Author: webrwanda

Ni amagambo Mbanda yatangarije Shene ya YouTube yitwa Uruganiriro TV, mu kiganiro cyagiyeho tariki 1 Ukwakira 2024.

Muri icyo kiganiro kimara hafi amasaha abiri, Mbanda avuga cyane ku mateka ye haba muri Politiki, mu mupira w'amaguru nk'uwigeze kuyobora Ishyirahamwe ry'Umupira w'Amaguru mu Rwanda (Ferwafa), n'ibindi.

Hari aho agera kuri Matayo Ngirumpatse, akavuga ko amuzi nk'umuntu mwiza w'imfura kandi ko udashobora kuba imfura ngo nyuma ubireke.

Mbanda ntasobanura neza ubupfura bwa Ngirumpatse wabaye Perezida w'Ishyaka MRND rya Juvénal Habyarimana wari Perezida, ari naryo ryari rifite umutwe w'Interahamwe wari urishamikiyeho.

Urukiko Mpanabyaha Rwashyiriweho u Rwanda, rwakatiye Ngirumpatse igifungo cya burundu nyuma yo kumuhamya ibyaha bya Jenoside n'ibyibasiye inyokomuntu.

Mbanda Jean kandi yagaragaje ko atemera inyito ya Jenoside yakorewe Abatutsi, yemejwe bidasubirwaho n'Umuryango Mpuzamahanga (Loni).

Mbanda yagiye impaka n'umunyamakuru ku bijyanye no kwemera inyito ya Jenoside yakorewe Abatutsi we akayica ku ruhande akavuga ko ari amahano ndengakamere.

Ati 'Njyewe mvuga amahano ndengakamere kandi mfite impamvu yabyo, andi magambo ntumva sinjya ntinyuka kuyakoresha.'

Ikiganiro Mbanda yavugiyemo ayo magambo kikimara kujya hanze hari benshi bariye karungu, bagaragaza ko biteye isoni kuba byavugwa n'umuntu uzi ukuri kw'ibyabereye mu Rwanda, wivugira ko Jenoside yakorewe Abatutsi yamugizeho ingaruka.

Popote Janvier yahise yandika ku rubuga rwe rwa X, agaragaza ko ibyo Mbanda yanditse bihabaye n'ukuri ndetse ko ari ugutoneka abarokotse Jenoside yakorewe Abatutsi n'Abanyarwanda muri rusange.

Ati 'Gutagatifuza umujenosideri nka Matayo Ngirumpatse wakatiwe gufungwa burundu na ICTR, ukavuga ko utemera inyito ya Jenoside yakorewe Abatutsi yemejwe n'Umuryango w'Abibumbye, si iby'i Rwanda. Ni ugutoneka imitima y'abarokotse Jenoside yakorewe Abatutsi n'Abanyarwanda muri rusange.'

'Ubu burozi ni bwo Mbanda yashakaga kugaburira Abanyarwanda ubwo yatangaga kandidatire ku mwanya w'Umukuru w'Igihugu mu matora aheruka? Birababaje.'

Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascene na we yashimangiye ko umuntu uhakana ukuri bitakubuza kuba ko cyane ko abo Mbanda yateye icyuhagiro babihamijwe n'Urukiko Mpuzamahanga.

Ati 'Guhakana ukuri ntibikubuza kuba ukuri. Urukiko mpuzamahanga rwa Arusha rwakatiye Col Renzaho Tharcisse na Matayo Ngirumpatse igifungo cya burundu rubahamije ibyaha byo gutegura no gukora Jenoside. Urukiko rwanemeje ko ibi byaha ari ihame ritagibwaho impaka. Ntakizabihanagura.'

Guhakana ukuri ntibikubuza kuba ukuri. Urukiko mpuzamahanga rwa Arusha rwakatiye Col Renzaho Tharcisse na Matayo Ngirumpatse igifungo cya burundu rubahamije ibyaha byo gutegura no gukora jenoside.Urukiko rwanemeje ko ibi byaha ari ihame ritagibwaho impaka.

Ntakizabihanagura. https://t.co/tTcwPYjb7J

— Dr. Jean Damascene BIZIMANA (@DrDamascene) October 4, 2024

Mu kiganiro cyose Mbanda yasaga n'ushaka guhinyura byinshi mu bisanzwe bizwi, ndetse akagaragaza ko abimaranye iminsi kuko ngo yirinze kubivugaho ubwo yashakaga kwiyamamariza kuba Perezida, Komisiyo y'Amatora ikanga kwemeza kandidatire ye kuko hari ibyo itari yujuje.

Jean Mbanda w'imyaka 71 y'amavuko, mu Rwanda azwi ho kuba yarabaye umudepite igihe kinini ndetse n'umuntu wanyuze mu ishyirahamwe ry'umupira w'amaguru.

Yabaye mu Nteko Ishinga Amategeko y'u Rwanda kuva mu 1994 kugeza mu 1999 nyuma ajya kuba muri Canada. Ni umwe mu bashinze ishyaka PSD mu gihe cy'amashyaka menshi mu 1991.

Si ubwa mbere avuze amagambo atavugwaho rumwe kuko no mu 2015, yavuze ko atumva impamvu yo gufunga Col Théoneste Bagosora wahamijwe ibyaha bya Jenoside.

Bivugwa ko yigeze gufungwa nyuma yo kutumvikana n'abari bagenzi be mu bucuruzi bujyanye n'ibikorwa byo gutwara abantu binyuze mu ikompanyi yari izwi nka Aprotam.

Mbanda Jean ubwo yatangaga ibyangombwa ngo yemererwe kwiyamamariza kuyobora u Rwanda

Ni impanuka yabaye kuri uyu wa Kane taliki ya 3 Ukwakira 2024. Mu gicuku cyo kuri uyu munsi n’ubundi Guverineri w’Intara ya Kivu y’Amajyepfo, Jean Jacques Purisi yatangarije Reuters ko bazamenya neza umubare w’abapfuye nibura mu minsi 3.

Ati: “Bizatwara nibura iminsi itatu kugira ngo tubone imibare nyayo kuko imibiri y’abapfuye yose ntabwo itaraboneka”. Yakomeje avuga ko ariko nibura bamaze kumenya ko abantu 78 ari bo bamaze kwitaba Imana mu gihe bamaze kurokora abantu 58.

Ubu bwato bwavaga mu gace ka Minova gaherereye muri teritwari Kalehe, Intara ya Kivu y'Amajyepfo bwerekeza mu mujyi wa Goma. Bwarohamiye mu gace ka Mukwidja. Amashusho yafashwe agaragaza burohama gake gake kugeza ubwo bwose bucuramye, bukarengerwa n'amazi.

Ku rundi ruhande, hagaragara abagenzi bake bageragezaga koga, berekeza ku nkombe z'ikiyaga. Umwe mu barokotse, Alfani Buroko Byamungu w’imyaka 51 yabwiye Reuters ko mu gihe yarwananaga no kuguma ku kiyaga hejuru abandi bamukikije bose bo yababonaga barohama.

Ati: 'Nabonye abantu barohama, benshi bagiye munsi. Nabonye abagore n’abana barohama mu mazi, nanjye ubwanjye nari hafi kurohama, ariko Imana yamfashije”?

Guverineri w'Intara ya Kivu y'Amajyepfo, Jean-Jacques Purusi yagaragaje ko iyi mpanuka yatewe n'uko ubu bwato bwari butwaye abarenze ubushobozi bwabwo kuko bwakabaye butwara abagenzi batarenze 30.

Yagaragaje ko abasare, Polisi ishinzwe umutekano wo ku nkombe z'ikiyaga ndetse n'abandi bafite aho bahurira n'ubwikorezi bukorerwa muri iki kiyaga bafite uruhare muri iyi mpanuka.

Yatangaje ko hagiye kuba inama y'umutekano yihutirwa ku rwego rwa Kivu y'Amajyepfo, yiga kuri iyi mpanuka, ateguza ko abayigizemo uruhare bose bagomba kubiryozwa.

Raporo ya Banki y'Isi ku birebana n'uburyo ibihugu byorohereza ishoramari yiswe B-Ready 2024 yashyize u Rwanda ku mwanya wa gatatu ku Isi mu bihugu byorohereza gutangiza ishoramari. U Rwanda rwaje kuri uwo mwanya rukurikiye Singapore na Georgia.

Iyi raporo yamurikiwe i Washington, D.C muri Leta Zunze Ubumwe za Amerika kuri uyu wa Kane, tariki ya 3 Ukwakira 2024 kandi, yashyize u Rwanda ku mwanya wa 8 mu bijyanye n'imitangire ya serivisi za Leta mu gihe ruri ku mwanya wa 17 ku Isi mu iyubahirizwa ry'amategeko mu bucuruzi n'ishoramari.

Raporo yakozwe hashingiwe ku nkingi eshatu z'ingenzi zirimo izirebana n'iyubahirizwa ry'amategeko, imitangire ya serivisi za Leta n'ibikorwa remezo byorohereza abashoramari ndetse no korohereza ishoramari.

U Rwanda rwaje ku mwanya wa gatatu mu korohereza imikorere y'ishoramari hashingiwe ku mategeko n'uburyo abikorera batangizamo ibigo cyangwa ishoramari, babyaza umusaruro ibikorwa remezo n'ibindi aho rufite amanota 81,31%, rukurikira Georgia ifite 84.75% na Singapore ifite 87,33%.

Ubusanzwe gutangiza ibigo by'ubucuruzi mu Rwanda, bifata iminsi 32 ku bigo by'imbere mu gihugu naho ibyo mu mahanga bigatwara iminsi 39 yo kuba byatangiye ibikorwa byabyo.

Mu nkingi ya kabiri ijyanye n'imitangire ya serivisi za Leta n'ibikorwa remezo, u Rwanda ruza mu bihugu 10 bya mbere aho ruri ku mwanya wa munani n'amanota 67.37, rukurikira Slovakie, Nouvelle Zelande, Hongrie,Portugal, Croatia, Singapore na Estonia ya mbere ifite amanota 73,31%.

Ku birebana n'iyubahirizwa ry'amategeko, u Rwanda ruza mu ku mwanya wa 17 n'amanota 70,68% mu gihe Hongrie ari yo iyoboye iyo nkingi n'amanota 78,23%.

Umuyobozi Mukuru w'Urwego rw'Igihugu rw'Iterambere, RDB, Francis Gatare, yasangije abitabiriye igikorwa cyo kumurika Raporo ya Banki y'Isi ku bucuruzi n'Ishoramari, Business Ready (B-READY 2024), uko impinduka mu iterambere ry’u Rwanda zashibutse ku guhuza imikoranire kwa Leta n’urwego rw’abikorera.

Yavuze ko kuva mu 2003 kugeza umwaka ushize, urwego rw'abikorera ku musaruro mbumbe w'igihugu rwikubye inshuro zisaga 14 kandi umusaruro w'umuturage w'u Rwanda wagiye uzamuka bitewe n'urwo ruhare abikorera bagira mu iterambere.

Yagize ati: 'Dutekereza ko amavugurura akorwa mu bucuruzi aba ashingiye ku bintu bitatu; icya mbere ni ibiganiro bigenda bibaho hagati ya leta n'abikorera. Mu Gihugu cyacu, urwego rw'abikorera na Leta, bafite urubuga bahuriramo bakaganira.'

Gatare yavuze ko amavugurura u Rwanda rwakoze arimo koroshya urujya n'uruza ari bimwe mu byorohereza abacuruzi n'abashoramari by'umwihariko abanyamahanga baba bashaka gushora imari mu Rwanda.

Ati: 'Bamwe mu bari muri iki cyumba bashobora kuba babizi ko u Rwanda ari cyo gihugu cyonyine ku Isi, aho umuturage wese ku Isi ashobora kurujyamo adasabwe viza, bagusinyira ugeze mu gihugu, uyibonera ku Kibuga cy'Indege, i Kigali ukihagera. Icyo ni ikintu ibihugu byinshi bitangiye gushyira mu bikorwa kuko twabonye ko bishobora kuba ari ingirakamaro mu guteza imbere ubucuruzi.'

Biteganyijwe ko raporo ya kabiri ya B-Ready izasohoka mu 2025 izakorerwa nibura ku bihugu 100, naho izasohorwa muri Nzeri 2026 ikorerwe nibura mu bihugu 180, mu gihe iy'uyu mwaka yakorewe ku bihugu 50 birimo ibiteye imbere, ibifite amikoro aciriritse ndetse n'iby'amikoro macye.

Ni amakuru yamenyekanye mu ma saa Yine za mu gitondo ku wa 03 Ukwakira 2024 ubwo umwe mu baturage yari mu bikorwa byo guhinga yabonye umurambo w'umugabo ku nkombe z'umugezi wa Mwogo.

Amakuru akomeza avuga ko abaturage bahise bahagera basanze batazi uwo muntu mu murenge wa Nyagisozi, ibintu byateye urujijo.

Umuyobozi w'Akarere ka Nyanza, Ntazinda Erasme,yemereye IGIHE iby'aya makuru, avuga ko Urwego rw'Igihugu rw'Ubugenzacyaha,RIB rwatangiye iperereza ngo hamenyekane iby'uru rupfu.

Ati 'Ni byo hari umurambo wabonetse ku nkombe z'umugezi wa Mwogo. Kugeza ubu ntiharamenyekana imyirondoro we. RIB yahise itangira iperereza ngo hamenyekanye icyamwishe, kuko twe ntituramenya ibyo ari byo.''

Meya Ntazinda, yakomeje avuga ko umurambo wa nyakwigendera woherejwe ku Bitaro by'Akarere ka Nyanza kugira ngo usuzumwe.

Ni uruganda ruzatwara arenga miliyari 1Frw, rukazubakwa muri gahunda ya Leta y'umushinga wa miliyoni 125$ wa RDDP2 witezweho gufasha aborozi kongera umukamo. Ni uruganda ruje rusanga izindi ebyiri ziri mu Rwanda harimo uruganda rw'umwuka ruri mu Rubirizi mu Mujyi wa Kigali ndetse n'uruganda rw'umwuka ruri i Huye.

Umuyobozi w'imirimo rusange mu Karere ka Kayonza, Mbasha David, yavuze ko uru ruganda rw'umwuka ruzubakwa hafi y'ibiro by'Umurenge wa Kabarondo aho hari ubutaka bunini bamaze kubona. Yavuze ko kuri ubu hakurikiyeho igice cyo kurwubaka ku buryo kizarangirana na 2025 aborozi bakanatangira kurwifashisha.

Bamwe mu borozi bo mu Karere ka Kayonza baganiriye na IGIHE bishimiye uru ruganda rw'umwuka rugiye kubakwa mu Karere kabo, bagaragaza ko rugiye kubafasha mu kongera icyororo, rukanakuraho zimwe mu mbogamizi zagaragaraga mu guteza intanga.

Ntagungira John wororera mu Murenge wa Gahini, yavuze ko hari igihe inka zabo zarindaga bagakenera kuziteresha intanga ntibikunde kuko abakozi bashinzwe ubworozi wasangaga nta mwuka bafite bikarangira guteza intanga bitabaye.

Ati 'Uru ruganda ni ingirakamaro cyane kuko muri iki gihe uhamagara umukozi ushinzwe ubworozi ngo aguterere intanga akakubwira ko nta mwuka afite rero niruboneka bizatuma aba bakozi babika neza izi ntanga nitubahamagara baze kudufasha byihuse tutarindiriye gutegereza.'

Niyotwagira François wororera mu Murenge wa Ndego we yavuze ko kuvugurura icyororo muri iki gihe byari bigoye kuko abakozi bashinzwe ubworozi ku mirenge wasangaga bafite intanga ariko nta mwuka bafite, kujya kuwushaka mu Mujyi wa Kigali cyangwa mu Karere ka Huye ngo byakundaga gutinda bigatuma inka zidaterwa intanga ku gihe cyangwa bakazitera igihe cyarenze ntizifate.

Umuyobozi w'umushinga RDDP, Gasana Ngabo Methode, yavuze ko uru ruganda rwitezweho gukemura ikibazo cy'umwuka wifashishwa mu kubika intanga z'inka. Asaba aborozi kwitegura kurubyaza umusaruro mu buryo bushoboka bwose.

Ati 'Igice cy'Intara y'Iburasirazuba ni igicumbi cy'ubworozi rero igikorwaremezo nka kiriya iyo kihaje bizafasha mu kwihutisha ya serivisi yo gutera intanga, bifashe mu kuvugurura icyororo kuko iyo intanga zitabitswe neza n'iyo uteye intanga ntabwo zifata neza.'

Umwuka wifashishwa mu kubika neza intanga ziterwa inka kuko ziba zikeneye kugenda mu bukonje bwinshi kugira ngo zitangirika. Biteganyijwe ko uru ruganda ruzajya rukora uwo mwuka (liquid Nitrogen) ungana na litiro 2000 ku isaha.

Niyotwagira François wororera mu Murenge wa Ndego yavuze ko kubona intanga byakundaga kugorana ariko uru ruganda rw'umwuka nirwuzura ngo biteze ko zizaboneka

Ntagungira John yavuze ko uruganda rw'umwuka ruzabafasha mu kongera inka zitanga umukamo

Umuyobozi w'imirimo rusange mu Karere ka Kayonza, Mbasha David, yavuze ko uru ruganda ruzubakwa mu Murenge wa Kabarondo

Uwo mwanya Barore awufatanya no kuyobora Urwego rw'Abanyamakuru bigenzura RMC).
Mu kiganiro na IGIHE, Barore yagarutse ku hazaza h'itangazamakuru mu Isi y'Ikoranabuhanga, ibyo ateganyiriza abakurikirana RBA n'ibindi.

Mubona ari iyihe myitwarire ikwiye mu mikoreshereze y'imbuga nkoranyambaga mu Rwanda rwa none?

Izo ni impungenge z'abantu cyangwa ibitekerezo , ariko ibyo bavuga si byo. Amateka y'itangazamakuru agaragaza ko igihe cyose hagiye havuka uburyo bushya bwo gutara, gutunganya no gusakaza amakuru; ubwari busanzwe icyo gihe abantu bibwiraga ko buzazimira, ariko uyu munsi abantu baracyakoresha igikobwakobwa bahamagara abandi; si uko telefoni zitariho […] Nta mpungenge z'uko ubwo buryo buzakuraho ubwari busanzwe.

Icyakora ubu buryo bwo gukoresha imbuga nkoranyambaga nibwo buri kwifashishwa na benshi, kuko burihuta. Nta byapa biri kuri iyo mihanda, birihuta. Hari abahitamo kwigengesera bakareba iyubahirizwa ry'amahame ngengamyitwarire y'umwuga bakagenda buhoro, hari n'abandi bahitamo kwishimira gukoresha ubwo buryo bamwe bise ngo ni 'imihanda' itagira ibyapa bakirukanka, ibyo bahutaza bakabihutaza, abagwayo bakahagwa.

Impanuka ziberayo ni nyinshi sinzi niba hari abapolisi bariyo bazireba, uwakomerekeyemo ariruka akajya kwivuza, yakoroherwa akagarukamo.

Icyakorwa cya mbere ni ukubanza ukwibuka ko hari amategeko asanzwe agira ibyo abuza. Ibyo abuza rero ntabwo bigera mu mbuga nkoranyambaga ngo bibe byemewe.

Usanga ikibereye kuri izo mbuga nkoranyambaga akenshi hahita hitabazwa RIB, ese mubona nta rundi rwego rukwiriye kubamo aho hagati?

Ukwiriye kuba abakebura muri iki gihe imbuga nkoranyambaga hafi yo ku Isi yose, ibihugu bigiye bigira imyihariko. Mu Rwanda twari tuzi ko politiki nshya izagenga itangazamakuru [itaremezwa] nisohoka wenda izatanga umurongo kuri iki kibazo.

Ariko uyu munsi wa none urwego rw'abanyamakuru bigenzura, rushinzwe abanyamakuru bemera ko ari bo, babiherewe ikarita itangwa hari ibisabwe.

Ntabwo bihagije kuba ufite camera na micro ukajya gutanga interview ngo bihite bikugira umunyamakuru. Ibyo ni nk'uko twavuga ngo abantu bafite amagare bose ni abanyonzi, ariko hari n'abafite iryo kwigenderaho badakora umwuga w'ubunyonzi.

Muri make umwuga w'itangazamakuru warinjiriwe…

Ikibuga cyinjiyemo abantu benshi banyuranye nk'uko mu mupira w'amaguru hari abakina nk'ababigize umwuga, hakaba n'abakina kuko babikunda, ariko bose barakina. Kuri iki, amategeko ugenga umupira w'amaguru ni amwe.

Muri uru ruhando rw'itangazamakuru n'ikoreshwa ry'imbuga nkoranyambaga, nifashishije iyo shusho, hari bamwe batabigize umwuga, ni abaturage babikunze bumva bagura camera cyangwa bagakoresha telefoni zabo n'ibindi bikoresho bibafasha kwegeranya amakuru bakayasakaza, ibyo ntibihita bibagira abanyamakuru.

Rero baba abo babikora ku bwo kubikunda, baba ababikora kinyamwuga nubwo batandukanye, bombi icyo bari gukora gikwiye kuba gifite amategeko akigenga bose bakayamenya.

Mubona ntawe ubashinzwe ukwiriye kujya hagati aho?

Reka tubanze turebe umuntu wese wagiye gutara, gutunganya no gusakaza amakuru, ibikeya by'ibanze yari akwiye kumenya: Ni ukumenya ngo amategeko ubundi asanzwe agenga abanyamwuga bakora ibi ni ayahe? Nibura akayamenya.

Icya kabiri, akamenya ko hari n'amategeko asanzwe y'igihugu agira ibyaha ahana, yabikorerayo akoresheje ibyo gutara amakuru, akamenya ko ashobora kwirengera ingaruka zabyo.

Icya gatatu rero, ni urwo rwego ruzabishingwa. Mu bihugu bimwe (tumaze iminsi tubiganiraho n'abantu), nko mu gihugu cya Côte d'Ivoire, rimwe twari mu nama twahuriyemo hanyuma baratubwira ngo: Twebwe ho n'utari umunyamakuru ariko afite abamukurikira (followers) ku mbuga nkoranyambaga ze, agejeje ku bihumbi 25, agira uko asinyana amasezerano n'urwego rufite mu nshingano gukurikira no kugira inama abakora mu isakazamakuru.

Kubera ko uyu muntu usanzwe ushyira ikintu ku mbuga nkoranyambaga ze kikarebwa n'abantu bangana batyo, wenda hari na radiyo idafite abayikurikira bangana batyo, agomba gufata inshingano nk'aho yaba ari igitangazamakuru.

Hari ibihugu usanga amashusho y'urukozasoni afunze kuri za Internet, ariko mu Rwanda ho si ko bimeze. Ubona igihe kitageze bigafungwa?

Hari ibihugu bigenda bishyiraho imbago kandi bakabikurikirana. Ntekereza ko no mu Rwanda byakunda, keretse niba muri ibyo bihugu bafite ikoranabuhanga rituma hari ibyo bakumira twe tukaba tutararigeraho.

Barore yavuze ko hakenewe ko imbuga nkoranyambaga zishyirirwaho imbago kugira ngo abaziriho batahakomerekera

Bishobora kuba ari ikibazo cy'ikoranabuhanga tutaragira, kuko sintekereza ko ari ikibazo cyo kwigengesera cyane ngo tudakoma rutenderi ku bwisanzure n'uburenganzira bw'abantu. Ntekereza ko atari cyo kibazo. Kuri urwo ruhande, gishobora kuba ari ikibazo cy'ikoranabuhanga.

Nk'Umuyobozi w'Ikigo cy'Igihugu cy'Itangazamakuru, Abanyarwanda babakurikira bitege iki gishya?

Reka mbanze nshime ko ntari njye nyine kuko nabonye Umuyobozi Mukuru w'Ikigo Wungirije. Icya kabiri rero, imigabo n'imigambi dufite; hari igenamigambi ry'imyaka itanu rikubiyemo indangagaciro z'umukozi w'iki kigo, zikubiyemo aho turi n'aho twerekeza, harimo cyane cyane nyine ko itangazamakuru muri iki gihe rishingiye cyane ku ikoranabuhanga.

Turi kubaka ubushobozi butuganisha muri iyo si kuko ari ho abantu bimukiye, ni ho abantu bari gucururiza. Abantu bimukiyeyo na za ngeso zose uko uzizi. Abajura bariyo, ababwirizabutumwa, abaturage bose baba hirya iyo ni ho batuye ni ho bakorera; nta muntu ugitegereza isaha y'amakuru. Nta saha y'amakuru ikibaho.

Kubera ari uko abantu bameze rero, mu ngamba dufite harimo kubibaha kuko muri iyo si y'ikoranabuhanga nta muntu ugifite umwanya wo kureba ikiganiro kimara amasaha abiri, atatu ane.

Tuzagumana uburyo busanzwe, turimo kubukora kandi tubuvugurura mu byo duha abakurikirana ibitangazamakuru bya RBA ariko tunazirikana ko dufite abantu benshi bakoresha uburyo buriho bw'ikoranabuhanga.

Abo tubafata nk'inkoramutima zacu kandi tubizeza ko tutazigera na rimwe tubatenguha. Turabumva natwe tukagerageza gutunganya ibiganiro n'amakuru byacu bijya gusubiza inyota abantu bafite. Ntabwo tuyibamara yose kubera amakuru asigaye ahenda.

Kera bavugaga ko amakuru ari ubuntu, ariko ubu arahenda. Urugero, uyu munsi kugira ngo tukwereke umupira, hari ikiguzi. Abareba iki kiganiro bumve ko kubereka umupira bihenda. N'iyo tuwubahaye hari ibindi biganiro byinshi biba biburiyemo cyangwa bishobora kuzaburiramo bikabura ingengo y'imari yo kubikora no kubitunganya.

Bakwiye kumenya ko umupira ari ingengo y'imari, ko siporo itakiri siporo gusa; byabaye ubucuruzi. Rero bisaba uburenganzira n'iyo byaba ari ikipe yanyu, tugeze ku rwego ibihugu bimwe bitakibibasha.

Ibinyamakuru byigenga byakunze gusaba ko RBA yahabwa ubushobozi buhagije, ikava mu byo kwamamaza kugira ngo ikorere abaturage yisanzuye. Mubivugaho iki?

Icya mbere kwamamaza ni ukugira gute? Ni ugutumikira abagutumye. N'ubundi nubwo twabona iyo ngengo y'imari 100%, nta mafaranga ahagije ajya abaho. Abo bayadusabira ni byiza n'izo nzozi zibaye impamo, ntacyo bitwaye ariko bajye basaba ahagije, azagura bwa burenganzira bwo kugura ibyo twerekana bihenze cyane.

Kuvuga ngo tuvemo 100% tugende tubabise, hari aho tutazababisa bitewe n'uko umuntu atuma uwo yizeye ko azamugereza ubutumwa aho ashaka ko bugera.

Nk'Umuyobozi wa RMC, manda mwatorewe imaze kurengaho imyaka itatu. Byagenze gute?

Reka mbanze mvuge ko ntawe ubwanga aburiho ngo abugaye, ariko nta n'ubwo twiyongeje. Twageze igihe twagombaga guhamagaza inteko yo gutora, tukiri muri ibyo haza COVID-19, irangiye dukomeza kubiganiraho, haba haje ibyo kuvugurura politiki igenga itangazamakuru mu Rwanda.

Abafatanyabikorwa bafite mu nshingano itangazamakuru bati 'rero nimube muretse tunoze politiki tunarebe amategeko y'itangazamakuru icyerekezo gishya biri buhabwe'.

Ngira ngo rero kimwe mu byatumye inama y'ubuyobozi ya Rwanda Media Commission n'abafatanyabikorwa ikiri aho, ni ubwo bujyanama bwo kungurana ibitekerezo kuko ntidukora twenyine.

Ni ikintu kiri kuganirwaho kandi nanjye ubwanjye ndi mu batanga ibitekerezo byo kuvuga ngo hakwiye gushakwa uburyo haboneka indi nama, bwaba ubuganiriweho bukumvikanwaho cyangwa ubunyuze mu matora; birakwiye.

Ndi mu babishyigikiye, ariko burya na none, Inama y'Ubutegetsi isimburwa n'indi ije, ntufata ibintu ngo ubijugunye mu muhanda, ngo uvuge ngo igihe cyanjye kirageze gusa kandi ubizi neza ko hari ibiganiro biganisha ku kurushaho kunoza ibintu no kubitunganya.

Kuri iyi ngingo, InyaRwanda yagize amatsiko yo kumenya uko Shampiyona y’u Rwanda, Rwanda Premier League na Shampiyona y’u Bwongereza English Premier League bikorwa, cyane ko arizo Shampiyona bisangamo kurenza izindi.

U Bwongereza nk’igihugu cyamaze gutera imbere, usanga ibyo gupanga uko imikino yikurikiranya bitagorana, kuko nta bibazo by’ibibuga bagira, kimwe mu gikoma mu nkokora imipangire ya shampiyona y’u Rwanda.

Kubera amakipe yo mu Bwongereza nta imbogamizi z’ibibuga agira, gupanga uko amakipe acakirana ntabwo biba bigoranye, kuko ntayo iba ihanganiye n’indi ikibuga. Mu gupanga uko amakipe acakirana, hifashishwa mudasobwa ibanza igatombora uko amakipe azahura.

Bimwe mu byitonderwa mu gutegura uko amakipe azacakirana muri English Premier League, hitonderwa ku buryo nta kipe ibanza gusura indi mu myaka ibiri yikurikiranya. Urugero niba Manchester United yarabanje kwa Arsenal mu mwaka w’imikino wa A, ubwo mu mwaka w’imikino wa B na Arsenal izatangira isura Manchester United. 

Ikindi cyitonderwa mu gupanga imikino ya shampiyona y’u Bwongereza, bigomba gutegurwa ku buryo mu mikino itandatu ya shampiyona, imikino itatu ikipe igomba kuyikinira mu rugo indi itatu ikayikinira hanze. 

Mu ntangiriro za shampiyona no mu mpera zayo, ikipe ntabwo yemerewe gukinira imikino ibiri mu rugo ndetse no gukinira imikino ibiri hanze. Bivuze ko iyo Shampiyona y’u Bwongereza itangiye imikino ibiri ya mbere umwe ikipe igomba kuwukinira mu rugo undi ikawukinira hanze, no mu mpera za shampiyona bikaba gutyo. 

Mu minsi mikuru ya Noheli byumwihariko Boxing Day nabwo imikino ya English Premier League ipangwa mu buryo amakipe adakora ingendo ndende ahubwo agahura n’ayo abarizwa mu gace kamwe. Ubwo twavuga nka Manchester United na Manchester City zo mu karere ka Manchester, Liverpool na Everton zo mu karere ka Liverpool, Chelsea, Arsenal, Tottenham Hotspur, West Ham United zo mu mujyi wa London.

Gusa nubwo haba hariho gahunda yo kugabanya ingendo mu minsi mikuru, si itegeko ngo agace gafite amakipe abiri gusa ngo azategereze gucakirana mu minsi mikuru. 

Mu Bwongereza ntacyo bitwaye kuba amakipe abiri abarizwa mu gace kamwe kuba yakwakirira rimwe imikino yayo, cyane ko buri kipe iba ifite ikibuga cyayo ntayo biba bigisiganira. Ubwo Manchester United yakinira mu rugo igihe kimwe na Manchester City ndetse n’isaha imwe kuko buri kipe igira ikibuga cyayo. 

English Premier ikunze kuringanyiza amakipe imwe ntikinire imikino myinshi mu rugo ngo indi iyikinire kanze 

Kuri Boxing Day amakipe yo mu gace kamwe akunze guhura 

Dukurikije amakuru y’uko Shampiyona y’u Bwongereza English Premier League ipangwa, usanga ari ibintu bitakunda cyane no mu Rwanda kuko amakipe 16 asangira ibibuga bitandatu gusa. 

Ubwo mu mipangire ya shampiyona y’u Rwanda, hagomba kwitonderwa hakarebwa niba nta makipe abiri yakirira ku kibuga kimwe, bikayagonganisha mu buryo bwo kwakira imikino yayo. 

Mu Rwanda hari ibibuga bitandatu aribyo Stade Umuganda yakiriraho amakipe ya Marines FC, Etincelles FC na Rutsiro. 

Stade ya Huye yakiriraho amakipe ya Mukura VS n’Amagaju. 

Stade Ubworoherane yakiriraho ikipe ya Musanze FC gusa. 

Stade ya Bugesera yakiriraho ikipe ya Bugesera FC. 

Stade y’akarere ka Ngoma ikiniraho na Muhazi United. 

Stade ya Kigali Pele Stadium yakiriraho amakipe nka APR FC, Police FC, Rayon Sports, Kiyovu Sports, AS Kigali, Gorilla FC, Gasogi United na Vision FC. 

Nubwo Stade Amahoro yamaze kuvugururwa ntabwo turabona amakipe ayitinyuka ngo yakiriremo imikino yayo ya shampiyona, uretse Gasogi United yabigerageje inshuro imwe gusa.

Kubera gusangira ikibuga kimwe ku makipe amwe n’amwe ya ngingo y’uko amakipe yo mu gace kamwe yakwakirira Umukino umunsi umwe ihita iburizwamo, cyane ko usanga nk’amakipe abarizwa muri Kigali akoresha Stade ya Kigali Pele Stadium.

Amakuru InyarmRwanda yizeye, agaragaza ko no mu Rwanda gutegura imikino ya shampiyona uko amakipe ahura bibanza kwitonderwa. 

Iby’ingezi birebwaho kugira ngo ingengabihe y’u mwaka w’imikino utegurwe mbere na mbere Rwanda Premier igendera ku mataliki mpuzamahanga. Niba umwaka w’imikino utangira muri Kanama ibyo nabyo mu Rwanda birubahirizwa. 

Mu gutegura ingengabihe y’uko imikino igenda muri Shampiyona y’u Rwanda hanarebwa ku mataliki ikipe y’igihugu Amavubi izakiniraho. 

Amakuru InyaRwanda yakuye muri FERWAFA avuga ko iyo ikipe y’igihugu ibura iminsi 10 ngo ikine imikino mpuzamahanga, Shampiyona irasubikwa abakinnyi bahamagawe bakajya mu makipe yabo y’ibihugu. 

Ubwo uyo ikipe y’igihugu imaze gukina umukino yari ifite nyuma y’iminsi ine Shampiyona irasubukurwa. 

InyaRwanda kandi yamenye ko imikino myinshi ishyirwa ku minsi abakozi baruhukiraho kugira ngo abakunzi ba ruhago bayikurikirane nta nkomyi ndetse n’amakipe abone abayashigikira. 

Rwanda Premier League kandi nk’uko no mu nshingano zayo harimo kureberera inyungu z’amakipe yose mu gutegura uko ahura hari igihe hazamo kuberereka amakipe afite ubushobozi buke agatangira akina n’ayo yegeranye mu rwego rwo kubanza bakisuganya mu bushobozi.

Aha twafata urugero kuri uyu mwaka w’imikino wa 2023-2024 Umuyobozi wa Rwanda Premier League yasobanuye ko impamvu yo gutangizanya AS Kigali na Kiyovu Sports ari ukuzirinda gutakaza amafaranga menshi, kandi zari mu bihe bibi. 

Gutegura imikino ya shampiyona y’u Rwanda, hibandwa ku minsi mpuzamahanga indi mikino iberaho 

Ikipe y’igihugu y’u Rwanda Amavubi ifite ubushobozi bwo gutuma Shampiyona ihagarara iminsi 14 mu gihe iri gukina 

Ni ibyatangajwe mu makuru ya buri munsi asohorwa n'iyo Minisiteri ajyanye n'uko icyorezo gihagaze, aho yatangaje ko uretse abo batanu bakize, kuri uyu wa 3 Ukwakira nta wahitanywe n'iyo ndwara.

Mu bipimo 1009 bishya byafashwe habonetsemo uwanduye umwe wiyongera ku bandi, bigatuma abakitabwaho n'abaganga kugeza ubu ari 21.

Minisitri w'Ubuzima, Dr. Nsanzimana Sabin, abinyujije kuri X, yongeye gutanga icyizere cyo gutsinda Marburg, ati “Uyu munsi hakize batanu. Ejo bazataha kandi bameze neza. Dufate uyu mwanya dushimire ababavuye. Marburg tuzayitsinda.”

Inzego z'ubuzima zigaragaza ko umuntu ashobora kwandura Marburg akamara hagati y'iminsi itatu na 21 ataragaragaza ibimenyetso gusa hari abo biza vuba.

Bitangira bisa n'iby'izindi ndwara cyane cyane Malaria, umuriro mwinshi utunguranye, umutwe ukabije, kubabara mu ngingo, imikaya ndetse bikaba byagera no mu rwungano ngogozi umuntu akaba yacibwamo akaruka.

Gusa ngo uko iminsi igenda yiyongera ibimenyetso bigenda bihinduka uko umubiri ugenda wangirika.

Abahanga mu buvuzi bemeza ko aho abarwayi bavuwe kare bashobora gukira ariko uwayanduye haba hari ibyago biri hagati ya 26% na 89% byo kuba yahitana umuntu.

Uburyo bwo kuyirinda ni ugukaza ingamba z'isuku no kwirinda gusangira ibikoresho n'umuntu ufite ibimenyetso bisa n'iby'iyi ndwara.

Abanyarwanda bose basabwe kuba maso bakamenya niba bafite ibimenyetso by'iyi ndwara bakajya kwa muganga kugira ahandi hantu bajya bakabanduza.

Uyu munsi hakize batanu. Ejo bazataha kandi bameze neza. Dufate uyu mwanya dushimire ababavuye. Marburg🦠 #Tuzayitsinda https://t.co/s2wD06HGR0

— Dr Sabin Nsanzimana (@nsanzimanasabin) October 3, 2024

Minisitiri Dr. Nsanzimana Sabin yongeye gutanga icyizere cyo gutsinda Marburg