Author: webrwanda

Abanyamategeko bunganira Théoneste Ndererimana mu rubanza aregwamo n'Ubushinjacyaha kunyereza amafaranga agera muri Miliyoni 10 z'amafaranga y'u Rwanda muri Koperative COABAMARU yari abereye umuyobozi, babwiye Urukiko rw'Ibanze rwa Gacurabwenge ko Laetitia Mukabucyana, Umukozi w'Akarere ka Kamonyi ushinzwe iterambere ry'Amakoperative, Ibigo bito n'Ibiciriritse ko yagize uruhare mu gushimuta no gufungisha uyu muturage binyuranije n'Amategeko, akabikora mu nyungu ze bwite.  

Laetitia Mukabucyana, amazina y'uyu mukozi w'Akarere ka Kamonyi yagarutsweho mu rukiko, akavugwa inshuro zisaga icumi(10). Abanyamategeko babiri bunganira Théoneste Ndererimana, babwiye urukiko ko umukiriya wabo uburana ifungwa n'ifungurwa ry'agateganyo arimo kuzira abamufiteho ububasha babikora mu nyungu zabo bwite, barimo uyu mukozi w'Akarere Laetitia Mukabucyana.

Aba banyamategeko, babwiye Urukiko ko intandaro yo gushimutwa no gufungwa binyuranije n'Amategeko kwa Théoneste Ndererimana ari uko aba bamufungishije bashakaga ko yemera ko Umusaruro w'Umuceri wa Koperative COABAMARU uhabwa uruganda rwa RWABUYE RICE(rutonora umuceri), we akabyanga.

Umwe muri aba banyamategeko yagize ati' Abamufungishije, bifuzaga ko yemera ko uruganda rwa RWABUYE RICE arirwo ruhabwa umusaruro uva muri Koperative(COABAMARU), we akabyanga kubera ko hari urundi ruganda bari basanzwe bakorana kandi bakorana neza'. Akomeza avuga ko babonye uyu Théoneste Ndererimana abyanze, bahitamo gukoresha ububasha bafite baramufungisha.

Yasabye Urukiko ko mbere y'uko rusuzuma icyifuzo cy'Ubushinjacyaha cy'uko yaba afunzwe by'agateganyo, rukwiye kubanza gusuzuma uburyo yafashwe agafungwa, niba bikurikije Amategeko.

Yabwiye kandi Urukiko ko nk'Abanyamategeko bunganira uyu Théoneste Ndererimana, basabye Ubushinjacyaha ko mu Iperereza bukora ku mukiriya wabo, bwanakora Iperereza ku buryo yafashwemo ariko ngo ibyo ntabwo Ubushinjacyaha bwigeze bubikora.

Yavuze ko uyu Théoneste Ndererimana yafashwe Tariki ya 27 Ugushyingo(11) 2025, afungirwa kuri Sitasiyo ya Gacurabwenge bikozwe ngo n'abo bafite ububasha bakoresheje mu nyungu zabo, hafungwa udafite icyo afungiye kuko nta Dosiye yakorewe igaragaza ibyo azira.

Uyu Munyamategeko, yabwiye Urukiko ko Tariki 5 Ukuboza 2025 Theoneste Ndererimana afunzwe nta Dosiye aribwo Laetitia Mukabucyana n'abo yajyanye(bivugwa ko barimo umukozi wa RCA), bagiye ku Mugina ahabarizwa Koperative COABAMARU gukora igenzura (Audit) nyamara uwo barikorera baramaze kumufunga.

Umunyamategeko, anenga ibyavuzwe n'Ubushinjacyaha ko iryo genzura(Audit) ngo ryakozwe n'ikigo gifite Amakoperative mu nshingano(RCA). Ati' Ubushinjacyaha mu Iperereza bukavuga ngo ni ikigo RCA!?. Mukabucyana bakoze iperereza basanga ni umukozi wa RCA?, ntabwo ari byo'.

Agira kandi ati' Nyakubahwa(Perezidante w'urukiko), umuntu afunzwe kuri 27 bagiye gukora Audit(igenzura) ku itariki eshanu(5) nk'uko Raporo, ikiswe Raporo kibigaragaza'.

Akomeza avuga ko hari Itegeko ribisobanura neza ko gufungwa by'agateganyo ari igihe hari ibyagezweho bihagije mu Iperereza. Ati' Kuri Théoneste Ndererimana, mbona Iperereza bararicuritse! kuko we barabanje baramufata, baramufunga, hashize iminsi afunze bajya gukora Iperereza'.

Akomeza avuga ko ibyakorewe Umukiriya we ari ibintu bibabaje cyane kuko ngo yahawe Inyandiko mvugo yo gufata no gufunga Tariki 11 Ukuboza 2025, nyuma hafi ibyumweru 2 afunzwe nta Dosiye.

Ati' Ibintu bibabaje nyakubahwa Perezida! Njyewe nahoze mbibwira n'Abagenzacyaha n'Abashinjacyaha nti nk'ibi bintu bibaye ku muvandimwe wawe! Ibi bintu mukabisigiriza mukabirebera!, umuntu agafunga undi binyuranije n'Amategeko akamuzanira PVA akayandika ko ari 11 twaramaze kumugaragariza ibimenyetso ko kuva kuri 27 yari afunzwe!'. Yakomeje avuga ko ubwo yabazaga icyo umukiriya we afungiye yasubijwe ko ari Akarere kasabye ko afungwa ngo hirindwa ko atoroka.

Yabwiye urukiko ati' Ibi ntabwo tubyita gufungwa, tubona yarashimuswe. Ni uko gusa yashimuswe ajyanwa mu nzego zizwi'. Yakomeje asaba Urukiko ko mu bushishozi bwarwo rukwiye kurekura Théoneste Ndererimana kuko nta kindi azira uretse kwanga gukora ibyo yabonaga bitanyuze mu mucyo byashakwaga n'abamufiteho ububasha mu nyungu zabo bwite.

Uyu munyamategeko, yasabye Urukiko ko rwarekura Théoneste Ndererimana, byaba ari n'Ingwate isabwa cyangwa abamwishingira nawe agashyirwa mu bishingizi kuko azi neza ko atari uwatoroka ubutabera, ko kandi niba hari n'impungenge Urukiko rufite, nawe nk'Umunyamategeko wemera kwishingira Umukiriya we.

Mu rukiko, hagaragajwe ko bijya gutangira, byahereye Tariki ya 19 Ugushyingo 2025, ubwo Laetitia Mukabucyana ngo n'uwitwa Davide ugaragara muri Raporo ngo bagiye kwivanga mu matora ya Koperative n'Ubuyobozi bwa Koperative COABAMARU.

Muri aya matora, uwazanywe gutorwa yabanje kwangwa n'abari bagize inteko itora bavuga ko atari umunyamuryango, ko ndetse atari kuri Lisiti y'abaje gutora boherejwe n'ama ZONE babarizwamo, ariko ntacyo byamaze kuko amatora yarabaye birangira uwazanywe atowe.

Koperative COABAMARU, mu gutangira kwayo bari Abarobyi b'Amafi ndetse n'icyangombwa bagira kitigize gihindurwa na RCA kiracyari icy'uko ari Koperative y'Abarobyi aho kuba iy'Abahinzi b'Umuceri, ibitera bamwe no kwibaza impamvu RCA iza mu matora y'abahinzi b'Umuceri bakigendera ku cyangombwa cy'Abarobyi b'Amafi yakabaye yarabahinduriye.

Kuburana ifungwa n'ifungurwa ry'agateganyo ntabwo biba bisobanuye ko Uburana afite icyaha cyangwa se atagifite. Urebye, haba harebwa cyangwa hasuzumwa ibintu by'ingenzi bibiri aribyo; Kureba impamvu zikomeye zituma ukekwaho icyaha, kureba ngo Ese ziramutse zihari, haba hari impamvu zitegeka ko ugomba gufungwa?. Kugira ngo uregwa arekurwe, akaburana ari hanze agomba kuba agaragaza impamvu zihamya ko adashobora Gutoroka, ko kandi abaye arekuwe atabangamira Iperereza cyangwa se ngo abe yasibanganya ibimenyetso.

Théogène Munyaneza

The post Kamonyi-Urukiko: Umukozi w'Akarere ushinzwe Amakoperative yavuzwe mu Gushimuta no Gufungisha Umuturage first appeared on Intyoza.

The post Kamonyi-Urukiko: Umukozi w'Akarere ushinzwe Amakoperative yavuzwe mu Gushimuta no Gufungisha Umuturage appeared first on Intyoza.

Source : https://www.intyoza.com/2026/01/05/kamonyi-urukiko-umukozi-wakarere-ushinzwe-amakoperative-yavuzwe-mu-gushimuta-no-gufungisha-umuturage/

Liam Rosenior, umutoza w'Umwongereza uri mu bahabwa amahirwe menshi mu mupira w'amaguru w'i Burayi, ari i Londres aho ategerejwe guhabwa inshingano zo kuba umutoza mukuru wa Chelsea FC muri iki cyumweru, mu gihe RC Strasbourg ikomeje gushaka umusimbura we. Amakuru yizewe avuga ko ibiganiro biri kugenda neza kandi ko impande zombi zifuza ko iyi gahunda yarangira vuba bishoboka.

Chelsea, iri mu rugendo rwo gutangiza ibihe bishya by'imiyoborere n'imikinire, yamaze kwitegura kwakira Rosenior, imufata nk'umutoza ujyanye n'icyerekezo cy'iyi kipe: kubaka ahazaza hifashishijwe impano z'abakiri bato, gukina umupira ugaragara, no gusubiza ikipe ku rwego rwo guhangana mu marushanwa akomeye i Burayi.

Rosenior yagaragaje ubuhanga mu kazi yakoraga muri RC Strasbourg, aho yafashije iyi kipe gutera intambwe mu mikinire no mu myumvire y'abakinnyi, bituma yitabwaho n'amakipe akomeye arimo na Chelsea. Kuba afitanye isano ya hafi n'abayobozi ba Chelsea binyuze mu mikoranire y'aya makipe byongereye amahirwe yo kubona amasezerano byihuse.

Biteganyijwe ko RC Strasbourg izatangaza umutoza mushya mu minsi ya vuba, bikorohereza Rosenior gutangira akazi ke ka mbere muri Premier League nk'umutoza mukuru wa Chelsea. Abafana ba Chelsea biteze byinshi muri iyi ntangiriro nshya, bafite icyizere ko izi mpinduka zizagarura icyubahiro n'ibyishimo kuri Stamford Bridge.

Source : https://kasukumedia.com/liam-rosenior-agiye-kugirwa-umutoza-mukuru-wa-chelsea-fc/

Umuhanzi Alto yagaragaje ko urukundo yeretswe ubwo yasusurutsaga abari bitabiriye igitaramo 'The Nu Year Groove' rwamuhaye umukoro udasanzwe muri uyu mwaka.

Mu kiganiro na ISIMBI, Alto yatangaje ko ubwuzu yakiranywe n’abakunzi be ubwo yataramiraga bwa mbere mu nyubako ya BK Arena byamuhaye ishusho ngari y’ibyo agomba kubaha muri 2026.

Ati 'Byari indorerwamo nziza yo gupima ibyo nkora nubwo byose bisaba gukora cyane, gusa kiriya gitaramo cyanyeretse ko hari abanyarwanda bakunda ibyo nkora ndetse ngiye kubikuba cyane.'

Akomoza ku by’album ye yasezeranije abakunzi be kuzasohoka mu mwaka ushize amaso agahera mu kirere, Alto yemeje ko nubwo ibizazane byatambamiye ishyirwa hanze ryayo ariko ko vuba azayisohora.

Ati 'Album yanjye ndacyari kuyikoraho , iriho indirimbo 12, iri no mu bintu byatumye ntasohora indirimbo nyinshi umwaka ushize, hazamo izindi mbogamizi ariko nditegura kuyisohora.”

'Ndashaka kuzashyirira hanze indirimbo zose ziyigize icyarimwe bitarenze muri kimwe cya kabiri cy’uyu mwaka kandi ntabwo bizambuza gucishamo nkasohora n’izindi ndirimbo mbere yayo.'

Uyu muhanzi yanashimangiye ko nawe ashyigikira ihangana mu muziki hagati y’umuhanzi na mugenzi we mu gihe hatajemo ibyo gufatana mu mashingu ubwo yasobanuraga iby’ihangana riri hagati ya Bruce Melodie na The Ben muri iki gihe basangiye urubyiniro .

'Kuri njyewe ihangana ni ryiza mu gihe ritari rya rindi risesereza cyangwa ibishobora gutuma umuntu akora ikintu kibi ku wundi cyangwa kwinjirirana mu buzima bwite kuko bituma n’uruganda rwa Muzika rushyuha.'

Tariki ya mbere Mutarama 2026, ni bwo uyu muhanzi yahawe umwanya wo gutaramira Imbaga yari yuzuye BK Arena mu gitaramo 'The Nu -Year Groove' cyari cyahurije hamwe Bruce Melodie na The Ben.

Alto yishimiye gutaramira muri Kigali Arena

Source : http://isimbi.rw/byampaye-undi-mukoro-_-alto-ku-gutaramira-bwa-mbere-muri-kigali-arena.html

Bruce Melodie yasabye abafana be guhagarika guserereza The Ben muri iki gihe hakomeje igereranywa ridasanzwe ry’uburyo bombi bitwaye mu gitaramo ‘The Nu -Year Groove’.

Mu kiganiro yakoreye ku rukuta rwe rwo ku rubuga rwa Instagram ku cyumweru tariki ya 4 Mutarama 2025, Bruce Melodie yasobanuye ko icyo abafana be bakomeje kuririraho mu kubahanganisha kugeza aho batangira gusenya The Ben, ari umuziki usanzwe kandi abona utagakwakiye kuba ikintu cyo gusebanyirizanyamo.

Ati 'Abafana banjye mwubahe izina rya The Ben, mwirinde kurivuga nabi cyangwa se muriharabika kuko biriya ni umuziki usanzwe.'

Itahiwacu Bruce atangaje ibi mu gihe hirya no hino ku mbuga nkoranyambaga hakomeje kugaragara benshi mu bavuga ko ari abafana be bifatira ku gahanga umuhanzi The Ben bari bamaze iminsi bari mu gisa n’ihangana ryeruye ryabanjirije iki gitaramo.

Uku gusenya uruhande batabogamiyeho kw’aba bafana kongeye gufata indi ntera ubwo iki gitaramo cyabaye kuri Bonane cyarangiraga bakavuga ko Bruce Melodie yitwaye neza ku rubyiniro kurusha The Ben.

Asubiza kuri ibi, Bruce Melodie yagaragaje ko umuziki kimwe n’ubundi bumenyi bushingiye ku mpano umuntu avukana, buri muntu wese agira igihe cye cyo gutumbagira gusa bitabuza ko n’icya mugenzi we kuzagera.

Ati 'Uyu munsi nshobora kuba nabyutse neza ariko ejo akanyigaranzura cyangwa agasohora indirimbo igakundwa cyane ibintu bigahita bihindura isura kuko twese nta bubiko bw’indirimbo tugira.'

Ni no muri iki gitaramo cyabereye muri BK Arena, Bruce Melodie yamurikiye ku mugaragaro indirimbo ye nshya yise 'Pom Pom’ yakoranye na Diamond Platnumz na Joel Brown.

Bruce Melodie yasabye abafana be kureka gukomeza kwibasira The Ben

Source : http://isimbi.rw/bruce-melodie-yihanije-abafana-be-basebya-the-ben.html

Abakorera mu isoko ryo mu Irebezo, riherereye mu Kagari ka Mahango, mu Murenge wa Kibungo, Akarere ka Ngoma, baravuga ko bahangayikishijwe n'uko bakorera mu isoko ritubakiye, bigatuma bahora bahura n'igihombo cyane cyane mu bihe by'imvura. Aba bacuruzi bavuga ko ibicuruzwa byabo byangirika kenshi bitewe n'amazi y'imvura, bikabatera igihombo gikomeye.

Bamwe mu bacuruzi batangarije Kasuku Media bavuga ko iyo imvura iguye batabona aho bihisha, bagahitamo gutwarwa n'ibicuruzwa byabo, cyangwa bikangirika burundu. Bavuga ko ibiribwa nk'imboga, imbuto n'ibinyampeke byibasirwa cyane n'amazi n'ibyondo, bigatuma batabasha kubona inyungu bateganyaga.

Umwe muri bo yagize ati: 'Dukora twizeye ko twabona icyo dutunga imiryango yacu, ariko imvura iyo iguye iraduhombya cyane. Ibyo tutagurishije bigenda byangirika, ugasanga twakoresheje amafaranga ntacyo yadusigiye.' Avuga kandi ko no mu gihe cy'izuba ikibazo gikomeza, kuko izuba ryinshi ryangiza bimwe mu bicuruzwa, bigatuma bigabanuka ku isoko.

Aba bacuruzi basaba ubuyobozi bw'inzego z'ibanze kubafasha bakubakira isoko rifite inyubako ibarinda imvura n'izuba, kugira ngo babashe gukorera mu mutekano no guteza imbere imibereho yabo. Bavuga ko isoko ryubatse neza ryatuma bongera abakiriya, rikazamura ubucuruzi kandi rikagira uruhare mu iterambere ry'Akarere ka Ngoma muri rusange.

Source : https://kasukumedia.com/abacururiza-mu-isoko-ryo-mu-irebezo-baratabaza-ku-gihombo-baterwa-nisoko-ritagira-inyubako/

Source : https://kasukumedia.com/bugesera-abaturage-barinubira-itangwa-ryinkunga-yibiryo-bavuga-ko-ryabaye-mu-buryo-budahwitse/

Ishyirahamwe ry'Umupira w'Amaguru mu Rwanda (FERWAFA) ryatangaje ko mu mwaka wa 2026 riteganya gukoresha ingengo y'imari ingana na 14,583,702,636 Frw, igaragaza impinduka n'icyerekezo gishya mu miyoborere no mu iterambere ry'umupira w'amaguru mu Rwanda.

Muri iyi ngengo y'imari, miliyari 8,39 Frw zizakoreshwa mu bikorwa rusange bya FERWAFA birimo imiyoborere, amarushanwa atandukanye, amahugurwa y'abatoza n'abasifuzi, ndetse n'iterambere ry'imiyoborere y'amakipe n'ibikorwaremezo. Miliyari 5,39 Frw zo zizagenerwa amakipe y'Igihugu atandukanye, by'umwihariko Amavubi n'andi makipe ahagarariye u Rwanda mu marushanwa mpuzamahanga.

Iyi ngengo y'imari ya 2026 igaragaza igabanuka ugereranyije n'iyari yateganyijwe mu mwaka wa 2025, aho FERWAFA yari iteganyije gukoresha 15,297,147,920 Frw, harimo miliyari 4,98 Frw zagenewe amakipe y'Igihugu.

Ibi bigaragaza ko nubwo ingengo y'imari rusange yagabanutse, amafaranga agenewe amakipe y'Igihugu yiyongereye, bigaragaza umuhate wo kuzamura isura y'umupira w'amaguru w'u Rwanda ku rwego mpuzamahanga.

Tariki ya 31 Ukuboza 2025, FERWAFA yatumiye abanyamuryango bayo mu Nama y'Inteko Rusange Isanzwe, izabera muri Serena Hotel ku wa 10 Mutarama 2026, guhera saa tatu za mu gitondo. Muri iyo nama, hazareberwa hamwe raporo y'ibikorwa byakozwe, gahunda z'ibikorwa biteganyijwe, isesengura ry'imikoreshereze y'ingengo y'imari ya 2025, ndetse hanemezwa ingengo y'imari ya 2026.

Source : https://kasukumedia.com/ferwafa-yagabanyije-ingengo-yimari-yumwaka-wa-2026/

Abaturage batuye mu Mudugudu wa Gitwa, mu Kagari ka Kamunyana, Umurenge wa Minazi, mu Karere ka Gakenke, baravuga ko babangamiwe bikomeye n'icyemezo kibabuza kubaka aho bari basanzwe batuye, bagasabwa kwimurwa bakajyanwa gutura ahandi bavuga ko badafitiye ubushobozi.

Bamwe muri bo bavuga ko bamaze imyaka myinshi batuye muri uwo Mudugudu, bagaharanira kwiteza imbere, ariko bakaza gutungurwa n'itangazo ribabuza kongera kubaka cyangwa kuvugurura inzu zabo. Ibi byatumye bamwe mu nzu zabo zisaza zirangirika, mu gihe abandi babuze aho bubakira abana babo bageze igihe cyo kwiyubakira.

Umwe mu baturage yagize ati: 'Inzu yanjye yarasenyutse kubera ko nabujijwe kuyisana. Nta bushobozi mfite bwo kujya gutura aho batwerekeza, none turi mu bibazo bikomeye.' Undi na we yagaragaje ko abana be bakuze badafite aho bubakira, nyamara ubutaka bafite ari ho batuye ubu.

Abaturage bavuga ko aho basabwa kwimurirwa hadahwanye n'ubushobozi bwabo, haba ku bijyanye n'amafaranga yo kubaka, imirima yo guhingamo n'ibikorwaremezo by'ibanze. Basaba ubuyobozi kubumva, bukabaha ibisobanuro bisobanutse, ndetse bukabashakira igisubizo kirambye cyabafasha kubaho neza batavutswa uburenganzira bwabo bwo gutura no kwiyubakira.

Ku ruhande rw'abaturage, icyifuzo ni uko habaho ibiganiro n'ubuyobozi kugira ngo harebwe uko babonera ibisubizo biboneye, birinda ko bakomeza kubaho mu bwigunge no mu bibazo by'imibereho mibi.

Source : https://kasukumedia.com/abatuye-i-gitwa-barataka-kubuzwa-kubaka-no-gusana-inzu-zabo/

Urwego rw'Igihugu rw'Ubugenzacyaha (RIB) rwatangaje ko umunyamakuru Emmanuel Ndahiro uzwi ku izina rya Taikun yarekuwe nyuma y'uko habayeho ubuhuza hagati ye n'uwakorewe icyaha. Taikun ukorera Radio/TV 10 yarekuwe ku wa Gatanu tariki ya 2 Mutarama 2026.

Uyu munyamakuru yari yatawe muri yombi ku wa 1 Mutarama 2026, akurikiranyweho ibyaha birimo gukubita no gukomeretsa, kwangiza cyangwa konona umutungo w'abandi ndetse no gukoresha amagambo arimo ibikangisho. Ibi byabereye mu gitaramo cyari cyateguwe n'Umujyi wa Kigali cyabereye mu mbuga ya Kigali Convention Centre, aho bivugwa ko yagiranye amakimbirane n'abashinzwe umutekano.

Umuvugizi wa RIB, Dr Murangira B. Thierry, yemeje ko Ndahiro yarekuwe hashingiwe ku buhuza, asobanura ko ari inzira iteganywa n'amategeko, by'umwihariko ingingo ya 16 y'itegeko ryo mu 2023 rigena imiburanishirize y'imanza z'inshinjabyaha.

Iyo ngingo igena ko umugenzacyaha ashobora gutangiza ubuhuza mu gihe icyaha cyakozwe kitahanishwa igihano kirenze imyaka itanu y'igifungo, kandi bigamije kurihira uwakorewe icyaha no gufasha ukekwaho icyaha kwisubiraho.

Dr Murangira yavuze ko Taikun yanaganirijwe ku myitwarire ikwiye mu mibanire n'abandi, asabwa kwirinda ibikorwa bishobora guteza amakimbirane. Yanashishikarijwe gukoresha impano ye mu myidagaduro mu buryo bwubaka, yubaha amategeko n'ubuzima bwite bw'abandi. RIB yashishikarije abaturage gukoresha inzira z'ubuhuza mu gukemura amakimbirane, kuko zifasha gukiza inzika no kugarura ituze mu muryango nyarwanda.

 

Source : https://kasukumedia.com/umunyamakuru-emmanuel-ndahiro-taikun-yarekuwe-nyuma-yubuhuza-bwakozwe-na-rib/

Mu myaka irenga 30 ishize, Uburasirazuba bwa Repubulika Iharanira Demokarasi ya Congo bukomeje kurangwa n'amakimbirane n'ubugizi bwa nabi bukorerwa abaturage b'inzirakarengane, cyane cyane Abanye-Congo b'Abatutsi. Ibyo byatumye abantu benshi bicwa, abandi barahunga, aho mu Rwanda habarurwa impunzi z'Abanye-Congo zirenga ibihumbi 120.

Mu buhamya bubabaje, Mwiza (izina ryahinduwe ku bw'umutekano we), umugore w'imyaka 40 umaze umwaka ahungiye mu Rwanda, yagaragaje amabi yakorewe n'umutwe w'iterabwoba wa FDLR ufatanyije n'ingabo za FARDC. Avuga ko yashimuswe amezi atandatu mbere yo guhunga, akajyanwa muri Teritwari ya Masisi, aho yasambanyijwe ku gahato n'abasirikare benshi bamushinja kuba Umututsikazi n'umugore wa bamwe muri M23.

Muri ayo mezi yose, Mwiza avuga ko yakorewe iyicarubozo rikabije, agasambanywa inshuro nyinshi, agahohoterwa bukomeye yaba ku mubiri no mu mutwe, kugeza ubwo yanduye Virusi itera Sida akanasigara afite ubumuga. Yashimutiwe hamwe n'umukobwa wa musaza we, ariko uwo mukobwa we ntiyarokotse kuko yaje kwicwa.

Amahirwe make yamugejeje kurokoka, ni uko umwe mu basirikare yamugiriye impuhwe amutorokesha, agahura n'ingabo za M23. Nyuma yaje guhungira mu Rwanda, agezwa mu Nkambi.

 

Source : https://kasukumedia.com/ubuhamya-bukomeye-bwuwahunze-amabi-ya-fdlr-na-fardc/