Author: webrwanda

Umuhanzikazi Irene Ntale yongeye guhakana inkuru zimaze imyaka zivugwa ko Vinka yaba yarigeze kumubera umujyanama igihe bakibarizwa muri Swangz Avenue.

Ubwo uyu muhanzikazi yavaga mu nzu ifasha abahanzi ya Swangz Avenue mu buryo butavuzweho rumwe, hari abahise bavuga ko yasimbuwe na Vinka, ndetse ko uwo muhanzi mushya yari amaze kwigarurira abayobozi b’iyi nzu ifasha abahanzi.

Hanakomeje gucicikana inkuru zavugaga ko Vinka yakoraga nk’umujyanama wa Ntale, agatunganya byose bijyanye n’ibiganiro yagiranaga n’itangazamakuru n’akazi k’ingenzi ka buri munsi ka Ntale.

Ariko mu kiganiro yagiranye n’umunyamakuru Shalom Kaweesi, Ntale yavuze ko ayo makuru yagoretswe ku bushake ndetse anahamya ko ari ibihuha byakomeje gukwirakwizwa ariko bidafite ishingiro, ndetse ahubwo avuga ko ari we wagize uruhare mu gutahura impano ya Vinka mbere y’uko amenyekana.

Ati 'Ni inkuru bashyize hanze nyuma, bavuga ko umujyanama wanjye yansimbuye. Sinzi impamvu abantu bamwise umujyanama wanjye. Abajyanama banjye nyakuri ni ba nyiri Swangz Avenue, Kyazze na Benon. Vinka we yari umuntu usanzwe twakoranaga imirimo ya buri munsi nk’umuhanzi mugenzi wanjye ariko si umujyanama.'

Ntale anavuga ko ari mu ba mbere babonye impano idasanzwe ya Vinka mu muziki, avuga ko buri gihe mbere y’uko Vinka ajya gukora indirimbo, yamutumiraga muri studio bagakorana imyitozo y’ijwi, ndetse akamwereka uburyo bwo kwitwara mu muziki nk’umuntu wamubonagamo ubushobozi budasanzwe.

Ntale yasobanuye ati 'Twari tuziranye nk’umubyinnyi mwiza, ariko igihe yafunguraga akanwa agasohora amajwi, nabonaga ko ari umuhanzi munini ushobora kuzamuvamo.'
'Igihe yatangiye kuririmba, nari mbizi mbere y’uko igihugu kibimenya. Nari nkiri muri Swangz ubwo yambwiraga ko agiye gutangira kuririmba. Namuhamagaraga kenshi muri studio, tugakora imyitozo y’ijwi.'

Ntale yanibukije ko nta na rimwe Vinka yahawe inshingano zo kuyobora ibikorwa bye bya muzika. ahubwo ngo bari bafitanye imikoranire isanzwe nk’abahanzi babanaga mu nzu imwe ibafasha, ariko nta nshingano z’ubujyanama Vinka yari amufiteho.

Ibi byatangajwe n’uyu muhanzikazi wakoranye indirimbo 'Guluma’ na Jules Sentore, bije bisobanura byinshi mu bihuha byo mu myaka yashize, aho abakunzi b’umuziki bakomeje kwemeza Vinka nk’umujyanama we.

Ntale yahakanye ko Vinka yigeze kuba umujyanama we

Nyuma y’ibaruwa ya RGB yagiye hanze isesa inzego zose za Rayon Sports zirimo n’Inteko Rusange, icyahise cyiza mu mitwe ya benshi ni ukwibaza ubu umunyamuryango wa Rayon Sports uwo ari we.

Tariki ya 25 Ugushyingo 2025 ni bwo nyuma y’ibibazo by’ubwumvikane buke bushingiye ku miyoborere, RGB yasheshe inzego zose za Rayon Sports hashyirwaho komite y’agateganyo iyobowe na Murenzi Abdallah mu gihe cy’amezi atatu.

Tariki ya 27 Ugushyingo 2025 RGB kandi yanditse ibaruwa imenyesha ko n’Urwego rukuru (Inteko Rusanze) narwo rwasheshwe ubu nta bushobozi rugifite.

Hari nyuma y’izindi nzego 4 zari zasheshwe ari zo Komite Nyobozi ya Rayon Sports iyobowe na Twagirayezu Thaddée, Inama y’Ubutegetsi iyobowe na Paul Muvunyi, Komite Ngenzuzi n’Akanama Gashinzwe gukemura amakimbirane.

Kugeza aka kanya ubu nta munyamuryango Rayon Sports wemerewe kwitabira Inteko Rusange ndetse Murenzi Abdallah nabo bafatanyije kuyobora inzibacyuho ni bo ba nyiri Rayon Sports.

Harakurikiraho iki?

Mu nshingabo bahawe gukora muri aya mezi atatu harimo kuvugurura amategeko nshingiro y’umuryango Rayon Sports ku buryo hatazongera kubaho ibimeze nko kugongana kw’inzego.

Harimo kandi gutoresha ubuyobozi bushya bwa Rayon Sports. Aha ni ho abantu bibariza uko ubuyobozi buzajyaho kandi Inteko Rusange yarakuweho.

Mu busanzwe Inteko Rusange ni rwo rwego rukuru runatorerwamo ubuyobozi bw’Umuryango.

Kuri ubu abitabiraga Inteko Rusange ni Fan Clubs, akaba ari nazo zatoraga ubuyobozi bwa Rayon Sports, kuba rero barukuyeho benshi baribaza abanyamuryango bazatora.

Abazatora byose bizashingira ku mategeko azavugurura, agashyiraho inzego n’inshingano zifite n’icyo zizajya zikora.

Muri aya mategeko ni nayo azagena abanyamuryango ba Rayon Sports bazajya bitabira Inama y’Inteko Rusange izajya inafata ibyemezo ikanatora abayobozi.

Amakuru avuga ko kuba ububasha bwari bwarahawe Fan Clubs (Abayobozi ba fan clubs ni bo bitabiraga bakanatora) hari abandi bantu bafite ubushobozi bafasha ikipe ariko nta Fan Club babarizwamo, abantu kandi bakwiye kwitabira Inteko Rusange, rero ayo mategeko azavugururwa azaba yarahuje izo Mpande zose maze agene abazajya bitabira Inteko Rusange.

Uyu munsi ni bwo hari bube ihererekanya bubasha hagati ya Komite y’Inzibacyuho na Komite Nyobozi n’iy’Inama y’Ubutegetsi zaseshwe.

Inzego za Rayon Sports zose zaraseshwe

Amategeko mashya ni yo azagena abanyamuryango bazajya bitabira Inteko Rusange

Umuraperi Ish Kevin ndetse na Miss Kalimpinya Queen, bategerejwe i Rwamagana ku munsi wa nyuma wa shampiyona yo gusiganwa mu Madoka (Rally des Mille Collines) aho bombi bafite amahirwe yo kuyegukana.

Uyu munsi wa nyuma wa Shampiyona y’Amamodoka (Rally des Mille Collines) uzakinwa ku wa Gatandatu tariki ya 6 Ukuboza 2025 ubere i Rwamagana mu Ntara y’Iurasirazuba, ni mu gihe uheruka wari wabereye i Huye.

Uzitabirwa n’abakinnyi b’abanyarwanda gusa kuko abakinnyi bo muri Uganda bagombaga kuzaryitabira bagize ikibazo cy’amikoro, uwabemereye inkunga ntiyayibahaye.

Ni isiganwa ryari riteganyijwe kuzaba iminsi ibiri ariko bitewe n’impamvu zitandukanye rikaba rizaba umunsi, mu bakinnyi bazaryatabira harimo Miss kalimpinya Queen umaze kumenyerwa mu gusiganwa mu Madoka ndetse n’Umuraperi Ish Kevin.

Iyi shampiyona ikinwa mu byiciro bibiri hari icyiciro cy’imodoka zikururira hose zizwi nka 'Four by four cyangwa four-wheel drive (4WD)' ndetse n’izikururira imbere zizwi nka 'two-wheel drive (2WD)'.

Muri ibyo byiciro byose nta na kimwe shampiyona iragenda ariko mu zikururira hose, Miss Kalimpinya Queen ni we uri imbere mu manota ndetse akaba ahabwa amahirwe yo kuba yakwegukana irushanwa.

Mu cyiciro cy’imodoka zikururira imbere, Rutabingwa Gratien na Ish Kevin ni bo bari imbere mu manota ndetse uzaza imbere y’undi ni we uzegukana shampiyona.

Kugeza ubu abamaze kwiyandikisha kuzitabira umunsi wa nyuma wa Rally de Mille Collines ni 8 mu gihe hari n’abandi babiri bashobora kwiyongeraho.

Ish Kevin iki cyumweru gishobora gusiga atwaye Rally des Milles Collines

Miss Kalimpinya afite amahirwe yo kwegukana shampiyona mu cyiciro cy’imodoka zikururira hose

Umunyamabanga Mukuru w’Ishyirahamwe ry’Umupira w’Amaguru mu Rwanda (FERWAFA), Bonnie Mugabe yasabye abakozi b’iri shyirahamwe kumenya ko amakuru aba afite uburyo asohokamo atanzwe n’urwego rubifitiye aburenganzira rero abajya kuyatanga mu tubari, ntabwo bazumvikana.

Bonnie Mugabe wagizwe umunyamabanga mushya wa FERWAFA aho yanatangiye inshingano kumugaragaro ejo hashize tariki ya 1 Ukuboza 2025, yabigaritseho ubwo hari hamaze kuba ihererekanya bubasha hagati ye na Mugisha Richard wari umunyamabanga w’agateganyo.

Yabwiye abakozi ba FERWAFA ko guhera ku muzamu (security) kugeza no kuri perezida buri wese aba afite inshingano ze kandi agomba kuzubahiriza.

Kugira ngo bagere ku cyerekezo bihaye bagomba guhindura uburyo bw’imikorere kandi ko nta bandi bakozi bahari uretse bo kugeza igihe babona ko bitagishoboka, yanabibukije ko bagomba kwitegura gukorera ku gitutu.

Ati 'Ni mwe bakozi muri hano kugeza igihe tuzagira kuri gahunda yindi (Plan B), ariko aho si ho nshaka ko tugana, muhindure imitekerereze, mutekereze byagutse, tugiye gukorera ku gitutu, niba mutiteguye gukorera ku gitutu ndababwiza ukuri ntabwo bizavamo.'

Yakomeje avuga ko bagomba kumenya ko ubu abantu bumvaga ko muri weekend batakora, abumvaga ko saa 17h baba bagashoje akazi kabo bitazakunda.

Ati 'Sinzi uko ubu bimeze ariko abantu batakoraga muri weekend, ku wa Mbere kugeza ku wa Gatanu ukumva ko inshingano za we zarangiye, saa 9h00′ kugeza saa 17h ukumva ko akazi ka we karangiye, ntabwo bizakunda, tugomba guhindira imitekerereze, muhindure kugira ngo twese dushobore kugera ku ntego twifuza kugeraho.'

Bonnie Mugabe kandi yahanangirije abatangaza amakuru y’ibibera muri FERWAFA mu tubari, avuga ko Ibiro by’Ubunyamabanga ari byo bifite mu nshingano gutanga amakuru ndetse n’abashinzwe Itangazamakuru n’Itumanaho mu gihe babiherewe uburenganzira.

Ati 'Amakuru agomba gusohoka bifitwe mu nshingano n’Ibiro by’Ubunyamabanga ndetse n’Ibiro by’Itangazamakuru n’Itumanaho mu gihe byabiherewe uburenganzira, mumenye ko mukorera ikigo kigomba kugendera ku murongo, nta wagutumye ngo ujye gutangaza ibibera muri FERWAFA muri utwo tubari mu biganiro.'

Yashimanagiye ko niba no mu masezerano yabo hatarimo ingingo igaruka ku kubika amabanga y’ikigo bakorera bigomba kongerwamo kuko buri kigo kigomba kugira uko gikora.

Bonnie Mugabe yasimbuye kuri uyu mwanya Mugisha Richard wari uwuriho by’agateganyo abifatanya no kuba Visi Perezida wa FERWAFA ushinzwe Tekinike.

Yize amasomo ajyanye n’Imiyoborere n’Imicungire y’Umupira w’Amaguru yakurikiraniye muri Kaminuza ya Leicester mu Bwongereza, akaba atangwa ku bufatanye bw’ikigo cya CIES n’Ishyirahamwe ry’Umupira w’Amaguru ku Isi (FIFA).

Nyuma yo guhererekanya ububasha na Mugisha Richard, Bonnie Mugabe yabwiye abakozi ba FERWAFA imirongo migari bagomba gukoreraho

Nyum yo kwegukana imodoka mu bihembo bya Mashariki, Kecapu yashimiye umugabo we umuhora hafi umunsi ku munsi akanamushyigikira mu rugendo rwe rwa sinema.

Mu kiganiro yagiranye na ISIMBI, Mukayizeri Djalia wamamaye muri sinema nyarwanda nka Kecapu yatangaje ko umugabo we, Mutabazi Jean Luc amufata nk’umuntu udasanzwe mu byo amaze kugeraho nk’umukinnyi wa filime kubera ko nubwo yasaga nk’uri ku ruhande rw’ubuzima bwo kwamamara, yamufashe akaboko akamutera imbaraga kugeza yisanze ageze ku byo atatekerezaga ko yageraho.

Ati 'Ubutwari bwa Mutabazi buturuka ku kuba ari umuntu wakuze atari umuntu wamamaye akaza kugira umugore ubibamo ariko ntavuge ngo njyewe ngire ubuzima bwanjye mbikomeze nawe agire ubwe gusa ntabwo ibyo yabikoze ahubwo yamfashe akaboko akomeza kunshyigikira.'

Kecapu yanavuze ko Mutabazi amugira inama akamurebera kure ibyo yakagezeho ndetse ko hari igihe yajyaga amwibutsa kwitabira ibifite aho bihuriye n’uyu mwuga wo gukina amafilime kandi nyuma bikaza kurangira bimubyariye umusaruro.

Ati 'Ntureba hari ibintu bimwe na bimwe ntari buvugire hano ariko hari nk’ibikorwa bimwe mba ntashaka kujyamo akambwira ngo 'oya bijyemo’ kandi nagerayo nkasanga bya bintu bingiriye umumaro cyangwa iyo ntabikora nkabona byari kuba bibi cyane andebera kure kurusha aho nareba.'

Usibye kuba imodoka nk’igihembo nyamukuru gihabwa abatsinze mu cyiciro cya 'People’s choice’ zarabaye ebyiri zikava kuri imwe yatangwaga mu myaka yashize Kecapu yashimiye abategura ibihembo bya Mashariki by’umwihariko abo mu gisata cy’abahize abandi muri sinema kubera ubutabera bagaragaje mu mitangire y’ibi bihembo.

Ati 'Ubutabera bwaratanzwe cyane rwose Kecapu ninjye wari ukwiye imodoka, ni nanjye wayibonye. Njyewe nka Nelly iyo nza kuba ndi mu batanga ibihembo nari buyihe Kecapu kuko ni we wari uyikwiye.'

Uyu mukinnyi wamenyekanye mu ruhererekane rwa filime 'Bemenya’ yanakomoje ku magambo yari amaze acicikana ku mbuga nkoranyambaga nyuma yuko we na Benimana Ramadhan uzwi nka Bamenya begukanye imodoka ebyiri nshya zo mu bwoko bwa Hyundai Sonata, nyuma yo guhigika bagenzi babo mu bihembo bya Mashariki.

Kecapu yerekanye ko nubwo hakomeje kuvugwa ko baba barakoresheje amafaranga y’umurengera mu kwitora kugira ngo bazamure umubare w’amajwi yabafashije guhigika bagenzi babo we na Bamenya bari bakwiriye iki gihembo bijyanye n’imbaraga n’umuhate babishoyemo kuva mu myaka yatambutse kugeza magingo aya.

Ati 'Bamenya yakinnye filime zikijya kuri za C.D, yagurishije ikibanza cye atangira gushora muri filimi, Bamenya hari filime yakinnyemo zikamuzanira ibibazo, azi imvune za sinema muri rusange iyo haza kuba harimo n’inzu nk’igihembo kirenze imodoka bakamuretse akayitwara.”

'Kuri njyewe simbona ko ntari nkwiriye imodoka kuko maze imyaka irenga 10 muri sinema, iyo myaka mazemo mfite ibyo nakoze kandi hari benshi byagiriye umumaro hari n’abantu benshi barengaho bakadukunda.”

Mu cyiciro cy’abagore, Kecapu yagize amajwi 70,208, akurikirwa na Intare y’Ingore wagize 32,317. Amajwi yose mu cyiciro cy’abagore yari 126,948, angana n’agaciro ka 25,389,600 Frw. Ku ruhande rw’abagabo, Bamenya yegukanye umwanya wa mbere ku majwi 80,748, mu gihe Boss Rukundo yabonye 14,320.

Kecapu yashimiye umugabo we umushyigikira umunsi ku munsi

Yavuze ko iyi modoka yahawe yari ayikwiye

Itsinda ry’abahanzikazi bo mu gihugu cya Uganda, Kataleya & Kandle ryaciye ururondogoro imbuga nkoranyambaga nyuma yo kwemeza ku mugaragaro ko Sheebah Karungi ari we muhanzikazi wicaye ku ntebe y’ubwamikazi mu muziki wa Uganda.

Ubwo aba bakobwa bari mu kiganiro bagiranye na radio ya Galaxy FM, ntabwo bigeze bita ku mpaka zari zimaze iminsi zivuga ku bahanzi barimo Cindy Sanyu na Ava Peace bari basanzwe biyita abamikazi mu muziki w’iki gihugu, bemeje ko babona Sheebah nk’umuhanzi wo gushima mu bababanjirije kandi ugifite imbaraga.

Muri iki kiganiro, Namakula Hadiijah uzwi nka Kataleya na Nabatuusa Rebecca Robins ukoresha amazina ya Kandle bagaragaje ko imyaka ine bamaze mu muziki yabahaye isomo rikomeye ku nzitizi zihari, bityo ikaba ibafasha kurushaho kubaha Sheebah nk’umuhanzikazi wamaze kuzamuka ku rwego rwo hejuru akanaguma ku gasongero mu myaka irenga icumi.

Bati 'Tumaze imyaka ine gusa, ariko ibyo twanyuzemo ni byinshi kandi birakomeye. None se niba Shebaah amaze imyaka irenga icumi ahangana ntitwagira icyo tumuvugaho? Kubona agihagaze mu muziki uyu munsi ni ikintu gikomeye cyane ndetse akwiye kubiherwa ikamba ry’ubwamikazi w’umuziki wa Uganda.'

Ibi bije bisubiza mu buryo bweruye impaka zari zimaze iminsi zishamikiye ku magambo y’uwitwa Ava Peace, uherutse kwiyita 'new generation Queen,' ibintu byahise biba imbarutso y’urukurikirane rw’amagambo menshi ku mbuga nkoranyambaga no mu bitangazamakuru.

Mu kubikomozaho, Kataleya & Kandle bavuze ko babona ko kwiyita 'Queen' atari byo bikwiye gushyirwaho imbaraga, ahubwo ko uwo mukoro wo kugena ugomba kubyitwa bigomba guharirwa abafana.

Bati 'Ni byiza kwiyemera no kwiyita umwamikazi w’umuziki, ariko tugomba kubirekera abafana bakaba ari bo babyemeza. Ni bo badutega amatwi, ni bo batugira abo turi bo. Sheebah ni umuhanzi w’umugore muri Uganda, ariko sinigeze numva yiyita ngo ni we Queen. Ni abafana babimushyiraho.'

Mu mwaka wa 2021 ni bwo aba bahanzikazi bakoze indirimbo zirimo 'Muzibe wa love', 'Tonafuya' na 'Do me' zakunzwe cyane byemezwa ko zatumye batangira gutekerezwa nk’ibyamamare by’ahazaza mu muziki wa Uganda.

Iri tsinda ribona Sheebah Karungi akiwye icyubahiro kirenze bitewe n’ibyo yakoze

Sheebah Karungi bamufata nk’umwamikazi w’umuziki wa Uganda

Babona Cindy Sanyu atari ku rwego rwa Sheebah Karungi

Urwego rw’Igihugu rw’Ubugenzacyaha (RIB) rwatangaje ibishobora gutuma umuhanzi Yampano ndetse n’umugore we bashobora kwisanga batawe muri yombi nyuma y’uko bagaragaye mu mashusho y’urukozasoni amaze iminsi akwirakwira ku mbuga nkoranyambaga.

Mu kiganiro n’itangazamakuru cyabaye kuri uyu wa mbere tariki ya 1 Ukuboza 2025, Dr.Murangira B Thierry, Umuvugizi wa RIB yasobanuye ko urwego avugira ruri gukora iperereza ryimbitse ku ruhare rw’umuhanzi Uworizagwira Florien uzwi nka Yampano ndetse n’umukunzi we Uwineza Diane mu ishyirwa hanze ry’aya mashusho.

Ati 'Kumva ko Yampano yatabwa muri yombi birashoboka kuko n’ubu turi gukora iperereza ku uruhare rwe mu ishyirwa hanze ry’aya mashusho y’urukozasoni, nibimuhama icyo gihe we n’uwo yagaragaye ari kumwe na we bazabihanirwa .'

Dr. Murangira yanashimangiye ko nk’urwego nyubahiriza tegeko bashyira mu bikorwa uko itegeko ryanditswe kandi rikemezwa na Nyakubahwa Perezida wa Repubulika aho kuba byakubahirizwa hashingiwe ku myumvire y’umuntu ku giti cye, yanahamije ko iyo haza kuba haragendewe muri uwo mujyo, Yampano yagakwiye kuba yarafunzwe ku ikubitiro hagicicikana ariya mashusho.

Yanakomeje avuga ko hashingiwe ku ngingo ya 34 y’amategeko ateganya ibyo gukumira ibyaha bikorewe ku mbuga nkoranyambaga cyangwa se ku ikoranabuhanga ryitsa ku byo 'gushyira ahagaragara amashusho cyangwa amafoto agaragaza imikoreshereze y’ibitsina hakoreshwe telephone cyangwa mudasobwa' ari byo byatumye hihutirwa guta muri yombi abasakaje aya mashusho kuruta abayifashe cyangwa abayagaragayemo.

Urwego rw’Igihugu rw’Ubugenzacyaha, RIB rwatangaje ko kugeza ubu rumaze guta muri yombi abantu bagera kuri batanu rubakurikiranyweho gusakaza aya mashusho y’uyu muhanzi wamenyekanye mu ndirimbo nka 'Ngo’.

Aba batanu bamaze gutabwa muri yombi ni Cyprien Uzabakiriho wamenyekanye nka Djihad, Kwizera Nestor ukunda kwiyita Pappy Nesta, Ishimwe Patrick uzwi nka Pazzo Man, Kalisa John uzwi nka K John na Ishimwe François Xavier.

RIB yibukije urubyiruko ko rukwiye kujya rwirinda kuba ba nyirabayazana b’igisebo, urubwa no gutakarizwa icyizere no kugaragara nk’ibyomanzi muri sosiyete bishobora kubabaho bishingiye ku mashusho y’urukozasoni bifata.

Yampano, RIB yavuze ko ashobora gufungwa iperereza riramutse rigaragaje uruhare rwe mu gusakaza amashusho ye y’urukozasoni