Author: webrwanda

Ku mugoroba wo kuri uyu wa Gatanu, abatuye mu Mujyi wa Goma bari bagize ubwoba nyuma yo kubona ikirunga cya Nyamulagira cyaka umutuku, nka kimwe mu bimenyetso by'uko kiri cyangwa kigiye kuruka.

Ni nyuma y'umunsi umwe ikigo OVG gitangaje ko hari amahindure yagaragaye mu Murwa w'Ikirunga cya Nyamulagira, ashobora gusohoka hanze isaha n'isaha.

Itangazo rishya icyo kigo cyashyize hanze ku mugoroba wo kuri uyu wa Gatanu, rivuga ko hari amahindure amaze igihe azamuka mu murwa w'Ikirunga cya Nyamulagira, gusa bagaragaza ko aramutse asohotse nta ngaruka yagira ku baturage kuko inzira azerekezamo ari igana muri Pariki ya Virunga aho kuba mu bice bya Goma n'ahandi hatuwe n'abaturage.

Bagize bati 'Turasaba abaturage ba Goma gutuza bagasubira mu mirimo yabo batekanye'.

Icyakora bagiriwe inama yo kubanza kuronga neza ibyo guteka nk'imboga mu gihe bagiye kubitunganya no kwitondera kunywa amazi yo mu bigega.

OVG yatangaje ko ikomeje gukurikiranira hafi iby'ikirunga cya Nyamulagira, ku buryo amakuru yose mashya abaturage baza kuyamenyeshwa.

Nyamulagira iheruka kuruka mu buryo bukomeye mu 2011. Iki kirunga kiri rwagati muri pariki ya Virunga, icumbikiye inyamaswa nk'ingagi zo mu misozi.

---

Mu 2017, Leta y'u Rwanda yatangije umushinga w'Ikigega cy'Ubwiteganyirize cyiswe Ejo Heza, wari ugamije gufasha Abanyarwanda kubona uburyo bwo kwizigama by'igihe kirekire.

Amarembo yafunguriwe abanyamushahara, abikorera, abakorera abandi mu byiciro by'imirimo itandukanye, harimo n'itagengwa n'amategeko y'umurimo cyangwa amategeko yihariye.

Mu nama y'ihuriro ry'Ibigo by'Ubwiteganyirize yabereye i Abidjan muri Côte d'Ivoire kuva kuwa 17 kugera kuwa 19 Gicurasi 2023, u Rwanda rwahize ibindi bihugu bya Afurika yo munsi y'Ubutayu bwa Sahara mu bihembo bya ISSA by'uwakoze ibikorwa by'intangarugero 'Good Practice Awards.'

U Rwanda rwasangije iri huriro ibanga ryakoreshejwe kugira ngo iki kigega kigere ku ntego zacyo, zirimo udushya mu ikoranabuhanga, amafaranga ya nkunganire Leta iha abizigama, ikoranabuhanga mu kwiyandikisha no kwishyura imisanzu hakoreshejwe telefoni zigendanwa, ndetse na bimwe mu byo gishobora kwishyura umunyamuryango mbere y'uko agera mu za bukuru.

Kuba umunyamuryango wa 'Ejo Heza' bikorwa ku bushake, biroroha kandi abantu bose bashobora kuyigana bazigamira izabukuru.

Umuyobozi Mukuru wungirije ushinzwe Ibigenerwa Abanyamuryango mu Kigo cy'Igihugu cy'Ubwiteganyirize mu Rwanda, RSSB, Dr Regis Hitimana, yavuze ko iki gihembo bahawe kigaragaza ko u Rwanda rwakoze cyane kandi rudaheza abaturage mu guteganyiriza ejo habo hazaza.

Ati 'Iki gihembo ni igihamya cy'ubushake Guverinoma y'u Rwanda ifite mu guha Abanyarwanda bose ubwiteganyirize nta busumbane, kinagaragaza kandi ibikorwa by'indashyikirwa Leta y'u Rwanda yakoze mu myaka myinshi ishize.'

Imibare yo muri Gicurasi igaragaza ko ubwizigame bw'abanyamuryango ba Ejo Heza bugeze kuri miliyari 45,4 Frw.

Kugeza muri Werurwe 2023, abanyamuryano ba Ejo Heza bari bamaze kugeza kuri miliyoni eshatu n'ibihumbi 100, bivuze ko bari 23,4% by'abaturage bose, kandi 38,7% by'abafite imyaka yo gukora bizigamye biganjemo abari mu miryango yinjiza amafaranga make.

Imibare yo muri uko kwezi igaragaza ko abanyamuryango bizigama mu buryo buhoraho bari miliyoni ebyiri n'ibihumbi 600, mu gihe 49% by'abizigama ari abagore naho abangana na 32% ni bo babarirwa mu bwiteganyirize bw'izabukuru bwa RSSB.

Imibare yo muri Gicurasi 2023, igaragazaga ko 88% by'abanyamuryango ari abakora imirimo itagengwa n'amategeko y'umurimo, naho 12% bakora imirimo igengwa n'amategeko.

Abanyamuryango ba Ejo Heza muri Gicurasi 2023 bariyongereye bagera kuri 3.223.205, barimo abagabo bangana na 50,6% n'abagore bangana na 49,4%.

Imibare mishya yakusanyijwe mu ibarura rusange ry'abaturage ryabaye mu 2022, igaragaza ko umubare w'urubyiruko rufite munsi y'imyaka 30 wagabanyutse, uva kuri 70,3 mu 2012 ugera kuri 65,3% mu 2022, ndetse byitezwe ko mu 2050 bazaba bageze kuri 54,3%.

Naho abaturage bafite imyaka hagati ya 16-64 bavuye kuri 53,4% mu 2012 bagera kuri 56,0% mu 2022, ndetse byitezwe ko mu 2050 bazaba bageze kuri 61,4%.

Mu ibarura rya 2012 umubare w'Abanyarwanda bari hejuru y'imyaka 60 wari ibihumbi 500. Icyo gihe mu 2032, uwo mubare uzikuba kabiri, ari nayo mpamvu hatekerejwe iki kigega kugira ngo kizagoboke abaturage bari kurushaho kugana mu zabukuru.

---

Impuzamashyirahamwe y’Umupira w’Amaguru muri Afurika, CAF, iherutse gusohora itangazo ryemeza ko u Rwanda rwatewe mpaga ku mukino rwakinnyemo na Benin ukaba wari warangiye amakipe yombi anganyije igitego 1-1.

Wari umukino wo ku munsi wa 4 mu gushaka itike y’igikombe cy’Afurika kizabera muri Cote d’Ivoire mu mwaka utaha. Uyu mukino wari wabereye i Kigali none byarangiye Benin yegukanye amanota 3 uko ari imbumbe.

Icyo Amavubi yazize ni ugukinisha umukinnyi ukina mu kibuga hagati ariwe Muhire Kevin kandi yarabonye amakarita 2 y’umuhondo mu mikino 2 yikurikiranya. 

Iyo mikino ni uwa Senegal ndetse n’uwa Benin ubanza. Bivuze ko ku mukino wabereye i Kigali atari gukandagira mu kibuga ariko yagiye mu kibuga arakina bituma ikipe y’Igihugu ya Benin ihita ifata iya mbere ijyana ikirego muri CAF.

Nk’uko Itegeko rya 42 ku bijyanye n'imikino yo gushaka itike y'Igikombe cya Afurika rivuga ko umukinnyi ubonye amakarita abiri y'umuhondo agomba gusiba umukino ukurikiyeho ariko ku Mavubi siko byagenze aribyo byatumye Benin yibonera amanota 3 yemye nta nkomyi maze u Rwanda ruterwa mpaga y’ibitego 3-0.

Nyuma y’uko iki gikorwa kibaye benshi batangiye kwibaza niba nta muntu ugomba kubibazwa cyangwa ngo abe yanabizira. 

Ku makuru InyaRwanda yamenye ni uko uwari ushinzwe ubuzima bwa buri munsi bw’ikipe y’igihugu Amavubi (Team Manager) ariwe Rutayisire Jackson yamaze kwegura ku mirimo ye nyuma y’imyaka 5 yari amaze kuri uyu mwanya.

Ubusanzwe ‘Team Manager’ n iwe uba ushinzwe kumenya umukinnyi wemerewe gukina cyangwa utabyemerewe kubera amakarita y’umuhondo.

Bivuze ko Rutayisire Jackson nawe ari mu bagombaga kubazwa ukuntu Muhire Kevin yakandagiye mu kibuga kandi atabyemerewe dore ko aba ari nawe wicaye yandika abakinnyi bahawe amakarita y’umuhondo.

Ibi bibaye kandi nyuma y’uko hari andi makuru yagiye hanze avuga ko Minisiteri ya siporo yasabye Ferwafa ibisonuro birambuye kuri mpaga yatewe Amavubi.

Rutayisire Jackson wari umukozi wa Ferwafa ushinzwe ikipe y’igihugu Amavubi yeguye ku mirimo ye

Kuva kuri uyu wa Gatandatu tariki 20 Gicurasi, mu Rwanda harakinwa umunsi wa 29 wa shampiyona, habura umunsi umwe gusa ngo shampiyona ishyirweho akadomo.

Nk’ikipe ya Kiyovu Sports iyoboye urutonde rwa shampiyona, abafana bayo aho bava bakagera yaba aba Nyamirambo ndetse n’ibindi bice bitandukanye by’igihugu, batangiye kwizera ko ikipe yabo izegukana igikombe cya shampiyona ndetse batangira no kubishyira ahagaragara.

Bamwe mu bafana ba Kiyovu Sports batangiye kwandika ku modoka zabo ko iyi kipe ariyo yegukanye igikombe cya shampiyona ya 2023. Kiyovu Sports izamanuka mu kibuga kuri iki cyumweru, aho izaba yasuye Sunrise FC mu mukino ukomeye ndetse abenshi bavuga ko Kiyovu Sports ariho itegewe.

Aba bafana ba Kiyovu Sports biyemeje kumanuka mu Karere ka Nyagatare bafite izi modoka zaditseho ibirango byo kwegukana igikombe cya shampiyona, ndetse nk’uko babitangarije InyaRwanda, barashaka kwereka Isi yose ko igikombe cya shampiyona 2023 ari icyabo.

Kiyovu Sports iherutse gutsindwa mu mukino wa 1/2 cy’igikombe cy’Amahoro na APR FC bahanganiye shampiyona, aho Kiyovu Sports irusha APR FC amanota 3, mu gihe habura imikino ibiri ngo shampiyona irangire.

Abafana ba Kiyovu Sports batangiye kwiyumvisha ko igikombe cya shampiyona 2022-23 ari icyabo

Bamwe batangiye kwandika ku modoka zizabajyana i Nyagatare, bemeza ko aribo bagomba kubika shampiyona 

Imyiteguro irarimbanyije aho Kiyovu Sports ishaka igikombe cyayo cya mbere nyuma ya Jenoside yakorewe Abatutsi mu 1994

Byari bitegenyijwe ko iki gitaramo gitangiye saa kumi n'imwe z'umugoroba zo kuri uyu wa Gatanu tariki 19 Gicurasi 2023 mu Intare Conference Arena.

Uyu munyamuziki w'igikunduro cyihariye yageze ku ruhimbi rw'iyi nyubako y'Umuryango FPR Inkotanyi, ahagana saa moya, abanza kwisegura ku bakunzi be avuga ko yatindijwe n'umuvundo w'imodoka mu muhanda.

Ageze ku rubyiniro yabwiye abakunzi be ko ashingiye ku buryo indirimbo ziteye baza kumuha izina ry'iyi album. Ati 'Iyi album muraza kumpa izina ryayo mwenyine. Ndanezerewe cyane Imana, ibahe umugisha.'

Yahereye ku ndirimbo aririmba ngo 'Ibyananiye abatware n'intuti zose zo mu Isi, iyo n'iyo ibikora.'

Ku rubyiniro, Israel Mbonyi yafashijwe n'abaririmbyi batandatu barimo abakobwa/abagore batatu ndetse n'abasore/abagabo batatu. Ni mu gihe yari afite abacuranzi batandatu, barimo umucuranzi wa gitari, uwa Piano, uw'ingoma n'abandi.

Yari afite kandi ikipe y'abantu barenga batanu bafataga amashusho y'izi ndirimbo. Ni igitaramo kitabiriwe n'abantu 1000 bahawe Invitation, barimo Ambasaderi wa Israel mu Rwanda, Ron Adam n'abandi.

Mu ndirimbo ya kabiri, uyu munyamuziki yaririmbye irimo kumvikanisha gushima Imana, hari aho agira ati 'Ni iby'agaciro kumugira, ndi ubuhamya bugenda, ndashima.'

Buri ndirimbo ye yateye byari bimeze nk'aho abantu bayizi! Ibi babifashijwemo n'inyakira-mashusho nini ebyiri zari muri iyi nyubako zatambukaga amagambo agize buri ndirimbo.

Indirimbo ya gatatu ye, yubakiye ku gusaba Imana kugufasha kurwana intambara y'ubuzima kandi ukoresheje uburyo bwose. Hari aho aririmba ati 'Nk'umusirikare ugiye ku rugamba unyigishe kurwanisha uburyo bwose. Dore ngushimikashijeho umutima wanjye…. Abaringiye uwiteka Imana bameze nk'umusozi w'Isiyoni, ntakizabasha kubanyeganyeza.'

Nyuma yo kuririmba indirimbo eshatu, Israel Mbonyi yavuze ko yakozwe ku mutima n'uburyo abantu baje kumushyigikira muri iki gitaramo.

Ati 'Ndanezerewe ko mwabonetse Imana ibahe umugisha, Hano harimo inshuti zanjye nyinshi. Harimo ababyeyi, abavandimwe n'abandi mwakomeje kunshyigikira. Hano harimo Ambasaderi wa Israel mu Rwanda, Dr. Ron Adam, n'abandi mwese Imana ibahe umugisha.'

Byageze aho yikura ikote: We n'ababyinnyi be bajya guhindura imyambaro

Ageze ku ndirimbo ye yise 'Jambo', Israel Mbonyi yikuye ikote yari yambaye maze aranzika, abanza kuvuga ko kuba ibihangano bye bikundwa 'nta bundi buhanga nshyiramo' ahubwo iyo agiye kwandika indirimbo yisunga ijambo ry'Imana.

Israel Mbonyi yavuze ko Imana imuhamagara kuyikorera yamuhaye 'igitabo cyo gukoresha' kiyivugaho.

Ati 'Imana yarambwiye ngo aha niho uzakura ubutunzi, niyo mpamvu buri gihe iyo ngiye kwandika indirimbo mfata ijambo ry'Imana, ndasoma nkegerana n'Imana maze ikabasha kumbwira, yahise yanzika mu ndirimbo ye 'Jambo'.

Iyi ndirimbo yumvikana ibwira buri wese utegereje amasezerano y'Imana ko agiye gusohora; hari aho aririmba agira ati '

Avuye guhindura imyenda we n'abaririmbyi bamufashaga ku rubyiniro, Israel Mbonyi yongeye gushyira abantu mu mwuka binyuze mu ndirimbo ye yamamaye cyane yise 'Baho'- Iri mu ndirimbo ze zakunzwe mu buryo bukomeye kuri album ze ziheruka.

Uyu musore aherutse kwandika amateka ubwo yamurikaga album ze ebyiri mu gitaramo cyabereye muri BK Arena, akaba umuhanzi wa mbere wo mu Rwanda wabashije kuzuza iyi nyubako y'imyidagaduro.

Mu ndirimbo ye ya Gatanu, Israel Mbonyi aririmba asaba kubana kumuherekeza. Ati 'Niba nkugiriyeho umugisha unyibuke. Ijisho ryawe ni rimbeho ibihe n'ibihe. Ineza yawe imperekeze kundunduro. Iri n'isengesho nkumeneye umutima. Icyo nsaba tugumane niba nkugiriyeho umugisha.'

Hariho indirimbo iri mu rurimi rw'Igiswahili! Ni indirimbo igaruka ku mukristu uvuga ko afitanye ibanga na Yesu rituma ahora yishimye. Ni album avuga ko yahisemo

Asoza iki gitaramo, Israel Mbonyi yavuze ko iyi album ye izasohoka mu kwezi kwa Gatandatu. Iriho indirimbo nka 'Nkumusirikare' yitiriye iyi album, hariho kandi indirimbo nka 'Niyibikora', 'Ijambo' n'izindi nyinshi.

Israel Mbonyi yatunguwe yifurizwa isabukuru y'amavuko: Kuri uyu wa Gatandatu tariki 20 Gicurasi 2023, nibwo uyu munyamuziki azaba yizihiza isabukuru y'amavuko ye.

Ubwo yari asoje kuririmba zimwe mu ndirimbo zigize album ye, abakunzi b'ibihangano bye bamutunguye bazana ku rubyiniro umutsima 'Cake' bamwifuriza isabukuru y'amavuko. Ni ibintu byashimishije Israel Mbonyi, kandi aratungurwa.

Israel Mbonyi yatanze ibyishimo ubwo yafataga amashusho ya album ye nshya ya Gatanu yise ‘Nk’umusirikare’

Israel Mbonyi yavuze ko iyi album ye izasohoka muri Kamena 2023, akazayishyira ku mbuga zitandukanye zicururizwaho umuziki

Umunyamuziki Yvan Ngenzi wari umushyushyarugamba muri iki gitaramo, yanyuzagamo akaririmba

Umuhanzi w’indirimbo zo kuramya no guhimbaza Imana, Danny Mutabazi ari mu bitabiriye iki gitaramo- Uyu mugabo azwi mu ndirimbo zirimo ‘Saa cyenda’ n’izindi

Israel Mbonyi yaririmbaga anezerewe, kandi ashima buri wese wamushyigikiye

Israel Mbonyi yatangaje ko nta buhanga ashyira mu kwandika indirimbo ze, ahubwo avoma mu ijambo ry’Imana

Abaririmbyi batandatu nibo bafashije Israel Mbonyi mu gukora kuri iyi album ye nshya ya Gatanu



Israel Mbonyi yasabaga abantu kwifashisha indirimbo ze bagatura isengesho Imana

Ibyishimo byari byose kuri Israel Mbonyi afata amashusho y’indirimbo zigize album ye

Mbere yo kwinjira ahabereye iki gitaramo werekanaga ‘Invitation’ wahawe

Abantu batangiye guhera ahabereye iki gitaramo ahagana saa kumi n’imwe z’umugoroba

Iki gitaramo cyabereye mu Intare Conference Arena, kuri uyu wa Gatanu tariki 19 Gicurasi 2023

Kanda hano urebe amafoto yaranze igitaramo Israel Mbonyi yamurikiyemo album ye ya Gatanu

AMAFOTO: Nathanael Ndayishimiye& Sangwa Julien-INYARWANDA.COM

Ku nshuro ya mbere hagiye gutangwa ibihembo mpuzamahanga bigenewe abari n'abategarugori bagaragara mu mashusho y'indirimbo.

Bazaba bashimirwwa uruhare bagira mu iterambere ry'umuziki n'umuryango mugari muri rusange.

Abagera kuri 50 nibo bahatanye mu byiciro bigera ku munani mu matora ari kuba anyuze kuri Noneho Events.

Bitewe ni indirimbo wakunze, washyigikira uwatumye irushaho kuryoha umuhesha amahirwe yo kuzaba uwahize abandi.

Abahatana bari mu byiciro binyuranye birimo umunyamideli mwiza, mu bagaragara mu mashusho y'indirimbo w'umwaka [Best Video Vixen], w'ikinyacumi [Best Decade Video Vixen].

Hari kandi umunyamideli mu bagaragara mu mashusho w'umubyinnyi w'umwaka [Best Dancer Video Vixen], ugira imyambarire ishimwa na benshi [Best Dressed Video Vixen].

Umunyamideli uberwa n'amafoto mu bagaragara mu mashusho y'indirimbo [Best Photogenic Video Vixen], wamamaye cyane [Best Popular Video Vixen].

Umunyamideli uri kuzamuka neza mu bagaragara mu mashusho y'indirimbo [Best New Video Vixen] nuw'intangarugero cyangwa icyitegererezo [Best Inspirational Video Vixen].

Kanda hano ubashe gutora Urutonde rwose rw’abahatanye mu byiciro bitandukanye