Author: webrwanda

Umutoza w'ikipe y'igihugu Amavubi yirukanye abakinnyi 5 mu mwiherero.

Abakinnyi barimo NZEYURWANDA Jimmy Djihad, NIYIGENA Clément, ISHIMWE Christian, KWITONDA Alain Bacca na MUGISHA Didier bamaze gusezererwa mu mwiherero w'ikipe y'igihugu.

Ikipe yagarutse i Kigali, uyu munsi saa cyenda baritoreza kuri Kigali Pélé Stadium.

Biteganyijwe ko barakina undi mukino tariki ya 21/11/2023 aho bazaba bakiriye ikipe y'igihugu ya Afurika y'Epfo.

Source : https://yegob.rw/babiri-ni-aba-apr-fc-umutoza-wikipe-yigihugu-amavubi-yirukanye-abakinnyi-5-mu-mwiherero-bari-mu-gushaka-itike-yigikombe-cyisi/

Ahari Camera zandikira abarengeje umuvuduko w'ibinyabiziga mu Rwanda, hatangiye gushyirwa ibyapa bibaburira, kugira ngo baringanize umuvuduko.

Ni igikorwa cyatangiye gukorwa n'Ikigo cy'Igihugu Gishinzwe Iterambere ry'Ubwikorezi (RTDA), aho ibi byapa bigiye gushyirwa ahantu hose habanziriza ahari Camera zandikira abagendera ku muvuduko urenze uwagenwe.

Abatwara ibinyabiziga mu Rwanda, bakunze kuzamura amajwi bavuga ko ubundi ahari camera nk'izi, haba hakwiye gushyirwa ibimenyetso byo ku muhanda nk'uko biteganywa n'amategeko y'umuhanda.

Umwe mu batwara ibinyabiziga, yavuze ko ibi byapa bizafasha abashoferi kwirinda kugwa mu makosa bajyaga bafatirwamo n'izi camera zikabandikira.

Ati 'Ubusanzwe ahari ikidasanzwe ku muhanda, haba hagomba gushyirwa ikimenyetso nk'uko biteganywa n'amategeko y'umuhanda. Ibi rero bizafasha abashoferi kutongera kugwa mu makosa yo kwandikirwa na ziriya camera.'

Gusa avuga ko nanone bishobora kuzongera amakosa mu muhanda kuko abantu bazaba bazi ko bari buze kubona icyapa kibamenyesha ko imbere hari Camera, bizajya bituma birara bakagendera ku muvuduko wo hejuru mu gihe batarabona icyo cyapa.

Ibyapa bizajya bimenyesha abatwaye ibinyabiziga ko imbere hari Camera

Mu kiganiro Umuyobozi Mukuru wa Polisi y'u Rwanda, IGP Felix Namuhoranye yagiranye n'itangazamakuru mu kwezi gushize k'Ukwakira, yavuze ko izi camera zigiye kujya zitahura n'andi makosa ndetse zikanayandikiraho abashoferi, atari ukurenza umuvuduko gusa nk'uko byari bisanzwe.

Icyo gihe yagize yagize ati 'Udafite ubwishingizi, mu gihe kiri imbere, Camera izamenya ko imodoka iriho igenda idafite ubwishingizi, izamenya ko imodoka iriho igenda idafite Contrôle technique, izamenya ko imodoka iriho igenda nyirayo ari kuvugira kuri telefone cyangwa atambaye umukandara. Izanamenya ko imodoka iriho igenda ifite umuvuduko.'

IGP Namuhoranye yavuze ko mu gihe camera zo ku muhanda zizatangira gutahura aya makosa yose ndetse no kuyandikiraho abashoferi, bizatanga umusaruro, kuko abantu bazajya birinda gutwara ibinyabiziga batujuje ibitahurwa na zo.

Source : https://yegob.rw/abashoferi-bo-mu-rwanda-bari-kumwenyura-nyuma-yigikorwa-polisi-yu-rwanda-yabakoreye/

Ambasaderi wa Israel mu Rwanda, Einat Weiss yatangaje ko ku bufatanye na Guverinoma y'u Rwanda igihugu cye gishaka kohereza Abanyarwanda bagera ku 1000 bazajya muri iki gihugu bagiye mu kazi bitari ukwiga nk'uko byari bisanzwe bikorwa.

Ibi Amb Weiss yabitangaje kuri uyu wa 15 Ugushyingo mu muhango wo gutangiza ku mugaragaro umushinga witwa 'Seed Resilience' wo gufasha abahinzi bo mu Rwanda kugerwaho n'imbuto nziza ku buryo bazamura umusaruro w'imboga n'imbuto.

Ni umushinga w'umuryango utegamiye kuri leta wo muri Israel witwa Fair Planet watangijwe n'umunya-Israel Dr Shoshan Haran.

Ubusanzwe Abanyarwanda bajyaga muri Israel babaga bagiye mu masomo atandukanye nk'ubuhinzi bw'indabo, imboga n'imbuto, kuhira mu buryo bugezweho n'ibindi bakagaruka nyuma y'umwaka ibyo bungutse bakabishyira mu bikorwa.

Kuri iyi nshuro Weiss yavuze ko begereye Guverinoma y'u Rwanda barayiganiriza kugira ngo bohereze abakozi batandukanye bakazajya bafatwa nk'uko Abanya-Israel bafatwa ku bigenerwa umukozi.

Ati 'Turashaka abagera ku 1000. Urumva ko ari benshi. Bazaba bakora bitari ibisanzwe byo kwiga. Bazahabwa ibigenerwa umukozi byose nk'ibigabwa umwenegihugu. Bijyanye n'uko Abanya-Israel bamwe bishwe abandi bakaba bari mu ntambara, dukeneye abakozi benshi. Abazaherwaho ni abanyuze muri iriya gahunda ifasha Abanyarwanda kwiga muri Israel.'

Yavuze ko nubwo bafite abakorerabushake bari mu mirimo itandukanye muri iki gihugu, ariko hakiri imirimo ikeneye abantu benshi 'kuko nubwo duha Abanyarwanda amahirwe yo kwiga, kuri ubu natwe dukeneye abaza kudufasha mu mirimo itandukanye na bo bakunguka amafaranga. Ni amahirwe akomeye kuri twese.'

Yashimangiye ko aya masezerano bari kugirana n'u Rwanda adasanzwe, kuko ari rwo gihugu cya Afurika cyonyine bari kugirana ubu bufatanye, bigashingira kuko iki gihugu cyo mu Burasirazuba bwo Hagati cyabonye Abanyarwanda nk'abakozi.

Israel iri mu bihugu bihemba neza ku Isi kuko ikigo gishinzwe ibijyanye n'ubwushingizi no kurengera abakozi cy'iki gihugu kigaragaza ko umushahara wo hasi umukozi abona ungana na ama-Shekel ya Israel 5.571 angana na 1.826.677 Frw.

Ku bijyanye n'abanyeshuri b'Abanyarwanda bajya kwimenyereza umwuga muri Israel, Amb Weiss yavuze ko muri uyu mwaka wa 2023, bongerewe bava ku 200 bagera kuri 250, ashimangira ko n'ubu bari mu biganiro kugira ngo bongerwe.

Ati 'Mu byumweru bibiri bishize twaganiriye na Guverinoma y'u Rwanda twemeza ko twakongeraho abandi 200 bakaba 450.'

Yavuze ko ari icyemezo kiri kwigwaho ashimangira ko igihugu cye kirangamiye ko hajyayo benshi kugira ngo babyaze ayo mahirwe umusaruro.

Amb Weiss yavuze ko uretse uwo mushinga wo guha Abanyarwanda akazi muri Israel, iki gihugu kuri ubu kiri guteganya imishinga itandukanye irenze ku kigo cy'icyitegererezo giteza imbere ubuhinzi bw'imboga n'imbuto bugezweho cyahaye u Rwanda.

Yavuze ko kugeza ubu hari undi Munya-Israel ushaka kubaka icyanya kibungabunga ibidukikije mu Rwanda kizaba ari icya mbere kinini muri Afurika.

Ati 'Ni ikintu kigari turi gukoraho kuva umwaka ushize ndetse turi mu biganiro bya nyuma. Nibikunda iki gikorwaremezo kizashyirwa mu Karere ka Nyagatare. Ni icyanya kizashyirwamo ikigo cyita ku matungo, icyanya kirengera urusobe rw'ibinyabuzima n'ibindi. Ni umugiraneza uzaba ukoresha amafaranga ye.'

Yashimangiye ko icyo cyanya kizafasha mu kurengera ibiti, abantu bakareka kubitema uko biboneye n'amatungo arwaye bakajya bayajyanayo akavurwa ndetse hagashyirwamo n'ikigo cyigisha kurengera ibidukikije n'ubuhinzi n'ubworozi bugezweho.

Ngo ni igikorwa kizajyana n'indi mishinga iteza imbere ubworozi no kuzamura umukamo mu Rwanda, Amb Weiss agatangaza ko bari gukorana n'u Rwanda harebwa uko uwo mushinga washyirwa mu bikorwa cyane ko mu Rwanda hakiri ikibazo cy'amakusanyirizo y'amata make.

Ati 'Ubusanzwe impuzandengo y'umukamo utangwa n'inka yo mu Rwanda ni litiro eshanu. Dushaka guteza imbere ubu bworozi ku buryo byibuze inka yajya itanga litiro 27 ku munsi. Ni ibintu bishoboka kuko Israel ibifitemo ubumenyi bwisumbuye.'

Ibindi bifuza gukora mu Rwanda birimo kubaka inganda ziyungurura amazi yakoreshejwe akongera gukoreshwa, ibintu muri Israel bazobereyemo kuko 95% by'amazi akoreshwayo aba ari ayakoreshejwe akayungururwa bundi bushya kuko Israel ari igihugu giherereye mu butayu.

Source : https://yegob.rw/bahembwa-hejuru-ya-miliyoni-1-5-abanyarwanda-1000-bagiye-guhabwa-akazi-gahoraho-muri-israel-iri-mu-ntambara-na-hamas/

Iyo uganiriye n'abahanzi bakora umuziki wo mu njyana ya gakondo muri iki gihe, benshi muri bo bakubwira ko bafite uwo bavomaho inganzo, wemeje imitima yabo kureka kuririmba injyana zigezweho, bakayoboka iya gakondo kandi bakiri bato.

Mu Rwanda, hamaze kuvuka abahanzi benshi bakora injyana ya gakondo. Bamwe muri bo bamaze kugera ku rwego rushimishije, ndetse bakora ibitaramo haba mu Rwanda no mu mahanga kandi bikitabirwa ku kigero cyo hejuru.

Cyusa Ibrahim, umaze gushinga imizi muri iyi njyana yaganiriye na InyaRwanda, maze asobanura ko gakondo ari injyana yabyirukiyemo akayikuriramo abifashijwemo n'ababyeyi be ndetse n'abamubanjirije muri uyu muziki afatiraho icyitegererezo.

Yagize ati: 'Gakondo ni ubuzima bwanjye kuko nabibyirukiyemo, mbifashijwemo n'ababyeyi banjye kuko natangiye kubyina mu itorero mfite imyaka itanu; rero ubutore narabukuranye.'

Akomoza ku bamubanjirije bamubereye urugero yagize ati: 'Njyewe abahanzi ba gakondo mfataho ikitegererezo ni benshi gusa ab'ingenzi ni:

– Maman Uwera Florida, ni nawe mwarimu wanjye indirimbo nyinshi mpimba mbanza kuzimwumvisha; kandi yanyigishije nyinshi cyane za gakondo yo hambere.

– Rugamba Sipuriyani; ni umuhanzi njye ntanatinya kuvuga ko yari umuhanuzi; ikibonezamvugo yagiraga sinzi ko hari abahanzi bazakigira.'

Cyusa Ibrahim yakunzwe cyane mu ndirimbo zirimo 'Imparamba,' Muhoza, Marebe, Umwiza yafatanije na Riderman, Rwanda Nkunda n'izindi nyinshi.

Abakobwa b'impanga, Ange Ndayishimiye na Pamella Bamureke nabo bamaze kuba ubukombe mu njyana ya gakondo, bafite ababanjirije bafata nk'ibyitegererezo muri iyi njyana. 

Bamwe muri bo, banabahimbiye indirimbo bise 'Ndamurika' ibashimira ku bw'uruhare bagize mu kuzamuka kwabo. Muri abo, harimo Cecile Kayirebwa, Muyango na Massamba Intore.

Cecile Kayirebwa, icyitegererezo kuri Ange na Pamella

Mu kiganiro bagiranye na InyaRwanda, Ange & Pamella basobanuye ko bakunze injyana gakondo kuva bakiri  bato, kuko banabyirutse babyina mu matorero atandukanye.

Bagize bati: 'Gakondo ni injyana nziza cyane iryoheye ugutwi, yuje ubuhanga n’umwimerere. Twarushijeho kuyiyumvamo cyane kuko twakuze dukunda imbyino za gakondo ndetse tunabyinira amatorero atandukanye.'

Massamba Intore nawe ni umwe mu bahanzi ba gakondo batera imbaraga Ange na Pamella

Aba bakobwa bihebeye gakondo, babajijwe abo bafata nk'icyitegererezo basubije bati: 'Abahanzi gakondo bo hambere dufata nk’icyitegererezo ku isonga haza Nyambo y’icyeza Cecile Kayirebwa. 

Twakunze ibihangano bye cyane kuva tukiri bato ku buryo aho twatangiye kubonera ko dufite impano yo kuririmba twifuzaga gutera ikirenge mu cye. Hari kandi na Kamaliza ndetse na Muyango abo rwose nibo batubereye icyitegererezo muri iyi njyana.'

Bashimangiye ko aba babyeyi babasigiye umurage ukomeye wo gukunda igihugu n'umuco wabo. Basoje bavuga ko bifuza gusigasira uwo murage bahawe, bakawusigira abari kubyiruka kandi bizeye ko nabo bazawukomeza.

Muyango wamamaye cyane muri gakondo hagati y’impanga zimaze kwigarurira imitima ya benshi

Ange na Pamella batangiye umuziki mu 2008 ariko baza gushinga imizi muri 2016 ubwo bamenyanaga n'umubyeyi wubashywe cyane muri iyi njyana Cecile Kayirebwa, binyuze mu marushanwa yo gushaka abantu bagombaga kumufasha mu gitaramo yateganyaga gukorera mu Rwanda.

Cyusa Ibrahim, intore cyane mu njyana ya gakondo, umwimerere w’u Rwanda 

Source : https://inyarwanda.com/inkuru/136539/abakora-umuziki-gakondo-muri-iki-gihe-bacyeje-bakuru-babo-babaharuriye-inzira-136539.html

Kuva tariki 13-15 Ugushyingo 2023, Isi yose yizihizaga icyumweru cyahariwe kuzirikana akamaro k'Inkoni Yera ikoreshwa n'abafite ubumuga bwo kutabona. Kimwe n'umwaka ushize, MTN Rwanda ifatanije n'Ihuriro Nyarwanda ry'Abatabona (RUB) bizihije umunsi mpuzamahanga w'Inkoni yera, mu gikorwa bise 'Dinner in the Dark.'

Iki gikorwa cyibaye ku nshuro ya kabiri, cyabaye mu ijoro ryo kuri uyu wa Gatatu tariki 15 Ugushyingo 2023 kuri Kigali Serena Hotel, cyitabirwa n'itsinda rigari rya MTN Rwanda n'abafatanyabikorwa bayo, itsinda ryo muri RUB n'abandi.

Uyu mugoroba watangiye ahagana ku isaha y'i saa kumi n'ebyiri z'umugoroba, waranzwe cyane no kwisanisha n'abafite ubumuga bwo kutabona, aho ababona bagize umwanya wo gupfukwa ibitambaro ku maso, bagahabwa inkoni zera ubundi bakagenda batabona mu cyumba cyijimye cyari cyateguwe.

Buri wese mu bitabiriye, yinjiraga apfutse ku maso ndetse afite inkoni yera akayoborwa n'usanzwe ufite ubumuga bwo kutabona mu ijwi riranguruye rigira riti: 'Kurikira ijwi ryanjye, ntugire ubwoba uratekanye.'

Itsinda ry'abafite ubumuga bwo kutabona ryayoboye ababona niryo ryayoboye abantu kuva binjiye, mu mwanya wo kujya kwarura no kurya kugeza hatanzwe uburenganzira bwo kwipfukura.

Dr Beth Mukarwego, Umwarimu muri Kaminuza y'u Rwanda mu ishami ry'Uburezi akaba n'umuyobozi ukuriye komite y'abagore muri RUB, niwe wahaye ikaze abitabiriye 'Dinner in the Dark,' asobanura agaciro k'Inkoni Yera ndetse yongeraho ko yakwibagirwa ibintu byose akagenda, ariko ko atashobora gutandukana n'Inkoni Yera ye kuko azi neza ko imufasha kugenda nta nkomyi.

Yashimiye byimazeyo MTN Rwanda yateguye iki gikorwa cyafashije abantu gusogongera gato ku buzima bugoye abafite ubumuga bwo kutabona bahura nabwo.

Dr Beth yagize ati: 'Impamvu nyamukuru yo kubapfuka ku maso ni ukugira ko tubasangize ku nararibonye y'ubuzima butoroshye abafite ubuzima bwo kutabona babayemo. Twizeye ko niba utari usanzwe udufasha ugiye gutangira kubikora kandi ubufasha twifuza ni inkoni yera.'

Nyuma, hahawe umwanya umwe mu bafite ubumuga bwo kutabona maze yereka abari aho uko yifashisha igikoresho cy'ikoranabuhanga akandika ndetse akabasha no gusoma inyandiko y'undi. Yasobanuye ko icyo gikoresho cyakorewe byumwihariko abanyeshuri bafite ubumuga bwo kutabona kugira ngo babashe guhuza n'abarimu babigisha mu mashuri.

Alain Numa, umukozi wa MTN Rwanda niwe wayoboye umwanya ukomeye kwitanga inkoni zera ku wabyifuzaga mu bushobozi bwe.

 Iki cyiciro cyamaze igihe gito, cyakusanije inkoni zera zirenga 500 nubwo hari n'abandi biyemeje gukomeza kuzitanga, zikaba zizafasha abantu bazikeneye kandi badafite ubushobozi biganjemo abo mu cyaro.

Numa yagize ati: 'Twongeye kwifatanya n'Ishyirahamwe ry'abafite ubumuga bwo kutabona mu rwego rwo gukora ubuvugizi kugira ngo hamenyekane imbaraga zabo, abantu babahe agaciro, cyane cyane bihuzwe n'umunsi wo kwizihiza inkoni yera.'

Yongeyeho ko bategura igikorwa nk'iki bagamije cyane cyane kwisanisha n'abafite ubumuga bwo kutabona, ashimangira kandi ko icyo bifuzaga cyagezweho kuko abantu batashye basobanukiwe agaciro n'imbaraga by'Inkoni Yera.

Mapula Bodibe, umuyobozi wa MTN Rwanda yashimiye abitabiriye bose barangajwe imbere n'umushyitsi mukuru waje uhagarariye Minisitiri w'Ubutegetsi bw'igihugu, Jean Claude Musabyimana.

Yavuze ko umwaka ushize wabagoye cyane mu gutegura iki gikorwa kuko batari bazi icyo kwitega bitandukanye n'uyu mwaka, yongeraho ko bongeye gucishwa bugufi nacyo.Yashimangiye kandi ko nka MTN Rwanda bashishikajwe no guharanira iterambere ritagira uwo risiga inyuma.

MTN Rwanda ntiyateguye iki gikorwa gusa, ahubwo yanatanze inkoni zera ndetse inatanga ibikoresho by'ikoranabuhanga bifasha abafite ubumuga bwo kutabona kwandika no gusoma (Orbit device) bisaga 24 bifite agaciro k'Amafaranga y’u Rwanda  Miliyoni Makumyabiri n'Enye.

Godfrey wari umushyitsi mukuru muri iki gikorwa akaba ari nawe waje uhagarariye Minisitiri w'Ubutegetsi bw'igihugu, yashimiye MTN yateguye igikorwa cyihariye nk'iki, avuga ko nubwo byari bigoye ariko byatanze isomo ryo kudaheza abafite ubumuga bwo kutabona muri sosiyete nyarwanda.

Yagize ati: 'Mureke u Rwanda, aho buri wese ashobora guharanira kugera ku nzozi ze. Hamwe na MTN Rwanda, reka dukomeze gufasha abafite imbogamizi zihariye.'

Uyu mugoroba wo gusangira 'Dinner in the Dark,' wasojwe ahagana saa tanu z'ijoro, aho abantu bose batashye basobanukiwe neza akamaro k'inkoni yera ifatiye runini abafite  ubumuga bwo kutabona.

Ni umugoroba witabiriwe n'abayobozi batandukanye ba RUB, MTN Rwanda, abayobozi batandukanye mu nzego z'igihugu, abafatanyabikorwa ba MTN n'abandi.

Abitabiriye basusurukijwe n’abagize itsinda rya ‘The Heroes’ ry’abafite ubumuga bwo kutabona.

Abatumirwa bose bagize umwanya uhagije wo gusangira icyo kunywa no kuganira mbere yo gupfukwa ku maso

Itsinda ry’abafite ubumuga bwo kutabona niryo ryayoboye ababona mu mwanya wo gufata amafunguro

Alain Numa usanzwe uyobora ibikorwa byinshi bya MTN 

Abayobozi bakuru nibo babaye aba mbere mu kubahirizwa gahunda yateguwe

Kugera ku mafunguro byari ikizamini gikomeye

Abantu bose bariye bapfutse

Godfrey, umushyitsi mukuru waturutse muri Minisiteri y’ubutegetsi bw’igihugu

Mugisha Jacques, umuyobozi wungirije wa komite ya RUB akaba n’uwayoboye gahunda ya ”MTN’s Dinner in the Dark”    

MTN yashyikirije ubuyobozi wa RUB inkoni zera n’ibikoresho by’ikoranabuhanga byifashishwa n’abafite ubumuga bwo kutabona

Kanda hano urebe andi mafoto menshi yaranze igikorwa cya “MTN’S Dinner in the Dark”

AMAFOTO: Freddy RWIGEMA – Inyarwanda

Source : https://inyarwanda.com/inkuru/136582/hakusanyijwe-akayabo-mtn-yifatanije-nabafite-ubumuga-bwo-kutabona-kwizihiza-umunsi-mpuzama-136582.html

Muri iki gihe inzoga ziri kunyobwa cyane ndetse hahandi ziri gutuma ubusinzi bwiyongera cyane cyane mu rubyiruko, icyo ninacyo gituma abantu bibaza niba urubyiruko rw'ubu ruzavamo abakuze bejo hazaza bikabacanga, sibyo gusa kuko haribazwa aho amafaranga basindira ava Kandi birwa bavuga ko ubucyene bubishe ngo babuze akazi.

 

 

Ibyo byose byakomeje gusakara no kugirwaho impaka biturutse ku mashusho yanyujije ku mbugankoranyambaga aho abakobwa batatu, abakobwa beza bo mu gihugu cya Kenya bagaragaye mu mashusho basinze bari kugwirirana arinako barwana hagati yabo.

 

 

 

Muri ayo mashusho abo bakobwa bari bari gufatana mu majosi, arinako batukana besurana, icyakora mu mashusho humvikanamo ijwi ry'umugabo uba uri kubabwira kurekurana bakarekera kurwana bagataha, nubwo bari banze kumwumvira cyane ko bari basinze.

 

 

 

Uyu mugabo yakomeje kubabwira kurekera kurwana bakomeza kurwana banze kumwumvira nibwo yavuze ko agiye guhamagara abashinzwe umutekano maze Bose batangira kugira ubwoba, Niki kumubwira ko Bose bavukana nubwo bari kurwana Hari icyo bari gupfa.

 

 

 

Ubwo umugabo yabicazaga ngo bamubwire neza icyabateye kurwana, nibwo umwe muri bo yasakuje avuga ko bitamureba, uyu mugabo yaje kurambirwa maze ahamagara Umusore wari hafi Aho amusaba kubasohora hanze.

 

 

Abantu benshi bakomeje kwibaza aho urubyiruko ruvuga ko rukennye rukura amafaranga yo gusinda.

 

 

Umwanditsi: Byukuri Dominique

 

 

 

Source: News Hub Creator

The post Inkumi ebyiri z'uburanga zagaragaye mu muhanda ziri kurwana appeared first on The Custom Reports.

Source : https://thecustomreports.com/inkumi-ebyiri-zuburanga-zagaragaye-mu-muhanda-ziri-kurwana/

Hari ubwo umugore abyaye umwana ufite ikibazo runaka ariko ntamenye impamvu yabiteye ndetse ko hashobora kuba harimo n'uruhare rwe mu kubyara umwana utuzuye cyangwa ufite ubumuga runaka.

 

Muri iyi nyandiko twifashishije inyandiko zizewe mukubategurira ndetse no mu kubaha amakuru yizewe ku mpamvu umugore ashobora gutwita cyangwa kubyara umwana utuzuye cyangwa ufite ubumuga runaka.

 

 

DORE IMPAMVU ZISHOBORA GUTUMA UMUGORE ABYARA UMWANA UTUZUYE CYANGWA UFITE UBUMUGA RUNAKA;

 

 

1.Aho uvuka

 

Wowe mugore ushobora kubyara umwana utuzuye cyangwa ufite ubumuga runaka bitewe nuko mu muryango wanyu harimo abantu bafite icyo kibazo bityo bikaba nawe byaragukurikiranye bikarangira wisanze wabyaye umwana utuzuye cyangwa ufite ubumuga runaka.

 

 

2.Kubura imisemburo ku mugore

 

Hari ubwo umugore aba adafite imisemburo ihagije runaka yo mu mubiri we bityo bikagira ingaruka ku mwana atwite akavuka afite ikibazo runaka ubumuga runaka cyangwa akavuka atuzuye.

 

 

3.Prenatal Infection

 

Izo infection zishobora gufata umugore mu gihe Ari kubyara zikaba zakongera imyaku ku mwana ko ashobora gukura atuzuye cyangwa afite ikibazo runaka.

 

 

4.Imiti cyangwa ibiyobyabwenge

 

Imiti cyangwa ibiyobyabwenge umugore yakoresheje mu gihe yari atwite bishobora gutuma abyara umwana utuzuye cyangwa ufite ubumuga runaka. Ni ukuvuga Hari imiti umugore utwite atemerewe gukoresha ndetse ibiyobyabwenge nabyo ni ibintu umugore utwite akwiye kugendera kure.

 

 

5.Indwara

 

Hari indwara zizwiho kuba umugore azifite zishobora gutuma umugore abyara umwana ufite ikibazo runaka. Izo ndwara harimo Diabetes, Umuvuduko w'amaraso nizindi.

 

 

6.Kubyara amezi atuzuye

 

Ikindi birazwi ko umwana agomba kuvukira amezi 9, mugihe bitagenze gutyo nabwo umwana ashobora kuvuka afite ikibazo runaka ubumuga runaka cyangwa akavuka atuzuye.

 

 

7.Ibibazo Mu kubyara

 

Mu gihe umugore ahuye nibibazo runaka mu kubyara kwe nko kubura umwuka, bishobora gutuma abyara umwana ufite ikibazo runaka.

 

 

8.Kutiyitaho / Kutitabwaho

 

Umugore utwite ategetswe gukora imirimo itavunanye ndetse akiyitaho no mu mirire, rero iyo umugore atiyitayeho ashobora kubyara umwana utuzuye cyangwa ufite ubumuga runaka.

 

 

9.Impamvu zitazwi

 

Hari ubwo umugore ashobora kubyara umwana utuzuye cyangwa ufite ubumuga runaka bitewe n'impamvu itazwi.

 

 

Umwanditsi: BYUKURI DOMONIQUE

 

Source: News Hub Creator

 

The post Menya impamvu zishobora gutuma umugore abyara umwana utuzuye cyangwa ufite ubumuga appeared first on The Custom Reports.

Source : https://thecustomreports.com/menya-impamvu-zishobora-gutuma-umugore-abyara-umwana-utuzuye-cyangwa-ufite-ubumuga/

Umuhanzi Rema ukuri muto mu myaka gusa akaba asumba benshi muri muzika , akomeje kwibazwaho n'abatari bake, nyuma y'aho ibitaramo yari afite muri Ethiopia gifunzwe kubera umudari yambara ugaragaza ishusho yo gutwika urusengero.

Ka twifashishe inyandiko y'urubuga Nairaland Forum.Umwanditsi yaranditse ati:' Mu by'ukuri ntabwo ndi umufana w'umuziki wa Nigeria ariko nkunda uburyo Rema , umwana ukuri muto arimo kurwana no kuzamura izina rye rikagera hejuru

 

N'ubwo hari byinshi bishobora kuba byaramuciye intege ariko yarakize cyane kuburyo mu myaka ye 20 arimo kuzunguza Isi y'imyidagaduro'

ESE KUKI IBI BYO KWAMBARA UMUDARI 'NECKLACE' UGARAGAZA GUTWIKA URUSENGERO BYAHAWE UMWANYA CYANE ?

Uyu muhanzi arasabwa kwitonda no kwirinda by'umwihariko mu buryo agaragara mu ruhame nuko abantu bashobora kumubona na cyane ko mu buganiro bye biheruka , yatangaje ko ari Umukirisitu mu rusengero rumwe muri Nigeria.

 

Benshi bakomeje kwibaza impamvu uyu muhanzi ukuri muto yafata umwanzuro wo kwambara umudari ugaragaza Urusengero rurimo gushya. Ese niba atari ikimenyetso runaka koko, ni ubuhe butumwa yashakaga gutanga , yashakaga kubuhande ?

Iki kibazo n'ibindi bigishamikiyeho nibyo byatumye igitaramo yari afite muri Ethiopia mu kwezi gushize gihagarikwa ndetse n'ubuyobozi bw'Igihugu cya Ethiopia bubijyamo nk'uko byagaragajwe n'urwandiko rwagenewe itangazamkuru.

 

Byinshi mu bitangazamakuru byo muri Ethiopia byatangaje ko hari imyuka mibi yihishe inyuma y'umudari w'uyu mwana Rema , ugaragaza gutwika urusengero bakanemeza ko ibi bizakomereza mu bandi bahanzi bo muri Nigeria.

Iki gitangazamakuru kivuga ko Rema akiri muto bityo akwiriye kujya kure y'ibikorwa bibi [ By'umwijima ], agakora umuziki mwiza ngo na cyane ko afite imyaka myinshi imbere ye.

The post Ese ari muri illuminati ? Umuhanzi Rema akomeje kwibazwaho nyuma yo kugaragara yambaye umudari ugaragaza gutwika urusengero appeared first on The Custom Reports.

Source : https://thecustomreports.com/ese-ari-muri-illuminati-umuhanzi-rema-akomeje-kwibazwaho-nyuma-yo-kugaragara-yambaye-umudari-ugaragaza-gutwika-urusengero/

Mu gitondo cyo kuri uyu wa Gatatu tariki 15 Ugushyingo 2023, umugabo witwa Ntegerejimana Christophe w'imyaka 37 yarashe mugenzi we witwa Irakoze Kevin w'imyaka 32, bakoranaga mu kigo cya Karisoke Research center gikorera muri pariki y'ibirunga ku buzima n'imibereho y'Ingagi.

Umuyobozi wa Pariki y'ibirunga Uwingeri Prosper yemeje aya makuru ndetse avuga ko uyu mugabo yamaze gufatwa.

Ntegerejimana Christophe yafatiwe mu Murenge wa Mudende, aho yafashwe muri iki gitondo taliki ya 16 Ugushyingo, akaba avuka mu Murenge wa Gataraga mu Karere ka Musanze.

 

Source : https://yegob.rw/umugabo-wacunganga-umutekano-muri-pariki-yibirunga-yishe-arashe-mugenzi-we-bakoranaga/

Nyamirambo habereye impanuka y'imodoka itwara imbaho yahirimye ku mukingo — Amafoto

Ahagana mu masaha ya Saa sita n'igice za manywa kuri uyu wa 16 Ugushyingo, Kigali, i Nyamirambo habereye impanuka y'imodoka itwara imbaho.

Iyi mpanuka yabereye ahitwa mu miduha hafi ya sitasiyo ya esanse. Ubwo iyi modoka ishinzwe gupakira imbaho yageraga aho zikorerwa yahirimye ku mukingo kuko aho yacaga batari hameze neza.

Muri iyi mpanuka ntamuntu wahasize ubuzima. Amafoto.

Source : https://yegob.rw/nyamirambo-habereye-impanuka-yimodoka-itwara-imbaho-yahirimye-ku-mukingo-amafoto/