Author: webrwanda

Ni amatora yabaye mu Nteko Rusange ya Sena kuri uyu wa 4 Ukwakira 2024.

Sena igizwe na Komisiyo ya politiki n'imiyoborere, komisiyo y'iterambere ry'ubukungu n'imari, komisiyo y'ububanyi n'amahanga, ubutwererane n'umutekano na Komisiyo y'imibereho y'abaturage n'uburenganzira bwa muntu.

Senateri Usta Kayitesi Usta yatorewe kuba Perezida wa Komisiyo ya Politike n'Imiyoborere n'amajwi 25, na ho ku mwanya wa Visi Perezida wa Komisiyo hatowe Senateri Uwera Pelagie.

Dr. Usta Kayitesi yagaragaje ko impamvu zatumye yiyamamariza uyu mwanya zirimo kuba yarize amategeko, imirimo yakoze yamuhuje na Komisiyo ya Politike n'Imiyoborere ku buryo bizamufasha kuzuza inshingano.

Ati 'Imirimo nagiye nkora yampaye amahirwe yo guhura n'ibikorwa bya komisiyo ya politike n'imiyoborere. Nabaye muri Komisiyo y'Ivugurura ry'Itegeko Nshinga mu 2015 kandi iyo komisiyo igaragaza neza ibikorwa by'iyi komisiyo ya politike ikora.'

Yahamije ko n'Urwego rw'Igihugu rw'Imiyoborere yari amaze imyaka igera kuri irindwi ayoboye rwatangaga raporo kuri komisiyo ya Politike n'Imiyoborere ku buryo azi neza inshingano n'imikorere y'iyi komisiyo.

Ku mwanya wa Perezida wa Komisiyo y'Iterambere ry'Ubukungu n'Imari hatowe Senateri Nsengiyumva Fulgence naho Visi Perezida aba Senateri Dr. Nyinawamwiza Leatitia.

Muri Komisiyo y'Ububanyi n'Amahanga, Ubutwererane n'Umutekano hatowe Senateri Murangwa Ndangiza Hadidja, wayiyoboraga n'ubundi muri manda ishize, naho Visi Perezida w'iyi Komisiyo ni Senateri Rugira Amandin.

Senateri Rugira yagaragaje ko igihe kirekire yakimaze ari umudipolomate, bikazamufasha mu kuzuza inshinano ze.

Mu mirimo yakoze imyaka 18 yayimaze muri dipolomasi, aho imyaka ine yari Umunyamabanga Uhoraho muri Minisiteri y'Ububanyi n'Amahanga n'Ubutwererane avamo ajya kuba ambasaderi.

Ati 'Indi myaka 14 nyibamo Ambasaderi w'u Rwanda mu bihugu binyuranye birimo Repubulika Iharanira Demokarasi ya Congo, u Burundi, u Bubiligi na Zambia kandi ngira ngo ku bireba umutekano ibyo bihugu mvuze muzi ko hari aho bihurira n'umutekano wacu.'

Abandi batowe ni Senateri Umuhire Adrie wabaye Perezida wa Komisiyo y'Imibereho y'Abaturage n'Uburenganzira bwa Muntu, mu gihe Visi Perezida wayo yabaye Senateri Niyomugabo Cyprien ndetse bombi bahoze muri biro y'iyi komisiyo muri manda ishize.

Sena y'u Rwanda igizwe n'Abasenateri 26 barimo abagore 14 bangana na 53,9% n'abagabo 12 bangana na 46,1%. Ni ubwa mbere muri uyu mutwe hagaragayemo abagore benshi ugeranyije n'abagabo kuko manda ya gatatu icyuye igihe yari igizwe n'abagore bangana na 35%.

Sena y'u Rwanda ifite inshingano zo kugenzura iyubahirizwa ry'amahama remezo, Gusuzuma no gutora amategeko, kugenzura ibikorwa bya Guverinoma, Kugenzura imikorere y'imitwe ya Politiki ndetse no gutanga ibitekerezo ku mushinga w'ingengo y'imari ya Leta.

Senateri Usta Kayitesi yavuze ko ubunararibonye afite mu miyoborere n’amategeko bizatuma yuzuza inshingano yatorewe

Senateri Uwera Pelagie yatorewe kuba Visi perezida wa Komisiyo ya Politike n’imiyoborere

Itora ryari mu ibanga amajwi akabarurirwa aho

Muri Komisiyo y'Ububanyi n'Amahanga, Ubutwererane n'Umutekano hatowe Senateri Murangwa Ndangiza Hadidja

Senateri Rugira Amandin yagaragaje ko ubunararibonye afite buzafasha mu kuzuza inshingano za Sena

Senateri Niyomugabo Cyprien yongeye kugirirwa icyizere cyo kuba Visi Perezida wa Komisiyo y’Imibereho y’Abaturage

Senateri Umuhire Adrie yongeye gutorerwa kuyobora Komisiyo y’Imibereho y’Abaturage

Abasenateri bitabiriye amatora bari 26 bose uko bagize Sena y’u Rwanda

Nyuma yo gutora impapuro batoreyeho zahise zicibwa

Amafoto: Ingabire Nicole

Papa Francis yahisemo tariki 7 Ukwakira, umunsi wa mbere Hamas yatereyeho Isiraheli, kuri uwo munsi gusa igahitana abantu 1,200 ndetse ikanafata bugwate abagera kuri 250 muri Gaza, nk’umunsi abantu bo hirya no hino ku isi bazajya bafata umwanya bagasenga kandi bakiyiriza ubusa basengera amahoro.

Nk'uko bivugwa na Minisiteri y'Ubuzima ya Gaza iyobowe na Hamas, abantu barenga 40.000 ni bo baguye muri iyo ntambara kuva muri Kanama 2024.

Ibijyanye n'iyi gahunda y'isengesho, byatangajwe n'Umuyobozi wa Kiliziya Gatolika ya Roma, ubwo yasozaga Misa yabereye ku kibuga cya Mutagatifu Petero.

Nk'uko ibiro ntaramakuru Vatikani bibitangaza, Francis yagize ati: “Muri iyi saha itangaje y’amateka yacu, mu gihe imiyaga y’intambara n’umuriro w’urugomo bikomeje gusenya abantu n’amahanga yose, [umuryango wa gikirisitu ugomba] gukora ibikorwa bya kimuntu.”

Igihe Papa yahamagariraga abantu bose kwitabira iri sengesho, yagize ati: “Reka tugendere hamwe. Reka twumve Umwami. Reka tuyoborwe na Mwuka.'

Ntabwo ari ubwa mbere Papa Francis ahamagariye amahanga yose kwiyiriza ubusa no gusengera agace kose karimo intambara, kuko yaherukaga no kubikora mu 2013 mu rwego rwo gusengera Siriya ndetse no muri 2017, ubwo hasengerwaga Repubulika Iharanira Demokarasi ya Congo na Sudani y’Amajyepfo.

Atangaje ibi mu gihe yashyize hanze iki gisigo kuri uyu wa Gatanu tariki 4 Ukwakira 2024. Ni kimwe mu bisigo bigize Album ye ya kabiri aherutse gushyira ku isoko yise “Nzaza” iriho n’ibindi bisigo yakoranyeho n’abandi bahanzi ndetse n’abasizi.

Rumaga yabwiye InyaRwanda ko akora Album ye ya Kabiri Kenny Sol ari umwe mu bantu yatekereje ko bazakorana kandi ko ubwo yamwegeraga yahise abyumva vuba.

Ariko kandi avuga ko gutekereza gukorana na Kenny Sol atari ibya vuba, kuko no kuri Album ya mbere yise “Mawe” yifuzaga ko bakorana ariko ‘tubura igitekerezo’. Ati “Umunsi nagize igitekerezo rero naramuhamagaye bimera nko kurundura umudari, abyumva cyane, ambwira ko rwose yishimiye ko dukora icyo kintu. Nzaza ni kimwe mu bisigo biri kuri Album byiza.”

Rumaga yavuze ko iki gisigo ‘Nzaza’ yakoranye na Kenny Sol gishushanya urugamba rwo kubohora u Rwanda, kandi agisohoye muri uku kwezi kubera ko uku kwezi ‘njye nakwise ukwezi ko gukunda Igihugu’.

Yavuze ko muri uku kwezi azashyira hanze n’ibindi bisigo bibiri byitsa ku gukunda igihugu, ari nayo mpamvu tariki 1 Ukwakira 2024, ari bwo yasohoye integuza y’iki gisigo ‘kuko ari umunsi ukomeye ku Rwanda, umunsi wa mbere w’itangira ry’urugamba.’

Akomeza ati “Rero kiriya gisigo kivuga ku buzima bwo gukunda Igihugu.” Yasobanuye ko mu rwego rwo gushushanya urugamba rwo kubohora Igihugu no guhamagarira abantu kugikorera no kugikunda, biri mu mpamvu zatumye bahitamo kugaragara mu mashusho y’iki gisigo bambaye imyenda ya Mukotanyi. Ati “Niyo mpamvu watubonye mu myambaro ya ‘Mukotanyi’.'     

Mukotanyi ni impuzankano ifite amateka akomeye, kandi adasanzwe kuri bari abasirikare ba RPA bari ku rugamba rwo kubohora u Rwanda. Iyi myenda ingabo zatangiye kuyambara mu 1991, ubwo zimuriraga ibindiro mu gace k'ibirunga. Iyi myambaro iri mu ibara ry'icyatsi, ibara rya Chocolat ndetse igaragaramo n'igiti cy'umugano.

Rumaga yavuze ko mu ikorwa ry’amashusho y’iki gisigo bahaye akazi abantu barenga 20, kandi bashoyemo amafaranga menshi mu ikorwa ryayo. Gusa, hari n’abo bifashishije badashobora kubonera ikiguzi cyabo. 

Amashusho (Video) y'iki gisigo yakozwe na Tag Mayors, ni mu gihe amajwi (Audio) yakozwe na Santana Sauce.

Rumaga yatangaje ko kuva kuri Album ya mbere yifuzaga gukorana na Kenny Sol ariko bakabura ibitekerezo

Rumaga yasobanuye ko iki gisigo bagikoze mu rwego rwo kwizihiza ukwezi k'Ukwakirwa kwahiriwe gukunda Igihugu

Muri iki gisigo, Kenny Sol agaragara mu mwambaro wa Mukotanyi cyo kimwe na Junior Rumaga

KANDA HANO UREBE AMASHUSHO Y'IGISIGO 'NZAZA' CYA RUMAGA NA KENNY SOL

“> 

Ni amahugurwa yamaze ibyumweru umunani bigishwa ku ruhare rw'umugabo by'umwihariko mu gushyigikira uburinganire n'ubwuzuzanye hagati yabo n'abagore. Abayasoje babiherewe impamyabumenyi mu muhango wabereye i Kigali tariki 4 Ukwakira 2024.

Iyi gahunda NCBA yayitangije nyuma yo gusanga hari ibibazo uruhuri byugarije umuryango mugari bishingiye ku kuba abagabo hamwe bafatwa nk'abihagije muri Byose, bityo ko abakeneye kuzamurwa ari abagore gusa.

Umwe mu batangaga ayo mahugurwa akanaba umukozi wa NCBA ushinzwe ubugenzuzi bw'imari, Ingabire Ivan yagarutse ku mpamvu abagabo bakeneye na bo kwigishwa ku buringanire mu muryango.

Yagize ati 'Umugabo mu muryango mugari afatwa nk'umuntu wihagije kuva mu bwana ntibabona n'ubabwira icyo bagomba gukora bakumva ko babizi nk'uko umuryango mugari ubafata. Twigishije abagabo mbere na mbere kwisobanukirwa bakamenya abo bari bo, inshingano bafite mu muryango wabo no mu muryango mugari'.

Yakomeje avuga ko hari bimwe mu bibazo byugarije umuryango mugari biterwa no kuba abagabo bakura batozwa kwimenya muri byose.

Ati 'Uyu munsi ibibazo umuryango mugari ufite harimo abangavu bafatwa ku ngufu, ingo zisenyuka, umubare munini w'abiyahura n'ibindi usanga bifite aho bihurira n'umugabo. Umugabo kenshi ntahabwa umwanya ngo yitabweho aganirizwe yumve ko na we afite amaragamutima kandi yagira ibibazo akagira uwo abiganiriza. Iyo ibyo byose umugabo abyibitsemo kenshi bigera aho bimurenze kubera kubura uwo agisha inama ni ho bya bibazo bihera'.

Umwe mu bitabiriye ayo mahugurwa, Murengezi Brian yavuze ko amasomo yahawe agiye kumufasha kuba umugabo ubereye umuryango mugari ahereye aho akorera.

Ati 'Twigishijwe ko bimwe mu byo twumvaga bigize umugabo nyawe ari ukwibeshya. Nk'ubu umugabo na we yaba umunyantege nke yewe no kurenza umugore we ariko baba bagomba kuzuzanya bahereye kuri uko kwisobanukirwa kuri buri umwe'.

'Numvaga ko kuba umugabo bivuze kuba uzi gukora cyane uri umuhanga abantu bakwirahira kandi ufite n'imitungo. Nasanze ariko ibyo bigomba kwiyongeraho kumva ko atari wowe wenyine ufite ijambo mu rugo kuko n'umugore afite ibyo agomba kukunganira mukazamurana mu rugo. Nk'igihe mufite abana, ese nta kindi umugabo aba ashobora kubaha kitari ukubshyurira ishuri muri ya mafaranga menshi afite?'.

Umuyobozi Mukuru wa NCBA Bank Rwanda, Musyoka Nicholas yavuze ko iyo banki ishaka kuba intangarugero mu kwimakaza uburinganire mu bigo by'ubucuruzi kuko ibyo bitanga amahirwe angana mu kazi kandi bikazana umusaruro urambye .

Gahunda ya 'Man Enough' yatangijwe n'umugabo w'Umunyakenya witwa Simon Mbevi.

Abitabiriye iki gikorwa bahawe ubuhamya n’abagabo biyemeje kuba umusemburo w’impinduka mu muryango mugari

Abagabo bitabiriye aya mahugurwa mu byumweru umunani

Ingabire Yvan yagaragaje impamvu abagabo na bo bakwiye kwigishwa ku buringanire mu muryango

Umuyobozi Mukuru wa NCBA Bank Rwanda, Musyoka Nicholas yavuze ko iyo banki ishaka kuba intangarugero mu kwimakaza uburinganire mu bigo by'ubucuruzi

Abasoje amahugurwa bahawe impamyabumenyi

Muri ibi birori, Minisitiri Ngirente yahagarariye Perezida Paul Kagame mu birori byabereye muri Stade ya Setsoto, bikarangwa n'ibikorwa birimo akarasisi ka gisirikare ndetse n'ubutumwa bwatanzwe n'abayobozi batandukanye bitabiriye.

Lesotho ni Ubwami bufite umwihariko wo kuba buzengurutswe na Afurika y'Epfo, kikaba igihugu cy'imisozi aho ubuso bwacyo bwose buri hejuru ya metero 1000 uvuye ku nyanja.

Ni igihugu gituwe n'abaturage bake, batarenze miliyoni eshatu, kikagira ubukungu bushingira ku buhinzi n'ubucukuzi bw'amabuye y'agaciro n'ibindi byiganjemo ubucuruzi na Afurika y'Epfo, igihugu kibafatiye runini kuko ari cyo kibagemurira byinshi mu byo bakura hanze.

Umubano w'u Rwanda na Lesotho watangiye kubakwa mu 1983, ukaba ushingiye ku bwubahane n'ubufatanye hagati y'ibihugu byombi.

Wabagarijwe n'ibikorwa bitandukanye byiganjemo kugenderanirana kw'abayobozi b'impande zombi.

Urugero ni uruzinduko Minisitiri w'Intebe w'u Rwanda, Dr. Edouard Ngirente yagiriye muri iki gihugu kiri ku buso bwa kilometero kare 30.355, aho yari agiye mu muhango w'Irahira rya mugenzi we, Ntsokoane Samuel Matekane.

Ni mu gihe na Ntsokoane Samuel Matekane yaje gufata mu mugongo u Rwanda ubwo hibukwaga ku nshuro ya 30 Jenoside yakorewe Abatutsi mu 1994 ndetse anitabira umuhango w'Irahira rya Perezida Kagame.

U Rwanda na Lesotho bisanzwe bifitanye ubutwererane mu nzego zirimo n'iz'umutekano, ibi byatumye muri Mutarama 2022 uwari Umuyobozi Mukuru wa Polisi y'u Rwanda, yagiriye uruzinduko rw'akazi rw'iminsi ine muri Lesotho aho yagiye gusura Polisi y'iki gihugu.

Mu biganiro byahuje abayobozi bombi banaganiriye ku ishyirwa mu bikorwa ry'amasezerano y'ubufatanye inzego zombi zashyizeho umukono i Kigali mu Rwanda tariki ya 24 Kanama 2021.

Ubwami bwa Lesotho bwashinzwe n'Umwami Moshoeshoe I mu myaka 200 ishize, bukaba bwararanzwe n'amahoro n'umutekano mu bihe bitandukanye kugeza n'ubu.

Minisitiri w’Intebe Dr. Ngirente yahagarariye Perezida Kagame mu kwizihiza Ubwigenge bw’Ubwami bwa Lesotho

Akarasisi k’ingabo kashimishije benshi

Ibi birori byaranzwe n’imyiyereko y’indege

Ubwami bwa Lesotho buri kwizihiza imyaka 200 bumaze bushinzwe

Ni ishuri riri ku buso bwa hegitari 1.300 ziriho inyubako, imirima ikoresha mu buhinzi n'ubworozi n'ibindi bijyanye n'amasomo ayitangirwamo. Buri mwaka ishuri rigomba kuba rifite abanyeshuri batarenze 250.

Rifite intego zo kwigisha urubyiruko rw'u Rwanda ubumenyi bugezweho bugamije guteza imbere ubuhinzi n'ubworozi bujyanye n'igihe.

Abahasoreza amasomo bahabwa impamyabumenyi y'icyiciro cya kabiri cya Kaminuza mu bijyanye n'ubuhinzi burengera ibidukikije [Conservation Agriculture], ariko buri umwe akaba afite icyiciro runaka cy'ubuhinzi cyangwa ubworozi yihuguyemo by'umwihariko.

Mu mwaka wa gatatu umunyeshuri ashobora guhitamo kuba inzobere mu bworozi [Animal Production], cyangwa ubuhinzi [Crop Production], gukoresha imashini mu buhinzi [Mechanization] ndetse no gutunganya no kongerera agaciro ibikomoka ku buhinzi [Food Processing].

Muri uyu mwaka kandi baba bagomba gukora imenyerezamwuga ry'amezi atandatu, muri cya gice umunyeshuri yahisemo kubamo inzobere.

Kugeza ubu abanyeshuri bo mu byiciro bibiri ni bo bamaze gushyikirizwa impamyabumenyi aho umwaka ushize hasoje abanyeshuri 75 mu gihe muri uyu mwaka hasoje abanyeshuri 81.

Umuyobozi Mukuru wa RICA, Dr. Ron Rosati, yagaragaje ko intego yabo ari ukugeza ku baturage binyuze mu banyeshuri babo cyangwa gahunda zabo, uko ubuhinzi bukorwa kinyamwuga bukongera umusaruro n'inyungu kandi hashowe make.

Ati 'Turifuza kubona ikwirakwizwa ry'ubuhinzi bwita ku bidukikije mu gihugu kuko bizongera inyungu mu buhinzi ariko kandi bikarushaho guteza imbere uburyo burambye bwo guhinga bushingiye ku kubungabunga ibidukikije. Ibi ni intego yacu nyamukuru kuko twifuza kubona ubu buryo bukoreshwa hose mu gihugu.'

Umuyobozi Mukuru wa RICA, Dr. Ron Rosati, yagaragaje ko bifuza ko ubuhinzi butangiza ibidukikije bukwira hose mu gihugu

Ubuhinzi budakenera isuka mu butaka

Kimwe mu byatunguye benshi ni umwihariko w'umuhinzi bubungabunga ibidukikije bwigishwa muri RICA.

Ubu ni ubuhinzi butangiza ubutaka bwibanda ku mahame atatu, aho irya imbere ari ukwirinda gucukura cyangwa guhingagura ubutaka cyane; iryo guhora wasasiye ubutaka aho igihingwa gihizwe utakirandura ahubwo ukagitereraho ikindi [Permanent crop cover] n'ihame rya gatatu ryo guhora usimburanya igihingwa [Crop protection].

Iri hame rya mbere ribuza umuhinzi kwifashisha isuka ahinga ahubwo agakoresha igikoresho cyabugenewe [n'umuhoro wabikora] agacukura umwobo muto cyane uhagiye kujyamo imbuto n'ifumbire.

Uku kudacukura ubutaka cyane bituma udusimba tuto cyane tubamo [micro-organism] tudapfa tugafasha mu gukora ifumbire karemano bikanafasha ubutaka kurumbuka ndetse tukanaba intungagihingwa.

Ihame rya kabiri rivuga ko iyo igihingwa gisaruwe ibisigaye bitarandundwa ahubwo bigomba kwifashishwa mu gutwikira ubutaka buhingwa aho bibora na byo bigahinduka ifumbire.

Ihame rya nyuma riteganya ko igihingwa kimwe kitagomba guhingwa incuro ebyiri zikurikiranya mu murima umwe, yose agahuriza hamwe guha ubutaka ubushobora bwo gutanga umusaruro mwiza kandi bigakorwa mu buryo karemano bidasabye ikiguzi cyinshi.

Guhinga muri ubu buryo binatuma ingano y'amazi umuhinzi akenera guha ubutaka igabanyuka kuko bugumana ayo buba bufite.

Umunyeshuri mu mwaka wa gatatu muri RICA, Kwizera Rwayitare Fabrice, yabwiye IGIHE ko mu murima bakoreramo ubu buhinzi mbere kuri hegitari imwe havagamo umusaruro wa toni eshanu, ariko hakoreshwa ubu buhinzi burengera ibidukikije havamo toni ziri hagati ya 7,5-8 kandi uko igihe gishira zikazagenda ziyongera.

Ati 'Birahagije gusa gucukura akobo konyine uri bushyiremo imbuto n'ifumbire kuko igihingwa gikura neza ntakibazo. Ubu buhinzi ni ingenzi kuko igice kinini gitunzwe na bwo mu Rwanda kandi harimo kurinda kwangiza amafaranga kandi ukunguka cyane kuko umusaruro wiyongera.'

Uretse ubu buhinzi, muri RICA hakorerwa n'ubwo mu nzu zabugenewe zizwi nka 'Green House'. Izi zifasha mu guhangana n'imihindagurikire y'ibihe no kuzamura ubwiza n'ubwinshi bw'umusaruro w'abahinzi.

Urugero nk'ahakorerwa ubuhinzi bwa poivron z'amabara atandukanye ku buso bwa metero kare 504, iyo zimaze guterwa zitangira gusarurwa nyuma y'amezi atatu bigakorwa buri cyumweru. Mu mezi icyenda havamo toni ziri hagati y'eshanu na zirindwi.

Ikindi ni uko bafite ikoranabuhanga ryo gupima ubutaka hakamenyekana ububobere b'ubushyuhe bufite.

Bafite ubundi buryo bwo kuhira hifashishijwe ikoranabuhanga aho umuntu yuhira bidasabye kuba hafi ya 'pivot' ahubwo akoresha application akagena ingano y'amazi iyi mashini isohora, umuvuduko igenderaho n'igihe igomba kumara yuhira ubundi yakemeza bikikora.

Muri RICA banigisha ubuhinzi bukorerwa muri ‘Green House’

Muri RICA bahinga imbuto z’ubwoko butandukanye

Mu kuhira hakoreshwa ikoranabuhanga aho umuntu yuhira bidasabye kuba hafi ya 'pivot' ahubwo akoresha application akagena ingano y'amazi iyi mashini isohora, umuvuduko igenderaho n'igihe igomba kumara yuhira

Ubworozi burengera ibidukikije

Muri RICA hatangirwa amasomo y'uburyo ubworozi buteye imbere burengera ibidukikije bukorwa aho inka, ingurube n'inkoko byororerwa ahabugenewe kandi n'umusaruro wa byo ukabyazwa inyungu.

Ibi bikorwa binyuze mu kwita ku mibereho myiza y'amatungo no kuyafasha kugira ubuzima bwiza binyuze mu kuyagenera ibyo kurya bikwiye, ibiraro byiza, n'ubuvuzi.

Muri iri shuri hari ivuriro ry'amatungo ku buryo irigize ikibazo rihita rijya kwitabwaho.

Aha abanyeshuri bigisha kwita kuri aya matungo no gutunganya umusaruro wayo. Ku nka bahabwa n'amasomo y'uko batera intanga n'insoro.

Umusaruro w'aya matungo uragurishwa hakabonekamo amafaranga.

Hororerwa inka 73 [26 zikamwa ubu] zihororerwa zirishiriza mu rwuri rwa hegitari 74 ziteyemo ubwatsi butandukanye. Ikamwa litiro nyinshi ikamwa litiro 43 ku munsi, muri rusange zose zigakamwa litiro ziri hagati ya 515-520 ku munsi.

Hari n'ikindi gice cyororerwamo inkoko z'inyama n'iz'amagi, hifashishijwe uburyo bunyuranye hashingiwe ku bushobozi, abanyeshuri bakiyungura ubwo bimenyi.

Aho izi nkoko zororerwa hakakira 1.000 z'inyama [zororwa mu byumweru bitandatu] n'iz'amagi ziterenze 1.300 [zitera amagi 1.100 ku munsi].

Bigishwa uburyo inkoko zishobora kororerwa ahantu hatandukanye kandi byose bigatanga umusaruro

Umusaruro w'ibikomoka ku buhinzi n'ubworozi uratunganywa

Umwihariko w'iri shuri ni ukwigira ku murirmo kuko abanyeshuri bahabwa amasomo bakanashyira mu bikorwa ibyo biga.

Ni ukuvuga ngo niba ari ubuhinzi, biga bahinga n'ubworozi bakabwiga borora. Birumvikana rero ko no mu gushyira mu ngiro ibyo biga hari umusaruro bitanga.

Ni muri urwo rwego muri iri shuri hashyizwe ibigega bitanu bihunika ibinyampeke [soya n'ibigori] bingana na toni 460. Aha bihashyirwa bitegereje kujyanwa ku isoko.

Hafi y'ibi bigenga kandi hari imashini zifashwa mu kongera ibi binyampeke agaciro aho zikoramo ibiryo by'inka, inkoko n'ingurube. Imashini imwe ifite ubushobozi bwo gutunganya toni 12 z'ibi biryo ku munsi.

Umusaruro wundi nka poivron n'izindi mboga ndetse n'imbuto na byo bijyanwa ku isoko, mu gihe ya magi agurishwa ku ishuri no hanze ya ryo.

Amata atangwa n'inka agemurirwa ikigo agakoreshwa mu gutunganya amafunguro, hakaba ajyanwa mu makusanyirizo yegereye iri shuri hakaba n'andi ajyanwa mu gice cyo muri iri shuri cyongererwaho agaciro ibikomoka ku bworozi aho akorwamo 'yaourt' na 'fromage' kandi na byo bigakorwa n'abanyeshuri.

Hari ikindi gice cyongererwamo agaciro inyama ziba zakomotse ku matungu yororerwa muri iri shuri, hagakorerwamo za 'saucisse'; 'Ham'; inyama z'inkoko n'ibindi. Nko ku munsi abanyeshuri bashobora kongerera agaciro ibiro by'inyama birenga 30.

Umwihariko w'iri shuri ni uko ibikorwa byose by'ubuhinzi n'ubworozi bikorwa n'abanyeshuri ku rugero rwa 90% nka kimwe mu bice biba bigize amasomo yabo, ubundi abakozi basanzwe bagasigara bakurikirana ibi bikorwa mu gihe abanyeshuri bakurikirana andi masomo atandukanye.

Umuyobozi Mukuru Ushinzwe amasomo muri RICA, Dr Olusegun Yerokun, yavuze ko gahunda zabo atari ugutanga amasomo gusa ahubwo ari ukubakira urubyiruko rw'u Rwanda ubushobozi kugira ngo ruzagire icyo rumarira igihugu cyarwo.

Mu banyeshuri 75 basoreje kwiga muri iri shuri mu 2023, 93% muri bo bamaze kwinjira mu kazi mu nzego zitandukanye zijyanye n'ubuhinzi mu Rwanda mu gihe abandi bakomeje amasomo.

Uretse gutanga amasomo, hari gushyirwamo imbaraga mu ishami ry'ubushakashatsi kuri ubu buhinzi burengera ibidukikije muri RICA rimaze igihe gito ritangijwe.

Umuyobozi Mukuru Ushinzwe amasomo muri RICA, Dr Olusegun Yerokun, yavuze ko gahunda zabo atari ugutanga amasomo gusa ahubwo ari ukubakira urubyiruko rw'u Rwanda ubushobozi kugira ngo ruzagire icyo rumarira u Rwanda

Mu mezi icyenda havamo toni ziri hagati y'eshanu na zirindwi kuri poivron zihingwa muri green house

Izi ni inkoko zitera amagi zororerwa muri RICA

Izi ni 'saucisse' zatunganyijwe n’abanyeshuri bo muri RICA

Iyi ni imashini ikoreshwa mu guha inkoko ibiryo

Iyi mi imyembe izwi nka DL6, ifite umwihariko wo kugira umusaruro mwinshi kuko umwe ushobora gupima garama 900 ikibuto cyawo gipima garama 60 gusa. Hashize imyaka 3 ihinzwe muri RICA

Gukoresha imashini mu buhinzi ni rimwe mu masomo bahabwa

Buri mwaka iri shuri ryakira abanyeshuri bashya 84

Bumwe mu bumenyi aba banyeshuri bahabwa ni ubwo kwitunganyiriza ifumbire

Aha ni ho hari imashini zitunganya ibiryo by’amatungo n’ibigega bihunikwamo umusaruro

Abanyeshuri ubwo bari bari gutunganya 'saucisse'

Aba banyeshuri ni bo bahinga bakanasarura

Aba banyeshuri banyurwa no kwigira ku murimo

Aba banyeshuri baba bafite n’ubushobozi bwo gusuzuma amatungo bakamenya ikibazo bafite

50% by’umwanya abanyeshuri bamara biga, baba bari kwigira ku murimo

Umwihariko wa RICA ni uko abanyeshuri biga banashyira mu bikorwa

Umusaruro ukomoka ku matungo yororerwa muri iki kigo uragurishwa

poivron ni kimwe mu bihingwa byera neza iyo zitaweho

Ubuhinzi burengera ibidukikije ntibusaba amazi menshi cyane mu butaka kuko hari ayo buba bwibikiye

Inyubako zo muri RICA zubatse mu buryo bubungabunga ibidukikije

Kuri izi nyubako hagiye hakoreshwa bimwe mu bikoresho bitangiza ibidukikije

Amafoto: Kasiro Claude

Yabigarutseho mu ijoro ryo kuri uyu wa Kane tariki 3 Ukwakira 2024, mu kiganiro yatanze binyuze mu gace kazwi nka 'Meet me Tonight' mu gitaramo cy'urwenya cya Gen-Z Comedy cyabereye muri Kigali Conference and Exhibition Village ahazwi nka Camp Kigali.

Ni ikiganiro cyibanze cyane ku rugendo rwo kubohora u Rwanda, imyaka 30 ishize Abanyarwanda bagira uruhare mu kugarura umutekano mu bihugu bitandukanye byo ku Isi no kubaka Igihugu, ariko kandi agaragariza urubyiruko ko aribo hazaza h'igihugu, bityo bakwiriye kugikotanira.

Iki kiganiro yagitanze gishamikiye kuri iki gitaramo cya Gen-z Comedy cyari cyahujwe no kwizihiza itariki 1 Ukwakira, yabaye intangiriro y'urugamba rwo kubohora u Rwanda.

Lt Col Simon Kabera yavuze ko kuba Abanyarwanda uyu munsi basinzira bakabyuka amahoro, ari imvano y'umutekano waharaniwe n'Ingabo zari iza RPA kuko 'habayeho ikiguzi' cy'abana b'Abanyarwanda bemeye kwitanga mu bihe bitandukanye.

Yavuze ko yinjiye mu rugamba rwo kubohora Igihugu afite imyaka 18 y'amavuko. Ati 'Navukiye mu buhungiro, nize ndi impunzi, mbaho ndi impunzi, kugeza ku myaka yanjye 18 nzi neza ko ndi impunzi. Ariko ndi impunzi, igihugu cyanjye gihari.'

Simon yavuze ko kiriya gihe ntibyashobokaga ko yari kugaruka mu Rwanda, kuko na Se yari yarahunze mu 1959. Yavuze ko muri iriya myaka, u Rwanda rwarimo ivangura, akarengane, no gutoteza igice kimwe cy'Abanyarwanda hagamijwe kubamenesha.

Yumvikanishije ko igihe kigeze 'abari bakuru, bari mu gisirikare cya Uganda harimo Nyakubahwa Perezida wa Repubulika y’u Rwanda, Paul Kagame, harimo n'abandi batandukanye babona ko bidakwiriye ko abantu bakomeza kuba mu buhungiro, abo batekereje gutyo bari bazi neza ko hari ikiguzi kigomba gutangwa kugira ngo igihugu kibone umutekano.

Lt.Col Simon yabwiye urubyiruko ko mbere y'Abakoloni, Abanyarwanda bari babanye neza, ariko ko bakimara kugera mu gihugu, ingoma zose zakurikiranye zaranzwe n'amacukubiri no kuvangura Abanyarwanda nk'ingaruka z'ubukokoni.

Yavuze ko ababaye mu gihugu kiriya gihe nta burenganzira bari bafite ku gihugu cyabo, ndetse ntabemererwa kujya mu mashuri.

Ariko uyu munsi igihugu gitanga amahirwe ku bantu bose. Kandi buri munyarwanda afite uburenganzira bwo gutura aho ashaka, akiga aho ashaka.

Simon yavuze ko nyuma y'urugamba yagiye kwiga muri Kaminuza y'u Rwanda ishami rya Huye. Ndetse abona n'amahirwe yo kujya kwiga mu Buholandi.

Yabwiye urubyiruko ko kugira Igihugu ari nko kugira umubyeyi kandi ni umugisha. Ati 'Ninjiye mu 1991 (mu gisirikare) turarwana, duhagarika Jenoside yakorewe Abatutsi mu 1994, ndetse tubohora n'Igihugu.'

Yavuguruje Umuholandi wagorekaga amateka

Simon yabwiye urubyiruko kugira umuhate n'umwete wo kumenya amateka y'u Rwanda, kuko ari bwo bazabasha kuyasobanurira abakiri bato.

Yavuze ko ubwo yigaga muri Kaminuza mu Buholandi, hari Umuholandi wagorotse amateka y'u Rwanda, afata umwanya wo kumusobanurira ko Abanyarwanda ubwabo ari bo bahagaritse Jenoside yakorewe Abatutsi.

Simon yavuze ko yagiye ku rugamba atarasoza amasomo ye, ariko nyuma y'urugamba yabonye amahirwe yo gukomeza kujya gukurikirana amasomo ye.

Avuga ko kuba Inkotanyi ari uguharanira kurandura ibibazo byugarije Sosiyete. Ati 'Agaciro kawe ni uko uri iwanyu mu rugo. Uwakurenganya wese, wamubwira ko iyi ari gakondo y'iwanyu.'

Umukoro ku rubyiruko

Lt Col Simon yabwiye urubyiruko kugira ishyaka ryo gukunda Igihugu. Ati '[…]Njyewe nagiye kwiga muri Kaminuza ari uko mfite amanota akwiriye, nubwo narwaniye igihugu iyo ngira make ntabwo nari kujyayo.'

Yavuze ko mu kubaka u Rwanda rushya nta muntu wasubijwe inyuma. Kuko habayeho kureba mu nguni zose z'ubuzima, abantu bongera kubanishwa bundi bushya.

Yavuze ko u Rwanda rutekanye. Avuga ati 'Niba ushaka kumenya ko u Rwanda rurinzwe uzambuke umupaka gatoya, uhurireyo n'ikibazo umuntu agukubite inkoni yongere agukubite iya kabiri habure n'ugufasha, ubundi n'abari iruhande babaze bati uyu ni uwahe? Mumwongere izindi, ariko muri iki gihugu, igihugu kirarinzwe, uburenganzira bw'umuntu burubahirizwa, aho waba uri hose.'

Yasobanuye ko u Rwanda rutanga amahirwe kuri buri wese, kuko bifata amasaha make gusa kugira ngo ufunguze kompanyi cyangwa sosiyete utangire gukora.

Yabwiye urubyiruko ko 'iki gihugu kiri mu maboko yanyu' kandi 'mufite imbaraga zo kucyubaka'. Ati 'Igihe kizagera dusaze, ni ishema kuri twe kuba dushobora gusiga abantu bafite igihugu ku mutima.'

Simon yavuze ko urugamba rwo kubohora u Rwanda rwatangijwe kubera ko 'twifuza igihugu cy'aho umuntu ashobora gutura aho ashaka, igihugu aho buri wese agira amahirwe angana.'

Se yabaye imvano yo kwinjira ku rugamba

Lt Col Simon yavuze ko yakuze Se amutoza gukunda igihugu kandi 'nkiri muto yarambwiraga ngo igihugu cy'u Rwanda gitemba amata n'ubuki, kubwira umwana rero muri icyo gihe, ko gitemba amata n'ubuki, byatumye nkunda igihugu kurushaho'.

Yanavuze ko yafashe icyemezo cyo kujya ku rugamba, kuko mu bihe bitandukanye yumvaga amakuru y'abandi bantu bagiye kwifatanya n'Inkotanyi ku rugamba, kandi muri we yumvaga ko akeneye igihugu no kuba iwabo.

Ati 'Amahirwe nagize, narwanye intambara mbaho si uko abandi bose bagize amahirwe yo kubaho, Data agira amahirwe y'uko intambara yarangiye ansanga mu gihugu nkiriho. Kuba rero narafashe umwanzuro wo kuza gufatanya n'abandi, harimo gukunda igihugu, nanjye nari ndambiwe ubuhungiro, ndambiwe n'agasuzuguro.'

 

Umuvugizi wungirije w’Ingabo z’u Rwanda, Lt Col Simon Kabera, yabwiye urubyiruko ko barwanye urugamba baharanira Igihugu gitanga amahirwe kuri bose

Lt Col Simon Kabera yavuze ko yahisemo kujya ku rugamba afite imyaka 18 y'amavuko, kubera ko Se yamwumvishaga ko u Rwanda ari igihugu gitemba amata n'ubuki

Lt Col Simon Kabera yasabye urubyiruko kurwanya buri wese ugoreka amateka, kandi agaharanira gusigasira ibimaze kugerwaho

Lt Col Simon Kabera ubwo yaganiraga na Fally Merci utegura ibitaramo bya 'Gen-Z Comedy' binyuze mu gace kazwi nka 'Meet me Tonight'

Umunyarwenya wamamaye nka ‘Atome’ [Uri ibumoso] ari mu bitabiriye iki gitaramo 

Umunyarwenya wamamaye nka ‘Mushumba’ niwe washyize akadomo kuri iki gitaramo 

Umuraperi Bushali witegura kumurika Album ye “Full Moon” yitabiriye iki gitaramo

Umunyarwenya wamamaye nka Muhinde yateye urwenya agaruka ku barimo Alex Muyoboke n’abandi

Isimburana ry'izuba n'imvura mu Rwanda rigabanyijemo ibihe bine birimo bibiri by'izuba na bibiri by'imvura. Ibi bituma kugira ngo umuhinzi abikore kinyamwuga adahanga amaso ikirere gusa ahubwo atekereza n'uburyo bwo kuvomerera imyaka.

Ibi byiyongereraho kuba abahinzi babikora kinyamwuga atariko bose bafite imirima mu bishanga aho bakoresha amazi y'inzuzi mu kuvomerera, bituma hari abifashisha amazi y'Ikigo cy'Igihugu gishinzwe amazi isuku n'isukura WASAC Group mu kuvomerera imyaka bahinga imusozi.

Bicakungeri Jean ukorera ubuhinzi bw'umwuga mu murenge wa Mururu w'Akarere ka Rusizi yabwiye IGIHE ko aherutse guhinga imbuto afite intego yo kuvomerera akoresheje amazi ya WASAC, ukwezi gishize abona ikiguzi cya metero kimwe kikubye kabiri, ahagarika kuvomerera bituma imbuto yari yahinze zitera neza.

Ati “Icyifuzo cyacu ni uko ku mazi akoreshwa mu kuvomerera imyaka ihinze mu murima no mu bworozi ikiguzi bajya bakirekera kuri 400Frw kuri metero kibe imwe kabone n'iyo umuhinzi cyangwa umworozi yakoresha metero kube zirenze eshanu”.

Umworozi wo mu Karere ka Karongi, ufite inkoko 4000 mu kiganiro na IGIHE yavuze ko ku kwezi yishyura amafaranga arenga ibihumbi 60Frw y'amazi inkoko zanyoye.

Ati 'Mu kwezi nishyura amazi atari munsi y'ibihumbi 60Frw kandi twakoresheje mu rugo ntaba agera no kuri 5000Frw andi aba yangiye mu matungo kuko ku munsi inkoko 4000 zinywa amajerekani 60'.

Umuyobozi wungirije w'Umuryango w'Aborozi b'Ingurube, Mbaraga Alex avuga ko mu busabe bakunze kugezwaho n'aborozi b'ingurube harimo gusaba ko bakoroherezwa kwishyura amazi akoreshwa mu kwita ku ngurube.

Ati 'Ingurube mu biyitunga amazi agize igice kinini kandi ibyo dushaka ni ukorora itungo rimeze neza. Mu busabe aborozi bazo batugezaho harimo no gusaba koroherezwa kwishyura ikiguzi cy'amazi kuko ingurube nkuru inywa litilo 10 z'amazi ku munsi ari imwe, ubwo simbaze amazi yo gukora isuku mu biraro. Njye ku kwezi nishyura ibihumbi 70Frw by'amazi kandi ubwo mba nakoresheje n'ay'umureko kandi si amazi nagira aborozi inama yo gukoresha kuko ingurube ikenera isuku nyinshi'.

Mbaraga avuga ko umworozi n'umuhinzi babikora kinyamwuga nabo Leta ikwiye kubafata nk'uruganda ikaborohereza kwishyura amazi n'umuriro nk'uko ibikora ku nganda.

Umukozi w'Ikigo cy'Igihugu gishinzwe Ubuhinzi n'Ubworozi (RAB), Ntivuguruzwa Telesphore yabwiye IGIHE ko iki kibazo bagiye kugikoraho ubuvugizi.

Ati “Icyo twakora aho ni ubuvugizi mu kigo gishinzwe amazi, ariko kandi nanone nka RAB dufite uburyo tubaha ibigega bibafasha kuzigama amazi y'imvura kuko amazi y'imvura nayo uyafashe amatungo ashobora kuba yayanywa cyangwa ukanayuhiza imyaka”.

Mu Rwanda ubuhinzi n'ubworozi bifatwa nk'inkingi ya mwamba ku bukungu bw'igihugu kuko buha akazi 64.5% by'Abanyarwanda kandi bikagira uruhare rwa 25% ku musaruro mbumbe w'igihugu.

Abahinzi b’umwuga badafite imirima mu bishanga bavuga ko iyo amazi y’imvura ashize mu bigega bibagora gukomeza kuvomerera imyaka ihinze imusozi

Aborozi b’inkoko bavuga ko inkoko 4000 zinywa amajerekani 60 ku munsi, ibituma bakenera amazi menshi