Author: webrwanda

Nk’uko tubicyesha ikinyamakuru The Sun cyo mu Bwongereza, ibi byabaye ejo kuwa Gatanu. Guillermo Beltran wakinaga nka rutahizamu mu ikipe ya Real Santa Cruz yo muri shampiyona y’icyiciro cya mbere mu gihugu cya Bolivia gihana imbibi ba Brazil muri Amerika y’Epfo, yabyutse bisanzwe ajya mu myitozo mu gitondo mu gihe ari gukinana na bagenzi be aza kwikubita hasi.

Abakinnyi ndetse n’abatoza bahise bashaka imbangukiragutabara ngo imujyane kwa muganga ariko bamugejejeyo basanga yapfuye maze nyuma aza gukorerwa isuzuma basanga yishwe n’ikibazo cy’umutima yari asanzwe arwaye.

Mu butumwa ikipe ye ya Real Santa Cruz yanyujije ku mbuga nkoranyambaga yagize iti: “Uyu munsi, saa moya n’igice, twabuze umukinnyi twakundaga, Guillermo Denis Beltran.

Turahamagarira cyane abafana bose kuza kwifatanya natwe mu gusezera bwa nyuma ku mukinnyi wacu, wasize ikimenyetso mu mitima yacu no mu mateka y’ikipe yacu. 

Yari inshuti yacu, mugenzi wacu kandi yari intangarugero kuri benshi. Ishyaka rye mu mukino n’umwuka we udashira bizakomeza kwibukwa no guhabwa agaciro iteka ryose.”

Ishyirahamwe ry’umupira w’amaguru muri Bolivia naryo ryifurije iruhuko ridashira uyu mukinnyi ndetse no ku mukino wa gicuti ikipe y’igihugu yakinnyemo na Algeria ejo kuwa Gatanu, abakinnyi bafashe umunota wo kumwibuka.

Guillermo Beltran waguye mu kibuga ari mu myitozo agahita apfa

Muri gahunda ya inyaRwanda, Ubuhanzi n'Imyidagaduro mu Turere, twageze mu Karere ka Rubavu tuganira na West uri mu bafite amakuru menshi kuri iyi ngingo mu Burengerazuba.

Uyu mugabo yagarutse ku rugendo rwe mu bushabitsi mu muziki, anavuga uko byamuhuje n'abafite aho bahuriye n'ubuhanzi, icyo byamumariye n’ibyo ateganya muri iki gice n'ibindi.

InyaRwanda: Gutegura ibirori n'ibitaramo hano bikorwa gute?

West: Bisaba kuba ufitanye imikoranire n'abafite imyidagaduro mu nshingano zabo aba mbere ni abahanzi, aba kabiri ni itangazamakuru kuko ni ryo riba rizi amakuru yo muri ka gace ugiye gukoreramo.

InyaRwanda: Dusubire inyuma gato winjiye gutse mu Bushabitsi?

West: Mu mwaka wa 2010 ni bwo natangije ahantu hitwa El Classico Beach, ngitangira ubu bucuruzi natangiye mbana n'abahanzi n'amatsinda yabo n'ubu kandi turacyakorana.

Nkorana na The Same Abiru, ni itsinda twatangiye dukorana banagize uruhare mu kugira ngo ndusheho gukunda imyidagaduro.

Hari kandi Selekta Daddy, DJ Willy, MC Isma, MC T Blaise, umukobwa witwa Cyntho Tremy na we turakorana cyane mu gutegura ibirori bibera hano.

InyaRwanda: Imbogamizi mwagiye muhura nazo mu kazi kanyu ni izihe?

West: Kuva natangira, COVID-19 niyo yankomereye cyane, ibintu by'utubari n'imyidagaduro byasubiye inyuma icyo gihe.

InyaRwanda: El Classico Beach rimaze kuba izina rigari ubikesha iki?

West: Umuntu nakoranye na we cyane ni Rocky Kimomo ni we muntu twakoranye bwa mbere ku buryo iri zina rya El Classico kugira ngo rigere aho rigeze arifiteho nka 80%, twarahuje dukorana mu buryo bw’akazi ariko 90% harimo ubucuti.

InyaRwanda: Imyaka ibaye 14 utangiye gukora umaze kugera kuki?

West: Nabashije kwitunga mu mafaranga nagiye nkorera, nabonye inshuti zikomeye, abana banjye biga neza, ndatuye mfite inzu, nambaye isaha y'igihumbi cy'idorali, impeta n'ibintu by’amabuye y'agaciro nacyo ni igishoro.

InyaRwanda: Ni iki ubona cyakorwa kugira ngo ubuhanzi n'imyidagaduro birusheho gutera imbere?

West: Wavuga ko hano bimeze neza ariko abantu bategura ibikorwa bikomeye by'imyidagaduro bakunze kwibanda mu mujyi wa Kigali, twifuza ko bajya bamanuka bakagera no mu Turere no mu Ntara.

InyaRwanda: Ni iki wabwira abahanzi bakizamuka?

West: Akenshi usanga abahanzi cyane abakiri bato batarazamuka ntabwo baba bari babona amafaranga ku buryo umuziki wabatunga kandi baba bafite nk'imyuga barize nko mu ishuri.

Yamara kuba umuhanzi akabita, akumva ko yaba umuhanzi gusa, inama nabagira ni uko waba umuhanzi ariko ufite akandi kantu ku ruhande kakwinjiriza.

InyaRwanda: Umwaka wa 2024 tukwitegeho iki?

West: Mu mpeshyi nteganya gukora ibitaramo bizajya biba birimo abahanzi b'i Kigali n’aba hano i Rubavu.

InyaRwanda: Inama waha urubyiruko by'umwihariko ruri mu buhanzi n'imyidagaduro

West: Bakomeza cyane ntagucika intege kuko igihe turimo imyidagaduro hari agaciro imaze kugira mu Rwanda no kuba dufite ubuyobozi bushyigikira imyidagaduro na ryo ni ishema.

Mu bihe bitandukanye West afasha abahanzi yaba mu buryo bwo kubategurira ibikorwa bibazamura ariko na none harimo n’abo areberera inyungu.

Benshi mu bahanzi bakorana na we mu bikorwa bitandukanye harimo nka Jay Polly yanifurije gukomeza kuruhukira mu mahoro.

Hari kandi Chris Eazy, Dany Nanone, Fireman, Bull Dogg ndetse mu bihe bitandukanye aha akazi abavanga umuziki binatuma hari ibihembo ahabwa kubera gushyigikira ubuhanzi n'imyidagaduro.

KANDA HANO UREBE UNUMVE IKIGANIRO TWAGIRANYE NA WEST

West yasabye abahanzi cyane abakizamuka guhuza umuziki n’ibindi bintu kuko byabafasha kurushaho gutera imbere Yavuze ko ntagucika intege ku rubyiruko ruri mu myidagaduro cyane ko ubuyobozi bw’igihugu bushyigikiye ibyo bakora Yagaragaje ko hakiri ibibazo byo kuba abategura ibikorwa bikomeye mu myidagaduro badakunze kugera no mu Turere asaba ko byakosorwa Abagenderera El Classico Beach bagira uburyo buborohereza gutembera mu Kiyaga cya KivuWest agira ibikorwa by’uburobyi ku buryo amafi acuruza ari ayo aba yirobeye akanagira n’amacumbi ku bifuza kurara i Rubavu

“Unyuza mu muriro nkagira ngo ushaka ko nshya, njyewe sinkamenye ko ugira ngo umpindure mushya, yewe n’iyo naba ndibwa ubuzima bukanga, sinari nzi ko biba ari uruganda unyuzamo ngo ubone uko wereka isi agaciro kanjye. Namenye ko ari byo bikwiye kwemera ubushake bwawe”. Antoinnette Rehema mu ndirimbo “Simaragido”. 

Mu kiganiro na inyaRwanda, Antoinnette Rehema yavuze ko indirimbo ye nshya yise “Simaagido” ibumbatiye amateka ye, “ibyo nanyuzemo bingoye cyane byagiye bituma nenda guhera umwuka, umutima wenda guhagarara!! Ariko Uwiteka mutabaje aranyumva arantabara mu gihe nta byiringiro nari nsigaranye!”. 

Uyu muramyi avuga ko yasenze abaza Imana impamvu y'ibimubabaza cyane kandi byikurikiranya, nk’uko nawe uyu munsi uri kubibaza Imana “mbabwa impamvu y'uko Uwiteka iyo ashaka kurema intwari ayinyuza mu bikomeye kugira ngo izakomeze n’abandi kandi ihinduke urugero rw'ubwiza bw'Imana”.

Aragira ati “Nayisoje mvuga ibyo Imana yakoze kuva cyera ubwo umutima wanjye wari ushengutse unaniwe ko byayihagurukije ikantabara kuko ndi uw’agaciro. Iri ni ishimwe mfite uyu munsi kuko imibabaro si iy’ibihe byose byanze bikunze ifite garantie! Igihe ntarengwa kirahari kuri buri wese”.

Antoinnette ukunzwe cyae mu ndirimbo yise “Kuboroga” aho atakambira Imana ngo itabare itorero, avuga ko iyi ndirimbo ye nshya ari ubuhamya butagomba kuba ubw’umuntu ku giti cye kuko burya abantu benshi bahuza amateka! Ati “Iyo tubisangije abandi utarabona ihumure burya ahita agarura ibyiringiro akongera kwizera kandi kwizera kurarema.”

Yasobanuye ko “Simaragido” ari rimwe mu mabuye y'agaciro risa n’umukororombya utatse intebe y'Imana Bibiliya ivugaho, ni ibuye risa neza ndetse rikorwamo iby’agaciro ryifuzwa na bose”. Arakomeza ati “Rero Iyo Imana yamaze kukugira mushya ikugira uw’agaciro gakomeye kurusha nayo mabuye yaremye ngo adufashe.”

Rehema avuga ko ntakuryama mu 2024 kuko afite ubutumwa bwinshi bwo gusangiza Itorero ry'Imana. Ati “Udakuye ibyawe muri Simaragido uzabikura mu yizayikurikira mu minsi mike iri imbere kuko mfite agaseke kandi karacyarimo byinshi. Rero ni umwaka tuzafatanyamo cyane mu guhumuriza imitima no kuyifasha kurushaho kwegerana n'Imana yacu.”

Rehema yasohoye indirimbo yavomye mu buzima busharira yanyuzemo

Nyuma ya “Kuboroga” yakunzwe, Rehema yamaze gushyira hanze indi yise “Simaragido”

Rehema yateguje indirimbo nyinshi muri uyu mwaka wa 2024

Antoinnette Rehema ari mu bahanzi bari gukora cyane mu muziki wa Gospel

Rayon Sports y’abagore yegukanye igikombe cya shampiyona y’icyiciro cya mbere mu bagore, ni nyuma yo gutsinda Muhazi United WFC 1-0.

Uyu munsi hakinwaga umunsi wa 21 wa shampiyona y’icyiciro cya mbere mu bagore, umunsi ubanziziriza uwa nyuma w’iyi shampiyona.

Umukino wagiye kuba Rayon Sports iyoboye urutonde ifite amanota 55, AS Kigali ya kabiri ifite 48 ariko yo isigaje imikino 3.

Byari bivuze ko AS Kigali itsinze imikino yose isigaje yari kuzagira amanota 57, Rayon Sports ikaba yasabwaga gutsinda umukino wa Muhazi United kuko yari kugira 58, amanota AS Kigali itazageza ni yo Rayon yatsindwa umukino usoza.

Rayon Sports yari yamanutse mu Burasirazuba bw’u Rwanda gusura Muhazi United, ikaba yaje kubigeraho nyuma yo gutsinda iyi kipe 1-0 cya Mukandayisenga Jeannine ku munota wa 66.

Rayon Sports yakinaga umwaka wa yo wa mbere mu cyiciro cya mbere, ikaba yegukanye igikombe cya mbere cya shampiyona y’icyiciro cya mbere. Ni igikombe cya kabiri cya shampiyona yegukanye kuko yazamutse mu cyiciro cya mbere itwaye igikombe shampiyona y’icyiciro cya kabiri.

Indi mikino yabaye Inyemera yanganyije na Bugesera, AS Kigali yatsinze ES Mutunda 2-0, Indangaharwa yanganyije na Freedom 1-1, Fatima yatsinze Rambura 4-0.

Rayon Sports yegukanye shampiyona y’icyiciro cya mbere mu bagore

Zari Hassan wabyaranye na Diamond Platnumz yavuze ko umuhungu wa Hamisa Mobetto yabyaranye na n’uyu muhanzi atazi niba ari byo kuko nta rimwe yigeze abimubwiraho.

Ni nyuma y’uko yari abajijwe impamvu abana be yabyaranye na Diamond Platnumz batajya bagaragara bari kumwe n’umuvandimwe wa bo, umuhungu yabyaranye na Hamisa Mobetto.

Zari yavuze ko we yaretse Diamond Platnumz akaba ari we uzabihuriza kuruta ko uko we yabikora cyane ko we atanabizi.

Ati “Diamond ku giti cye ni we uzabisobanura niba uriya mwana ari uwe cyangwa atari uwe, ariko njye ntabyo nzi.”

Yavuze ko we namubwira ko umwana ari uwe ndetse ko yifuza ko amenyana n’abasigaye azamwakirana yombi.

Ati “Nambwira ngo uyu ni umwana wanjye ndashaka ko amenyana n’abandi, nzamuha ikaze, nta kintu na kimwe arambwira rero ntabyo nzi.”

Mobetto mu minsi ishize ubwo yari abajijwe kuri iki kibazo, yavuze ko nta kintu yakivugaho ku bw’umutekano w’umwana we bigendanye n’imyaka afite.

Umuhungu wa Mobetto na Diamond, Dylan yavutse ubwo uyu muhanzi yabanaga na Zari Hassan banafitanye abana babiri.

Gusa kuva yavuka ntabwo Diamond yigeze amufata nk’umwana we aho na nyina yagiye yumvikana kenshi avuga ko atari umwuzukuru we.

Diamond ntajya yikoza uyu muhungu yabyaranye na Hamisa Mobetto

Zari Hassan ngo umunsi Diamond yamubwiye ko ari umwana we azamwakira ahure n’abavandimwe be

Kuwa Gatanu Tariki 22 Werurwe 2024, Abanyeshuri 150 biga mu bigo birindwi biga mu mashuri abanza bajyanwe mu mavuriro atandukanye mu karere ka Nyagatare, nyuma gufatwa no kuruka no guhitwa bakaba bakeka ko bazize amata banyweye ku bigo bigaho.

Ababyeyi bo mu karere ka Nyagatare baganiriye na InyaRwanda.com, bavuga ko abana babo nyuma yo kunywa amata bakeka ko yari ahumanyijwe bafashwe n’uburwayi.

Ibi byatumye bajyanwa ku kigo Nderabuzima cya Cyabayaga ndetse n’icya Nyagatare ndetse abagera kuri 18 bagaragazaga ko barembye bajyanwe mu bitaro by’Akarere ka Nyagatare kugira ngo bitabweho n’abaganga.

Umuyobozi w’Akarere ka Nyagatare, Gasana Stephen, yemeje ko abana 150 bajyanwe kuvurirwa ku bigo Nderabuzima bibiri n’ibitaro by’Akarere ka Nyagatare ariko ahamya ko abana bajyanwe kuvurwa biga mu bigo birindwi.

Meya Gasana yakomeje avuga ko ibivugwa ko abo bana bazize amata yahumanyijwe bagemuriwe n’ikusanyirizo rya Bugaragara bitahabwa agaciro kuko hataramenyekana impamvu yatumye batwara. Avuga ko ikusanyirizo ry’amata rya Nyagatare rigemurira ibigo by’amashuri 39 ariko abajyanwe ku mavuriro biga mu bigo 7 gusa.

Perezida wa Rayon Sports, Uwayezu Jean Fidèle yavuze ko kugeza ubu atakwemeza niba aziyamamariza kongera kuyobora iyi kipe cyangwa atazabikora kuko bitari mu biganza bye.

Uyu muyobozi w’imyaka 58 uri ku mpera za manda ye y’imyaka 4 yatorewe mu Kwakira 2020, avuga ko we ubu ikimuraje ishinga ari ukubanza gusoza manda ye.

Yabitangaje nyuma y’umwiherero ubuyobozi bw’iyi kipe bwagiranye n’ubwa Skol ku wa Kane w’iki cyumweru bareba aho umwaka w’imikino ugeze ndetse n’uko bakwitegura umwaka utaha.

Yagize ati 'Icyo ndwana na cyo ni ukurangiza manda, ibindi ntabwo nabimenya. Kubera ko muri njye nzaba ndangije manda, ikiri mu mutwe nwanjye ni ugutoresha tugatora undi kuko manda izaba irangiye, uwo ninjye.”

Gusa yakomeje avuga ko nta bushobozi afite bwo kubyemeza cyangwa kubihakana ko uruhare runini ruri mu biganza by’Abarayon ndetse n’uko azaba yiyumva muri icyo gihe.

Ati 'Mu buzima ariko ntabwo twigenga, abakunzi bashobora kumbwira ngo perezida tubabarire dufashe wenda dukorere umwaka umwe cyangwa ibiri. Nkareba nkanasanga birashoboka, nshobora kureba nkasanga ariko nabishakaga ariko ubuzima cyangwa iki biratuma ntakora, ubu si nakubwira ngo ni uku bizagenda.”

Ku ngoma ye, Rayon Sports yegukanye ibikombe 3 Icy’Amahoro, Super Cup na RNIT Savings Cup ni mu gihe mu bagore begukanye igikombe cya shampiyona y’abagore mu cyiciro cya kabiri.

Uyu mwaka birashoboka ko yakongeraho ibindi 3 kuko Rayon Sports y’abagore itsinze umukino w’uyu munsi yahita yegukana shampiyona y’icyiciro cya mbere ni mu gihe ikiri no mu gikombe cy’Amahoro. Mu bagabo ubu basigaye mu gikombe cy’Amahoro aho bageze muri 1/2.

Perezida wa Rayon Sports yavuze ko atakwemeza niba azongera kwiyamamariza kuyobora Rayon Sports

Nk'uko bigaragaza muri raporo yashyizwe ahagaragara na Banki y'Isi muri uyu mwaka, Niger, Senegal n'u Rwanda, biri mu bihugu biri ku isonga mu kugira ubukungu buri kwihuta cyane mu 2024. Ni mu gihe ubukungu bw'u Rwanda bwazamutse ku kigero cya 8% mu myaka ya 2021-2023.

Hashingiwe ku byagzweho mu myaka ishize, biragaragaraza neza ko Afurika izarushaho kwaguka cyane mu birebana n'ubukungu muri uyu mwaka. Uyu mugabane ukomeje gutera intambwe ikomeje mu kugira ubukungu buri kwihuta cyane ndetse ukomeje no gutera imbere mu ikoranabuhanga hatitawe ku kuba utuwe n'abaturage bacye.Kugeza ubu, Aziya yonyine niyo ifite ubukungu bwihuta cyane kurusha Afurika.

Igihamya ko Afurika ikomeje kugendera ku muvuduko uri hejuru, ni uko ku rutonde rw'ibihugu 20 biri kwihuta cyane mu bukungu umugabane wa Afurika ariwo ufiteho ibihugu byinshi bigera kuri 11 byose.

Raporo ivuga ko hejuru ya 50% by’ibihugu 20 bya mbere kuri uru rutonde ari ibyo muri Afurika. Iyi raporo ikomeza igira iti: “Muri rusange, umusaruro rusange w'imbere mu gihugu (GDP) w'uyu mugabane, uteganijwe kuzamuka ku kigero cya 3.8% na 4.2% muri 2024 na 2025. Ibi birenze ibipimo byateganijwe ku isi bingana na 2,9% na 3.2% '.

Raporo ivuga ko nubwo Afurika yagize umuvuduko muke mu 2023, uyu mwaka amateka agiye guhinduka bijyanye n'uko ibihugu bigize uyu mugabane bikomeje guhuriza hamwe imbaraga mu nzira y'amajyambere.

Dore ibihugu 10 bya mbere byo muri Afurika biza mu myanya y'imbere ku rutonde rw'ibihugu bifite ubukungu bwihuta cyane muri 2024:

1. Niger – 11.2%

2. Senegal – 8.2%

3. Libya – 7.9%

4. Rwanda – 7.2%

5. Côte d’Ivoire – 6.8%

6. Ethiopia – 6.7%

7. Benin – 6.4%

8. Djibouti – 6.2%

9. Tanzania – 6.1%

10. Togo – 6%

Uri ruri mu bihugu 10 byo muri Afurika biri kugendera ku muvuduko uri hejuru mu bijyanye n’ubukungu mu 2024