Author: webrwanda

Ni amahugurwa y'icyiciro cya Kabiri yateguwe ku bufatanye n'Ikigo cyo mu Karere gishinzwe Kurwanya Ikwirakwizwa ry'Intwaro nto (RECSA), yitabiriwe mu gihe cy'icyumweru n'abagera kuri 25 bo muri Polisi y'u Rwanda, ibigo byigenga bicunga umutekano n'abashinzwe umutekano wa Parike z'igihugu, aje akurikira ayitabiriwe n'abo mu nzego zishinzwe kugenzura iyubahirizwa ry'amategeko 40, yasojwe mu cyumweru gishize.

Ubwo yasozaga aya mahugurwa ku mugaragaro, Benjamin Sesonga, Umunyamabanga Uhoraho muri Minisiteri y'Umutekano w'Imbere mu gihugu, yavuze ko aya mahugurwa ari umusingi w'imicungire myiza y'umutekano n'iterambere rirambye.

Yagize ati 'Iminsi mumaze hano muri aya mahugurwa yatumye muhura, mubona ubumenyi bwiyongera ku bwo musanganywe kugira ngo murusheho gucunga neza intwaro ntoya n'izoroheje, n'uburyo bwiza bw'imicungire y'amasasu bizabafasha kurushaho gucunga neza umutekano no guharanira iterambere ry'igihugu cyacu.'

'Nk'uko mubizi rero dusangiye inshingano zikomeye zo kugira ngo imbunda mufite cyangwa se mukoresha mu kazi kanyu ka buri munsi, zicungwe neza kandi habeho kubuza ikwirakwizwa ry'intwaro mu maboko y'abadakwiriye kuzigira kuko ari ryo ntandaro y'amakimbirane n'intambara ndetse n'imibanire mibi y'abantu n'abandi, uretse iy'ibihugu n'ibindi. Ibyo byose rero igihe mumaze hano ni ishingiro ry'icyizere cy'uko mugiye kuba imbarutso y'umusemburo w'impinduka, mu guca iyo mikoreshereze mibi, aho mukorera n'aho mutuye.'

Yabasabye kuzashyira mu bikorwa ibyo bungukiye mu mahugurwa bubahiriza amabwiriza yo kubika no gukurikirana imikoreshereze myiza y'intwaro n'amasasu, abashimira ubushake, imbaraga no kwitanga bagaragaje bitanga icyizere cy'uko umwanya bamaze mu masomo utapfuye ubusa, ashimira n'inzego zabohereje ngo bakurikire aya masomo afatwa nk'umusingi w'imikoreshereze y'intwaro neza.

Umuyobozi w'Ishuri ry'amahugurwa rya Gishari, CP Robert Niyonshuti yavuze ko aya mahugurwa yateguwe hagamijwe kwihutisha ishyirwa mu bikorwa ry'icyerekezo cyo guhangana n'ikwirakwizwa ry'intwaro nto n'izoroheje.

Ati 'Polisi y'u Rwanda, yiyemeje guharanira umutekano mu karere iha abashinzwe umutekano ubushobozi bwo guhangana n'ikwirakwizwa ry'intwaro nto n'izoroheje, bijyanye no gushyigikira icyerekezo cyo 'Gucecekesha imbunda' muri Afurika bitarenze umwaka wa 2030. Aya mahugurwa azabafasha gutanga umusanzu mu ishyirwa mu bikorwa ry'iki cyerekezo.'

CP Niyonshuti yasobanuye ko amahugurwa yatanzwe yibanze ku buryo bunoze bwo gucunga Intwaro nto n'Intwaro zoroheje (SALW), kimwe mu bigira uruhare ku mutekano mucye mu karere iyo zidacunzwe neza no ku masomo ajyanye n'imikoranire y'inzego zicunga umutekano n'abaturage (community based Policing), nka bumwe mu buryo bw'imikorere bufasha mu gucunga umutekano binyuze mu gukorera hamwe kw'inzego z'umutekano n'abaturage.

Yashimangiye ko gucunga umutekano bishingiye ku bufatanye n'abaturage, ari bwo buryo buhamye bufasha mu gukumira ibyaha no kurushaho kwicungira umutekano kandi ko aya mahugurwa ari ishingiro ryo kubaka icyizere no gukorana n'abaturage mu kurwanya ingaruka zaterwa no gutunga intwaro mu buryo butemewe cyangwa kuzicunga nabi.

CP Niyonshuti yagaragarije abitabiriye amahugurwa ko Ubumenyi n'ubushobozi bungutse bigomba guhuzwa n'imikorere yabo ya buri munsi, haba mu kazi ka Polisi ko gucunga umutekano rusange, gucunga umutekano mu bigo byigenga no gucunga Parike z'igihugu n'amashyamba kandi ko gukorana n'abaturage no gucunga neza intwaro bigomba kuba umusingi w'imikorere yabo.

Yashimiye Minisiteri y'Umutekano, RECSA, n'abandi bafatanyabikorwa, avuga ko biteguye gukomeza ubufatanye mu kongerera abakozi ubushobozi bukenewe kugira ngo amahoro n'umutekano birambye bibashe kugerwaho.

ACP (Rtd) Damas Gatare, Umuyobozi ushinzwe ibikorwa na gahunda muri RECSA, yavuze ko aya mahugurwa ari ikimenyetso kigaragaza ko Leta y'u Rwanda ishyira imbere ibikorwa bijyanye no kongerera ubushobozi inzego zishinzwe kugenzura intwaro kugira ngo zifatwe neza kandi ko aya mahugurwa ari inkingi ku bayitabiriye mu gukemura imbogamizi bahuraga nazo mu bikorwa basanzwe bakora bijyanye no gucunga intwaro n'amasasu.

Mu Ishuri rya Polisi ry'amahugurwa (PTS) hasojwe amahugurwa ku buryo bunoze bwo gucunga intwaro nto n'izoroheje

Izinjiye mu mezi icyenda ya 2024, ziruta kure izinjiye mu myaka yose yabanje. Ni ibintu byigaragaza mu muhanda hirya no hino mu gihugu, kuko udashobora kugenda metero 200 utarabona imodoka ya Hybrid.

Ubwiyongere bw'izi modoka bwatewe n'uko zakomorewe imisoro muri gahunda y'igihugu yo kurwanya imyuka ihumanya ikirere no kugabanya ingano y'ibikomoka kuri lisansi igihugu gikoresha cyane ko mu minsi ishize igiciro cyabyo cyari kiri kuzamuka cyane kubera ibibazo by'intambara hirya no hino ku Isi.

Imodoka nyinshi ziboneka mu Rwanda z'amashanyarazi, ni iz'uruganda rwa Kia na Hyundai zo muri Koreya. Ni inganda zikataje mu gukora imodoka zihendutse kandi ziteye neza ugereranyije n'izindi zimenyerewe muri Afurika nka Toyota.

Muri izo modoka, inyinshi ni Kia K5 na Kia 7 hamwe na Hyundai Sonata. Igiciro cyazo, inyinshi ziba ziri hagati ya miliyoni 12 Frw na miliyoni 15 Frw. Inyinshi ni izo mu myaka ya 2012 na 2016 kuko arizo ziba zihendutse.

Zinjira mu gihugu zarakoze, uyitumye imugeraho nibura mu gihe cy'amezi abiri, ariko mbere y'intambara zibasiye Isi muri iki gihe, byashoboraga gufata ukwezi kumwe.

Izindi modoka z'amashanyarazi ziboneka mu Rwanda harimo iz'inganda z'Abashinwa nka BYD, Dongfeng, Nissan n'iza Toyota zo mu bwoko bwa RAV4.

Nta modoka nyinshi z'amashanyarazi z'imodoka z'inganda zo mu Budage nka VW, Mercedes na BMW ziboneka ku isoko ry'u Rwanda cyane ko igiciro cyazo kiba kiri hejuru ugereranyije n'izindi.

Mu 2020, imodoka zikoresha amashanyarazi gusa zinjiye mu gihugu zari 19, mu gihe muri uwo mwaka nta n'imwe ya Hybrid yinjiye. Bigeze mu 2021, iz'amashanyarazi zariyongereye zigera kuri 38 mu gihe iza Hybrid zinjiye mu gihugu bwa mbere zari 28.

Mu 2022, imodoka z'amashanyarazi zinjiye mu gihugu zari 134 mu gihe iza Hybrid zari 520. Mu 2023, imodoka z'amashanyarazi zageze ku 103 mu gihe iza Hybrid zinjiye ari 2.386.

Bigeze mu 2024, imodoka z'amashanyarazi zageze zinjiye zari 218 mu gihe iza Hybrid zo zinjiye mu gihugu ari 3.726. Muri rusange, imodoka z'amashanyarazi ziri mu Rwanda guhera mu 2020 ni 512 mu gihe iza Hybrid ari 7.172.

Mbere y'iyo myaka, imodoka z'amashanyarazi zinjiye mu gihugu zari munsi y'icumi ku mwaka kuko nko mu 2018, hinjiye imodoka imwe gusa. Mu 2019, imodoka zikoresha amashanyarazi zatangiye kuzamuka kuko hinjiye 10.

Leta yigomye menshi mu misoro

Leta yakuyeho umusoro ku nyongeragaciro (VAT) ku modoka zikoresha amashanyarazi, ibyuma bisimbura ibindi, batiri zazo n'ibikoresho bikenerwa mu kuzongeramo umuriro.

Ibyo byatumye nko mu 2019, imisoro leta yigomwe ingana na miliyoni 26,7 Frw; 2020 iba miliyoni 101,6 Frw mu gihe mu 2021 yageze kuri miliyoni 498,7 Frw.

Raporo ya RRA yo mu mwaka wa 2022/22, igaragaza ko leta yigomye imisoro ingana na miliyari 4,6 Frw kubera izi modoka.

Imodoka zifashisha amashanyarazi zatangiye gukorwa cyane kuva mu 2008 biturutse ahanini ku mpungenge Isi yagize ku izamuka ry'ibiciro by'ibikomoka kuri peteroli ndetse no kuba ibihugu byinshi byari bishyize imbere imishinga yatuma hagabanuka imyuka ihumanya ikirere.

Imodoka zikorwa n’inganda zo mu Bushinwa zikomeje kwiyongera mu Rwanda

Hyundai Sonata za Hybrid ni nyinshi mu Rwanda

MTN Rwanda yabimburiye ibindi bigo mu kwinjira mu ikoreshwa ry’imodoka z’amashanyarazi, igura iza Mitsubishi Outlander

BRD ifite imodoka z’amashanyarazi ikoresha

Toyota Prius zikomeje kuba nyinshi mu Rwanda nubwo hashize iminsi zinubirwa hirya no hino ku Isi

Imodoka z’amashanyarazi cyangwa iza Hybrid ziba zifite ikirango kiziranga

Kia K7 ni zimwe mu modoka za Hybrid z’ama-voiture nziza

Toyota RAV4 za Hybrid nazo zikomeje kwiyongera mu Rwanda

Kia K5 zisigaye zarabaye uburo buhuye

Hyundai Grandeur za Hybrid ntabwo ari nyinshi mu Rwanda

Dongfeng ifite imodoka nziza z’amashanyarazi zikomeje kwiyongera ku isoko

Amafoto: Claude Kasiro

Iki gitaramo yise “Neyanziza” yagikoze mu ijoro ryo kuri uyu wa Gatanu tariki 4 Ukwakira 2024, kuri Sitade ya Lugogo Cricket Oval isanzwe iberamo ibitaramo bihuza abahanzi bakomeye mu bihugu bitandukanye byo ku Isi, basanzwe bataramira mu Mujyi wa Kampala mu gihugu cya Uganda.

Yifashishije konti ye ya Instagram, mbere y'uko ajya ku rubyiniro, Sheebah Karungi yagaragaje ko yitegura kwibaruka imfura ye, ndetse yuzuye amashimwe. Ariko kugeza n'ubu, ntiyigeze avugira mu itangazamakuru umugabo bagiye kubyarana.

Sheebah Karungi aherutse kumvikanisha ko atiteguye kuba mu nzu imwe n'umugabo, ariko arashaka kubyara imfura ye ku myaka 34 y'amavuko.

Imbere y'ibihumbi by'abantu bari bitabiriye iki gitaramo, Sheebah Karungi yaserutse yambaye imyambaro igaragaza inda mu rwego rwo gushimangira ko ibyavuzwe mu bihe bitandukanye by'uko yaba atwite, ari ukuri.

Muri iki gitaramo, Sheebah Karungi yifatanyije n'abahanzi bagenzi be barimo nka Karole Kasita, Pallaso, Weasel Manizo, Lydia Jazmine, Allan Toniks, Nina Roz, Pia Pounds, n'abandi.

Mu kiganiro n’itangazamakuru ku wa 3 Ukwakira 2024, Sheebah Karungi yavuze ko nyuma y’iki gitaramo azafata ikiruhuko mu muziki, ashingiye ku kuba amaze imyaka 14 anezeza imitima y’abakunzi be binyuze mu ruhumbirajana rw’ibitaramo yagiye akorera ahantu hanyuranye.

Yavuze ati “Ntabwo ngiye kugenda by’iteka ryose. Aho ni akaruhuko. Natangiye kugaragara ku rubyiruko kuva mfite imyaka 14 y’amavuko, ubu ngejeje imyaka 34 y’amavuko. Ndatekereza ko n’Imana yabyemeye ko nafata ikiruhuko.”

Sheebah Karungi ni umuhanzikazi w'Umunya-Uganda, umubyinnyi akaba n'umukinnyi wa filime udatana n'udushya ku rubyiniro n'imyambarire.

Yatangiye guhangwa amaso mu 2014 ubwo yashyiraga hanze indirimbo yise 'Ice Cream', yatumye yegukana igihembo cy'umuhanzikazi mwiza mu bihembo HiPiPo Music Awards.

Mu 2016, Sheebah yakinnye muri filime 'Queen of Katwe', yagaragayemo abarimo umunya-Kenya Lupita Nyong'o uzwi mu ruhande rwa Cinema ku Isi.

Sheebah Karungi yasohoye amafoto agaragaza ko atwite- Ni nyuma y’igihe kinini abantu babicyeka, ariko akabihakana

Muri iki gitaramo, Sheebah Karungi yagiye anyuzamo akicara kubera umunaniro ariko agakomeza gutaramira abakunzi be 

Abahanzi Pallaso na Weasel bafashije Sheebah Karungi gutaramira ibihumbi by’abantu muri iki gitaramo cye mbere y’uko afata ikiruhuko mu muziki

Umuhanzikazi Lydia Jazmine yifatanyije na Sheebah Karungi muri iki gitaramo 

 

Umuhanzikazi Nina Roz ari ku rubyiniro mu gitaramo cyabereye muri Cricket Oval

Umuhanzi Allan Toniks uzwi cyane mu gihugu cya Uganda, yatanze ibyishimo

 

Umuhanzikazi Karoke Kasita yashyigikiye mugenzi we mu gitaramo

Ibi byagarutsweho n'Umuyobozi wa SOS-Rwanda mu Ntara y'Amajyepfo, Serugo Aimable, mu muhango wo gushyingira imiryango 33 yo mu Murenge wa Kivu mu Karere ka Nyaruguru.

Serugo yavuze ko mu bikorwa bahoramo byo kurengera umwana, iyo baganiriye na bo basanga nka 90% baba barahageze kubera ko iwabo ahanini basiganira kubarera.

Ati '90% bya bariya bana iyo muganira, bakubwira ko ari amakimbirane ari iwabo bahunze, ari na yo mpamvu mu kubikemura hazamo n'iki gikorwa cyo gukangurira ababyeyi gushyingiranwa mu buryo bwemewe n'amategeko. Iyo batabikoze usanga ari imwe mu mpamvu ikurura ayo makimbirane.'

Serugo yakomeje avuga ko mu bukangurambaga bafatanyije n'inzego z'ibanze, hamaze gusezerana imiryango isaga 120 kandi bagikomeje.

Umunyamabanga Nshingwabikorwa w'Umurenge wa Kivu yabwiye IGIHE ko gushyingirana byemewe hagati y'abagiye gushinga umuryango ari kimwe mu bigabanya amakimbirane.

Ati 'Iyo umuryango ubanye warashyingiranwe, haba hari umutekano mu rugo. Abashakanye babana mu mahoro kandi n'ahagaragaye ayo makimbirane bashobora no kuyakemura ubwabo.

'Ku mwana rero bimugirira akamaro kuko iyo abona ababyeyi be barasezeranye, babanye neza, na we bimuha gutekana no gutera imbere mu bwenge no mu mibereho myiza.''

Imwe mu miryango yasezeranye yavuze ko ubu yashyize ku ruhande impaka zajyaga zibabaho no gusiganira inshingano zo kurera.

Umurenge wa Kivu ni umwe mirenge ikora ku ishyamba rya Nyungwe, aho abahatuye hakirimo abafite umuco w'ubuharike, aho hari n'ababura amahitamo mu gihe cyo gufata icyemezo cyo gushaka uwo bashyingiranwa byemewe n'amategeko.

Mu Karere ka Nyaruguru, ubu habarurwa imiryango 305 ibana mu buryo butemewe n'amategeko, ikomeje gushishikarizwa kubikora kugira ngo abayigize babane mu mutuzo barengewe n'amategeko.

Abasezeranye imbere y’amategeko biyemeje kubana neza bubahiriza icyo amategeko ategeka

Bamwe mu bashyingiwe bafatanya n’abayobozi gukata umutsima

Imiryango 33 yo mu Murenge wa Kivu yasezeranye imbere y’amategeko

Serugo Aimable yavuze ko umuryango utekanye ari wo urera abana neza

Umusaza Kayonga Jean Damascene yasezeranye n’umugore we

Ibiganiro bya Perezida Kagame na Nguema byibanze ku gushimangira umubano usanzwe hagati y'ibihugu byombi.

Nguema aheruka mu Rwanda muri Nyakanga ubwo yitabiraga umuhango w'irahira rya Perezida Kagame.

Yatangiye kuyobora Gabon ku wa 30 Kanama 2023 nyuma yo guhirika ku butegetsi Ali Bongo. Icyo gihe yamaze amezi abiri gusa ahita agirira uruzinduko mu Rwanda, maze we na Perezida Kagame baganira ku mutekano ku mugabane wa Afurika no mu bihugu bigize Umuryango w'Ubukungu byo muri Afurika yo Hagati (ECCAS).

U Rwanda na Gabon bisanzwe bifitanye imikoranire n'ubuhahirane binyuze mu bwikorezi bwo mu kirere, Sosiyete Nyarwanda ya RwandAir ikorera ingendo i Libreville mu Murwa Mukuru wa Gabon.

Ibihugu byombi byasinyanye amasezerano y'imikoranire mu 1976, aza kuvugururwa mu 2010.

Urugaga rw'Abikorera mu Rwanda n'inzego zo muri Gabon bateganya kunoza imikoranire yo gutangira kuhakorera ubucuruzi nk'inzira yo guteza imbere ibikorerwa mu Rwanda no guhanga imirimo myinshi.

Gabon ni igihugu gikungahaye ku bucukuzi bwa peteroli, ubucuruzi bw'imbaho n'amabuye y'agaciro.

Perezida Kagame na Nguema bahuriye i Paris mu Bufaransa

Abo bana ni Gisubizo Erneste, Irasubiza Nepomucsene, Maniraguha James, Mugisha Patrick, Mugisha Obed na Mugabo Bruce. Bafite imyaka iri hagati ya 10 na 13 y'amavuko, aho biga mu mwaka wa Kane w'amashuri abanza.

Ubwo imvura yagwaga kuri iriya tariki, umuyaga mwinshi washatse kugurukana Ibendera ry'igihugu riri mu kigo cyabo, maze bariya bana b'abanyeshuri babona igiti cyaryo gitangiye guhengama, basohoka mu mashuri aho bari bugamye bajya kuriramira kugira ngo umuyaga utaritura hasi.

Bakomeje gufata igiti imvura irabanyagira ndetse n'umuyaga ari mwinshi cyane ku buryo wanasakambuye amwe mu mashuri yo kuri icyo kigo cyabo, ariko ntibyabaca intege.

Umuyobozi wa EP Cyobe, Mugirwanake Aaron, yabwiye IGIHE ko bari mu bihe by'ibiza, ariko abo bana bakagaragaza umutima w'ubutwari, ibintu byanejeje benshi barimo n'abarezi b'iri shuri.

Yavuze ko ubundi abana icyenda aribo batabaye bwa mbere, ariko batatu umwarimu akababuza kugenda, mu gihe batandatu bo bari bamaze kunyaruka bagiye.

Ati 'Twasaga nk'abari mu biza, kuko mu gihe bakoraga biriya hari n'amashuri yarimo asenyuka, ariko bo ntibagira ubwoba bakomeza gufata igiti cy'Ibendera.''

Yakomeje avuga ko kubera umuyaga mwinshi, wageze aho ukabarusha imbaraga, igiti cy'ibendera kikavunika, ibendera rikagwa hasi mu byondo, ibintu byababaje bariya bana cyane.

Umutima wo gukunda no kubaha ibirango by'igihugu bawukuye hehe?

Mugirwanake, yavuze ko EP Cyobe ari ishuri rishya kuko ryubatswe muri COVID-19, ibi ngo byatumye ibendera bahazanye bwa mbere, abana barabonye icyubahiro ryahawe rizamurwa, bikanajyana n'amasomo bajya bahabwa atandukanye arimo kubaha ibirango by'igihugu ndetse no kumenya kurinda ibikorwaremezo birinda kubyangiza cyangwa kurebera ababyonona.

Ati 'Ubundi tukizamura ibendera, kuko turi ikigo gishya, abana barabibonaga, ariko kandi tujya tugira igihe cyo kuririmba Indirimbo Yubahiriza Igihugu, byose abana baba babireba, ndetse tugira n'umwanya w'itorero, kandi icyo gihe cyose tubaganirizamo ibintu byinshi byo guha agaciro ibirango by'igihugu, kurinda ibikorwaremezo no gufata neza ibintu byose.''

Nyuma y'ikwirakwira ry'iyi nkuru yatangaje benshi, inzego zitandukanye zatangiye kwemerera abana amashimwe atandukanye kubera umutima wo gukunda igihugu bagaragaje.

Ku ikibitiro, umuyobozi w'ishuri yageneye aba bana ishimwe ririmo ibikoresho by'isuku nyuma y'iki gikorwa bagaragaje, ndetse yatangarije IGIHE ko hateganyijwe inama ya komite y'ishuri ngo hatekerezwe uko bazashimirwa by'umwihariko.

Umuyobozi w'Akarere ka Ruhango wungurije ushinzwe imibereho myiza y'abaturage, Mukangenzi Alphonse, nawe yabwiye IGIHE ko nk'akarere bakozwe ku mutima cyane n'igikorwa cyiza cy'aba bana, avuga ko hari gutegurwa uko babasura bakabashimira n'ubwo ateruye ngo avuge nyakuri icyo babateganyiriza.

Yagize ati 'Burya n'ijambo rishimira riba ari ryiza ku mwana wagaragaje igikorwa nka kiriya, guhemba biri mu buryo bwinshi, n'iyo umuntu agushimiye muri kumwe biba byiza, ariko kandi n'ibindi byose bizashoboka, turiho turabiteganya.''

Mu yandi makuru IGIHE yamenye ni uko n'umuyobozi wa Polisi y'Igihugu mu Karere ka Ruhango yasuye aba bana, abizeza ko azagaruka abazaniye ibihembo, atasobanuye neza ibyo ari byo.

Uretse aba kandi, abinyujije kuri Facebook, Senateri Dr Emmanuel Havugimana, yanditse asabira aba bana kuzahembwa, aho yagize ati 'Byankoze ku mutima! Aba bana mbasabiye ibihembo.''

Hari n'abandi kandi bakomeje kugaragaza amarangamutima, basabira aba bana kuzafashwa kubera umutima udasanzwe bagaragaje wo gukunda igihugu.

Aba bana uko ari batandatu hamwe n’umurezi wabo

Aba bana basuwe n’Umunyabanga Nshingwabikorwa w’Umurenge wa Mbuye, Floribert Muhire ashima ubutwari bagize

Ibi byatumye BRD ibasha gufatirana aya mahirwe, yemera kwakira miliyari 3..5 Frw ku mafaranga yari yateganyije, ibisobanuye ko yakiriye miliyari 33.5 Frw muri rusange. Abaguze izi mpapuro bakoresheje amafaranga y'u Rwanda bazungukirwa 12.9 % buri mwaka, mu gihe cy'imyaka irindwi.

Ishoramari rito rishobora ryari ibihumbi 100 Frw, aho BRD yari yashyize imbaraga mu gushishikariza abashoramari bato n'abantu ku giti cyabo, kwitabira kuzigura.

Hifashishijwe ikoranabuhanga, BRD yabashije kugera kuri iyi ntego, aho abashoramari bato bitabiriye kugura izi mpapuro ku kigero cya 212% ugereranyije n'uko byari bimeze ku mpapuro za mbere zagiye ku isoko.

Ku rundi ruhande, banki z'imbere mu gihugu, ibigo bitanga serivisi z'ubwishingizi n'ibindi bitandukanye, byose byerekanye ubushake bwo gushora muri izi mpapuro mpeshamwenda. Abanyarwanda batuye mu bihugu nka Canada, u Bwongereza, Tunisia, Uganda, Norvège, u Buyapani, u Burundi, Djibouti, Afurika y'Epfo, u Bufaransa, u Budage na Côte d'Ivoire, bose bashoye imari muri izi mpapuro mpeshamwenda.

Umuyobozi Mukuru wa BRD, Kampeta Sayinzoga, yashimiye buri wese washoye imari muri iyi banki, ati 'Turashimira Guverinoma y'u Rwanda ku bw'ubufasha bwayo ndetse na buri wese witabiriye [kugura] izi mpapuro, bidutera imbaraga zo gukomeza gushaka ibisubizo bituma tubona ubushobozi bwo gushyira mu bikorwa gahunda y'iterambere ry'igihugu.'

Impapuro mpeshamwenda za BRD zaguzwe ku kigero cya 130.2%

Mu myaka ishize u Rwanda rwibasiwe n'imyuzure yatewe n'imvura yaguye ari nyinshi, cyane cyane mu Majyaruguru n'Iburengerazuba. Yangije ibikorwa by'ubuhinzi, amazu n'ibikorwa remezo, ndetse ihitana n'ubuzima bw'ababarirwa mu magana.

Ni mu gihe kandi u Rwanda rwiyemeje gutanga umusanzu ufatika mu rugamba Isi irimo rwo kugabanya imyuka ihumanya ikirere, hagamijwe ko ubushyuhe Isi igira butarenga degré Celsius 2, byaba akarusho bukaba degré Celsius 1.5.

Kugira ngo Igihugu kibashe guhangana n'ibyo biza biterwa n'imihindagurikire y'ibihe kandi runashyire mu bikorwa Amasezerano ya Paris rwashyizeho umukono mu 2016 agamije kugabanya imyuka ihumanya ikirere, guverinoma ivuga ko iteganya kongera ubushobozi bwo kuburira mbere, bigafasha mu kugabanya ingaruka z'ibiza.

Muri gahunda y'imbaurabukungu ya kabiri (NST2) kandi hateganyijwemo ko hazasubiranywa ibyogogo byangiritse, hakanozwa imicungire y'ibishanga.

Ibyo ngo bizajyana no gushyira mu bikorwa ingamba zo kugabanya imyuzure mu bice bikunze kwibasirwa n'ibiza nko mu Ntara y'Amajyaruguru n'iy'Iburengerazuba, ku bufatanye n'abaturiye ibyo bice.

Guverinoma kandi ivuga ko mu myaka itanu iri imbere hazanozwa neza imicungire y'amashyamba hifashishijwe ikoranabuhanga.

Ibiti bya gakondo hamwe n'ibyihanganira imihindagurikire y'ibihe bizongerwa, kimwe n'ibivangwa n'imyaka ndetse n'iby'imbuto ziribwa.

Guverinoma yiyemeje kwegereza abaturage ingemwe z'ibiti; ibintu bizafasha kugabanya imyuka yangiza ikirere ku kigero cya 38% nk'uko biteganywa n'amasezerano mpuzamahanga y'i Paris yo guhangana n'ingaruka z'imihindagurikire y'ibihe, no guteza imbere ubukungu butangiza ibidukikije.

Muri iyo myaka itanu izageza mu 2029, guverinoma ivuga ko hazakusanywa imari y'arenga miliyari $3 azafasha mu kubaka ubushobozi bwo gushyigikira imishinga n'ibikorwa bigamije guhangana n'ingaruka z'imihindagurikire y'ibihe mu bice byose by'iterambere ry'ubukungu bw'Igihugu.

Raporo ya Middle East and Africa Environmental Sustainability Scorecard ya 2023, yashyize u Rwanda ku mwanya wa gatanu mu bihugu bihagaze neza mu rugamba rwo kubungabunga ibidukikije muri Afurika no mu Burasirazuba bwo Hagati.

Ni ibintu Igihugu gikesha ingamba zitandukanye zashyizweho zirimo kongera ubuso buteyeho amashyamba, gukumira ibyuma by'ikoranabuahanga bigira ingaruka ku bidukikije, kugenzura ibinyabiziga bisohora imyuka myinshi ihumanye mu mihanda, no gukoresha uburyo bwo guteka hifashishisjwe izindi ngufu zitari inkwi n'amakara.

U Rwanda kandi rukomeje guha ikaze ikoreshwa ry'ibinyabiziga bikoresha amashanyarazi, hirindwa imyuka isohorwa n'ibikoresha ibikomoka kuri peteroli.

Zimwe mu nyubako nini zikomeje kuzamurwa hirya no hino muri Kigali, nazo zirubakwa mu buryo butangiza ibidukikije. Ibyo byiyongeraho umushinga wa Green City Umujyi wa Kigali ushyizemo ingufu mu myaka itanu iri imbere, witezweho byinshi mu iterambere rijyana no kubungabunga ibidukikije.

Umushinga wa Green City uri mu u Rwanda rwitezeho gutanga umusanzu mu rugamba rwo kubaka ubukungu butangiza ibidukikije.

Ni amasezerano yasinywe ubwo Minisitiri w'Intebe, Dr. Edouard Ngirente, yari muri ubwo bwami aho yari yitabiriye ibirori byo kwizihiza imyaka 200 bumaze bushinzwe ndetse na 58 bumaze bwigenga.

Nyuma y'ibi birori, Minisitiri w'Intebe yahuye n'Umwami wa Lesotho, Letsie III, amugezaho ubutumwa bwa Perezida Paul Kagame.

Nyuma y'aho nibwo Minisitiri Ngirente yahuye na Minisitiri w'Intebe w'ubwo bwami, Ntsokoane Samuel Matekane, ari naho hasinyiwe aya masezerano, yashyizweho umukono n'ibihugu byombi.

U Rwanda na Lesotho bisanzwe bifitanye ubutwererane mu nzego zirimo n'iz'umutekano, ibi byatumye muri Mutarama 2022 uwari Umuyobozi Mukuru wa Polisi y'u Rwanda, yagiriye uruzinduko rw'akazi rw'iminsi ine muri Lesotho aho yagiye gusura Polisi y'iki gihugu.

Mu biganiro byahuje abayobozi bombi banaganiriye ku ishyirwa mu bikorwa ry'amasezerano y'ubufatanye inzego zombi zashyizeho umukono i Kigali mu Rwanda tariki ya 24 Kanama 2021.

Umubano w'u Rwanda na Lesotho watangiye kubakwa mu 1983, ukaba ushingiye ku bwubahane n'ubufatanye hagati y'ibihugu byombi.

Wabagarijwe n'ibikorwa bitandukanye byiganjemo kugenderanirana kw'abayobozi b'impande zombi.

Urugero ni uruzinduko Minisitiri w'Intebe w'u Rwanda, Dr. Edouard Ngirente yagiriye muri iki gihugu kiri ku buso bwa kilometero kare 30.355, aho yari agiye mu muhango w'Irahira rya mugenzi we, Ntsokoane Samuel Matekane.

Ni mu gihe na Ntsokoane Samuel Matekane yaje gufata mu mugongo u Rwanda ubwo hibukwaga ku nshuro ya 30 Jenoside yakorewe Abatutsi mu 1994 ndetse anitabira umuhango w'Irahira rya Perezida Kagame.

Ubwami bwa Lesotho bwashinzwe n'Umwami Moshoeshoe I mu myaka 200 ishize, bukaba bwararanzwe n'amahoro n'umutekano mu bihe bitandukanye kugeza n'ubu.

Minisitiri w’Intebe, Dr. Edouard Ngirente, yahuye n’Umwami wa Lesotho, Letsie III, amugezaho ubutumwa bwa Perezida Paul Kagame

U Rwanda na Lesotho byasinye amasezerano y’ubufatanye

Minisitiri w’Intebe Ngirente yahuye na Minisitiri w’Intebe w’ubwo bwami, Ntsokoane Samuel Matekane, ari naho hasinyiwe aya masezerano, yashyizweho umukono n’ibihugu byombi