Author: webrwanda

Nyuma yo gukubita umutoza, Gisubizo Merci ukinira APR VC yasabye imbabazi kuri iyi myitwarire idahwitse yamuranze.

Ku wa Gatandatu tariki ya 18 Ugushyingo 2023 ubwo APR VC yakinaga na Police VC umukino wa 1/2 wa Zone V ni bwo Gisubizo Merci yakubise umutoza wungirije Rwanyonga Mathieu.

Bivugwa ko umutoza yahagurukije umukinnyi kujya kwishyushya ngo asimbure Manzi Sadru wari wagize ikibazo cy’imvune maze Merci agira ngo ni we bagiye gusimbuza.

Ubwo bari batse akaruhuko ‘Time Out’, Gisubizo Merci yagiye yegera umutoza Rwanyonga Mathieu amubaza impamvu ashaka ko bamusimbuza undi amubwira ko atari we, ni ko kumukubita umutwe undi ava mu mazuru.

Merci yahise ahabwa ikarita y’umuhondo n’umutuku ava mu kibuga, ndetse byari binavuze ko atongera gukina.

Gisubizo Merci akaba yamaze kwandikira ibaruwa asaba imbabazi kuri iyi myitwarire yamuranze.

Ati 'Bwana mutoza mbandikiye iyi baruwa ngira ngo mbasabe imbabazi ku myitwarire itari myiza nagaragaje mu kibuga ubwo twakinaga umukino waduhuje n’ikipe ya Police VC nkaba mbijeje ko bitazongera ukundi.'

'Nsabye imbabazi Abanyarwanda bose muri rusange, abatoza ndetse n’abakinnyi bagenzi banjye.'

Amakuru avuga ko uyu mukinnyi utarakinnye umukino wa ‘Zone V’ wo guhatanira umwanya wa 3 APR VC yatsinzemo Kepler amaseti 3-2 (25-21, 25-18, 28-30, 23-25, 15-12), Gisubizo Merci yahagaritswe igihe kirekire.

Merci (3) yasabye imbabazi

Police VC yo mu Rwanda yatsinze Sports-s yo muri Uganda yegukana irushanwa rya Zone V ryari rimaze iminsi ribera mu Rwanda ni mu gihe mu bagore ryegukanywe na Pepiline yo muri Kenya itsinze RRA yo mu Rwanda.

Ku munsi w’ejo hashize ku Cyumweru tariki ya 19 Ugushyingo 2023 ni bwo hasojwe irushanwa ry’Akarere ka 5 muri Volleyball “Zone V VOLLEYBALL CLUB CHAMPIONSHIPS 2023”.

Imikino ya nyuma ikaba yaritabiriwe na Minisitiri wa Siporo, Munyangaju Aurore Mimosa ndetse abayitabiriye bakaba barasusurukijwe n’umuhanzi Platini P.

Habanje umukino wa nyuma mu bagore wahuje RRA WVC yo mu Rwanda ndetse na Pepiline WVC yo muri Kenya yanaje kwegukana iri rushanwa itsinze amaseti 3-0.

Iseti ya mbere yayitsinze ku manota 25-20, iya kabiri iyitsinda amanota 25-23 ni mu gihe iya gatatu yayitsinze ku manota 25-19 (25-20, 25-23, 25-19).

Hakurikiyeho umukino wa nyuma mu bagabo wahuje Police VC yo mu Rwanda yari yasezereye APR VC yo mu Rwanda na Sports-s yo muri Uganda yari yasezereye Kepler VC yo mu Rwanda muri 1/2.

Ikipe ya Police VC yaje kwegukana igikombe itsinze Sports-s amaseti atatu kuri imwe.

Iseti ya mbere y’umukino yatwawe na Sport-S ku manota 25-20 ya Police. Iya kabiri ikipe ya Police VC yagarukanye imbaraga zongerwaga n’abafana b’abanyarwanda benshi bari muri Arena, iyitsinda ku manota 25 kuri 14. Iseti ya gatatu, nayo yatwawe na Police ku manota 25 kuri 21.

Umwanya wa gatatu mu bagore wegukanywe n’ikipe ya APR WVC itsinze ikipe ya Police WVC amaseti 3-1 (26-24, 25-21, 25-21, 25-21).

Mu bagabo naho umwanya wa gatatu wegukanywe n’ikipe ya Police VC itsinze ikipe ya Kepler VC amaseti 3-2 (25-21, 25-18, 28-30, 23-25, 15-12).

Wari umukino utoroshye hagati ya Police VC na Sports-s

Byari ibyishimo bikomeye kuri Police VC

Abafana bo bari benshi

Minisitiri wa Siporo, Munyangaju Aurore Mimosa na we yafannye karahava

Umuhanzi Platini P yasusurukije abari bahari

Bruce Melodie ukunze kwitazira akazina ka ‘Munyakazi’ bisobanuye ko ari Umukozi ukora cyane utajya uzana ibintu by’ubunebwe mu kazi ke, abinyujije ku rubuga rwe rwa Threads, yagize ati: “Mwite ku magambo yanjye, umunsi umwe nzazana ibihembo bya Grammy mu rw’imisozi igihumbi”.

Ugerageje kunyuza amaso mu bitekerezo byatanzwe kuri izi ntego afite, abantu benshi ubona ko babyishimiye cyane ndetse ukabona ko bari no kumwifuriza amahirwe masa. Si ibyo gusa kuko abandi bafana be bishimiye intera akomeje gutera mu kwagura muzika Nyarwanda no guharanira guha abakunzi be ibyishimo bisendereye.

Tariki 21 Ukwakira 2023, ni bwo mu Rwanda hatangiwe ibihembo bya Trace Awards ku nshuro yabyo ya mbere ku mugabane wa Afurika. Ni ibihembo byitabiriwe n’ibyamamare mpuzamahanga mu ngeri zitandukanye, birimo abaje guhatana mu bihembo, abaje gushyigikira abahanzi babo bakunda n’abandi bari baje mu zindi gahunda zitandukanye ariko zerekeranye n’ibi bihembo.

Bruce Melodie ni umwe mu bahanzi batazigera bibagirwa amateka barikoreyemo, ubwo yatwaraga igihembo cy’umuhanzi Nyarwanda mwiza muri ibi bihembo.

Uyu muhanzi kandi amaze kwibikaho ibikombe byinshi bitangirwa hano mu Rwanda ndetse akunze guhatana mu bihembo byinshi mpuzamahanga n’ubwo ataratangira kugira amahirwe yo kubyegukana.

Ibi bihembo bikomeye mu isi y’umuziki Melodie amaramaje gutwara, biranugwanugwa ko bishobora gutangirwa i Kigali mu mwaka wa 2025 cyangwa se 2026 bitewe n’umwaka ubuyobozi bwa  Recording Academy itegura ibi bihembo yaba yemerenyijwe na Leta y’u Rwanda.

‘Grammy Awards’, ni ibihembo byatangiye ku itariki ya 4 Gicurasi 1959, bikaba bitegurwa na Recording Academy iherereye mu gihugu cya Leta Zunze Ubumwe za Amerika.  Ni ibihembo byatangiye bitangwa mu buryo bwo gushimira no guha agaciro  abahanzi bakoze neza, bikaba bitangwa rimwe mu mwaka.

Bifatwa nka kimwe mu bihembo biza imbere bikomeye cyane mu isi yose ya Muzika bitewe n’agaciro gakomeye bifite. Ibi bihembo kandi biza muri bine bya mbere bigize imyidagaduro yo ku isi hakubiyemo ibihembo byo muri Sinema, Ikinamico n’ibindi bitandukanye.

Ubwo harimo ibizwi nka Emmy Awards, Tony Awards na Academy cyangwa se ‘Oscars’ Awards n Grammy Awards.

Iyo umuhanzi agize amahirwe yo gutanga indirimbo ye ikakirwa (ikemererwa guhatana muri ibi bihembo), hakurikiraho urugamba rwo gutorwa. Bitewe n’icyiciro umuhanzi ahatanyemo (ashobora kuba Album nziza, indirimbo nziza, Amashusho meza, n’ibindi), icyo abafana batoye  cyane ni cyo kiba cyegukanye igihembo.

Ni ukuvuga ngo bakurikiza amajwi y’abatoye kugira ngo umuhanzi yegukane igihembo, igihe igihangano nta muntu wagitoye, ntabwo ushobora kwegukana ibi bihembo. Ikintu cya mbere kigora abahanzi, ni ukubona igihangano cyabo gifashwe ngo gihatane. 

Abahanzi benshi ba Afurika mu binyejana byatambutse  bagerageje uko bashoboye batanga ibihangano byabo kugira ngo byakirwe bihatane muri ibi bihembo, ariko byabaye ingorabahazi. Gusa iyi minsi ibintu bisa nk’ibyahindutse kuko ubona ko noneho bari kubihatanamo kuva aho muzika ya Afurika noneho itangiye kwigaragariza amahanga.

Kugira ngo wumve uburyo ibi bihembo atari agafu k’imvugwa rimwe, bitavugishwa amatama gusa ndetse n’uburyo birenze, n’ubwo umuhanzi atatwara igihembo na kimwe, ariko byonyine kuba yabashije kubihatanamo, biba bingana no kubitwara kuko riba ari ishema rikomeye ndetse ako kantu akagenderaho ubuzima bwe bwose bitewe n’agaciro ibi bihembo bifite.

Ibi byose wabibaza umuhanzi Eddy Kenzo wigeze kugira amahirwe yo kubikandagizamo ikirenge hanyuma ukareba n’ibyishimo uwitwa Davido afite muri iyi minsi nyuma y’uko atanze ibihangano bye bikemerwa ndetse akabasha no kugira amahirwe yo kubihatanamo. Ibi nibyo bihembo Bruce Melodie ashaka kwegukana akazana mu Rwanda mu minsi iri imbere.

Bruce Melodie arashaka kuzana igihembo cya Grammy Award nyuma ya Trace Award

Grammy Awards ntabwo ari agafu k’imvugwa rimwe kuko byonyine no kuyihatanamo bingana no kuyitwara

Usibye no muri shampiyona, mu ikipe y’igihugu usanga abakinnyi bahurije hamwe ibitego bikomeje kubura ndetse hagendewe ku bakinnyi ikipe y’igihugu Amavubi ifite nta cyizere gihari ko bizakemuka vuba. Kuva mu 2011 ikipe y’igihugu Amavubi imaze gukina imikino 53 ubariye hamwe imikino yo gushaka itike y’igikombe cy’Afurika ndetse n’imikino yo gushaka itike y’igikombe cy’Isi.

Muri iyi mikino, u Rwanda rwatsinzemo imikino 10 rutsindwa 27, runganya imikino 16. Muri iyi imikino 53, u Rwanda rwatsinzemo ibitego 47, bivuzeko nibura ari igitego 1.12 kuri buri mukino. Muri ibi bitego, harimo ibitego 10 yatsinze Seychelles mu mikino ibiri.

Kuva mu 2011 ariwo mwaka twahisemo gukoresha, icyo gihe u Rwanda rwari rufite ba rutahizamu barimo Olivier Karekezi, Bokota Kamana Labama, Uzamukanda Baby ndetse n’abandi bakinnyi bari bakomeye nka Iranzi Jean, Sina Jerome, Daddy Birori n’abandi.

Olivier Karekezi niwe umaze gutsindira Amavubi ibitego byinshi, gusa abanyarwanda bakumbuye ubuhanga n’ubuyobizi bwe 

Meddie Kagere icyo gihe nawe yari umukinnyi mwiza ndetse bigaragara ko azafasha byinshi u Rwanda kandi niko byagenze. Uko imyaka yagiye yigira imbere, Olivier Karekezi yaje gusezera mu Mavubi ndetse ahagarika umupira w’amaguru, Bokota Kamana Labama nawe biba uko.

Abakinnyi barimo Meddie Kagere, Tuyisenge Jacques bari binjiye mu ikipe y’igihugu 2011 aba bakinnyi baje kuba ngenderwaho muri ba rutahizamu ndetse icyo gihe Birori Daddy nawe yari agihari.

Mu 2013, Sugira Ernest nawe yinjiye mu ikipe y’igihugu Amavubi asanganira Kagere, Tuyisenge Jacques na Birori warimo ubyina  umutaho.   

Aba bakinnyi, u Rwanda rwaje kubagenderago imyaka isaga 10, kuko nibura navuga ko umuvuduko wabo watangiye kugabanyuka mu 2019. Icyo gihe u Rwanda rwari mu bihe bigoye kubijyanye na barutahizamu kuko washakaga umukinnyi uzasimbira aba bagabo umukamubura.

Bamwe mu bakinnyi bari gukomeza aho ba Kagere Meddie na Tuyisenge Jacques bari bagejeje, harimo abakinnyi bakinnye igikombe cy’Isi cy’abatarengeje imyaka 17 2011, gusa abenshi muri abo byageze 2019 baratangiye kureka umupira. Abakinnyi bari bagikina twavuga nka Mico Justin, Ruhinda Faruku ariko nabo wabonaga batiteguye kuzaheka Amavubi mu bihe biri imbere.

Amavubi U17 ya 2011, yagendanye abanyarwanda, ibaye yishyura yakagize icyo itanga 

Danny Usengimana yari umukinnyi mwiza mu makipe ye ariko yagera mu ikipe y’igihugu bikanga, Biramahire Abedy watowe nk’umukinnyi mwiza utanga icyizere mu  2017 ntabwo umuvuduko yariho yawukomeje. Muri icyo gihe  nibwo abakinnyi nka Bizimana Yannick, Nshuti Innocent Twizerimana Onésime barimo binjira, ukongeraho Mugenzi Bienvenue mukuru wabo bose.

Kuva icyo gihe muri 2019 kugera 2023, aba bakinnyi bananiwe gusigariraho bakuru babo, ndetse biri gushyira habi umusaruro w’ikipe y’igihugu Amavubi.

Imyaka 3 irashije u Rwanda rudatsinda nibura ibitego 2 mu mukino umwe haba mu gushaka itike y’igikombe cy’Afurika ndetse n’itike y’igikombe cy’Isi. U Rwanda ruheruka gutsinda nibura ibitego birenze 2 mu mukino umwe, yaba iyo gushaka itike y’igikombe cy’Afurika cyangwa igikombe cy’Isi tariki 10 Nzeri 2019 ubwo batsindaga Seychelles ibitego 7-0.Kuva icyo gihe u Rwanda ntabwo rurarenza igitego 1 mu mukino umwe.

Nyuma ya 2019  byagenze gute?

2020

U Rwanda rwakinnye 2 ntirwinjiza igitego

Cape Varede 0-0 Rwanda

Rwanda 0-0: Cape Varede

2021

U Rwanda rwakinnye imikino 8 rutsindamo umukino wa Mozambique batsinze igitego kimwe ku busa, ari naho mukino baheruka gutsinda,  rutsindwa imikino 5, runganya 2 wakora igiteranyo muri iyi mikino ugasanga rwatsinzemo ibitego 3 gusa.

2022

U Rwanda rwakinnye imikino 2 r rutsindamo igitego kimwe ubwo banganyaga na Mozambique.

2023

U Rwanda rumaze gukina imikino 5 aho rwatsinzemo ibitego 2, harimo igitego cyo kuri Senegal ndetse na Benin.

Ese barutahizamu bakina mu Rwanda bitwara gute nyuma ya COVID-19?

Kuva muri COVID-19 muri shampiyona y’amatsinda, abakinnyi b’abanyarwanda ntabwo bakunze kuyobora abafite ibitego byinshi kuko babaga bibereye mu myanya y’inyuma.

Sugira Ernest niwe mukinnyi umaze gutsindara Amavubi ibitego byinshi kuva mu 2015, gusa buri munyarwanda avuga ko hari byinshi yari kuba atanga iyo aza kuba akina 

Kuva mu mwaka w’imikino 2020-21, ubwo hakinwaga shampiyona y’amatsinda kugera muri uyu mwaka w’imikino aho shampiyona igeze ku munsi wa 10, Twizerimana Onésime niwe umaze gutsinda ibitego byinshi 22, Yannick Bizimana akaza ku mwanya wa Kabiri n’ibitego 19, Bienvenue Mugenzi ku mwanya wa Gatatu  n’ibitego 19, Mugunga Yves ku mwanya wa Kane n’ibitego 18.

Abakinnyi bakina imbere, bari bahamagawe mu ikipe y’igihugu bahagaze bate muri shampiyona?

Abakinnyi 7 nibo bari bahamagawe mu bakina imbere, bakina mu Rwanda, aho bose bafite ibitego 15 muri shampiyona. Mugenzi Bienvenue afite ibitego 2, Mugisha Didier afite ibitego 4, (yarasezerewe), Nshuti Innocent afite igitego 1, Mugunga Yves afite ibitego 4 (yarasezerewe), Mugisha Gilbert nta gitego afite, Gitego Arthur afite ibitego 2, na Kwitonda Alain afite ibitego 2.

Kuri uyu wa Kabiri u Rwanda ruzakina na Afurika y’Epfo mu mukino wa nyuma usoza umwaka, umukino uzaba ugoye kuko ibi bihugu ni ubwa mbere bigiye guhura, ndetse Afurika y’Epfo mu mibare ikaba iri hejuru mu mibare. 

Kagere na Tuyisange nti tuzi niba barasezeye mu ikipe y’igihugu Amavubi ariko iminsi yabo iheruka batangaga ibimenyetso ko bakeneye umusimbura 

Sugira Erinest umukinnyi rukumbi uheruka guhabwa amafaranga n’abanyarwanda kubere ibyishimo byari byabasaze 

Byiringiro Lague umukinnyi rukumbi uheruka guhesha u Rwanda amanota 3 imbumbe, ubu byabaye nk’amateka 

Bwana Alain Mukuralinda aganira na InyaRwanda.com agaruka kuri iyi ngingo, yavuze ko abahanzi  abanyarwanda bashatse bakora itorero hanyuma bagatumira umukuru w’igihugu akaza bakagira ibyo baganira.

Agira ati:” Ese ubundi bakoze itorero ryabo (…) Bakavuga bati uyu munsi tuzahura nk’abahanzi; tukavuga tuti ‘abaririmba Gospel, abaririmba Secular, abaririmba iza gakondo mwaretse tukazishyira hamwe tukaba na benshi, tukavuga  tuti uyu munsi tuzahurire aha ngaha hanyuma iyo gahunda tukayimenyesha Umukuru w’Igihugu akaza kutureba’”.

Akomeza avuga ko baramutse batumiye Umukuru w’Igihugu ngo aze kubareba atakwanga, ahubwo ikibazo ni uko batajya babikora. Ikindi kandi Umukuru w’Igihugu aba afite inshingano nyinshi, ntabwo byashoboka ko yajya agenda ahura n’umuntu umwe umwe.

Ati”Byagorana ko yajya abona umwanya wo guhura n’umuhanzi umwe umwe, ariko bishyize hamwe akababonera hamwe ni ibintu bishoboka, ntabwo bamusaba ngo baze bahure ngo hanyuma abyange”.

Alain Mukuralinda ahamya ko kuvuga ko abahanzi bahura n’umukuru w’igihugu ari uko habanje kuza abahanzi mpuzamahanga, ari ugupfobya abo bahanzi nyarwanda.

Abahanzi nyarwanda  bahura na Perezida Kagame mu bihe bitandukanye wenda habaye ibirori cyangwa inbindi bikorwa  bihuza abantu benshi  nk’Inama Mpuzamahanga zibera mu Rwanda.

Guhura na Perezida Kagame no kuganira  nawe  ni  inzozi ku bahanzi   haba abo mu Rwanda ndetse no hanze yarwo.

Alain Mukuralinda ahamya ko abahanzi nyarwanda baramutse bateguye umunsi bagatumira Perezida Kagame atakwanga kuza

“>

Ikipe ya Rayon Sports yagaragarije abanyamuryango ba yo ko uyu mwaka w’imikino, ingengo y’imari iyi kipe izakoresha ari agera kuri Miliyoni magana acyenda (900.000.000 FRW) avuye kuri Miliyoni Magana arindwi yari yakoreshejwe umwaka ushize w’imikino.

Ibi ni ibyavugiwe mu nteko rusange isanzwe yabaye ku wa Gatandatu tariki 18 Ugushyingo 2023 ibera kuri Grazia Hotel iherereye ku Gishushu.

Yari yitabiriwe n’abahagarariye amatsinda y’abafana (Fan clubs) 43 yemewe ya Rayon Sports. Agera ku 8 yo yamaze gutakaza ubunyamuryango. Abandi bayitabiriye ni abagize komite nyobizi ya Rayon Sports ndetse n’abakuriye komite ngenzuzi na komite nkemurampaka.

Nkubana Adrien, DAF (Director of Administration and Finance) wa Rayon Sports yagaragarije abanyamuryango uko umutungo wakoreshejwe umwaka ushize.

Muri rusange iyi kipe mu mwaka w’imikino wa 2022-23, Rayon Sports yakoreshejwe Miliyoni magana arindwi na makumyabiri n’esheshatu (726.929.591 FRW)

Amafaranga yinjiye avuye kuri Stades ni miliyoni 173 (173.535.500 FRW), angana na 24% y’ingengo y’imari yakoreshejwe umwaka ushize.

Amafaranga yatanzwe n’abafana ni Miliyoni 129 (129.607.900 FRW) angana na 18%. Aya harimo Miliyoni 51 (51.170.000 FRW) yatanzwe na Fan clubs(angana na 39.5% y’ayatanzwe n’abafana muri rusange). Inkunga zanyuze ku *008000# zingana na miliyoni 36 (36.787.900 FRW) angana na 28.4%. Abantu baguze amatike ya season , akanama ngishwanama n’abantu ku giti cyabo bose batanze agera kuri Miliyoni 41 (41.650.000 FRW). Ahwanye n’ijanisha rya 32.1% ukurikije ayatanzwe n’abafana muri rusange.

Uruhare rw’abafatanyabikorwa rwari miliyoni zisaga 300 (337.000.00) angana na 46 %. Inguzanyo ikipe yafashe ni miliyoni 59 (59.070.752 FRW)angana na 8%. Ibihembo ikipe yegukanye mu marushanwa atandukanye ni miliyoni 27 (27.000.000 FRW) bingana na 4%. Yose hamwe amafaranga yakoreshejwe yageze kuri Miliyoni magana arindwi na makumyabiri n’esheshatu (726.929.591 FRW)

Nyuma yo kwerekana iyi mibare y’umwaka ushize, Nkubana Adrien yaboneyeho kubwira abanyamuryango ko uyu mwaka w’imikino Rayon Sports izakoresha Miliyoni magana acyenda (900.000.000 FRW).

Ku bigendanye n’uko harimo ikinyuranyo cy’amafaranga ugereranyije n’umwaka ushize, Adrien ntabwo yagaragaje aho izo miliyoni hafi 200 zizava gusa yavuze ko bagiye gukomeza gushaka abafatanyabikorwa batandukanye ariko anavuga ko bizeye ko Fan clubs zizagenda zongera umusanzu, hakaziyongeraho amafaranga ava ku bibuga.

Rayon Sports irateganya gukoresha miliyoni 900 muri uyu mwaka w’imikino