Author: webrwanda

Uyu mushinjacyaha yatawe muri yombi ku wa 18 Ukwakira 2024 afatanwa n'uwiyise umukomisiyoneri wafashwe nk'umufatanyacyaha, kuko ari we wahuzaga usaba n'utanga ruswa.

Aba bombi bakaba bakurikiranweho icyaha cyo gusaba no kwakira indoke kugira ngo hafungurwe uwari ufunzwe ku cyaha cy'ubujura bw'amatungo aho bakiriye ibihumbi 150 Frw n'umuturage kugira ngo bamufungurize umugore we.

Ni ibyaha byakorewe mu Karere ka Karongi mu Murenge wa Murambi nk'uko IGIHE yabihamirijwe n'Umuvugizi w'Urwego rw'igihugu rw'Ubugenzacyaham, Dr. Murangira B. Thierry.

Yagize ati 'Ni byo koko abo uko ari babiri batawe muri yombi bafungiye kuri Sitasiyo ya RIB ya Nyarugenge n'iya Kimihurura mu gihe hagikorwa dosiye yamaze koherezwa mu Bushinjacyaha kuri uyu wa 22 Ukwakira 2024.'

Icyaha cyo kwaka cyangwa kwakira indonke bikozwe n'ufata ibyemezo by'ubutabera cyangwa ubishyira mu bikorwa gihanwa n'ingingo ya 5 y'itegeko nimero 54/2018 ryo ku wa 13 Kanama 2018 ryerekeye kurwanya ruswa.

Ugihamijwe n'Urukiko we ahanishwa igifungo kitari munsi y'imyaka 7 ariko kitarenze imyaka 10 n'ihazabu y'amafaranga y'u Rwnada yikubwe inshuro kuva kuri 3 kugeza kuri 5 z'agaciro k'indonke yasabye, yakiriye cyangwa yasezeranyijwe.

Ni mu gihe icyaha cy'umufatanyacyaha kuri iki cyaha cyo gihanwa n'ingingo ya 84 y'itegeko nimero 68/2018 ryo ku wa 30 Kanama 2024 riteganya ibyaha n'ibihano muri rusange.

Iri tegeko ryo rigahamya ko umufatanyacyaha ubihamijwe n'urukiko ahanwa nk'uwakoze icyaha.

Dr. Murangira yavuze ko RIB itazihanganira abantu bose basaba cyangwa bakira indonke.

Ati “RIB iributsa abaturarwanda ko ruswa ari icyaha kidasaza ko uzsbifatirwamo wese azahanwa. RIB kandi irasaba abaturage kujya batanga amakuru, kugira ngo abantu nkaba basaba bakanakira ruswa bajye bafatwa.”

Umuvugizi wa RIB yanaboneyeho kandi umwanya wo kwibutsa abaturarwanda ko bidakwiriye ko hagira igitangwa kugira ngo hakorwe ikinyuranyije n'amategeko.

Umushinjacyaha akurikiranyweho kwakira ruswa y'ibihumbi 150Frw

Ni umushinga uherutse kumurikwa n'Umujyi wa Kigali n'abafatanyabikorwa ugamije kubaka amacumbi aciriritse kandi atangiza ibidukikije, azafasha mu kugabanya ubuke bw'amacumbi mu Mujyi wa Kigali ukomeje kwaguka amanywa n'ijoro.

Ni umwe mu mishinga minini u Rwanda rwinjiyemo uzasiga hatujwe abantu basaga ibihumbi 200, bikaba n'icyitegererezo ku bandi bashoramari bashaka kubaka amacumbi aciriritse ajyanye n'ubushobozi bw'Abanyarwanda.

Aya macumbi azubakwa mu murenge wa Kinyinya uherereye rwagati mu karere ka Gasabo, ariko bikajyana n'ibindi bikorwaremezo nk'imihanda, amashuri n'ibindi bifasha abahatuye kubona serivisi aho hafi. Ibizubakwa byose bizaba bitangiza ibidukikije.

Uyu mushinga wamurikiwe muri Koreya y'Epfo mu nama ya 40 y'abagize inama y'ubutegetsi y'icyo kigega gitera inkunga imishinga itandukanye ibungabunga ibidukikije.

Bijyanye n'uko mu Mujyi wa Kigali hafi y'abantu 77,3% bawutuye batuye mu buryo butateguwe, bituma umujyi ugirwaho n'ingaruka zikomeye ziturutse ku ihindagurika ry'ibihe, nk'imyuzure, inkangu n'ibindi.

Uyu mushinga uje ari uw'icyitegererezo mu guhangana n'ibyo bibazo, no kwimakaza iterambere ry'umujyi rirambye, abawutuye bakabaho mu buryo butangiza, ingaruka z'ihindagurika ry'ibihe zikagabanywa.

Biteganyijwe ko uzashyirwa mu bikorwa mu gihe cy'imyaka itanu iri imbere, ibizatuma Umujyi wa Kigali uhinduka icyitegererezo ku mahanga mu kwimakaza imiturire ibungabunga ibidukikije.

Minisitiri w'Ibidukikije, Dr Valentine Uwamariya yavuze ko iyo nkunga igaragaza imbaraga igihugu gikomeje gushyira mu bufatanye butandukanye muri ibi bihe bikomeye aho ingaruka z'ihindagurika ry'ibihe ziri kwiyongera umunsi ku wundi.

Ati 'Izo ngaruka ntabwo zizahaza ubukungu bw'igihugu gusa ahubwo zitateza ibyago bikomeye ku buzima bw'abaturage bacu. Umushinga wa Green City ni intambwe nziza iganisha ku kwimakaza imiturire itangiriza ibidukikije hagamijwe guhangana n'izo ngaruka no kuzirinda kugira ngo Abanyarwanda bakomeze gutengamara.'

Igice kigiye guherwaho muri uyu mushinga ni ikijyanye n'ibikorwaremezo, giherereye mu ahazwi nka Ngaruyinka.

Nubwo Ngaruyinka ari nini, IGIHE yamenye amakuru ko ifice kizaherwaho ari ikiri kuri hegitari 18 muri 600 z'umushinga wose. Ikindi ni uko mu bikorwaremezo bigiye kubanza gushyirwaho abaturage batazimurwa.

Mu biribandwaho muri aka gace ni ukwibanda ku gushora mu bikorwaremezo bitangiza, nk'ibyo gukusanya amazi y'imvura, gukoresha ingufu zitangiza, uburyo bwo gutunganya imyanda n'ibindi.

Ibindi bizakorwa muri iyo nkunga ni ugushyiraho Ikigo cyahariwe gutanga amasomo y'imyuga, hibandwa cyane mu gutanga ubumenyi bujyanye n'ubwubatsi n'uburyo bwo kubaho, byose bitangiza ibidukikije.

Ikizakurikiraho ni ugukwirakwiza porogaramu nk'izi zigamije kwimakaza imibereho itangiza ibidukikije mu Rwanda hose, binyuze mu mahugurwa ahabwa abari muri iyo mirimo ku bijyanye n'ubwubatsi no guteza imbere imijyi byose bibungabunga ibidukikije.

Umuyobozi Mukuru wa Green Climate Fund, Henry Gonzalez yavuze ko uyu mushinga uzafasha cyane mu kugaragaza uko imijyi mu Rwanda igomba gutezwa imbere habungabungwa ibidukikije ariko rukanabera icyitegererezo indi yo muri Afurika n'Isi muri rusange.

Ati 'Green Climate Fund izagurira uyu mushinga mu yindi mijyi y'ibihugu bitandukanye hashingiwe ku masomo yakuwe mu mushinga wo mu Rwanda.'

Umuyobozi Mukuru w'Ikigega cy'u Rwanda cyita ku bidukikije (Rwanda Green Fund), yavuze ko inkunga ya GCF igiye kunganira byuzuye icyerekezo cy'u Rwanda mu guteza imbere imiturire itangiza, binyuze mu kwimakaza ikoranabuhanga n'imiturire bitangiza.

Ubwo Guverinoma y'u Rwanda yamurikaga politiki ijyanye no gushora imari mu mishinga irengera ibidukikije n'urusobe rw'ibinyabuzima (National Climate and Nature Finance Strategy: NCNFS), Umuyobozi Mukuru wa Green City Kigali Basil Karimba yawugarutseho.

Icyo gihe yavuze ko nyuma yo gusoza igishushanyo mbonera, mu 2026 bazaba batangiye umushinga w'inzu 2000 zizubakwa kuri hagitari 16.

Ati 'Ubu turashaka gukorana n'abikorera baza bakubaka inzu kuri icyo kibanza. Tuzajya no muri za banki dushaka uburyo zabafasha inzu zikagurwa. Ni umushinga urambye. Icyo ni kimwe mu bikorwa bihateganyirijwe tuzaba dutangije.'

Ni inzu biteganyijwe ko zizaba ziciriritse ha handi na wa muntu wo hasi abona iye kuko biteganywa ko 60% cyangwa 70% zizaba zigonderwa, mbese zigurishwa munsi y'igiciro zubakiweho.

Uyu mushinga uzubakwa mu myaka itanu

U Rwanda rwemerewe miliyari 37,9 Frw zo gushyira mu bikorwa Green City Kigali

Green City Kigali izubakwa kuri hegitari 600, harimo inzu n’ibikorwaremezo

Raporo y'ibikorwa by'Urwego rw'Umuvunyi ya 2023/2024 igaragaza ko bakiriye amadosiye 31 y'ibyaha bya ruswa yasesenguwe, 10 arimo ibyaha bayashyikiriza Urwego rw'Ubugenzacyaha, atatu ashyikirizwa inzego zitandukanye nk'amakosa y'akazi mu gihe icyenda yaburiwe ibimenyetso na ho andi icyenda aracyakurikiranwa.

Umuvunyi Mukuru, Nirere Madeleine, yagaragarije Inteko Ishinga Amategeko, imitwe yombi ko Abanyarwanda bataraha agaciro igikorwa cyo gutanga amakuru ku byaha bya ruswa n'ubwo hari bake bashobora kuyatanga.

Yagaragaje ko mu bikwiye kwihutishwa harimo politike yo kurwanya ruswa irimo kuvugururwa n'itegeko ryo kurengera umutangamakuru ku byaha birimo n'ibya ruswa.

Ati 'Abatanga amakuru ku byaha birimo n'ibyaha bya ruswa urwego rw'umuvunyi rwagaragaje ko ari ngombwa ko bajya bagira ishimwe bagenerwa, ishimwe ntabwo ari amafaranga gusa, rishobora kuba gushimirwa mu ruhame, kuba impamyabumenyi, uko mujya mubona igihugu cyacu gishimira abantu bakoze ibikorwa by'indashyikirwa, dutekereza muri ubwo buryo ko nabyo byatanga umusaruro.'

Yagaragaje ko muri uyu mwaka wa 2023/2024, Ubushinjacyaha Bukuru bwakiriye bunakurikirana ibirego kuri ruswa 934 biregwamo abantu 1.718. Muri byo, 358 byaregewe inkiko, 442 birashyingurwa, 134 biracyakurikiranwa

Uburyo bwo gushyiraho ishimwe ku batanga amakuru bwakozwe n'Ikigo cy'Igihugu cy'Imisoro n'Amahoro aho umuguzi utanze amakuru ku mucuruzi utatanze inyemezabuguzi ya EBM kandi yagurishije, ahabwa 50% by'amande uwo mucuruzi acibwa.

Kugeza muri Kanama 2024, abagera ku bihumbi 25 hirya no hino mu gihugu ni bo bari bamaze kwiyandikisha muri ubu buryo.

Muri bo ibihumbi umunani batangiye guhabwa ishimwe rikubiyemo 10% by'agaciro k'ibyo umuntu yaguze yanasabye fagitire ya EBM; na 50% by'amande ahabwa umukiliya watanze amakuru ku mucuruzi utatanze fagitire ya EBM kandi yagurishije.

Miliyoni 310 Frw zakusanyijwe mu gihembwe cya mbere cy'umwaka ni yo yatangiye gusaranganywa ndetse ku ikubitiro hatanzwe miliyoni 91 Frw.

Umuvunyi Mukuru, Nirere Madeleine, yasabye ko abatanga amakuru kuri ruswa bajya bahabwa ishimwe

Abadepite n’Abasenateri bagaragaje ko hari byinshi byakozwe mu guhangana n’ibibazo byari byugarije abaturage

Mu maguriro atandukanye, ahacururizwa inyama z'inka, ibiciro bizamuka umunsi ku wundi kubera umubare muto w'inka zitanga inyama.

Mu Mujyi wa Kigali inyama z'inka, abagura iz'imvange batanga hagati ya 5000 Frw na 6000 Frw mu gihe iroti bazigura kuva kuri 7000 Frw kuzamura.

Mu Bugesera ikilo cy'imyama z'inka z'imvange ni 7000 Frw mu gihe iroti ari 8500 Frw.

Ni mu gihe ikilo cy'inyama y'inkoko mu bice bitandukanye by'Umujyi wa Kigali kigura 4000 Frw kugeza kuri 4500 Frw, byagera nko mu Karere ka Nyagatare inkoko hatitawe ku bilo ifite ikagura 6000 Frw, na ho mu Karere ka Bugesera ikilo cy'inyama z'inkoko ni 5500 Frw.

Muri rusange inyama z'inkoko zicuruzwa muri boucherie ziba zipima hagati y'ikilo kimwe na bibiri.

Umwe mu bacuruza inyama z'inkoko yabwiye IGIHE ko imishwi isigaye ituragwa ari myinshi ku buryo n'abazorora babaye benshi cyane bityo ibiciro byazo bigenda bimanuka.

Ati 'Kuko basigaye borora inkoko z'inzungu zisa n'izikurira rimwe. Baturagisha ari benshi imishwi zikarererwa rimwe zigakurira mu gihe kimwe.'

Uyu mucuruzi yavuze ko hari igihe ikilo cy'inyama y'inkoko kizamuka kikagera kuri 7000 Frw cyangwa kikamanuka kikagera kuri 2800 Frw bitewe n'uko aborozi bari kuzigeza ku isoko zingana.

Ibyavuye mu ibarura rusange rya 2022 bigaragaza Abaturarwanda bari boroye inkoko 2.583.333 zorowe n'ingo zibarirwa muri 12%.

Uretse kuba zihendutse, abahanga mu by'imirire bemeza ko inyama z'umweru zirimo n'iz'inkoko n'ifi ari nziza ugereranyije n'inyama zitukura zirimo inka, ingurube n'izindi z'inyamabere.

Nk'urugero inyama y'inkoko igira intungamubiri zatera umubyibuho zingana na 11% mu gihe iz'ingurube zifite 45%.

Inyama y'inkoko ipima 100 mg iba yifitemo intungamubiri za proteine zingana na 29,8 mg na ho inyama y'intama binganya uburemere ikagira 22,51 mg, mu gihe iy'ingurube bingana iba ifite 27,5 mg.

Bigaragazwa ko umubiri w'uriye inyama z'umweru zirimo inkoko n'ifi uba ushobora gukuramo proteine zingana na 80% mu gihe uwariye inyama zitukura we ukuramo 74%.

Inyama z'umweru zikungahaye kuri vitamine B z'ubwoko bunyuranye burimo B3 na B12 ifasha mu mikorere myiza y'ubwonko.

Inyama y’inkoko iri mu zihendutse mu Rwanda ugereranyije n’izindi zose abantu bakoresha ku mafunguro yabo

Ubworozi bw’inkoko bugenda butera imbere cyane mu Rwanda

Umwaka ushize nibwo Volkswagen yasinyanye amasezerano na Minisiteri y'Ubuhinzi n'Ubworozi, agamije gutangiza igerageza ry'imashini z'ubuhinzi zikoresha amashanyarazi ndetse na moto zikoresha amashanyarazi zizajya zijyana umusaruro ku isoko mu bice by'icyaro bitageramo imodoka.

Kuri uyu wa 22 Ukwakira 2024, hatangijwe ku mugaragaro ibikorwa byo gukodesha izi mashini ku bahinzi babyifuza, bikazajya bikorerwa mu Murenge wa Gashora mu Karere ka Bugesera, aho iki kigo gifite icyanya kizajya gitangirwamo izi serivisi.

Iki kigorwa ariko cyakomatanyijwe n'ikindi cyo gushyikiriza Ishuri Rikuru ry'Ubuhinzi n'Ubworozi butangiza ibidukikije [Rwanda Institute for Conservation Agriculture- RICA], imashini yifashishwa mu buhinzi 'MK1 electric tractor' yakozwe na Volkswagen, mu rwego rwo kuyigerageza no kwerekana uburambe bwayo mbere y'uko ishyirwa ku isoko.

Igitekerezo cyo gukora imashini yakwifashishwa mu buhinzi cyaje mu mwaka wa 2021, Inama y'Ubutegetsi ya Volkswagen Group yemeza ko bitangira kugeragezwa.

Iki kigo cyemeza ko bizafasha kongera umusaruro, bikanoroshya inzira yo kuwugeza ku isoko.

Umuyobozi Mukuru wa Volkswagen Rwanda, Serge Kamuhinda, yavuze ko igihe kigeze ngo habeho impinduka, imashini zitangire gukoreshwa mu buhinzi mu Rwanda.

Ati 'Izi mashini zibungabunga ibidukikije kandi ntizikoresha ibikomoka kuri peteroli. Twatangiye ibikorwa byo gukodesha imashini ariko turi no kubaka inyubako nini nyirizina izajya itangirwamo serivisi. Uko ibihe bizagenda bishira, tuzajya twongera imashini hashingiwe ku bikenewe.'

Biteganyijwe ko iyi nyubako izatangira gukorerwamo mu 2025.

Muri Afurika, kuri hegitari 1.000 haboneka imashini zihinga 28 gusa. Ni mu gihe u Buhinde bufite abaturage bajya kungana n'aba Afurika ariko bufite ubutaka bungana na ⅓ cy'ubuhingwa muri Afurika, usanga kuri buri hegitari 1.000 hari imashini 158.

Muri iki gihugu hagurishwa imashini zigera ku 740.000 ku mwaka, mu gihe muri Afurika habarwa imashini 470.000 gusa.

Kamuhinda yavuze ko kuzamura iyi mibare byatanga umusanzu mu kuzamura ubukungu bwa Afurika binyuze mu buhinzi.

Umuyobozi Mukuru wa RAB, Dr. Telesphore Ndabamenye, yahinyuje imvugo y'uko imiterere y'u Rwanda itajyanye n'ikoreshwa ry'imashini mu buhinzi.

Ati 'Buriya no mu misozi miremire cyane irimo amaterasi y'indinganire hashobora gukoreshwa imashini nto za 'Power Tiller'. Uko imisozi iteye bishobora guhuzwa n'ubwoko bw'imashini. Imiterere y'ubutaka igomba kujyana n'ubwoko bw'imashini yaba mu misozi miremire, iringaniye cyangwa ku butaka burambuye.'

Umuyobozi Mukuru wa Ishuri Rikuru ry'Ubuhinzi n'Ubworozi butangiza ibidukikije [Rwanda Institute for Conservation Agriculture- RICA], Dr. Ron Rosati, yagaragaje ko guhabwa imashini itangiza ibidukikije bihura n'umurongo bihaye.

Ati 'Zimwe mu nyungu z'iyi mashini ni uko ikoresha ingufu z'imirasire y'izuba kandi izo ngufu ni zo dukoresha hano muri kaminuza. Zikorerwa iwacu kandi ntizigira imyuka ihumanya, ubwo mu murongo wo kurengera ibidukikije ifite byose bikenewe.'

'Ishobora gukoreshwa mu guhinda bidasatura ubutaka, gutera imbuto, gusaruro n'ahandi henshi.'

Umuyobozi Mukuru wa Volkswagen muri Afurika, Martina Biene, yavuze ko intego ari uko mu gihe uyu mushinga utangiye mu Rwanda waba umaze gushinga imizi, wakwagurirwa no ku Mugabane wa Afurika wose.

Umuyobozi Mukuru wa Volkswagen Rwanda, Serge Kamuhinda, yavuze ko igihe kigeze ngo habeho impinduka, imashini zitangire gukoreshwa mu buhinzi mu Rwanda

Umuyobozi Mukuru wa RAB, Dr. Telesphore Ndabamenye, yavuze ko imashini zihingwa zishobora gukoreshwa mu Rwanda

Umuyobozi Mukuru wa Ishuri Rikuru ry'Ubuhinzi n'Ubworozi butangiza ibidukikije [Rwanda Institute for Conservation Agriculture- RICA], Dr. Ron Rosati, yagaragaje ko guhabwa imashini itangiza ikirere bihura n'umurongo bihaye wo kurengera ibidukikije

Umuyobozi Mukuru wa Volkswagen muri Afurika, Martina Biene, yavuze ko intego ari uko mu gihe uyu mushinga utangiye mu Rwanda waba umaze gushinga imizi, wakwagurirwa no ku Mugabane wa Afurika

Volkswagen Mobility Solutions Rwanda, yagiranye amasezerano y’ubufatanye na Ishuri Rikuru ry'Ubuhinzi n'Ubworozi butangiza ibidukikije [Rwanda Institute for Conservation Agriculture- RICA], ajyanye no kuzamura ubumenyi mu mikoreshereze y’imashini zihinga z’amashanyarazi

Imashini ya 'MK1 electric tractor' ishyikirizwa Ishuri Rikuru rya RICA

RICA yahawe imashini ya 'MK1 electric tractor' ngo iyigerageze mbere yo gushyirwa ku isoko

Hari indi mashini RICA yari isanganywe na yo ikoresha amashanyarazi

Abanyeshuri bahise batangira gukoresha iyi mashini

Umuyobozi w’Akarere ka Bugesera, Mutabazi Richard [Ibumoso]

Umuyobozi Mukuru Ushinzwe amasomo muri RICA, Dr. Olusegun Yerokun [Iburyo]

Hashize imyaka itari mike VW itangiye gushyira mu bikorwa umushinga wo gukora imashini zihinga zikoresha amashanyarazi

Amafoto: Kasiro Claude

Byabereye mu Mudugudu wa Mizigo, Akagari ka Rega, Umurenge wa Bigogwe ku wa 22 Ukwakira 2024.

Ahagana saa moya z'igitondo nibwo mu idari y'imwe muri butike icumi ziri muri iyi nzu y'ubucuruzi, haturikiyemo insinga z'amashanyarazi bihita biteza inkongi y'umuriro.

Abaturanyi bihutiye gutabara bagerageza kuzimya, banatanga amakuru ku nzego z'ubuyobozi bw'ibanze ari nako bagerageza kurwana no kugira ibyo barokora ariko umuriro ukomeza kwiyongera.

Umunyamabanga Nshingwabikorwa w'Umurenge wa Bigogwe, Nsengimana Jean Claude, yabwiye IGIHE ko bakimenya aya makuru bahise biyambaza ubuyobozi bw'akarere nabwo bwiyambaza ishami rya Polisi y'u Rwanda rishinzwe kuzimya inkongi.

Iryo shami ryahise ryohereza imodoka ebyiri kabuhariwe mu kuzimya inkongi zizimya iyi nzu itarakongeza izo mu gikari.

Ati “Igenagaciro rikozwe n'abagenagaciro b'umwuga ntirirarangira ngo tumenye agaciro nyakuri k'ibyahiriyemo ariko igenekereza ryakozwe na ba nyiri amabutike ryagaragaje ko hangiriyemo ibicuruzwa bya miliyoni 119Frw”.

Gitifu Nsengimana yashimiye abaturage ko bihutiye gutamga amakuru bikaba byaratumye inkongi y'umuriro itagera ku nzu zo mu gikari.

Yasabye kandi abacuruzi kujya bagura ubwishingizi bw'inzu zabo.

Hiyambajwe kizimyamwoto mu guhashya iyi nkongi

Ikigega Mpuzamahanga cy'Imari, IMF, kirateganya guha u Rwanda miliyoni 184,9$ azifashishwa mu mishinga itandukanye igamije iterambere ry'igihugu, irimo ijyanye no kurengera ibidukikije.

Aya mafaranga agomba kwemezwa n'Inama y'Ubutegetsi ya IMF izaterana mu Ukuboza uyu mwaka. Ari mu byiciro bibiri harimo icy'inguzanyo zitangwa ku nyungu nto na IMF (Standby Credit Facility). Muri iki cyiciro, u Rwanda ruzahabwa miliyoni 89,0$.

Harimo kandi andi miliyoni 95,9$ azifashishwa binyuze muri gahunda ya Resilience and Sustainability Facility (RSF) igamije kurengera ibidukikije n'izindi ngamba zihangana n'imihindagurikire y'ibihe.

Ibi byatangajwe nyuma y'igenzura itsinda rya IMF ryakoraga ku bukungu bw'u Rwanda ryamaze ibyumweru bibiri, aho iri tsinda ryavuze ko urwego rwa serivisi n'urwego rw'ubwubatsi bizagira ingaruka nziza ku bukungu bw'u Rwanda muri rusange.

IMF yagaragaje ko ubukungu bw'u Rwanda mu 2024, buzazamuka ku gipimo gishimishije mu 2024, bugere ku 8,3% bitandukanye n'ibipimo bya 6,6% byari byatangajwe mbere.

Mu gihembwe cya kabiri cy'uyu mwaka, Ikigo cy'Igihugu cy'Ibarurishamibare (NISR) cyatangaje ko urwego rwa serivisi rwaje ku mwanya wa mbere mu guha Abanyarwanda benshi akazi kuko rwihariye 44% by'abafite icyo bakora mu Rwanda.

IMF kandi yavuze ko ibiciro bizazamuka ku gipimo gikwiriye, ni ukuvuga ikiba cyaremejwe nk'ikidashobora kubangamira izamuka ry'ubukungu bw'u Rwanda.

Ingamba za Banki Nkuru y'u Rwanda kurengera ifaranga ry'u Rwanda ndetse n'ubukungu muri rusange ndetse n'umusaruro w'ubuhinzi wabaye mwiza ugatuma ibiciro bitazamuka ku masoko, byose byagize uruhare mu gutuma hatabaho izamuka ry'ibiciro rikabije.

Umuyobozi w'Itsinda rya IMF riri mu Rwanda, Ruben Atoyan, yavuze ko 'hari intego zagezweho', ashimangira ko “Ingamba zigamije gushyira umucyo ku ishoramari rya Leta ndetse no kongera ingufu z'isoko ry'ivunjisha zikomeje kugenda neza.”

Yashimiye uruhare rwa Leta y'u Rwanda mu gushora imari mu bikorwa bijyanye no guhangana n'ikibazo cy'ihindagurika ry'ikirere.

Gusa iri tsinda ryemeye ko ingamba Leta y'u Rwanda yihaye zigamije kongera umutungo wayo zitagenze neza nk'uko byari byitezwe ahanini kubera ibihe bikomeye by'ubukungu byagiye biba mu minsi yashize. Nko ku Rwanda, nyuma ya Covid-19 habaye ibiza byangije byinshi birimo n'ibikorwaremezo.

Kubera iyi mpamvu, u Rwanda rwakomeje kongera igipimo cy'ideni ryarwo ugereranyije n'umusaruro mbumbe warwo.

Icyakora Leta y'u Rwanda yemereye iri tsinda ko izakomeza gushyira imbaraga mu gukoresha inguzanyo zihendutse kandi zishyurwa mu gihe kirekire, ndetse ihamya ko izakomeza gushyira imbaraga ku ngamba zihamije kongera amafaranga yinjiza, mu rwego rwo kugabanya ikoreshwa ry'amadeni.

Leta kandi irateganya kongera umusaruro binyuze mu kurushaho kugenzura ibigo byayo bikora ubucuruzi mu rwego rwo kubirinda ko bigwa mu gihombo.

Guverineri wa Banki Nkuru y'Igihugu, John Rwangombwa, atanga ibitekerezo mu biganiro byahuje itsinda rya IMF n’iry’u Rwanda

Uhereye ibumoso: Guverineri wa Banki Nkuru y’u Rwanda, John Rwangombwa; Minisitiri w’Imari n’Igenamigambi, Yussuf Murangwa; Umuyobozi w’Itsinda rya IMF ryagenzuye uko ubukungu bw’u Rwanda buhagaze, Ruben Atoyan n’Umunyamabanga wa Leta muri Minisiteri y’Imari n’Igenamigambi ushinzwe ishoramari, Tessi Rusagara, ubwo bari mu kiganiro n’abanyamakuru

Itsinda ririmo abakozi ba Banki Nkuru y’Igihugu n’aba Minisiteri y’Imari n’Igenamigambi, bari i Washington DC ahabereye ibiganiro by’u Rwanda na IMF

IMF ishima ko ubukungu bw’u Rwanda buhagaze neza bigizwemo uruhare n’abikorera

Umuvugizi wa RIB, Dr. Murangira B. Thierry yasobanuye ko muri abo bantu 10, batatu bengaga inzoga, abandi barindwi bakabafasha mu bindi nko gushaka amacupa yavuyemo inzoga za zimwe mu nganda zenga izo mu bwoko bwa 'liquers,' noneho bakigana ibirango byazo bakabyomekaho.

Bongeragaho kandi ikirango cy'Ikigo cy'Imisoro n'Amahoro (RRA) gishyirwa ku gicuruzwa cyasoze ku buryo umuntu atapfa gutandukanya izo nzoga z'inkorano n'izo mu ruganda.

Aba bose bakoreraga mu Karere ka Gasabo ku Gisozi aho umwe muri bo wari unabacumbikiye ari Mutwarasibo witwa Uwimana Claudette.

Ni mu gihe uwari uyoboye ibyo bikorwa nka ubucuruzi ari umugabo w'imyaka 40 witwa Nshimiyimana Turahirwa Albert.

Abo bantu bafashwe ku matariki atandukanye y'Ukwakira 2024 bikaba bivugwa ko bari bamaze amezi atanu bakora gusa biracyakorwaho iperereza. Bafungiye kuri Sitasiyo ya RIB ya Rusororo n'iya Kimironko mu Mujyi wa Kigali.

Ubwo bafatwaga, Dr. Murangira yavuze ko bagerageje guha umugenzacyaha ruswa ya miliyoni 7 Frw ngo adatanga amakuru.

Ati 'Ikigaragaza uburemere bw'ibi bikorwa bakora bitewe n'amafaranga arimo ni uko nyiri ibyo bikorwa yahaye kuri telefone amafaranga miliyoni 3.4 Frw umugenzacyaha ngo amurekure biranga. Yagerageje kumuha andi mu ntoki miliyoni 1.4 Frw nabwo umugenzacyaha aranga, atanga amakuru ku bamukuriye arafatwa.”

Ayo mafaranga yamuhaye yose hamwe ni miliyoni 4.8 Frw muri miliyoni 7 Frw yari yamwemereye ngo ntamutange, ariko umugenzacyaha akoresha ubunyamwuga atanga amakuru abasha gutabwa muri yombi.

Agaciro k'ibyafashwe byose kangana na 31.335.250 Frw harimo litiro 347 z'inzoga zifite agaciro ka miliyoni 2.6 Frw y'amafaranga yatanzwe nka ruswa, ay'imifuniko y'inzoga, ibirango bya RRA n'ibindi.

Dr. Murangira yavuze ko bigayitse kuba hari Umuyobozi mu nzego z'ibanze wasangwa mu bikorwa nk'ibyo ariko anasaba abantu kwitwarika kuko izo nzoga akenshi ziba zigurishwa amafaranga make cyane ugereranyije n'izindi, nyamara zikangiza ubuzima.

Ibyaha abo batawe muri yombi bakurikiranweho ni ugutanga indonke, kunyereza umusoro, iyigana no guha umuntu ikintu gishobora kwica cyangwa gishegesha umubiri.

Igito muri ibi byaha byose gihanishwa igifungo kiri hagati y'imyaka ibiri n'imyaka irindwi kongeraho ihazabu y'amafaranga.

Umuyobozi w'Ishami Rishinzwe Ibiribwa mu Kigo Gishinzwe Kugenzura Ibiribwa n'Imiti (Rwanda FDA), Dr. Nyirimigabo Eric yavuze ko muri izo nzoga basanzemo ibinyabutabire by'ubwoko bune birimo 'acetic', 'volatile', 'methanol' na 'ethanol'.

Avuga ku ngaruka zabyo yagize ati 'Ziriya 'acide' zigira ingaruka ku muntu wanyoye ibintu zirimo nko kugira ibibazo mu rwungano ngogozi kuko murabizi nk'iyo 'acide' imenetse ku mwenda uhita ucika. Aho inyuze hose igenda ihatwika. Ni ikinyabutabire kibi mu binyobwa no mu biribwa by'abantu. Ikindi ni uko iyo ukomeje kuyifata igenda ivungura iryinyo kugeza rishize.”

Yavuze ko izo 'acide' zizamura isukari mu mubiri bikabije ndetse zikangiza ireme ry'amagufa.

Dr. Nyirimigabo yongeyeho ko n'ubwo ethanol isanzwe ikoreshwa mu kwenga, iyo ibaye nyinshi itera ibibazo mu mitekerereze no gufata ibyemezo ari yo mpamvu inzoga zigurishwa mu Rwanda zitangomba kurenza alcohol ya 45% mu bizigize.

Ni mu gihe methanol yo itemerewe gukoreshwa mu binyobwa kuko itera ubuhumyi ndetse yaba nyinshi ikaba ishobora no gutera urupfu.

Umuvugizi wa RIB, Dr. Murangira B. Thierry yasobanuye ko muri abo bantu 10, batatu bengaga inzoga, abandi barindwi bakabafasha mu bindi nko gushaka amacupa yavuyemo inzoga za zimwe mu nganda zenga izo mu bwoko bwa 'liquers,'

Umuyobozi w'Ishami Rishinzwe Ibiribwa mu Kigo Gishinzwe Kugenzura Ibiribwa n'Imiti (Rwanda FDA), Dr. Nyirimigabo Eric, yavuze ko muri izo nzoga basanzemo ibinyabutabire by'ubwoko bune

Izi nzoza zarirwaho ikirango cya RRA

Inzoga zirenga litiro 300 zitemewe zafashwe

Biganaga inzoga zisanzwe zikorwa

Abantu 10 bagira uruhare mu gukora no gucuruza inzoga zitemewe

Amafoto: Nzayisingiza Fidel