Webrwanda Backend

Author: webrwanda

  • Hamuritswe ikoranabuhanga ryitezweho kugenzura ikwirakwira ry'ibyorezo mu Rwanda – #rwanda #RwOT

    Ni umushinga watangiye mu 2021 ubwo icyorezo cya Covid-19 cyari kigifite ubukana bwo hejuru mu Rwanda, hagamijwe guhangana n'ikwirakwira ryacyo.

    Iki gikoresho umuntu yambara nk'isaha wagereranya n'igikomo, cyakozwe ku bufatanye bw'abarimu n'abanyeshuri bo muri Koleji y'Ubumenyi n'Ikoranabuhanga barimo batatu bimenyerezaga umwuga muri NARADA Ltd.

    Umuntu wambaye icyo gikoresho cyakozwe kimeze nk'isaha yajya amenya ko arwaye cyangwa se i ruhande rwe hari umuntu ushobora kumwanduza uburwayi n'inzego z'ubuzima zigahita zibona ayo makuru.

    Gifite ubushobozi bwo kumva igipimo cy'ubushyuhe umuntu afite, uko umutima utera, ingano y'umwuka wa Oxygène uri mu maraso, n'ukorora cyane kikagaragaza niba ari muzima cyangwa afite ibyago byo kuba arwaye ubutumwa bugahita bujya ku Kigo cy'Igihugu cy'Ubuzima.

    Umukozi mu kigo NARADA Ltd, Marvin Ogore, yasobanuye ko iri ikoranabuhanga ryakozwe rigamije gutahura abafite ibimenyetso bya Covid-19, ritahura aho umuntu wanduye aherereye n'uko agenda bakamukurikirana.

    Rishobora kubona abantu bafite uburwayi bari muri metero eshatu umwe aryambaye cyangwa bombi.

    Umuyobozi Mukuru wa ACEIoT, Prof Hanyurwimfura Damien, wayoboye umushinga wakoze iki gikomo yasobanuye ko umuntu ucyambaye iyo agaragaza ibimenyetso gikusanya, gihita gitanga impuruza ku bigo bikigenzura ariko na we yabishaka kikamuha ubutumwa kuri telefone ye.

    Yavuze ko ubu hari kurebwa niba iri koranabuhanga ryahuzwa n'izindi ndwara zandura ku buryo rifasha mu gukumira ko zikwira mu bantu benshi.

    Ati 'Ahantu hose dushobora gukoresha ikoranabuhanga bigakunda turashaka kuba twayishyiramo, ntabwo ari umwihariko ku ndwara runaka, aho tubona hose twatanga umusaruro twabikora.'

    Umuyobozi w'Ishami ry'Ubushakashatsi muri Koleji y'Ubumenyi n'Ikoranabuhanga (CST), Prof Telesphore Kabera, yavuze ko uyu mushinga kuba waragizwemo uruhare n'abanyeshuri babo birimo inyungu nyinshi.

    Ati 'Byafashije abanyeshuri mu gihe bari bari kwiga. Dufite izindi ndwara nyinshi zandura, barimo gutekereza noneho ukuntu bashobora kukigira ikintu kinini ku buryo cyakoreshwa ku ndwara zose zandura. Ari ku baturage hari ikintu bizafasha, n'abaganga kuba bicaye ahantu bakaba bavuga bati aha hantu indwara iri gukwirakwira gutya, no ku baturage bagatabarwa vuba.'

    Uyu mushinga washyizwe mu bikorwa ku bufatanye na Komisiyo y'Igihugu Ishinzwe Ubumenyi n'Ikoranabuhanga (NCST), ikigo cyigenga NARADA Ltd, n'ikigo African Centre of Excellence in Internet of Things gikorera muri CST, watwaye arenga miliyoni 60 Frw mu myaka irenga ibiri umaze.

    Prof Kabera yahamije ko bagira uruhare mu gukora ubushakashatsi ku bibazo bitandukanye, bibangamiye imibereho myiza y'abaturage bagatanga ibisubizo.

    Iki gikomo cyakorewe muri CST gifite ubushobozi bwo gutahura umuntu ufite umuriro mwinshi, ukorora cyane n’ibindi bimenyetso kigatanga impuruza kuri RBC

    Bavuze ko babonye ubushobozi bashyira ku isoko ikoranabuhanga bakoze

    Source : http://igihe.com/amakuru/u-rwanda/article/ur-cst-yamuritse-ikoranabuhanga-ryitezweho-kugenzura-ikwirakwira-ry-ibyorezo

  • U Rwanda rugiye kwakira inama Mpuzamahanga iziga ku birebana n'ingufu – #rwanda #RwOT

    Ni inama izaba ku wa 04 Ugushyingo 2024 ikazitabirwa n'abarenga ibihumbi bitandatu baturutse imihanda yose.

    Muri iyo nama kandi biteganyijwe ko hazabaho imurikabikorwa ku bafite imishinga y'ibirebana n'ingufu z'amashanyarazi.

    Iyo nama yateguwe ku bufatanye bwa Minisiteri y'Ibikorwa remezo n'ibigo biyishamikiyeho, Informa Markets na Rwanda Convention Bureau.

    Umuyobozi Mukuru ushinzwe ingufu muri Minisiteri y'Ibikorwa remezo, Mugiraneza Jean Bosco, yagaragaje ko kwakira iyo nama u Rwanda ruzabyungukiramo byinshi birimo no kunguka ubumenyi cyangwa abashoramari bashya mu birebana n'amashanyarazi.

    Ati 'Iyo abantu bateraniye hamwe bareba ibibazo n'ibyuho bihari, bakaganira uko bagiye babibonera ibisubizo abantu bakagenda bigira ku bandi, bakunguka ubumenyi kandi bakagenda bunguka ibitekerezo. Iyo abantu bashyize hamwe, baganiriye bagenda babona ibisubizo ku bibazo bari bafite.'

    Yagaragaje ko bitewe n'uko iyo nama izitabirwa n'abantu batandukanye bafite ishoramari rihambaye hirya no hino ku Isi, abayobozi mu nzego zitandukanye, abahagarariye ibigo by'ingufu z'amashanyarazi cyangwa ibigo bigenzura imikorere, abashakashatsi n'abandi bazafatanya mu gushakira hamwe ibisubizo bicyugarije Isi mu kugeza umuriro w'amashanyarazi ku baturage.

    U Rwanda rugaragaza ko kuri ubu 80% by'ingo zigerwaho n'umuriro w'amashanyarazi kandi ko hari intego z'uko biba 100% nubwo hakiri urugendo.

    Ati 'Kugera ku 100% bisaba amafaranga, bisaba ibikoresho, biriya bikoresho ntabwo tubikorera hano biva hanze. Turacyafite icyuho cya 20%. Ariko birenze 20% kuko muri abo 80% harimo abaturage bafite aturuka ku mirasire y'izuba kandi intego ni ukugira 100% y'amashanyarazi afatiwe ku muyoboro mugari.'

    Yagaragaje ko aho u Rwanda rugeze kuri ubu ari ku kigero gishimishije ukurikije aho rwavuye kandi byagizwemo uruhare n'ubuyobozi bwiza kuko mu 1994 rwari ku kigero kiri hagati ya 1 na 3% gusa.

    Umuyobozi ushinzwe imurikabikorwa muri Informa Market, Ade Yesufu, yagaragaje ko harimo amahirwe y'ishoramari kuko izitabirwa n'abantu b'ingeri zitandukanye kandi bafite imishinga yatanga ibisubizo mu kuziba icyuho kiri mu Rwanda no muri Afurika muri rusange.

    Ati 'Hari urubyiruko rwinshi rukeneye inama mu kwihangira imirimo kandi iyo ni imwe mu ntego z'iyi nama. Iyo urebye ibigo bito biri gushingwa usanga ahanini ari urubyiruko rubikora rero dukeneye kubarebaho nabo tukareba ko twabaha n'ubumenyi bukenewe.'

    Africa Energy Expo izamara iminsi itatu.

    Biteganyijwe ko nibura abantu ibihumbi bitandatu bazayitabira, ibigo birenga 150 bizamurika ibikorwa byabyo, abashoramari barenga 250 bakayizamo mu gihe abazatanga ibiganiro barenga 70 baturutse mu bihugu binyuranye.

    Abayobozi bagaragaza impamvu y’inama ya Africa Energy Expo

    Hatangajwe ko u Rwanda rugiye kwakira inama yiga ku birebana n’ingufu

    Umuyobozi ushinzwe imurikabikorwa muri Informa Market, Ade Yesufu, yagaragaje ko iyo nama igiye kuba ari amahirwe akomeye ku Rwanda rugiye kuyakira

    Source : http://igihe.com/amakuru/u-rwanda/article/u-rwanda-rugiye-kwakira-inama-mpuzamahanga-iziga-ku-birebana-n-ingufu

  • Umuhungu wa Gen Mubarakh Muganga wari umaze imyaka 4 muri APR FC yagaragaye muri Vision FC #rwanda #RwOT

    Umuhungu w’Umugaba Mukuru w’Ingabo z’Igihugu, Gen. Mubarakh Muganga, Niyonshuti Hakim Mubarakh wari umaze imyaka ine muri APR FC, yagaragaye muri Vision FC ashobora gusinyira mu gihe yaba yitwaye neza.

    Uyu mukinnyi utarahiriwe muri APR FC ni umwe mu bahawe umwanya muri Vision FC uyu munsi mu gice cya kabiri cy’umukino wa gicuti yakinaga na AS Kigali ikanayitsinda 2-1.

    Uyu mukinnyi wo hagati mu kibuga ukina asatira izamu, anyuze ku ruhande, ntarasinyira iyi kipe ari kwitorezamo, ariko ashobora kuyikomerezamo mu gihe Umutoza Calum Shaun Selby yashima urwego rwe.

    Niyonshuti Hakim Mubarak yagaragaye muri Vision FC

    Source : http://isimbi.rw/siporo/article/umuhungu-wa-gen-mubarakh-muganga-wari-umaze-imyaka-4-muri-apr-fc-yagaragaye-muri-vision-fc

  • Ishimwe Clement na Butera Knowless bizihije isabukuru y’ubukwe bwa bo bakira inka bagabiwe na Perezida Kagame (AMAFOTO) #rwanda #RwOT

    Umuhanzikazi Butera Knowless n’umugabo we Clement Ishimwe bizihije isabukuru y’imyaka umunani barushinze bakira inka bagabiwe na Perezida Kagame.

    Umunsi nk’uyu tariki 7 Kanama 2016 ni bwo aba bombi bakoze ubukwe biyemeza kubana akaramata bakazatandukanywa n’urupfu.

    Uyu munsi bizihije imyaka umunani barushinze akaba ari nabwo bakiriye inka baheruka kugabirwa n’Umukuru w’Igihugu, Perezida Kagame bongera kumushimira.

    Muri Nyakanga 2024, ni bwo Perezida Paul Kagame na Madamu Jeannette Kagame bakiriye abahanzi batuye mu Karumuna mu Bugesera, nk’uko yari yabibasezeranyije ku wa 6 Nyakanga 2024, ubwo yiyamamarizaga muri ako Karere.

    Ni icyifuzo cyari cyatanzwe na Butera Knowless ubwo Perezida Kagame yari ari mu bikorwa byo kwiyamamaza mu karere ka Bugesera, asaba ko nk’abaturanyi be bo mu karere ka Bugesera yazabatumira yabonye umwanya bagatarama bishimira intsinzi.

    Icyo gihe Perezida Kagame yargize ati 'Reka mbanze nsubize ibyasabwe na Knowless, ni uko yavuze mbere yanjye, naho nanjye nari mbifite ko nzashaka umwanya nkabatumira tugatarama.'

    Nyuma y’iminsi 9 gusa Perezida Kagame yahise asubuza icyifuzo cya Knowless atumira abahanzi batuye mu karere ka Bugesera by’umwihariko ahazwi nko mu Karumuna barimo Knowless, Producer Clement, Tom Close, Platini P, Nel Ngabo n’abandi batandukanye, ndetse aranabagabira.

    Kuri uyu wa 7 Kanama 2024 ni bwo aba bahanzi bagabiwe na Perezida Kagame bashyikirijwe inka bagabiwe.

    Ishimwe Clement abinyujije ku rukuta rwe rwa Instagram yagaragaje ko ari ibyishimo bidasanzwe kuri uyu munsi bizihijeho isabukuru y’imyaka 8 bakoze ubukwe, wahuriranye no kwakira inka bagabiwe na Perezida Kagame, baranamushimira.

    Ati “Mbega uburyo bwo kwizihiza isabukuru yimyaka 8 y’ubukwe, uyu munsi twakiriye Rugirabuntu na Rudahinyuka twagabiwe na Rudasumbwa. Turagushimira iteka Nyakubahwa Paul Kagame.”

    Clement yasoje abwira umugore we Knowless ko amukunda.

    Ati “Butera Knowless nkukunda buri munsi.”

    Knowless na Clement barizihiza imyaka 8 bamaze bakoze ubukwe

    Isabukuru y’ubukwe bwa bo bayizihije bakira inka bagabiwe na Perezida Kagame

    Imwe mu nka zagabiwe Knowless na Clement

    Abahanzi bagabiwe na Perezida Kagame bashyikirijwe inka za bo

    RUKUNDO Sulaiman / ISIMBI.RW

    Source : http://isimbi.rw/imyidagaduro/article/ishimwe-clement-na-butera-knowless-bizihije-isabukuru-y-ubukwe-bwa-bo-bakira-inka-bagabiwe-na-perezida-kagame-amafoto

  • Ruharwa Capt Sagahutu arahamagarira urubyiruko gusanga FDLR no guhakana Jenoside yakorewe Abatutsi kandi atunzwe na UN #rwanda #RwOT

    Mu mwaka wa 2015, umwanditsi w'umwongereza Andrew Wallis yasohoye inyandiko muri Open Democracy ivuga ku mugambi wo guhakana Jenoside yakorewe Abatutsi muri 1994.

    Mu ntangiriro y'inyandiko ye, yavuze ati: 'Ukuri niko guhura n'ingaruka z'intambara mu gihe cy'intamabara, ikindi nuko nyuma ya Jenoside haba gupfobya no guhakana. Abicanyi, abateguye n'abashyize mu bikorwa umugambi wa Jenoside bashakisha uko bihisha bakagoreka imibare y'abishwe, bakarangaza abantu mu mateka, bakigira intwari aho kuba abicanyi ndetse bakigira abatabazi'

    Guhakana Jenoside ni icyiciro cya nyuma cya Jenoside. Guhakana bigamije kwamagana abayikorewe no gutagatifuza abayikoze. Muri iyi minsi ruharwa Capt Innocent Sagahutu wakatiwe imyaka 20 n'Urukiko Mpanabyaha rw'Arusha ariko akarekurwa amaze 15 ari gutumirwa n'urubyiruko rw'abakomoka ku barimbuye Abatutsi bashinze amashyirahamwe n'ibinyamakuru bigamije gutagatifuza ababyeyi babo ndetse no kugoreka amateka ya Jenoside yakorewe Abatutsi.

    Abagize iri tsinda rigizwe n'abana bari abayobozi muri Guverinoma yakoze Jenoside bahungiye I Burayi n'ahandi ku isi bakiri bato hakiyongeraho na Chaste Gahunde wakoze Jenoside ariko inkiko zigasanga yarayikoze ari umwana.

    Umwicanyi Sagahutu bamwita 'intwari' ndetse bamuzamuriye ipeti aba Jenerali maze nawe akabyemera rwose. Ubu niwe ufatwa ko ariwe wakijije impunzi akazigeza muri Kongo mu cyiswe 'Operation Champagne'. Ntiyemera ko batsinzwe yemera ko babuze intwaro mu rwego rwo kugoreka amateka.

    Mu butumwa bwe Sagahutu ashishikariza urubyiruko gusanga FDLR muri Kongo bakifatanya nuwo mutwe ngo bagataha muri gakondo ndetse no guhakana Jenoside yakorewe Abatutsi aho ibyaha byose abishyira ku bishwe agatagatifuza ingabo z'u Rwanda ndetse n'Interahamwe.

    Sagahutu wari mu itsinda ry'ingabo z'abicanyi rikoresha imodoka z'intambara yahungiye muri Zaire nk'abandi bicanyi nyuma ahungira muri Danemark ahari umuryango we.

    Sagahutu atunzwe n'amafaranga ya UN imuha buri kwezi kugirango abeho, Ese azakomeza gukoresha ayo mafaranga mu bikorwa byo guhungabanya umutekano w'u Rwanda no guhakana Jenoside yakorewe Abatutsi yamuhamye nka ruharwa?

    Sagahutu wavukiye mu cyahoze ari Perefegitura ya Cyangungu muri Komini Gisuma yari mu ngabo z'u Rwanda muri Jenoside yakorewe Abatutsi yari afite ipeti rya Kapiteni. Yari yungirije umukuru wa Batayo ya Reconnaissance yari iyobowe icyo gihe na Major Nzuwonemeye.

    Nkuko bigaragazwa n'inyandiko z'Urukiko Mpanabyaha rw'Arusha, hagati ya 1990 na 1994, Sagahutu hamwe n'abandi basirikari bakuru ba FAR bari bafite umugambi wo kurimbura Abatutsi ndetse n'abatavuga rumwe na MRND bakaba kandi baratoje Interahamwe n'indi mitwe yitwaraga gisirikari yagize uruhare rukomeye muri Jenoside yakorewe Abatutsi.

    Nyuma y'urupfu rwa Habyarimana, Sagahutu na Nzuwonemeye bagize uruhare mu iyicwa rya Minisitiri w'Intebe Agathe uwilingiyimana n'abasirikari icumi b'ababiligi.

    Yafatiwe mu mugi wo muri Danimarike tariki ya 15 Gashyantare 2000 aho yari amaze imyaka isaga ibiri nuko yoherezwa Arusha tariki ya 24 Gashyantare 2000.

    Muri Mata 2011, Sagahutu ndetse n'abandi bicanyi bakatiwe n'Urukiko rw'Arusha aho yasabiwe igihano cyo gufungwa imyaka 20. Urukiko rw'ubujurire bwamukatiye imyaka 15 aho yarekuwe by'agateganyo muri Gicurasi 2014.

    Sagahutu ushaka impinduka mu Rwanda aho ashishikariza abantu gutera u Rwanda yibuke ibyabaye kuri Col Nkundiye na Lt Col Dr Froduald Mugemanyi mu mwaka wa 1998 bari bayoboye ALiR/PARiL ndetse n'abandi babasimbuye mu mutwe wa FDLR harimo na Lt Gen Mudacumura uheruka kwicwa mu mwaka wa 2019.

    The post Ruharwa Capt Sagahutu arahamagarira urubyiruko gusanga FDLR no guhakana Jenoside yakorewe Abatutsi kandi atunzwe na UN appeared first on RUSHYASHYA.

    Source : https://rushyashya.net/ruharwa-capt-sagahutu-arahamagarira-urubyiruko-gusanga-fdlr-no-guhakana-jenoside-yakorewe-abatutsi-kandi-atunzwe-na-un/?utm_source=rss&utm_medium=rss&utm_campaign=ruharwa-capt-sagahutu-arahamagarira-urubyiruko-gusanga-fdlr-no-guhakana-jenoside-yakorewe-abatutsi-kandi-atunzwe-na-un

  • Abahagarariye iperereza mu Rwanda na RDC bahuriye i Luanda – #rwanda #RwOT

    Ni ibiganiro byabaye kuri uyu wa Gatatu tariki 7 Kanama 2024. U Rwanda ruhagarariwe n'abarimo Umunyamabanga Mukuru wungirije w'Urwego rw'Igihugu rushinzwe Umutekano n'Iperereza (NISS), Col. Jean Paul Nyirubutama n'Umuyobozi muri Minisiteri y'Ingabo Ushinzwe ubutwererane mpuzamahanga, Brig Gen Patrick Karuretwa.

    Iyi nama igamije kurebera hamwe uko ibibazo by'umutekano muke uri mu Burasirazuba bwa Congo byakemuka. Ni inama ikurikira iyahuje ba Minisitiri b'Ububanyi n'Amahanga b'ibihugu byombi mu cyumweru gishize.

    Mu kiganiro Minisitiri w'Ububanyi n'Amahanga, Amb. Olivier Nduhungirehe, aherutse kugirana na IGIHE, yavuze ko kimwe mu byo baganiriye mu nama baherukamo, bemeje ko bagomba gushyiraho Itsinda ry'inzobere mu bijyanye n'iperereza rihuriweho.

    Ati 'Mbere na mbere twiyemeje ko haba guhagarika imirwano hagati y'impande zishyamiranye, twiyemeza gukurikirana uko bishyirwa mu bikorwa. Hari urwego rwitwa Adhoc mechanism rusanzwe ruriho ariko twafashe icyemezo cyo kurwongerera ingufu, aho tuzashyiramo n'inzobere mu byerekeye iperereza z'ibihugu bitatu, Angola, Congo n'u Rwanda. Zizajya zihura kugira ngo zirebe uko guhagarika imirwano byubahirizwa.”

    'Ntabwo guhagarika imirwano ari byo byakemura ikibazo, uhagarika imirwano kugira ngo ubone umwanya wo gukemura ibindi bibazo. Twumvikanye ko impuguke zizahura vuba mu cyumweru gitaha kugira ngo baganire ku byerekeye umugambi wo kurandura FDLR ari yo mutwe uteza ikibazo akarere n'u Rwanda, banaganire ku bindi bijyanye n'ingabo ziri muri kariya karere.'

    Iyi nama ibaye mu gihe hari ikibazo cy'uko n'icyemezo giherutse gufatirwa i Luanda cyo guhagarika imirwano hagati y'impande zihanganye muri Congo kitigeze cyubahirizwa.

    Iyi nama igamije kurebera hamwe uko ibibazo by'umutekano muke uri mu Burasirazuba bwa Congo byakemuka

    Umunyamabanga Mukuru wungirije w'Urwego rw'Igihugu rushinzwe Umutekano n'Iperereza (NISS), Col. Jean Paul Nyirubutama, akurikiye ibiganiro

    Source : http://igihe.com/amakuru/u-rwanda/article/abahagarariye-iperereza-mu-rwanda-na-rdc-bahuriye-i-luanda

  • Gavi wa Barcelone mu rukundo n'igikomangomakazi #rwanda #RwOT

    Inkuru y'urukundo ivugwa hagati y'umukinnyi wa FC Barcelona n'umukobwa w'umwami w'igihugu cya Epagne

    Ni inkuru yatangiye kujya hanze ubwo uyu mukobwa w'umwami witwa Princess Leonor w'imyaka 19 yisanze akunda umukinnyi Pablo Gavira usanzwe uzwi nka Gavi w'imyaka 20 biza gusa n'ibifata intera ubwo umwami wa Espagne Felipe wa gatandatu yagaragaye arikumwe na Gavi arimo asinya kumwambaro we w'ikipe y'igihugu ya Espagne uriho nimero 9 asanzwe yambara bivugwa ko uyu mwambaro King Felipe wa gatandatu yari yawusabwe n'umukobwa we ko Gavi yawusinyaho akawumuzanira arinako byagenze

    Ikindi kintu cyaje kugira inkuru impamo ko uyu mukobwa w'umwami Princess Leonor yakunze uyu musore nuko muri 2022 amakayi ndetse n'ibitabo yajyanaga kwiga byari byuzuyeho amafoto ya Gavi abantu bati inkuru ni impamo umukobwa yisanze yarobye

    Gusa abantu bakomeza kwibaza impamvu Gavi atagaragaza ubushake bwo kuba yakundana nuyu mukobwa w'umwami ariko nanone umuryango wa cyami (Royal Family) muri Espagne ntago wemera ko umwe mubawugize agaragara mubikorwa ibyaribyo byose by'umupira w'amaguru bityo mugihe Gavi yakemera kuba yajya murukundo nuyu mukobwa umupira w'amaguru ahita asabwa kuwusezera burundu akinjira ibwami agafata izindi nshingano.

    By Thiago

    Source : https://flash.rw/2024/08/07/gavi-wa-barcelone-mu-rukundo-nigikomangomakazi/

  • Abatasi b'u Rwanda baganiriye n'aba Kinshasa muri Angola #rwanda #RwOT

    Abahagarariye inzego zishinzwe iperereza hagati y'u Rwanda na Repubulika Iharanira Demukarasi ya Congo, RDC, bahuriye i Luanda muri Angola, mu biganiro bigamije kwigira hamwe ahaturuka umuti w'ibibazo by'umutekano muke mu Burasirazuba bwa Congo

    Baganiriye ku byo babona byakorwa kugira ngo umutekano urambye ugaruke mu Burasirazuba bwa DRC aho umutwe M23 umaze iminsi usibana n'ingabo za DRC n'abazishyigikiye.

    Intumwa z'u Rwanda ziyobowe na Colonel Jean Paul Nyirubutama akaba umuyobozi mukuru wungirije w'Urwego rw'u Rwanda rushinzwe umutekano n'iperereza, NISS.

    Ari kumwe n'umuyobozi muri Minisiteri y'ingabo ushinzwe ububanyi n'amahanga mu bya gisirikare Brig Gen Patrick Karuretwa na Col Regis Gatarayiha ushinzwe iby'ikoranabuhanga n'itumanaho muri Minisiteri y'ingabo z'u Rwanda.

    Inama yabo ije ikurikira iy'Abaminisitiri b'ububanyi n'amahanga bo muri ibi bihugu iherutse kubera muri Angola ku buhuza bw'iki gihugu.

    Ni inama yari yemeranyirijwemo ko impande zihanganye mu Burasirazuba bwa DRC bishyira intwaro hasi hakaba agahenge.

    Icyakora ako gahenge uko bigaragara ntakabaye kubera ko abarwanyi ba M23 bavuze ko ibya ako gahenge bitabareba kuko itatumiwe aho kemerejwe.

    Perezida Tshisekedi wa Kongo Kinshasa mu binyamakuru byo mu gihugu cye yavuze ko ibi biganiro bya Luanda muri Angola haganirwa uko umutwe wa FDLR wasenyuka nta bindi bigomba kuhavugirwa.

    Ntibyatinze imirwano irakomera ku buryo hari abaturage benshi ba DRC barimo n'abapolisi bahungiye muri Uganda.

    Byatumye Uganda ibona ko ibintu biri kuyototera ihitamo kongera abasirikare bayo ku mupaka uyigabanya na DRC.

    Source : https://flash.rw/2024/08/07/abatasi-bu-rwanda-baganiriye-naba-kinshasa-muri-angola/

  • Gukora indirimbo 7 ku kwezi no guhabwa 40% y… – #rwanda #RwOT

    Ariko uyu musore w’i Karongi yigaragaje cyane kuva mu myaka itanu ishize, byatumye amagana y’abahanzi amwegera, ndetse abarimo Bruce Melodie, Kenny Sol, Juno Kizigenza n’abandi yabakoreye indirimbo zabaciriye inzira mu muziki.

    Kopi y’amasezerano yagiranye na Label 1:55 AM ifitwe na InyaRwanda, bigaragara ko yateguwe kandi igashyirwaho umukono ku wa 28 Ukuboza 2022. Bivuze ko byasabye hafi iminsi 16 kugirango bitangazwe mu itangazamakuru ko uyu musore yatangiye gukorana n’iyi Label iri mu zihagazeho muri iki gihe.

    Element ari kuvugwa cyane muri iki gihe biturutse mu kuba indirimbo ‘Sikosa’ yakoreye The Ben na Kevin Kade asabwa kuyivamo, kuko yayigizemo uruhare uruhande rwa Label abarizwamo rutabizi.

    Amakuru avuga ko Label ye yamuhaye amahitamo abiri; Kuva muri iriya Label cyangwa se kwishyura asaga  Miliyoni 500 Frw kubera ko atubahirije amasezerano.

    Ibikubiye mu masezerano yashyizeho umukono ari kuri Paji esheshatu

    1.Uburenganzira afitweho n’umushoramari ndetse na Serivisi agomba gutanga (Investor’s rights and Services):

    Kuri iyi ngingo Label ivuga ko izahagararira inyungu za Producer Element mu cyo bise ‘Entertainment Industry’ igizwe n’umuziki, Televiziyo, Ikinamico, ibibyara inyungu kuri Internet, ubugeni n’ibindi.

    Label ivuga ko izafasha Producer mu bijyanye no gukora indirimbo no kuyinononsora (Mastering).

    Ikindi ni uko iyi Label izakomeza gushaka ibintu byaha amahirwe Element kugirango izina rye rikure, banamufasha gukora ‘Collabo’ yaba imbere mu gihugu no hanze.

     

    2. Fee (Uko bafata inyungu ku byo yakoze)

    -Iyi Label ivuga ko mu gihe habayeho gukora indirimbo n’ibindi bikorwa biri muri ‘Music Industry’ bazajya bafata 60%. Bivuze ko ibyo binjije bivuye mu mirimo ya Element bazajya bafataho 60%.

    Urugero niba Producer Elementa akoze indirimbo ku mafaranga Miliyoni 1 Frw bazafataho ibihumbi 600 Frw, Element afateho ibihumbi 400 Frw.

    -Muri iyi ngingo banavuga ko ku bundi bucuruzi nko kwamamaza n’ibindi bikorwa byazanywe na Label ye, nabwo bazajya bafataho 60% y’inyungu (Net Revenue) atari iby’umusaruro mbumbe.

    -Imishinga yose Producer yari afite mbere y’uko asinya aya masezerano ntacyo Label ibirebaho. Urugero niba yari afite indirimbo yakoragaho atarashyira umukono ku masezerano ntacyo iyi Label ikurikiranaho.

    3.Kurangiza amasezerano mbere y’igihe mwavuganye (Early Termination)

    Aha ni igihe ushobora gusesa amasezerano mbere y’igihe mwavuganye. Urugero, niba Element yarasinye amasezerano y’imyaka itatu, agasaba ko arangira mbere y’uko iriya myaka igera.

    Kuri iyi ngingo, Label ye ivuga ko Producer Element ashobora gusesa amasezerano ako kanya ariko yabanje gutanga integuza. Ariko kandi usesenguye muri ‘Contract’ ntabwo bagaragaje igihe cyo gutangira integuza

    Bagaragaza ko Element yemerewe gusesa amasezerano igihe habayeho icyaha, ubujura, uburiganya bikozwe n’iyi Label bijyanye no kubahiriza inshingano ze.

    Ariko kandi ashobora no gusesa amasezerano igihe Label itari kubahiriza ibyo imugomba kugirango abashe gukora akazi. Anashobora guseswa kandi igihe Producer yananiwe kuzuza ibyo bumvikanye.

    4.Sunset (Hari abanyamategeko bavuga ko ingingo nk’iyi itabamo mu masezerano)

    Kuri iyi ngingo, Label ivuga ko izakomeza kubona amafaranga cyangwa se kugira uburenganzira ku bikorwa byose, kuri Album n’ibindi byakozwe mu masezerano cyangwa mbere y’uko amasezerano aseswa.  

    Aha ni ukuvuga ko Label ye ifite uburenganzira bwo gukomeza kwakira ‘Commission’ ku bikorwa bya Element, haba mbere yo gusesa amasezerano cyangwa nyuma yo gusesa amasezerano.

    Urugero bashobora gusesa amasezerano kuri uyu wa Gatatu ariko hari indirimbo Element yarimo akoraho itararangira. Bavuga ko bazakomeza gufata amafaranga kuri iyo ndirimbo ku kigero cya 50% y’umusaruro mbumbe (Gross Revenue).

    5.Accounting Records

    Muri iyi ngingo bavuga ko Element ategetswe gutanga raporo buri minsi 15 mbere y’uko ukwezi kurangira.

    Ariko kandi bavuga ko Element ariwe wemerewe guhitamo igiciro akoreraho indirimbo, ariko kandi agatanga raporo ku buyobozi bwa Label.

    6.Producer’s responsibilities during the term (Inshingano za Producer mu gihe cy’amasezerano)

    -Element yemeye gukora amasaha 40 mu Cyumweru muri 1:55 Studio ndetse no muri  1:55 AM Production-Bivuze ko agomba gukora amasaha umunani ku munsi.

    -Element kandi agomba gukora no gutunganya byibuze indirimbo 7 ku kwezi.

    -Asabwa kandi gushyira ikirango (Jingle) cya 1:55 AM muri buri ndirimbo yose akoze.

    6.Confirm the method of Payment

    Label ivuga ko ariyo igomba gukurikirana no kwita ku bikorwa byose bikorewe muri 1:55 AM, kandi buri gihembwe bereka Producer ibyakozwe, agahembwa. Bavuga ko bamwereka iriya raporo bakuyemo ibyo bashoye.

    Igihe Producer kandi abisabye, ahabwa inyandiko zigaragaza ibyinjijwe mbere y’iminsi itatu.

    7.Recruitment Fees

    Kuri iyi ngingo bavuga ko hari amafaranga bamuhaye bamuha ikaze muri iyi Label ariko ntavugwa muri aya masezerano.

    Source : https://inyarwanda.com/inkuru/145689/gukora-indirimbo-7-ku-kwezi-no-guhabwa-40-yibyinjiye-ibikubiye-mu-masezerano-ya-element-na-145689.html

  • Igitutu cya M23 cyasohoye Tshisekedi mu bitaro adakize, none uburwayi bumuvugishije amangambure. #rwanda #RwOT

    Perezida Félix Tshissekedi wa Kongo amaze iminsi mu bitaro byitwa'Saint-Luc' by'i Buruseli mu Bubiligi, aho yanabagiwe kubera uburwayi bw'umugongo.

    Mu gihe abaganga bamusabaga kuba agumye mu bitaro akabanza agatora agatege, amakuru yamugezeho ko M23 ikomeje kwambura ingabo ze ibirindiro byinshi kandi bikomeye, maze ahitamo gutoroka abaganga, ngo ajye kurwana intambara y'amagambo, dore ko ariyo we n'abambari be bagikanyakanyamo.

    Ikindi cyamuhubanuye mu bitaro akirwaye, ni igitutu cy'amakuru yasohotse, ahishura ko Leta ya Kinshasa yohereje intumwa i Kampala gushyikirana mu ibanga na M23. Kubera ko Tshisekedi yabeshye abahezanguni ko adashobora gushyikirana na M23, yagombaga gutabara bwangu, akaza gushimisha abanzi b'amahoro, abemeza ko' igihe cyose azaba akiri Perezida atazigera ashyikirana na M23″.

    Ngiyo impamvu rero abajyanama be, barimo Patrick Muyaya, bamushushubikanyije, bamushora mu itangazamakuru akirwariye, birengagije ko umuntu ukiva ku iseta bimusaba igihe gihagije ngo ibitekerezo bye bisubire ku murongo.

    Reka rero Perezida Tshisekedi bamuterere agatebe imbere y'abanyamakuru, muri ambasade ya Kongo-Kinshasa i Buruseli, maze si uguhuzagirika no gusohora amagambo atabanje gupima uburemere bwayo, sinakubwira!

    Ikibabaje kurushaho, abamushoye imbere ya camera akirwaye ntibabanje no kumva aho yinyuzemo ngo bahakate, cyangwa bamusabe kuhakosora mbere y'uko amangambure ye atambutswa.Twibutsa ko iki kiganiro kitari' live', ko rero kugitunganya byashobokaga mbere yo kugishyikiriza muri rubanda.

    Tshisekedi ati' turishyura ikiguzi cyo kuba abajenosideri barinjiranye intwaro muri Kongo'.

    Nta gihe u Rwamda rutasobanuye ko imwe mu ntandaro z'umutekano muke cyane cyane mu burasirazuba bwa Kongo, ari abajenosideri bo muri FDLR bagiye gukomereza umushinga wabo w'ubwicanyi n'ubundi bunyamanswa muri Kongo, bibasira by'umwihariko Abakongomani bo mu bwoko bw'Abatutsi.

    U Rwanda kandi ntirwahwemye kugaragariza isi yose ko Leta ya Kongo yashyize ku ibere abajenosideri ba FDLR, ibaha imyitozo n'intwaro ziyongera ku zo binjiranye muri 94, ndetse ibinjiza mu gisirikari cya Leta, umugambi ari ugutsemba Abatutsi b'Abanyekongo, ariko cyane cyane guhungabanya umutekano w'uRwanda.

    Igihe cyose havugwaga ikibazo cya FDLR, Leta ya Kongo yabyitaga' urwitwazo rw'uRwanda rushaka gusahura Kongo, kuko nta FDLR ikirangwa ku butaka bwa Kongo'. Ubuhubutsi bwa Tshisekedi rero bugize neza, kuko yeruye ati:' Umuryango mpuzamahanga wakoze ikosa rikomeye ryo kurekera intwaro abajenosideri ubwo baduhungiragaho, none Kongo irimo kwishyura ikiguzi cyabyo'.

    Mu gushimangira kandi ko FDLR atari 'baringa' nk'uko yajyaga abikwiza,Tshisekedi yanavuze ko impande zirebwa n'imyanzuro ya Luanda nineho zigiye gutangira gahunda yo guhashya FDLR. Gusa ababikurikiranira hafi bemeza ko ibyo ari cya kinyoma Tshisekedi asanganywe, kuko adafite ubushake n'ubushobozi bwo kwikuraho FDLR, kandi ari amaboko ye.

    Bwa mbere, Tshisekedi yashinje ku mugaragaro Joseph Kabila kuba inyuma y'umutwe wa AFC/M23.

    Kugeza ubu ibyo kuba Joseph Kabila, wahoze ari Perezida wa Kongo-Kinshasa, yaba ari mu bikorwa bya gisirikari birwanya ubutegetsi bwa Tshisekedi, byajyaga bivugwa mu matamatama gusa gusa, ariko byari bitarashyirwa ahagaragara n'umutegetsi ukomeye nka Perezida wa Repubulika. Muri icyo kiganiro rero, adaciye ku ruhade, Perezida Tshisekedi yagize ati: 'Joseph Kabila yanze kwitabira amatora aheruka, ahitamo kwigomeka, kuko AFC ni iye bwite'.

    Perezida Kagame niwe wigeze kuvuga ko Tshisekedi ashobora gukora ibintu byose bimuje mu mutwe, uretse gupima uburemere bw'amagambo ye. Aha Tshisekedi yari amaze guhagarara ku maguru ye abiri, atangaza ko azagaba ibitero ku Rwanda, atitaye ku gaciro u Rwanda rwagombaga guha ayo magambo, mu rwego rwo gukumira ibyo bitero.

    N'ubu rero yakije umuriro adafitiye ubushobozi bwo kuzimya. Guhuza Joseph Kabila na AFC/ M23 ntawe uzi uko Kabila abyakira, gusa bishobora kuba nko gukora mu jisho ry'intare yari yisinziriye.

    Nubwo Joseph Kabila asanzwe ari Senateri, ntakunze kumvikana avuga kuri politiki ya Kongo. Ndetse bivugwa ko inzego za Leta zagiye zimwendereza, nko kuvogera umutekano we n'uwabagize umuryango we, ariko akomeza kuzima amahirwe yo guhangana ku mugaragaro, ngo zitabona aho zihera zimushinja kuvutsa igihugu umudendezo.

    Ese niba koko Kabila ari muri AFC/M23, kuki atamburwa ubudahangarwa bwa senateri, ngo akurikiranweho ' ibikorwa by'iterabwoba', nk'uko byagenze kuri Muzehe Mwangacucu n'abandi.

    ' Kuva naba Perezida wa Kongo niyemeje KUGABANYA ubushobozi bw'abaturage mu guhangana n'ibiciro ku masoko'

    Ubwo yasubizaga ikibazo cy'ubukene bw'Abakongomani ugereranyije n'izamuka ry'ibiciro ku masoko, aho kugira ati:'Twiyemeje KUZAMURA ubushobozi bw'Abakongomani mu guhangana n'ibiciro ku isoko', kubera intege nke z'uburwayi yisanze avuze ko biyemeje 'kugabanya' ubwo bushobozi. Uburangare (niba atari ubugome) bw'abajyanama be, ndetse n'ubw' abo banyamakuru, nyamara bamubeshyaga ko bariho bamufasha mu icengezamatwara, ntibwatumye Perezida yumva ko akoze amahano, ngo akosore imvugo. Ku mbuga nkoranyambaga Abakongomani ntibabifashe nko kunyerera k'ururimi, ahubwo babyuririyeho, bati:' imvugo ya Tshisekedi ijyanye neza n'imikorere y'ubutegetsi bwe'.

    Ibi tubagejejeho ni bike cyane ugereranyije n' ibidasanzwe mu mvugo z'umukuru w'igihugu ( insolites) byavugiwe muri icyo kiganiro, nko gutukana no kwikoma abandi, kumena amabanga, kubeshya no gucikwa akemera ubuswa mu nzego z'ubutegetsi bwe, guhubuka n' ubwana muri politiki.

    Tumwifurije gukira vuba no kwiga kuvuga ibikwiye, mu gihe gikwiye.

    The post Igitutu cya M23 cyasohoye Tshisekedi mu bitaro adakize, none uburwayi bumuvugishije amangambure. appeared first on RUSHYASHYA.

    Source : https://rushyashya.net/igitutu-cya-m23-cyasohoye-tshisekedi-mu-bitaro-adakize-none-uburwayi-bumuvugishije-amangambure/?utm_source=rss&utm_medium=rss&utm_campaign=igitutu-cya-m23-cyasohoye-tshisekedi-mu-bitaro-adakize-none-uburwayi-bumuvugishije-amangambure