyize ku mbuga nkoranyambaga zayo igaragaza ko abakora ingendo z'indege bagomba no gukomeza kuzirikana ko Umujyi wa Kigali wakiriye Shampiyona y'Isi y'Amagare.

Ryakomeje rigaragaza ko abantu bari bafite ingendo z'indege muri ibi bihe, zizakomeza nta kabuza ariko basabwa guharanira kuzinduka mu rwego rwo kwirinda ko hari imihanda yabafungirwaho.

Ryakomeje riti 'Shampiyona y'Isi y'Amagare ikomeje kubera mu Mujyi wa Kigali guhera ku wa 20-28 Nzeri 2025. Ifungwa ry'imihanda riri kugira ingaruka ku rujya n'uruza. Mbere yo kwerekeza ku kibuga cy'Indege cya Kigali ugomba kubanza kumenya imihanda iri gukoreshwa, ukemera amasaha ashobora kwiyongera ku rugendo ugana ku kibuga no kubahiriza ibijyanye no kugenzura abagenzi bagiye gukora urugendo.'

RwandAir yagaragaje ko ku bakora ingendo imbere mu gihugu ibijyanye no kugenzura abagenzi mbere yo guhaguruka bizajya bitangira gukorwa mbere y'amasaha atatu bihagarikwe mbere y'isaha imwe ngo urugendo rutangire.

Ku ngendo Mpuzamahanga byo bizajya bitangira mbere y'amasaha ane bisozwe mbere y'isaha n'igice ngo urugendo rutangire.

Byumvikane ko umugenzi asabwa kugera ku kibuga cy'indege mbere y'amasaha atatu cyangwa ane kugira ngo yirinde ibibazo bishobora kumubuza gukora urugendo rwe.

RwandAir kandi yakomeje isaba abakora ingendo kujya bakurikirana amakuru ku mbuga nkoranyambaga za Polisi y'u Rwanda mu bijyanye no kumenya imikoreshereze y'umuhanda.

Shampiyona y'Isi y'Amagare izaca mu bice byinshi by'Umujyi wa Kigali ariko bizagenda bitandukana bitewe n'iminsi, ndetse kuri ubu bisa n'ibiri mu bice bine kandi imihanda izaba iri gukoreshwa izajya ifungwa.

Kubera iri rushanwa, umuhanda mugari ugana ku Kibuga Mpuzamahanga cy'Indege cya Kigali giherereye i Kanombe, uzajya ufungwa mu masaha y'amanywa.

Nubwo bimeze bityo ariko hagenda hatangazwa indi mihanda igomba gukoreshwa mu kunganira indi yari isanzwe izaba iri gukinirwamo shampiyona y'Isi y'Amagare.

Indi nkuru wasoma: https://igihe.com/amakuru/u-rwanda/article/umuhanda-mugari-ugana-ku-kibuga-cy-indege-mpuzamahanga-cya-kigali-uzafungwa-by

RwandAir yasabye abakora ingendo kuzirikana ibihe bya Shampiyona y'Isi y'Amagare u Rwanda rwakiriye

Yabigarutseho ubwo yari mu kiganiro n'itangazamakuru yahuriyemo na mugenzi we w'u Rwanda, Paul Kagame, wari mu ruzinduko rw'akazi muri Azerbaijan.

Perezida Ilham Aliyev yasabye ko impande zombi zarushaho gukorana mu bijyanye no guteza imbere uburezi, ndetse asaba ko umubare w'abanyeshuri b'Abanyarwanda biga mu gihugu cye wongerwa.

Ati 'Twishimiye ko Heydar Aliyev Foundation ifite amahirwe yo gutera inkunga gahunda z'uburezi mu gihugu cyanyu. Urebye uru rwego, ntekereza ko ikwiye kuba kimwe mu by'ingenzi mu bufatanye bwacu.'

Yakomeje ati 'Nkimara kumenya amakuru y'uruzinduko rwa perezida, nashatse amakuru nsanga dufite umunyeshuri umwe w'Umunyarwanda uri kwiga hano muri Azerbaijan. Ndatekereza ko dushobora guhuza imbaraga mu kongera umubare w'abanyeshuri. Ibyo biri mu miterere y'uburyo Azerbaijan itangamo buruse.'

Uretse imikoranire mu rwego rw'uburezi, uruzinduko rwa Perezida Kagame rwasize ibihugu byombi bishyize umukono ku masezerano y'imikoranire atanu mu nzego zirimo ubuhinzi, uburezi, serivisi z'itumanaho ryifashishwa mu kirere, ubucuruzi n'imitangire ya serivisi.

Amasezerano y'ubufatanye mu itumanaho ryo mu kirere, mu burezi no mu buhinzi yashyizweho umukono n'Umunyamabanga wa Leta muri Minisiteri y'Ububanyi n'Amahanga n'Itumanaho, Gen (Rtd) James Kabarebe, na Minisitiri w'Ububanyi n'Amahanga wa Azerbaijan, Jeyhun Bayramov.

Ay'ubufatanye mu mitangire ya serivisi no mu bukungu yashyizweho umukono na Ambasaderi wa Azerbaijan ku Rwanda, Ruslan Nasibov, n'Umuyobozi Mukuru wungirije w'urwego rw'igihugu rw'iterambere (RDB), Juliana Kangeli Muganza.

Perezida Kagame yabwiye Aliyev wa Azerbaijan ko u Rwanda ruzakora ibishoboka kugira ngo aya masezerano atange umusaruro yitezweho.

Perezida wa Azerbaijan, Ilham Aliyev na Perezida Paul Kagame bakurikiye isinywa ry’amasezerano y’ubufatanye ku bihugu byombi

Perezida wa Azerbaijan Ilham Aliyev ntiyumva uburyo igihugu cye gifite umunyeshuri umwe w’umunyarwanda gusa