Muhoza Daniel yabaye umucunguzi wa Rayon Sports nyuma yo kuyitsindira igitego cyatumye yegukana CECAFA Kagame Cup 2026 batsinze Gor Mahia 2-1 kuri uyu wa Gatanu tariki ya 7 Kanama 2026.
Ni igitego cyaje mu minota 30 y’inyongera nyuma y’uko bari banganyije 1-1 mu mukino wabereye kuri Stade Amahoro.
Rayon Sports yaherukaga ku mukino wa nyuma wa CECAFA Kagame Cup 2013 itsindwa Vital’o, yashakaga uko itwara iki gikombe ku kabi n’akeza.
Gor Mahia baherukaga gukina kuri Rayon Day bakayitsinda 2-0, yashakaga nayo uko yatwara iki gikombe yihoreye.
Mu minota ya mbere y’umukino Gor Mahia yashyize igitutu kuri Rayon Sports bagenda barema amahirwe ariko kuyabyaza umusaruro biranga.
Rayon nayo yanyuzagamo igasatira nka kufura ya Elie Tatu umunyezamu yakuyemo bigoranye ndetse n’ishoti rya Muderi Akbar naryo umunyezamu yafashe.
Rayon Sports yaje gufungura amazamu ku munota wa 29 ku gitego cyatsinzwe Kameni Herman Junior ku mupira wari uhinduwe na Nshimiyimana Emmanuel Kabange. Amakipe yombi yagiye kuruhuka ari 1-0.
Gor Mahia yagarukanye imbaraga mu gice cya kabiri maze ku munota wa 53, Shariff Sabuni Sirengo ayitsindira igitego cyo kwishyura.
Rayon Sports iba yabonye igitego cya kabiri ku munota wa 73 ku mupira wari utewe n’umutwe na Kameni Junior ariko umunyezamu Omondi awukuramo. Umukino warangiye ari 1-1 bahita bitabaza iminota 30 y’inyongera.
Ku munota wa 96, Rayon Sports yaje kubona igitego cya kabiri gitsinzwe na Muhoza Daniel.
Umukino warangiye ari 2-1 maze Rayon Sports yegukana CECAFA Kagame Cup 2026 yaberaga mu Rwanda kuva tariki ya 24 Nyakanga 2026.
Source : http://isimbi.rw/rayon-sports-yegukanye-cecafa-kagame-cup-yaherukaga-1998.html
Leave a Reply