Minisitiri w'Umutekano w'Imbere mu Gihugu, Dr. Vincent Biruta, agiye kuyobora umuhango wo gusoza amahugurwa y'icyiciro cya 22 cy'Abapolisi bato uza kuba ku mugoroba wo kuri uyu wa gatatu tariki 28 Ukwakira 2026, uza kurangwa n'imyiyereko igaragaza ubumenyi n'ubushobozi abahuguwe bungukiye muri aya mahugurwa.
Uyu muhango uragaragaramo imyiyereko itandukanye irimo imyitozo yo guhosha imyigaragambyo, kumasha, akarasisi ndetse n'imyitozo njyarugamba.
Iyi myiyereko ikaba ari umwanya wo kugaragaza zimwe mu ngeri z'imyitozo abapolisi bato bahawe mu gihe bamaze mu mahugurwa, cyane cyane ubumenyi bujyanye n'imikorere ya Polisi mu bihe bitandukanye bisaba ubushobozi, imyitwarire iboneye no gukurikiza amabwiriza.
Imyitozo yo guhosha imyigaragambyo iri mu yerekanwa iragaragaza uburyo abapolisi bato batojwe guhangana n'ibihe bishobora guhungabanya ituze n'umutekano rusange, mu gihe imyitozo yo kumasha izagaragaza ubumenyi bahawe mu gukoresha intwaro.
Ku rundi ruhande, akarasisi n'imyitozo njyarugamba biraba biri mu bigaragaza imyitozo ngororamubiri, ikinyabupfura, gukorera hamwe no kubahiriza amabwiriza bisabwa mu kazi k'umupolisi.
Umuhango wo gusoza aya mahugurwa ni intambwe ikomeye ku bayasoje, kuko ushyira akadomo ku gihe bamaze bahabwa ubumenyi n'ubushobozi bizabafasha mu nshingano zabo zo kubungabunga umutekano.
Mu mwaka wa 2025, Polisi y'u Rwanda yakiriye abapolisi bashya 1.863 basoje icyiciro cya 21 cy'amahugurwa y'ibanze (Basic Police Course), cyasorejwe mu Ishuri rya Polisi rya Gishari, mu Karere ka Rwamagana, ku wa 22 Ukuboza 2025.
Leave a Reply