Author: webrwanda

Abahanzi b’indirimbo zo kuramya no guhimbaza Imana baheruka gukora ubutwe, Chryso Ndasingwa na Gatete Sharon bavuze inkuru y’urukundo rwabo aho Sharon atabonaga umugabo we nk’umubera umukunzi.

Mu kiganiro n’ikinyamakuru ISIMBI, Chryso Ndasingwa yavuze ko bwa mbere amubona byari 2015 amubona mu rusengero, ngo hari nimugoroba bagiye kuzinga ibyuma yumva umuntu aririmba yumva ijwi riramukuruye ajya guhengereza, icyo gihe yari asoje amashushuri yisumbuye n’aho Sharon ari bwo akiyatangira ari mu wa mbere.

Sharon Gatate yavuze ko inkuru y’urukundo rwabo yatangiye Chryso atangiye kumwigisha kumenyekanisha umuziki we ku mbuga nkoranyambaga.

Aha Chryso yahise amucamo avuga ko gukundana byagoranye kuko yamubwiye ko “ntabwo uri umuntu tuberanye (nturi type yanjye)”

Sharon yahise asobanura impamvu yabivuze ko ari uko yasohoye indirimbo maze ajya gukora “challenge” z’abandi asize indirimbo ye maze Chryso amuhamagara yarakaye amubaza impamvu adakora ibyo yamwigishije, undi yumva ari butsindwe niko gunindura ikiganiro maze aramubwira “ko wakoze igitaramo ukuzuza Arena kuki utatwereka umuntu, yaransubije ngo sindabona uwo duhuza.”

Chryso na we yahise amubwira ko na we yakoze igitaramo mbere ye ariko akaba ntacyo yibwira, niko kumubwira ko na we atarabona uwa nyawe, Chryso yahise amubwira ati “ndumva duhuje ikibazo, ubwo n’igisibuzo kiri hagati muri twe, twakihuza.”

Sharon yahise amubwira ati “ntibishoboka nturi mu bantu njya ntekereza muri ubwo buryo.”

Chryso akimara kubwirwa ko bidashoboka yahise agira ubwoba maze yigira inama yo kumenya ibyo agenderaho kugira ngo bizamufashe ku mukobwa wundi azatereta.

Ngo bagiranye ikiganiro cy’amasaha 8 Sharon amubwira amahame agenderaho, bakababiganiraho mu buryo burambuye, icyo kiganiro ni nacyo cyaje kuba imbarutso y’urukundo rwabo.

Gatete Sharon ati “urumva twaraganiriye noneho nkibaza ubundi abaye ari we byavamo? Nkareba ibyo twganiriye byose nkasanga kuri njye ni byo byose. Urumva twese mu mutima twumvaga duhuje ariko ntawutobora ngo avuge.”

Ndasingwa bagiye gusoza kuvugana yamubwiye ko bagiranye ikiganiro cyiza atifuza ko cyarangirira aho, amubaza niba nta ngamba zafatwa, Sharon yahise amubwira “ngo reka tugerageze, umupira uri mu biganza byawe.”

Chryso kandi yamubwiye ko kugira ngo yemere ko ibyo avuze bimuvuye ku mutima yamara icyumweru ari we ubanza kumwandikira, undi arabikora.

Agaruka ku cyo yakundiye Sharon, yagize ati “byarizanye, nta kintu na kimwe bishingiyeho pe.”

Barakundanye kugeza mu Kwakira 2025 ubwo bakoraga ubukwe, bavuze impamvu bwahindutse ari uko itariki bwari kuzaberaho ari bwo bafite ibitaramo i Burayi mu Bubiligi (tariki ya 23 Ugushyingo 2025)kandi batari bwimure igitaramo.

Bakuyeho urujijo rw’ibyavuzwe ko bakoze ubukwe huti huti kuko Sharon atwite, ngo si byo ahubwo byatewe n’izindi mpamvu z’akazi zanavuzwe haruguru.

Perezida w’Ishyirahamwe ry’Umupira w’Amaguru mu Rwanda, Shema Fabrice, yavuze ko mu mikino yo kwishyura ya Shampiyona hazatangira gukoresha VAR.

Yabigarutseho mu kiganiro n’itangazamakuru cyabaye ku wa Mbere, tariki ya 27 Ukwakira 2025.

Itangazamakuru ryamubajije ikibazo cy’imisifurire kimaze iminsi kigaragara cyane muri shampiyona cyane ko hari abaherutse guhagarikwa by’agateganyo.

Yagize ati 'Muri zone yacu ishami rya VAR riri muri Tanzania ariko nababwiye ko nta kohereza abasifuzi babiri muri 200. Nababwiye ko tuzasaba iyo iri muri Tanzania ikazaza no mu Rwanda bityo tukazahugura benshi.'

Yakomeje agira ati 'Bikunze ni uko imikino ibanza twatangira kuyigerageza [VAR] ku buryo twazatangira kuyikoresha mu yo kwishyura ndetse no muri shampiyona itaha tuyikoresha neza. Icyo nababwira cyo turi mu mavugurura y’abasifuzi ku buryo mu mikino yo kwishyura muri Gashyantare tuzaba dufite VAR itwunganira.'

Shampiyona ya 2025/26 igeze ku Munsi wa Gatanu ariko imwe mu nkuru ziri kugarukwaho cyane ni ibibazo by’abasifuzi, aho bamwe bahagaritswe ndetse n’amakipe menshi akomeje kurega cyane.

Irafasha Sandrine Reponse wamenyekanye mu ruganda rw’imyidagaduro nka Swalla, yavuze ko hari igihe yageze ahura n’ibibazo biramurenga bituma anywa ibiyobyabwenge.

Uyu mukobwa ukina filime Nyarwanda, wifashishwa no mu ndirimbo z’abahanzi aho aheruka kwegukana igihembo cya ‘Best Video Vixen’, yakuriye mu buzima butoroshye.

Swalla mu kiganiro yagiranye n’ikinyamakuru ISIMBI, yavuze ko ari umukobwa wakuriye mu buzima butoroshye.

Mama we yatandukanye na papa we akiri umwana, akaba yarakuriye kwa nyirakuru, akaba harakuze yibaza impamvu umuryango wo kwa se utamukunze cyangwa ngo unamushakishe kandi bazi ko ahari.

Hari ibihe yagezemo akajya yibaza impamvu adafite se, akifuza ko yaba ahari. Ati “hari igihe nagera nkavuga ngo iyaba papa yari ahari ntabwo byari kugenda gutya.”

Yashimiye umugabo wa nyina kuko yamureze nk’umwana we, akamufasha ntacyo yamuburanye, akaba ari na we wamushyigikiye mu rugendo rwe rwa Sinema no kujya mu mashusho y’indirimbo mu gihe nyina atabyumvuga, akamwangira kujyayo rimwe na rimwe akanajyayo yihishe ariko ngo inshuro nyinshi umugabo wa nyina yari abizi.

Swalla yahishuye ko yageze aho anywa ibiyobyabwenge kubera inshuti ye ya bwiraga buri kimwe yari imaze kwitaba Imana.

Avuga ko kuko we atakuranye na mama we, yaje kubana na we akuze byari bigoye ko yamubwira buri kimwe ahuhwo yari afite inshuti magara abwira buri kimwe.

Ati “amaze kwitaba Imana ni bwo natangiye kunywa ibiyobyabwenge ngo mbyirengagize ariko ndashima Imana ko nahise mbivamo, bamfasha gusenga ariko byarangoye muri icyo gihe.”

Ngo uko yageragezaga gufata ibi biyobyabwenge azi ko abyiyibagiza ahubwo yarushagaho kubitekerezaho, byaje gutuma arwara akaremba akajya mo mu bitaro.

Swalla yakinnye anakundwa muri filime zitandukanye nka 'City Maid’, 'The Bishop’s Family’ na 'Inzira y’Umusaraba’.

Niba ufite akanya gato, tera agatebe tuganireho gato kuri shampiyona y’icyiciro cya mbere mu Rwanda umwaka w’imikino wa 2025-26 kuko ndabona izarangizwa n’umugabo igasiba undi.

Ubu nta kipe yemerewe gutsindwa kuko iratsindwa igahita yandika ngo bahane umusifuzi, ngo yasifuye nabi kuko batemera ibyavuye mu mukino.

Uyu mwaka ubanza iriya nzu yegeranye na Controle Technique ifite akazi kenshi, izakira amabaruwa menshi y’ibirego, irabe ifite abacamanza bahagije.

Nk’ubu abasifuzi batatu kandi bose Mpuzamahanga bari mu bihano, Mugabo Eric, Habumugisha Emmanuel bahaw ibyumweru 5, na Ishimwe Claude wahawe ibyumweru 2.

Bagihanwa byari nko gutanga ubutumwa ko n’abandi uzakora ikosa bazabiryozwa.

Kubahana kandi byazamuye igitutu kuri benshi binatuma amakosa yiyongera.

Nta muntu wanze ko bahanwa ariko na none bigakoranwa ubushishozi n’ubwitonzi nta kugendera ku gitutu cy’itangazamakuru n’imbuga nkoranyambaga.

Nubwo batemerewe gutanga ibiganiro ariko ISIMBI yagerageje kwegera bamwe (amazina yabo ni ibanga) bavuga ko ngo iyi ntambara izatuma hari byinshi byangirika kuruta uko bikizwa.

Umwe ati “iki gitutu kirangiza byinshi, ubu umuntu arajya gusifura atekereza abahanwe kuruta gutekereza ku mukino. “

“Harimo kwigengesera kwinshi binatuma hakorwa amakosa menshi, nibadacunga neza hari igihe bazabura abasifura, bose baragiye mu bihano.”

Undi yavuze ko atakwemeza ko ibi ari byiza cyangwa ari bibi ariko na none hakwiye kurebwa ku mategeko.

Ati “imisifurire ni ikintu kigari cyane. Umusifuzi aba agomba gutanga ubutabera atabogamye, habaho gukora amakosa bagahanwa ariko hakarebwa amategeko.”

“Hari igihe usanga abantu bavuga ngo iri kosa yagahawe umutuku, umuhondo ariko ntibazi icyo itegeko rivuga kuko bibaho ko abantu bakora ikosa rimwe umwe agahabwa umutuku undi yarikora agahabwa umuhondo.”

Babona ikihutirwa cyagakozwe ari uko Komisiyo ibashinzwe yabatumizaho, ikabaganiriza ikababwira ko nta gikuba cyacitse kuko nubwo ako kanyafu kaba gakenewe ariko na none ntabwo bose bakomeye mu mitwe kimwe.

Ubu benshi bategereje kureba abazahanwa kuko ukurikije ibaye mbere, n’imikino y’umunsi wa 5 iheruka habayemo amakosa ashobora kuba anaturuka kuri iki gitutu aho amakipe amwe yanamaze kwandika.

Amagaju ni yo yabimburiye andi kwandika aho yanditse isaba ko ikarita itukura yahawe myugariro wayo Rwema Amza ku mukino wa Rayon yakurwaho kuko itariyo, ikosa yakoreye Aziz Basane ridakwiye umutuku.

APR FC nayo yasohoye itangazo igaragaza ko umukino wabahuje na Kiyovu Sports, imisifurire itagenze neza. Ikarita utukura yahawe Ronald Ssekiganda nayo ntabwo bayemera.

Iyo urebye amashusho y’umukino wahuje Bugesera FC na AS Muhanga biragoye kwemeza ko igitego Muhanga yatsinze umusifuzi atabanje gukora ku mupira.

Hari abibaza impamvu umunyezamu wa AS Muhanga, Hategekimana Bonheur atahawe ikarita itukura kandi hari umupira yafatiye inyuma y’urubuga rw’amahina awubuza kujya mu izamu. Byanze bikunze Bugesera nayo iraza kurega niba itamaze kubikora.

Ishyirahamwe ry’Umupira w’Amaguru mu Rwanda rikwiye gufata ingamba zikwiye zikura igitutu kuri aba basifuzi n’aho ubundi shampiyona nikomeza gukinirwa mu baruwa abantu baregana, ntabwo biri buze koroha.

Abakinnyi babiri b’abanyarwanda, Mugisha Bonheur Casemiro na Buregeya Prince bakabije inzozi bahoraga barota zo kugera mu matsinda y’imikino Nyafurika.

Buregeya Prince wakuriye mu ishuri ryigisha umupira rya APR FC akaza kuzamurwa mu ikipe nkuru 2017 baje gutandukana 2024 agiye muri AS Kigali yakinnyemo umwaka umwe ahita yerekeza muri Kenya muri Nairobi United.

Casemiro we yagiye muri APR FC muri 2021 avuye muri Mukura VS aho yari intizanyo ya Heroes, APR FC yayivuyemo 2023 ajya muri Stade Tunisien yavuyemo ajya muri Al Masry yo mu Misiri.

Aba bakinnyi bombi bahuriye ku kuba ubwo bakiniraga APR FC bari bafite inzozi zo kugera mu matsinda ya CAFConfederation Cup, bakaba baraye bazigezeho batari kumwe n’iyi kipe nk’uko babyifuzaga.

Ni nyuma y’uko Nairobi United yo muri Kenya yaraye isezereye Esperance Sportif du Sahel yo muri Tunisia kuri penaliti 7-6, hari nyuma y’uko amakipe yombi yanganyije ibitego 2-2 mu mikino yombi.

Umukino ubanza wabereye Kenya, Nairobi yabatsinze 2-0, umukino waraye ubereye muri Tunisia, Esperance yabatsinze 2-0 bahita bitabaza penaliti maze Nairobi iba ari yo ikomeza.

Ku rundi ruhande, Mugisha Bonheur Casemiro yarimo yandika amateka na Al Masry yo mu Misiri basezerera Al Ittihad yo muri Libya.

Umukino ubanza wabereye muri Libya, amakipe yombi yanganyije ubusa ku busa. Umukino wo kwishyura waraye ubaye Casemiro wakinnye iminota 90 we na Al Masry batsinze 2-1 bahita bagera mu matsinda ya CAF Confederation Cup.

Umutoza wa APR FC, Taleb Abderrahim yemeje ko umunya-Burkina Faso ukinira iyi kipe, Memel Dao, agiye kumara ukwezi adakina kubera imvune yagize ku kirenge.

Ni imvune yagiriye ku mukino wa Mukura VS, wari umukino w’umunsi wa 4 wa shampiyona.

Nyuma y’umukino iyi kipe yaraye inganyijemo na Kiyovu Sports ubusa ku busa, umutoza Taleb yavuze ko agomba kumara byibuze ibyumweru bine hanze y’ikibuga.

Ati 'Yavunitse igufa. Ni inkuru mbi kuri twe n’abakunzi ba APR. Yari yaje gushyigikira bagenzi be kuko azamara hagati y’ibyumweru bitatu na bine adakina.'

Dao warabye uyu mukino yaje agendera ku mbago, yiyongereye kuri rutahizamu Cheikh Djibril Ouattara wagize ikibazo cy’amazi mu bihaha akaba ataragaruka.

Taleb kandi yavuze ko Mamadou Sy wahagaritswe yamaze kugera mu Rwanda ndetse vuba bamwakira mu ikipe.

Ati “Mamadou Sy mwamubonye yaraje avuye iwabo yari yaje gushyigikira bagenzi be. Yakoze amakosa kandi yemera ibihano yahawe anasaba imbabazi, vuba turamugarura mu ikipe akine.”

Kuri Dauda nta byinshi yamugarutseho uretse kuba ari umukinnyi na we wahanwe kimwe na Mamadou Sy kubera imyitwarire mibi bagaragaje mbere y’umukino wa Pyramids akaba ari igihombo kuba adahari, gusa mu minsi ishize yari yavuze ko bombi bazaganirizwa bakagaruka mu ikipe.