Author: webrwanda

Rusesabagina washinze ndetse akayobora Umutwe wa MRCD/FLN, yari yarakatiwe gufungwa imyaka 25 mu Rwanda ahamijwe ibyaha by'iterabwoba bishingiye ku bitero wagabye ku Rwanda mu 2018 na 2019. Byaguyemo abagera ku icyenda, imitungo irasahurwa, ibindi birangizwa.

Ni nyuma y'uko uyu mugabo yari yatawe muri yombi muri Kanama mu 2020.

Ku wa 24 Werurwe 2023, Guverinoma y'u Rwanda yafunguye Rusesabagina na bagenzi be 19, nyuma y'imbabazi bahawe na Perezida.

Rusesabagina w'imyaka 68 yandikiye Perezida Kagame asaba imbabazi z'ibyaha yakoze ari na byo byatumye akatirwa igifungo cy'imyaka 25, yiyemeza kutazagisubira naramuka ababariwe, gusa nyuma y'igihe gito afunguwe yatangiye kunyuranya n'iyi mvugo.

Mu kiganiro Perezida Kagame yagiranye na France 24 yabajijwe uko yakiriye uku gutandukira kwa Rusesabagina bigendanye n'imbabazi yari yamuhaye.

Perezida Kagame yavuze ko abibona ko uyu mugabo yatandukiriye kandi afite amakuru ko yasubiye mu bikorwa byo gutera inkunga imitwe yitwaje intwaro, ashimangira ko azaba ari umunyamahirwe (niyongera kugirirwa imbabazi yahawe).

Ati 'Hari ibintu byinshi byabaye kugira ngo abe ari hariya hanze, gusa ntabwo dufite umwanya uhagije wo kubijyamo byimbitse, ariko ni byiza kuri we kuba ari hariya hanze akora ibyo aribyo byose ashaka kuvuga, haba mu guhindanya isura y'igihugu, ariko tunafite amakuru ko yasubiye mu bikorwa byo gutera inkunga iyi mitwe yitwaje intwaro. Azaba ari umunyamahirwe mu gihe kiri imbere niyongera gufatwa, akora ibyo yakoraga mbere ubwo yisangaga imbere y'ubutabera.'

Perezida Kagame yakomeje avuga ko ibyo Rusesabagina yakora byose, nta kibazo ashobora guteza u Rwanda cyangwa iterambere ryarwo.

Ati 'Wenda arashaka gukomeza kugerageza amahirwe ye ariko ibyo birasa no kwisumbukuruza, ariko icyo nakubwira ni uko ushingiye ku mateka ye, ibinyoma biri mu nkuru ye, ibyo yabihinduye akazi kandi ntacyo nabikoraho, ariko nakubwira ko nta ngaruka na nto yagira ku bibera mu rwanda, haba iterambere Cyangwa ibindi.'

Abajijwe niba yicuza kuba yaramuhaye imbabazi, Perezida Kagame yavuze ko 'oya nta kintu na kimwe nkwiriye kwicuza, ntabwo muha ako gaciro, nta nubwo njya mutekerezaho, kugeza igihe wazamuraga izina rye'.

Perezida Kagame atangaje ibi mu gihe Rusesabagina akomeje kugaragaza ko atigeze atezuka ku mugambi we wo guhungabanya umutekano w'u Rwanda.

Muri Gicurasi mu 2024 uyu mugabo yumvikanye ashimangira ko ibihumbi 20 by'Amayero yemereye ubutabera ko yahaye umutwe w'iterabwoba wa FLN atigeze abitanga.

Ati 'Nta mafaranga nahaye uwo mutwe witwaje intwaro'

Umunyamakuru Marc Perelman bagiranaga ikiganiro yahise amwibutsa ko yabyemereye Urukiko, undi mu kumuhwika avuga ko 'nabyemeye kugira ngo ndokore ubuzima bwanjye.”

Uyu mugabo kandi aherutse kumvikana anenga gahunda y'u Bwongereza yo kohereza abimukira mu Rwanda.

Mu gihe guverinoma y'u Bwongereza iri gutegura gahunda yo kohereza abimukira mu Rwanda, komisiyo y'Inteko Ishinga Amategeko ishinzwe uburenganzira bw'ikiremwamuntu yaganirije abantu batandukanye kugira ngo bayisobanurire uko uburenganzira bw'ikiremwamuntu bwubahirizwa mu Rwanda.

Ku wa 21 Gashyantare 2024, abagize iyi komisiyo baganirije Rusesabagina nk'umuntu 'uhirimbanira uburenganzira bw'ikiremwamuntu', bamubaza uko yari abayeho mu gihe yari mu Rwanda, ubuzima bwe bwo mu buhungiro mu Bubiligi n'ubwo mu igororero rya Nyarugenge.

Rusebagina yabwiye iyi komisiyo ko hashize hafi imyaka 30 atotezwa na Leta y'u Rwanda, kandi ngo azira abantu 1268 'yarokoreye' muri Hôtel des Mille Collines mu gihe cya jenoside yakorewe Abatutsi mu 1994.

Ati 'Kubera ibyo nakoze mu 1994, ibyo byabaye ikibazo. Kubera ko nabaye icyamamare, abanyamakuru bose bazaga mu Rwanda bashakaga kumvugisha mbere y'uko bagira undi bavugisha.'

Rusesabagina utuye muri Leta ya Texas muri Amerika, yatawe muri yombi muri Kanama 2020 akurikiranweho ibyaha by'iterabwoba bikomoka ku bikorwa bya MRCD-FLN byahitanye ubuzima bw'abantu mu Rwanda. Mu 2021, urukiko rwamukatiye igifungo cy'imyaka 25.

Rusesabagina yaje gusaba imbabazi arazihabwa, asohoka mu igororero rya Nyarugenge muri Werurwe 2023. Yarekuwe kugira ngo ajye kwivuza uburwayi budakira burimo 'Diyabete', kandi yari yahawe ibwiriza ryo kutongera kwijandika muri politiki irebana n'u Rwanda.

Rusesabagina washinze ndetse akayobora Umutwe wa MRCD/FLN, yari yarakatiwe gufungwa imyaka 25

Ni ibirori byitabiriwe n’abaturage barenga ibihumbi 25 bahuriye i Musanze ku kibuga cya Busogo gisanzwe mu Murenge wa Busogo, Akagari Kabatezi. Ni ikibuga giherereye mu Murenge wa Busogo, Akagari ka Gisesero, Umudugudu wa Gahanga. Hateraniye abaturage baturutse mu Turere dutandukanye.

Abahanzi barimo Riderman, Bruce Melodie, Dr Claude, Bwiza na Ariel Wayz ndetse n’abavanzi b’umuziki Dj Bisoso na Dj Brianne, ni bamwe mu basusurukije abantu ku munsi wa mbere wo kwiyamamaza k’Umukandida wa FPR Inkotanyi, Perezida Paul Kagame.

Abaturage bo mu Karere ka Nyabihu barashima cyane Perezida Kagame kubera ibyiza yabagejejeho. Perezida Kagame ahagarariye Umuryango FPR-Inkotanyi mu matora y’Umukuru w’igihugu azaba tariki 15 Nyakanga 2024 ku banyarwanda baba mu gihugu. Ni mu gihe abanyarwanda baba hanze y’u Rwanda bazatora kuwa 14 Nyakanga 2024.

Bamwe mu batutage baraye ku kibuga cya Busogo bategereje ko bucya, ubundi bakaganira n’Umukandida wa FPR Inkotanyi mu kumushimira ibyiza byinshi u Rwanda rwagezeho ku bwe, ndetse no kumugaragariza ko bamushyigikiye cyane mu matora y’Umukuru w’Igihugu.

Munyakabuga Juma waturutse mu Murenge wa Gataraga mu Karere ka Musanze yabwiye inyaRwanda ati: “Njye nageze aha saa Tanu z’Ijoro rwose, ku munsi w’ejo naryamye saa Kumi n’ebyiri mbyuka saa yine kugira ngo nitegure kuko nashakaga kubahiriza gahunda mfite na Perezida Kagame”.

Yakomeje agira ati: “Perezida Kagame yangejeje kuri byinshi byatuma ntamwibagirwa, urabona nawe dufite umutekano, amahoro iterambere n’ibindi, mbese arimo kudutindira”. Yasabye Perezida Kagame kuzakomeza kuyobora u Rwanda, ati: “Ikintu namusaba ni uko yakomeza kutuyobora, ntazigere aturambirwa”.

Mutesi Mediatrice yahamije ko we yahageze saa Munani z’Ijoro. Ati:”Njye nahageze saa Munani z’Ijoro kubera ko nashakaga kutica gahunda mfitanye n’uwatugejeje ku iterambere, akaduha ubwisungane mu kwivuza, akaduha inka ndetse akanita ku bakobwa babyariye iwabo, icyo ni cyo cyatumye ngera ahangaha nizinduye”.

Munyamboneza Jean Damascene waturutse mu Murenge wa Gataraga we yashimiye Perezida Kagame kutavangura ku butoni ndetse ahamya ko mu bana 5 yabyaye, bane muri bo bagiye kurangiza amashuri kubera Perezida Kagame.

Yavuze ko Perezida Kagame atarobanura ku butoni anamushimira ibyiza yagejeje ku Rwanda. Ati “Indi mpamvu rero kera bigaga bigoye, abatishoboye ntibige ariko ubu abana banjye bose bari kwiga mu bana 5 mfite, bane bagiye kurangiza. Ubuyobozi bwe buraryoshye”.

Abaturage ibihumbi n’ibihumbi bazindukiye i Musanze muri gahunda yo kwamamaza Perezida Kagame

Barashimira cyane Perezida Kagame ku byiza yagejeje ku Rwanda bakavuga ko ubuyobozi bwe buryoshye

Umwanditsi: Kwizera Jean de Dieu

Kimwe n'abandi banyarwanda bose baba abatuye mu Rwanda no mu mahanga, imyiteguro y'amatora y’Umukuru w’Igihugu n’ay’Abadepite azaba muri Nyakanga uyu mwaka irarimbanije no ku bahanzi bagiye gutora bwa mbere.

Mu gushaka kumenya uko aba bahanzi biteguye aya matora, InyaRwanda yaganiriye na bamwe muri bo bagiye gutora ku nshuro ya mbere barimo Bwiza, Josh Ishimwe, Babo, Ariel Wayz n'abandi.

Umuhanzikazi Ariel Wayz wamaze no guhuza imbaraga na Juno Kizigenza bagashyira hanze indirimbo izifashishwa mu matora bise 'Injyana,' yavuze ko yishimiye kuba agiye gutora ku nshuro ya mbere, yumvikanisha ko kuba akora ubuhanzi hari uwabigizemo uruhare.

Yagize ati: 'Ndumva nishimye kuba ngiye gutora ku nshuro ya mbere.  Nk'umunyarwandakazi, ni amahirwe akomeye yo guhitamo umuyobozi nyawe udukwiriye. Nk'umuhanzikazi, ni ugushimira ibyagezweho mu myaka ishize. 

Kuba ndi gukora ubuhanzi nk'umwuga hari uwabigizemo uruhare. Inzozi zanjye zaranyegereye. Hari uwabigizemo uruhare. Sinakwitesha amahirwe yo kumutora.'

Umuhanzikazi Bwiza ugezweho muri iki gihe kandi ukomeje kugaragara mu ndirimbo zinyuranye zizakoreshwa mu bihe by’amatora zirimo ‘Ogera’ yakoranye na Bruce Melodie, ‘Iyo Twicaranye Remix’ yahuriyemo na Senderi Hit n’izindi, yavuze ko atari we uzarota itariki y’amatora igeze.

Ati: “Yego ni ubwa mbere kandi ndumva binshimishije. Sinjye uzarota umunsi ugera nkatora.”

Ku rundi ruhande, umuhanzi w'indirimbo zo kuramya no guhimbaza Imana Josh Ishimwe, yavuze ko atari we uzarota itariki igera kuko ategerezanyije amatsiko menshi kuzabona nawe ari gutora kimwe n'abandi banyarwanda.

Mu ijambo rye yagize ati: 'Ndumva hatinze kugera ngo nanjye ntore ntange igikumwe cyanjye. Ndishimye cyane ndumva atari njye uzarota umunsi ugera. Niyo nshuro yanjye ya mbere, kandi nizeye ko nzatora nk'uko abanyarwanda nabo bakwiye gutora, dutore udukwiriye.

Umuhanzikazi Babo Ekeight wamamaye mu ndirimbo 'Go Low' yakoranye na The Ben, 'I'm in Love,' 'Turn Up' yakoranye na Urban Boyz n'izindi, yavuze ko ari iby'agaciro kuri we kuba agiye gutora ubwa mbere mu matora y'Umukuru w'Igihugu n'ay'Abadepite.

Ati: 'Ni iby'agaciro kuri njye kandi ndanezerewe cyane kuba ngiye gutora bwa mbere mu buzima bwanjye akaba aribwo bwa mbere ngiye gutora umuyobozi nkunda bivuye ku mutima. Zari inzozi zanjye kuzatora umuyobozi mukuru, rero kuba bigiye kuba biranshimishije cyane mfite umunezero.'

Mu kiganiro yagiranye n'itangazamakuru ku wa Kane tariki 16 Gicurasi 2024, Perezida wa Komisiyo y’Igihugu y’Amatora (NEC), Oda Gasinzigwa yagaragaje ko bishimiye kuba hari urubyiruko rugera kuri Miliyoni 2 rugiye gutora ku nshuro ya mbere.

Ati “Ni ibintu byiza kandi dukomeza gukangurira urubyiruko kwitabira ibikorwa by’amatora, biyongera ku rundi kuko muzi ko mu Rwanda umubare munini dufite ari urubyiruko.”

Yabwiye urubyiruko kugira uruhare mu matora, kandi ntibirangirire mu gutora gusa, kuko bashobora no kwiyamamaza. Ati “Icyo twabakangurira rero ni uko batumva ko ibikorwa by’amatora ari iby’abantu bakuze gusa, ahubwo ari ibyabo kuko igihugu ari icyabo, uyu munsi n’ejo bundi.'

Kugeza ubu, imibare igaragaza ko Miliyoni icyenda n’ibihumbi Magana atanu (9.500.000) bafite imyaka 18 kuzamura bari kuri Lisiti y’itora. Amatora agiye kuba ku nshuro ya Kane kuva Jenoside yakorewe Abatutsi mu 1994 yahagarikwa.

Ku mugoroba wo kuri uyu wa Gatandatu tariki 21 Kamena 2024, yifashishije imbuga nkoranyambaga ze yagaragaje ko yiteguye kujya gukorera ibitaramo mu Mijyi itandukanye muri kiriya gihugu mu rwego rwo kwagura inganzo ye, nyuma y'imyaka itatu ari mu muziki.

Ni ibitaramo agiye gukora yitwaje ibihangano bye biri kuri Album ze eshatu. Ndetse, muri uyu mwaka avuga ko azashyira imbere gukorana indirimbo n'abandi bahanzi, ariko kandi mu 2025 azatangira urugendo rwo gukora kuri Album ye ya Kane.

Yabwiye InyaRwanda ko mu gihe kiri imbere ari bwo bazatangaza amatariki bazakoreraho ibi bitaramo, ariko kandi bigamije kwishimana n'abakunzi b'umuziki we batuye muri Leta Zunze Ubumwe za Amerika. 

Ati 'Amatariki turacyari kuyavugaho neza, ntekereza ko mu minsi iri imbere tuzabimenyesha abantu. Ariko muri rusange ni ibitaramo bigamije kwishimana na Diaspora Nyarwanda iba muri Amerika.'

Nel Ngabo uherutse gusohora indirimbo yise 'Mbali' yavuze ko ibi bitaramo bizaba umwanya mwiza wo kugaragaza ibikorwa bye, kandi ni ibyishimo byinshi kuri we. Ati 'Ni ibyishimo kuri njye kujya gutaramana n'abakunzi banjye muri Amerika.'

Ibi bitaramo biri gutegurwa na Afro Hub Entertainment ihagarariwe na Ernesto Ugeziwe wabwiye InyaRwanda ko biri mu ruhererekane rw'ibitaramo bashaka gufashamo abahanzi Nyarwanda gukorera muri Leta Zunze Ubumwe za Amerika.

Yavuze ko mu byo bari gutegura harimo no kuba Nel Ngabo azaririmba mu bitaramo byiswe 'Made in Rwanda Weekend' hanyuma 'akomereze mu bitaramo bye bizagera mu Mujyi itandukanye'. 

Ati 'Nawe ari mu bazitabira 'Made in Rwanda Tour' ariko icyo ni kimwe muri byo, ubundi rero azakomeza urugendo rwe, ndetse amatariki tuzayatangaza vuba”.

Nel Ngabo agiye gutaramira ku nshuro ye ya mbere muri Leta Zunze Ubumwe za Amerika

Nel Ngabo yavuze ko ibi bitaramo bigamije kumuhuza n'abakunzi b'umuziki we mu Mijyi itandukanye

Nel Ngabo azaririmba no mu ruhererekane rw'ibitaramo byiswe 'Made in Rwanda Weekend' 

Muri Nzeri 2022, Nel Ngabo yakoreye ibitaramo bikomeye muri Canada

KANDA HANO UREBE AMASHUSHO Y'INDIRIMBO 'MBALI' YA NEL NGABO

Uyu mugore w'ikimero umaze igihe yinjiye mu muziki, yaserutse mu kabyiniro ka B Lounge i Nyamirambo mu Mujyi wa Kigali, ahagana saa saba z'ijoro ryo kuri uyu wa Gatandatu tariki 22 Kamena 2024, ni nyuma y'amasaha arenga atanu yari ashize abantu bamutegereje.

Ubwitabire bwari hasi ugereranyije n'imbaraga zashyizwe mu kwamamaza iki gitaramo, ndetse byatumye Tanasha atamara umwanya munini ku rubyiniro nk'uko bigenda ku bandi bahanzi.

Yageze ahabereye iki gitaramo aherekejwe na Jeanine Noach wamufashije gutaramira i Kigali ndetse n'umunyamideli Sacha Kate bamaranye igihe.

Tanasha aherutse kubwira itangazamakuru ko Jeanine Noach yamubereye umukoresha, ndetse ko Sacha Kate ari inshuti ye y'akadasohoka, bituma buri gihe amugaragaza ku mbuga nkoranyambaga ze.

InyaRwanda igiye kugaruka ku bintu bitanu byaranze igitaramo cya Tanasha Donna i Kigali

1.DJ Toxxky yahageze ntiyacuranga

DJ Toxxky wari mu bagomba gususurutsa abitabiriye iki gitaramo, yageze muri The B Lounge saa saba z’igicuku nyuma yo kubona ko umubare w'abitabiriye iki gitaramo ari bacye yategereje by'akanya gato ategereza ko Tanasha ajya ku rubyiniro, amucurangira indirimbo ebyiri ahita ataha. Ntiyongeye kugaragara aho.

2.Tanasha yaririmbye indirimbo ebyiri gusa

Tanasha Donna wari utegerejwe na benshi ndetse byari byavuzwe ko azasogongeza abakunzi b'umuziki indirimbo ziri kuri album ye yaririmbye indirimbo ebyiri gusa ahita ava ku rubyiniro.  

Uyu muhanzikazi yinjiye ku rubyiniro saa 1:30 Am z'igicuku aririmbana na bake mu bitabiriye iki gitaramo agerageza kuririmbana nabo abasanze mu byiciro byabo.

Tanasha ntiyatinze ku rubyiniro yaririmbye indirimbo ebyiri gusa zirimo 'Mood' na 'Gere' yakoranye na Diamond Platinumz ahita ava ku rubyiniro.

Uyu muhanzikazi yahise yinjira mu kabyiniro ka The B Lounge nabwo ahamara umwanya muto ahita ataha yerekeza kuri The B Hotel aho acumbitse.

3.Bushali ni umwe mu bishimanye na Tanasha Donna

Umuraperi Bushali uherutse gutaramira ku mugabane w’i Burayi ni umwe mu byamamare byaje gushyigikira Tanasha Donna muri iki gitaramo.

Ubwo Tanasha Donna yari avuye ku rubyiniro yahuye na Bushali bagirana ibiganiro bigufi bitamaze umwanya munini. Bushali ntiyashatse gutangaza ibyo yaganiriye na Tanasha Donna gusa avuga ko bigana aheza.

4.Bake bitabiriye batashye badashize ipfa

Iki gitaramo cyitabiriwe ku kigero gitandukanye n'icyari cyitezwe, bake baje baririmbanye na Tanasha Donna amasaha yakuze bigeze saa munani.

Ubwo byari bigeze aharyoshye bamaze kuririmbana indirimbo 'Gere' yakoranye na Diamond Platinumz, yahise ava ku rubyiniro bamwe bakimukeneye.

Nubwo batahanye ipfa, benshi bahize ko bongera guhura nawe kuri uyu wa Gatandatu tariki 22 Kamena 2024 kuri The B Hotel iri Nyarutarama.

Iki ni igitaramo cya kabiri Tanasha Donna akorera i Kigali aho kwinjira muri iki gitaramo bisaba kwishyura ibihumbi 250 Frw ku meza y’abantu batanu, ugahabwa n’amacupa abiri y’ibyo kunywa (Wine).

Tanasha ni umunyamideli w'umunya-Kenya ubarizwa muri Tanzania wabiciye bigacika mu myaka itanu ishize, yanabaye umunyamakuru w'igihe kirekire wa NRG Radio yo muri Tanzania.

Yavukiye muri Kenya, ku wa 7 Nyakanga 1995 kuri Nyina w'umunya-Kenya na Se w'Umutaliyani. Ubwana bwe yabumaze igihe kinini muri Kenya mbere y'uko yimukira mu Bubiligi, afite imyaka 11 ubwo yajyaga kubana na Se wabo. 

Yigeze kuvuga ko gukurira mu Bubiligi byatumye yiyumvamo kumurika imideli ndetse n'umuziki. Uyu mugore kandi ari ku rutonde rw'abakobwa bahataniye ikamba rya Miss World Kenya.

Muri Nzeri 2022, yagaragaye muri filime 'Symphony' yatumye ahangwa ijisho na benshi. Yavuzwe mu rukundo cyane na Mutuma baje gutandukana muri Nzeri 2017, nyuma y'amezi arindwi yari ashize bakundana.

Umwaka wa 2018 wabaye rurangiza kuri we! Yakundanye by'igihe kirekire na Diamond kugeza ubwo banabyaranye umwana bise Naseeb Junior. Ibi byanatumye Tanasha abasha gukorana indirimbo na Diamond bise 'Gere'.

Mu 2020, bombi barashwanye, buri umwe atangira urugendo rw'ubuzima bwe. Ariko kandi buri umwe yagiye ashinja mugenzi we kuba impamvu yo gutandukana. Kuva icyo gihe ntiyogeye kuvugwa mu rukundo. 

Tanasha yaririmbye indirimbo zirimo iyo yakoranye na Diamond babyaranye

Sacha Kate, Ruth na Jeanine Noach bashyigikiye Tanasha muri iki gitaramo 

Umwe mu bitabiriye iki gitaramo yasanze ku rubyiniro Tanasha barabyinana

Mu gihe cy’iminota 5, Tanasha yanyuzagamo akavuga ko yishimiye gutaramira i Kigali

Tanasha yataramiye abantu mbarwa muri iki gitaramo, agerageza uko ashoboye

Mu gihe cy’iminota 5, Tanasha Donna yagerageje kuririmba ibice by’indirimbo ze ebyiri 

Jeanine Noach wagize uruhare rukomeye mu kuba Tanasha yataramiye i Kigali

Uhereye ibumoso: Sacha Kate, Ruth, Tanasha Donna ndetse na Jeanine Noach

Tanasha Donna ari kumwe na Ruth bazanye i Kigali mu rugendo rw’ibitaramo bibiri

Umuraperi Bushali asuhuza Tanasha Donna mbere y’uko bagirana ibiganiro byihariye

Jeanine Noach [Nyirasenge wa Miss Nishimwe Naomie] wabaye umukoresha wa Tanasha mu Bubiligi

Abarimo Bushali, Sacha Kate, Jeanine Noach, Rutha wazanye Tanasha Donna basabaniye i Kigali

Basile washinze B Lounge [Uri iburyo] ari kumwe na Ganza, umukozi muri Heineken uri mu bateye inkunga iki gitaramo

Umuraperi Slum Drip ari mu bitabiriye iki gitaramo cya Tanasha i Kigali

Kanda hano urebe amafoto menshi yaranze igitaramo cya mbere cya Tanasha i Kigali

AMAFOTO: Dox Visual- InyaRwanda.com

Umutoza wa APR FC, Darko Nović yemeje ko umukino w’agapingane mu Rwanda awuzi ariko we akaba agomba gutekereza cyane ku ikipe ye gusa.

Ni nyuma y’uko ejo hashize ku wa Gatanu tariki ya 21 Kamena, APR FC yemeje uyu mugabo w’umunya-Serbia, Darko Nović nk’umutoza wa yo mu myaka 3 iri imbere.

Uyu mugabo yahise ajya ku myitozo ya yo i Shyorongi nubwo atakoresheje ariko yarayikurikiranye.

Abajijwe nk’umutoza mushya wa APR FC niba yaba azi umukino w’agapingane wa mbere mu Rwanda “1000 Hills Derby” (APR FC vs Rayon Sports), yavuze ko awuzi ariko na none we aba atekereza ku ikipe ye cyane.

Ati “Yego buri gihe wumva umukeba wa mbere, ariko nkunda kuvuga ko buri gihe mba ngomba gutekereza ku ikipe yanjye kuko n’amakipe yitwa ko ari mato ashobora kuguha akazi gakomeye, njye rero buri gihe ni ugutekereza kuri aba basore uko bakitwara neza.”

Yavuze ko intego ari ukwitwara neza mu ruhando Nyafurika bakaba bagera mu matsinda ya CAF Compions League kuko ari cyo ubu ikipe ikeneye kurusha ibindi byose.

Umukino uhuza Rayon Sports na APR FC ngo arawuzi ko ari wo wa mbere mu Rwanda

Darko Nović yavuze ko umukino w’agapingane awuzi ariko we aba areba ikipe ye cyane

Ni igikorwa cyabereye mu Murenge wa Shangi w'Akarere ka Nyamasheke ku wa 21 Kamena 2024. Aborojwe ni abo mu mirenge ya Shangi, Bushenge, Ruharambuga na Nyabitekeri.

Mu ngaruka Jenoside yakorewe Abatutsi yagize ku bayirokotse harimo n'ubukene kuko Interahamwe zabasenyeye inzu zikanabarira inka.

Ibi biri mu byatumye iri huriro n'Ishuri rikuru ry'imyuga n'ubumenyingiro n'Ubumenyingiro (RP) bakusanya ubushobozi ubagurira inka.

Nyuma yo gukusanya amafaranga agera kuri miliyoni 7Frw, iki gitekerezo bakigejeje ku Rwego rw'Igihugu rw'Imiyoborere RGB, rubagira inama yo gukorana na IBUKA kugira ngo ibafashe guhitamo abazazihabwa. IBUKA yabahitiyemo kuziha abarokotse Jenoside no mu mirenge ine muri 15 igize akarere ka Nyamasheke.

Mukangarambe Félicite, uri mu miryango 16 yorojwe, avuka mu muryango w'abantu barindwi. Mu gihe cya Jenoside barishwe bose arokoka wenyine ndetse n'inka zirenga 50 bari batunze ziribwa n'Interahamwe. Nyuma yo kurokoka yabayeho mu buzima bugoye n'ubwo yihanganaga agakenyera agakomeza bimwe by'intore ishinjagira ishira.

Uyu mubyeyi wo Mu mudugu wa Busasamana, Akagari ka Shangi Umurenge wa Shangi, yavuze ko kuva Jenoside yahagarikwa, yahoraga yibaza ukuntu bagenzi be bagira ababasura bakaboroza ariko we akaba nta n'umusura ngo amubaze uko abayeho.

Ati 'Nishimye cyane kuko Imana yansubije. Iyi nka igiye guhindura byinshi mu rugo rwanjye. Inka ni agakiza, inka ni amafaranga, inka ni urukundo umubyeyi wacu (Perezida Kagame) adukunda. Nzabonaho amafaranga y'ishuri, mitiweri n'ibindi'.

Niyondamya Sylvain wo mu murenge wa Ruharambuga yashimiye ababoroje avuga ko inka ahawe igiye kumufasha kwiteza imbere binyuze kongera umusaruro w'ubuhinzi kuko azaba yabonye ifumbire.

Umuyobozi wa NINGO, Geoffrey Kayonde yavuze ko bahisemo koroza abarokotse Jenoside yakorewe abatutsi mu rwego rwo kubafasha kwiyubaka.

Ati 'Uko turi imiryango 86 ijwi turihurije hamwe kuko iyo uremeye umuryango ukawuha inka, ejo ejobundi utera imbere nawo ukaba waremera undi muryango'.

Umuyobozi ushinzwe ibikorwa bya IBUKA, Nyiribakwe Jean Paul yashimiye Leta y'u Rwanda ko yemeye ko Ibuka ibaho, abarokotse Jenoside bakaba bahura, bakaganira ku bibazo bafite bakanabishakira ibisubizo.

Ati 'Turashimira Perezida wa Repubulika washyizeho gahunda ya Girinka. Abarokotse ba hano mu karere ka Nyamasheke twabaye inka 16. Turabasaba kuzifata neza no gusigasira urukundo kuko ni inka bahawe kubera urukundo bafitiwe n'abazibahaye'.

Mu karere ka Nyamasheke ni hamwe mu ho Jenoside yakorewe abatutsi yagize ubukana cyane kuko Ikiyaga cya Kivu n'Interahamwe byagose abatutsi bakabura aho bahungira.

Abarokotse Jenoside yakorewe abatusi bo mu karere ka Nyamasheke borojwe inka 16 zo kubafasha kwiteza imbere

Izi nka zifite agaciro ka miliyoni 7 Frw

Igikorwa cyo koroza abarokotse Jenoside batishoboye cyabereye mu mbuga ya Paruwasi ya Shangi

Nyuma y’imyaka 30 inka z’iwabo ziriwe n’Interahamwe yishimiye ko akanguriwe igicaniro