Author: webrwanda

Iyo umuntu anyweye inzoga zijya he ?

Iyo umuntu anyweye inzoga ihita ijya mu maraso iciye mu gifu n'amara. Hari impamvu zimwe zatuma inzoga yihutira gukwirakwira mu maraso:

— Inzoga zishyushye cyangwa zifite gaz Carbonique, zirimo isukari, divayi ishyushye cyangwa se ibinyobwa bitera imbaraga.

— Kunywa inzoga umuntu atariye, igifu kirimo ubusa

— Kunywa inzoga vuba vuba

Urubuga Medisite rutangaza ko iyo inzoga imaze kugera mu maraso, ihita yihutira mu bindi bice by'umubiri. Itangira kugira ubukana nibura hashize isaha umuntu ayinyweye ari nayo mpamvu gusinda bitwara umwanya runaka bitewe n'imikorere y'umubiri wa buri muntu.

Iyo inzoga igiye no mu bindi bice by'umubiri, igera no mu bwonko. Ingaruka zayo rero ziterwa n'ingano y'inzoga yanyoye cyangwa ibihe umuntu arimo. Bamwe inzoga zituma bishima mu gihe abandi ituma barira.

Igikurikiraho ni uko umwijima utangira akazi ko gusohora 'Alcool' mu mubiri, isigaye igasoka binyuze mu mwuka, mu nkari cyangwa ibyuya. Ku mpuzandengo, umubiri usohora 'Alcool' ingana na garama 0,1 kugeza kuri garama 0,15 mu gihe kingana n'isaha. Nta bundi buryo bwo kwihutisha iri kurwa rya 'Alcool' mu mubiri.

Ingano y'inzoga mu maraso (L'alcoolémie) iterwa n'ibintu binyuranye harimo ingano y'ibiro, indeshyo cyangwa se ijanisha ry'ibinure by'umubiri. Niyo mpamvu umugore n'umugabo banyweye inzoga ingana, iganza cyane umugore ari naho hava kuvuga ko inzoga ziganza cyane abagore kurusha abagabo.

Gusaza, imiti imwe n'imwe ndetse n'indwara zimwe na zimwe cyane cyane indwara y'umwijima ni bimwe mu bituma inzoga itinda mu mubiri w'umuntu kuko uba utabashije kuyisohora nko mu bihe bisanzwe. Iyi niyo mpamvu ushaka kunywa inzoga yari akwiriye kujya abanza akabaza umuganga.

Ingaruka z'inzoga ku bice bitandukanye by'umubiri;

1. Ku bwonko: — Unanirwa gufata imyanzuro

— Ugira ikibazo cyo kureba neza

— Kudidimanga

— Ikibazo cyo mu ngingo: gususumira

2. Ku mutima:— Kubyimbagana k'umutima

— Umuvuduko udasanzwe w'amaraso

— Guteragura k'umutima ku buryo budasanzwe

— Gutera k'umutima inshuro nyinshi k'umunota

3. Ku gifu:— Bitera kubyimba inda ( kuzana nyakubahwa)

— Bitera kuruka kuko iyo inzoga ibaye nyinshi ihinduka uburozi

— Bitera ibibazo mu gifu

— Bishobora kugutera kanseri y'igifu

4. Ku mwijima:— Nk’uko twabibonye, kunywa nyinshi bitobagura umwijima:

— Zitera kubyimba k'umwijima

— Zitera kanseri y'umwijima

— Iyo kanseri ituma iyo ukomeretse amaraso adakama

— Kutabasha kuyungurura amaraso ngo zivanemo imyanda na mikorobe.

— Kurwara diyabete

5. Ku myororokere:— Inzoga nyinshi zituma ucika intege mu gukora imibonano mpuzabitsina

— Umwana uvutse ku basinzi nta bwenge buhagije agira (si kuri bose)

— Kubabara cyane uri mu mihango

— Kutiyobora mu bijyanye n'imibonano, bishobora gutuma wiyandarika

— Imihango iza uko yiboneye, igihe wayiteganyaga ntibe ariho iza

— Kuba watwitira inyuma y'umura (ectopic pregnancy)

Ubushashatsi bwakozwe n'inzobere za Kaminuza ya Inserm n'Ishuri Rikuru rya London mu Bwongereza, bugaragaza ko inzoga nyinshi zifite ingaruka mbi ku bwonko cyane cyane ku bantu bakuze.

Ubu bushakashatsi bwakorewe ku bagabo 5054 n'abagore 2099 bakuze, banywa inzoga cyane bwerekanye ko bahura n'ibibazo byo kwangika ubwonko ntibabashe gukurikira neza no gukora ibintu bisaba ubwenge mu gihe kirekire.

Abantu bafite ibyago bwo kugira ikibazo cy'ubwonko ngo ni abafata ibirahuri bitatu n'igice ku munsi, ibi bituma umunywi w'inzoga w'imyaka 55 ubwonko bwe bukora nk'ubw'umusaza w'imyaka 61.

Kuba inzoga zigira ingaruka zikomeye mu mubiri no k’ubuzima bw’uzinyweye hamwe n’umuryango we, byumwihariko muri iki gihe mu Rwanda umubare wabazinywa ukomeje kwiyongera kandi wiganjemo urubyiruko, niyo mpamvu hatangijwe gahunda ya Tunyweless.

Dusobanukirwe na gahunda ya Leta y'u Rwanda yitwa Tunyweless

Gahunda ya Tunyweless yatangiye muri Nyakanga ya 2023 imara amezi 3. Igamije gushishikariza abari hagati y'imyaka 18-35 kunywa ibisindisha ku kigero cyo hasi kugirango babeho ubuzima bwiza.

Ni mu gihe icyiciro cya kabiri cyatangiye mu Ugushyingo ikazarangira muri Mutarama ya 2024. Ubukangurambaga bwayo bugamije'Inzoga si iz'Abato, Abakuru'.

Ubwo twegereje iminsi mikuru kandi ni cyo gihe abantu birekura cyane bakanywa cyane.Ni wo mwanya wo kwibutsa ko Inzoga atari iz’abato kandi abakuru bakwiye kunywa mu rugero ku bahisemo kunywa inzoga.

Iyi gahunda ya TunyweLess kandi ntigamije kubuza abantu kunywa inzoga nk’uko bamwe babitekereza ahubwo igamije kwibutsa abanyarwanda ko kunywa mu rugero ku buryo inzoga banyweye zitagira ikibazo ziteza.

Nk’uko bavuga ko ibintu byose bibaye byinshi bigira ingaruka koko nibyo. Ibi ntibigarukira ku nzoga gusa kuko n’uriye ibiryo byinshi akarenza urugero nabyo bimugiraho ingaruka kimwe n’uwanyweye amazi menshi akarenga urugero.

Abazinywa bagomba kwibuka ko nubwo inzoga ari nziza zibatera kwizihirwa zikatuma basabana n’abandi, ari nako zikomeza kubongerera ibyago byo kurwara indwara zikomeye ndetse zikanagira ingaruka mu buzima bwabo busanzwe nko mu kazi aho usanga abenshi mu bazinywa harimo abo zakirukanishije, zitumye babanye nabi n’umuryango n’ibindi. Ibi byose nibyo gahunda ya TunyweLess igamije gukuraho.

Si ibyo gusa kuko n’amafaranga azigendaho yagakwiye kugira byinshi byihutirwa akemura mu muryango.

Ku wa Gatanu tariki ya 30 Kamena 2023, nibwo Ubushakashatsi bwa kabiri Minisiteri y'Ubuzima yamuritse bwakozwe ku ndwara zitandura mu Rwanda, bwerekanye ko kunywa inzoga byiyongereyeho 6.8 mu myaka icyenda ishize nka kimwe mu byongera ibyago byo kurwara indwara zitandura.

Muri ubu bushakashatsi bwerekana ko kunywa inzoga mu 2013 byari kuri 41.3%, bikaba bigeze kuri 48.1%..

Muri ubu bushakashatsi,bugaragaza ko umubyibuho ukabije wavuye kuri 2.8% muri 2013 ukaba ugeze kuri 4.3% muri 2022.

Intara yiganje kugira abanywi b'inzoga ni iy'Amajyaruguru aho bari ku kigero cya 56.5%, iy'Amajyepfo nayo ni 51.6%,Iburengerazuba ni 46.5%, iy'Iburasirazuba ni 43.9%, Umujyi wa Kigali 42.0%.

Bugaragaza mu minsi 30 ubwo hakorwaga ubushakashatsi mu 2022 ko mu banywa inzoga abagabo ari 61.9% mu gihe abagore 34.%.

Ubushakashatsi bwa kabiri ku ndwara zitandura bwerekana kandi ko kunywa inzoga zikabije byongera ibyago byinshi ku bantu kuko bashobora kurwara indwara zitandura.

Bugaragaza ko abanywi b'inzoga mu buryo bukabije(ubusinzi) bwagabanyutseho 8% aho mu 2013 bwari ku 23.5% bugera kuri 15.2% mu 2022.

Afurika iri mu kiragano cyo gukora amavugurura mu masitade y’umupira w’amaguru, ndetse by’umwihariko ubu kugira ikipe y’igihugu cyangwa ikipe isanzwe ihagararire igihugu cyayo mu mikino, igomba kuba ifite igihugu cyemewe na CAF. Ibi rero byatumye ibihugu bitangira kuvugurura Amasitade ndetse hamwe hakubakwa ayandi.

Tugiye kubera hamwe Amasitade agera ku 10 ahenze muri Afurika

10. Stade Olmpique de Radès – $110 Million

Sitade Olympique de Radès ni sitade iherereye mu mujyi wa Radès muri Tunisia. Sitade Olympique de Radès yakira abantu bagera ku bihumbi 60 ndetse bigatuma iba imwe mu masitade yakira abantu benshi muri Afurika. 

Iyi sitade, ubusanzwe yubatswe kugira ngo yakire imikino ya Mediterranean Games yabaye mu 2001. Mu 2004 kandi iyi sitade yabereyeho imikino y’igikombe cy’Afurika, u Rwanda rukaba rwarayikiniyeho. Iyi sitade kandi isanzwe ikoreshwa mu bikorwa bitandukanye birimo imikino yo kwiruka ndetse n’ibitaramo.

9. Mbombela Stadium $ 140 Million

Mbombela Stadium ni imwe muri sitade 10 zakiriye imikino y’igikombe cy’Isi cya 2010 cyabereye muri Afurika y’Epfo. Iyi sitade yakira abantu 43,500 iherereye mu gace ka Mpumalanga, ikaba yakirirwaho n’ikipe ya Pumas.

8. Peter Mokaba Stadium $150 Million

Peter Mokaba Stadium iherereye mu mujyi wa Polokwane muri Afurika y’Epfo, iyi sitade isanzwe ikinirwaho na Rugby, yakira abantu bagera ku bihumbi 45. Iyi sitade iri mu masitade 5 mashya yubatswe, ubwo biteguraga imikino y’igikombe cy’Isi, ndetse muri iyi mikino ikaba yarakiriye imikino 4 y’amatsinda.

7. Sitade Amahoro $165 Million

Sitade Amahoro ni sitade nkuru y’igihugu cy’u Rwanda. Iyi sitade, turi ubu iri kuvugururwa, ikazuzura mu mwaka utaha. Sitade Amahoro izaba yakira ibihumbi 45, niyo sitade izaba ari nini mu Rwanda. Amafaranga y’u Rwanda asaga miliyari 150, niyo azatangwa kuri iyi sitade izakira imikino y’igikombe cy’Isi cy’abakanyujijeho.

6. Estadio 11 de Novembro – 227

Iyi sitade yiswe uku, mu buryo bwo kuzirikana umunsi mukuru w’ubwigenge bwa Angola. Iyi sitade iherereye mu mujyi wa Luanda ikaba yakira ibihumbi 55 by’abantu bicaye neza. Estádio 11 de Novembro yakiriye imikino 9 harimo n’umukino wa nyuma mu mikino y’igikombe cy’Afurika Angola yakiriye mu 2010.

5. Nelson Mandela Bay Stadium – $270 Million

Nelson Mandela yiswe uku nyuma yaho Perezida wa mbere wa Afurika y’Epfo Nelson Mandela yitabiye Imana. Iyi sitade yakiraga ibihumbi 42, 486 mu mikino y’igikombe cy’Isi ariko mu mikino isanzwe yakira ibihumbi 46 no mu mikino ya Rugby, ikaba yarubatswe mu 2007, yuzura mu 2009. Mandela, mu mikino y’igikombe cy’Isi yakiriye imikino itandukanye ndetse irimo umukino wo guhatanira umwanya wa 3. Isanzwe yakiriraho ikipe ya Chipa United.

4. Moshood Abiola National Stadium – $360 Million

Iyi sitade izwi ku izina rya National Stadium Abuja, ikaba iherereye mu gihugu cya Nigeria mu gace ka Abuja. Iyi sitade yakira imikino y’ikipe y’igihugu ya Nigeria. Iyi sitade yakira yakira ibihumbi 60 by’abantu, ndetse ikaba ariyo sitade yonyine iba muri 5 za mbere zihenze muri Afurika, ariko itari muri Afurika y’Epfo.

3. FNB Stadium $440 Million 

Niyo sitade yakiriye umukino wa nyuma w’igikombe cy’Isi cya 2010. Ikaba izwi ku izina rya Soccer City cya ngwa Calabash. Iyi sitade iherereye mu mujyi wa Johannesburg ndetse ikaba ari sitade ya Kaizer Chief ndetse n’ikipe y’igihugu ya Afurika y’Epfo.

Iyi sitade ifite ubushobozi bwo kwakira abantu 94, 736, ndetse ikaba ari imwe muri sitade nini ku Isi. Iyi sitade, niho Nelson Mandela yavugiye ijambo rya mbere, ubwo yari avuye muri gereza mu 1990.

2. Moses Madhiba Stadium – $450 Million

Moses Madhinda, niyo yakiriye umukino ufungura imikino y’igikombe cy’Isi cya 2010. Iyi sitade yakira ibihumbi 54, iherereye mu mujyi wa Durban muri Afurika y’Epfo, gusa mu gihe cy’igikombe cy’Isi yakiraga abantu bagera ku bihumbi 62,760. Kuri ubu iyi sitade yakirirwaho n’ikipe ya Amazulu FC ndetse n’ikipe y’igihugu ya Rugby.

1. Cape Town Stadium $ 600 Million

Cape Town Stadium, niyo sitade ihenze muri Afurika ikaba ihagaze miliyoni maganatandatu z’amadorari. Iyi sitade yakira 58,310 by’abafana, iyi sitade yubatswe na kampani yo muri iki gihugu yitwa Muray and Roberts. Mu 2010 iyi sitade yari yarahawe ubushobozi bwo kwakira ibihumbi 64. Ikaba igenzurwa n’umujyi wa Cape Town.

Ishyirahamwe ry’Umupira w’Amaguru mu Rwanda, FERWAFA, ryamaze kumenyesha amakipe yo mu cyiciro cya mbere n’icya kabiri mu bagabo n’abagore igihe cyo kwandikisha abakinnyi ndetse n’umunsi isoko rizafungwa.

Ku makipe yo mu cyiciro cya mbere mu bagabo, isoko rito ryo kwandikisha abakinnyi babigize umwuga ry’umwaka w’imikino wa 2023-24 rizafungura tariki ya 26 Ukuboza 2023 rifungwe tariki ya 27 Mutarama 2024.

Kwandikisha abakinnyi babigize umwuga mu cyiciro cya mbere mu bagore, bizatangira guhera tariki ya 26 Ukuboza 2023 birangire tariki ya 26 Mutarama 2024.

Kwandikisha abakinnyi batabigize umwuga, ni ukuvuga mu cyiciro cya kabiri mu bagabo n’abagore ni ukuva tariki ya 1 Mutarama 2024 kugeza tariki ya 8 Gashyantare 2024.

Amakipe kandi yibukijwe ko nta kipe igomba kurenza abakinnyi 30, bivuze ko izishoboye yazandikisha umubare w’imyanya yari asigaranye kugira ngo 30 bagere, gusa kugeza 30 si itegeko ariko kubarenza ntibishoboka.

Perezida w’Ishyirahamwe ry’Umupira w’Amaguru muri Tanzania (TFF), Wallace Karia yemeje ko Tanzania na Uganda ziyongera kuri Kenya bakazakira CHAN 2024.

Impuzamashyirahamwe y’Umupira w’Amaguru muri Afurika (CAF) yari yatangaje ko Kenya ari yo izakira Igikombe cy’Afurika cy’Abakinnyi bakina imbere mu Bihugu bya bo cya 2024 (CHAN 2024), iheruka yegukanywe na Senegal.

Nubwo CAF nta kintu irabitangazaho ariko perezida wa TFF, Wallace Karia yavuze ko Uganda na Tanzania bizafatanya kwakira iki gikombe.

Ati “umwaka utaha muri Nzeri, twahawe uburenganzira bwo kwakira CHAN hamwe na Tanzania, Kenya na Uganda, bivuze ko mu Karere kacu hazaba hasigaye ikipe imwe kubona itike.”

Ubusanzwe Akarere ka CECAFA (ari nako u Rwanda rurimo) kaba gafite amakipe 4 muri CHAN, bivuze ko ibihugu bisigaye bizishakamo 1 gisanga ibi bindi 3.

Karia yavuze ko bateganya ko uko ari amatsinda 4, rimwe ryazakinira mu Mujyi wa Dar es Salaam muri Tanzania, irindi Zanzibar, irindi Nairobi muri Kenya ndetse na Kampala muri Uganda.

Zaba Missedcall na Nkusi Lynda bazwi muri Sinema Nyarwanda bemeje ko batandukanye nyuma y’uko umuryango wa Lynda utishimiye uburyo bitwaraga mu rukundo rwa bo.

Zaba na Lynda bakaba bari bamaze amezi agera ku munani batandukanye, baheruka kwemeza ko biyunze.

Mu kiganiro banyujije kuri YouTube Channel ya Lynda Priya, Zaba Missedcall yavuze ko bashwanye kubera amashusho bashyiraga ku mbuga nkoranyambaga bigatuma umuryango wa Lynda utumva iby’urukundo rwa bo.

Ati “hari ukuntu imitwikire yacu n’ibyo twakoraga habayemo kwisanzura biragenda birenga urugero, turyoherwa n’uburyo tubanyemo ku buryo hari ibyo twakoraga ubu ndabireba nkabona ntibyari bikwiye, tugasomana kuri camera, nibyo tiuabyemerewe ariko se nitureba mu muco wacu mwari mwabyemererwa?”

“Buriya rero ku muryango w’umuhungu nta kibazo cyane (…) icyo kintu gukomeza kurinda umukobwa hari ibintu aba adakwiye gukora, urumva umukobwa ukiri muto kujya kuri camera agasomana hari igihe umuryango ukubwira ngo nimutandukana bizagenda bite? Na we yaje kubyisangamo nk’ikosa ariko umuryango we ntabwo wabishyigikiye kandi n’utabishyigikira n’uwo mubikorana ntabwo bamureba neza.”

Yakomeje avuga ko Lynda yatangiye gusa nutinya umuryango we asaba Zaba ko bagabanya ibyo bakoraga ariko we ntiyamwumva bitewe n’uko yumvaga bari mu kuri nta n’ikibazo kirimo.

Byahereye aho batangira gushwana, baburirana umwanya, icyizere kiragabanuka kugeza aho bahisemo guhagarika urukundo rwa bo aho Zaba Missedcall yahise ajya no mu rukundo mu buryo bwo kumuhima ndetse birangira amwikuyemo burundu.

Bemeje ko ubu bamaze kwiyunga ari na ho bakuye igitekerezo cyo kuba bakora filime bise ‘Aho yaciye’.

Babajijwe niba ubu barasubiye mu rukundo, Zaba yagize ati “Mu gihe twari tumaze, ntekereza ko icyingenzi ari uko imikoranire y’ibanze yo yabayeho, nibaza ko ikintu cyashimisha abakunzi bacu ari ukutubona dukorana! Ibindi ntekereza ko bizivugira.'

Lynda na we yagize ati “Njye nizera ko ikintu cyose kigira igihe cyacyo, ibaze abantu bakozanyijeho mu mezi umunani ashize kuba uyu munsi tugiye gukorana, hari ibizaza tu.'

Mu minsi ya vuba ni bwo iyi filime y’uruhererekanye ya ‘Aho Yaciye’ izatangira kujya hanze.