Author: webrwanda

Rayon Sports yatangiye shampiyona nabi igabana amanota na Marines FC nyuma yo kunganya ubusa ku busa mu mukino wabereye kuri Kigali Pelé Stadium.

Rayon Sports yari yakiriye Marines FC mu mukino w’umunsi wa mbere wa shampiyona y’icyiciro cya mbere mu Rwanda umwaka w’imikino wa 2024-25.

Marines FC nubwo yanyuzagamo igasatira, Rayon Sports ni yo wabonaga ishaka igitego cyane aho ku munota wa 8, Bugingo Hakim yahinduye umupira mwiza imbere y’izamu ariko habura ushyira mu izamu.

Ku munota wa 12, Charles Baale yagerageje ishoti rikomeye ariko umunyezamu arawufata.

Rayon Sports yongeye kuzamuka neza ku munota wa 20 maze Elanga-Kanga ahindura umupira mwiza imbere y’izamu ariko Muhire Kevin ashyize mu izamu umunyezamu awukuramo byoroshye.

Rayon Sports yakomeje gushyira igitutu kuri Marines FC ishaka igitego ariko amakipe yombi ajya kuruhuka ari ubusa ku busa.

Rayon Sports yatangiye igice cya kabiri ikora impinduka, Charles Baale aha umwanya Iraguha Hadji.

Ku munota wa 47 Omborenga yahinduye umupira mwiza imbere y’izamu ariko Iraguha Hadji ateye mu izamu bawohereza muri koruneri itagize icyo itanga.

Ku munota wa 62 Haruna Niyonzima yinjiye mu kibuga asimbura Aruna Moussa Madjaliwa.

Ku munota wa 63 Taiba wa Marines yagerageje ishoti rikomeye ariko umupira unyura hanze y’izamu.

Rayon Sports yakomeje gushyira igitutu kuri Marines ariko igorwa no kubyaza umusaruro amahirwe yabonye.

Marines FC na yo yanyuzagamo igasatira ariko umunyezamu Patient abyitwaramo neza.

Ku munota wa 88 Seif yahaye umupira mwiza Elanga-Kanga ariko ateye umupira ufata igiti cy’izamu. Umukino warangiye ari ubusa ku busa.

Umunsi wa mbere wa shampiyona uzakomeza ejo Muhazi United yakira Musanze FC.

Imikino yabaye ku wa Kane, Gasogi United yatsinze Mukura VS, Bugesera FC inganya na Amagaju FC ni mu gihe Gorilla FC yatsinze Vision FC 1-0.

Ba kapiteni n’abasifuzi mbere y’umukino

Nsabimana Aimable yari ahagaze neza mu bwugarizi

Seif na Fabio bari bafite ihangana rikomeye

Kapiteni wa Marines, Nkundimana Fabio

Mbonyumwami Taiba utaha izamu rya Marines FC ntiyahiriwe

Wari umukino utoroshye

Iki kigo cyasobanuye ko nyuma y'isuzuma ryakozwe, byagaragaye ko ibi bigo bitunganya ibiribwa mu buryo bunyuranyije n'amategeko ndetse bidakurikiza ibipimo ngenderwaho by'ubuziranenge.

Kiti 'Bitewe n'iyo mikorere, Rwanda FDA ifunze ibi bigo bibiri kandi ihagaritse ikorwa, igurisha, ikwirakwizwa n'ikoresha ry'ibicuruzwa byatunganyirijwe muri ibyo bigo.'

Ibicuruzwa byatunganyirijwe muri ibi bigo byahagaritswe ni 'Vinegre' ya Discovery White Vinegar ikorwa na Tamu Tamu ndetse na Hlaal White Vinegar ikorwa na Cheeter Group.

Rwanda FDA yatangaje ko 'Nta muntu wemerewe gukora, gutegura, guhunika, gufunika cyangwa kubika ibiribwa bigenewe gucuruzwa atubahirije amabwiriza y'isuku yabugenewe.'

Iki kigo cyasobanuye ko uyu mwanzuro wafashwe mu rwego rwo kurinda ubuzima rusange bw'abaturage. Abamaze kugura izi 'Vinegre' basabwe guhagarika kuzikoresha.

Umuyobozi Mukuru wa Rwanda FDA, Prof Emile Bienvenu

Mu mpera za Nyakanga 2024 ni bwo Ikigo cy'Igihugu gishinzwe Ubuzima (RBC) cyatangaje ko indwara y'Ubushita bw'Inkende izwi nka Monkeypox cyangwa mpox, yamaze kugera mu Rwanda nyuma yo kugaragara ku bantu babiri.

Mu gihe iyi ndwara ikomeje kwibasira umugabane wa Afurika n’u Rwanda rurimo, Umuvugizi wa Minisiteri y’Ubuzima, Julien Mahoro Niyingabira, yasabye Abanyarwanda gukomeza kubahiriza amabwiriza yo kwirinda, ashimangira ko ari ibintu byoroshye cyane kuba uyirwaye yakwanduza utayirwaye mu gihe cyose bakoranyeho.

Yagize ati: “Imibonano mpuzabitsina yaba ikingiye cyangwa idakingiye irimo ibyago byinshi byo kwanduzanya Mpox.”

Yakomeje avuga ko nka Minisiteri icyo basaba abanyarwanda ari ugukomeza gukurikiza ingamba ziriho zo kwirinda, harimo kwirinda gukora ku muntu wagaragaje ibimenyetso bya Mpox, gukaraba intoki inshuro nyinshi ukoresheje amazi meza n’isabune cyangwa imiti yabugenewe, n’ibindi.

Abanyarwanda kandi barasabwa kwihutira kumenyesha inzego z’ubuzima mu gihe cyose hagaragaye ibimenyetso by’iyi ndwara kugira ngo ubuvuzi butangwe, kuko kugeza ubu iyo iyi ndwara igaragaye kare iravurwa igakira.

Ibi bitangajwe nyuma y'uko Minisiteri y'Ubuzima itangaje ko mu Rwanda hamaze kugaragara abantu bane bafite indwara y'Ubushita bw'Inkende (Monkeypox). Babiri muri bo bamaze kuvurwa barakira, mu gihe abandi babiri bari kwitabwaho n'abaganga kandi hari icyizere ko nabo bazakira.

Itangazo ryashyizwe hanze na Minisiteri y'Ubuzima kuri uyu wa Gatanu rivuga ko aba bantu bane bahuriye ku kuba bose barakoreye ingendo muri Repubulika Iharanira Demokarasi ya Congo, aho iki cyorezo gikomeje kugaragara ku bwinshi.

Rikomeza rivuga ko 'Minisiteri y'Ubuzima ifatanyije n'Ikigo cy'Igihugu cy'Ubuzima (RBC) hamwe n'abandi bafatanyabikorwa ikomeje Ibikorwa byo gukurikirana abahuye n'abo barwayi, kugira ngo ugaragaje ibimenyetso apimwe kandi ahabwe ubuvuzi akire bityo hirindwe ugukwirakwira kw'indwara mu bantu Benshi.'

Minisiteri y'Ubuzima yijeje ko Ibikorwa by'igenzura bakomeje ku mipaka hagamijwe indwara z'ibyorezo zambukiranye imipaka, ndetse ihumuriza Abanyarwanda ko ingendo hanze y'igihugu zikomeje.

Iyi ndwara yandura cyane binyuze mu gukora ku muntu uyirwaye cyangwa amatembabuzi y'urwaye. Ishobora kwandura kandi mu buryo bw'imibonano mpuzabitsina, gusomana, cyangwa gusuhuzanya n'ufite ubwo burwayi.

Ibimenyetso byayo ni ukugira ibiheri ku mubiri biryaryata bikunze gufata imyanya ndangagitsina, mu maso, mu biganza no mu maguru. Ibindi bimenyetso ni kugira umuriro, kubabara umutwe, kuribwa mu ngingo no kugira amasazi.

Ishami ry'Umuryago w'Abibumbye ryita ku Buzima, OMS, ryashyizeho Komite Idasanzwe izaterana vuba ikiga ku cyorezo cy'Ubushita bw'Inkende kimaze iminsi kigaragara mu bihugu bitandukanye bya Afurika, ikazemeza niba cyashyirwa ku rwego rw'ibyorezo byugarije Isi.

Indwara y'ubushita bw’inkende imaze kugera mu bice byo muri Afurika yo hagati no muri Afurika y’uburasirazuba, ndetse abahanga muri siyanse bahangayikishijwe n’ukuntu ubwoko bushya bwayo bukwirakwira mu buryo bwihuse ndetse bukaba bwica ku kigero cyo hejuru.

Ubushita bw’inkende bumaze kugaragara mu bindi bihugu byo muri Afurika, birimo u Burundi, Repubulika ya Demokarasi ya Congo na Centrafrique.

Hemejwe ko ifaranga-koranabuhanga (digital currency) rizatangira gukoreshwa mu Rwanda bitarenze mu 2026. Kuri ubu, harimo gutegurwa amategeko na politiki byihariye bigomba kugenga ikoreshwa ry’iri faranga. 

Mu kiganiro aherutse kugirana na The New Times, Guverineri Wungirije wa Banki Nkuru y'Igihugu, Soraya Hakuziyaremenye, yavuze ko inyigo u Rwanda rumaze iminsi rukora yagaragaje ko koko rukeneye ifaranga ry'ikoranabuhanga ndetse hanzurwa ko ibikenewe byose ngo ritangire gukoreshwa bizaba byarangiye mu myaka ibiri iri imbere.

Abasesengura ubukungu bakavuga ko ari amahirwe menshi ku gihugu, kuko bizafasha no guhanga imirimo mishya. Bavuga ko kandi iri faranga rizafasha igihugu kuzamura ubukungu bwacyo, binyuze mu kwihutisha iterambere ry’ubucuruzi bw’imbere mu gihugu n’ubwambukiranya imipaka.

Umwe muri aba, ni umuhanga mu by’ubukungu akaba n’umusesenguzi mu bya politiki, Dr. Bihira Canisius. Mu kiganiro yagiranye na InyaRwanda, yashimangiye ko u Rwanda rwakerewe gutangira gukoresha iri faranga kuko ibindi bihugu bimaze igihe biribyaza umusaruro.

Yagize ati: “Ahubwo twe twarakererewe abandi barikoresheje kuva kera, ryaremewe kuko ni ifaranga na ryo rifite uko rikora.”

Crypto currency na Bitcoin ni yo mafaranga-koranabuhanga azwi cyane ku rwego mpuzamahanga. Ibigo nka Binance, nabyo bimaze kumenyekana kubera gukora ubucuruzi bw’aya mafaranga agezweho.

Banki nkuru y’Igihugu BNR yemeza ko iri faranga rizaba ryitwa CBDC (mu magambo arambuye aribyo Central Bank Digital Currency).

Mu kwezi kwa 5 uyu mwaka, uru rwego rwashyize ahagaragara ubushakashatsi rwakoze ku ikoreshwa ry’ifaranga-koranabuhanga mu Rwanda. Bwerekana ko iri faranga rizagirira igihugu akamaro binyuze muri gahunda ya leta, y’ubukungu buhererekanya amafranga mu buryo bw'ikoranabuhanga (cashless economy).

Habanje ubushakashatsi, hazakurikiraho itegeko ryihariye ritanga uburengazira ku ikoreshwa ry’iri faranga, rikazasohoka bitarenze mu 2026, ari nabwo rizatangira gukoreshwa mu buryo bwemewe.

Ifaranga rya CBDC ritandukanye n'andi mafaranga y'ikoranabuhanga azwi nka 'Cryptocurrency' ari n'aho ayo mu bwoko bwa Bitcoin abarizwa.

Bimwe mu bitandukanya Central Bank Digital Currency na Cryptocurrency harimo ko kimwe kiba kigenzurwa na Banki Nkuru y'Igihugu mu gihe ikindi gishobora kugenzurwa n'ubonetse wese.

Ibi bituma ikoreshwa rya Central Bank Digital Currency ritagira ingaruka zikomeye ku bukungu nk'uko bigenda kuri Bitcoins kandi rikaba ryizewe nk'uko andi mafaranga bimeze.

Iri ni ifaranga rikorwa n'ibihugu ariko imisusire yaryo itandukanye n'ayo dusanzwe tubona y'inoti cyangwa ibiceri bikozwe muri zahabu cyangwa umuringa 'silver'.

Ni ifaranga ryemewe n'amategeko rikoreshwa mu kugura ibintu na serivisi ariko hifashishijwe ikoranabuhanga, kurihererekanya no kugaruza nabyo bigakorwa mu ikoranabuhanga.

Guverineri Wungirije wa Banki Nkuru y'Igihugu, Soraya Hakuziyaremenye, yavuze ko iri faranga ry'ikoranabuhanga rizafasha Abanyarwanda guhererekanya amafaranga no gukora ubucuruzi mu buryo butekanye, ugereranyije n'umutekano ifaranga risanzwe rigira. Bizafasha kandi abantu kugira inyungu muri gahunda z'ubukungu n'imari zidaheza.

Yakomeje avuga ku mpamvu iri faranga ry'ikoranabuhanga rikenewe mu Rwanda.

Ati 'byagaragaye ko ari ingenzi kubera kandi ibiri gukorwa mu bind ibihugu. Turabizi ko hafi ibihugu 11 byatangiye gukoresha iri faranga ry'ikoranabuhanga. Icya mbere ni Bahamas, ndetse harimo n'ibihugu byo muri Afurika birimo Nigeria, Ghana na Afurika y'Epfo, aho bimwe biri mu cyiciro cy'igerageza mu gihe ibindi byatangiye kurikoresha.

Yavuze ko gahunda yo gutangira gukoresha iri faranga mu Rwanda yabanjirijwe n'inyigo yo kureba uko byakorwa. Ni gahunda yagizwemo uruhare na Banki Nkuru y'Igihugu, Minisiteri y'Ikoranabuhanga na Inovasiyo ndetse na Minisiteri y'Imari n'Igenamigambi.

Soraya Hakuziyaremenye yavuze ko 'Ibyavuye muri iyi nyigo byatweretse amahirwe atandukanye ari mu gukoresha ifaranga ry'ikoranabuhanga mu Rwanda. Twabonye agera kuri ane dushaka kugerageza. 

Amahirwe ya mbere ni uko iri faranga ry'ikoranabuhanga rizaba rifite Ubushobozi bwisumbuyeho bwo gukora neza mu bijyanye n'uburyo bw'imyishyurire buhari uyu munsi, ndetse ryagaragaye nk'uburyo bwiza bwo kwishyurana mu gihe cy'ibiza n'ibibazo.'

Yakomeje avuga ko nubwo iri faranga ari ryiza hari impungenge nke barigizeho zishingiye ku kuba Abaturage batakwitabira kurikoresha.

Ati 'Niba Banki Nkuru y'Igihugu ishyizeho ifaranga ry'ikoranabuhanga ariko Abaturage ntibabone inyungu zaryo, nta kiba cyakozwe. Ntabwo dushaka gushyiraho ifaranga ry'ikoranabuhanga kubera kurishyiraho gusa, ahubwo turashaka gushyiraho ifaranga rifitye inyungu Abaturage b'u Rwanda. 

Iyi niyo mpamvu twasohoye inyandiko y'ibyavuye mu bushakashatsi ndetse buri wese akaba ashobora kubitanga ibitekerezo, twiteze kubona ibitekerezo n'impungenge by'abaturage.'

Soraya Hakuziyaremenye yakomeje avuga ko mu minsi iri imbere hazatangira Ibikorwa byo kugerageza iri faranga n'ikoranabuhanga rikoresha, 'hashingiwe kuri urwo rugendo, turatekereza ko Byose bizaba byarangiye mu myaka ibiri iri imbere.' 

MINEDUC yagaragaje ko amasomo azatangira muri Nzeri 2024 mu mwaka wa Karindwi cyangwa 'Grade seven' bihwanye n'umwaka wa mbere w'amashuri yisumbuye.

Umwana uzahabwa buruse azakomeza kuyihabwa kugeza arangije amasomo muri iryo shuri mu gihe cyose azaba yakomeje kugira amanota amwemerera kwimuka.

Iri shuri rizakira abana bafite inzozi zo kuba inzobere mu by'Ubwubatsi, Ubuganga cyangwa mu Bushakashatsi mu bijyanye n'ubumenyi n'ikoranabuhanga.

Ntare Louisenlund School' ifite gahunda yo kwigisha amasomo y'Ubumenyi n'Ikoranabuhanga yo ku rwego rwo hejuru mu Karere ka Afurika y'Iburasirazuba akazajya atangwa hifashishijwe integanyanyigisho ya 'Plus-STEM' iha abanyeshuri uburyo bwo kwiga bashyira mu bikorwa imishinga isubiza ibibazo biriho.

MINEDUC yagaragaje ko muri Nzeri 2024 abanyeshuri 240 bafite impano zidasanzwe mu masomo y' Imibare, Ubumenyi n' Ikoranabuhanga (STEM) bazaba batsinze neza kurusha abandi mu bizamini bisoza icyiciro cy'amashuri abanza bazahabwa amahirwe yo gupiganira umwanya wo kwiga muri 'Ntare Louisenlund School' mu mwaka w'amashuri utaha.

Abanyeshuri bazaba batoranyijwe mu cyiciro cya mbere bazanyura mu irushanwa ry'iminsi ibiri rizaba hagati y'amatariki 7-18 Nzeri 2024.

Muri iki cyiciro cya kabiri cy'irushanwa abanyeshuri bazitabira ibikorwa bizagaragaza niba koko bakwiye guhabwa buruse yo kwiga muri iri shuri, abatsinze bazahite bahabwa ubutumire bwo gutangira kwiga guhera tariki 23 Nzeri 2024.

Kugira ngo umunyeshuri yemererwe buruse yo kwiga muri iri shuri asabwa kuba afite ubwenegihugu bw'u Rwanda, kuba yarakoze ibizamini bisoza amashuri abanza mu Rwanda, kuba afite amanota meza mu bumenyi, imibare n'icyongereza no kuba yifuza gukomeza kwiga mu masomo y'ubumenyi, ikoranabuhanga, ubugenge n'imibare (STEM).

Ntare Louisenlund School ni ishuri ryakomotse ku bagize umuryango NSOBA (Ntare School Old Boys Association) bize mu ishuri ryisumbuye rya Ntare School muri Uganda barimo Perezida Paul Kagame na Perezida Yoweri Kaguta Museveni uyobora Uganda.

Iri shuri ryubatswe mu Mudugudu wa Musagara, Akagari ka Kanazi mu Murenge wa Nyamata, Akarere ka Bugesera.

Ku ikubitiro iki kigo kizatangirana n'abanyeshuri 160 barimo abahungu n'abakobwa bitandukanye na Ntare School ya Uganda yizemo abahungu gusa.

Umunyezamu Habineza Fils François wafatiraga Etoile del’Est, yamaze kumvikana na Rayon Sports kuyikinira mu mwaka w’imikino wa 2024-25.

Uyu munyezamu nubwo ikipe ye yamanutse mu cyiciro cya kabiri, yari yagize umwaka mwiza, yahise yerekeza muri Leta Zunze Ubumwe z’Abarabu gukorayo igeragezwa.

Habineza Fils François akaba yari amaze iminsi mu ikipe ya Al Wahda akorayo igeragezwa, amakuru ISIMBI yamenye ni uko byanze agomba kugaruka mu Rwanda.

Akaba rero yamaze kumvikana na Rayon Sports itari ifite umunyezamu w’umunyarwanda kuza guhangana na Khadime Ndiaye na Ndikuriyo Patient basanzwe bafatira iyi kipe.

Mbere yo kujya muri Leta Zunze Ubumwe z’Abarabu, Habineza Fils François akaba yari yarifujwe n’amakipe atandukanye Mukura VS na Police FC ariko ntibahuza.

Yari amaze iminsi akora igeragezwa muri Al Wahda yo muri Leta Zunze Ubumwe z’Abarabu

Habineza Fils François yari umunyezamu wa Etoile del’Est

Yvan yitabye Imana amaze igihe atangiye kugaragaza ko umuziki gakondo w'u Rwanda ufite ubushobozi bwo kwakirwa neza ku rwego mpuzamahanga. Ndetse, yasize Album 'Twaje' iriho ibihangano na n'uyu munsi umuntu yumva akanyurwa.

Mu bihe bitandukanye, ku mbuga nkoranyambaga hari abagaragaza bakozwe ku mutima n'inganzo ye, ndetse ibikorwa bye yasize byakomeje gusigasirwa n'umuryango we birimo nko gushyiraho ishuri ryamwitiriwe, gutegura iserukiramuco ryubakiye ku murage n'ibindi.

Massamba Intore na Ruti Joël babanye igihe kinini na Yvan Buravan bagaragaje ko ku itariki nk'iyi bazirikana ibihe banyuranyemo n'uyu muhanzi, ndetse bavuga ko mu gitaramo bitegura gukora kizaba tariki 31 Kanama 2024 muri BK Arena, bazamucyeza mu buryo bwihariye.

Massamba yanditse ku rubuga rwe rwa Instagram agira ati 'Umuhungu wanjye nkunda Yvan Buravan ndagucyeje, uri nkongi itazazima, njye na Ruti Joel tuzagucyeza. Turagukunda.'

Iki gitaramo cyiswe '3040 Ubutore Concert', Massamba yagiteguye mu rwego rwo kwizihiza imyaka 40 amaze akora umuziki n'indi 30 ishize u Rwanda rubohowe.

Ni igitaramo avuga ko yateguye mu rwego rwo gukundisha urubyiruko umuco. Ati 'Mu muco abakuru batanga inkoni ku bakiri bato. Ni ingenzi ko ababitse n'abazi amateka bagomba kuyasangiza abato kugira ngo bakomeze muri uwo murongo wo kuyasigasira.''

Biteganyijwe ko azahurira ku rubyiniro n'abahanzi Ariel Wayz, Ruti Joel, DJ Marnaud ndetse na DJ GRVNDLVNG.

Ruti Joël azirikana uruhare rwa Buravan kuri Album ye ya mbere

Ku wa 22 Ukuboza 2023, Ruti yabwiye itangazamakuru ko agira igitekerezo cyo gukora Album yabanje kumva azayita 'Rumata' ariko birangira ahinduye izina ayita 'Musomandera' kubera uruhare rwa Buravan. 

Yavuze ko Album 'Rumata' yari kuba iriho indirimbo za gakondo ndetse n'indirimbo z'umudiho ugezweho. Akomeza ati 'Kubera umuvandimwe wanjye Buravan niwe wangiriye inama ati ndashaka kugirango uyikore mu buryo bwa gakondo gusa, ndamwemerera ndayikora.'

Ruti avuga ko yongeye gutekereza ku izina rya Album, asanga afiteho indirimbo 10 zisanzwe (modern) ndetse n'indirimbo 10 z'umudiho ugezweho biba 'Rumata wa Musomandera'.

Uyu munyamuziki yavuze ko ashingiye ku ruhare Buravan yagize kuri Album ye, abifata nk'isezerano bagiranye ryo kumugaragaza buri hantu hose azataramira.

Ati 'Ntabwo nkongi nshobora kumwibagirwa, ubu ngubu nta handi namukura usibye muri njye.'

Ruti avuga ko nawe yagize uruhare rukomeye kuri Album ya Buravan yise 'Twaje', abikubira mu ijambo rimwe akavuga ko ari 'umunywanyi we'.

Yavuze ko ubushuti bwabo bwarandaranze kugeza n'ubwo baguranye indirimbo. Buravan yakunze indirimbo 'Impore' ya Ruti Joel arayimusaba, undi arayimuha. Ruti Joel nawe akunda indirimbo 'Nyambo' ya Buravan arayimwaka.

Massamba Intore na Ruti Joel batangaje ko biteguye guha icyubahiro Buravan mu gitaramo bazahuriramo tariki 31 Kanama 2024

Ruti Joel ari kumwe na Buravan ku rubyiniro- Babaye inshuti z'akadasohoka, barashyigikirana mu bihangano byabo 

Massamba agiye gukora igitaramo cyo kwizihiza imyaka 40 ishize ari mu muziki  

Ku itariki nk’iyi kandi ni bwo ‘Yanga’ wamamaye muri Cinema yitabye Imana

KANDA HANO UREBE AMASHUSHO Y’INDIRIMBO ‘TSINDA’ YA MASSAMBA INTORE