Author: webrwanda

Umushoramari wiyemeje gufasha umuhanzi aba afite indi mpamvu itumye ashaka kumufasha ashobora kuba yifuza kwamamaza ibikorwa bye binyuze mu muhanzi cyangwa kumufasha gusa nk'umuntu abonyemo  impano akifuza kuyimurikira Isi gusa ariko habaho n'zindi mpamvu tutarondora nonaha zatuma uwishoboye yifuza gufasha umuhanzi abonanye impano icyakora mu Rwanda bikunze kugaragara ko badakunze kurambana.

Uretse no mu Rwanda, n’ahandi mu bindi biguhu bafite umuziki wateye imbere usanga ntabahanzi bamarana kabiri n’abashoramari bitewe n’impamvu zibaturukaho. Ibi ariko biri ku mpande zombi kuko usanga yaba umuhanzi hari ibyo yakoze bikamuteranya n’umushoramari, kimwe n’uko umushoramari aba ariwe uhemukira umuhanzi yafashaga.

Dore ibintu 10 biza ku isonga bitera abahanzi gutandukana n’abashoramari bari bariyemeje kubafasha:

1. Kutuzuza amasezerano

Kenshi umushoramari ureshya umuhanzi ngo bakorane usanga atabura utwo yitwaje akamwizeza ibyo azamukorera umuhanzi yabitekereza agasanga ari byo yaburaga ngo abe ari ku rwego atekereza. Nyuma yo kumvikana n'umushoramari gukorana hari igihe uyu asanga ibyo yemeye bihenze cyangwa binagoye agahitamo kugenda biguruntege mu masezerano yagiranye n'umuhanzi bityo amasezerano agahagararira aho.

Bibaho kandi ko umuhanzi aba yarumvikanye n’umushoramari kugira ibyo yuzuza n’ibyo agenderaho kugirango amufashe mu bikorwa by’umuziki we, gusa ntabyubahirize cyangwa se akabikora biguruntege bigatuma n’umushoramari acika intege bikarangira batandukanye.

2. Kwica no kutagira gahunda kw'abahanzi

Kenshi abashoramari bafasha abahanzi baba bagamije n'ubucuruzi kandi icyizere ni kimwe mu bintu byubaka ubucuruzi bugakomera, abahanzi bo mu Rwanda kenshi bakunze kurangwa n'ingeso isa n'iyabokamye yo kwica no kutagira gahunda, ibi rero usanga abashoramari batabyihanganira kabiri dore ko nk’iyo yateganyije akazi cyangwa yashakishije akazi ukica gahunda yo kugakora usibye no kwiyicira izina nawe uba urimwiciye nk’umuntu wagashatse bityo gutandukana kuba kuri hafi aho.

3.Ikinyabupfura gike cy'abahanzi

Umukinnyi kabuhariwe w’iteramakofi, Mike Tyson, yigeze kuvuga ati: ” Uko waba ufite impano nziza, uko waba ukomeye kose, akazi waba ukora kose ariko udafite ikinyabufura ntikaguhira kuko ikinyabupfura aricyo gituma ubasha gukora akazi neza ugakorana n’abandi”. Ibi ni ibyerekana ko ikinyabupfura kiba gikenewe kuri bose kugeza no kubahanzi.

Benshi mu baba biyemeje gufasha abahanzi ni abantu bishoboye n’ubusanzwe babaho babaye badafite abo bahanzi, bityo iyo afashe umuhanzi ngo amufashe biba bisaba uwo muhanzi kumera nk'umwana uhuye n'umubyeyi. Benshi mu bahanzi rero kwihanganira kubaha umuntu ubafasha kuri bamwe mu bahanzi biba bigoye cyane, bituma umuntu wiyubashye n’ubundi witunze atabasha gusuzugurwa kenshi n’uwo agiye gufasha bityo akamureka.

4. Kutiyubaha no kwiyandarika ku bahanzi

Iki kijya guhura n’ibyo twabonye haruguru, abahanzi kenshi bahura n'ikibazo cyo kutabasha kugenzura kamere yabo, iyo rero bafite ababafasha rimwe bafite n”amazina yiyubashye ntibaba bifuza gukorana n’ababicira amazina. Urugero rwa hafi rw'ibyo bakora bituma abashoramari kubihanganira biba bigoye ni nk'ubusinzi bukabije bw'abahanzi cyangwa kwiyandarika ku karubanda ugasanga umuhanzi yabaye iciro ry'imigani mu gihe nyamara usibye kwangiza izina rye yakwangiza n'iry'umufasha bityo bigatuma bashobora gutandukana mu buryo bworoshye.

5. Gukunda amafanga n'amanyanga y'abahanzi

Kenshi abahanzi bakunze kubona ababafasha muri muzika ndetse ugasanga hari ibyo bumvikanye gusa irari ry'amafaranga rikaba ingume kugira ngo bagume mu murongo umwe, ni ho ha handi usanga umuhanzi ari gukorera amafaranga mu bitaramo binyuranye nyamara umushoramari bakorana atazi n'ibyo uwo muhanzi arimo, ibi bituma afata icyemezo cyihuse cyo guhagarika imikoranire ye n'uyu muhanzi aba abonyeho ubunyangamugayo buke cyane.

Urebye ibyo tumaze kuvuga haruguru watekereza ko abahanzi aribo ba nyirabayazana bo gutandukana n'abakire baba biyemeje kubafasha gusa ntawahamya ko aribyo cyane ko nabo iyo muganiriye hari izindi ngingo baguha zikwereka ko abashoramari kenshi nabo hari impande zigaragaza ko atari abatagatifu.

6. Kumva amabwire kw'abahanzi

Umuhanzi uri kuzamuka neza aba ameze nk'inkumi nziza yimukiye mu gace kamwe ivuye ku kandi, buri wese aba amureshya ashaka kumwiyegereza, abwirwa utugambo twiza dusize umunyu buri wese wifite aba yamubonyemo, ibiryo bihiye, igicuruzwa gifite abaguzi mbega aba ashakishwa.  Uko gukururwa na buri wese bituma rimwe yizezwa ibitangaza n’abamukurura bikarangira ataye n’urwo yari yambaye, amabwire agamije kumutandukanya n’abo bakoranaga kenshi birangira bitandukanyije abahanzi benshi n’abo bakoranaga nyamara aho bagiye bikabagora mu gihe baba bifuje gusubira mu bo bakoranye na mbere.

7. Irari ryo kuryamana n'umuhanzikazi ufasha

Mu ruganda rw’imyidagaduro, iyi ngeso ikunze kugaragara, umukobwa wese uririmba aba afite benshi bifuza kumufasha bikaba ahe ho guhitamo umureshya neza. Iyo bamaze kumvikana hari igihe uyu washoye akayabo mu gufasha umuhanzikazi yifuza kuyagaruza binyuze mu kuryamana nawe. Ibi gusa kenshi biraba ariko bihira bake dore ko nyuma yo kuryamana igihe runaka uyu mushoramari ahita ata iyi nkumi akajya kwirebera n’abandi cyangwa uyu muhanzikazi akanga kuryamana n’urimokumufasha bigahita bihagarika imikoranire hagati yabo.

Hari ingero nyinshi z’abahanzikazi batandukanye bazwi bagiye batandukana n’abashoramari bapfa ko umuhanzikazi yanze kuryamana nawe. Muri aba twavugamo abamamaye barimo nka Mariah Careh na Lady Gaga bo muri Amerika,Tiwa Savage wo muri Nigeria, Shenseea wo muri Jamaica, n’abandi benshi bagiye bagaragaza ko abashoramari babafashaga bashatse ko baryamana.

8. Gukunda inkumi kw'abashoramari no kuzihigira muri muzika

Ibi akenshi biteranya abahanzi n'abajyanama babo, kenshi usanga umuntu ushoye amafaranga ye mu muziki aba afite impamvu ye yo kuyashoramo ariko hari n’ababikora nk'inzira yo kwishimisha bituma banabona umuziki nk'inzira ya bugufi yo gufatishirizamo inkumi hitwaje izina ry'umuhanzi. Uyu mushoramari ukunda inkumi rero hari igihe agonganira ku nkumi n'umuhanzi afasha bikaba byaba intandaro yo kubatandukanya cyangwa nanone ugasanga kubera kwisanga mu nkumi asigaye aziha umwanya kuruta umuhanzi nyirizina afasha, bityo bikarangira ibikorwa bidindiye bikabatandukanya.

Urugero ruzwi cyane rw’umushoramari wapfuye inkumi n’umuhanzi afasha, ni urwa Justin Bieber n’umushoramari Scooter Braun wamufashaga bikarangira batandukanye aho Braun yashinjaga Bieber ko aryamana na buri mukobwa wese atereta. Mu gihe Justin Bieber we yavugaga ko izi nkumi ziza zimushaka gusa zikanyura kuri Scooter Braun.

9. Kutiyubaha no kwiyandarika kw'abashoramari

Mu Rwanda ntabwo byakunze kubaho ariko nubwo byabaye gake nabwo byarabaye kuko kenshi usanga umushoramari yiyemeje gufasha umuhanzi bakumvikana ndetse n'imikoranire ugasanga bayihuje yabyara ikintu kinini ariko kutiyubaha no kwiyandarika k'umushoramari bikaba inzitizi zo gukomeza gukorana cyane iyo umuhanzi amaze kubona ko imyitwarire y'umufasha ishobora kumwangiriza izina yari amaze kugeraho.

10. Gukunda kwamamara kw'abashoramari kurusha guteza imbere umuhanzi afasha

Abashoramari muri muzika bagira impamvu nyinshi zibazana hari n’ababa bashaka kwamamara ngo rubanda babamenye bityo ugasanga aho agiye hose ashaka kwamamara kurusha n'umuhanzi ari gufasha ibyo bidindiza cyane iterambere ry'umuhanzi bigatuma iyo amunyujijemo ijisho hakiri kare akuramo ake karenge imikoranire ikarangirira aho.

Ibintu bitandukanya abahanzi n’abashoramari ni byinshi gusa ibi biri mu biza ku isonga bikunzwe gushyirwa mu majwi na benshi bo mu ruganda rw’umuziki bavuga ko ibi aribyo bikunze kwitambika hagati y’abahanzi n’abashoramari.

Byatangajwe kuri uyu wa Gatatu tariki 15 Ugushyingo 2023 mu kiganiro n'itangazamakuru cyabereye kuri Saint Paul, cyagarutse birambuye kuri iki gitaramo bazahuriramo na Josh Ishimwe wamamaye mu ndirimbo zo muri Kiliziya Gatolika.

Ni kimwe mu bitaramo bimaze hafi amezi atatu byamamazwa, kandi abantu banyuranye barimo abazwi cyane nka Massamba Intore bamaze kugaragaza ko biteguye kuzitabira iki gitaramo cyubakiye ku ndirimbo zo guhimbaza Imana mu buryo bwagutse.

Mu mashusho yashyize hanze, Massamba yavuze ko atumiye buri wese kutazacikwa n'iki gitaramo. Ati 'Icyo gitaramo bacyise neza cyane cyitwa 'I Bweranganzo' murumva ko harimo inganzo nziza, inganzo ishimisha Imana, inganzo iryohereye amatwi, iryohereye ibyishimo, muze muri benshi, maze dutarame, dutaramane na Chorale Christus Regnat. Gahunda ni Camp Kigali.'

Visi-Perezida wa Chorale Christus Regnat, Alice La Douce Nyaruhirira asobanura ko bateguye iki gitaramo “I Bweranganzo” bafite intego yo gusabana ‘n’abakunzi babo, kuko hari hashize imyaka ine badatarama n'abo mu buryo bw'imbona nkubone.

Ati '[…] Ni ukugira ngo tugaragaze natwe nka Chorale Christus Regnat aho igeze. Twari tumaze imyaka igera kuri 4 tudakora igitaramo ahanini byatewe na Covid-19 bituma tudashobora guhura, no kuba twakora igitaramo nk’iki ngiki mu buryo bwagutse. 

Gusa muri icyo gihe cya Covid-19 twashoboye kujya dukora ibindi dusanzwe dushinzwe, kuririmba missa, yaba mu kiliziya, yaba kuri Pacis Tv n’ahandi twagiye dufashe abakristu.

Alice La Douce Nyaruhirira avuga kandi ko iki gitaramo ari imbanziriza mushinga y'iserukiramuco batekereza gutegura rizaherekezwa n’ibitaramo by’ubuvanganzo, kandi bizajya biba buri mwaka.

Akomeza ati 'Impamvu rero y’iki gitaramo ni nko gutegurura umushinga twise “I Bweranganzo’ tukaba twifuza y’uko icyo gitaramo cyazaba ngaruka mwaka bidushobokeye, kinaguka mbese kikarenga kwitwa igitaramo gisanzwe.”

Yunganirwa n'Umuyobozi wungirije ushinzwe ibya tekiniki n’imyitwarire, Bizimana Jeremie uvuga ko iki gitaramo bacyise ‘I Bweranganzo’ mu murongo w’icyifuzo cyo kuba bakora iserukiramuco rizajya rihuza ‘impano nyinshi’.

Ati “Twifuza ko aho hitwa ‘I Bweranganzo’ bitaba igitaramo gusa, bishobora kuba iserukiramuco rihuza impano nyinshi. Turifuza ko wazaba umushinga mugari ku buryo mu gihe kizaza tubonye abafatanyabikorwa badufasha gukora uwo mushinga tukawugeza ku bantu benshi, tugafasha no kuzamura impano zikiri ntoya zikagera ku rwego rushimishije.”

Agakomeza ati “Impamvu twacyise ‘I Bweranganzo’ turashaka kumurika impano dufite ariko nk’uko tubizi mu kinyarwanda iyo ufite urwuri ugira n’uruhongore, mu ruhongore niho haba inyana, ni ukuvuga ngo rero hazagaragara n’impano zikiri nto, z’abatoya, bigaragara ko dufite uruhongore, ko ejo hazaza hazaba ari heza mu bijyanye n’umuziki ndetse n’izindi mpano zinyuranye.'

Iki gitaramo kizabera muri Kigali Conference and Exhibition Village ahazwi nka Camp Kigali guhera saa kumi z’umugoroba.

Chorale Christus Regnat ni korari imaze kubaka izina mu ndirimbo zinyuranye zaba izisingiza Imana, izirata umuco ndetse n'izindi zinyuranye. Izwi mu ndirimbo nka ‘Umukozi w’umuhanga’, ‘Duhakirwe’, ‘Ca akabogi’, ‘Mu maboko yawe’, ‘Mama shenge’ bakoranye na Yverry na Andy Bumuntu n’izindi.

Iyi korali yakoze kandi ingendo nyinshi z'iyogezabutumwa mu gihugu cy'u Rwanda ndetse no hanze yacyo.

Yakoze ibikorwa by'urukundo bitandukanye harimo gusura abarwayi, gufasha imfubyi n'abapfakazi ndetse no kurihira abatishoboye ubwisungane mu kwivuza.

Kwinjira muri iki gitaramo igiye gukora ni 5,000 Frw mu myanya isanzwe, 10,000 Frw muri VIP na 20,000 Frw muri Premium, ni mu gihe ku meza y’abantu batandatu ari ukwishyura ibihumbi 150,000 Frw-Aha ni mu gihe uguze itike imbere y’igitaramo.

Ku munsi w’igitaramo ibiciro bizaba byiyongereho; kuko mu myanya isanzwe ari ukwishyura 8,000 Frw, 15,000 Frw muri VIP na 25,000 Frw muri Premium. Ku meza y’abantu batandatu ntacyahindutse, kuko ari ukwishyura 150,000 Frw.

Ushobora kugura itike yawe hakiri kare unyuze ku rubuga www.christusregnat.rw ndetse no kuri Code: *666600#

Chorale Christus Regnat iritegura gukora igitaramo gikomeye ku Cyumweru tariki 19 Ugushyingo 2023 muri Camp Kigali bazahuriramo na Josh Ishimwe 

Umuyobozi wungirije ushinzwe ibya tekiniki n’imyitwarire, Bizimana Jeremie yatangaje ko iki gitaramo bateguye ari intangiriro y'iserukiramuco 'I Bweranganzo' rigamije kuzamura impano z'abakiri bato no gutaramira abakunzi babo buri mwaka 

Visi-Perezida wa Chorale Christus Regnat, Alice La Douce Nyaruhirira yavuze ko bateguye iki gitaramo mu rwego rwo gusabana no gutaramana n'abakunzi babo

Cyriaque Ngoboka, umunyamuziki uri mu batangiranye na Chorale Christus Regnat yumvikanisha ko bubakiye ku ntego y'ibihangano bifasha buri wese

Josh Ishimwe ugiye kuririmba muri iki gitaramo aherutse gushyira ahagaragara amashusho y'indirimbo yasubiyemo 'Umwana ni umutware' ya Ngarambe François-Xavier

KANDA HANO UREBE IBYATANGAJWE MU KIGANIRO N'ITANGAZAMAKURU

“>

Biravugwa ko umutoza w’ikipe y’igihugu Amavubi, Torsten Frank Spittler yamaze gusezerera abandi bakinnyi batanu mu gihe arimo yitegura umukino wa Afurika y’Epfo.

Uyu mutoza w’umudage yari yahamagaye abakinnyi 30 agomba kwifashisha mu mikino 2 yo gushaka itike y’igikombe cy’Isi cya 2026 harimo uwo baraye bakinnye na Zimbabwe bakanganya 0-0 ndetse n’uwo bazakina na Afurika y’Epfo tariki ya 21 Ugushyingo 2023.

Mu bakinnyi bari yahamagawe, mbere yo gukina na Zimbabwe yari yasezereye babiri ari bo; Mugunga Yves na Iradukunda Elie Tatou.

Nyuma y’umukino yaraye anganyijemo na Zimbabwe 0-0, bivugwa ko umutoza yamaze gusezerera abakinnyi 5 kuko atabafite mu mibare y’umukino wa Afurika y’Epfo.

Ku isonga hari umunyezamu wa Kiyovu Sports, Nzeyurwana Jimmy Djihad ndetse na rutahizamu wa Police FC, Mugisha Didier.

Bivugwa ko kandi yanamaze gusezerera abakinnyi 3 basanzwe bakinira APR FC, Ishimwe Christian, Niyigena Clement ndetse na Kwitonda Alain Bacca.

Gusa na none nubwo yarekuye aba bakinnyi yakiriye abandi batatu barimo Mugisha Bonheur wa AS Marsa yo muri Tunisia, Yves Hendrickx wa RWD Molenbeek mu Bubiligi na Maxime Wenssens wa Union Saint-Gilloise yo mu cyiciro cya mbere mu Bubiligi.

Urugaga rw’Abanditsi mu Rwanda rutangaza ko gushimira abanditsi b'ibitabo mu mashuri bizanafasha mu gushishikariza urubyiruko rw'u Rwanda kwita  ku rurimi rwabo kavukire kuruta gukururwa cyane n’iz’amahanga.

Nyuma yo kubona ko hari icyuho gituruka ku rubyiruko rutazi neza Ikinyarwanda, Urugaga rw'Abanditsi mu Rwanda rwagiye rutegura amarushanwa atandukanye guhera mu mashuri abanza, ayisumbuye na za Kaminuza, agamije kurebera hamwe urwego abanyeshuri bariho mu bijyanye no gusoma no kwandika ibitabo mu rurimi rw'Ikinyarwanda.

RWF ifatanyije n'Ishyirahamwe ry'Uruganda rw'Ibitabo mu Rwanda (Rwanda Books Industry Association/ RWABIA) ndetse n'Inzu Isohora Ibitabo (Africa Oasis Publishing House) bateguye umuhango wo guhemba amashuri makuru na za kaminuza zaguze ibitabo 50 cyangwa hejuru yabyo, byanditswe mu rurimi rw'ikinyarwanda mu myaka ibiri ishize.

Mu bushakashatsi bwakozwe, hasanzwe kaminuza zujuje ibisabwa zitarenze ebyiri mu gihugu hose.

Umuyobozi w'Urugaga rw'Abanditsi mu Rwanda, Hategekimana Richard, yabwiye  InyaRwanda ko iki gikorwa cyatekerejweho nyuma yo kubona akamaro k'ibitabo byanditswe mu rurimi rw'Ikinyarwanda mu iterambere ry'igihugu.

Avuga kandi ko hari amashuri menshi makuru na za kaminuza zidafite ibitabo byanditswe mu Kinyarwanda mu masomero yabo.

Yagize ati: 'Dushingiye ku mahitamo y'u Rwanda aho guteza imbere ururimi rw'Ikinyarwanda ari inshingano ya buri wese cyane cyane mu mashuri arera abana b'u Rwanda, dushingiye kandi ku kamaro k'ubukangurambaga mu iterambere ry'ururimi rwacu kavukire hubakwa u Rwanda rwacu, hateguwe umuhango wo guhemba amashuri makuru na za kaminuza zesheje umuhigo wo kugura byibura ibitabo 50 byanditswe mu rurimi rw'Ikinyarwanda.'

Mu bandi bazahembwa, harimo abanyamakuru bateje imbere umuco wo gusoma ibitabo mu mwaka wa 2023/2024, ibigo by'amashuri yisumbuye byagaragaje urukundo rw'ibitabo nibura bakagura ibitabo 20 mu mwaka umwe.

Hazahembwa kandi umwanditsi wanditse ibitabo bibiri nibura mu myaka ibiri ikurikirana (2022-2023) kandi ibyo bitabo akabimurikira Abanyarwanda bifite ISBN bitari munsi ya paji 100, inzu zisohora ibitabo zikora neza, inzu zicapa ibitabo zikora neza, inzu zigurisha ibitabo zikora neza n'inzu z'isomero zikora neza.

Umuhango wo gutanga ibi bihembo uteganyijwe kuzaba tariki ya 8 Ukuboza 2023 mu nzu Mbera Byombi ya Hilltop Hotel guhera saa munani z'amanywa.   

Nyuma y’amarushanwa ajyanye no gusoma no kwandika ibitabo, ubu noneho hagiye guhembwa ibigo ndetse n’abandi bose bagize uruhare mu guteza imbere ururimi rw’Ikinyarwanda

Torsten Frank Spittler uherutse guhabwa ikipe y’igihugu Amavubi, yaraye atoje umukino we wa mbere nk’umutoza mukuru, mu mukino wo gushaka itike y’igikombe cy’Isi, u Rwanda rwanganyijemo na Zimbabwe ubusa ku busa. Nubwo Torsten Frank Spittler ari umutoza mukuru, ariko ibyemezo byinshi by’ikipe y’igihugu kuva yahamagarwa kugera nijoro umukino urangiye, byakunze gufatwa n’abatoza bungirije, aribo Rwasamanzi Yves ndetse na Jimmy Mulisa.

Torsten Frank Spittler, yemejwe nk’umutoza mukuru w’ikipe y’igihugu Amavubi hasigaye ibyumweru 2 gusa ngo bakine na Zimbabwe. Nyuma y’iminsi mike uyu mutoza yaje gushyira hanze urutonde rw’abakinnyi 30 bagombaga gutangira umwiherero ariko biza kugaragara ko uru rutonde atariwe waruhamagaye.

Mu bakinnyi 11 u Rwanda rwabanje mu kibuga, 3 nibo bakina mu Rwanda 

Mu kiganiro n’itangazamakuru kibanziriza umukino, umutoza Torsten Frank Spittler yatangaje ko abakinnyi bahamagawe atabazi yewe atazi n’imyanya bakinaho. Yagize Ati” nNtabwo nahita nkubwira ngo abakinnyi bari gukina uku bameze uku, kuko nibwo nkihura nabo. Abenshi ubu ndikurwana no kubafata amazina kuko sinzi n’uko bitwa.”

Mu bakinnyi 30 bari bahamagawe umutoza akibabona imyitozo itangiye, hari abo atashimye ndetse akajya abaza abatoza bungirije niba nta bandi bahari. Aha twavuga nka Mugisha Bonheur byabaye ngombwa ko ahamagarwa nyuma, ukibaza icyari cyabaye kugira ngo ntiyitabazwe.

Mu myitozo hari abakinnyi bashyizwe ku myanya basanzwe badakinaho kandi bikozwe n’abatoza bungirije, byatumye umutoza mukuru uko abonye umukinnyi ariko agumana ishusho ye. Urwo rugendo rwarakomeje kugera kuri uyu wa Gatatu ku munsi w’umukino naho haje kugaragara kunyuranamo hagati y’umutoza mukuru ndetse n’abungiriza.

Umutoza w’ikipe y’igihugu, yemeza ko mu bakinnyi bavuye hanze harimo abakuze mu mutwe kandi bazamufasha 

Abakinnyi babanje mu kibuga, twavuga ko abanyarwanda n’ubwo nta cyizere baba bafitiye ikipe y’igihugu ariko bari banyuzwe n’abakinnyi bakoreshejwe.

Mu gice cya kabiri, nibwo ibintu byatangiye kwivanga Amavubi atangiye gusimbuza. Byiringiro Lague yaje gusimburwa na Gitego Arthur abantu batangira kwibaza impamvu yabyo birabacanga.

Gitego ni Rutahizamu wa Marine FC ukina nka nimero 9 ndetse muri uyu mwaka w’imikino akaba afite ibitego 2. Uyu musore twese twakemeranya ko umutoza mukuru atari amuzi, usibye Rwasamanzi Yves, usanzwe amatoza mu ikipe ya Marine FC.

Icyo umuntu yakibaza, ni ukuntu umutoza Rwasamanzi Yves yakinishije Gitego Arthur ku mpande, kandi no muri Marine FC ubwo iryo kosa atarikora kuko abizi neza ko ari nimero 9.

Gitego ntabwo ajya akina ari rutahizamu wenyine. Rwasamanzi Yves nano arabizi ko Gitego Arthur nk’umwana yitoreza, atajya akina imbere ari rutahizamu umwe kuko niyo abashije kujya mu kibuga aba afite undi mukinnyi uba amuri hafi.

Gitego Arthur inshuro ya mbere yari ahamagawe mu mavubi, yahise akina umukino we wa mbere 

Sahabo Hakim wari wakinnye umupira mwiza, yaje kuva mu kibuga imburagihe, asimburwa na Muhire Kevin. Sahabo yari yamaze kwemeza ko ari umukinnyi uri gufata cyane ndetse na Zimbabwe yari yatangiye kumugendera gake. Ubwo yavaga mu kibuga uyu musore yasohotse atishimye ndetse agaragara nk’umukinnyi wari ugifite byinshi byo gutanga.

Tugendeye kuri Sahabo na Muhire Kevin, ntabwo Muhire Kevin yari afite ubushobozi bwo gukina ibintu bisumbye ibya Sahabo, ariko Jimmy Mulisa na Rwasamanzi Yves bahisemo kubikora uko umutoza arebera dore ko n’uwo  Muhire Kevin atazi uko akina.

Sahabo yavuye mu kibuga abafana barababara cyane bavuga ko ariwe mukinnyi bari bacungiyeho

Nyuma y’uyu mukino, umutoza w’ikipe y’igihugu Amavubi yatangaje ko anyuzwe n’uko abakinnyi bitwaye. Yagize Ati” Mbere na mbere nishimiye uko abakinnyi bitwaye. Turi mu bihe bigoye, ngira ngo murabizi ko aribwo nkifata ikipe abakinnyi benshi simbazi, ariko natangiye kubamenya twakizerako ku mukino wa Afurika y’Epfo bizaba byatangiye kujya ku murongo.     

Tariki 21 Ugushyingo 2023, u Rwanda ruzakira ikipe y’igihugu ya Afurika y’Epfo mu mukino uzabera nabwo kuri sitade mpuzamahanga y’akarere ka Huye. Twavuga ko mu kindi cyumweru cy’imyitozo, umutoza Torsten Frank Spittler azaba amaze kumenya imikinire ya buri mukinnyi tugatangira kubona ibyemezo bye bwite ndetse n’ubuhanga bwe bwo gusoma umukino, bukunganirwa n’abatoza bungirije. 

Frank yungirijwe na Jimmy Mulisa na Rwasamanzi, gusa bamwe mu bakinnyi bavuga  ko aba batoza bo mu Rwanda bavangira umutoza mukuru 

Sahabo ntabwo yanyuzwe n’imisimburize 

Muhire Kevin na Sibomana Patrick bitegura kujya mu kibuga 

Byiringiro Lague yakinnye iminota 45 asimburwa na Gitego 

Mugisha wahamagawe mu nyongera, yabanje mu kibuga akina igice cya mbere