Author: webrwanda

Ivuka rya FPR-Inkotanyi ryabanjirijwe n'ibindi bice bigera kuri bine kuko Abanyarwanda babanje kugira ibyo bakora ku gihe cy'Inyenzi, icyo gihe n'ishyaka rya UNAR ryarakoraga ndetse ryabaga riburana muri za Loni n'ahandi n'ibihugu birwanya ubukoloni byose bibafasha, kuko bibwiraga ko ibintu bizagera aho bikajya mu buryo.

Aho ni hagati y'imyaka ya 1950 kugeza mu 1967 mu gihe cy'ibitero by'Inyenzi hakiri n'icyizere cy'Abanyarwanda, ariko byaje kugera aho Inyenzi ziratsindwa na UNAR irasenyuka ntiyongera kugira icyo ivuga kandi yasenyutse buhoro buhoro.

Burya ikintu gisenyuka ntabwo uvuga ngo bibaye uwo munsi, ariko nko ku ruhande rw'Inyenzi ho igitero cya nyuma zakoze ni icyo mu 1967 nyuma y'aho nta kindi cyabaye.

Mu 1966 ni bwo abantu batangiye kubona ko ibintu bitazakunda bamwe bahita batangira kwishakishiriza imibereho hirya no hino mu gihugu no mu bihugu duturanye.

Imyaka imaze kwisunika bigeze nko mu myaka ya 1970 kuzamura, abo bari baratataniye hirya no hino mu bihugu bitandukanye, batangiye kubona ko abana babo bari kwibagirwa Ikinyarwanda, ha handi bari bamaze imyaka 15 batavuga ururimi rwabo.

Bahise babona ko ibintu bitangiye guhinduka ibibazo birenzeho, maze hatangira kubaho amatsinda yigisha umuco, abasizi batangira kwandika ibisigo, mbega hatangira gushakisha uko abantu batagera aho kwibagirwa abo bari bo.

Abana bari barahunganwe n'ababyeyi muri 1959 bari bamaze kuba abangavu n'ingimbi, ubwo ni na ko abavukiyeyo bamaze kugira hejuru y'imyaka 10. Icyo gihe rero habayeho kongera kuvuka k'Umuco Nyarwanda.

Kubera ko abantu bari batangiye kwitekerezaho baniyibutsa abo bari bo, ntibyahereye gusa mu matsinda yo kwigishanya umuco nyarwanda n'ururimi rw'Ikinyarwanda n'ibisakuzo n'ibindi.

Ahubwo ubwo bamwe mu bari bakiri urubyiruko batangiye kujya bibaza bati ese ubu tuzahereza he?

Icyo gihe rero byatangiriye muri Uganda hari itsinda rimwe, mu Burundi hari abiri nyuma yaje no kuba atatu arimo rimwe ryitwaga 'Urukatsa' yarimo bamwe bitwaga Inyenzi.

Habaga irindi tsinda ryari rizwi nka 'Groupe de Réflexion', ryo ryari rigizwe n'abantu bahora bibaza uko ibintu bihagaze.

Mu myaka ya 1980 nibwo haje kuza irindi tsinda ry'urubyiruko mu Burundi. Uko ni na ko mu Busuwisi hari irindi tsinda, mu Bubiligi hari andi matsinda abiri, mu Budage ho hari itsinda ryitwa 'Abadaha'; hari amatsinda menshi yo kwibaza icyakorwa.

Itsinda ryateye intambwe ikomeye rero, ni itsinda ryari muri Uganda kuko benshi bari barahungiye muri Kenya mu mwaka ya 1970 na 1979 ni bwo iryo tsinda ryavuze riti tureke gukomeza kuvuga, ahubwo ubu twakora iki?

Icyo gihe mu 1979 bahise batangiza RANU (Rwandese Alliance for National Unity). Hatangiye kubakwa inzego, hashakwa n'umurongo wa politiki bakajya bakora na za kongere.

Byabaye aho mu 1981 ba Banyarwanda babiri muri ba bandi 27 bagiye kurwana kwa Museveni, barimo Rwigema na Kagame abandi bakajya babasangayo.

Nyuma mu 1985 RANU ikora kongere, yibaza iti 'ko tumaze imyaka itanu dukora ariko ntidukure ngo tube umuryango hakorwe iki?'

Badusaba ibitekerezo twese turandika, nanjye naranditse. Museveni afashe ubutegetsi ndataha, kuko nabaga mu Burayi.

Ku bw'ibitekerezo natanze banyemerera kuyobora Akanama twiga uko twarema Umuryango uhuje bose, ariko tukabanza kwigisha n'Abanyarwanda bari barahunze.

Twahereye ku bana bari bavuye muri za kaminuza, turabafatirana batarahabwa akazi, tubaha inyigisho zamaraga amezi abiri, zibandaga kuri politiki, filozofiya, amateka n'ibindi.

Twabigishirizaga mu nzu z'abantu bigakorwa rwihishwa, ntihagire ubimenya, niba nyir'inzu twatiye afite abakozi bo mu rugo, tukazana abana bacu bakabikora, kugira ngo abo bakozi batazajya kubivuga.

Twakoze inyandiko eshatu zirimo icyakorwa ngo duhindure u Rwanda; twubakiye ku bumwe bw'Abanyarwanda, byaca ibyo bibazo byose.

Twakoze indi nyandiko yabaga ijyanye n'imikorere ya FPR-Inkotanyi ha handi twishakagamo ibisubizo uko twabaga tungana kose, dukora indi ijyanye no kwigenzura mu myifatire, zijyana n'indi tutabashaka kwerekana yitwaga 'Option Z' ha handi twagombaga kuyoboka inzira y'intambara mu gihe ibindi byanze.

Nyuma rero tumaze gushyiraho izo nyandiko habayeho kongere y'Abanyarwanda benshi bari impunzi mu bihugu bitandukanye ndetse hagira n'abava mu Rwanda, duhindura RANU.

Turabyemera ko duhinduye tutakiri RANU tubaye FPR. Noneho twagombaga gusobanura kuki Front Twagombaga kubisesengura tugenda tubitanga, ni icyo cyatumye dukora inama y'umuryango y'iminsi itatu yose.

Ubwo byatumye tujya muri ibyo byose noneho 'Front' byerekana ko niba iriya migabo n'imigambi tugomba kuzayigeraho tugomba guhaguruka tukabiharanira.

Kujya kuri 'front' y'ibitekerezo ni igihe ibiganiro byanze tugomba gukoresha imbaraga, ibyo na byo tukabyitegura iyo 'front' igakora ntitube gusa mu bitekerezo bikaba ibitekerezo bigomba guhindura ibintu.

Urumva nicyo cyatumye dufata 'front' hanyuma kuko twubakaga batubwiraga ngo turebe uko wakwinjira mu baturage n'abandi.

Twasanze tutakora ku buryo busanzwe buriya twavuga ngo twari dufite ibitekerezo byacu ni ibi, wenda ntituri benshi cyane, wenda tuzaba nk'ibihumbi icumi cyangwa ijana hanyuma twigishe abaturage ibitekerezo nibabyemera babitore ariko abaturage batari hamwe natwe batora ibitekerezo byacu, burya niko amashyaka abikora.

Twe turavuga ngo oya reka twubake ku buryo na ba bandi bo hasi bajyamo ntibatore ibitekerezo gusa, ahubwo nabo bibe ibyabo ntibibe kuvuga ngo hari ababatekerereje ibitekerezo byiza bibateza imbere none ibi nimubitorere, twe turavuga ngo oya na ba bandi baze mu batanga ibitekerezo bitekererezo babemo.

Noneho icyo gihe birangiye twerekana ibyangombwa byose byemewe nyuma dutora inzego zo kubishyiraho.

Ikindi gishya cyagezweho ubwo dushyiraho ishuri rya politike, turatangira aho twari turi dutangira kuryagura hirya no hino n'abandi bashyiraho amashuri ya politike twoherezayo abajya kubigisha tujya i Burayi, Tanzania, mu Rwanda, Burundi, Congo.

FPR-Inkotanyi yakomotse kuri RANU bijyanye no guha ubwisanzure buri wese ufite ibitekerezo bitandukanye

Inkomoko y'izina Inkotanyi

Hari nk'abantu bavuye mu Rwanda batagiye mu mashuri yisumbuye ariko ugasanga ari abahanga na cyane ko mu Rwanda nta n'amashuri menshi yari ahari.

Hari nk'abasaza b'abahanga twigishaga, tukareba ko babyumva, n'amagambo menshi y'Ikinyarwanda twagiye dukoresha nibo twayakuyeho.

Ni uko tubaza babiri bari aho ngo umuntu uharanira icyo ashaka kugeraho kandi abikorana ingufu ze zose n'ubwenge bwe bwose niyo byamunanira ariko akongera agahaguruka akabikora, uwo muntu mwamwita gute?

Baratubwira ngo uwo muntu aba akotana ni Inkotanyi ndetse turabyumva ko twari dutangiye gukotana. Icyo gihe twari dufite ikinyamakuru muri 1987 twandikagaho, tucyita Inkotanyi.

Tukiri muri iyo nama ni bwo twavugaga tuti buri mutwe wose mu Kinyarwanda, yaba iy'ingabo, iy'inka, iy'amashyaka bagira izina bwite.

Tuti natwe tukagira izina bwite akaba ari ryo dukoresha mu Kinyarwanda kuko iyo uvuze ngo FPR ntabwo ari izina bwite ni ibintu bibiri ugenda uteranya.

Ahandi bagira izina rifashe byose hamwe, noneho tuti hari izina twabonye twitwa INKOTANYI buriya twagomba kuba INKOTANYI, RPF bikavugwa mu bya kizungu.

Nyuma ariko twabonye ko mu Rwanda batabyumva neza tuvuga ko tugomba kubyita FPR-Inkotanyi, Abanyarwanda tubazane tube umuryango ndetse tubigishe politiki yacu aho agomba kuva hose ntawe duheje.

Niba byumvikana neza uwo wari umuryango ha handi umuntu aba afite intekerezo ze ariko umuryango ukamureberera, abenshi bakaba beza kabone niyo habamo abakunanira ariko abenshi babaga ari beza, tukanashingira ku bitekarezo by'abeza.

Ababi ariko nabo ntabwo twabataga ahubwo twarabafataga bakagira icyo badufasha, niba wenda hari abatashoboraga gucunga amafaranga kuko bayarya, ariko hari ibindi bari bashoboye nko kuvuga bakatuzanira abantu.

Niyo mpamvu kugeza uyu munsi FPR-Inkotanyi tutari ishyaka ahubwo turi Umuryango w'Abanyarwanda. Umunyarwanda wese afite uburenganzira bwo kuwujyamo yewe n'iyo yaba afite ibindi bitekerezo, turamwigisha.

Impamvu yo kuba umuryango aho kuba ishyaka, FPR Inkotanyi yayikomoye ku guha rugari buri wese nta guheza

Gushaka Abakada

Twashatse n'abakada bitangiraga ibyo byose, bagenda babyubaka kuko hari igihe abantu bose bizasaba kwitanga kugira ngo duharanire kubaka igihugu cyacu.

Twagombaga kubyigisha kare ngo haboneke abazitanga, ubwo rero byadusabye kubaka guhera hasi tugana hejuru iyo yari gahunda yemejwe mu ihuriro ry'ishyaka noneho iranatorwa iranatangira.

Ubwo twatangiye kohereza abajya kubaka hirya no hino inzego ariko muri izo nzego dushyiraho ko hagomba kubakwa inzego z'abari n'abategarugori, hasi dufite urugo, akagari, noneho isangano ni ku rwego rw'igihugu.

Icyo gihe nabwo twubatse inzego z'urubyiruko, bakagira inzego zabo zibayobora bagatanga raporo ku bakuru babo bikanakomeza ku rwego rw'igihugu no kugira ngo urubyiruko tubashakire inyigisho zabo bige.

Kwari ukugira ngo tubashyire hamwe tubigishe bose nk'uko n'abandi bose twabahurizaga hamwe, ariko nk'urubyiruko narwo rugire ibyabo nubwo nyuma bisangaga mu bandi.

Ubwo rero abakada bajyaga kwigisha ahandi mu Rwanda, muri Uganda, mu Burundi, muri Congo, muri Tanzania, Kenya, i Burayi, muri Afurika y'Iburengerazuba, iy'Amajyepfo, mbese hose.

Twatangiye kugenda twubaka inzego tugenda dushaka abakada bahoraho n'abadahoraho kugira ngo, niba nimugoroba arangije akazi afite amasaha abiri atatu yaza agaha umuryango, aze yigishe.

Kuba umukada ni wa muntu wize ya mezi abiri, akajya gukora akazana ibitekerezo, ibitekerezo bikaganirwaho hanyuma akaba umukada.

Abo bose nta kintu bahabwaga, icyakora ntiwareka umuntu ngo yicwe n'inzara, umuryango ubashakira ibyo kurya.

Uko kwitanga byari ingenzi cyane kuko ni nabyo muri RANU byaburaga aho umuntu yitangaga gufasha umuryango bikaba akazi kabo.

Abakada icyo gihe twagombaga gukora akazi kose gashoboka, nko kwigisha abandi mu kubaka inzego z'ahandi bagukenera ahantu na bwo ukajyayo.

Babanje kwitangira abo muri Uganda, bikomereza mu Burundi, Tanzanie n'ahandi, kuva ku rwego rwo hejuru kugeza ku mudugudu ariko tukabikora ahari Abanyarwanda.

Ikindi kandi muri iyo myaka inzego twazishyize mu byiciro, RANU kuko yatangiye bwa mbere muri Kenya yabaye A, Uganda iba B, Tanzanie iba C, u Burundi buba D naho E iba RDC, hakurikiraho no kwagukira ku Isi. Ahabaga benshi nka Uganda havukaga A1, A2 gutyo.

Nka RDC kuko yari nini cyane twari dufiteyo ibice bine, ndetse nyuma biza kuba bitanu.

Mu Rwanda kuko ari ho twari tugambiriye twahise O, ariko kuko hari ibice by'u Rwanda twafashe twabyise O1, 02 na O3 bigaterwa n'uko mugenda mwunguka abantu.

Byageze aho abantu bacu batangira kujya no mu myanya y'ubuyobozi iciriritse, ugasanga akuriye itsinda runaka, tukinjira mu basirikare nka ba Uganda bimenyereza umurimo, abo ni urubyiruko.

Kuko twiteguraga urugamba hari n'ibindi twakoraga twakundaga kwita 'Option Z' ha handi niba tuzakenera imbunda, imiti, ibiryo hakabaho abatanga amafaranga ariko b'abanyamuryango.

Abakada ba FPR-Inkotanyi bitanze igihe kirekire batizigama ibyatumye umugambi wo kubohora Abanyarwanda ugerwaho nta kabuza

Myugariro wo ku ruhande rw’iburyo uheruka gutandukana na APR FC, Omborenga Fitina yasabye abakunzi b’iyi kipe kugumya gushyigikira ikipe ya bo kandi ababwira ko igihe yari akiyirimo yitangaga ku rwego rwe rwa nyuma.

APR FC iheruka gutangaza abakinnyi itazakomezanya na bo mu mwaka w’imikino wa 2024-25 barimo na Omborenga Fitina.

Nubwo byari bimaze iminsi bizwi ko batazakomezanya, gusa abakunzi b’iyi kipe ntabwo byabashimishije kurekura umukinnyi nka Omborenga Fitina wabanzaga mu kibuga ndetse binagaragara ko ku mwanya we nta wundi umurusha mu Rwanda.

Mu kiganiro yahaye ikinyamakuru ISIMBI, Omborenga Fitina yasabye abakunzi b’iyi kipe kuba hafi y’ikipe ya bo ndetse ababwira ko we ntacyo yishinja icyo atabahaye ari icyo atari afite.

Ati “Abakunzi ba APR FC icyo nababwira ni ugukomeza gushyigikira ikipe ya bo nk’uko basanzwe babikora. Ikindi nababwira igihe nahabaye nakoreshaga imbaraga zanjye zose zishoboka, ibyo ntakoze ubwo ntabwo byabaga ari ubushobozi bwanjye, gusa bamenye ko njye nitangaga bishoboka ku rwego rwa nyuma.”

Uyu myugariro kandi akaba avuga ko we atigeze atungurwa no kutongererwa amasezerano kuko imikino yo kwishyura ya shampiyona ya 2023-24 yayikinnye abizi neza ko atazakomezanya n’iyi kipe y’Ingabo z’Igihugu.

Omborenga Fitina yari amaze imyaka 7 muri APR FC kuko yayikiniye kuva 2017. Amakuru akaba amwerekeza muri mukeba wa APR FC, Rayon Sports.

Omborenga Fitina yageneye ubutumwa abakunzi ba APR FC

Iyi ndirimbo yagiye hanze ku gicamunsi cyo kuri uyu wa 21 Kamena 2024, mu gihe ibikorwa byo kwiyamamaza kw'abakandida ku mwanya w'Umukuru w'Igihugu n'Abadepite bitangira kuri uyu wa Gatandatu tariki 22 Kamena 2024.

Muri iyi ndirimbo, Tuyisenge avuga ibigwi Nyakubahwa Perezida wa Repubulika Kagame Paul akaba n’Umukandida watanzwe n’Umuryango RPF-Inkotanyi kuri uyu mwanya.

Agaragariza Abanyarwanda ibikorwa byagezweho birimo: Ibyogajuru u Rwanda rusigaye rufite mu isanzure, amazi, amashanyarazi, imihanda, Ikigo cy’Ibimenyetso bya gihanga byifashishwa mu butabera, Inganda, no kuba u Rwanda iyo ruhuye n’ikibazo kitaruherana ahubwo ruhita rugishaka mo amahirwe yo kwikemurira ibibazo, atanga urugero kuri Covid 19 aho yatumye 'tudaheranwa nayo ahubwo Perezida Kagame agahita azana inganda zikora Inkingo n’imiti.'

Ati” Kuba abana batagisinzirira mu ishuri kubera inzara ahubwo basigaye barya ku ishuri kubera Nyakubahwa Perezida Paul Kagame byanatumye umubare w’abana bata ishuri ugabanuka cyane dore ko nk’ibisanzwe kwiga ari ubuntu muri gahunda y’uburezi kuri bose.'

Tuyisenge Intore yabwiye InyaRwanda ko iyo asubije amaso inyuma asanga hari ibyo afite gushimira Perezida Kagame ku myaka 30 ishize ayoboye Abanyarwanda.

Ati 'Ubu njye nk'umuhanzi ndishimira ibyagezweho mu myaka 30 u Rwanda rumaze rwibohoye aho ubu umwarimu afite ishema ryo gutanga uburezi ku bana dore ko n’umushahara we wongerewe babikesha Umuryango RPF -Inkotanyi ku Isonga Umukandida wayo Paul Kagame.'    

Yungamo ati 'Ndasaba abakunzi banjye n’Ibihangano byanjye gutora Intore Idatenguha, Paul Kagame kuko Imvugo ye ariyo ngiro mu myaka yose tumaranye murabizi ntiyigeze adutenguha. Tumutore tumwiture ibyo yadukoreye kandi tumutezeho kutugeza kuri byinshi kurushaho.'

Tuyisenge yumvikanishije ko Perezida Kagame yahesheje ishema ubuhanzi, ari nayo mpamvu muri iki 'tutakitwa ba Sagihobe' ahubwo 'tukaba dukora ubuhanzi nk’umwuga, nta wundi kubikesha uretse RPF-Inkotanyi irangajwe imbere na Nyakubahwa Paul akaba ruserukana igitinyiro imbere y'ababisha muri rubanda, igikundiro kigakura buri munsi'.

Tuyisenge Intore yashyize hanze indirimbo yise 'Kagame Paul ni wowe' avuga ko yayihimbye mu rwego rwo gutanga umusanzu we nk'umuhanzi

Tuyisenge yasabye abafana be kuzashyigikira umukandida yahimbiye iyi ndirimbo

KANDA HANO WUMVE INDIRIMBO 'KAGAME PAUL NI WOWE' YA TUYISENGE INTORE

Umukinnyi wakinaga mu kibuga hagati muri Muhazi United, Richard Ndayishimiye yamaze gusinyira Rayon Sports amasezerano y’imyaka 2 aho yasezeranyije abakunzi b’iyi kipe kubaha ibyishimo.

Uyu mukinnyi amaze umwaka umwe muri shampiyona y’u Rwanda aho yakiniraga Muhazi United.

Richard wavukiye muri DR Congo akaba afite ubwenegihugu bw’u Burundi, yasabye ikipe ye kuza gukora igeragezwa muri Rayon Sports na yo iramwemerera.

Yakinnye umukino wa gicuti wahuje Rayon Sports na APR FC kuri Stade Amahoro tariki ya 15 Kamena aho amakipe yombi yanganyije ubusa ku busa.

Ni umukinnyi wigaragaje maze abakunzi b’iyi bakaba bibazaga impamvu atarabsinyira kuko babona hari byinshi azafasha mu kibuga hagati.

Ubu yamaze gusinyira Rayon Sports aho yavuze ko ari inzozi za buri mukinnyi gukinira ikipe nka Rayon Sports.

Ati “Nishimiye kuza muri Rayon Sports. Buri mukinnyi wese aba arota gukinira ikipe ikomeye nk’iyi muri iki gihugu. Intego ni uguha ibyishimo abafana mu mwaka w’imikino ugiye kuza.”

Uyu mukinnyi wakiniye amakipe nka Tel Aviv-Yafo FC mu cyiciro cya kabiri i Burundi na Dynamic FC mu cyiciro cya mbere i Burundi mbere y’uko aza muri Muhazi United, yamaze gusinyira Rayon Sports aho bivugwa ko yatanzweho miliyoni 15.

Richard Ndayishimiye yamaze gusinyira Rayon Sports

Mu 2023, u Rwanda rwakiriye ba mukerarugendo basuye ingagi 25,927 ugereranyije na 20,035 basuye ingagi mu mwaka wa 2022.

Parike y'Ibirunga yatangiye nk'icyanya kirinzwe mu 1925 ari Pariki y'Igihugu yitiriwe Albert ya Congo Mbiligi, nyuma y'ubwigenge bw'u Rwanda mu 1962, igice giherereye mu Rwanda, ari cyo cyabaye Pariki y'Igihugu y'Ibirunga cyari gifite ubuso burenga gato kilometer kare 320.

Kuri ubu, iyo Parike iri ku buso bwa kilometerokare 160, ikaba ikora ku bihugu bya Uganda mu majyaruguru na Repubulika Iharanira Demokarasi ya Congo mu majyaruguru y'uburengerazuba.

Abasuye Parike y'Igihugu y'Ibirunga mu mwaka wa 2023 ni 46,187, bakaba barakoze ibikorwa bitandukanye birimo gusura ingagi, gusura inkima, gusura imva ya Dian Fossey, gusura igice cya Parike Buhanga, gutembera mu buvumo, gutembera mu ishyamba no kurira ibirunga byose uko ari bitanu harimo Muhabura iri ku butumburuke bwa metero 4,127 ibasha kubonwa ahantu hose mu gihugu ku misozi iri ku butumburuke.

Hari kandi Gahinga iri ku butumburuke bwa metero 3,473, Sabyinyo iri kuri metero 3,669 ikunze gutangaza abantu kubera imisozi yo ku bushorishori bwayo, Bisoke ikurura ba mukerarugendo kubera ikiyaga kiba mu bushorishori bwayo kiri ku butumburuke bwa 3,711, Kalisimbi ari na wo musozi muremure mu gihugu ikaba iri ku butumburuke bwa metero 4,507.

Izi nguge nini zibarizwa mu misozi miremire y'amashyamba ya Virunga ahuza ibice by'ibihugu by'u Rwanda, Uganda na Repubulika Iharanira Demokarasi ya Congo, ndetse no mu ya Bwindi muri Uganda na Sarambwe muri Repubulika iharanira Demokarasi ya Congo, izina rya gihanga ryazo ni Gorilla beringei beringei, bizwi ko uwazibonye mbere akanabimenyekanisha mu 1902 ari umusirikare w'Umudage Robert Von Beringe ari we zitiriwe.

Izo nyamaswa zavuye mu rwego rw'ibisimba biri mu nzira yo gucika ku isi bikaba byemezwa ko byugarijwe nk'uko Ikigo gishinzwe inyamaswa ku isi cya World Wildlife Fund kibitangaza.

Nyuma y'ibikorwa bidasanzwe byo kubungabunga, kuzivura no kuzirinda ba rushimusi izo ngagi byakozwe na guverinoma y'u Rwanda biciye mu Rwego rw'Igihugu rw'Iterambere, ibarura riheruka ryagaragaje ko zisigaye ari 1,063 ku isi.

Mu gice u Rwanda ruherereyemo mu gice cy'imisozi miremire ya Virunga habarurwamo ingagi 604. Ingagi zizamura amarangamutima ku bazisuye ku buryo budasanzwe, bamwe bafata nk'ikintu kimwe mu buzima bw'umuntu aba agomba kwibonera amaso ku maso, igihe cy'isaha imwe abakerarugendo bamarana nazo iyo bazisura benshi bemeza ko nta kindi cyahwana nabyo.

Ubukerarugendo bwo kujya gusura ingagi bukurura abantu kubera ko abasura bahava batangajwe n'imiterere yazo imeze nk'iya muntu, uburyo zibayeho mu ishyamba ndetse n'uburyo zibana budatandukanye n'ubw'abantu.

Kimwe mu bintu bitangaza abasuye ingagi z'imisozi ni ingano yazo n'imbaraga zazo aho ingore zikuze zipima hagati y'ibiro 150 na 200 naho ingabo zigapima hagati y'ibiro 200 na 250. Zibaho hagati y'imyaka 35 na 45 ku zabashije gukura zidahuye n'ibindi bibazo, abana bazo bakavukira amezi icyenda bari hagati y'ibiro bitatu na bitanu, bagacuka ku kigero cy'imyaka itatu n'igice.

Mu buzima bwayo, ingagi nkuru ishobora kubyara hagati y'abana bane na batandatu, gusa habayeho umwihariko kuri Kampanga yabyaye abana umunani. Kuri ubu ingagi nkuru kuruta izindi ni ingore, ibarizwa mu muryango wa Hirwa, ikaba yitwa Kibyeyi, ifite imyaka 49. Intoya cyane muri zo ivuka mu muryango wa Sabyinyo ikaba ifite ukwezi kumwe kurengaho umunsi umwe.

Imibereho yazo ya buri munsi isa nk'iy'abantu gusa ikiganzamo kwita ku buzima bwayo harimo kurya zikaba zirya ibyatsi n'ibiti cyane cyane zikaryoherwa n'imishibuka y'imigano. Ku munsi ingagi nkuru ishobora kurya ibiro bingana na 15% by'ibiro byayo, bivuga ko ingagi ipima ibiro 200 irya ibiro 30 by'ibyatsi ku munsi.

Nyuma yo gufungura zifata umwanya urenga isaha ziruhukiye, iyo bwije zisasa aho zahisemo zikaryama. Mu buzima bwazo bwa buri munsi zibana mu miryango irimo inkuru z'ingabo zikunze kurangwa n'ibara ry'umweru mu mugongo iyo zikuze, ingore ndetse n'abana.

Imiryango iba ihagarirawe n'umutware wazo akenshi akaba ingabo, iba ishinzwe ahanini no kwita ku busugire bwazo n'aho zituye ariko ziri mu bwigenge busesuye kandi mu miryango igira imbibi mu byanya bitandukanye byo muri parike. Kuri ubu, imiryango 14 isurwa na ba mukerarugendo batarenga umunani ku munsi, bityo abazisura bakaba batarenga 112 ku munsi. Gusa iyo siyo miryango yonyine y'ingagi kuko uko zigenda ziyongera ni na nako zirema indi miryango nayo ikabanza gukurikiranwa n'abahanga mu gihe itegurwa kuzasurwa na ba mukerugendo.

Ku ikubitiro, umuryango wa Susa, uwa Sabyinyo na Groupe 13 izwi kuri ubu ku izina ry'Agashya niyo ya mbere yabanje gusurwa ubwo umushakashatsi Dian Fossey w'Umunyamerika wigaga ku myitwarire no kubungabunga ingagi ndetse no kuzimenyereza guhura na bamukerugendo niyo yatangiye gusurwa bwa mbere mu 1979.

Urugero rutomoye rugaragaza uko imiryango yaguka umuntu yarurebera ku wa Susa waje kuvamo indi miryango itatu ariyo Karisimbi, Igisha n'isimbi. N'indi miryango ni uko bigenda iyo ingagi zigenda ziyongera.

Ubu bumenyi bwose bwakusanyijwe mu nyandiko n'imibare by'abahanga bazikurikirana bakora muri Parike y'Igihugu y'Ibirunga hamwe n'abo bafatanya kuzibungabunga bikozwe na The Dian Fossey Gorilla Fund, Gorilla Doctors na International Gorilla Conservation Programme.

Mu rwego rwo kubungabungabunga ubuzima bwa Parike, abakozi bakora ako kazi by'umwihariko buri munsi 149 bacunga inyamanswa muri iryo shyamba riri mu butumburuke mu gihe abatanga ubufasha mu gihe ba mukerugendo basura Parike bagera kuri 27.

Ingagi zo mu misozi zisigaye hake ku isi

Iterambere ry’abo mu Majyaruguru rishingiye ahanini ku bukerarugendo bukorerwa muri Pariki y’Ibirunga

Parike y’Iburunga ni mwe mu zikundwa na ba mukerarugendo benshi

Abazisuye basiagarana akanyamuneza

Zikomeza kororoka uko umwaka utashye

Mu ijoro ryo kuri uyu wa Gatanu saa 20:00 pm nibwo Ani Elijah yafashe indege imwerekeza mu gihugu cy'u Bubiligi, aho agiye mu igerageza mu ikipe ya Charleroi yaritsinda akazahita ayisinyira.

Tariki 5 Kamena uyu mwaka, nibwo Ani Elijah yari yasinyiye ikipe ya Police FC amasezerano y'imyaka ibiri, aho yari imukuye mu ikipe ya Bugesera FC.

Uyu musore azamara igihe kigera ku cyumweru ari muri iyi kipe, yamushima agasinya amasezerano y'imyaka 5 ndetse akaba yatangwaho asaga miliyon 300 z'amanyarwanda.

Ikipe ya Charleroi ikina shampiyona y'icyiciro cya mbere mu Bubiligi, yashinzwe mu 1904. Iyi kipe kandi yazamutse mu cyiciro cya mbere bwa mbere mu 1947-48.

Igihe kiza yagize muri shampiyona ni ugusoreza ku mwanya wa kabiri mu mwaka w'imikino 1968-69.

Ani Elijah arimo asezera Manager we Emmy Fire 

Yabigarutseho ubwo mu Ishuri Rikuru rya Gisirikare rya Gako riherereye mu Karere ka Bugesera haberaga igikorwa cyo gusoza ku mugaragaro imyitozo ya gisirikare izwi nka Ushirikiano Imara 2024 yitabiriwe n'Ingabo z'u Rwanda, iza Uganda, Tanzania na Kenya.

Ni imyitozo yatangiye ku wa 6 Kamena 2024 ikazasozwa ku wa 26 Kamena 2024.

Iki gikorwa cyitabiriwe n'abayobozi batandukanye mu buyobozi bw'Ingabo zo mu bihugu byitabiriye ayo mahugurwa barimo Minisitiri w'Ingabo w'u Rwanda, Juvenal Marizamunda, Umugaba Mukuru w'Ingabo z'u Rwanda Gen Mubarakh Muganga, Umunyamabanga Mukuru wa EAC, Veronica Mueni, n'Umunyamabanga wa Leta ushinzwe Ubutwererane bw'Akarere muri Minisiteri y'Ububanyi n'Amahanga (MINAFFET), Gen (Rtd) James Kabarebe n'abandi.

Iyi myitozo igamije gufasha ingabo z'ibi bihugu kwitegura guhangana n'ibishobora guhungabanya umutekano wabyo. Yanitabiriwe n'abapolisi ndetse n'abo mu rwego rwa gisivili.

Umugaba Mukuru w'Ingabo z'u Rwanda Gen Mubarakh Muganga yagaragaje ko ibibazo by'umutekano muke byugarije Akarere ka Afurika y'Iburasirazuba bikwiye gukemurwa n'abagatuye ubwabo.

Yagize ati 'Ntabwo dufite impungenge kuko iyi myitozo yabahaye ubumenyi n'ubushobozi bwo kubasha guhangana n'ibibazo bikomeje guhungabanya umutekano w'ibihugu byacu mu karere.'

Yagaragaje ko aya iyo myitozo yashyizweho kandi igamije gushimangira imikoranire y'inzego z'umutekano mu Karere, kuzamura icyizere no kongera ubushobozi bwo guhangana n'ibibazo byugarije akarere.

Ati 'Ndasaba ko habaho imyitozo nk'iyo iduhuriza hamwe ikadufasha kubaka inzego z'umutekano zikomeye zishobora gutuma twishakamo ibisubizo. Mu by'ukuri ibibazo bya karande [inkomoko] bikenera ibisubizo by'ababivukiyemo. Mu yandi magambo hakenewe kubakwa uburyo bw'Akarere bukemura ibibazo byako.'

Yashimye uruhare rw'ubuyobozi bw'Akarere bukomeje kubaka inzego zitandukanye no kwishakamo ibisubizo ku bibazo bikugarije.

Umunyamabanga Mukuru w'Umuryango w'Afurika y'Iburasirazuba, Veronica Mueni, yagaragaje ko Ushirikiano Imara 2024 yitabiriwe n'abarenga 1130 kandi ko ibyakozwe bishingiye ku nkingi zigize uwo muryago nubwo hari ibitaritabiriye kubera impamvu zitandukanye.

Ibihugu bititabiriye ni u Burundi, Repubulika Iharanira demokarasi ya Congo, Sudani y'Epfo na Somalia.

Yakomeje ati 'Ubumwe, amahoro, umutekano n'imbaraga ni ingenzi cyane kwirwanaho nk'akarere ka Afurika y'iburasirazuba nubwo imikoranire mpuzamahanga nayo yagira umusaruro ariko dukwiye gushaka uburyo burambye ku gukemura ibibazo byacu.'

Yagaragaje ko uko gukorera hamwe nk'ingabo z'Akarere bikorwa bikwiye gushyirwa mu nzego zose z'uyu muryango hakimazwa imikoranire.

Minisitiri w'Ingabo, Juvenal Marizamunda, yagaragaje ko ikinyejana cya 21 cyagaragaje ko nta gihugu ubwacyo gishobora guhangana n'imbogamizi mu birebana n'umutekano uko cyaba gikomeye kose.

Yasabye abitabiriye iyo myitozo gukoresha ubumenyi bahawe mu nyungu rusange z'Akarere mu bihugu baturutsemo.

Yashimye kandi ubuyamabanga bukuru bw'Umuryango wa Afurika y'Iburasirazuba wemeye ko iyo myitozo ibera mu Rwanda kandi bukanayitera ingabo mu bitugu.

Kugeza ubu Akarere kugarijwe n'ibibazo birimo umutekano muke mu bihugu bikagize birimo Repubulika Iharanira Demokarasi ya Congo, Sudani y'Epfo NA Somalia.

Hari kandi ibibazo by'ubukungu butifashe neza muri ibyo bihugu ndetse n'umwuka utari mwiza hagati y'abenegihugu nko muri Kenya n'ibindi binyuranye.

Umugaba Mukuru w’Ingabo z’u Rwanda yagaragaje ko ubufatanye bwafasha mu gushakira akarere umutekano

Minisitiri w’Ingabo Juvenal Marizamunda yagaragaje ko mu gihe Isi igezemo ibihugu bikeneye ubufatanye mu guhangana n’ibibazo by’umutekano

Umuvugizi Wungirije w’Ingabo z’u Rwanda, Lt. Col. Simon Kabera niwe wayoboye ibi birori

Umunyamabanga Mukuru wa EAC, Veronica Mueni na we yashimangiye ibyo kwishakamo ibisubizo

Umunyamabanga Mukuru wa EAC, Veronica Mueni na we yashimangiye ibyo kwishakamo ibisubizo

Ubwo haririmbwaga indirimbo yubahiriza Igihugu

Mu biabiriye iyo myitozo harimo n’abapolisi

Umunyamabanga wa EAC, Veronica Mueni, Minisitiri w’Ingabo Marizamunda na Gen (rtd) James Kabarebe

Minisitiri Marizamunda yahawe ibendera rya EAC

Abasirikare bo muri Kenya nabo bari bitabiriye iyo myitozo

Maj Gen Andrew Kagame wayoboye imyitozo

Abasirikare n’abapolisi b’u Rwanda basoje imyitozo bafashe ifoto y’urwibutso

Ibihugu bine nibyo byitabiriye iyo myitozo yamaze ibyumweru bibiri

Hafashwe ifoto rusange

Army Band yo mu ngabo z’u Rwanda

Abasirikare bari bafite ibendera rya EAC mu gihe cy’akarasisi

Abasirikare b’u Rwanda mu karasisi

Abasirikare ba Uganda bitabiriye iyo myitozo

Amafoto: Kwizera Herve

Ni imibare yasohotse muri Gicurasi 2024 igaragaza ko abakobwa batewe inda mu 2023 ari 19,406, biganjemo abari hagati y'imyaka 15 na 19.

Hanagaragaramo impinja 75 zavutse ku babyeyi bafite imyaka iri hagati ya 10 na 14, ndetse no mu 2022 hari hagaragaye impinja 102 zavutse ku bakobwa bataruzuza imyaka 15.

Umuganga uvura indwara z'abagore n'abakobwa [gynecologue] waganiriye na IGIHE yatangajeko guhera ku myaka 10 umwana ashobora kujya mu mihango, bityo aba ashobora no gusama.

Gusa yavuze ko kubabyaza bishobora kuzamo ingorane nyinshi kuko baba bafite mu matako hatarakura neza.

Ati 'Abo ngabo kubera ko baba bafite mu matako hatarakura neza, bitewe n'umuvuduko umwana yakuranye ashobora kubyara neza, nk'uko ashobora kubyara bimugoye wenda bikaba ngombwa ko bamubaga, […] ariko aba afite ibyago byo kuba yananirwa kubyara bakamubaga.'

Imibare igaragaza ko mu 2017, abangavu batewe inda zitateganyijwe bari 17.331, umubare wazamutse cyane mu myaka yakurikiyeho bagera ku 23,622 mu 2019 mu gihe mu 2020 wageze kuri 19,701, bigeze mu 2021 baba ibihumbi 23,534.

Umuyobozi Mukuru wa HDI, Kagaba Aflodis yabwiye IGIHE ko hageze ngo abana bahabwe uburenganzira busesuye bwo kwifatira ibyemezo ku buzima bw'imyororokere bwabo kuko iyo batangiye gukundana baba bashobora no gukora imibonano mpuzabitsina kandi bagomba kurindwa gusama imburagihe.

Ati 'Ubundi njyewe umpaye uburenganzira nahera no kuri 12. Habayeho ibiganiro hagendewe ku makuru ahari dusanga ari ngombwa gushingira ku myaka 15 ariko n'undi uri munsi muganga abona ko abikeneye bikaba byaba nk'umwihariko akamuhereza.'

'Ubundi ntabwo twagombye gushyiraho imyaka kuko niba umwana abikeneye, ashobora kuba afite 12 undi ashobora kubikenera afite 14, ni ukuvuga ngo iyo umwana yinjiye mu gukundana ashobora gukora imibonano mpuzabitsina ni ngombwa ko afashwa ntasame.'

Ubushakashatsi bwa 6 ku buzima n'imibereho y'abaturage bugaragaza ko hari abagore bafite imyaka 15-19 basanze barakuyemo inda, abatwite n'ababyaye bafite abana bitaho.

Umubare munini w'aba bana ni abo mu byaro, mu gihe biganjemo abize amashuri abanza gusa, hamwe n'ayisumbuye.

bunagaragaza ko abana 4.5% b'abakobwa bakoze imibonano mpuzabitsina batarageza ku myaka 15, mu gihe abahungu bo ari 10.1% baba barakoze imibonano mpuzabitsina batarageza ku myaka 15. Muri aba harimo abari bafite abana mbere yo kugeza ku myaka 15 y'amavuko.

Abana baterwa inda imburagihe bahura n’ingaruka nyinshi zirimo no gutakaza ejo hazaza

CMUC ni irushanwa rihuza abanyeshuri bo muri za kaminuza n'amashuri makuru yo mu Rwanda, rigamije kubashishikariza kwitabira ibikorwa by'Isoko ry'Imari n'Imigabane ry'u Rwanda no kwizigamira no kubongerera ubumenyi muri izi nzego.

Iri rushanwa ritegurwa n'Ikigo kigenzura Isoko ry'Imari n'Imigabane mu Rwanda, CMA. Uyu mwaka ni inshuro ya 11 ryari ribaye.

Ryatangiye ku wa 01 Werurwe 2024, ryitabirwa n'abanyeshuri hafi 800 bo muri kaminuza no mu mashuri makuru yo mu ntara zose z'igihugu. Ibyiciro binyuranye by'iri rushanwa byagiye bikorwa hifashishijwe iya kure.

Kuri uyu wa Gatanu, tariki ya 21 Kamena 2024, habaye icyiciro cya nyuma cy'iri rushanwa aho intara zose n'umujyi wa Kigali byari bihagarariwe n'abanyeshuri 25.

Aba bahatanye mu gusubiza ibibazo mu ruhame mu byiciro bitanu, nyuma hakurikiraho icyiciro cya gatandatu cya kamarampaka cyahuje batanu bahize abandi mu byiciro byabanje. Cyarangiye Nshyimiyimana Jean Pierre, ariwe wegukanye umwanya wa mbere.

Buri munyeshuri muri aba batanu yagenewe ibihumbi 500 Frw yatanzwe na Banki ya Kigali.

Umuyobozi wa BK Capital, Siongo Kisoso, yagarutse ku buryo bwo gutangiza urugendo rwo gushora imari, abwira abahatanye muri iri rushanwa ko ari intambwe ya mbere bateye.

Ati 'Ishoramari rya mbere wakora ni ugushora mu bumenyi, ikindi ni ukureba uko ikoranabuhanga rikomeje gutera imbere ryagira umusanzu mu ishoramari ryawe. Ryagufasha kubona ubumenyi bwiyongera k'ubwo ufite, rikagufasha no kurushaho gusobanukirwa byinshi wakora. Ndabashishikariza kuribyaza umusaruro.'

Yakomeje agira ati 'Mbere y'uko utangira gushora imari banza wibaze impamvu nyirizina ushaka gushora imari kuko bizaguha ishusho ngari y'ibyo ushaka kugeraho, ikindi ni uguha agaciro igihe ukagikoresha neza.'

Umuyobozi w'Isoko ry'Imari n'Imigabane mu Rwanda, RSE, Rwabukumba Pierre Celestin, yagarutse ku byiza bituruka mu gushora imari mu isoko ry'imari n'imigabane.

Yavuze ko iyo habayeho iri shoramari ari uburyo bumwe bwo kwizigama, kandi bunakuzanira inyungu ku mwaka, kandi ko hari igihe agaciro k'imigabane kiyongera ukungukirwa, ndetse ukaba watanga imigabane yawe nk'ingwate muri banki, cyangwa ukanayiraga.

Ati 'Ikindi n'uko imigabane ushobora kuyikoresha kugura indi migabane. Ikindi uretse kwizigama, ushobora kugira igitekerezo cyiza ukayakuramo ukayakoresha.'

Iradukunda Valentine, wahatanye muri CMUC mu 2023, yatanze ubuhamya ku kamaro k'aya mahugurwa dore ko byamufunguriye amarembo, ubu akaba ari umwe mu banyamigabane muri BK Capital nyuma yo kuyishoramo. Yanagiriye inama abahatanye muri uyu mwaka ku nyungu zo kwizigamira.

Umuyobozi Mukuru w'Ikigo kigenzura Isoko ry'Imari n'Imigabane mu Rwanda, CMA, Thapelo Tsheole, yavuze ko iyi gahunda y'amarushanwa itanga umusanzu mu kubaka no kugeza ku rwego rushyitse abashoramari b'ahazaza ku isoko ry'imari n'imigabane.

Ati 'Ndashimira abafatanya bikorwa bacu aribo BK, BK Capital na RSE badufashije gutegura no gutera inkunga iki gikorwa kugira ngo kigende neza. Reka kandi twishimire ababashije kwitabira iri rushanwa n'abatsinze ku rwego rw'igihugu twizera ko bakuyemo ubumenyi bufatika.'

CMA ivuga ko urubyiruko rugana isoko ry'imari n'imigabane rugenda rwiyongera ku buryo bitanga icyizere ko mu bihe biri imbere urubyiruko ruzajya rutanga umusanzu mu iterambere ry'igihugu binyuze mu kugura imigabane ku isoko ry'imari n'imigabane.

Byasabaga kumva neza ikibazo, ugatanguranwa na bagenzi bawe kugaragaza ko ufite igisubizo, nyuma ugahabwa umwanya wo gusubiza

Icyiciro cya nyuma cyari indya nkurye kuko byasabaga kwitonda. Uyu ni Ashimwe wabaye uwa kabiri

Nshyimiyimana Jean Pierre, yiteguye kumva ikibazo ngo asubize

Bishimiraga bagenzi babo ubwo batangaga ibisubizo bya nyabyo

Iradukunda Valentine, wahatanye muri CMUC mu 2023, yatanze ubuhamya ku kamaro k'aya mahugurwa dore ko byamufunguriye amarembo, ubu akaba ari umwe mu byanyamigabane muri BK Capital

Batanu beza ku rwego rw’igihugu bahembwe

Nshyimiyimana Jean Pierre, niwe wegukanye umwanya wa mbere

Umuyobozi Mukuru wa CMA, Thapelo Tsheole, yavuze ko iyi gahunda y'amarushanwa itanga umusanzu mu kubaka no kugeza ku rwego rushyitse abashoramari b'ahazaza

Umuhuzabikorwa wa CMUC muri CMA, Magnifique Migisha, yagarutse ku rugendo rw'iri rushanwa kuva muri Werurwe

Umuyobozi w'Isoko ry'Imari n'Imigabane mu Rwanda, RSE, Rwabukumba Pierre Celestin, yagarutse ku mimaro myinshi y’imigabane, kugeza aho yagaragaje ko yanakubera ingwate muri banki

Umuyobozi wa BK Capital, Siongo Kisoso, yagaragaje ko urubyiruko rushoye imari bwa mbere mu bumenyi nta gihombo cyaba kirimo

Amafoto: Shumbusho Djasiri