Author: webrwanda

Perezida wa Repubulika y’u Rwanda, Nyakubahwa Paul Kagame na Madame Jeannette Kagame bitabiriye igitaramo ‘Inkuru ya 30’ cyahuje ibihumbi by’abantu cyateguwe n’Itorero Inyamibwa.

Ni igitaramo cyabaye mu ijoro ryo ku wa 23 Werurwe 2024 muri Kigali Arena.

Ubundi igitaramo mu mu Rwanda gifite amateka akomeye. Dushingiye ku muco Nyarwanda habaho amako y’ibitaramo 5 ari byo; Igitaramo cy’Umuryango, icy’Umuganura, icy’Imihigo, icy’uburere mboneragihugu n’Igitaramo Nyizihizangoma ari na cyo Inyamibwa zataramiyemo Abanyarwanda. Gusa byose bigahurira ku kuba bibumbatiye umuco Nyarwanda.

Iki gitaramo cyari cyitezwe na benshi, uretse Perezida Kagame na Madame Jeannette Kagame, kitabiriwe n’abandi bayobozi bakomeye mu nzego z’igihugu nk’Umunyamabanga wa Leta muri Minisiteri y’Urubyiruko n’Ubuhanzi, Umutoni Sandrine, Minisitiri w’Ubumwe bw’Abanyarwanda, Dr Jean-Damascène Bizimana, Umuyobozi w’Urwego Ngishwanama rw’Inararibonye z’u Rwanda, Tito Rutaremera n’Umuvugizi Wungirije w’Ingabo z’u Rwanda, Lt Col Simon Kabera n’abandi.

Iki gitaramo cy’amateka cyahuje isinzi y’abantu, cyateguwe n’Itorero Inyamibwa AERG mu rwego rwo kwizihiza no kuzirikana ibyo u Rwanda rwagezeho mu myaka 30 rumaze rwibohoye nk’uko byasobanuwe na Rusagara Rodrigue ushinzwe gukurikirana ibikorwa by’iri torero.

Ati “Buri Munyarwanda wese muri iyi myaka 30 afite inkuru yabara, hari aho Igihugu cyacu kigeze ndetse hari ibikorwa byinshi twishimira byagezweho nyuma ya Jenoside yakorewe Abatutsi.'

Iki gitaramo cyatibiriwe n’abiganjemo urubyiruko n’abandi bakunda imbyino gakondo, cyarimo imikino itandukanye, imbyino, indirimbo zose gakondo zijyanye n’umuco Nyarwanda.

Iri torero ryashingiwe muri Kaminuza y’u Rwanda mu 1998 mu rwego rwo kwikura mu bwigunge no kwiteza imbere, ryaherukaga gukora igitaramo ‘Urwejeje Imana’ nacyo kitabiriwe n’abantu benshi aho cyabaye muri 2023 muri Camp Kigali.

Saa 19h30′ ni bwo umushyushyarugamba (MC) Lion Imanzi yageze ku rubyiniro aho yahise yakira umuhanzi Iradukunda Yves [Impakanizi] usanzwe ubarizwa mu Itorero Ibihame, mbere yo kuva ku rubyiniro yaririmbye ‘Gusakara’ ya Yvan Buravan mu rwego rwo kumwunamira.

Saa mbili hafi n’iminota 40, Itorero Inyamibwa ryakiriwe ku rubyiniro binjiriye mu murishyo w’ingoma n’inanga iherekejwe n’amajwi yumvikanisha uko byagiye bisimburana mu buzima bw’Abanyarwanda kugeza aho umunyarwanda ariho atewe ishema no kwitwa umunyarwanda n’ubwo ubuzima butari bworoshye mbere ya 1994.

Iyi ndirimbo bateye kandi yumvikanisha uko Abanyarwanda batari bemerewe kuba mu gihugu cy’abo mu mudendezo bari baherereyemo mbere y’uko u Rwanda rubuhorwa.

Hakurikiyeho umukino w’umusaza n’umwuzukuru we. Uyu mwana yabazaga Sekuru impamvu baheze ishyanga, akamubaza impamvu badataha mu Rwanda. Sekuru yamubwiraga ko bisaba 'Intwari’ ariko kandi birashoboka ko bataha mu Rwanda.

Umwana yabazaga amateka y’u Rwanda, uko u Rwanda rumeze, Sekuru nawe akamubwira ubwiza bw’ u Rwanda akamusezeranya ko bazataha vuba.

Uyu mukino wakurikiwe n’indirimbo ‘Iya 1 Ukwakira’ yumvikanamo Ubutwari bw’Inkotanyi zabohoye igihugu ari na zo zayihimbye aho hanumvikanamo uduce zari zimaze gufata nka Ruhengeri, Kagituma, Umutara, Gatanu, i Burunga n’ahandi.

Nyuma y’iyi ndirimbo 'Iya Mbere Ukwakira’, bakurikijeho umuhamirizo w’Intore, Umutahano, Intagishyika, Ikotaniro ndetse no kwiyereka mu Ikondera.

Hakurikiyeho kandi Umusizi akaba n’umukinnyi wa filime, Rudahigwa Emmanuel ‘Rugaba’ wamamaye muri filime 'Papa Sava’, aho yakoze mu nganzo ashimira Perezida Kagame uburyo u Rwanda rwateye imbere kubera we, asaba Abanyarwanda kuzagira uruhare mu matora ya Perezida wa Repubulika azaba muri Nyakanga 2024.

Inyamibwa zakomeje gususurutsa abantu bagenze ku Ndirimbo ‘Ndandambara’ ya Nsabimana Léonard yamamaye mu buryo bukomeye mu gihe cy’amatora ya Perezida Kagame, abantu bari muri Kigali Arena bayishimiye mu buryo bukomeye.

Saa 23h39′ ni bwo iri torero Inyamibwa ryashyize akadomo kuri iki gitaramo cyanyuze benshi bamwe bagataha batabishaka. Bagisoje mu ndirimbo nka 'Rwanda uri nziza’, 'Kigali uteye neza kandi utatse ibyiza’, Imihigo y’imfura’ ndetse na 'Reka ndate ubutwari bw’inkotanyi’.

Bruce Melodie uvuga ko akora ibintu yihuse kandi bitamubuza kumva abagenda gacye, yishimira ko yabashije guhabwa umwanya kuri televiziyo yo muri Leta Zunze Ubumwe za Amerika.

Avuga ko yishimira kandi kubona ibyo arimo gukora byose abikora ku bwo gukomeza kurushaho gutera ishema igihugu ndetse akishimira uburyo yakirwa aho ageze hose.

Bruce Melodie avuga ko yasanze muri Amerika bafite umuco wo hejuru wo gushyigikira ubuhanzi kandi iyo bakwishimiye barabikwereka bakanagufasha muri byose harimo kugura ibikorwa byawo no kwitabira ibirori n'ibitaramo wategura.

Avuga yatunguwe n’uko ibinyamakuru byo hanze bikora aho bikoresha imbaraga nyinshi kandi bikaba bigoye kubona iminota myinshi mu kiganiro. Ati: 'Mbambona nkeneye akandi gahe gato ariko nkabona na ba Obama iyo baje bakora iminota itanu.'

Ku birebana n’abantu bavuga ko atari we utumirwa, hatumirwa Shaggy, we agaherekeza, Bruce yavuze ko ababivuga bibeshya kuko indirimbo ari iye. Ati: 'Tuza hano twembi kuko bidufitiye akamaro.'

Melodie kandi yagaragaje ko umuziki awubonera mu kugira abo mukorana beza bikanajyana n'urukundo n'amarangamutima kurusha amafaranga n’ubwo yerekana ko kumenyekanisha ibyo ukora bihenze byikubye gukora indirimbo.

Mu byo yigiye kuri Sean Paul na Shaggy ni uko adakwiye gushyira imbaraga mu gushaka gukorana n'abahanzi bakomeye ahubwo yanakorana n’aboroheje ariko agashyira imbara mu gushakira isoko ibyo bakoze.

Yagarutse ku buryo yigeze kuregwa na Super Level imusaba za Miliyoni, avuga isomo yabikuyemo. Ati: 'Nagiye mu rukiko bwa mbere mfite imyaka 21 bandega miliyoni 18Frw muri 2014 uwo muntu wandeze nari nzi ko anyishe ariko yaranyigishije.'

Bruce Melodie yavuze kandi ku muzingo yitegura gushyira hanze agaragaza ko hari indirimbo zigera kuri 90, bakaza gukuramo 32, ariko 17 akaba ari zo zizajya hanze. Yavuze ko 10 muri zo bamaze kuzemeza bigoranye ariko izindi 7 bikomeje kuba ingorabahizi.

Aha ni naho yahereye avuga ko yiteguye muri Gicurasi gushyira hanze indirimbo nshya yitwa “Soweto” izafatirwa amashusho muri Nigeria aho avuga ko hari ibikoresho bihagije byafasha mu gufata amashusho meza.

Bruce Melodie afite gahunda yo gukora kandi uruhererekane rw'ibitaramo mu Rwanda, muri Afurika y'Iburasirazuba, Amerika n'u Burayi.

Nk’uko yabisobanuye yifuza kuzabikora amaze gushyira hanze uyu muzingo. Aragira ati: 'Sinifuza gutangira uruhererekane rw'ibitaramo byanjye ntarasohora Album.'

Mu gusoza Bruce Melodie yakomoje ku biraka binyuranye yanze kwitabira bizaba mu kwezi kwa Karindwi, abyanga ku bw'igihugu cy’u Rwanda. Muri ibyo biraka harimo nk’ibyo muri Dubai.

Melodie ati: 'Mu kwa Karindwi ngomba kuba ndi mu Rwanda nta mpamvu n’imwe, nta na gahunda n’imwe nshobora gushyira aho hantu kubera ko nzi ko igihugu kinkeneye ngomba kuba mpari.'

Ukwezi kwa Nyakanga 2024 ni ko guteganijwemo amatora y'Umukuru w'Igihugu mu Rwanda aho igengabihe yashyizwe hanze igaragaza ko tariki ya 14 hazatora ababa hanze y'igihugu naho 15 ukaba umunsi w'ubukwe nyamukuru ku baba mu gihugu nk’uko abanyarwanda bafata amatora.

Bruce Melodie yagarutse kandi ku kuba bagiye gushora amafaranga mu bucuruzi bukomeye we yita karahabutaka. Aragira ati: 'Umuntu uzabona uyu mushinga azamenye ko amafaranga agiye gukwira mu bafana.'

Wumvise neza aya magambo hamwe no kuvuga ati: 'Ni ahantu heza rata washyira ibintu byawe ukaba wizeye umutekano', wumva ari ugushinga ikigo cy'imari [Banki].

Bruce Melodie na Coach Gael bahuriye muri kompanyi batifuza kuvuga izina iri kubaka Kigali Universe ikaba ari nayo yashoye muri UGB ikipe y’umukino wa BasketballBruce Melodie yavuze ko amaze kwiyungura ubumenyi ku birebana n’umuziki mu gihe amaze muri Amerika aho yasobanukiwe ko adakeneye cyane gukorana n’abahanzi barenze icyo akeneye ari ukumenyekanisha cyane ibyo akoraYavuze ko adashobora gufata ikiraka icyo ari cyo cyose muri Nyakanga 2024 kubera ibikorwa by’amatora biteganijwe muri uku kwezi bityo agomba kuzaba ari mu Rwanda Yavuze ko yishimiye kubona intambwe Amerika yagezeho mu gushyigikira abahanzi 

KURIKIRANA UKO IKI GITARAMO CY'ITORERO INYAMIBWA KIRI KUGENDA

Saa 21: 45': Baririmbye indirimbo 'Iwacu' y'umunyabigwi mu muziki w'u Rwanda, Cecile Kayirebwa.

Bayiririmbye bagaragaza amashusho y'imisozi myiza itatu ihagaragariye Abanyarwanda baturutse amahanga yose bari kuyinyuramo bataha nk'ikimenyetso cy'intsinzi y'Inkotanyi mu kubohora u Rwanda, intore zose zari ku rubyiniro zigaragiye ya misozi yose.

Saa 21: 29': Iya mbere Ukwakira

Baririmbye iyi ndirimbo banerekana ikarita y'u Rwanda n'Abasirikare bayizengurutse bari gupanga urugamba rwo kubohora u Rwanda. Iri mu ndirimbo zamamaye cyane, kuko igaruka ku rugamba.

Iyi ndirimbo yahimbwe n'inkotanyi bavuga ko iyo tariki aribwo binjiye. Ubwo binjiye ingabo za mouvoma (Ubwo bavugaga ingabo za kera) ko zababonye zigahunga; Habyarimana agahamagaza amahanga bakaza n’abo bakabatsinda.

Muri rusange ni indirimbo yo kwirata ubutwari. Hari aho baririmba bati ‘Iya mbere ukwakira ku wa 90, twarose inzozi nziza ko tugiye kwambuka, mu gitondo cya mbere twari dusesekaye ntawadukomeye imbere, oye Nkotanyi.”

Bavugamo uduce bari bamaze gufata nka Ruhengeri, Kagituma, Umutara, Gatanu, i Burunga n’ahandi.

Nyuma y'iyi ndirimbo 'Iya Mbere Ukwakira', bakurikijeho umuhamirizo w'intore, umutahano, intagishyika, ikotaniro ndetse no kwiyereka mu ikondera.

Urugamba rwo kubohora Igihugu rwaranzwe n'ubwitange bw'Ingano zari iza RPA, uruhare rw'Abanyarwannda bari mu mahanga, imbere mu gihugu n'ahandi kugeza ubwo Ingabo zibashije gutsinda urugamba.

Mu rugendo rw'urugamba, Ingabo za RPA zagiye zihimba indirimbo zabafashije mu kwishakamo 'Morale', ndetse amatorero nk'Isamaza, Indahemuka n'abandi babarizwaga mu Bubiligi bahimba indirimbo zabaye iz'ibihe byose.

Saa 21: 25': Inyamibwa zinjiye mu mukino w'umusaza n'umwuzukuru we. Uyu mwana yabazaga Sekuru impamvu baheze ishyanga, akamubaza impamvu badataha mu Rwanda. Sekuru yamubwiraga ko bisaba 'Intwari' ariko kandi birashoboka ko bataha mu Rwanda.

Umwana yabazaga amateka y'u Rwanda uko u Rwanda rumeze, Sekuru nawe akamubwira ubwiza bw' u Rwanda akamusezeranya ko bazataha vuba.

-Mu 2023 iri torero ryakoze igitaramo bise 'Urwejeje Imana' cyatanze ibyishimo ku mubare munini. Bizihirijemo isabukuru y'imyaka 25 yari ishize ishushanya urugendo rw'iterambere bagezeho n'iyaguka mu bijyanye no guteza imbere umuco binyuze mu mbyino n’indirimbo.

Iri torero ribarizwamo abantu bazwi nka Muvunyi Ange Nina ukina muri Indoto ari 'Mimi', Umuratwa Kethia Anitha wabaye Miss Supranational 2021, Teta Ndenga Nicole wabaye 'Miss Heritage' muri Miss Rwanda 2020, Musoni Kevine wageze mu bakobwa bavuyemo Miss Rwanda 2022.

Abarimo Muyango Jean Marie, Muyoboke Alex, Angel&Pamella, Aimable Twahirwa, Mutesi Scovia bitabiriye iki gitaramo cyashushanyije imyaka 30 ishize u Rwanda rwibohoye 

Akanyamuneza kari kose ku bitabiriye iki gitaramo cyihariye mu muco w’u Rwanda

Saa 21: 02':Abagize Itorero Inyamibwa bagize bati 'Turi Inyamibwa z'u Rwanda, Dore abakobwa, Dore abahungu. Iyi ni inkuru ya 30.'

Bifashishije umurya w'inanga, babaze inkuru y'ubuzima bugoye Abanyarwanda banyuze mu gihe cy'ubuhunzi, ariko ko umutima wateraga utekereza ku gihugu cy'abo.

Saa 20: 35: Itorero Inyamibwa ryakiriwe ku rubyiniro binjiriye mu murishyo w'ingoma n'inanga iherekejwe n'amajwi yumvikanisha uko byagiye bisimburana mu buzima bw'Abanyarwanda kugeza aho umunyarwanda ariho atewe ishema no kwitwa umunyarwanda n'ubwo ubuzima butari bworoshye mbere ya 1994.

Iyi ndirimbo bateye kandi yumvikanisha uko Abanyarwanda batari bemerewe kuba mu gihugu cy'abo mu mudendezo bari baherereyemo mbere y'uko u Rwanda rubuhorwa.

Inyamibwa bati 'Ikaze mu gitaramo cy'Itorero Inyamibwa…. Inkotanyi zatubereye umubyeyi, imyaka 30 ishize n'iyo gushimira inkotanyi, iyi ndirimbo ya kabiri twayise 'iyo ni inkuru'.

Saaa: 30: Perezida Kagame na Madamu Jeannette Kagame bageze muri BK Arena, bakiranywa ibyishimo n'ibihumbi by'abantu, maze Umukuru w’Igihugu nawe arabasuhuza.

Umushyushyarugamba Mc Lion Imanzi ahuje amajwi n'abitabiriye iki gitaramo, bashimye Perezida Kagame ku kuyobora urugamba rwagejeje Abanyarwanda ku ntsinzi.

Lion Imanzi ati 'Inkuru ya 30 ntiyari kuba yuzuye, iyo umubyeyi wagize uruhare ataza ngo twifatanye, reka tumushimire Nyakubahwa Perezida Kagame na Madamu Jeannette baje kwifatanya natwe.' Abitabiriye iki gitaramo bahanitse amajwi bati 'Ni wowe, Ni wowe, Ni wowe…'

Saa 20: 00': Umuhanzi Impakanizi yunamiye Yvan Buravan

Uyu muhanzi Iradukunda Yves [Impakanizi] usanzwe ubarizwa mu Itorero Ibihame niwe wafunguye ku mugaragaro iki gitaramo. Yatangiriye mu murishyo w'ingoma, maze abantu barizihirwa.

Yakunze kugaragara cyane mu bitaramo byubakiye kuri gakondo. Mbere yo kuva ku rubyiniro yaririmbye indirimbo yitwa 'Gusakaara' mu rwego kunamirwa Buravan.

Impakanizi yavuze ko Buravan yari inshuti ye, kandi ari ngombwa kwizihiza ubuzima bwe. Ati 'Natangiye mbabwira ko muri beza ariko ntabwo nibeshye. Ngiye kubasangiza igihangano cy’umwe mu nshuti zanjye ntagifite ubu ngubu, ariko twigeze, nibaza ko buri wese uri hano aramuzi, mumfashe dutaramane. Ni Yvan Buravan.'

Saa 19: 30': Umushyushyarugamba Lion Imanzi watangije iki gitaramo, yumvikanishije ko cyateguwe mu rwego rwo kwizihiza imyaka 30 ishize ‘u Rwanda rwibohoye’.

Yavuze ko ubuyobozi bw'Inyamibwa bushimira buri wese witabiriye gufatanya n'abo kwizihiza iyi myaka 30 ishize u Rwanda ruvuye habi.

Ati “Ndashimira buri wese witabiriye iki gitaramo. Ni ukugaragaza urugendo rw’imyaka 30 ishize. Ni imyaka 30 ishize, u Rwanda rwihoboye, kandi igaragaza ko buri munyarwanda wese akwiriye Igihugu.”

Yavuze ko iyo yivuga yisanisha n'igisobanuro cy'izina 'Lion' (Intare). Akomeza ati “Ni Lion Imanzi, Intare y’ishyamba, indangagaciro zose z’ubumanzi, ni intare idasanzwe, reka dutangirane n’igikorwa cyaduhurije hamwe. Tugiye kubaha icyo urubyiruko rwita ‘show’. Tuje gutaramana bya Kinyarwanda, abafana ba gakondo muri he? Amajwi yanyu ntabwo ndi kuyumva. Mwihe amashyi y’uburambe (kuramba). Uri umunyarwanda ntiwakifuza kuva kuri iyi si vuba.”

Saa 19: 00': Imvura yaguye mu bice bitandukanye by'Umujyi wa Kigali, ariko ntibyabujije bamwe mu bantu gutangira kuhagera bifashishije ibinyabiziga binyuranye.

Imvura yamaze igihe kitari gito, ariko abari imbere muri BK Arena bumvaga indirimbo zinyuranye z'abahanzi bo hambere baririmba barata u Rwanda n'izindi zagarukaga ku buzima busanzwe.

Saa 17:00: Ab'inkwakuzi bari batangiye kugera muri BK Arena biteguye kwihera ijisho iki gitaramo cyihariye kuri gakondo y'Abanyarwanda.

Ni kimwe mu bitaramo bimaze igihe byamamazwa! Cyabaye kuri wa Gatandatu tariki 23 Werurwe 2024 mu nyubako y'imyidagaduro ya BK Arena. Ni ubwa mbere Itorero gakondo rigiye gukorera igitaramo muri iriya nyubako, ikodeshwa arenga Miliyoni 24 Frw ku munsi umwe.

Mu bihe bitandukanye abahanzi nyarwanda bagiye bayitaramiramo mu bitaramo bagiye bahuriramo n'abandi, no ku banyamahanga ni uko byagenze!

Iri torero rizwi cyane mu guteza imbere umuco. Ryifashishwa cyane mu bukwe no mu bindi birori n’ibitaramo bitsimbataza umuco w’u Rwanda.

Kubyina mu bukwe ni agace kamwe k’ibyo bakora. Ni ababyinnyi ba Kinyarwanda babigize umwuga, baririmba, babyina, amazina y’inka, bakaraza n’ibindi byose bijyanye n’imbyino Nyarwanda.

Inyamibwa ni itorero ryashinzwe n’abanyeshuri bacitse ku icumu rya Jenoside yakorewe Abatutsi mu 1994, rishingwa n’abanyeshuri bo mu cyahoze ari Kaminuza y’u Rwanda.

Intego ya mbere y’iri torero kwari ukwikura mu bwigunge. Ni intego yakuze, iva mu kubyina hagati yabo, ahubwo igera no ku kwizihiza abandi babareba, kugera aho bizihiza ibirori ku rwego rw'Isi- Ibi bisobanuye ko bakuze cyane.

Ibikorwa bifatika Itorero Inyamibwa ryagezeho:

Iri torero ryashinzwe mu mwaka wa 1998. Rusagara avuga ko kuva icyo gihe kugeza n’uyu munsi ‘twafashije abanyeshuri bacitse ku icumu rya Jenoside kuva mu bwigunge’.

Avuga kandi ko kuva icyo gihe bateje imbere umuco, bafasha abari bifite impano yo kubyina kuyisobanukirwa no kuyigaragaza. Ati “Abari bafite impano twarayizamuye.”

Rusagara avuga ko imyaka ishize 26 ishize bafashije ababyinnyi babo mu mibereho. Ati “Bivuze ngo iyo tubyinnye, duserutse ahantu, tugatanga amafaranga, ni ugufasha abantu mu mibereho ariko binjiza.”

Ikindi ni uko batanze icumbi ku bantu. Yavuze ko bafite inzu y’itorero aho umubyinnyi wese atajya abura aho.

Ikindi bishimira muri iyi myaka, ni uko batembereje abantu imahanga kandi bimakaza umuco Nyarwanda.

Urufatiro rw'itorero Inyamibwa mu gihe cy'imyaka 26 ishize:

Ingero ni nyinshi z'amwe mu matorero yo mu Rwanda yagiye ashingwa ariko mu gihe kitari kinini agacikamo ibice, igice kimwe kigatangira kwikorana.

Umuyobozi ushinzwe gukurikirana ibikorwa by’Itorero Inyamibwa, Rusagara Rodrigue, aherutse kubwira InyaRwanda ko imyaka 26 ishize Inyamibwa igishinze imizi bitewe n'impamvu ikomeye iri torero rishingiyeho. Ati “Impamvu yo kubaho iruta impamvu y’abantu bashobora kutumvikana ku kintu.'

Arakomeza ati 'Impamvu rero cyangwa se umusingi w’icyatumye dukora cyangwa se abatangije Itorero Inyamibwa, ni yo ituma dukomeza. Ntabwo rero twebwe duhungabanywa n’ibibazo cyangwa se n’ibigeragezo byahuye bivuye ku mpamvu z’umuntu umwe, babiri cyangwa batatu bahuriye hamwe…'

Uyu muyobozi avuga ko nta muntu ‘uva mu Inyamibwa kuko ibikorwa byacu haba ari mu itorero no hanze y’itorero ari inyamibwa’

Yavuze ko bagire uruhongore rw'Inyamibwa (Abakiri bato) n'Inyamibwa bakibyina ndetse n'Inyamibwa Nkuru (abakuze).

Perezida Kagame ku gisobanuro cy'imyaka 30 ishize u Rwanda rwibohoye:

Mu nama y'Igihugu y'Umushyikirano yabereye muri Kigali Convention Center, tariki 23-24 Mutarama 2024, Perezida Kagame yavuze ko imyaka 30 ishize u Rwanda rwibohoye ifite igisobanuro cy'ibintu bibiri; ibyago bya Jenoside yakorewe Abatutsi mu 1994 ndetse n'Igihugu guhinduka kikaba Igihugu kindi Abanyarwanda bakwiye kitari ikijyanye n'ayo mateka bibuka.

Ati “Imyaka 30 irimo ibintu bibiri: Irimo ibyo byago ariko irimo n’igihugu guhinduka kikaba igihugu kindi dukwiye, kitari ikijyanye n’ayo mateka nayo twibuka”.

Yavuze ko muri ibyo bigenda bihinduka mu rugendo rw’iterambere ry’u Rwanda n’ubuzima bw’abantu n’imiterere y’Igihugu’ bijyanye n’ukuntu ibisekuru bisimburana. Yavuze ko abagejeje imyaka 30 ingana n’iyo u Rwanda rumaze ‘igihugu kibitezeho guhindura igihugu neza’.

Umukuru w’Igihugu yavuze ko abagejeje iriya myaka bafite uko barezwe n’imiryango ndetse n’uburyo igihugu cyabareze mu bijyanye na Politiki.

Ati 'Byose rero biri kuri bo, imyifatire yabo, imyumvire y'inshingano bafite no kumva ko Igihugu ari bo kireba mu myaka yindi 30 iri imbere yacu, bafite uruhare runini mu guhindura ubuzima bw'Abanyarwanda kurusha ndetse uko twebwe twabigenje.'

Yabwiye abakiri bato ko uburere bahawe, bibaha impamvu yo kurwanirira igihugu no kumva ko igihugu aribo kireba.

Ati “Bafite uruhare runini mu guhindura’ ubuzima bw’abanyarwanda, kurusha ndetse batwebwe uko twabigenje… Urwo rubyiruko cyane cyane nibo mbwira. Mugomba kumva uburemere bw’inshingano zanyu nk’abanyagihugu, nk’abantu bakwiriye kuba abantu bazima, biyubaka, bakubaka imiryango yabo, bakubaka n’igihugu.”

Impamvu y'iki gitaramo 'Inkuru ya 30' cy'Itorero Inyamibwa

Umuyobozi Ushinzwe gukurikirana ibikorwa by’Itorero Inyamibwa, Rusagara Rodrigue, asobanura ko iki gitaramo kidasanzwe kuri buri munyarwanda, kuko buri wese afite inkuru yo kubara nyuma y'imyaka 30 ishize u Rwanda rwibohoye.

Ati 'Buri Munyarwanda wese muri iyi myaka 30 afite inkuru yabara, hari aho Igihugu cyacu kigeze ndetse hari ibikorwa byinshi twishimira byagezweho nyuma ya Jenoside yakorewe Abatutsi.'

'Twe nk'Inyamibwa mu mbyino, umuco no kuwumenyekanisha dufite inkuru twabara. Turifuza ko Abanyarwanda dukomera ku bituranga, twifuje ko muri Werurwe, dutarama kinyarwanda, dutarama u Rwanda kubera ibyishimo dufite muri uyu mwaka.'

Asobanura ko ibi biri mu mpamvu zatumye iki gitaramo bakita 'Inkuru ya 30'. Ati 'Ni yo mpamvu rero twahisemo gukora iki gitaramo cy'Inkuru ya 30, ntitube twaragikoze mu myaka yatambutse ni uko nta kindi gihe iyo myaka izongera guhura.'

Impamvu y'ishingwa ry'Itorero Inyamibwa

Umuyobozi Ushinzwe gukurikirana ibikorwa by’Itorero Inyamibwa, Rusagara Rodrigue, avuga ko kuva Itorero Inyamibwa ryavukira muri Kaminuza y'u Rwanda mu 1998, rwari urugendo rurerure kandi ko ryashinzwe mu rwego rwo kwikura mu bwigunge no kwiteza imbere.

Ati 'Urugendo rw'inyamibwa rwabaye rurerure n'u Rwanda ruduha urubuga rwo gukoreramo ibintu byose. Ntiwabyina abantu bari mu ntambara, ubyina ari uko abantu bari mu byishimo. Igitaramo twateguye ni umwanya mwiza wo kwerekana aho itorero ryavuye kandi rishobora kuva muri ibyo bibazo'.

Akomeza ati 'Nk'itorero rya AERG, ryavutse hakiri ibikomere kuko ryavutse mu 1998 muri Kaminuza y'u Rwanda, nyuma ya Jenoside yakorewe Abatutsi, benshi bari bafite ibikomere, ariko uyu munsi turifuza kugaragaza ko urugendo rw'inyamibwa rwabayemo ibintu byiza. Rero n'ubwo tutamaze imyaka 30 ariko dufite byinshi byo kugaragaza Igihugu cyacu cyagezeho kandi cyaduhaye.'

Perezida Kagame na Madamu Jeannette bitabiriye igitaramo cy’Itorero Inyamibwa bise ‘Inkuru ya 30’

Abato batojwe umuco! Aba ni abana bo ku Nyundo bagaragaje ubuhanga mu kuvuza ingoma no kubyina

Nishimwe Naomie wabaye Nyampinga w’u Rwanda 2020 ari mu bihumbi by’abantu bitabiriye iki gitaramo ‘Inkuru ya 30’

Abantu bicaye mu myanya bitewe n’ubwoko bw’itike yaguze imwinjiza muri iki gitaramo

Umuhanzi Impakanizi yaririmbye muri iki gitaramo cyashushanyije urugendo rwo kwibohora k’u Rwanda

Umushyushyarugamba Lion Manzi wayoboye iki gitatamo yifashishije indimi zinyuranye mu gufasha buri wese witabiriye iki gitaramo

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascene Bizimana yitabiriye iki gitaramo

Impakanizi yunamiye Yvan Buravan binyuze mu ndirimbo ‘Gusaakaara’ yamamaye mu buryo bukomeye

Lion Imanzi yashimye buri wese witabiriye iki gitaramo, avuga ko bigaragaza ko Abanyarwanda bakunda gakondo

Mbere yo kwinjira muri iki gitaramo, bamwe babanje gushaka icyo kunywa no kurya

Mu masaha y’umugoroba nka saa 17H: 00 hari hakonje bitewe n’imvura yaguye, bamwe bitwaza icyayi cyo kunywa

Abantu bagiye binjira muri iki gitaramo bari mu matsinda, ariko nako baganira

Inkuru ya 30- Itorero Inyamibwa ryakinnye umukino wagaragaje imyaka 30 ishize u Rwanda rwibohoye

Kanda hano urebe amafoto menshi yaranze igitaramo ‘Inkuru ya 30’ cy’Itorero Inyamibwa muri BK Arena
AMAFOTO: Freddy Rwigema &erge Ngabo- InyaRwanda.com

Kuri uyu wa Gatandatu tariki 23 Werurwe 2024 ni bwo shampiyona y’icyiciro cya mbere mu Rwanda mu bagore yakomeje hakinwa umunsi wa 21.

Umukino wari utegerejwe na benshi ni uwo ikipe ya Muhazi United yakiriyemo Rayon Sports WFC ku kibuga cya AVEGA i Rwamagana bitewe nuko iyi kipe ya Murera y’abagore yasabwaga gutsinda uyu mukino ubundi igahita yegukana igikombe cya shampiyona.

Umukino watangiye utinze bitewe n’uko ku kibuga hari imbangukiragutabara itujuje ibyangombwa bikaba ngombwa ko hazanwa ibyujuje. Yaje kuzanwa, umukino utangira Saa munani n’iminota 18.

Ikipe ya Muhazi United WFC yatangiye igora ikipe ya Rayon Sports WFC ikina imipira miremire ndetse ukongeraho n’ikibuga kitari kiza ku buryo gukina umupira wo hasi byagoranaga.

Umukinnyi usanzwe ugenderwaho mu ikipe ya Rayon Sports WFC, Mukandayisenga Jeanine uzwi nka ‘Kaboy’ yagerageje uburyo bwinshi imbere y’izamu, gusa ntibimukundire ariko bigeze ku munota wa 66 bitakunda aterekamo igitego cya 1.

Nyuma y’iminota 10, imvura yari yahereye kare ishaka kugwa yahise igwa biba ngombwa ko amakipe aba avuye mu kibuga, ariko iza guhita abakinnyi basubira mu kibuga. Umukino warangiye Muhazi United WFC yari imbere y’abafana bayo itsinzwe igitego 1-0.

Rayon Sports WFC ihise itwara igikombe hakibura umukino 1 ngo shampiyona irangire kubera ko ifite amanota 58 ikaba irusha AS Kigali WFC iyikurikiye amanota 7 nubwo yo ifite umukino w’ikirarane.

Iyi kipe ya Gikundiro y’abagore yashinzwe muri 2022 ihita itangira gukina shampiyona y’icyiciro cya 2. Yazamutse muri shampiyona y’icyiciro cya mbere mu mwaka ushize none ihise itwara igikombe.

Rayon Sports WFC yegukanye igikombe cya shampiyona y’icyiciro cya mbere nyuma y’imyaka 2 ishinzwe 

Igitaramo cya Pasika “Ewangelia Easter Celebration Concert” cyateguwe n’Umuryango wa Bibiliya mu Rwanda (BSR) mu gusoza ubukangurambaga bwiswe ‘Shyigikira Bibiliya’, bwo gushishikariza abantu gutera inkunga Bibiliya kugira ngo itazabura burundu mu Rwanda.

Kizaba tariki 31 Werurwe 2024, kibere muri BK Arena, inyubako yagenewe ibikorwa by’imyidagaduro ikaba yakira abantu barenga ibihumi icumi bicae neza. Ni igitaramo cy’amateka cyatumiwemo Israel Mbonyi, James na Daniella, Chrisus Regnat, Alarm Ministries, Shalom Choir na Jehovah Jireh Choir.

Mu kiganiro na InyaRwanda, Nicodeme Nzahoyankuye [Peace Nicodeme], umwe mu bari gutegura iki gitaramo, yavuze ko mu baramyi batumiwe harimo na Israel Mbonyi. Yavuze ko bateguye iki gitaramo mu rwego rwo gufasha Abakristu kwizihiza Pasika.

Aragira ati “Iki gitaramo kigamije gufasha abantu kwizihiza Pasika. Abantu bazahabwa umwanya mwiza wo gutaramana n’amatsinda n’abahanzi bakomeye mu ndirimbo zo kuramya no guhimbaza Imana.”

Israel Mbonyi wiyongereye mu bazaririmba muri iki gitaramo gitegerejwe na benshi, aherutse kwandika amateka yo kuzuza Miliyoni y’abamukurikira kuri Youtube. Ni mu gihe kandi afite indirimbo ya Gospel ikomeje kuza ku isonga mu Karere mu gukundwa cyane, iyo akaba ari “Nina Siri” imaze kurebwa n’abarenga Miliyoni 40 mu mezi 8 gusa.

Mbonyi agiye kongera gutaramira muri BK Arena afitemo amateka akomeye dore ko mu myaka ibiri yikurikiranya, yayikoreyemo ibitaramo bya Noheli, akitabwa n’abakunzi be ibihumbi n’ibihumbi kugera aho amatike yose agurwa agashira (Sold Out). Biri no mu byatumye hari abamwita ‘Nyiri BK Arena’ na cyane ko ari we muhazi rukumbi wayujuje.

Israel Mbonyi ategerejwe mu gitaramo cya Pasika kizabera muri BK Arena

Ibiciro byo kwinjira muri iki gitaramo biri mu byiciro bine (4) aho bihera ku bihumbi bitanu gusa (5000 RWF) ahasanzwe, ahisumbuyeho ni ibihumbi icumi (10000 RWF), muri VIP ni ibihumbi cumi na bitanu (15,000 RWF), muri VVIP ni ibihumbi makumyabiri (20,000 RWF) naho kumeza yicarwago n’abantu batandatu (6) ni ibihumbi magana abiri (200,000 RWF).

Abifuza kugura amatike y’iki gitaramo cy’imboneka rimwe cyo kwizihiza Pasika cyiswe ‘Ewangelia Easter Celebration’, bayagura banyuze ku rubuga rwa WWW.TICQET.RW n’ahandi hatandukanye mu mujyi wa Kigali nka Camelia CHIC, Camelia- Makuza Peace Plaza, Camelia Kisimenti, La Gardienne (Kiyovu), Uncle’s Resto (Kicukiro);

St Famille Parish, Regina Pacis, Omega church (Kagugu), Bethesda Holy church, Foursquare Gospel church, Restoration center (Masoro), Zion Temple (Gatenga), New Life Bible church (Kicukiro) na Eglise Vivante (Rebero). Ushobora no guhamagara izi nimero bakagufasha kubona itike byoroshye: 0788304142, 0788880901 na 0787837802.

REBA INDIRIMBO “NINA SIRI” YA ISRAEL MBONYI UTEGEREJWE MU GITARAMO CYA PASIKA

Israel Mbonyi agiye gutaramira muri BK Arena bwa mbere kuva yakuzuza Miliyoni y’abamukurikira kuri Youtube

Amatike yo kwinjira muri iki gitaramo cya Pasika yatangiye kugurishwa

Shalom Choir iherutse kuzuza BK Arena nayo izaririmba muri iki gitaramo

Korali Jehovah Jireh iri mu makorali azatanga ibyishimo muri iki gitaramo cya Pasika

Uramutse ukoresha imbuga nkoranyambaga cyane ntabwo wabura kuba hari aho wabonye Radio nshya ya Isibo ivugira kuri 98.7 bitewe n'abanyamakuru basanzwe bazwi cyane iri kwibikaho bo mu biganiro by'imyadagaduro na siporo.

Umwe mu banyamakuru bazajya bakora mu kiganiro cya siporo cyanatangiye uyu munsi kuwa Gatandatu, Faustinho yaganriye na InyaRwanda Tv agaruka kuri byinshi birimo n'impamvu yatumye afata umwanzuro wo kwerekeza ku Isibo.

Yavuze ko icyamweje ari igihe iki gitangazamakuru kimaze ndetse n'umushinga gifite dore ko n'abakiyobora batuma umunyamakuru yisanzura.

Yagize ati: 'Icyanyemeje ahanini ni igihe iki gitangazamakuru kimaze. Ni gishya ariko kuri uko kuba gishya cyaraje gihita gifatisha. Televiziyo Isibo irakurikirwa hano mu Rwanda, urabibona n'ibikorwa irimo itegura.

Nk’ejo bundi naraje duhita duhera kuri Rwanda Premier League Awards, ndebye ubutumwa mbona ko iba ikurikirwa cyane. Cyangwa se urumva no kuba ari televiziyo nshya ariko ikaba icishwaho ibyo bihembo by'ukwezi ni ibintu bikomeye.

Njyewe nanyuzwe n'uwo mutekano Isibo TV ifite kuva yatangira, burya ntibakubeshye ureba ikigo uvuga ngo ese hano nzahakorera numvikane, ibyo nzakora abaturage bizabageraho mu buryo bworoshye.

Abantu batanatekereza ibindi, ikintu cya mbere umunyamakuru akunda ni ahantu nyine ukora ibintu byawe, abantu bakabyumva ndetse ukanareba n'ubuyobozi butazakugora kuko numvise umushinga wabo ni abantu batagoranye.

Ubona ko ni igitangazamakuru kitazitira umunyamakuru ahubwo kimufasha no kuzamura izindi mpano zimurimo…. Ibyo biri mu byankuruye ariko n'amafaranga nayo aba akenewe.  

Ikiza ni icyo ngicyo cyo kuvuga ngo ni Radio yifuza ko uha ibyiza abanyarwanda, nanjye rero naravuze nti kuki ntaba ndi umwe mu bazatanga ibyo bintu kandi ndabizi ko bizagenda neza'.

Mugenzi Faustinho wari umaze umwaka n'amezi 2 akora ku Ishusho Tv yavuze kandi ko udushya abantu bagiye bamumenyeraho cyane cyane binyuze mu kogeza imipira ntaho twagiye bityo ko bazakomeza kutwumva ndetse akaba yumvaga anakumbuye gukorera kuri Radiyo.

Uyu munyamakuru uvuka mu karere ka Huye yatangiye itangazamakuru ahereye kuri Contact FM/TV muri 2015, muri 2019 yerekeza ku Isango Star, ahava nyuma y'umwaka umwe ajya kuri Radio & TV 10 naho ahava muri 2023 yerekeza ku Ishusho TV.

Kanda hano urebe ikiganiro twagiranye na Faustinho