Bwiza Emerance yasezeranye imbere y’amategeko n’umujyanama we #rwanda #RwOT

Umuhanzikazi Bwiza Emerance yasezeranye imbere y’amategeko na Uhujimfura Jean Claude usanzwe ari umuyobozi wa KIKAC Music ireberera inyungu Bwiza.

Ni umuhango wabaye ku wa Kane w’iki cyumweru tariki ya 23 Ukwakira 2026 ubera mu Murenge wa Kimihurura mu Mujyi wa Kigali mu Karere ka Gasabo.

Ni umuhango witabiriwe na bamwe mu byamamare birimo umukinnyi wa filime Nyambo Jesca n’umunyamakuru, Bianca Baby.

Bwiza na Uhujimfura biyemeje kubana akaramata nyuma y’imyaka itanu bakorana cyane ko batangiye gukorana muri 2021.

Basezeranye imbere y’amategeko nyuma y’igihe bavugwa mu rukundo ariko aba bombi bakirinda kuba babyemeza.

Muri Kanama 2026, nibwo Danny Vumbi usanzwe ari inshuti yabo, ni we wemeje ko aba bakundana ubwo yifurizaga isabukuru nziza Bwiza Emerance akifashisha amashusho ye ari kumwe na Uhujimfura agaherekezwa n’amagambo agira ati “wowe n’uwawe mugubwe neza.”

Mu gihe hagitegerejwe indi mihango y’ubukwe, Bwiza Emerance aritegura igitaramo azakorera muri Zambia tariki ya 28 Ugushyingo 2026.

Iki gitaramo azafashwamo na Bruce Melodie, azaba arimo kumurika Album ye nshya yise “Home”.

Bwiza Emerance yasezeranye imbere y’amategeko

Bamaze igihe bakundana

Nyambo Jesca yitabiriye uyu muhango

Bianca Baby yari ahari