Author: webrwanda

Uyu munsi nibwo Ishimwe Patrick uzwi nka Pazzo Man na Kalisa John uzwi nka K John batangiye kuburana ku ifungwa n’ifungurwa by’agateganyo ku byaha bakurikiranyweho byo gusakaza amashusho ya Yampano arimo gukora imibonano mpuzabitsina.

Tariki ya 27 Ugushyingo 2025 ni bwo bari kuba baraburanye ariko ruza gusubikwa kuko Pazzo atari yiteguye kuburana.

Aba bombi baburaniye ku Rukiko rw’Ibanze rwa Kicukiro aho bakurikiranyweho gusakaza amashusho ya Yampano arimo akora imibonano mpuzabitsina n’umugore we.

Aba bombi bakaba bahakanye ibyo baregwa aho nka Pazzo Man watawe muri yombi tariki ya 11 Ugushyingo, yavuze ko ayo mashusho ashinjwa atigeze ayatunga muri telefoni ye.

Kuba yari ari kuri email ye (ya Yampano) ariko ntabwo Pazzo yigeze ayamanura (download) ngo ayatunge muri telefoni ye.

We abona Yampano ari we wishyize hanze kuko kubikaho amashusho kuri email abizi neza ko abasha (Pazzo) kuyinjiramo afite umubare w’ibanga (password) cyane ko yari umujyanama, atari ikosa rye (Pazzo).

Ati 'Njye nayabonye kuri Email, icyo gihe mpita nanabimubwira kandi yayakuyeho kuko abahanga bagaragaza ko ayo mashusho atakiriho, njye uretse kuyarebaho ntabwo nigeze nyabika kuri telefone (Download) cyangwa ngo ngire uwo nyasangiza. Mu Iperereza ryakozwe n’abahanga ngira ngo babonye ko ntayo nari mfite yewe nta n’uwo nigeze nyasangiza.'

Uwunganira Pazzo Man yavuze ko umuntu wa mbere wasakaje aya mashusho ari Yampano wayashyize kuri Email azi neza ko atariho wenyine, bityo asaba Urukiko ko rwategeka ko atangira gukurikiranwaho iki cyaha.

Ati 'Turasaba Urukiko ko mu bubasha bwarwo rwategeka ko Yampano atangira gukurikiranwaho gusakaza ayo mashusho kuko yayashyize kuri Email kandi abizi neza ko atariwe wenyine uyikoresha, ni we wa mbere wayasakaje.'

Ubushinjacyaha bwagaragaje ko mu igenzura ry’abahanga mu ikoranabuhanga basanze Pazzo Man ku wa 11 Ugushyingo 2025 yarandikiye uwitwa Ddumba amusaba gusiba amashusho yose ya Yampano no kutongera kuyasakaza.

Ubushinjacyaha bwareze Kalisa John wamamaye nka KJohn kuba hari ifoto yafashe yoherereza Papa Cyangwe amubwira ko amashusho ya Yampano ari gutera akabariro yagiye hanze.

Ikindi Ubushinjacyaha bwagaragaje ko gituma bakurikirana KJohn ni ukuba yarasabye uwitwa Kwizera Nestor uzwi Pappy Nesta ayo mashusho ndetse akanayahabwa, bityo bukibaza umugambi wari wihishe inyuma utari ukuyasakaza.

Ubushinjacyaha bwagaragaje ko bufite umutangabuhamya witwa Ngabo Leon uzwi nka Njuga wavuze ko yahuriye na KJohn ari kumwe na Pazzo Man muri Restaurant yo kwa Clapton Kibong bityo bakahamwerekera ayo mashusho.

Kalisa Joh uzwi nka Kjohn we yaburanye ahakana ibyaha aregwa ahamya ko muri Kamena 2025 ari bwo yabonye umuntu witwa Odette ashyize ku rubuga rwe rwa Whatsapp ifoto ya Yampano ahamya ko umuntu umuha amafaranga amuha amashusho ya Yampano ari gutera akabariro.

Kjohn avuga ko akibona iyi foto yahise akora 'Screenshoot’ ayoherereza Papa Cyangwe wari uherutse gukorana indirimbo na Yampano amubaza niba koko ibyo abonye ari impamo.

Papa Cyangwe na we ngo yahise aha Yampano ya foto amubwira aho ayikuye, ibi bikaba ari nabyo byatumye uyu muhanzi amenya ko amashusho ye yagiye hanze.

Kalisa John yavuze ko iyo foto yoherereje Papa Cyangwe atari iy’urukozasoni kuko nta kintu kibi kiyigaragaraho.

Avuga ko nyuma y’icyo gihe byabaye nk’ibihosheje icyakora mu Ugushyingo 2025 aya mashusho yongeye kujya hanze aba aribwo ayasaba.

Ati 'Hari uwitwa Willy Pappy yarayansabye mubwira ko ntayo mfite, hashize akanya ambwira ko uwitwa Pappy Nesta yayamuhaye nanjye mpita nyamusaba arayampa. Nibyo narayabonye ariko nta muntu n’umwe nigeze nyoherereza.'

Umunyamategeko wa KJohn yavuze ko kuba Kalisa John yarasabye amashusho akanayahabwa, bitagize icyaha kuko icyaha ari ukuyasakaza kandi we nta muntu yigeze ayasakazaho.

KJohn yavuze ko atazi icyo apfa na Njuga watanze ubuhamya amushinja, icyakora abwira Urukiko ko icyo yaketse ari uko hari ubwo yamukinishije filime mu bihe bya Covid-19 batandukana batumvikanye, wenda we akaba ari bwo abonye uko yamwihimuraho.

Ku rundi ruhande yaba Pazzoman cyangwa umwunganira mu mategeko, bagaragaje ko gusaba Ddumba gusiba ayo mashusho no kutongera kuyasakaza byari uburyo bwo kugabanya umurindi w’isakazwa ryayo cyane ko yari yamenye ko ari gukurikiranwa.

Ubushinjacyaha bwabasabiye gufungwa imisi 30 y’agateganyo kuko hari impamvu zikomeye zituma bakomeza kuburana bafunzwe. Urukiko rukazasoma umwanzuro tariki ya 11 Ukuboza 2025 saa 15h00′.

Uyu munsi kandi hari hitabye abandi bantu batatu baregwa muri iyi dosiye barimo Uzabakiriho Cyprien uzwi nka Djihad, Ishimwe François Xavier na Kwizera Nestor bakunda kwita Pappy Nestor, nabo bakurikiranyweho gukwirakwiza aya mashusho, gusa Urukiko rwategetse ko urubanza rwabo rusubikwa kuko Ishimwe François Xavier yavuze ko nta mwunganizi mu mategeko afite. Ruzasubukurwa tariki ya 11 Ukuboza 2025.

K John yavuze ko gusaba amashusho bitavuze ko yayasakaje

Pazzo Man yavuze ko ibyabaye byose byabazwa Yampano

Yampano yatanze ikirego avuga ko abantu basakaje amashusho ye

Producer Prince Kiiz yongeye kwiharira ukuvugwa ku mbuga nkoranyambaga nyuma yo gushinja ubuhemu umuhanzikazi Bwiza ndetse n’umureberera inyungu kubera kumwiba no kumutwarira indirimbo ye (Boda Boda) batanabimumenyesheje.

Mu butumwa yanyujije ahatangirwa ubutumwa bumara amasaha makumyabiri n’ane ku rukuta rwe rwo ku rubuga rwa Instagram, Prince Kiiiz uri mu batunganya indirimbo bamaze kumenyekana mu Rwanda yagaragaje uburakari budasanzwe yatewe n’ibikorwa bya Bwiza n’uwitwa Uhujimfura Claude umureberera inyungu muri Kikac Music.

Prince Kiiz yifatiye ku gahanga ubunyamwuga bw’uyu muhanzikazi uri mu bakunzwe muri iki gihe abashinja gufata igihangano cye bakakiyitirira kandi we nka nyiracyo atanabimenyeshejwe.

Yanditse ati 'Bwiza na Manger wawe, Uhijimfura Claude ndabanenga ubunyamugayo buke, kuba mwafata igihangano cy’umuntu mukakiyitirira, nta giciro kibaho cyagura inganzo y’umuntu ngo yitirirwe undi nyirabyo atabizi ariko Imana itabeshya imporere.'

Prince Kiiiz yakomeje agaragaza ko ibyo yakorewe na Bwiza ari agasuzuguro gakabije ndetse ko atari ku nshuro ya mbere abimukoze.

Ati 'Ndavuga ubu ni ubuhe bwoko bw’inganzo bwuje ukutiyubaha ndetse no kwiyitirira ibitari ibyawe? Ibi si inshuro ya mbere kandi ntekereza ko atari iya nyuma mbikorewe gusa ntiwibagirwe ko buri wese ugurana icyiza umwuka mubi nawo ntago utajya umuvira mu nzu.'

Kiiiz usanzwe ari n’umuhanzi yanagaragaje ko we abona igihangano kitaramo nyir’ukugihanga ntaho kiba gitandukaniye n’urusaku rwumvikanamo izina ry’uwahuguje.

Nubwo yirinze gutangaza izina ry’igihango cye cyaba kibwe gusa ibi Prince Kiiiz yabitangaje nta minota myinshi itambutse uyu muhanzikazi yagiriza kumutwarira igihangano ashyize hanze amashusho y’indirimbo ye nshya yise 'Boda Boda’ yatunganijwe mu buryo bw’amajwi ku bufatanye bwe na Producer Loader.

Bamwe bafana ntibatinze kugaragaza imbamutima zabo kuri iki kibazo aho benshi muri bo bakomeje guhuriza ku kwibaza impamvu uyu mutunganya muziki ashyirwa ku rutonde rw’aba- producer bayikoze kandi ariwe wayiririmbye.

Prince Kiiiz yashinje Bwiza ubwambuzi

Indirimbo Boda Boda ya Bwiza ngo ntabwo ari ye

Umuhanzi Nyarwanda, Florien Uworizagwira wamamaye nka Yampano aricuza urukundo yatanze ariko akiturwa kugambanirwa.

Yampano uri kubarizwa ku mugabane w’u Burayi mu Bubiligi, ntabwo ari mu bihe byoroshye.

Mu kwezi gushize ni bwo hagiye hanze amashusho ya Yampano n’umugore we barimo biha akabyizi (Bakora Imibonano mpuzabitsina), ni amashusho yatunguye benshi.

Uyu muhanzi yahise avuga ko umuntu akeka wabikoze ari uwari umujyanama we Pazzo Man kuko yari afite ‘password’ ya Email kandi ari ho yari abitse, ngo yabikoze ashaka kwihorera kuko yamwirukanye mu nzu.

Yahise ajya gutanga ikirego muri RIB maze ubu abantu batanu barimo Pazzo Man, K John, Djihad, Papy Nestor na Ishimwe François Xavier batawe muri yombi bakekwaho gusakaza aya mashusho.

Yampano akaba yateye benshi urujijo abinyujije ku rukuta rwe rwa Instagram aho yashyizeho ifoto ashoka amarira agaragaza ko aho kwizera abantu wakizera imbwa.

Ati “Kubera wenda kuvukira kure y’iterambere hari igihe mpa urukundo abantu nkarwima imbwa, kandi buriya imbwa ntiyakugambanira.”

Yakomeje avuga ko ibihe arimo ntawamwumva ariko ngo byose byapfiriye mu kwizera.

Ati “Reka mbabwire nta muntu n’umwe wanyumva ariko byose byapfiriye mu gutanga umutima wanjye. Ibihe bizacaho kandi haze ibindi byiza. Mwana wanjye cyangwa muntu wanjye aheza ni mu ijuru.”

Iyi mvugo yasorejeho “aheza ni mu ijuru”, yateye abantu kwikanga bavuga ko ashobora kwiyahura.

Yampano ntabwo yigeze yerura ngo avuge uwo yavugaga yizeye akamuhemukira bigeze aho yashokaga amarira mu maso.

Yampano yagaragaje ko arimo kunyura mu bihe bitoroshye

Umuraperi Zeo Trap yahishuye ko we na bagenzi be barimo Chacka Fella babarizwa inzu ifasha abahanzi ya 'Kavu Music’ bitegura gushyira hanze album nshya bise 'Baturekure’ mbere y’uko uyu mwaka ugera ku musozo.

Mu kiganiro yahaye ISIMBI, Byiringiro François wamamaye mu muziki nka Zeo Trap yatangaje ko we na bagenzi be babana mu itsinda rya Kavu Music bari kwitegura gushyira hanze album ya mbere bose bazaba bahuriyemo muri uyu mwaka benshi mu bayigize buri umwe yagiye ashyira hanze Album ku giti cye.

Yagize ati 'Mu busanzwe twebwe twari dufite umugambi wo kuvuga ngo buri muhanzi uba muri Kavu-gang ni yo yavamo yazajya afatwa nk’umuhanzi wihariye udashingiye ku itsinda nubwo dukorera hamwe, ni yo mpamvu haba njyewe, Bodack na Chacka Fella twashyize hanze album, ubu rero hakurikiyeho iyo duhiriyeho.'

Nk’uko yakomeje abishimangira iyi album bise 'Baturekure’ izaba iri ku miyoboro ya Label ya Kavu Music abarizwamo anayihuriyemo n’abandi barimo Dondada, Bodack, Bwiru Majagu na Chaka Fella aho kuba ari iye ku giti cye.

Yongeyeho ati 'Iyi album isigaje ibintu bike tukayishyira hanze, tuzayishyira ku mbuga nkoranyambaga n’izindi platform za Kavu Music aho kuyishyira kuri channel z’abahanzi ku giti cyabo.'

Ihene y’Agasozi nk’uko akunze kwiyita yanagaragaje ko habayeho ugutinda mu bikorwa byo gusohora iyi album ahanini kwatewe n’uko benshi mu bahanzi babariza muri Kavu Music barimo Chaka Fella na Bodack bari bahugiye mu kumenyekanisha ibikorwa byabo by’umuziki.

Ati 'Ni album twese duhuriyemo nk’abahanzi twanagombaga no kuba twarayisohoye mu mezi ashize tugisohora indirimbo twafatanije twese yitwa 'Baturekure’, gusa nyuma yaho hazamo kwita ku bikorwa byacu kuri buri muhanzi giti cye ariko turayishyira hanze vuba bitarenze uyu mwaka. '

Mu buryo buteye amatsiko uyu muraperi uherutse gushyira hanze album yise 'Ntabwo Anoga’ iri mu zakunzwe cyane muri uyu mwaka mu njyana ya Hip Hop, yerekanye ko igitekerezo cyo kwita iyi Album 'Baturekure’ cyaturutse ku burebure bw’intera yabaga hagati y’aho abahanzi batahaga mbere ubwo bahuraga byatumaga bamwe badatahana n’abandi ubwo babaga bari nko gukora nk’inama.

Ati ' Buri wese yari atuye ahandi hatandukanye n’aha mugenzi we, rero iyo twegerezaga amasaha akuze bamwe bataha kure wajyaga kumva baraturabuye bati’turashaka gutaha’ aho ni naho iyo mvugo yo kuvuga ngo ' baturekure dutaha kure’ yavuye.'

Muri uyu mwaka wa 2025, Kavu Music bigaragara ko bashyize imbaraga mu gutuma abantu babamenya binyuze mu muziki mwiza mu njyana ya HipHop bijyanye n’uko Zeo Trap yashyize album yise 'Ntago Anoga’, Chaka Fella asohora iyo yise 'Birakaze ku mihanda’ ndetse na Bodack ashyira hanze alubumu ye ya mbere yise 'Kuri Time’.

Zeo Trap yavuze ko bagiye gusohora album nshya

Diamond Platnumz yangiwe gukorera ibitaramo bisoza umwaka mu bihugu byo ku mugabane w’i Burayi ndetse no muri Amerika ya Ruguru kubera gushyigikira Perezida Samia Suluhu Hassan mu matora yakurikiwe n’imyigaragambyo yaguyemo imbaga.

Amakuru dukesha ibinyamakuru byo mu gihugu cya Tanzania avuga ko inzego zishinzwe abinjira n’abasohoka mu bihugu byo ku mugabane w’Amerika ya Ruguru ndetse n’i Burayi byafatanije mu gutesheje agaciro uruhushya rw’inzira [Visa ] rw’uyu muhanzi wo muri Tanzania kubera gushyigikira Perezida Samia Suluha Hassan mu matora aherutse kwegukanamo intsinzi yamuhesheje kuyobora manda ye ya mbere.

Ntabwo ari Diamond Platnumz wangiwe gukorera ibitaramo muri ibi bihugu gusa kuko iri tegeko ryafashwe ahanini byemezwa ko rishingiye ku mpamvu za politike zo gushaka guhana buri muntu wese washyigikiye Perezida Samia mu cyo ibi bihugu bivuga ko ari ukuniga ubwisanzure bwa rubanda, gukoresha igitugu ndetse no kwifashisha amatora nk’igikoresho cya politike aho kuba inzira ya demokarasi ifasha mu isumburana ry’ubutegetsi.

Abandi bahanzi barimo Harmonize, Rayvanny ndetse n’umuraperi Bill Nas, we wanatwikiwe ibikorwa by’ubucuruzi n’abagaragambyaga nabo bivugwa ko bamaze gukurirwaho Visa zo kwerekeza muri ibi bihugu mu gihe kitatangajwe.

Amakuru aturuka mu bantu bari hafi b’uyu muhanzi avuga ko yari afite gahunda yo kuzakorera ibitaramo bisoza umwaka mu mijyi itandukanye yo muri Leta Zunze Ubumwe za Amerika, Canada, Ubwongereza. U Bufaransa ndetse n’Ubuholandi.

Ibi bihano bije byiyongera ku kuba Diamond Platnumz yarabaye umwe mu bantu bokejwe igututu n’abigaragambya muri Tanzania bavuga ko atari akwiriye gushyigikira Samia Suluhu mu matora y’Umukuru w’Igihugu.

Ndetse icyo gihe nyuma yo kotswa igitutu yagiye ku rukuta rwe rwa Instagram asiba buri butumwa bwose yari yarashyize agaragazaga ko ashyigikiye uyu wari umukandida w’Ishyaka CCM ndetse hari n’amakuru yavugaga ko we n’umuryango we bahise bahungira muri Kenya aho bahungaga abigaragambya batinya ko babagirira nabi.

Kuva Diamond Platnumz yakwamamara yabaye umurwanashywaka ukomeye wa CCM ku buryo yari inshuti y’akadosohoka ya buri muperezida uhereye kuri Kikwete, Magufuli kugeza no kuri Samia Suluhu.

Diamond Platnumz yangiwe kujya gutaramira i Burayi