Author: webrwanda

Iyi ndirimbo yasohotse ku gicamunsi cyo kuri uyu wa Kane tariki 18 Ukwakira 2023, yari imaze imyaka ibiri iri muri studio, aho mu buryo bw'amajwi yakozwe na Producer Element akiri muri studio ya Country Records ayikomereza muri 1:55 AM aho abarizwa muri iki gihe.

Ni mu gihe mu buryo bw'amashusho (Video) iyi ndirimbo yakozwe na John Elarts wo mu gihugu cy'u Burundi. Ibi byatumye hari ibice binini bigeze amashusho y'iyi ndirimbo byakorewe mu Mujyi wa Bujumbura n'ibindi byafatiwe mu Rwanda.

Prince VII ni Umushumba w'Itorero Jesus is Coming ryakoreraga ahazwi nka Total kuva mu 2013 kugeza mu mpera za 2017. Izina rye ryagarutsweho cyane mu itangazamakuru nyuma yo kubatiza umunyamakuru akaba n'umushyushyarugamba, Anitha Pendo.

Yabaye impfubyi akiri muto, byatumye aba mu bihugu bitandukanye; yize amashuri abanza muri Repubulika Iharanira Demokarasi ya Congo (RDC), ayisumbuye yiga mu Rwanda n’aho Kaminuza ayiga mu gihugu cya Kenya.

Nk'umwana wari ukuri muto yiyumvagamo ko igihe kimwe Imana izamuhindurira amateka, ari nabyo yaririmbye muri iyi ndirimbo 'Kule', yumvikanisha ko Imana igukura kure, kandi ikakugeza kure.

Nk'umushumba w'Itorero Jesus is Coming yafatanyaga na korali y'urusengero kuririmba, ariko muri we akiyumvamo ko igihe kimwe kizagera agakora indirimbo ye bwite.

Yabwiye InyaRwanda ko kwifuza guhimba indirimbo byaturutse ku buzima bugoye yanyuzemo no gushaka kugaragariza umuryango Nyarwanda ko ntaho Imana itagukura.

Uyu mugabo usanzwe ukora ubushabitsi muri Sallon yavuze ati 'Indirimbo imfashe imyaka ibiri kugirango ijye hanze. Urumva ko harimo no kuyitondera kugirango amarangamutima yanjye n'ibyo nifuzaga buri umwe wese byamufasha bibashe kuhagera.'

Akomeza ati 'Muri rusange ni indirimbo ivuga ku buzima nanyuzemo nshobora kuba mpuje n'abandi. Mvuga ku buzima bwanjye, aho navuye hasi Imana ikancira inzira, ikamvana mu kintu ubona ko bidashoboka kugeza igihe iguhinduriye amateka, uguhinduriye ubuzima, ikugize umugabo w'abana babiri, mbese ikugize undi muntu.'

Prince VII yavuze ko yahereye ku busa ariko Imana iza kumwigaragariza. Ati 'Urumva ko byose Imana yarabikoze. Usibye kuyikorera, urumva ko byose byagendeyemo kandi bigenda neza. Urumva ko yankuye kure.'

Uyu mugabo yumvikanisha ko n'ubwo yakuriye mu bibazo by'ubuzima bugoye, yagiye ashyira imbere isengesho, biri mu byatumye asezeranya Imana kuzayikorera mu mashyi n'umudiho igihe izaba yaramuhinduriye ubuzima.

Avuga ko nyuma yo kubona umugiraneza atigeze amenya akamuha amafaranga akabasha kwiga, ageze muri Kaminuza yahisemo kwiga Tewoloji (amasomo ajyanye n'iyobokamana) kugirango azabashe gutangira umurimo w'ivugabutumwa.

Ati 'Nakomeje gusenga mu buryo bwose bushoboka ariko ngeze no muri Kaminuza mpitamo kwiga Tewoloji. Bitewe n'ubuzima nari mbayemo muri Kenya numvaga ntashaka kugaruka mu rugo, ariko Imana irambwira ngo taha ku bw'umurimo nagushinze, kuva ubwo rero nshinga itorero ryitwa Jesus is Coming, urumva rero Imana yarahabaye.'

Yishimira ko Itorero rye ryagutse, kandi yabonye Imana ubwo yasengerwaga yinjizwa mu bavugabutumwa; ni mu muhango wabereye muri Serena Hotel witabiriwe n'ibihumbi by'abantu.

Yavuze ko nyuma y'ibihe by'imiraba yanyuzemo, ubuzima bwamwigishije ko 'ntagahora gahanze'. Ati 'Niba uri mu ntambara nibivuze ko uzahora mu ntambara. Niba hari uwaguhagurikiye ntibivuze ko azahora aguhagurukira, niba hari uwakuvuze ntibivuze ko azahora akuvuga, Oya! Ubuzima bwanyeretse ko buhindagurika.'

Prince yisunze ijambo riboneka mu Umubwiriza: 3:1 hagira hati 'Imana igenera ikintu cyose igihe cyacyo Ikintu cyose kigenerwa igihe cyacyo, n’icyagambiriwe munsi y’ijuru cyose gifite umwanya wacyo.' Yumvikanishije ko ntakitagira iherezo. Ati 'Habaho igihe cyo kurira, igihe cyo guseka, rero ubuzima ni uko bimeze.'

Uyu mugabo avuga ko gukurira mu itorero rya Dr. Apotre Gitwaza biri mu byamufashije gukura mu by'umwuka no gufata icyemezo mu gukora umuziki.

Akavuga ko nyuma yo gusohora iyi ndirimbo 'Kule' afite izindi agomba gusohora hanze mu gihe kiri imbere. Ati 'Iyi ndirimbo siyo ya nyuma. Hari indirimbo nyinshi muri njye, ariko iyi ivuga ku buzima nanyuzemo niyo nifuje kubanza.'

Prince VII asobanura ko nta muntu ukwiye gutakaza icyizere cy'ubuzima, kuko gutegereza amasezerano y'Imana bisaba kudashidikanya.

Ku bijyanye no kuba yitegura kongera gutangiza itorero, avuga ko hari ibikiri gukorwa mu murongo w'inzira y'Imana wo kongera kubahiriza hamwe.

  

Prince VII avuga ko yamaze imyaka ibiri akora kuri iyi ndirimbo bitewe n'ibyo yayifuzagaho, yaba mu buryo bw'ibitekerezo n'ibindi 

Prince VII yashimye Gabiro Guitar ku bw'umusanzu we muri iyi ndirimbo y'ivugabutumwa 

Prince avuga ko amashusho y'iyi ndirimbo yakorewe mu Burundi no mu Rwanda

Prince VII niwe washinze Itorero Jesus is Coming, ni nyuma yo kwiga amasomo ya Tewoloji muri Kenya

KANDA HANO UREBE AMASHUSHO Y'INDIRIMBO 'KURE' YA PRINCE VII NA GABIRO GUITAR

“>

Hashize igihe kirekire mu itangazamakuru hirya no hino havugwa urwango Coach Gael yanga The Ben bifitanye isano no kuba The Ben yaranze imikoranire nawe mbere y’uko Coach Gael ahura na Bruce Melody afasha mu muziki magingo aya. 

Mbere na nyuma y’uko The Ben akorera igitaramo mu Burundi, havuzwe byinshi birimo urwango rwinshi Coach Gael yashakaga kwereka The Ben ndetse no kumubabaza harimo kuba yarashatse kwica igitaramo cya The Ben, kugura amatike y’igitaramo The Ben akazisanga ahari kubera igitaramo wenyine, kugura ibibuga byakira ibitaramo mu Burundi ndetse n’ibindi byinshi abantu bagiye bumva.

Ubwo The Ben yari mu Burundi yibwe Telephone bagerageje kuyishaka babona iri ku butaka bw’u Rwanda ndeyse X Dealer atabwa muri yombi akekwaho ko yaba ariwe wibye iyo Telephone. Byavuzwe ko ari Coach Gael wamutumye kugira ngo ayimwibire ayimuzanire bagire bimwe mu butumwa bwa The Ben babona ndetse n’ubwo basiba.

Si ayo makimbirane gusa kuko ubwo The Ben aheruka gutaramira muri BK Arena, byavuzwe ko Coach Gael yatanze miliyoni 20 kugira ngo yinjire muri sisitemu za BK Arena hanyuma akore ibyo ashoboye byose yice igitaramo cya The Ben.

Ibyo ni bike  muri byinshi byavuzwe hagati y’aba bagabo bombi bemeza ko ari abavandimwe ndetse n’inshuti. Coach Gael yari aherutse gutangaza ikiganiro karahabutaka kizagaruka ku bimuvugwaho byose ndetse yiyemeza kuvugisha ukuri kose.

Mu kiganiro yakoreye kuri shene ya YouTube ya ABAVIP TV, Coach Gael yavuze muri bimwe biba muri Showbiz abantu bitiranya n'urwango kandi ari ingenzi kuri Showbiz muri rusange. Gael yatangaje ko uko amatiku yiyongera ariko abagira icyo bakora mu myidagaduro babyungukiramo.

Nyuma yo kubona ko ibyo byose bimaze kurenga ibyo bita gutwika muri Showbiz, Coach Gael yatangaje ko ibyo bavuga byose byamaze kurenga gutwika ari ibinyoma kuko ibyo bintu byose birenze ukwemera kwa muntu bavuga ko akora yagakwiye kuba arimo akurikiranwa n’inzego zubutabera nk’uko yavugaga ko amahanga yose yagenze yasanze mu Rwanda ariho hantu itegeko ryubahirizwa uko ryashyizweho.

Coach Gael yavuze ko ibyo bavuga byose inyuma y’amarido ari ibinyoma kuko bose ni amagambo nta n’umwe ugaragaza ibimenyetso by’ibyo bavuga. Uretse ibyo,  yatangaje ko ku myaka 35 afite atari yagera ku rwego rwo kuba yatanga 20,000,000 Frw cyangwa  andi yose  ngo akunde yice igitaramo. 

Ati “Ubaye ufite ibimenyetso bifatika by’uko nshaka kwica ibikorwa by’umuntu bimutunga, wabizana nkafungwa. Njyewe Coach Gael ndacyari umujeune w’imyaka 35, ubu ndi umuntu uri ku rwego rwo gutanga miliyoni 20 z’amafaranga y’u Rwanda cyangwa Miliyoni 100 z’amafaranga yo mu Burundi kugira ngo nice igitaramo cya The Ben?”

Coach Gael yavuze kandi ko ibyo bavuga ko The Ben yaba yaramuriye amafaranga akaba ariyo ntandaro y'urwango bafitanye nabyo bidafite ishingiro kuko ibyo bibaye baba bafitanye amasezerano yanditse ku buryo yayazana mu nkiko akarega The Ben agasubizwa ibye mu nzira nziza.

Coach Gael ati “The Ben amfitiye ideni cyangwa mufite ideni twajya mu mategeko akaba ariyo yishyuza kuko hagomba kuba hari amasezerano yanditse aho kujya gutanga amafaranga kugira ngo nice ibitaramo bye ari andi mafaranga nkomeza gutakaza.”

Coach Gael kandi yavuze ko hari abazana iyo migambi mibi bamuvugaho bagashyiramo n’ubwenge buke. Ati “Mbaye ndi umugome, sinagira n’ubwenge ku buryo najya gutakaza ayo mafaranga yose?”

Uyu rwiyemezamirimo yakuyeho igihu ku byamuvugwagaho avuga ko habaye hari ibyo ashinja The Ben cyangwa se ashinjwa na The Ben mu buryo bwa Business byagakwiye kujya mu mategeko aho kujya mu bugome bwaba budafite n’ubwenge. 

Coach Gael yavuze ko ibyo abantu bavuga byose bitizwa umurindi n’abari hafi ya The Ben bishakira kurya,abasaba no gukoresha ubwenge mu byo bakora kuko barakabya bakanarengera cyane.

Coach Gael yavuze kandi ko we ari rwiyemezamirimo wibereye mu kazi ke atarimo arwanira na Muyoboke Alex kuba Manager kuko yemera ko Alex ariwe Manager w’ibihe byose kandi akanabimwubahira cyane. 

Byavuzwe ko The Ben adacana uwaka na Coach Gael bapfa kuba yaranze imikoranire hagati yabo hanyuma Coach Gael agafata Bruce Melodie 

The Ben nta kintu yari yatangaza ku mwuka mubi uri hagati ye na Coach Gael gusa ubwo  yari ku rubyiniro i Burundi yashimangiye ko hari abashatse kwica igitaramo cye  ariko ntibabigereho.

Coach Gael yavuze ko byatangiye abona ari ugutwika gusa ariko nyuma yaje kubona abantu bararengereye ahitamo gutanga ukuri

Coach Gael yatangaje ko nta rwango na rucye afitanye na The Ben

Coach Gael yavuze ko The Ben ari umuvandimwe we kandi uwaba afite ibimenyetso bigaragaza ubugome Gael yashatse gukorera The Ben yabigaragaza agahanwa

Ku cyumweru taliki 22 ni bwo iyi mikino igomba gukinwa kuri sitade y’akarere ka Bugesera. Umukino wo guhatanira umwanya wa 3 ni wo uzabanza, bikaba biteganyijwe ko uzaba saa sita zuzuye. Uzahuza Cyeru FC ndetse na Bugesera Veterans.

Saa Cyenda ni bwo umuriro uzaka noneho hakinwa umukino wa nyuma wo uzaba uhuza Magic SA yageze hano isezereye Bugesera Veterans FC muri 1/2 na Bakambwe FC yo yageze hano isezereye Cyeru FC.

Abakinnyi bakiniye Amavubi bagaragaye muri iyi mikino kuva igitangira ndetse bakaba baranafashije ikipe yabo ya Magic SA kugera no ku mukino wa nyuma, ni umunyezamu Ndayishimiye Eric Bakame ndetse Ndahinduka Michel wamamaye nka ‘Bugesera’.

Iri rushanwa ngarukamwaka rihuza abafite imyaka 30 ritegurwa na Magic Association yashinzwe na Habimana Hussein wahoze ari umuyobozi wa tekiniki w’ishyirahamwe ry’umupira w’amaguru mu Rwanda, FERWAFA rifite intego zitandukanye zirimo kurwanya indwara ziterwa no kudakora siporo ndetse no gukangurira abantu gahunda ya ‘TunyweLess’.

Ikipe ya Magic SA irimo Bakame niyo izakina umukino wa nyuma na Bakambwe FC

Cyeru FC irimo Lomami Frank na Murengezi Rodriguez bakiniye amakipe akomeye mu Rwanda yo izahatanira umwanya wa 3

Umukino w’umwanya wa 3 uzakinwa saa sita ku cyumweru

Umukino wa nyuma uzakinwa saa cyenda

Kuva muri 2020 kugeza uyu munsi, hagiye haduka amaraso mashya muri Gospel, abahanzi bashya u Rwanda n'amahanga bitezeho impinduka ikomeye muri uyu muziki uhembura imitima ya benshi. Bamwe muri abo bahanzi batangiye baririmbana n'abandi nyuma baza guhitamo gufata icyerekezo cyo gukora ku giti cyabo, abandi byaje gutyo biyumvamo umuhamagaro wo gukorera Imana.

Bamwe muri abo bahanzi ni aba bakurikira:

1. Peace Hozzy

Paece Hosiana uamze kumenyekana nka Peace Hozy ni umwe mu bahanzikazi bamaze igihe gito mu muziki, unafite ibihangano bike ariko utanga icyizere mu muziki wo kuramya no guhimbaza Imana. Ni umwe mu bakobwa bafite impano mu muziki cyane ko yigeze no kuwiga mu ishuri ry'umuziki ryahoze ku Nyundo.

Yamenyekanye cyane mu baririmbyi bafasha umwe mu bahanzi bakomeye muri Gospel nyarwanda, Israel Mbonyi. Kugeza uyu munsi, Hozy afite indirimbo ebyiri gusa, 'Uganze' na 'Ruhuka,' ihumuriza imitima y'abihebye. Yafashe icyemezo cyo kuririmba wenyine muri uyu mwaka nyuma y'igihe kinini abisabwa n'abatari bake.

2. Divine Nyinawumuntu

Nyinawumntu Divine ni umukobwa ukiri muto ufite impano idakwiye kwirengagizwa muri gospel nyarwanda. Amaze igihe gito muri muzika kuko yayinjiyemo muri Kanama 2022. Yatangiriye ku ndirimbo yitwa 'Mbeshejweho,' ariko muri uyu mwaka yashyize hanze indi ndirimbo ye ya kabiri yitwa 'Urugendo.' 

Divine, bigaragara ko afite impano, asanzwe ari umukristo w'Itorero ADEPR Muhima mu Mujyi wa Kigali. Kuwa 17 Gicurasi 2023 ni bwo yasinye amasezerano na kompanyi yitwa TFS (Trinity For Support) yiyemeje kumufasha mu muziki we nyuma yo kuenguka impano ye.

3. Grace Nyinawumuntu

Gace Nyinawumuntu umaze imyaka itatu gusa mu muziki wo kuramya no guhimbaza Imana ni umwe mu mpano zitangaje u Rwanda rufite. Afite indirimbo nshya yitwa 'Mu Kivunge' ikunzwe n'abatari bake mu gihe kitageze ku kwezi imaze igiye hanze. 

Iyo, yaje ikurikira izindi afite zirimo ‘Narakwiringiye’, ‘Ndamushima’ n'izindi. Mu mezi atatu ashize, uyu muramyi yakoze igitaramo cye cya mbere cy'amateka yise 'Exceeding Love Live Concert,' cyitabiriwe n'abahanzi bakomeye.

4. Richard Zebedayo

Mahirwe Richard ukoresha amazina ya Richard Zebedayo yatangiye umwuga wo kuririmba ku giti cye indirimbo ziramya zikanahimbaza Imana mu 2021. Ni umwe mu bakomoka kuri Zebedayo, barimo n'abafite amazina azwi muri gospel nyarwanda nka mushiki we bafitanye n'indirimbo, Diane Nyirashimwe [Diane Zebedayo]. Kuva atangiye kugeza ubu afite indirimbo ze ndetse n'iz'abandi bahanzi yagiye asubiramo.

5. Mwiza Zawadi

Mwiza Zawadi umaze imyaka ibiri muri uyu murimo, afite indirimbo eshanu zakunzwe cyane ku bw'ubutumwa bw'amashimwe no guhamya imirimo y'Imana buzumvikanamo. Uyu mukobwa ufite impano idasanzwe n'umuhate wo gukorera Imana ari no kwitegura igitaramo cye cya mbere yitiriye indirimbo ye ya mbere yise 'Imirimo Yawe Live Concert.' Mu ndirimbo ze zikunzwe cyane harimo inshya afite yitwa 'Twarahuye,' Uhoraho, n'iyitwa ‘Warakoze’.

6. Wilson

Wilson Nsabigaba, ni umusore mushya cyane mu miziki wo kuramya Imana kuko amaze iminsi mike ashyize hanze indirimbo ye ya mbere yafatanije n'uwitwa Espe yitwa 'Ibyishimo Mporana'. Nubwo ariyo ya mbere ashyize hanze, ariko ni umwe mu baramyi bashya batanga icyizere b'abahanga haba mu mirimbire ye ndetse n'imihimbire ye.

7. Yvette na Yvonne

Aba bakobwa babiri ni impanga. Bahisemo gukorera Imana binyuze mu mwuga wo kuririmba indirimbo ziramya zikanahimbaza Imana. Aba nabo biyongereye ku rutonde rw’abahanzi bashya muri Gospel nyarwanda bakwiye guhozwaho ijisho. 

Kuva batangira kuririmba mu ntangiro z’uyu mwaka, bafite indirimbo ebyiri gusa harimo iyo bakoranye na Tresor Zebedayo yitwa ‘Amen’ hamwe n’iyabo ku giti cyabo yitwa ‘Inzira yawe.’ Ni abanyempano bidashidikanwaho, bakaba batanga icyizere mu muziki wa Gospel.

8. Rene na Tracy

Couple ya Rene na Tracy, yiyongereye ku yandi ma-couple akomeye muri Gospel nyarwanda mu ntangiro za Nzeri uyu mwaka. Rene Patrick na Tracy Agasaro bafite ubuhamya buryoheye amatwi, kuri ubu ni umugabo n’umugore. Mu minsi ishize, bashyize hanze indirimbo yabo ya mbere bise ‘Jehovah,’ indirimbo ikunzwe cyane muri iyi minsi. 

9. Maombi Muhoza

Maombi Muhoza watangiye kuririmba akiri umwana muto muri 2005, amaze umwaka urenga abikora nk’umwuga. Uyu muramyi utuye muri Leta Zunze Ubumwe za Amerika, afite indirimbo nshya ikomeje kunyura imitima ya benhi yise ‘Amakamba,’ yaje ikurikira izo yari asanganwe zirimo ‘Humura’ yahereyeho, ‘Uhoraho’, ‘Iby’Imana Ikora’ yafatanije na Bigizi Gentil n’izindi.

10. David Kega

David Kega, ni umwe mu baririmbyi bamenyekanye cyane muri korali ya El Shaddai. Yafashe umwanzuro wo kuririmba ku giti cye muri Gicurasi uyu mwaka. David ubusanzwe, asengera mu rusengero rwitwa Isoko Ibohora ruherereye ku Gisozi mu Mujyi wa Kigali. 

Kugeza ubu, uyu muhanzi amaze gusana imitima ya benshi yifashishije indirimbo ze eshatu maze gushyira hanze zirimo Akabando, Yarabisohoje, na ‘Aransanga’ imaze amezi abiri isohotse. Aherutse gutangariza InyaRwanda ko ari gukora kuri album ye ya mbere yitwa ‘Izuba Rya Nijoro,’ izaba iriho indirimbo zibarirwa hagati za zirindwi n’umunani.

Mu gihugu cya Kenya mu gace ka Makuyu hari hamaze iminsi micye hujujwe inzu ya Francis Marigu wabaga mu ndaki kubwo kubura ubushobozi bwo kwiyubakira n’ubwo yahoze ari umucungamari.

Marigu Francis yari afite akazi ko gucunga imari ariko kaza kumuteza ibibazo bituma abura imitungo ye yose ahitamo gutangira kubaho ubuzima bwo mu ndaki/umwobo kubwo kubura ubushobozi bwo kwigondera inzu nshya. 

Nyuma y’imyaka 20 aba mu ndaki n’umuhungu we, abagira neza bamuhaye impano y’inzu yubakiwe mu rwego rwo kumufasha ariko hadaciye kabiri hasaka inkuru y’urupfu rwe.

Mu butumwa umunyamakuru MC Wanyoike Wa Mugure yanyujije ku rukuta rwe rwa Facebook, yagaragaje ko ababajwe kandi atewe n’agahinda kubera urupfu rwa Francis Marigu. 

Wanyoike yagize ati “Kubera iki mana? Umutima wange urashenguwe. Yaryamye umuhungu we agiye kumubyutsa asanga byarangiye. Umutima wange urababaye cyane.”

Uyu mugabo Francis witabye Imana yari yaratereranywe n’umugore we n’abana be kubera ubucyene ariko umwe muri abo bana amumambaho akaba ari nawe watangaje inkuru y’urupfu rwa se nyuma y’uko bari bahawe inzu yo kubamo bakava mu mwobo bari bamazemo imyaka 20.

Diana Kamugisha ni umwe mu mfura z’ishuri rya Bibiliya ryitwa Africa College of Theology (ACT) rya Africa New Life Ministries. Ni ishuri rimaze kongerera ubumenyi abaramyi batandukanye barimo Diana Kamugisha, Chryso Ndasingwa na Pastor JB [Jean Bosco Kanyangoga].

Nyuma y’uko asoje amasomo ya Bibiliya muri iyi kaminuza ifatiye runini Iyobokamana mu Rwanda, Diana Kamugisha yafashe undi muvuno mu buhanzi bwe. Niwitegereza indirimbo asigaye yandika muri iyi minsi, ukazigereranya n’izo mu bihe byashize, urasanga harimo itandukaniro.

Byakugora kubona umuhanzi wise indirimbo ye izina ry’Icyanditswe cyo muri Bibiliya. Diana Kamugisha yabishobojwe no kurahura ubumenyi muri Kaminuza yigisha ya Tewolojiya. Uretse n’ibyo, hari n’abandika indirimbo, ikarinda irangira nta zina Yesu n’Imana wumvisemo. Hari amakuru y’uko bamwe babikora nkana ku bw’izindi mbaraga zibiri inyuma.

Kuwa 16 Gashyantare 2022, uyu muramyi yasohoye indirimbo yatangaje benshi bitewe n’izina ryayo dore ko yahise “Zaburi 33” (Psalms 33 – Yahweh). Mbere yaho gato yari yashyize hanze iyo yise “Zaburi 91”. Mu mpera za 2022, yakoze iyo yise “Yatuvukiye”, none azanye “Uracyakora”. Ni indirimbo zishoye imizi muri Bibiliya.

Mu kiganiro na inyaRwanda, Diana Kamugisha wanejejwe no gusura Igihugu cya Israel mu mpera za 2022, yavuze ko kwiga amasomo ya Bibiliya yabikuyemo inyungu ikomeye. Ati “Ubu narushijeho kugira ubumenyi mu Ijambo ry’Imana, hari byinshi nasobanukiwe. Muri make, ubu narushijeho gushora imizi mu guhanga nshingiye mu Byanditswe Byera.”

Arasaba abanyamadini gushishikariza abapasiteri n'abavugabutumwa – ubwo harimo n’abahanzi, kwiga amasomo ya Bibiliya kugira ngo bigishe ijambo ry'Imana bafite ubumenyi bwimbitse. Ibyo avuga abihuza na Chryso Ndasingwa nawe wayobotse Tewolojiya, wavuze ko hari abaramyi bandika indirimbo z’amatiku kandi bidakwiriye, bityo akabasaba kwiga tewolojiya.

Diana Kamugisha yasoreje umwaka wa 2022 mu gihugu cya Israel

Pastor John Bosco Kanyangoga Umushumba Mukuru wa Zion Temple Nyarutarama, akaba n’umwanditsi mwiza w’indirimbo za Gospel, nawe ari kwiga Tewolojiya muri Master’s. Avuga ko kwiga aya masomo ari ingenzi kuko abatayize usanga batwarwa n’amarangamutima. 

Nawe avuga ko ari ko byari bimeze mbere yo kwihugura mu masomo ya Bibiliya. Ati “Hari igihe tugira amarangamutima rimwe na rimwe tukabyitirira Umwuka Wera, ayo makosa wenda navuga ko nayakoze, ugasoma nk’Ijambo bijyanye n’ibihe urimo gucamo bikagukoraho, ugasanga urimo kwigisha amarangamutima yawe cyane kurusha uko Bibiliya yashakaga kwigisha”.

Tugaruke kuri Diana Kamugisha. Ubu ushatse umwite umuhanga mu bijyanye na Tewolojiya kuko abifitiye impamyabumenyi y’icyiciro cya Kabiri cya Kaminuza. Umwaka wari ugiye gushira nta ndirimbo nshya asohoye kandi azwiho guhozaho cyane. Ni mwene wabo wa Tonzi, ndavuga mu abaramyi baticisha irungu abakunzi babo.

Kamugisha yabwiye inyaRwanda ko avuye ku rugamba. Ati “Kuba hashize amezi 9 ntarakora iyindi ndirimbo ni uko nagize kurwanywa cyane na satani kandi birasanzwe kuko satani arwanya umurimo w’Imana. Umuziki wo kuramya no guhimbaza mbifata seriye cyane cyane”.

Yatangaje ko indirimbo ye nshya “Uracyakora” yaje ari mu bihe bikomeye cyane kuko “nabonaga nta nzira imbere yanjye yo gukorera Imana bijyanye n’impano yanjye. Nuko nibuka Abaheburayo 13:8 havuga ngo ‘uko yahoze ni ko ari ni ko azahora, aracyakora’ “.

Uyu muramyi ukunzwe mu ndirimbo ”Mwami Mana” [Uhoraho mpora ntangazwa cyane n’ibyaremwe n’ibiganza byawe,..] yatumbagije ubwamamare bwe, “Ibendera”, “Yego”, yabwiye abanyarwanda ko Imana igikora ibitangaza nk’uko yahoze n’ubundi ibikora. Ati: “Imana ntiyahindutse ni nziza”.

Diana avuga ko kwiga tewolojiya byamuvanye ku rwego rumwe bimujyana ku rundi rwiza

Kamugisha yamenyekanye mu ndirimbo “Mwami Mana” yamuciriye inzira mu muziki

Diana avuga ko asigaye akora umuziki ushoye imizi mu Byanditswe Byera

Yakoze mu nganzo abwira abatuye isi ko Imana ikirimo gukora, #Uracyakora

Nyuma yo kuminuza muri tewolojiya, Diana Kamugisha yabonye akazi muri Kaminuza ya ACT 

REBA INDIRIMBO NSHYA “URACYAKORA” YA DIANA KAMUGISHA

REBA INDIRIMBO “MWAMI MWANA” YA DIANA KAMUGISHA

Kuva mu 2021   hatangiye  kuvugwa umwuka mubi hagati ya Coach Gael na The Ben  kugeza n’ubu  ni inkuru ikomeje kugarukwaho cyane  bamwe bagahamya  ko umushoramari Coach Gael ashaka gutambamira imishinga yose ishobora kugirira umumaro The Ben , bitsa  ku bitaramo The Ben agenda abonamo akazi. Ababa hirya y'iby'imiziki babyakira uko babihawe ababa imbere mu ruganda rw'imyidagaduro bagakomeza kwicarana amakuru atariho ivumbi dore ko no kuvuga uko ikibazo kiri nta nyungu baba babifitemo  bagahitamo kwanga kwiteranya. 

Bamwe mu bakagombye kuzana impinduka mu myidagaduro  mu Rwanda bahitamo kubagarira yose,nyamara haba hari abari kubigenderamo aribo bahanzi, abahanzikazi bafite imishinga migari, ibikorwa bifatika bifuza ko Abanyarwanda babatega amatwi bakabatiza umwanya nyamara birangira baburijwemo imbere y'amakimbirane  yakabaye yararangiye ubuzima bugakomeza nk'uko n'ubundi bwari bumeze.

 

Muri  Iyi nkuru  tugiye ku garuka ku nzira yagejeje ku mwuka mubi, ubugambanyi, ihangana na rwaserera ihora mu itangazamakuru ivuye ku bantu babiri; Coach Gael na The Ben aho Bruce Melodie w'i Kanombe akunze kwisanga muri izi rwaserera nyamara ntaho ahuriye nazo bikarangira abigizemo ijambo. Yabona amahirwe yo kugira icyo abivugaho agwa mu mutego w'abanyamakuru  agasubiza ibyakabaye bisubizwa na ba nyirabyo. Aha ni naho asabwa ubushishozi akajya amenya ikijya mbere kuko hari igihe icyitwa gutwika birangira bibyaye urwango rw'igihe kirekire nubwo bidakwiriye ku bahanzi bakabaye batahiriza umugozi umwe mu mujyo wo gushaka icyasunika umuziki nyarwanda ukabasha gukomeza kwagura imbago.

 

 

Ishoramari ritari iry'igihe kirekire akenshi rihombya nyiraryo

 

Indirimbo ishobora kumara imyaka 3 itegurwa ikazasohoka ihindura ubuzima bw'umuhanzi, umushoramari(wavuga  Manager) n’umuziki w'igihugu muri rusange.

Ufashe urugero kuri Why ya Diamond na The Ben iyo hataza kubaho kurambirwa no kugira huti huti kuri Coach Gael ubu yari kuba yarashyize akaguru ku kandi ari gusarura ku yo yashoye. Kubera igihunga 'Pressure' nk’uko bisobanurwa na Producer Madebeats wahishuye ko Coach Gael na The Ben bapfa amafaranga yashowe muri 'Why' umushinga  wo gukorana guhagarara  ngo   bakabanza  gutekereza kuri Ariel Wayz bitaje gukunda kubera kumubura kuri telefoni, Made Beats agahita ahamagara Bruce Melodie wateze indege shishi itabona bikarangira umunyemari Coach Gael amubengutse bagasinyana amasezerano yo gukorana kuva ubwo kugeza na nubu.

 Kuri ubu  ikibuga cy'imyidagaduro hano mu Rwanda mu ntoki zabo kuko bafite akazi kenshi, indirimbo zikunzwe, ibiraka byo kwamamaza, nta gitaramo gikuru gipfa kuburamo Bruce Melodie, ku mpapuro z'imbere, mu biganiro byo kuri murandasi, ku maradiyo, insakazamashusho biragoye ko icyumweru cyashira hatavuzwe Bruce Melodie kuko ahagaze neza rwose mu muziki. 

Tugarutse rero ku kibazo cyo gusenya The Ben mu murongo wo kwihorera kubera ko indirimbo Why yamufunguriye imiryango mishya inamuhesha amasoko hirya no hino byakomeje kuzengereza Coach Gael nk’uko amakuru aba ava mu bantu ba hafi b'izi mpande zombi babyemeza.

Icyari gushoboka ni uko nyuma yo kubona ko Diamond Platnumz wari warananiranye kumushyigura ku bahanzi bo muri aka Karere k'Afurika y'Iburasirazuba biciyemo kuri The Ben, Coach Gael yari kwirinda huti huti akagenda gake ku mishinga yose ye na The Ben. Birashoboka gukora indirimbo 4 nziza mu mwaka ntizizane isoko nk'iry'indirimbo imwe yatekerejweho, ikamamazwa bikarangira ibaye ikimenyabose ibizwi nka 'Mega Hit'.

 

Indirimbo imwe yatekerejweho neza nta huti huti ku muhanzi irusha 3  zakozwe mu bihe bimwe (bisaba kwiga neza umushinga mu gihe kirambye)

 

 

Dufashe indirimbo nka Sawa Sawa ya Bruce Melodie na Khaligraph Jones yasohotse ku itariki 19 Ukwakira 2023 (ntabwo yakozwe na 1:55 AM), ugafata Totally Crazy ya Bruce Melodie na Harmonize yasohotse ku itariki 04 Werurwe 2022, A l'aise ya Bruce Melodie na Innos B yasohotse ku itariki 19 Nzeri 2022, Nyoola ya Bruce Melodie na Eddy Kenzo yasohotse ku itariki 26 Mata 2022. 

Izi ndirimbo zahotse igihe The Ben yari yarashwanye na Coach Gael amusimbuza Bruce Melodie. Uzumvise wumvamo ibirango byamamaza 1:55 AM sosiyete igamije gushora imari mu myidagaduro aho bafite na  Studio , bagomba gusinyisha abahanzi kandi bakanakora ibindi bikorwa birimo inzu y'imyidagaduro iri kubakwa ku gisenge cya CHIC. Byose bigamije iterambere ry'uruganda rw'imyidagaduro nyarwanda.

Ziriya ndirimbo 3 zose hamwe urebye abazirebye kuri Shene ya YouTube ya Bruce Melodie usanga ari Miliyoni 5, 800,000 (views). Kuri Spotify abumva Bruce Melodie basaga 12,070 ni mu gihe The Ben abamwumva bakiri hasi ya ba Melodie  kuko ni 70,100 (monthly listeners). Indirimbo Why ku mibare ntabwo yangana na ziriya 3 bitewe nuko yacururijwe ku mbuga za Diamond Platnumz ziri hejuru nka Spotify nibura buri kwezi yumvwa n'asabaga Miliyoni ni mu gihe kuri YouTube imaze kurebwa na Miliyoni 19. Ku bijyanye n'uko yakinwe cyane'power plays' iri hejuru kuko Diamond Platnumz yagiye aza ku  mu   bihugu bitandukanye ayoboye intonde z'indirimbo zikunzwe mu bice by'Isi ariko aho bumva, bareba bakaba banakurikira umuziki wo mu burasirazuba bw'Afurika.

 

Biragoye ko umuhanzi akora indirimbo nyinshi ahuriyemo n'abandi bahanzi bafite amazina Manini ngo zose azibonere umwanya wo kuzikurikirana. Niyo mpamvu ushobora kwihambira ku ndirimbo imwe ariko igasiga ihinduye amateka y'ubuzima bwawe bwose . Twabonye indirimbo nka Number One ya Diamond na Davido yahinduye urupapuro rw'ubuzima bwa Diamond Platnumz, tubona indirimbo nka Waah ya Diamond na Koffi Olomide yamuhesheje ibihembo, imuhesha akazi, imwongerera abafana mu Isi y'abakunda Rhumba ndetse inaza mu ndirimbo 3 zarebwe cyane zikanacuruzwa cyane ku mbuga za Diamond Platnumz. 

Ushatse gukora igihango kiri bukore amateka wakwigira kuri uyu mugabo wo muri Tanzania. Mu myaka  itatu ishize twabonye Jerusalema ya Master KG na Nomcebo yahinduye amateka ya Master KG  ku buryo nyuma y'uko indirimbo ibaye ikimenyabose yahoraga mu ndege agiye gusarura amafaranga mu bitaramo, mu nama, mu nsengero n'abanyacyubahiro bifuzaga ko abaririmbira, yanamuhesheje ibihembo bitandukanye nk'indirimbo yamenyekanye ku ruhando mpuzamahanga 'best international Song'. Iyi ndirimbo yamenyekanye ku migabane yose ku buryo yari yarabaye nka virusi mu bantu. Master KG yumvwa mu bihugu 183 akaba afite abamwumva kuri Spotify basaga Miliyoni 17.3. Ibi byose abikesha indirimbo imwe yamuhinduriye amateka.

 

Huti huti mu  gushora idindiza iterambere ry'umuhanzi igaca intege umushoramari

 

Ntabwo gukora indirimbo nyinshi mu mwaka ari bibi ariko urabanza ukareba umusaruro watanzwe n'indirimbo zabanje. Niba Harmonize we ubwe bimugora gukora indirimbo yafata isoko ry'Afurika yose tureke no hanze y'Afurika kuko ni ibindi bindi, byagorana ko yahura n'umuhanzi bigatanga umusaruro wagutse. Simvuze ko habura abafana Bruce Melodie yungutse ariko ntabwo byari kimwe no gushaka umuhanzi w'igitinyiro akabahenda (1:55 AM) ariko igihangano kikaza ari akasamutwe gica impaka mu Isi y'umuziki.

Harmonize kuva yatandukana na WCB byaramugoye kongera kwibona afite indirimbo zumvikana ahantu hose nk’uko byahoze ariki mu ikipe ngari ya WCB.

Impamvu ni uko akiri kumwe na bagenzi be bamufashaga kwandika, imiririmbire, bakagirana inama kuva indirimbo itangiye kugeza isojwe. Eddy Kenzo ni umuhanzi mwiza ku ndirimbo mu gihe ahuye n'umurusha izina ariko ntabwo twigeze tubona umuhanzi yaciriye inzira mu ndirimbo'Collabo' ahubwo ize zikunze kwandika amateka.Bivuze ko Nyoola byari bigoye ko iba 'Mega Hit' ariko ntibivuze ko itakunzwe.

Hirya hano i Goma kwa Innos B isoko ryaho riragoye bisaba amayeri menshi ubona ko abandi bahanzi   binabagora kurifatisha usibye Diamond Platnumz nawe ufite ikipe ngari izi neza umuziki n'ibisabwa kugirango indirimbo yahuriwemo itumbagire.

 

Uhereye kuri izi ngero wahita ubona ko indirimbo nyinshi zishobora kurutwa n'imwe yarashe ku ntego.

 

Why yagaruye neza mu kibuga The Ben warimo atega zivamo

Urebye imibare n'ibimenyetso byerekanaga ko The Ben ari gutungwa n'izina yakoze hambere nyamara Isi y'umuziki yarimo isaba kugendera ku muvuduko byakwanga ugasigara ureba aho abandi bageze. Nibyo rero Why yaje ari iturufu arushije abandi bahanzi bo mu burasirazuba bw'Afurika. Muri Uganda bananiwe gukorana na Diamond Platnumz. Icyokora iyo afiteyo igitaramo asiga abakinze ibikarito mu maso ko yahoze yifuza gukorana na Jose Chameleone. Ibi ni amayeri kugirango abone uko avugwa nataha azasigare abakwena.

Diamond Platnumz ntabwo ajya akorana n'umuhanzi adafiteho inyungu. Ndavuga isoko rishya yifuza (urugero Koffi, Innos B na Fally Ipupa) yabashakagaho isoko rya views n'abafana bo mu bihugu bivuga Igifaransa, abakongomani n'abakunda Rhumba. I Burundi yigeze kujyayo mu 2008 ataramamara akorana na Rolilo anamuririmbisha ikirundi none ubu  nta muhanzi uhari wamwigondera usibye ko batakiri inshuti nk’uko Rolilo  aherutse kubitangariza InyaRwanda .

Amaboko atareshya ntaramukanya. Diamond mu Burundi bwose ahafite isoko ntakeneye umuhanzi urimuhesha. Uganda ahafite isoko dore ko ajya ajyayo agahabwa amafaranga menshi agasiga abahanzi baho bijujuta ngo abategura ibitaramo baramubasuguza. Kenya ni cyo gihugu afitemo abafana benshi kurusha no muri Tanzania avuka . Ku itariki 8 Kanama 2022 yigeze guhabwa Miliyoni 230 z’Amashilingi ya Kenya ku minota 10 yaririmbye mu bikorwa byo kwamamaza Raila Odinga. Aha naho nta muhanzi yakorana na we indirimbo kuko ni mu kibuga cye.

 

Ku itariki 03 Kamena 2022 The Ben yakoreye igitaramo i Kampala cyasize gihinduye izina rye risigara ryibazwaho ukuntu akoze igitaramo kwinjira ari 300,000 Frw ku muntu umwe mu gihe byari byarananiye Bebe Cool, Ruger, Jose Chameleone n'abandi bose bahakoreye ibitaramo. Mwibuke ko yari mu bihe byiza akesha Why yakoranye na Diamond Platnumz.

 

The Ben yakoreye ibitaramo bibiri i Kampala aho kwinjira byari bihenze. Igitaramo cya mbere cyitabiriwe n'abasaga 1500 kwinjira byari 22000 Frw na 27000 Frw ku waguze itike ku muryango. Igitaramo cya kabiri itike ya make yari 8000 Frw iya menshi ari 300,000 Frw. Ni mu gihe ibitaramo bya Jose Chameleone, Bebe Cool na Ykee Benda kwinjira byari 5000 Frw. Ruger we icyo yahakoreye kwinjira byari 14000 Frw.

 

The Ben yaje kubona akazi mu Rwanda mu gitaramo cyiswe Rwanda Rebirth Celebration Concert cyo kwizihiza  umunsi wo Kwibohora ariko ahabwa Miliyoni 40 Frw mu bipengeri. Yabanje kwishyuza miliyoni 20 Frw mbere. Ageze mu Rwanda mbere yo kujya ku rubyiniro asaba izindi Miliyoni 10 Frw. Ariko izindi Miliyoni 10 Frw bivugwa ko  ntazo yabonye kuko habayeho ubugambanyi abari gutera inkunga igitaramo bakuramo akarenge birangira nyiri ukugitegura ahombye. 

Bivugwa ko ubu bugambanyi buva ku mushoramari ubona ko The Ben ari gusarura kandi adashaka kumwishyura ayo yamutanzeho nubwo nta masezerano ahari kandi, ngo The Ben akaba ari we wakuwe mu mishinga y'uwo mushoramari aho yavugaga ko The Ben abigendamo biguru ntege.

 

Hari ibitaramo byinshi byabaye tutiriwe turondora  kumvikana  ku ngano y'amafaranga bikanga . Wongereho na Giants Of Africa yamushatse ngo azaririmbe abaca Miliyoni 30,000 Frw birangira akazi gahawe Bruce Melodie kuri Miliyoni 10 Frw. Ibitaramo by'i Burundi yishyuwe arenga miliyoni 40 Frw. Bamwe bemeza ko aya yose ni amafaranga yakabaye agabana na Coach Gael babikesha Why iyo imishinga yabo itazamo ibishirira.

Ku itariki 04 Nzeri 2022 ikipe ya Orion Basketball Club yasinyanye amasezerano na The Ben yo kwamamaza ibikorwa byayo (Brand Ambassador) mu gihe cy'imyaka 5. Bivuze ko aya ari amafaranga yiyongera ku yandi yakabaye asaranganywa hagati y'Umushoramari na The Ben.

 

The Ben i Burundi yeruye ko afite abanzi

 

Ku itariki 01 Ukwakira 2023 kuri Messes Des Officiers igitaramo kigana ku musozo The Ben yateye indirimbo'Ndaje' yakozwe mu myaka ine ishize. Yagiye hanze ku itariki 19 Kamena 2019. Yageze aho arapfukama ku rubyiniro mu guha Imana icyubahiro. Yagize ati:'Twese duhora dushaka gutsinda umwanzi akatuzunguza ariko tukamutsinda. Umwanzi azahora atsindwa ibihe byose'all the time'. Umwanzi uguhiga, ukurwanya wowe aho uri hose azohora atsindwa mu izina rya Yesu'In the name of Jesus'.  

Ku muntu uzi neza gusoma amarangamutima ya muntu ukaba usanzwe umenyereye uwo muntu wahita ubona ko The Ben yari afite intambara arwana nayo mu mutima we akifashisha ijambo ry'Imana mu kwerekana ko afite umwanzi umugera amajanja.

Ijambo umwanzi rigaruka kenshi mu mbwirwaruhame yamaze iminota mike mbere y'uko ava ku rubyiniro. Ati'Hari abantu bashatse kurwanya iki gitaramo cyanjye”.

 Hano yaraturitse ararira kivuga biranga arihanagura. Yarize amasegonda 6 arongera arihanagura .Ati” Hariho abantu bakurwanya ahantu hose ugenda bakakugirira ishyari bakakuvuga amagambo. Iki gitaramo turi gutegura aha ngaha, abantu barakirwanyije. Ariko Imana irabikoze. Abenshi mwarabyumvise, ndabikwifurije gutsinda umwanzi, niwifuriza mugenzi wawe ineza Imana izaguhe umugisha ndabikwifuriza. Ntabwo naje kubwiriza ariko nzi ko iri jambo riturutse ku Mana. Ndabasabye muzitandukanye n'abategura imigambi mibi!'.

 

Coach Gael aherutse guhakana umugambi wo gukomanyiriza The Ben

 

Umushoramari Coach Gael ahakana ko nta kibi yakorera The Ben kuko baraziranye cyane kandi haramutse hari ikibi ashaka kumukorera haboneka ibimenyetso. Anavuga ko aramutse amwanga haboneka ibintu bisa nabi pe!

 

Umuziki nyarwanda wari ugeze aharyoshye ariko utangiye kuvangirwa ku buro abahanzi bari gukora iyo bwabaga ngo basunike ugere kure y'imbibi z'u Rwanda bazisanga bari kuyoberwa inzira ya nyayo yo gucamo mu gihe abashoramari bakabaye bagira imishinga migari y'igihe kirekire bahugiye  bawugaraguza agati.

 Ntabwo umuhanzi mukuru'Legend' aterwaho rwaserera n'abakabaye bamutera ingabo mu bitugu kuko umuziki ni ubuhanzi. Uhanga neza iyo mu mutwe hameze neza.

Kuri ubu umuziki Nyarwanda ukeneye ko  habaho isaranganya ku mwanya uhabwa abahanzi mu itangazamakuru kuko kumara ukwezi havugwa inkuru imwe ya The Ben, Bruce Melodie na Coach Gael bisubiza inyuma bikanadindiza imishinga y'abahanzi bahagaze neza bakwiriye guhabwa umwanya nabo abafana babo bakamenya ibyo bahugiyemo.

 Icyokora kuba ibi bibazo birimo ubugambanyi buciye mu isura yo kuburizamo ibitaramo, gusaba abaterankunda bakanga gutera inkunga igitaramo, gukorana n'abanyamakuru bakamara igihe bakora inkuru z'ibitagenda gusa ku muhanzi runaka birangira biciye intege umuhanzi akaba yahitamo kwigira mu bindi usibye ko biba binatanga isura mbi ku bafata ibyemezo muri Leta kuko babona umuziki nk'urimo abaryana badashobora guhuza ku buryo bigoye ko umuhanzi yavuga rikijyana bitewe n'isura mbi aba afite yambitswe n'itangazamakuru n'abamwifuriza inabi.

Umuhanzi ufite intumbero zagutse aho gushyigikirwa akagambanirwa bigira ingaruka ku ruziga rw'umuziki w'igihugu kuko amahirwe yakazanye arayafunga andi akifunga.

 Urugero niba ubu Abahanzi nyarwanda bari kwisanga o Burundi na Uganda, Congo, Kenya, i Burayi, Amerika, Aziya na Australia ni amahirwe yari akwiriye gufatiranwa ku buryo harebwa uko umuziki nyarwanda washinga imizi muri iriya Migabane nk’uko Nigeria yabigezeho.

Ariko turikuva i Kigali tukajya  i Bujumbura, tukajya kurwanya bagenzi bacu bari kwitwara neza hirya no hino ku Isi. Nta gihugu gifite umuziki wateye imbere babanje kwangisha abafana abanyabigwi cyangwa se abakoze mbere. Urebe hano mu Karere dutuye i Burundi bubaha Kidumu, Big Fizzo, Rolilo n'abandi. Uganda bubaha Jose Chameleone, n'abandi. Nigeria ba 2Baba baracyahabwa icyubahiro bakwiriye.

 Inaha mu Rwanda niho uzasanga umuhanzi wagize icyo amarira umuziki atubahwa ndetse na ba rumuna be ugasanga ntibakozwa ibyo kumuha agaciro akwiriye kandi nta gasozi katagira abahanuzi. Usibye ko uko byagenda kose buri kiragano kigira abo cyigiraho.

Birashoboka cyane ko abahanzi barenga 20 bakora neza bakaba basunika umuziki nyarwanda ku ruhando mpuzamahanga. Si ngombwa ko umuhanzi umwe aba ari we wumva ko ari kamara ku buryo ajya mu migambi yo kugusha bagenzi aho gutahiriza umugozi umwe.

Mu nkuru itaha tuzareba ingaruka zo guheza inguni ku itangazamakuru ry'imyidagaduro ribogamira ku ruhande runaka. Biragoye ko haboneka umushoramari uhamye wazana aye mu muziki nyarwanda nyuma yo kubona amanyanga awubamo, guhuzagurika no guhora mu matiku atagamije kuryoshya uruganda rw’imyidagaduro ahubwo agamije guhombya, kwangisha no guca intege abahagaze neza mu muziki.

Ibi  byose byagakozwe  n’abatifuriza ineza umuziki nyarwanda ahubwo  bafite ibindi bibagenza birimo gushaka ubwamamare kandi nta kintu shingiro bwubakiyeho, gukorana n’udutsiko tw’abantu batazi batanumva neza umuziki nyarwanda ndetse batanawifuriza ineza.

 

 

 

 

 

 

 

 

 

 

 

Umukuru w'Igihugu yabigarutseho ku Mugoroba wo kuri uyu wa Gatatu tariki 18 Ukwakira 2023, mu muhango wabereye mu Intare Conference Arena wo kwizihiza iyi sabukuru witabiriwe n'abayobozi mu nzego Nkuru z'Igihugu batandukanye, abayobozi n'abakozi ba MTN n'abandi.

Mu ijambo rye, Perezida Kagame yavuze ko imyaka 25 ishize MTN ikorera mu Rwanda ari urugendo rurerure, kandi ari ibyo kwishimira. Yashimye MTN ku bw’iyi sabukuru y’imyaka 25 ishize yaranzwe no kwitanga n’ubufatanye.

Umukuru w’Igihugu yavuze ko MTN yatangiye gukorera mu Rwanda nyuma y’imyaka ine yari ishize u Rwanda ruvuye mu icuraburindi rya Jenoside yakorewe Abatutsi, bityo ko ari amahitamo atari yoroshye gufata yaba kuri MTN ndetse no ku Rwanda.

Avuga ko ari cyo kimwe na Afurika y’Epfo aho MTN ikomoka, kuko nabo bari bari kuzamuka bava mu mateka akomeye ya Apartheid. Ati “Barazamukaga twe tujya hasi’.

Yavuze ko umubano w’ibihugu byombi nyuma y’imyaka ine yari ishize binyuze mu bihe bikomeye wakomejwe no “kuba MTN yaraje gushora imari mu gihugu cyacu.”

Ati 'Ni nde wundi wabona ko byoroshye gushora imari hamwe n’igihugu cyari kimaze kuva mu mateka yacu mabi, nk’uko tubizi. Twagize ibyago twembi. Twembi twafashe icyemezo kigoranye kuri MTN cyo gukorana nayo, ndatekereza ko MTN ariyo yafashe icyemezo gikomeye kuri twe cyo gukorana n'u Rwanda.  Nyuma y’imyaka 25 ndatekereza ko dushobora kuvuga ko twishimye…'

Perezida Kagame yavuze ko hari ibigo bitatu byasabaga gukorera mu Rwanda birimo na MTN. Icyo gihe byabaye ngombwa ko Guverinoma ibifataho icyemezo.

Umukuru w’Igihugu avuga ko mu basabaga uburenganzira harimo ikigo cyari gifite telefoni zitajyane n'igihe (Analog system). 

Hari n'ikigo cyari gifitwemo ukuboko n'umunyarwanda wagize uruhare mu rugamba rwo kubohora Igihugu, amajwi menshi y’abari bagize Guverinoma, basabaga ko uyu munyarwanda yakwemererwa mu rwego rwo kumwitura.

Yavuze ko icyo gihe yari Visi-Perezida, kandi ko yari atuje cyane ategereje umwanzuro wa Guverinoma. Ariko avuga ko yaje kumanika ukuboko, atangaza igitekerezo cye, avuga ko atemeranya n’umwanzuro wari ugiye gufatwa.

Umukuru w’Igihugu yavuze ko nk’abagize Guverinoma bari bakwiye kwita cyane ku kureba ikoranabuhanga ‘rizadukorera neza’. 

Yaravuze ati 'Mwirengagize amateka n'umubano dufitanye na Afurika y'Epfo, ibi ni ikoranabuhanga, hagati y'iri koranabuhanga rishaje n'iri rya vuba, icyo guhitamo kiragaragara.”

Yabwiye abagize Guverinoma kwirengagiza iby’uko abahataniye isoko harimo n’umunyarwanda wagize uruhare mu rugamba, ahubwo bakita cyane ku kureba sosiyete y’itumanaho izafasha abanyarwanda mu itumanaho.

Impaka zarakomeje mu Inteko ariko birangira mu 1998 MTN ihawe isoko ryo gukorera mu Rwanda, kuva ubwo ifasha abanyarwanda gukoresha ikoranabuhanga rigezweho.

Umuyobozi wa MTN Rwanda, Mapula Bodibe, yagaragaje ko imyaka 25 ishize MTN ikorera mu Rwanda yaranzwe n'ubwitange no gukora cyane.

Ashima Guverinoma y'u Rwanda yemereye MTN gukorera mu Rwanda nk'umufatanyabikorwa mu rugendo rw'iterambere rihanzwe amasomo.

Imibare igaragaza ko ubu mu Rwanda abakoresha umuyoboro wa MTN bageze kuri 64.6% by'Abanyarwanda bose. Kandi MTN ivuga ko abakoresha serivisi ya Mobile Money bazamutse ku kigero cya 17.2%.

Muri Werurwe 2023, MTN yavuze ko yungutse Miliyari 227 Frw, binyuze mu gucuruza Serivisi n’imigabane. Inyungu yayo mu 2022 yarazamutse igera kuri Miliyari 221.7 Frw, avuye kuri Miliyari 184.9 Frw yungutse mu 2021.

Mu 2022, abafatabuguzi ba MTN biyongereyeho 381.000 bagera kuri miliyoni 6.8 muri rusange. Muri aba bashya, abagera kuri 308.000 bakoresha umuyoboro wa Interineti.

Umuyobozi wa MTN, Mapula Bodibe, yavuze ko ibyo bagezeho ari 'ikimenyetso cy'imirimo n'ubwitange by'abakozi bacu n'inkunga ikomeje gushyirwaho n'inama y'ubuyobozi n'abafatanyabikorwa, ndetse n'ubudahemuka bw'abakiriya bacu.'

MTN ikorera mu bihugu bitandukanye byo muri Afurika, kandi umuntu 1 muri 3 akoresha umuyoboro wa MTN.

MTN irayoboye ku isoko ry'itumanaho ngendanwa mu Rwanda no muri Afrika. Guhera mu mwaka wa 1998, yakomeje gushora imari mu kwagura no kunoza imikorere y'umuyoboro wayo ndetse kuri ubu yishimiye kuba ku mwanya wa mbere nk'umuyoboro wa interineti mu Rwanda.

MTN igeza serivise zo ku rwego rwo hejuru abafatabuguzi bayo, zirimo ndetse n'udushya nk'iya MTN Irekure itanga amainite yo guhamagara na bundle za interineti ku muntu.

Iyi sosiyete kandi iri imbere mu gutanga serivise z'imari kuri telefone ngendanwa mu Rwanda hamwe na Mobile Money, MoMoPay na MoKash itanga inguzanyo ikanazigama.

Perezida Kagame yavuze ko kugira ngo MTN ikorere mu Rwanda byasabye ibiganiro byahuje abari bagize Guverinoma

Perezida Kagame yavuze ko imyaka 25 ishize MTN ikorera mu Rwanda ibumbatiye inkuru zijyanye n'itangira ryaryo n'ibikorwa bifatika imaze gufashamo abanyarwanda

Perezida Kagame yaganiriye n'Umuyobozi Mukuru wa MTN Group, Ralph Mupita

Umuyobozi Mukuru wa MTN Rwanda, Mapula Bodibe, yashimye Guverinoma y'u Rwanda ku bw'ubufasha n'ubufatanye bagaragarije MTN

Umuyobozi w'Inama y'Ubutegetsi ya MTN Rwanda, Faustin Mbundu

Umuyobozi Mukuru wa MTN Group, Ralph Mupita

Minisitiri w'Ikoranabuhanga na Inovasiyo, Ingabire Musoni Paula [Uri iburyo]

Umuyobozi w'Umujyi wa Kigali, Pudence Rubingisa (Ibumoso) 

Abakaraza bakiriye abashyitsi mu murishyo w’ingoma za kinyarwanda

Abarimo Gisele Phanny [Uri hagati], umuyobozi muri MTN Rwanda bitabiriye ibirori byo kwizihiza iyi sabukuru

KANDA HANO UREBE IJAMBO RYA PEREZIDA KAGAME MU KWIZIHIZA ISABUKURU Y'IMYAKA 25 YA MTN

Kanda hano urebe amafoto menshi yaranze kwizihiza isabukuru y’imyaka 25 ya MTN