Author: webrwanda

Ni porogaramu yatangijwe ku wa 18 Gicurasi 2023 ku bufatanye n'Ikigo mpuzamahanga kizobereye mu gutanga Amasomo ajyanye no gukoresha neza imari ku bari mu rwego rw'uburezi, Opportunity International.

I&M Bank izajya yita kuri serivisi zo gutanga inguzanyo ku buryo bworoshye ku bari muri urwo rwego mu gihe Opportunity International izatanga amahugurwa ajyanye no kuzamura ubushobozi bw'amashuri mu bijyanye n'imari no kwitabira serivisi zijyanye na yo.

Abari mu ruhererekane nyongeragaciro rw'uburezi barimo amashuri, ababyeyi bayarereramo, abarimu, abakozi, ba rwiyemezamirimo bakorana na yo n'abandi bashoramari bagira uruhare kugira ngo umwana yige abona ibikenewe byose.

Bisobanuye ko niba umubyeyi ufite umwana ku kigo runaka, mu gihe akeneye wenda kwishyura amafaranga y'ishuri kandi ntayo afite ako kanya, kuko akorana na I&M Bank izajya ihita imwishyurira kuri cya kigo.

Nyuma yo gukemura ikibazo impande zombi zizumvikana uburyo ya nguzanyo izajya yishyurwa bitagoranye.

Ibigo by'ishuri runaka na byo bikeneye kugura ibikoresho nk'imodoka zijyana abanyeshuri cyangwa ibikoresho by'ikoranabuhanga, kubaka za laboratwari, kongera umubare w'amashuri cyangwa ibindi na byo I&M izajya ibibafasha by'umwihariko, bishyure gahoro gahoro.

Ku bijyanye n'inyungu y'inguzanyo I&M Bank izajya yaka abazishaka, nta nyungu fatizo ihari kuko izajya ishingirwa ku nguzanyo umukiliya ashaka, ubwoko bw'imirimo ashaka kuyikoresha n'uko iyo mirimo yunguka n'uburyo izishyurwamo.

Icy'ingenzi ni uko izo nyungu zizajya zishyirwaho mu murongo w'iziteganywa na Banki Nkuru y'u Rwanda.

Umuyobozi Mukuru wa I&M Bank mu Rwanda, Robin Bairstow, ati 'Ibigo by'amashuri ntibingana mu bunini, ntibifite porogaramu zingana yewe n'ibikorwaremezo bikeneye kubaka ntibingana. Urumva ko n'inyungu utayigira imwe. Dusesengura buri kimwe cyose noneho tugashyiraho inyungu bijyanye n'ikigo kiyisaba.'

Yongeraho ko buri kigo cyose gishaka inguzanyo gishyirirwaho uburyo bwo kwishyura butakigoye 'kuko natwe tuzi uko ubukungu buhagaze ni yo mpamvu twashatse gukorana n'abo muri uru rwego ku buryo bw'umwihariko.'

Birungi Ronald wo muri Life International Christian Academy, LICA, yagaragaje ko iyi porogaramu izabafasha muri serivisi zitandukanye zirimo kubahugurira abakozi ariko ngo bikaba akarushyo ku nguzanyo ijyanye no kubafasha kugura nk'imodoka zitwara abanyeshuri, kuko zihenda cyane.

Ati “Amafaranga y'ishuri ntaba ahagije kugira ngo ikigo cy'ishuri kibeho. Ubu tugiye kuba twabona inguzanyo yo kubaka bitagoranye. Iyi gahunda izanakemura n'ikibazo cyo gusaba inyemezabwishyu umunyeshuri yishyuriyeho bya buri kanya, kuko nidufatanya na I&M Bank uwishyuye tuzajya tumubona muri sisiteme bikiba.”

Kuva mu 2016 Opportunity International imaze gufatanya n'ibigo by'imari 148 mu bihugu ikoreremo, bitanga inguzanyo ku bigo bifite aho bihuriye n'uburezi ibihumbi 602. Abanyeshuri bo mu bihugu 31 bangana na miliyoni 11.5 bungukiye muri ibyo bikorwa.

Ibyo bigo by'imari byashoye agera kuri miliyoni 614 z'Amadorali mu burezi bwigonderwa na buri wese ndetse abayobozi b'ibigo by'amashuri bagera ku 2000 bo mu bihugu 10 barahuguwe.

Iki kigo kandi ngo cyabonye ko hari amahirwe y'uko ibigo by'amashuri byo mu Rwanda 3401 byigenga n'amashuri y'imyuga 366 bikeneye serivisi za EduFinance mu buryo butaziguye.

Umuyobozi wa Opportunity International mu Karere, Julius Omoding, yavuze ko biyemeje gufatanya na I&M Bank kugira ngo no mu Rwanda uburezi butezwe imbere mu buryo bufatika.

Ati 'Twabonye ko izi serivisi zikenewe haba ku buryo bw'amafaranga ndetse n'ubumenyi kuri serivisi z'imari. Nk'ubu twakoze ubushakashatsi dusanga 37% y'ibigo by'amashuri twabajije bashaka impuzandengo y'inguzanyo ntarengwa (average loan size) yo kubaka ingana n'ibihumbi 24 by'Amadorali.'

Akomeza ati '73% by'ababyeyi bakeneye impuzandengo y'inguzanyo ntarengwa y'amafaranga y'ishuri, ingana n'ibihumbi 224$ mu gihe 63% by'abarimu na bo bashaka bene iyo nguzanyo ku mpuzandengo y'ibihumbi 2.3$.'

Ati 'Ubu twatangiye urugendo dufatanyije ndetse turateganya ko buzahoraho tugafasha abari mu burezi kubona serivisi ziborohereza kubuteza imbere. Ubu abo mu burezi bashyira mu bikorwa gahunda zabo kuko bafite umufatanyabikorwa wumva ibyo bakora.'

Kugeza ubu muri Afurika Edufinance ibarirwa agaciro ka miliyari 2.7$ mu gihe mu Rwanda ifite agaciro ka miliyari 152 Frw. Iyi porogaramu izajya ikorana n'ibigo by'ishuri byose.

Abafatanyabikorwa mu burezi benshi bitabiriye umuhango wo gutangiza Edufinance

Wari umwanya wo kubaza ibibazo no kungurana ibitekerezo

Umuyobozi wa SPENN mu Rwanda, Karake Julius, na we yari yitabiriye umuhango wo gutangiza Gahunda ya Edufinance

Umuyobozi ushinzwe ibijyanye no kwishyurana hakoreshejwe Ikoranabuhanga muri I&M Bank, David Munyanziza, yerekanye uburyo Edufinance izoroshya kwishyura amafaranga y’ishuri ku babyeyi

Umuyobozi muri I&M Bank Rwanda Plc, Hans Mark Muganzi, asobanura zimwe muri serivisi batanga

Ubwo abakora mu nzego zitandukanye z’uburezi bari bakurikiye uko Edufinance izashyirwa mu bikorwa

Umuyobozi Mukuru wa I&M Bank mu Rwanda, Robin Bairstow, asobanura birambuye ibijyanye na Edufinance

Abitabiriye umuhango wo gutangiza ku mugaragaro Edufinance babanje kwerekwa amahirwe ari mu rwego rw’uburezi

Buri wese yari anyotewe no kumenya uburyo Edufinance izorohereza abo mu rwego rw’uburezi mu gushyira mu bikorwa ibyo bashinzwe

Amafoto: Ndayisenga Mohamed

Ibirunga biri muri RDC ubu ni byo bigifite ubushobozi bwo kuruka ndetse mu myaka mike ishize Nyiragongo yasize benshi habi nyuma yo guhitana bamwe, ikangiza inzu n'imyaka yabo mu Burasirazuba bw'iki gihugu.

Ikigo gikurikiranira hafi ibi birunga cyatangaje ko kuva tariki 9 Gicurasi 2023 cyabonye amakuru ko amahindure yo mu Kirunga cya Nyamuragira yatangiye kuzamuka yerekeza ku ruhande rwo mu Burengerazuba bw'iki kirunga.

Itangazo iki kigo cyasohoye ku wa 17 Gicurasi 2023 rigaragaza ko nta makuru agaragaza ko amahindure yaba yahinduye icyerekezo ndetse ngo habayeho kuruka cyaruka muri Pariki ya Virunga.

Rigira riti 'Turasaba abaturage b'i Goma gutuza no kuguma mu byabo. Bagomba kurya imboga babanje kuzironga kandi amazi yo mu bigega by'imvura bakitondera kuyakoresha.'

Ku mugoroba wo kuri uyu wa 19 Gicurasi 2023 abakoresha imbuga nkoranyambaga batangiye gukwirakwiza amafoto y'Ikirunga cya Nyamuragira kiruka, bahamya ko amahindure atari kwerekeza mu baturage.

Abaturage bagiye bavuga ko cyatangiye kuruka guhera saa 18h00. Ikinyamakuru Tazama RDC yanditse ko ku isaha ya 18h47 hejuru ku Kirunga cya Nyamuragira hasa n'umutuku ariko kugeza 19h17 abaturage bo mu Gace ka Rugari bavuze ko cyari kitararuka.

Kugeza ubwo iyi nkuru yakorwaga, OVG nta makuru yandi yari yagatangaza ku byerekeye iruka ry'iki kirunga.

N'ubwo benshi batarimo kumva imitingito ikomeye, abaturiye imijyi ya Gisenyi na Goma bamaze iminsi bumva ubushyuhe bwinshi, nka kimwe mu bimenyetso by'ubushyuhe bwoherezwa n'ikirunga.

Ikirunga cya Nyamuragira gikunze kuruka cyane kurusha Nyiragongo, ariko ntikigira ingaruka ku baturage kubera cyerekeza muri Pariki y'Ibirunga, icyakora icya Nyiragongo cyo iruka ryacyo rikura umutima benshi kubera cyohereza amahindure mu baturage.

Ubwo giheruka kuruka tariki 21 Gicurasi 2021 cyahitanye abantu, cyangiza inyubako nyinshi muri Teritwari ya Nyiragongo hafi y'Umujyi wa Goma, ndetse abaturage benshi bava mu byabo.

Ikirunga cya Nyamuragira biravugwa ko cyatangiye kuruka

Amakuru IGIHE yamenye ni uko uyu mwana w'umuhungu witwa Fabrice yatabarutse mu gitondo cyo kuri uyu wa Gatanu, tariki 19 Gicurasi 2023, nyuma y'iminsi mike yari amaze arwaye.

Mu butumwa buto uyu mubyeyi yanyujije ku rubuga rwa WhatsApp yanditse agira ati “Mwana wanjye warariwe urihangana ukomera gisirikare kugeza ku munota wa nyuma, ariko Imana yagukunze kuturusha. Ugiye tukigushaka ariko twizeye ko aho ugiye ariho heza. Imana ikwakire mu bayo.'

Ni inkuru y'incamugongo yatashye mu muryango wa Mukakamanzi dore ko uyu mubyeyi w'abana batandatu n'abuzukuru batanu yari aherutse gukora impanuka agonzwe n'igare ubwo yari avuye mu rugo iwe agiye ku muhanda kugura ama-unite.

Ni impanuka yahuye na yo tariki 11 Werurwe 2023 ndetse kugeza n'ubu uyu mubyeyi ntarakira imvune yatewe na yo yatumye avunika igufa ry'ikibero. Ibi byatumye asigaye agendera mu kagare.

Mukakamanzi Beatha yamaze igihe kirekire arwariye mu Bitaro byitwa Inkuru Nziza biri i Gikondo mu Mujyi wa Kigali.

Mama Nick yamamariye muri filime zitandukanye zirimo “Intare y'Ingore” akinamo yitwa Cecile, “Giramata” akinamo ari umubyeyi wa Giramata na “City Maid” akinamo ari Mama Nick, iyi ikaba imwe mu zikunzwe na benshi mu Rwanda.

Mukakamanzi Beatha “Mama Nick” ari mu gahinda gakomeye ko gupfusha umwana w'umuhungu

Mama Nick na we amaze amezi abiri agonzwe ndetse asigaye agendera mu kagare

Ubuhinzi bw'imbuto n'imboga ni kimwe mu bimaze kwitabirwa mu Rwanda ndetse benshi bayobotse iyo kubyohereza hanze y'igihugu kuko ari ho isoko rinini riri.

Kuva tariki 9 kugeza 11 Gicurasi 2023, abacuruza imbuto n'imboga bo mu Karere ka Afurika y'Iburasirazuba bagiye mu imurikabikorwa muri Suède basanga nta gicuruzwa cyo mu Rwanda cyo muri iyo ngeri kibarizwa kuri iryo soko.

Umuyobozi wa TearFund mu Rwanda, Emmanuel Andrew Murangira, yavuze babonye isoko rishobora kugura umusaruro w'abahinzi bato bahinga imboga n'imbuto mu Rwanda mu gihe waba ugiyeyo ufite ubwiza bukenewe ku isoko rya Suède.

Kuri uyu wa 19 Gicurasi 2023 ubwo baganiraga n'abacuruza imbuto n'imboga babyohereza hanze y'igihugu yavuze ko bakwiriye gutekereza uko iryo soko barigeraho kuko rifite abantu benshi kandi bakeneye ibiribwa byinshi.

Yagize ati 'Twagombaga guhura n'abo tutajyanye [muri Suède]. Hari isoko rinini ariko rikeneye imbaraga kugira ngo uryinjiremo. Bifasha abahinzi bato dukorana na bo ariko bikanafasha abacuruzi bohereza imboga n'imbuto hanze.'

Yanavuze ko Tearfund ifasha abahinzi bato kugira ngo bageze ibihingwa byabo ku isoko kandi bifite agaciro keza ku buryo bihita bigurwa bigatanga umusaruro.

Murangira avuga ko bakorana n'abahinzi bato ibihumbi 30 mu turere tune two mu Mujyi wa Kigali n'Intara y'Iburasirazuba, kandi imibare igaragaza ko abahinzi bato bagize 80% by'abahinzi bose bo mu Rwanda.

Rwiyemezamirimo w'Umunya-Suède unagura imbuto n'imboga muri iki gihugu, John Berglund, yabwiye aba bacuruzi ko muri Suède imboga n'imbuto bikenewe cyane, igisabwa ari ukuba ufite umusaruro mwiza ushobora guhangana ku isoko mpuzamahanga.

Muri Suède mu cyumweru kimwe bashobora kugura kontineri eshanu za avoka gusa ariko ngo byose bibanza guca mu Mujyi wa Amsterdam bikabona kwinjira muri Suède.

Umucuruzi ujyana hanze imbuto n'imboga, Daniel Muzungu, yavuze ko biteguye kubyaza umusaruro aya mahirwe barangiwe ariko asaba ko inzego zishinzwe guteza imbere ubucuruzi bw'ibyoherezwa hanze na za Ambasade z'u Rwanda mu bihugu baba bagiye gucuruzamo kujya babahuza n'abashobora kubagurira umusaruro.

TearFund ivuga ko amahirwe yo gucuruza imboga n'imbuto atari muri Suède gusa, kuko muri Denmark na Finland na ho bikeneweyo.

Hagati ya tariki 6 na 12 Gicurasi 2023 u Rwanda rwohereje hanze ibikomoka ku mboga n'imbuto byoherejwe ni toni 707.5, aho byinjije 930.989$, ni ukuvuga nibura 1,3$ ku kilo.

Ibihugu u Rwanda rwoherejemo imboga n'imbuto byinshi ni Repubulika Iharanira Demokarasi ya Congo, Leta Zunze Ubumwe z'Abarabu, u Bwongereza, u Bufaransa n'u Buholandi.

Abacuruza imbuto n’imboga baganirijwe ku mahirwe aboneka muri Suède

Uwitije Cyprien wari uhagariye Umuryango w’Ubumwe bw’u Burayi, EU, yavuze ko biteguye gukomeza gutera inkunga imishinga y’ubucuruzi bw’imbuto n’imboga

Umucuruzi ujyana hanze imbuto n'imboga, Daniel Muzungu, yavuze ko biteguye kubyaza umusaruro aya mahirwe barangiwe

Umuyobozi wa TearFund mu Rwanda, Emmanuel Andrew Murangira, yavuze ko abahinzi b’imboga n’imbuto hari amahirwe menshi bashobora kubyaza umusaruro

Abohereza hanze imbuto n'imboga beretswe amahirwe y'isoko ribategereje muri Suède

Mukakamanzi Beatha ukina ari Mama Nick muri filime y’uruhererekane yitwa City Maid ari mu gahinda gakomeye ko gupfusha umwana we w’umuhungu.

Amakuru y’uko uyu mwana w’umusore yitabye Imana, yamenyekanye ku mugoroba wo kuri uyu wa Gatanu tariki ya 19 Gicurasi 2023 ari nawo munsi yapfiriyeho.

Yitabye Imana nyuma y’iminsi mike arwaye. Mu butumwa bwa nyina bwuzuyemo ahahinda, yagize ati “Mwana wanjye warariwe urihangana ukomera gisirikare kugeza ku munota wa nyuma, ariko Imana yagukunze kuturusha. Ugiye tukigushaka ariko twizeye ko aho ugiye ariho heza. Imana ikwakire mu bayo.'

Abuze umuhungu we na we atarakira imvune yatewe n’impanuka ikomeye yakoze tariki 11 Werurwe 2023 akaba agendera mu kagare.

Mama Nick wakinnye muri filime zitandukanye zirimo ‘Intare y’Ingore’, ‘City Maid’ yitiriwe, afite abana 6 ndetse n’abuzukuru 5.

Mama Nick ari mu gahinda gakomeye ko gupfusha umwana we

Umuhungu we yari amaze iminsi arwaye

Hashize iminsi mike u Rwanda ruhuye n'ibiza byahitanye abantu 135, hangirika byinshi mu bikorwaremezo n'imyaka y'abantu irangirika, biturutse ku mvura idasanzwe yaguye mu bice bitandukanye by'igihugu.

Nubwo atari igihamya cya nyuma cy'ihinduka ry'ibihe, abahanga mu by'iteganyagihe babihuza n'ingaruka zaryo ndetse REMA ivuga ko hakenewe amakuru yizewe kandi abonekera ku gihe yerekana ingaruka zishobora kubaho mu bihe biri imbere.

Kuri uyu wa 19 Gicurasi 2023, REMA yatangije amahugurwa ku bakozi 50 b'ibigo bya Leta n'ibyigenga, bari guhabwa ubumenyi mu gusesengura amakuru ajyanye n'imihindagurikire y'ibihe, no gutanga raporo inoze kuri ayo makuru babonye.

Umuyobozi Mukuru wa REMA, Juliet Kabera, yavuze ko kugira ngo habeho ubujyanama ku nzego zifata ibyemezo, bisaba kugira abakozi basobanukiwe amakuru atangwa n'ibigo bishinzwe iteganyagihe.

Yagize ati 'Tuba dukeneye gukoresha imibare ifatika tugendeye ku bipimo by'ubushyuhe cyangwa iby'imvura, niba tubona hagiye kugwa imvura tukabikuramo ubutumwa bwumvikana, tukabikuramo amakuru atuma twakwirinda kubura ubuzima bw'abantu cyangwa ibintu. Ibyo ntitwabigeraho tudafite abakozi babasha gukoresha aya makuru tuba dufite ngo bakuremo amakuru akenewe twashingiraho dufata ibyemezo.'

Kabera avuga ko mbere bakoreshaga abakozi bavuye hanze kugira ngo bafashe mu gutegura aya makuru ariko nyuma y'amahugurwa azamara amezi icyenda bizeye ko abo bakozi bazaba bafite ubushobozi bwo gusuzuma ingaruka z'imihindagurikire y'ibihe mu bigo bakorera.

Umuyobozi Mukuru w'Ishami rishinzwe Imihindagurikire y'Ibihe muri Minisiteri y'Ibidukikije, Cyiza Beatrice, yavuze ko ubumenyi aba bakozi bari guhabwa ari igisubizo ku guhangana n'imihindagurikire y'ibihe mu Rwanda no ku Isi muri rusange.

Ati 'Iyo dufite raporo nziza, irimo amakuru yizewe habaho igenamigambi rinoze. Ntitwakora igenamigambi ry'igihe kirekire tudafite amakuru ateguye neza yo gushingiraho. Ntitwashyiraho politiki nziza hatari amakuru yizewe yashingirwaho.'

Buri myaka ibiri u Rwanda rutanga raporo igaragaza uko ibigo na za Minisiteri bigira uruhare mu kurengera ibidukikije, ikazajya igirwamo uruhare runini n'aba bakozi bari guhugurwa.

Aya mahugurwa atangwa ku bufatantye na Kaminuza ya AIMS, abari guhugurwa bakazahabwa impamyabushobozi ziri ku rwego mpuzamahanga.

Umuyobozi Mukuru wa REMA, Juliet Kabera, yavuze ko bizeye ko nyuma y’amahugurwa abakozi bazaba bafite ubushobozi bwo gusuzuma ingaruka z'imihindagurikire y'ibihe mu bigo bakorera

Umuyobozi Mukuru w'Ishami rishinzwe Imihindagurikire y'Ibihe muri Minisiteri y'Ibidukikije, Beatrice Cyiza

Bategerejweho kuzana impinduka mu bigo bakorera

Abakozi bo mu bigo bitandukanye bari guhugurwa ku gutanga amakuru ku mihindagurikire y’ibihe