Author: webrwanda

Umutoza wa Rayon Sports yavuze ko anyuzwe n’urwego rw’abakinnyi be barimo na rutahizamu Fall Ngagne utariyereka abakunzi b’iyi kipe neza.

Uyu mukinnyi ukomoka muri Senegal nyuma yo kugera mu Rwanda akaba yaragize ikibazo cy’imvune ariko akaba yarakize neza ndetse yatangiye imyitozo n’abandi kimwe n’Umurundi Richard Ndayishimiye na we wari umaze igihe arwaye igifu yatangiye imyitozo.

Nyuma y’umukino wa gicuti Rayon Sports yaraye itsinzemo Esperence, Robertinho yavuze ko yanyuzwe n’urwego abakinnyi be bariho barimo Fall Ngagne ko ari umukinnyi mwiza igihe ari cyo kizabyerekana.

Ati “Ni umukinnyi mwiza, ufite impano ariko umupira w’amaguru ni igihe, reka turebe icyo igihe kizerekana.”

Yakomeje avuga ko ubu intego ari ukubaka ikipe ikomeye ibindi by’amagambo avugwa atabyitayeho.

Ati “Tugomga kubaka ikipe ikomeye ni ko kuri, njye ntibindeba abavuga vuga, njye ngomba gukora akazi kanjye, intego yanjye ni ukubaka ikipe ikomeye yahangana n’uwo ari we wese.”

Rayon Sports izagaruka mu kibuga ikina umunsi wa 4 wa shampiyona tariki ya 21 Nzeri 2024 na Gasogi United, ni mu gihe imikino 2 ya mbere ya shampiyona itagenze neza aho yanganyije n’Amagaju na Marines FC.

Fall Ngagne arimo kugenda yemeza umutoza

Umuhanda Muhanga-Karongi ufite ibilometero 128. Umaze igihe kuko igice cya mbere cyawo cyuzuye mu 2000, ikindi cyuzura mu 2002 icyakora ukaba warangiritse cyane aho wuzuyemo ibinogo byinshi.

Uyu muhanda Perezida Paul Kagame yawemereye abaturage ku wa 30 Nyakanga 2024, ubwo yari yakomereje ibikorwa byo kwiyamamaza ku mwanya w'Umukuru w'Igihugu, kuri Site ya Mbonwa mu Murenge wa Rubengera mu Karere ka Karongi.

Icyo gihe Perezida Kagame yagize ati 'Hanyuma hari umuhanda uva hano muri ibi bice, ugenda ukagera za Muhanga mu mujyi. Ntabwo nishimye cyane kuko ikibazo gihari cyari gikwiye kuba cyarakemutse kera ariko ndabasezeranya ko kigiye gukemuka byanze bikunze.'

Umuyobozi w'Akarere ka Ngororero, Nkusi Christophe yabwiye IGIHE ko igice cy'umuhanda Muhanga- Ngororero cyo mu karere ayoboye kigizwe n'ibilometero 16, aho kiva ahitwa Rambura kugera ku Kiraro cya Nyabarongo gitandukanya Ngororero na Muhanga, kigeze kure cyubakwa.

Ati 'Imirimo yo kubaka igice cyo mu Karere ka Ngororero igeze ku kigero kiri hejuru ya 65%. Tugendeye ku muvuduko biriho twavuga ko bitazarenza amezi abiri igice gisigaye kitararangira.'

Yavuze ko igice kindi gikurikiyeho muri uwo muhanda ari icya Nyange-Muhanga na cyo biteganyijwe ko kizatangira kubakwa mu minsi iri imbere.

Umuhanda Muhanga-Karongi ufatiye runini ubukungu bw'igihugu kuko woroshya ubuhahirane hagati y'ibice by'Iburengerazuba, Amajyepfo n'Umujyi wa Kigali kandi ukanyuramo ba mukerarugendo batandukanye bava cyangwa bajya mu turere nka Rutsiro, Karongi na Nyamasheke.

Uretse uwo muhanda uhuza uturere, mu Karere ka Ngororero hari kubakwa indi mihanda y'igitaka ingana n'ibilometero 29,6.

Irimo uwa Gatumba-Bwira-Gashyushya ungana n'ibilometero 17 uzatwara arenga miliyoni 1,8 Frw n'uwa Gatega-Muramba-Rubagabaga ungana n'ibilometero 12,6 ukazatwara miliyari 1,7 Frw.

Igice cy’Umuhanda Muhanga-Karongi cyo mu Karere ka Ngororero kiva ahitwa Rambura kikagera ku Kiraro kiri ku Mugezi wa Nyabarongo gitandukanya uturere twa Muhanga na Ngororero

Imibare y'Ikigo cy'Igihugu gishinzwe Ingufu, REG yo muri Kamena 2024 yagaragazaga ko ingo 78.9% ari zo zifite amashanyarazi, muri zo 55.9% zafatiye ku muyoboro mugari mu gihe 23% zikoresha amashanyarazi akomoka ku ngufu zisubira by'umwihariko imirasire y'izuba.

U Rwanda rufite intego y'uko umuriro w'amashanyarazi ugera ku ngo zose zirenga miliyoni 3.3 n'izindi nshya zishingwa buri munsi.

Ubwo Minisitiri w'Intebe Dr Ngirente Edouard yagezaga ku Nteko Ishinga Amategeko imitwe yombi gahunda ya Guverinoma y'Imyaka itanu yagaragaje ko amazi n'amashanyarazi bizagezwa mu midugudu yose bitarenze mu 2029.

Ibyavuye mu ibarura rusange rya 2022 bigaragaza ko ingo 82% mu Rwanda zikoresha amazi meza, 11% bagakoresha ava mu masoko adatunganyije na ho 6% bakoresha amazi ava mu biyaga.

Yahamije ko intego nkuru Leta ifite ari 'Gukomeza ingamba zo kugeza amashanyarazi mu Gihugu hose ndetse hagamijwe no kuzamura ijanisha ry'ingo zifite amashanyarazi mu Rwanda. Ibi bizajyana n'intego yo kuyageza mu tugari twose tw'Igihugu.'

Mu Rwanda hari imidugudu 14,837, imibare igaragaza ko uturere tw'ibyaro ari two turimo ingo nyinshi zidafite amashanyarazi.

Minisitiri w'Intebe Dr Ngirente yavuze ko u Rwanda ruzakomeza kongera umubare w'inganda zitunganya amazi n'ingomero z'amashanyarazi, kandi bakabungabunga izisanzweho.

Ati 'Hazakomeza gukwirakwizwa amashanyarazi aho akenewe mu bikorwa byose by'iterambere birimo inganda, inyubako z'ubucuruzi, amashuri, amavuriro, no mu bigo bitandukanye bigira uruhare mu iterambere ry'ubukungu.'

Biteganyijwe ko impuzandengo y'abakoresha ingufu zisubira izava kuri 52% ikagera nibura kuri 60%.

Hateganyijwe kandi ibikorwa byo gusoza inyigo ku ikoreshwa ry'ingufu za nucléaire hagamijwe kuyibyaza umusaruro mu gihe cya vuba mu nzego zirimo ubuzima, ingufu z'amashanyarazi, ubuhinzi, n'izindi.

Kugeza ubu u Rwanda rutunganya amashanyarazi agera kuri megawati 332.6, muri yo 43.9% akomoka ku ngomero zo mu mazi, 4% agakomoka ku mirasire y'izuba.

Biteganyijwe ko amashanyarazi azagezwa mu midugudu yose yo mu gihugu

Mu turere dutandukanye hakomeje ibikorwa byo kubegereza amazi meza

Amazi meza ni isoko y’isuku n’isukura

Abaturage barenga 82% bagerwaho n’amazi meza

Iby'ibyo bimenyetso byatangajwe n'Ibiro bya Perezida wa Afurika y'Epfo, bibinyujije mu itangazo ryashyizwe hanze kuri uyu wa 10 Nzeri 2024.

Itangazo rigira riti 'Mu gihe ikirego kitaremezwa Israel igomba gukurikiza ibyemezo by'agateganyo ICJ yabaye itanze kugeza uyu ubu.'

Ibyo byemezo ni ibisaba Israel guhagarika ibitero byayo mu Mujyi wa Rafah wo mu Majyepfo ya Gaza, mu kwirinda ko yagwa mu byaha by'intambara, icyakora byarakomeje.

Ubutegetsi bwa Pretoria bwarahiye ko ikirego bwarezemo Israel mu Ugushyingo 2024 buzakomeza kugikurikirana kugeza ubwo cyumviswe ndetse ICJ ikagira icyo ibikoraho.

Afurika y'Epfo ishinja Israel gushaka gukuraho igice kimwe cy'abaturage ba Palestine, ibintu ikomeje kugaragaza ko iki gihugu kiyobowe na Benjamin Netanyahu kigomba kubiryozwa uko byagenda kose.

Ni ikirego Afurika y'Epfo ishyigikiwemo n'ibindi bihugu nka Nicaragua, Palestine, Turikiya, Espagne, Mexique, Libya na Colombia.

Icyakora ICJ yatanze tariki ya 28 Ukwakira 2024 nk'igihe ntarengwa Afurika y'Epfo igomba kuba yakusanyije ibimenyetso byose bigaragaza ko ikirego cyayo kigomba gukomeza.

Bivugwa ko Israel yatangiye gusaba Amerika gushyira igitutu kuri iki gihugu cyo mu majyepfo ya Afurika kugira ngo gihagarike icyo kirego.

Kuva Israel yatangiza ibitero simusiga kuri Hamas, bimaze guhitana Abanye-Palestine barenga ibihumbi 41 ndetse ubu habarurwa inkomere zirenga ibihumbi 95 nk'uko Minisiteri y'Ubuzima ya Palestine ibitangaza.

Abanye-Paletine barenga ibihumbi 41 bamaze guhitanwa n’ibitero bya Israel muri Gaza

Nelly Mukazayire ni we wagizwe umunyamabanga uhoraho muri Minisiteri ya Siporo, yasimbuye Niyonkuru Zephanie uheruka gukurwa kuri izi nshingano.

Mu itangazo ibiro bya Minisitiri w’Intebe byashyize hanze kuri uyu wa Gatatu tariki ya 11 Nzeri 2024, Perezida wa Repubulika y’u Rwanda yakoze impinduka muri bamwe mu bagize guverinoma.

Umwe mu bahawe inshingano nshya ni Mukazayire Nelly wari usanzwe ari Umuyobozi Wungirije w’Urwego rw’Igihugu rw’Iterambere (RDB). Yagizwe Umunyamabanga uhoraho muri Minisiteri ya Siporo.

Mukazayire Nelly afite imyaka 42 aho yavutse mu 1982.

Amashuri abanza n’ayisumbuye yayize mu Rwanda. Afite impamyabumenyi y’icyiciro cya kabiri cya Kaminuza ya Siyansi mu by’ubukungu mpuzamahanga (Bachelor of Science degree in International Economics).

Afite kandi impamyabumenyi mu micungire y’Ubukungu yakuye muri Kaminuza ya Makelele muri Uganga (Master of Arts degree in Economic Policy Management ).

Nelly ni impuguke mu by’ubukungu mu Rwanda akaba n’umuyobozi wa Leta, muri 2018 yabaye umuyobozi mukuru muri ‘Rwanda Covention Bureau’ mu ishami rishinzwe iterambere ry’u Rwanda.

Muri Werurwe 2023 yaje kuzamurwa mu ntera agirwa umuyobozi mukuru wungirije mu Kigo cy’Igihugu gishinzwe iterambere (RDB).

Yabaye umuyobozi mukuru wungirije mu biro bya Perezida wa Repubulika y’u Rwanda ndetse anaba umujyanama mukuru w’umuyobozi mukuru mu biro bya Perezida. Mbere y’uko ajya gukora mu biro bya Perezida, yabaye umushakashatsi wa Politiki mu ishami ry’Ubukungu mu biro bya Minisitiri w’Intebe.

Nelly Mukazayire yagizwe Umunyamabanga uhoraho muri Minisiteri ya Siporo

Ni impinduka zikubiye mu itangazo ibiro bya Minisitiri w'Intebe byashyize hanze kuri uyu wa Gatatu.

Undi wahinduriwe inshingano ni Nelly Mukazayire wari usanzwe ari Umuyobozi Wungirije w'Urwego rw'Igihugu rw'Iterambere (RDB). Yagizwe Umunyamabanga uhoraho muri Minisiteri ya Siporo.

Joseph Nsengimana wagizwe Minisitiri w'Uburezi yari asanzwe ari Umuyobozi w'Ikigo cya Mastercard Foundation gishinzwe guteza imbere uburezi kuri bose binyuze mu ikoranabuhanga.

Mbere yo gukorana na Mastercard, Joseph Nsengimana yakoraga mu kigo cy'Abanyamerika cy'ikoranabuhanga, Intel Corporation.

Nelly Mukazayire we ni impuguke mu by'ubukungu akaba yari Umuyobozi Wungirije wa RDB guhera muri Werurwe 2023.

Mbere yaho yari umuyobozi w'Ikigo cy'Igihugu gishinzwe guteza imbere ubukerarugendo bushingiye ku nama Rwanda Convention Bureau.

Yabaye kandi Umuyobozi Mukuru wungirije mu biro bya Perezida wa Repubulika. Mbere y'uko Mukazayire agera mu biro bya Perezida, yabaye umushakashatsi wa politiki mu ishami ry'ubukungu mu biro bya Minisitiri w'Intebe.

Afite impamyabumenyi y'icyiciro cya kabiri cya Kaminuza mu bukungu ndetse n'impamyabumenyi y'icyiciro cya gatatu cya Kaminuza mu micungire ya Politiki y'Ubukungu.

Twagirayezu wagizwe Umuyobozi Mukuru w'Urwego Rushinzwe Isanzure, yabaye Minisitiri w'u Burezi muri Kanama 2023 asimbuye Dr Uwamariya Valentine wari wagizwe Minisitiri w'Uburinganire n'Iterambere ry'Umuryango.

Ni inshingano yahawe avuye ku mwanya w'Umunyamabanga wa Leta muri MINEDUC, imirimo yatangiye muri Gashyantare 2020.

Yakoze no mu Biro bya Perezida kuva mu Ukwakira 2019 kugeza muri Gashyantare 2020, aho yari umusesenguzi ushinzwe ingamba na politiki.

Kuva mu Ukwakira 2014 kugeza muri Nzeri 2019 yari umusesenguzi ushinzwe ibijyanye n'ihererekanywa ry'ubumenyi n'ikoranabuhanga mu Nama y'Igihugu y'Ubumenyi n'Ikoranabuhanga, NCST.

Ni imirimo yahawe avuye ku mwanya w'umuhuzabikorwa w'ibijyanye na siyansi muri Agahozo Shalom Youth Village, imirimo yakoze umwaka wose kuva mu Ukwakira 2013.

Yize amashuri yisumbuye kuva mu 2001-2007 kuri Petit Seminaire St. Pie X Nyundo, aho yigaga Ikiratini, Ibinyabuzima n'Ubutabire.

Kuva 2008 kugeza 2012, yize muri Oklahoma Christian University iherereye muri Leta Zunze Ubumwe za Amerika, aho yakuye impamyabumenyi y'icyiciro cya kabiri cya kaminuza mu bya siyansi, by'umwihariko mu bijyanye n'amashanyarazi (Electrical/Electronics Engineering).

Iyo kaminuza kandi ni na yo yakomerejemo ayikuramo impamyabumenyi y'icyiciro cya gatatu cya kaminuza mu bijyanye n'ayo masomo yari yarize mu cyiciro cya kabiri.

Joseph Nsengimana yagizwe Minisitiri w'Uburezi

Gaspard Twagirayezu yagizwe Umuyobozi Mukuru w'Urwego Rushinzwe Isanzure

Nelly Mukazayire wari usanzwe ari Umuyobozi Wungirije w'Urwego rw'Igihugu rw'Iterambere (RDB) yagizwe Umunyamabanga uhoraho muri Minisiteri ya Siporo

Kuri uyu wa 10 Nzeri 2024, Perezida Kagame yongeye kugaruka kureba umukino w'Ikipe y'Igihugu ‘Amavubi’ nyuma y'imyaka umunani yari ishize ataza ku kibuga kureba umukino mu mupira w'amaguru.

Perezida Kagame yaherukaga kuri Stade mu mwaka wa 2016 ubwo u Rwanda rwakinaga na DR Congo mu irushanwa rya CHAN hanyuma Amavubi agatsindwa ibitego 2-1.

Icyo gihe ibitego bya DR Congo byatsinzwe na Doxa Gikanji ku munota wa 11 na Botuli Bompunga ku munota 114 mu gihe igitego kimwe cy'Amavubi cyatsinzwe na Sugira Erneste ku munota wa 56. Uyu mukino wari watojwe na Jonathan Mckinstry ubera kuri Stade Amahoro.

Iri rushanwa ryari ryabereye mu Rwanda, ryarangiye DR Congo n'ubundi iryegukanye ku nshuro yayo ya kabiri batsinze imikino 4 batsindwa 1 banganya 1, muri iyo mikino harimo uwo basezereyemo u Rwanda muri ¼.

Mbere y'uyu mukino, abakinnyi n'abatoza bari baganirijwe ndetse basabwa kwitwara neza imbere ya DR Congo nk'uko umutoza Jonathan Mckinstry yabitangaje mu kiganiro n’itangazamakuru cyabaye mbere y'umukino.

Icyo gihe, umutoza Jonathan yagize ati 'Ibintu bimeze neza mu ikipe. Twahuye na Minisiteri ndetse n'abayobozi ba FERWAFA. Buri wese yishimiye uko twitwaye ariko icy'ingenzi ni uko twakomeza muri CHAN nyuma y'aho akaba aribwo dutekereza ku yandi marushanwa. 

Twiteguye guhura na DR Congo mu mukino ntekereza ko utoroshye kuko ni ikipe ikomeye kandi iri guhabwa amahirwe yo kwegukana iri rushanwa.'

Nyuma y'aho, Perezida Kagame ntabwo yongeye kujya agaragara muri Stade ariko urukundo rw'umupira ntaho rwagiye kuko yabaye hafi ikipe y'Igihugu amavubi. 

Ku wa 07 Gashyantare 2021, Perezida Kagame yahuye n'abagize ikipe y'igihugu y'u Rwanda Amavubi, abashimira uko bitwaye muri CHAN 2020 yatwawe na Morroco icyo gihe yari mu itsinda rimwe n'Amavubi aba ari nabo bazamukana hanyuma Togo na Uganda bataha rugikubita.

Ubwo yahuraga n'abagize ikipe y'Igihugu , Amavubi, Perezida Kagame yagize ati: 'Nishimiye kubona uyu mwanya wo kuganira namwe, na kera byari bisanzwe najyaga mbona umwanya wo kuganira namwe n'abawuyobora, gusa hari aho nageze ndabyihorera njya mu kazi kandeba ndabyihorera, iby'imikino mbivaho.'

Akomeza agira ati: 'Si uko ntashakaga kubikurikirana, ku rundi ruhande abakinnyi n'ababiyobora babifitemo uruhare, najyaga nza nkicara tukanaganira. Ibitekerezo bikava no mu bakinnyi, tukumvikana ko hari ibigomba gukorwa byafasha ngo abantu batere imbere.”

Aha Perezida Kagame yumvikanishaga ko nubwo afite inshingano nyinshi zo kwitaho zatumye atagaruka kuri Stade, yaciwe intege n'ibibazo biri mu mupira w'amaguru haba mu bakinnyi ndetse n'abayobora umupira w'amaguru wo mu Rwanda.

Uruhare rw'abakinnyi Perezida Kagame yagarutseho, ni uburyo ikipe y'Igihugu ‘Amavubi’ itakomeje kwitwara neza ahubwo urwego rwayo rwagiye rusubira inyuma kurushaho mu cyimbo cyo kongera gukora cyane ngo yitware neza ikosore amakosa yakoraga mu bihe byatambutse.

Bitari ukwitwara nabi mu kibuga gusa, Perezida Kagame yakunze kunenga ibintu by'amarozi na ruswa mu mupira w'amaguru wo mu Rwanda byatumye atongera kuwinyumvamo na mba.

Muri Mata 2023, ubwo yari mu Nama y'Igihugu y'Umushyikirano, Perezida Kagame yavuze ko impamvu adaheruka kuri sitade kureba umupira w'amaguru ari uko ruswa n'amarozi byokamye uwo mupira mu Rwanda.

Yagize ati: 'Icyatumye kenshi ngabanya kujyayo (kuri sitade) ni bo byaturutseho. Ibintu by'imikino by'amarushanwa bigenda bikajyamo ruswa, bikajyamo amarozi ibyo bintu biraciriritse njye ntabwo nabijyamo. Ni ho byageze mbivaho ibintu nka biriya ntabwo bari bakwiriye kuba babyihanganira.'

Ubwo Perezida Kagame yari mu kiganiro 'Ask The President' yagiranye na Televiziyo y'Igihugu ku wa Kabiri, tariki ya 4 Nyakanga 2023, cyagarutse ku myaka 29 ishize u Rwanda rwibohoye, yongeye kwitsa ku ikipe y’Igihugu avuga uburyo ki bitumvikana ko idatanga umusaruro kandi ibisabwa ubuyobozi bubikora.

Nyuma yo kubazwa na Jean Pierre Kagabo uko ahuza imbaraga zishyirwa mu iterambere ry'umupira n'umusaruro ubonekamo, PerezidaKagame yasubije agira ati 'Biraruhanyije, biragoye ariko tugomba kugira icyo dukora.

 Byavuzwe kera, ni imyaka myinshi twibaza impamvu siporo yaba muri rusange cyangwa ukuntu twayiteza imbere, cyane cyane mu mupira w'amaguru, impamvu n'imbaraga zishyirwamo, umusaruro utaboneka bihagije.''

Ibi byose, Perezida Kagame yabivuze nyuma y'uko mu mwaka wa 2017 hashyizweho itegeko rikumira amarozi muri siporo aho ababirengaho bari guhanwa n'itegeko mpuzamahanga agenga siporo.

Itegeko Nº 32/2017 ryo ku wa 03/08/2017 rigena imitunganyirize ya siporo, imikino n'imyidagaduro, risobanura ko imigenzo itemewe ari igikorwa cyose kigamije guca intege, gutera imbaraga zidasanzwe uri mu irushanwa cyangwa uwitegura kurijyamo.

Komisiyo Mpuzamahanga yo kurwanya ikoreshwa ry'ibyongerambaraga, iteganya ko uhamwe n'icyaha cyo kubikoresha, kubicuruza no kubitwara agenerwa ibihano birimo; kumara imyaka ine atagaragara mu bikorwa bya siporo n'ibindi bihano.

Bitari ibyo gusa byatumye umupira w'amaguru udakomeza gutera imbere, akenshi Minisiteri ya Siporo ndetse n'ubuyobozi bwa FERWAFA bwagiye bunengwa mu gushaka abatoza ndetse no kuzana umutoza ufite ubuhanga n'ubunararibonye mu mitoreze aho akenshi bazanaga umutoza udahenze kandi nabwo akaza ku munsi wa nyuma habura umunsi umwe cyangwa itatu ngo atoze umukino we wa mbere.

Ibi byose byatumaga ikipe y'Igihugu, Amavubi, idatera imbere mu buryo bw'intsinzi byatumaga abatoza benshi bataramba mu Rwanda bityo guhinduranya abatoza bikagira ingaruka mu iterambera ry'umupira w'amaguru.

Kuva mu mwaka wa 2016 kugera mu mwaka wa 2024, u Rwanda rumaze gutozwa n'abatoza 8 muri abo bose uwahamaze igihe kirekire ari umutoza ni Mashami Vincent watoje Amavubi kuva mu mwaka wa 2018 kugera mu mwaka wa 2022. Uwatoje igihe gito ni Gerrard Buscher watoje umukino umwe ubwo Amavubi yakinaga na Senegal.

Uretse no kuba abashinzwe gushakira ikipe y'igihugu abatoza bararyaniraga mu nshingano zabo, byabayeho ko hari igihe Minisiteri yashakaga umutoza ariko FERWAFA itamushaka bigatuma batumvikana. 

Urugero rwamenyekanye cyane ni igihe Minisiteri ya Siporo yahaga amasezerano Mashami Vincent mu gihe FERWAFA yo yashakaga gutandukana na we. Ibi byose byagaragazaga ko umupira w’amaguru wo mu Rwanda urimo kidobya nyinshi.

Si Perezida Kagame wabonaga ko ikipe y’Igihugu Amavubi yasubiye inyuma gusa ahubwo na FIFA yabiteye hanyuma imboni Amavubi asubira inyuma ku rutonde rwa FIFA ngarukakwezi. 

Mu mwaka wa 2015, u Rwanda rwageze ku mwanya wa 68 ariko nyuma ruza gusubira inyuma gake gake mu mwaka wa 2016 rugera ku mwanya wa 85, 2017 rugera ku mwanya 93, 2018 rugera ku mwanya wa 127 rukomeza kumanuka kuri ubu rukaba ruri ku mwanya wa 131.

Nyamara nubwo ibyo byagiye bibaho, kuba abayobozi basigaye basigaye bashyira hamwe no kuba hafi hafi y'Ikipe y’Igihugu Amavubi, byongereye imbaraga bituma icyizere cyo gutsinda kizamuka cyane cyane ku ngoma y'umutoza Frank Torsten Spiltter kuri ubu umaze gutoza imikino 8 aho yastinzemo 3, anganya 4 atsindwa umukino umwe gusa ndetse akaba amaze gutsindwa ibitego 2 gusa.

Bimwe mu bitangiye guhinduka muri iyi myaka 8, harimo icyizere cy'intsinzi ku Amavubi ndetse ubuyobozi bukaba bugerageza gushyira hamwe n'abakinnyi. Bigaragara ko mu cyo abakinnyi banengwaga cyo kudatanga umusaruro ukwiye mu kibuga, batangiye kwikubita agashyi cyane ko nta kipe ijya gukina n'Amavubi yiteguye ko iri bubone intsinzi mu buryo bworoshye.

Aha wahera ku mutoza wa Nigeria, mu kiganiro n'itangazamakuru mbere y'umukino, yavuze ko Amavubi atari ikipe yo kwizera gutsinda mu buryo bworoshye kuko iri mu bihe byayo byiza bityo baje biteguye gutanga ibyabo byose kuko kubona igitego baziko byari kubagora. Umukino warangiye kandi babonye ko ibyo bibwiraga byari ukuri.

Si ibyo gusa, kugeza magingo aya u Rwanda ruyoboye itsinda ryo gushaka itike y’igikombe cy’Isi n’amanota 7 aho runganya amanota na South Africa mu gihe Nigeria yaraye ikinnye n’u Rwanda yo iri ku mwanya wa gatanu mu makipe atandatu.

Nyuma y’umunsi wa kabiri mu gushaka itike y’igikombe cya Africa, u Rwanda rumaze kunganya imikino 2 bivuze ko rufite amanota abiri rukaba ruri ku mwanya wa gatatu nyuma ya Nigeria iyoboye hagakurikiraho Benin yatsinze umukino yahuyemo na Libya.

Mu by’ukuri Perezida Kagame akunda umupira w'amaguru nubwo yagira inshingano nyinshi ariko umutima wo gukunda umupira ni uwa cyera.

Ku wa 27 Kamena 2024 ubwo yari mu bikorwa byo kwiyamamaza, Perezida Kagame yavuze uburyo mu mwaka wa 1978 yagiye kureba umukino wa Mukura yari yakinnye na Panthères Noires, kandi yari yaje mu Rwanda mu buryo yise ubwo gusesera ariko kubera gukunda umupira w'amaguru yemera kwishyira mu byago ajya kureba umupira.

Perezida Kagame yagize ati: 'Hari Stade nto yari hano mu 1978, niyo bahinduyemo iyaPelé?ndumva atariyo, umuntu w'inshuti yanjye najyaga nsura, ndetse icyo gihe yabaga muri Université mu 1978 antwara ku mupira, Mukura na Panthères Noires, barakinaga icyo kihe'.

Arongera ati 'Njyana n'iyo nshuti yanjye, ariko nkajya mbona abantu bandeba, ni nko kuvuga ngo ariko aka kantu ntabwo ari akinaha, ndetse umukino ugiye kurangira iyo nshuti yanjye irambwira ngo ariko urabizi, reka tuve ahangaha umupira utararangira, ubundi ibikurikiraho cyane cyane iyi kipe ya Panthère iyo yatsinzwe, abantu barakubitwa'.

Ku wa 10 Nzeri 2024, Perezida yongeye kugaruka kuri sitade bica amarenga ko mu gihe Amavubi yakomeza kwitwara neza nta kabuza twakongera kubona kenshi Perezida Kagame yitabiriye imikino y'umupira w'amaguru nk'uko akunze kwitabira imikino y'intoki nka Basketball.

Perezida Kagame yongeye kugaruka kuri sitade nyuma y’imyaka umunani

Umukino wa mbere Perezida Kagame yarebye nyuma y’imyaka 8, u Rwanda rwanganyije na Nigeria

Nyuma yo kwitwara neza, Umunyezamu Ntwali Fiacre yavuze ko kuba Perezida yari yaje kubashyigikira byabongereye imbaraga cyane bakina bifuza gutsinda batatsinda bakanganya

Ku wa 07 Gashyantare 2021, Perezida Kagame na Minisitiri wacyuye igihe Aurore Mimosa bakiriye Amavubi nyuma yo kwitwara neza muri CHAN 2020.

Abakinnyi b’Amavubi bitwaye neza muri CHAN2020, bashimiwe na Perezida Kagame ndetse bagenerwa ishimwe basabwa gukomeza kwitwara neza

Perezida Kagame yongeye kureba umukino w’Amavubi kuri Stade Amahoro nyuma y’imyaka 8