Author: webrwanda

SKOL Brewery Ltd yihaye intego yo gufasha urubyiruko mu Rwanda kubona uburezi bufite ireme, binyuze mu kubishyurira haba mu mashuri yisumbuye yigisha ubumenyi rusange cyangwa imyuga ndetse na Kaminuza.

Abanyeshuri 58 bishyuriwe amafaranga y'ishuri muri uyu mwaka w'amashuri bari mu mashuri yisumbuye, ndetse bagize icyiciro cya gatatu cy'iyi gahunda yatangijwe bwa mbere muri 2021.

Aba bana bishyurirwa amafaranga y'ishuri ni abo mu miryango y'abakozi b'uru ruganda. Bishyurirwa ku bufatanye n'umwe mu batangije uru ruganda, Maïté Relecom.

Iyi gahunda igaragaza uburyo uru ruganda ruhora rwiteguye gushora imari mu iterambere ry'urubyiruko nyarwanda by'umwihariko abakomoka mu miryango y'abakozi barwo, bafashwa kugera ku burezi n'ibisabwa byose ngo bube bwuzuye, kandi barusheho gutera imbere mu bumenyi.

Maïté Relecom nk'umuterankunga yagize uruhare rukomeye mu gutuma iyi ntego igerwaho.

Mu myaka itatu iyi gahunda imaze, yatanze umusaruro ushimishije kuko abana 187 b'abakozi bakora mu ruganda rwa Skol bishyuriwe amashuri yisumbuye, mu gihe abandi 18 bishyuriwe amashuri mu cyiciro cya mbere cya kaminuza.

Ubuyobozi bwa Skol na Maïté Relecom bagaragaje ko bashimishijwe cyane n'uburyo iyi gahunda igira uruhare mu guhindura ubuzima bw'abagenerwabikorwa no ku muryango mugari.

Bahamya ko uko iyi gahunda ikomeza kwaguka, na SKOL Brewery Ltd ikomeje intego yayo yo gufasha mu burezi urubyiruko rw'ubu n'uruzaza, ibaha ubushobozi bubafasha kugera ku nzozi zabo kandi bakazagirira umuryango mugari akamaro.

Umukino w’umunsi wa 9 wa shampiyona wagombaga guhuza Rayon Sports na APR FC ntukibereye kuri Kigali Pelé Stadium kubera ko iki kibuga kizaba kirimo kuvugururwa.

Mu ibaruwa Umujyi wa Kigali yandikiye Ishyirahamwe ry’Umupira w’Amaguru mu Rwanda barimenyesha ko kuva tariki ya 23 kugeza 29 Ukwakira 2023 iki kibuga kitazaboneka kubera ko hazaba harimo hakorwa imirimo yasigaye ubwo bayivugururaga.

Muri iyi baruwa Umujyi wa Kigali yagize iti 'dushingiye ku ngengabie y’ikigo Real Constructors LTD cyubaka Kigali Pelé Stadium cyamenyesheje Umujyi wa Kigali ko kuva tariki ya 23 Ukwakira 2023 kugeza tariki ya 29 Ukwakira 2023 icyo kigo kizasubukura ibikorwa by’ubwubatsi byari bisigaye gukorwa kuri Kigali Pelé Stadium.'

'Kubera iyo mpamvu turabamenyesha ko imikino yose yari iteganyijwe kubera kuri Kigali Pelé Stadium kuva tariki ya 23 Ukwakira kugera tariki ya 29 Ukwakira 2023 yakwimurirwa ikindi gihe.'

Bivuze ko hazabera imikino y’umunsi wa 8 iteganyijwe mu mpera z’iki cyumweru mu gihe imikino y’umunsi wa 9 itazahabera.

Mu mikino y’umunsi wa 9 nibwo hazaba umukino uzahuza APR FC na Rayon Sports tariki ya 29 Ukwakira 2023 kandi ukaba wagombaga kubera kuri Kigali Pelé Stadium, bivuze ko ugomba kujya mu Ntara.

Umukino wa APR FC na Rayon Sports ntukibereye kuri Kigali Pele Stadium

Olivier yabigarutseho kuri uyu wa Kabiri tariki 17 Ukwakira 2023, mu kiganiro n’itangazamakuru cyabereye kuri BK Arena, yahuriyemo n'Umuyobozi mukuru w’ishami ry’ubukerarugendo no kubungabunga za Pariki muri RDB, Kageruka Ariella, Umuyobozi Ushinzwe imenyekanishabikorwa muri RwandAir, Haba Adijah Kamwesiga n'Umuyobozi w'ikigo Q&A Solutions, Kyle Schofield.

Ibi birori byo gutanga ibi bihembo bizahuriza i Kigali, abanyamuziki mu ngeri zinyuranye, abashoramari, abikorera, abo mu nzego za Leta n’abandi baturutse mu bihugu bitandukanye byo ku Isi.

Ni ibirori bizamara iminsi itatu kuva ku wa 20 Ukwakira kugeza ku wa 23 Ukwakira 2023. Ku mugoroba wo ku wa Gatanu, hazaba ibirori byo gufungura ku mugaragaro itangwa ry’ibi bihembo n’iserukiramuco, aho hazatangwa n'ibiganiro binyuranye bizagaruka ku muziki.

Olivier yasobanuye ko bitari byoroshye gutegura itangwa ry’ibi bihembo, ariko ko hamwe n’abaterankunga ‘byarashobotse’. Avuga ko abahanzi bazaririmba muri ibi bihembo barimo abo mu Mujyi nka Lagos, Paris, Johannesburg n’ahandi batangira kugera mu Rwanda kuva kuri uyu wa Gatatu.

Ati “Icya mbere na mbere rwari urugendo rutoroshye gutegura igikorwa nk’iki ariko turashimira abafatanyabikorwa, twarabikoze.”

Bamwe mu bahanzi bazagera mu Rwanda bifashishije indege zabo bwite, abandi bazakoresha indege za RwandAir. Yavuze ko abahanzi barenga 60 ari bo bazitabira, ariko abazaririmba bararenga 50.

Kandi byateguwe ku buryo abahanzi bazaririmba mu matsinda, nibura babiri babiri mu gihe cy'iminota 12, harebwa indirimbo bahuriyeho cyangwa ikindi.

Olivier yavuze ko imyaka ibiri yari ishize bakorana n’Ikigo cy’Igihugu cy’Iterambere (RDB) mu gutegura ibi bihembo, aho bazaba bizihiza imyaka 20 ishize Trace Africa igira uruhare mu kuzamura abahanzi.

Yavuze ko bageze kuri 98% bitegura itangwa ry’ibi bihembo, kandi bari gukorana n’abantu barenga 200 mu gutegura iki gikorwa kugira ngo kizagende neza.

Olivier yavuze ko abariyemo ibimaze gukorwa birimo kumenyekanisha iki gikorwa mu itangazamakuru Mpuzamahanga, ibigo bitandukanye bari gukorana n'ibindi u Rwanda rumaze kumenyekana ku rwego mpuzamahanga ku gaciro k'angana n'amadorali Miliyoni 58 [68,200,000,000 Frw].

Ati “Igihugu cyanyu kiramenyekana ku rwego rw’Isi binyuze muri aka gaciro k’amafaranga Miliyari 68 Frw…”

Yavuze ko bari mu murongo mwiza wo kuzagira ibirori byiza, kandi ko muri uyu mwaka bahisemo gushora mu gutegura iki gikorwa. Anavuga ko iyo baza guhitamo kwishyura abahanzi, iki gikorwa cyari kuba kibarirwa nibura Miliyari 100 Frw.

Ibi bihembo bigiye gutangirwa i Kigali ku bufatanye n'ibigo birimo wanda Convention Bureau (RCB), Visit Rwanda, RwandAir, RBA, the BK Arena, Kiss FM, VW Move, the Kigali Conference & Exhibition Village (KCEV), Alpha Entertainment, Shoplife, Betpawa ndetse n'uruganda rwa Bralirwa.

Bizatangwa ku wa 20-22 Ukwakira 2023 muri BK Arena no muri Kigali Conference and Exhibition Village ahazwi nka Camp Kigali.

Ibirori byo gutanga ibi bihembo bizatambuka imbona nkubone ku nyakira-mashusho za Trace Africa, kuri Radio zitandukanye, kuri shene za Youtube, ku buryo abantu bo ku Mugabane w'u Burayi no muri Leta Zunze Ubumwe za Amerika bazabasha kubireba.

Imibare igaragaza ko ibi birori bizarebwa n'abantu barenga Miliyoni 500 mu bihugu 190 byo ku Isi.

Trace Awards& Festival izaririmbamo abarimo Ish Kevin, Kenny K-Shot, Bruce Melodie, Sema Sole, Angell Mutoni, Boy Chopper, Mike Kayihura n'abandi.

Mu birori byo kwerekana imyambaro yahanzwe, inzu z'imideli zirimo Sonia Mugabo, Inzuki, KT’SOBtE, Maison Munezero, Uzi Collection, Rwanda Clothing, N’intoki, Ki-pepeo Kids, Wearfragile, Bibi Creations, Kalunza, Gahaya Links, Irebe, Mwinda, Tugirimana, Art Rwanda Ubuhanzi, KomezArt, Wood Habitat, Lisa Marler, Laini, In Wo bazagaragaza ibyo bahanze.

Itangwa ry’ibi bihembo rizaba ku wa 20 Ukwakira 2023 guhera saa kumi n’ebyiri z’umugoroba muri BK Arena, kandi bizatangira guca kuri Televiziyo guhera Saa mbili z’ijoro.

Olivier avuga ko umuhango wo gutanga ibi bihembo uzamara amasaha ane kubera abahanzi benshi bazaririmba. Ibi bihembo bihataniwe mu byiciro 26, kandi hari abahanzi bahatanye mu byiciro birenze bine.

Ibi birori bizaririmbamo abahanzi barimo Bruce Melodie, Sema Sole, Kivumbi King, Angell Mutoni, Chriss Eazy, Bwiza, Boy Chopper, Mike Kayihura, Soweto Gospel Choir, Janet Otieno wo muri Kenya, umuramyi Levixone wo muri Uganda, Benjamin Dube wo muri Afurika y'Epfo;

Nomcebo wamamye mu ndirimbo 'Jerusalema', Roselyne Layo, Gerilson Insrael, Soraia Ramos, Lisandro Cuxi, Azawi, Donovan BTS, Terell Elymoor, Gaei, MIKL, Segael, Goulam, DJ Illans, Davido, Yemi Alade, Rema n'abandi.

Abahanzi bose batangajwe bazaririmba mu gutanga ibi bihembo ku wa 20 Ukwakira 2023, ndetse bamwe muri bo bazaririmba mu birori by'imideli bizahera.

Olivier Laouchez uyobora Trace Group yatangaje ko u Rwanda rumaze kungukira Miliyari 68 Frw muri Trace Awards- Ni agaciro k'ibimaze gukorwa mu kumenyekanisha u Rwanda ko ariho hazatangirwa ibihembo

 

Umuyobozi mukuru w’ishami ry’ubukerarugendo no kubungabunga za Pariki muri RDB, Kageruka Ariella, yasabye abanyarwanda kubyaza amahirwe atangwa n'ibikorwa mpuzamahanga u Rwanda rwakira

Ni ubukwe butegerejwe n'imbaga ndetse amakuru InyaRwanda ifite ni uko  ubu  bukwe buzatahwa  n'abanyacyubahiro baturutse impande zose ndetse n'ibyamamare.

Nubwo bitaremezwa neza na ba nyir’ubwite gusa amakuru InyaRwanda ifite ni uko abarimo Tiwa Savage, Diamond, Zari, Otile Brown, Rema, Sheebah nibindi byamamare bizahurira i Kigali muri ubu bukwe.

Ibi byamamare kandi byiyongereye kuri Meddy wamaze kwemeza ko byanze bikunze agomba kuza gushyigikira The Ben mu bukwe bwe.

Ubukwe bwa The Ben buzabera muri Kigali Convention Center  tariki 23 Ukuboza 2023.

Diamond na Zari bitezwe mu bukwe bwa The Ben

Amakuru InyaRwanda ifite kandi ni uko Kigali Protocol kompanyi ikomeye inamenyerewe mu kwakira ibyamamare n'ibirori bikomeye ariyo izakira abazataha  ubukwe bwa The Ben.

The Ben uherutse guha umukunzi we imodoka nshya ya Ranger Rover, bahanye isezerano ryo kubana byemewe n'amategeko ku wa 31 Kanama 2022.

Aba bombi basezeranye nyuma y'uko mu Ukwakira 2021, The Ben yambitse impeta Pamela amusaba niba yakwemera kuzamubera umugore undi na we  arabimwemerera.

Tiwa Savage ashobora kugaruka i Kigali yitabiriye Ubukwe

Mu 2019 ni bwo hatangiye kuvugwa inkuru z'urukundo hagati ya The Ben na Uwicyeza Pamella.

The Ben aherutse guha Range Rover Miss Pamella

Otile Brown azaba Ari i Kigali

Meddy azaba ari I Kigali

Rema azaba ari i Kigali

Sheebah azaba ari I Kigali

Umutoza Jimmy Mulisa avuga ko impano rutahizamu wa APR FC afite, Nshuti Innocent yakabaye akina i Burayi gusa kubera ko hari ibyo atakurijije ubu ashobora kuba hari ibyo yicuza.

Jimmy Mulisa yabitangaje mu kiganiro cy’imikino kuri B&B FM kibanze cyane ku ngaruka umwana wavukijwe amahirwe yo gukina ashobora guhura nazo, icyo bisaba kugira ngo umukinnyi agere ku rwego rwiza, iterambere ry’umupira n’ibindi.

Ubwo yari abajijwe impamvu abakinnyi benshi b’Abanyarwanda bajya gukina hanze y’u Rwanda ariko ntibatindeyo, Jimmy Mulisa yavuze ko ahanini biterwa n’imyumvire y’umukinnyi.

Aha niho yahise atanga urugero rwa Nshuti Innocent aho mu myaka 3 ishize yabonaga afite ubishobozi bwo kuba yakina i Burayi, kuko ari umukinnyi ufite impano banaganira cyane umunsi ku munsi ariko ubu ahamya ko hari ibyo yicuza atakoze.

Ati 'Umukinnyi nka Nshuti, Nshuti naramutioje kuri njyewe ngira ngo mu myaka 3 ishize nabonaga afite ubushobozi bwo kujya gukina i Burayi, ni umuntu nabaye hafi na n’ubu turaganira, hari ibintu byinshi cyane wenda Nshuti ubu yicuza atakoze neza. Umwaka ushize w’imikino nabonaga asa n’umuntu urimo gukora cyane.'

Yakomeje kandi avuga ko muri ba rutahizamu bari mu Rwanda, nta muntu urusha Nshuti Innocent cyane cyane iyo bageze mu rubuga rw’amahina ariko gukora ngo agere aho ubushobozi bwe bugarukira ni ikibazo.

Ati 'Akenshi ubona abakinnyi bacu ntabwo bakora ngo bagere aho ubushobozi bwabo bugarukira kugira ngo bagere ku kagasongero, nka Nshuti ubonye ba rutahizamu dufite hano mu Rwanda, nta muntu urusha Nshuti mu rubuga rw’amahina (box) umuhaye umupira mu rubuga rw’amahina, gutsinda ibitego arabizi cyane.'

Jimmy Mulisa ufite irerero rya Umuri Foundation, yatoje APR FC akaba ari na we wazamuye Nshuti Innocent muri APR FC avuye mu irerero ryayo muri 2016. 2018 yagiye gukina muri Tunisia mu ikipe ya Stade Tunisien ariko ntiyahatinda ahita agaruka mu Rwanda.

Uretse Jimmy Mulisa, benshi bemeza ko Nshuti Innocent yabatengushye

Jimmy Mulisa avuga ko Nshuti Innocent ari umukinnyi ufite impano ikomeye ariko yananiwe kubyaza umusaruro

Perezida w'Amerika Joe Biden yageze muri Israel kuri uyu wa gatatu kugaragaza ko yifatanyije nayo no kuganira n'abategetsi bayo kuri gahunda y'intambara.

Ubwo yari ageze i Tel Aviv, Biden yakiranwe urugwiro na Minisitiri w'intebe wa Israel Benjamin Netanyahu.

Ariko uruzinduko rwe rwagize ingorane zikomeye zitewe n'ikintu cyaturikiye ku bitaro muri Gaza, hari ubwoba ko cyishe Abanya-Palestine babarirwa mu magana.

Perezida Biden yavuze ko ababajwe cyane n'abapfuye.

Uruzinduko rwari ruteganyijwe ko agirira muri Jordan (Jordanie) agahura n'abategetsi bo mu bihugu by'Abarabu, rwaburijwemo mu gihe hari uburakari bwinshi mu mahanga kubera impfu zo muri Gaza.

Ubwo wumva ngo u Rwanda rufite ba rutahizamu basaga 500 ariko badafite ubushobozi bwo gutsinda n’ibitego 100 mu mwaka w’imikino ntukagirengo biba byaravuye ahandi, ni aba bana bakabaye bakina umupira w’amaguru ariko bagahezwa hanze, ahubwo hagahabwa umwanya abadakeneye kumenya n’umupira icyo ari cyo.

Muri uyu mwaka hagati, ni bwo u Rwanda rubinyujije muri Visit Rwanda, rwasinye amasezerano y’ubufatanye arimo kwa mamaza kuri sitade ya Allianz Arena ndetse muri aya masezerano hakaba harimo n’igice kireba umupira w’amaguru mu Rwanda cyo gushyiraho irerero ry’umupira w’amaguru rizajya ryita ku bana. Nyuma yaho bidatinze hahise hatangira gahunda yo gushaka abana bazajya muri iryo shuri.

Bayern Munich abana yababonye ite?

Ubwo gahunda yo gushaka impano yatangiraga mu gihugu cyose,  hiyandikishije ibigo birenga 450 ariko nyuma yo kubisuzuma hasigara 345. Ibyo byose byagombaga gutanga abana batanu kuri buri kimwe. Abo bana bahurijwe hamwe mu turere babarizwamo, mu gihugu cyose hatoranywa abana 100.

Tariki 17 Nzeri 2023, ni bwo kuri sitade ya Bugesera hahurijwe ba bana 100, mu gikorwa cyo gutoranyamo abana 43 irerero rya Bayern Munich ryagombaga gutangirana nabo, aho aba bana bagomba kwiga umupira w’amaguru ndetse n’amashuri asanzwe mu buryo bwo kuguma gutegura neza ejo hazaza habo.

Aba bana batoranyijwe hakurikiyeho gahunda yo gushaka ibyangombwa byabo ndetse abana 20 muri 43 bari batoranyijwe basanga ntabwo bujuje Imyirondoro barirukanwa. Abana basigaye bagiye ku mashuri nk’abandi bose aho bano bana bari kwiga muri Lycee de Kigali na GS Kicukiro.

FERWAFA nk’urwego rukuriye umupira w’amaguru mu Rwanda nibo bari bayoboye iki gikorwa, dore ko na Visi Perezida wa kabiri wa FERWAFA, Mugisha Richard, ariwe wari uyoboye buri kimwe.

Bamwe mu bana batoranyijwe batangiye kwiga 

Uyu muyobozi agaruka ku mpamvu hari abana batabashije kujya muri iri shuri, yavuze ko habayeho uburiganya bw’imyaka. Yagize ati” Twatoranyije abana 100 baturutse mu Rwanda hose ariko twemeza ko 43 ari bo bagomba gukomeza, kongeraho barindwi basimbura abagira ikibazo. Abo uko ari 50 ntibagezeyo bose kuko harimo ibibazo.”

“Dufatanyije na REB [Urwego rw'Igihugu rushinzwe guteza imbere Uburezi bw'Ibanze mu Rwanda] na NIDA [Ikigo cy'Igihugu gishinzwe Indangamuntu] twarebye ibyangombwa by'abatoranyijwe dusanga 20 barabeshye. Hari ababikoze mbere yo gutoranywa ndetse n'ababikoze nyuma yo kubafata. Tubimenye twahise tubasezerera.”

Ikibazo: FERWAFA ishaka Imyirondoro cyangwa ishaka impano?

Twemera ko buri kintu cyose giciye mu nzira nziza kigomba kuba gifite umurongo ngenderwaho, ndetse umuntu wese akanjira muri uwo mujyi azi ibisabwa n’ibigenderwaho. Hatabaye ho kunyumva nabi, ntabwo nshyigikiye umwana ukina adafite ibyemezo irerero ryashyizeho, ariko nanone sinshyigikiye umuntu uhemukira umwana ku bintu yakabaye afite icyo yabikoraho amahoro agahinda.

Hagati y’impano n’imyirondoro, bigaragara ko FERWAFA yo yashakaga imyirondo kurusha impano. Ibi icyo mbivugira, ni uko kureba imyirondoro y’abana, ari cyo gikorwa cya nyuma cyabaye kugira ngo abana bemererwe kwinjira mu ishuri. Ntabwo byumvikana uburyo FERWAFA ikoresha ijonjora ryo gushaka abana, ariko ikarinda isigarana abana 43 ba nyuma nta n’umwe yizeye imyirondoro ye.

Mugisha Richard wari ukuriye itoranywa ry’abana bajya mu irerero rya Bayern Munich niwe wajyanye n’abana batarengeje imyaka 16 bagiye mu gikombe cy’amarerero y’iyi kipe kibera mu Budage 

Ibi bivuze ko byashobokaga ko gahunda yose yabaye yo gushaka impano, amafaranga yakoreshejwe, umwanya watanzwe na buri umwe muri iki gikorwa, byari kurangira byose bibaye imfabusa abantu bararuhiye ubusa nta mwana n’umwe wujuje imyirondoro.

Amanyanga ya FERWAFA yatsindiwe mu mpano, ijya kwihorera mu myirondoro

Ubwo hasigaraga abana 100, mu karere ka Bugesera nta munyarwanda n’umwe wari ufite ijambo rya nyuma ryo guhitamo umwana kuko umwana yemezwaga n’abatoza b’abazungu bari boherejwe na Bayern Munich.

Iki gihe gahunda y’abatoza b’abanyarwanda yo gukinisha umwana w’umucuruzi w’umukire, abantu bakomeye mu nzego, yari imaze gupfa kuko ntaho bari guhera basesekamo abantu.

Mu bana 43 bari batoranyijwe, abenshi baraye badasinziriye kubera ibyishimo byo kumva ko indoto zabo zishobora kugerwaho, gusa kuri ubu harimo abarara barira kuko babona Isi yabanze 

Mu gihe birangiye uko habaye gushaka impamvu zatuma hari abana bo mu bakire n’ahandi binjira muri iri shuri, ariyo mpamvu abana bo kwa ngofero batangiye gushyirwaho ibibazo by’imyirondoro ndetse ntibagire n’icyo bafashwa, akaba ariyo marira ya Iranzi Cedric kuri uyu wa kabiri yaririye kuri Fine FM ndetse n’abandi ba ntaho nikora.

Ese koko impano ariyo ishyizwe imbere, wareka umwana akagenda ngo ni uko afite imyirondoro 2? Ubundi mu buzima bw’imyuga birazwi ko kubona impano ari cyo kintu kigora kuko akenshi tubona abagerageza wenda ishuri rikazabongerera.

Ntabwo byumvikana uburyo FERWAFA yaba yaranamye ku zuba ishaka impano y’umwana ndetse ku bw’amahirwe ikayibona ariko imyirondoro ibiri inyuranye ikemeza ko umwana yirukanwa.

Niba warize ku kigo kidafite umwana wigira ubuntu kubera ubushobozi bucye ariko akaba afite ubwenge, untere ibuye. Niba utazi abakinnyi iwanyu aho wize bigiraga ubuntu untere irindi. 

Ubundi uramutse usanganye umwana impano wakabaye umukorera buri kimwe cyose kugira ngo utamutakaza, aho kugira ngo usigarane umwana ufite imyirondoro ariko atazi no gufunga umupira.

Twese turi abantu kandi tuba mu bantu kuri ubu nibura ushaka guha akazi abantu 10, 3 muri bo ni bo wasanga bujuje ibyo ukeneye byose. Ariko mu basigaye hari ababa bafite ibyo babura ariko kuko ukeneye bimwe mu byo bafite ukabafasha gushaka ibisigaye.

Ahagana 2007 ni bwo hatangiye gahunda yo gushaka abana bazajya mu irerero rya FERWAFA, aba bana akaba aribo bakinnye igikombe cy’Isi cya U17 mu 2011 ubwo FERWAFA yazengurukaga igihugu cyose ishaka abana, abo yasanze bujuje ibyangombwa bari mbarwa ariko uwabaga afite impano wese yafashije kubona ibindi bisabawa. 

Gusa kuko abayobozi b’icyo gihe bari bazi ko ikizapfa cyose igihugu kizagwa hasi, bagerageje kubikora neza n’ubwo nta byera ngo de. 

Umwana wakweretse icyo ashoboye ntabwo wakamwirukaniye imyirondoro yanditse nabi. Ahubwo aho umubera umubyeyi kuko n’ubundi uba uri we, icyo abura ukacyuzuza kugira ngo iyo mpano itagucika. Abantu bavuka buri munsi ariko impano ntizivuka buri munsi, kuko iyo biba ariko bimeze ntitwakabaye dukumbura Jimmy Gatete.

Si ibanga kandi ko hari abahanzi nyarwanda babashije kuzana injyana zitari zimenyerewe mu Rwanda, babasha kwigarurira imitima ya benshi ku buryo kugeza n’ubu usanga bacyibukwa nubwo baba bamaze igihe batagaragara mu muziki.

Muri aba bahanzi bahinduye amateka y’umuziki nyarwanda, higanjemo abawukoze mu bihe byashize ari nabo bagize uruhare mu kuwubaka bagacira inzira barumuna babo bagezweho muri iyi minsi. Mu by’ukuri abahanzi bubatse umuziki Nyarwanda ni benshi gusa harimo abagera kuri 20 babashize kuzana impinduka ku buryo batazanibagirana mu mitima ya benshi bitewe n’ibihangano byabo.

Mu gice cya mbere cy’iyi nkuru cyagarukaga ku bahanzi 10 bahinduye amateka y’umuziki Nyarwanda, ikini igice cya kabiri gikubiyemo abandi icumi:

1. DMS

Amazina ye asanzwe ni Muhire Tembwe Christian yamenyekanye nka DMS muri muziki nyarwanda. Azwiho kuba umwe mu bafashe iya mbere ,mu gukundisha abanyarwanda injyana ya Hip Hop.

DMS yatangiye kugaragaza impano yo kuririmba ubwo yari afite imyaka umunani gusa, mu 2003 aba aribwo atangira gushyira hanze bitandukanye. Yaririmbaga cyane mu rurimi rw'Icyongereza.

Mu 2005 ni umwe mu bahanzi bakoranaga na BZB muri TFP, mu 2007 yashyize hanze album ye ya mbere. Nyuma y'imyaka ibiri yagiranye amasezerano na Barrick Music aba ari nawe umufasha gushyira hanze album yise 'Live & Love' yamuritse mu Ukuboza 2011 iyi album yaje ikurikira iyo yashyize hanze mu 2007 yise 'Peace'.

DMS yamenyekanye mu ndirimbo zirimo 'Kigali City', 'Yego' , 'To the Lost ones', 'Bari hehe?', 'It's over' yakoranye na Cassa Manzi n'izindi.

2. Rafiki

Rafiki Mazimpaka azwi cyane mu njyana yihariye ya 'Coga Style' ku izina rye ry'ubuhanzi 'Rafiki', yavutse mu 1984 , avukira muri Repubulika Iharanira Demokarasi ya Congo. 

Amashuri abanza yayize i Goma muri RD Congo, ayisumbuye ayiga muri CGFK (College George Fox de Kagarama). Yatangiye muzika kera kuko aho yigaga mu mashuri yisumbuye aho yabaga muri Korali y'ikigo, nyuma mu 2002 ayivamo ajya mu itsinda ryo kubyina ryitwaga 'Hot Side' yari ahuriyemo na Kamichi, Platini, Prince Kidd na Bad Rama.

Muri iyo minsi, nibwo yahuye na Producer Jay P amukorera indirimbo ya mbere yitwa 'Igipende' yasohotse mu mpera za 2004, nyuma y'aho haza 'Igikosi' n'izindi yagiye akora agitangira umuziki zikamwubakira izina mu Rwanda.

Uyu muhanzi yazanye umwihariko w'injyana ya “Coga Style” yumvikanamo ururimi rw'Ikinyarwanda ruvugwa na benshi mu batuye mu Majyaruguru y'u Rwanda nk'umwihariko.

Iyi njyana ya “Coga” yagereranywa na (Kinyarwanda Dancehall) yazanywe n'uyu muhanzi, bituma bamutazira “Umwami wa Coga Style”.

Rafiki yasohoye album ye ya mbere yitwa “Ica Mbere” kuwa 4 Ukwakira 2008, yari igizwe n'indirimbo 12 zose ziririmbwe mu njyana ya Coga yanyuze benshi mu Banyarwanda.

Rafiki wakuze akunda injyana ya Reggae na Lumba mu bahanzi yakoranye nabo harimo Miss Jojo, Miss Shanel, Professor Jay, Dr. Jose Chamelone, Washington, Youth Wave, Dream Boyz n'abandi.

Mu bihembo yatwaye harimo Pama Award (Pan African Music Awards) inshuro ebyiri mu 2007 na 2008 muri Uganda. Yitabiriye kandi irushanwa rya Primus Guma Guma Superstar mu Rwanda mu bihe bitandukanye gusa ntiyabasha kwegukana iki gikombe.

3. Tom Close

Uyu nawe ni umwe mu bahanzi bo mu gisekuru cya Nyuma ya Jenoside bubatse amateka mu muziki nyarwanda. Ubusanzwe amazina ye ni Muyombo Thomas yavutse mu 1984.

Tom Close yavukiye muri Uganda aba ariho yiga amashuri abanza. Nyuma yaho ababyeyi be bimukiye mu Rwanda yize amashuri yisumbuye muri Kiziguro ndetse na Lycée de Kigali.

Uyu muhanzi yasoje Kaminuza mu 2013 mu ishami ry'ubuganga.

Mu 2005 nibwo uyu muhanzi yatangiye umuziki ubwo we n'inshuti ze bashinze itsinda bise 'Afro-Saints' bakoze indirimbo mu myaka ya 2006 na 2007 ntizakundwa.

Mu 2007 uyu muhanzi yahisemo kwikorera indirimbo ku giti cye yise 'Mbwira' yakunzwe akurikizaho album yise 'Kuki' yariho indirimbo ze zakunzwe. Indirimbo zazamuye izina rya Tom Close zirimo 'Si beza', 'Ntibanyurwa', 'Komeza Utsinde', 'Sinari nkuzi' Ndacyagukunda  n'izindi. Tom Close ufatanya ubuhanzi n’ubuganga, aherutse gushyira hanze album yise ‘Essence’ ituma abafana be bari bamukumbuye bishimira igaruka rye mu muziki.

4. Riderman

Ubusanzwe yitwa Emery Gatsinzi ni umwe mu baraperi babaye inkomarume. Riderman yavutse mu 1987 akaba imfura mu bana batanu. Uyu muhanzi yavukiye mu muryango wa gikirisitu ndetse umubyeyi we na mushiki we bose bari abaririmbyi b'indirimbo zihimbaza Imana.

Riderman nawe yakundaga kubiyungaho bakaririmbana mbere yo kuryama. Uyu muhanzi yiyumvagamo ubusizi ndetse n'umuziki nyuma yo kwitabira igitaramo cya Lucky Dube cyabaye mu 2003 kuri Stade Amahoro yahisemo guhuza ibi byombi.

Mu 2006 yatangije itsinda rya UTP Soldiers yari ahuriyemo na Neg G The General ndetse MIM nyuma aza gutandukana na bagenzi be. Uyu muhanzi yahise atangira kuririmba ku giti cye.

Mu 2009 yashyize hanze album ye ya mbere. Mu bwana bwe Riderman yakundaga abahanzi barimo Jean-Christopher Matata, Benjamin Rutabana na Kidumu. Nyuma yaje kwiyumvamo abaraperi nka Tupac Amaru Shakur, 50 Cent na Lil Wayne.

Yahuriye ku rubyiniro n'abahanzi mpuzamahanga batandukanye barimo Sean Paul, Lauryn Hill, Mr Flavour, Elephant Man, Koffi Olomide, Brick and Lace, Sean Kingston, D'banj, Shaggy n'abandi. Kugeza nubu uyu muraperi ari mu bahagaze neza mu Rwanda.

5. Tuff Gangs

Ni itsinda ryamenyekanye mu muziki nyarwanda cyane cyane muri Hip hop. Ni ryo tsinda ryashinze ibirindiro by'umwihariko riririmba iyi njyana. Ryari rigizwe n'abarimo Jay Polly witabye Imana, P Fla, Bulldogg, Green P na Fireman.

Iri tsinda ryatangiye kumenyekana cyane mu 2008 biturutse ku ndirimbo yaryo yiswe 'Kwicuma' nyuma yayo ryagiye rikora izindi ndirimbo nyinshi nazo zakunzwe zirimo nka ‘Gereza’, ‘Inkongoro y’umushimusi’,’Amaganya’ n’izindi zagumye mu mitima ya benshi bitewe n’ubutumwa burimo.

P Fla wari mu bari abaraperi ngenderwaho muri Tuff Gangs ariko wakunze guhora mu mahari na bagenzi be, akenshi mu itsinda hagahora umwiryane wanatumye bamwereka umuryango.

Yatandukanye na Tuff Gangs muri Mutarama 2012, icyo gihe yahise ashinga itsinda yise 'Imperial Mind State', yaje guhinduka “Imperial Mafia Land” aho yari ari kumwe na El Poeta bari baranabyaranye.

Mu 2015 benshi batunguwe no kumva inkuru yavugaga ko Jay Polly yatandukanye na bagenzi be ndetse agahita yinjiza amatwara mashya mu itsinda akanashyiramo amaraso mashya.

Tuff Gangs ya Jay Polly yari irimo Khalifan, Romeo na Young T bahoze mu itsinda rya Home Boyz; mu ndirimbo ya mbere bakoze bise 'Wiyita Iki?' batangiranye amashagaga bereka abari bagize Tuff Gangs ya mbere ko nta buhangange bari bafite bwatuma bigira ibyatwa. Bulldogg, Fireman na Green P nabo bahise bashinga itsinda bise Stone Church bahise bongeramo na Nick Breezy.

Mu minsi ishije Devy Denko umwe mu bahanga mu gutunganya indirimbo yasangije amashusho n’amafoto abamukurikira ku mbuga nkoranyambaga, arikumwe na P Fla na Bulldogg hamwe na Fireman atangaza ko bageze kure batunganya album ya Tuff Gangs. Iri tsinda benshi bavuga ko ryaharuriye inzira abandi baraperi baje nyuma.

6. The Ben

Mugisha Benjamin, uzwi ku izina rya The Ben yavutse ku itariki ya 9 Mutarama 1988. Yavukiye i Kampala muri Uganda. The Ben ni umuhanzi nyarwanda uririmba injyana ya RnB/Pop.

Ni uwa Gatamuryango w'abana batandatu barimo nka Danny (nawe w'umuhanzi n'ubwo atigeze amenyekana mu Rwanda), Green P uzwi muri Tuff Gangs.

Iby'ubuhanzi The Ben yabihereye mu muryango aho yakuze akundishwa n'ababyeyi be gusenga cyane. Byatumye ajya muri Korali aho yari ari kumwe n'abandi bahanzi bamenyekanye nka Meddy, Lick Lick na Nicolas.

Uyu muhanzi atangira umuziki yabaga ari mu mutaka wa Tom Close gusa mu myaka ya 2008 nawe atangira kumenyekana. Icyo gihe atangira umuziki yamenyekanye mu ndirimbo nka 'Amaso ku Maso', 'Amahirwe ya nyuma' n'izindi nyinshi zamenyekanye cyane yari yararirimbiyemo Tom Close nka 'Si beza' na 'Mbwira'.

Yaje gukora indirimbo nka Uzaba Uza (yaririmbanye na Roger), Wirira, Imfubyi, Wigenda, Uri he, Sinzibagirwa, Zoubeda, Ese Nibyo n'izindi. The Ben ni umwe mu bahanzi bambukiranyije ikinyacumi bagifite igikundiro cyane n'ubu indirimbo zigakundwa. Uyu muhanzi yabaye kandi uwa mbere wakoranye indirimbo na Diamond Platnumz bise ‘Why’ yatumye yunguka abafana muri Tanzania.

The Ben uheruka kandi gukora igitaramo cy’amateka mu Burundi, aherutse gutangaza ko agiye gushyira hanze ibihangano bishya nyuma y’igihe kinini abafana be babimusaba.

7. Meddy

Ubusanzwe yitwa Ngabo Médard Jobert. Yamenyekanye cyane mu muziki nyarwanda nka Meddy. Uyu muhanzi yavutse ku wa 7 Kanama 1989 mu Burundi. Meddy aririmba RnB na Pop. Yamenyekanye mu myaka ya 2008 mu ndirimbo nka “Amayobera”, “Akaramata “Ese Urambona” n'izindi.

Meddy yatangiye aririmba mu rusengero ndetse indirimbo ye ya mbere yari ihimbaza Imana. Iyi yayise 'Ungirira ubuntu'.

Meddy mu 2010 yavuye mu Rwanda we na The Ben mu gitaramo bari batumiwemo n'umuryango w'abanyarwanda baba muri Amerika ntibagaruka.

Mu gihe cy'imyaka irenga icumi uyu muhanzi amaze akora umuziki aracyakunzwe ni n'umwe mu birahirwa kubera ibihe yatangiriyemo umuziki na bagenzi be ntacike intege. Yigeze kubwira itangazamakuru ko yigeze kumva yava mu muziki nyuma yo gutegura igitaramo kikazamo abantu 20.

Ati 'Nakoze igitaramo ngira ngo kizamo abantu 15 cyangwa 20, nacitse intege cyane. Icyo gihe nigaga muri La Colombière mu wa Gatandatu dusoza amashuri yisumbuye. Kuri njyewe iyo ndebye uwo munsi ibyo natekerezaga n’aho ndi mpita mbona ko mu buzima ikibi ari ugucika intege. Sinigeze na rimwe ntekereza kuzagera ku rwego ndiho uyu munsi mu muziki kubera iryo joro rimwe.'

Meddy uri mu bahanzi bakomeye mu Rwanda aheruka gushyira hanze indirimbo y’Imana ndetse anatangaza ko agiye kujya mu njyana ya ‘Gospel’ aho azajya akora indirimbo zo kuramya no guhimbaza Imana. Ibi ariko ntabwo byashimishije abafana be.

8. Urban Boyz

Itsinda rya Urban Boyz ni rimwe mu matsinda yakanyujijeho mu muziki nyarwanda. Naryo umuntu avuze ko riri mu ya mbere yabayeho ntabwo yaba abeshya. Ryatangiriye i Butare rigizwe n'abantu batanu barimo uwitwaga Lino G, Safi Madiba, Humble Jizzo, Nizzo n'undi mugenzi wabo umwe.

Urban Boyz yamenyekanye mu ndirimbo nka 'Sindi indyarya' na 'Icyicaro' ndetse ziri mu zatumye izina ryayo rigwiza igikundiro. Nyuma Lino G yavuyemo basigara ari batatu ndetse baza no kwimukira mu Mujyi wa Kigali kuhakorera umuziki.

Iri tsinda ryagize igikundiro mu muziki nyarwanda. Ryamenyekanye nka rimwe mu matsina yagiye yijajara agakorana n'abahanzi bakomeye muri Nigeria cyane ko bakoranye na Timaya na Iyanya.

Mu 2017 Safi yavuye mu itsinda ajya kuba umuhanzi ku giti cye asiga bagenzi be. Ubu Urban Boyz isa nk'iyabaye amateka kuko nta gihangano iheruka.

9. Dream Boyz

Dream Boyz ni itsinda ryaririmbaga injyana ya R'n B ndetse na Afrobeat ryari rigizwe na Platini na TMC.

Platini ubundi yitwa Nemeye Platini akaba yaravutse muri nzeli 1988 i Bukavu kuko niho ababyeyi be bari barabaye bahamaze igihe kirekire.

Nyuma yaho yaje gutahuka kimwe n'abandi banyarwanda bose atangira amashuri ye abanza abiri yayize muri Congo, akomereza kuri Ecole primaire ya Nyanza ya Kicukiro , icyiciro rusange cy'amashurii yagikomereje kuri Ecole secondaire de Gasange I Byumba, akomereza mu rwunge rw'Amashuli rwa  Butare (Groupe Scolaire Officiel de Butare ). Yaje gukomereza muri Kaminuza nkuru y'U Rwanda mu ishami ry'itangazamakuru n’itumanaho.

Platini akiri umwana yaririmbaga muri Kolari aza kuhava atangira gukora muzika ye.

Mujyanama Claude uzwi nka TMC ni undi musore wabarizwaga mu itsinda rya Dream Boyz, yabonye izuba kuri 25 Nzerii 1988 i Bukavu muri Congo. Yaje gutahuka muri 1994 atangira amashuri ye abanza kuri Ecole Primaire de Kicukiro aza gukomereza amashuri ye yisumbuye kuri Ecole Secondaire de Kicukiro yaje gundinduka E.T.O Kicukiro.

TMC yaje gukomereza amashuli ye mu Rwunge rw'amashuri i Butare (Groupe Scolaire Officiel de Butare )mu ishami ry'imibare n'ubugenge, akomereza  mu yahoze ari KIST. TMC akiri muto yakundaga kumva indirimbo zo muri Tanzaniya cyane cyane umuhanzi Mr. Nice bituma akura yiyumvamo umuziki.

Mu 2000 nibwo yavuye muri Kolari  yaririmbagamo. Mu mwaka wa 2007 arangije amashuli yisumbuye nibwo yakoze indirimbo ya mbere.

Mu 2008,Platini akirangiza amashuri yisumbuye yahuye na TMC bari bariganye i Butare   ndetse ko bari banaturanye byatumye bakora itsinda baryita Dream Boyz.

Muri uwo mwaka nibwo barebye Lick Lick atangira kubakorera.

Dream Boyz yamenyekanye mu ndirimbo yitwa Nirizingua yo mu njyana ya bongo irakundwa, ariko iyatumye Deam Boyz ikundwa ikanamenyekana cyane ni 'Magorwa'. Nyuma yaho Dream Boyz yakoze izindi ndirimbo nyinshi zivugisha abantu menshi nka 'Si inzika' n'izindi nyinshi.

Mu 2019 aba basore bafashe umwanzuro wo gutandukana. Ubu buri wese akora umuziki ku giti cye.

10. Oda Paccy

Ubusanzwe yitwa Uzamberumwana Oda Paccy ariko yaje mu muziki akoresha izina rya Oda Paccy. Niwe mukobwa wabimburiye abandi mu gukora injyana ya Hip Hop mu Rwanda.

Yakuze akunda Hip Hop kuko yari umufana ukomeye wa Eminem na Dr. Dre ndetse bituma akora iyi njyana.

Uyu muhanzikazi yamenyekanye mu ndirimbo zirimo 'Ese Nzapfa?' yatumye amenyekana cyane 'Miss President', 'Biteye ubwoba' ‘Uwo Ninde’ n'izindi. Uyu muraperikazi hari benshi badatinya kuvuga ko ariwe mwamikazi w’injyana ya Hip Hop mu Rwanda. Nyuma yo kumara igihe atagaragara mu muziki, Oda Paccy aherutse gutangaza ko yawugarutsemo bushya ndetse ashyira hanze indirimbo yise ‘Ngicyo’.