Blog

Kuri iyi ncuro, ubu bukangurambaga buzibanda cyane ku bacuruzi bakoresha MoMoPay. Ubu bukangurambaga, buri mu mugambi mugari wo guteza imbere ubukungu budashingiye ku guhererekanya amafaranga mu ntoki no korohereza ubucuruzi binyuze mu kwishyurana hifashishijwe ikoranabuhanga.

Abacuruzi ku isonga mu bukungu bugezweho

Abacuruzi bifuza kubona amahirwe yo gutsindira ibihembo bikomeye muri 'BivaMoMotima 3', barasabwa kwakira ubwishyu bw'abakiriya banyuze kuri kode yabo ya MoMoPay, ndetse na bo hagati yabo n’abandi bacuruzi bakishyurana bakoresheje MoMoPay. 

Biteganijwe ko kuri iyi ncuro, abacuruzi babiri ba mbere b'abanyamahirwe bazatsindira imodoka zizajya zibafasha mu bucuruzi bwabo (pickup trucks), ibi bikaba ari uburyo bwo kubashimira uruhare rwabo mu kwimakaza uburyo bwishyurana butekanye kandi bwihuse.

MoMoPay: Icyizere cy'abacuruzi n'abakiriya

Mu gutangiza ku mugaragaro iki gikorwa, Chantal Kagame, Umuyobozi Mukuru wa Mobile Money Limited, yagaragaje ko iyi gahunda ari inzira yo kwizihiza urugendo rukomeye iyi sosiyete yateye mu kwimakaza ubwishyu bwa MoMoPay mu Rwanda.

Ati: “Twishimiye gutangiza icyiciro gishya cya 'BivaMoMotima' kuko twageze ku ntsinzi ikomeye umwaka ushize. Twabonye abacuruzi barenga 500,000 batangiye gukoresha MoMoPay, ndetse abakiliya 3.3 miliyoni bakoresheje ubu buryo mu kwishyura.”

Yakomeje agira ati: “Ibi byerekana ko ubucuruzi bukomeje kwimukira ku ikoranabuhanga, bigahura n'icyerekezo cya Leta y’u Rwanda cyo guteza imbere ubukungu budashingiye ku guhererekanya amafaranga mu ntoki. 'BivaMoMotima 3', ni uburyo bwo gushimira abacuruzi no gukomeza kubashishikariza gukoresha MoMoPay.'

Amahirwe mashya ku bacuruzi

Gahunda ya 'BivaMoMotima' imaze kumenyekana nk'imwe mu zifasha kwimakaza ikoreshwa ry'amafaranga hakoreshejwe ikoranabuhanga. Iki cyiciro cya gatatu cyayo kigamije kwibanda ku bacuruzi, dore ko ari bo nkingi y'ubucuruzi bwa buri munsi. MoMoPay ifasha abacuruzi kwakira ubwishyu hifashishijwe kode yihariye, bityo bakirinda ibyago byo gukoresha amafaranga mu ntoki no gutakaza umwanya.

Uyu munsi, Mobile Money Limited ifite abacuruzi barenga 500,000 bakoresha MoMoPay, kandi ikomeje gushishikariza abandi kwiyandikisha kugira ngo bungukire muri ubu buryo bworoshye, butekanye kandi bujyanye n'igihe.

Ubucuruzi bw'ejo hazaza ni ubushingiye ku ikoranabuhanga

Mu gihe ubukungu bw'Isi buhura n'impinduka nyinshi, uburyo bw'ikoranabuhanga mu kwishyurana ni inkingi ikomeye y'ubucuruzi bugezweho. Mobile Money Limited yiyemeje gukomeza gushyigikira abacuruzi n'abakiliya bayo, hagamijwe iterambere ry'ubukungu bw'u Rwanda binyuze mu bwishyurane bugezweho, bwihuse kandi bwizewe.

Muri Gashyantare 2024, nibwo MTN Mobile Money Rwanda Ltd yatangije ubukangurambaga bwiswe #BivaMoMoTima, bugamije guhemba abakoresha neza uburyo bwo kwishyura binyuze kuri telefoni bwa Momo Pay.

Ubu bukangurambaga bugamije gushimira abakiliya ba MTN Mobile Money, bishyura cyangwa bishyurwa ibintu binyuze kuri Momo Pay.

MoMo Pay ni uburyo bwo kwishyura bwa MTN Mobile Money bwatangiye mu gihe cya Covid-19, bwari bugamije korohereza abantu guhererekanya amafaranga binyuze mu ikoranabuhanga.

Iyi serivisi abayikoresha biganjemo abamotari, abacuruzi n'abandi bakenerwa kwishyuza, uwishyuwe muri ubu buryo asabwa ikiguzi cya 0.5% mu gihe yakiriye ari hejuru ya 4,000Frw.

Chantal Kagame uyobora Mobile Money Rwanda Ltd yatangaje ko hatangijwe icyiciro cya gatatu cy’ubukangurambaga bwa ‘BivaMoMotima’

Abanyamahirwe babiri ba mbere ni bo bazegukana izi modoka zizakomeza kubafasha mu bucuruzi bwabo  

Mu itangazo RwandAir yashyize hanze, yavuze ko bitewe n'isanwa ry'imihanda yo mu mujyi wa Londres irimo uwitwa M25, ishobora gutuma abakiliya bayo bahura n'ibibazo bitandukanye mu nzira zigana ku kibuga cy'indege.

RwandAir yavuze ko abagenzi bakwiriye kwigengesera ari abafite ingendo hagati ya tariki 7-11 Werurwe 2025, hamwe no kuva tariki 21-24 Werurwe 2025.

Iri tangazo ryakomeje risaba abagenzi ko mu rwego rwo kwirinda gukererwa bazagera ku kibuga cy'indege kare ku buryo bahagera amasaha ane mbere y'uko indege ihaguruka.

Basabwe kandi ko bakoresha indi mihanda yerekeza ku kibuga cy'indege itari uwa M25 uri gusanwa kugira ngo bitabatinza. Mu kwirinda akajagari ko mu muhanda kandi banasabwe ko bakoresha ibinyabiziga rusange, gari ya moshi n'ibindi byabafasha kugera ku kibuga cy'indege cya Londres bitabatindije.

Uyu muhanda wa M25 ushobora gukoma mu nkokora ingendo za RwandAir, watangiye gukorwa mu 2022 gusa imirimo yo kuwusana yigijwe inyuma ku buryo biteganyijwe ko uzarangira mu mpeshyi y'uyu mwaka.

RwandAir yasabye abakiliya bayo kwigengesera kubera imirimo yo kubaka imihanda i Londres

Ni igikorwa cyatangijwe n'umuganda wabaye ku wa 22 Gashyantare 2025, mu karere ka Musanze, umurenge wa Musanze, akagari ka Kabazungu, witabiriwe n'abayobozi batandukanye bo mu karere na Minisitiri w'ingabo, Juvenal Marizamunda.

Inzu 115 nizo zatangiye kubakwa mu cyiciro cya mbere cy'uyu mushinga izindi 85 zikazubakwa nyuma, ariko zose byitezwe ko zizarangirana na 2025.

Abaturage bari kubakirwa inzu babwiye RBA ko bibereka ko ubuyobozi bw'igihugu bubazirikana kandi bubitayeho.

Elizabeth Nikuze, umwe mu bagiye kubakirwa, yagize ati 'Imvura yaragwaga nkapfukama mu buriri nkatabaza Imana yo mu ijuru, ikanyagira hakaba hari igihe nshaka amashashi nkatwikira abana. Leta yaradufashije, iradukodeshereza, none igiye kutwubakira. Ndanezerewe cyane.'

Uwitonze Florida na we yagize ati 'Ubuzima bwari bumeze nabi, kugira ngo menye ngo burakeye ni amabati nareberagamo hejuru, nkamenya ngo burakeye, yari yarapfumutse hari nko hanze, ariko ubu kubera Perezida Kagame agiye kunshyira hariya, yanshyize mu buzima busanzwe, akaba yanguriye ikibanza'

Umuyobozi muri Minisiteri Ishinzwe Ubutabazi (MINEMA), Mugisha Virgile yavuze ko izi nzu zizubakwa mu buryo bugezweho kandi ku buryo zishobora guhangana n'imihindagurikire y'ikirere.

Ati 'Inzu zari zisanzwe aha zari zubakishijwe ibiti, ubu tugiye kubakisha amatafari ahiye nk'uko mwabibonye mu muganda twagize, dukusanya amabuye azakoreshwa mu kubaka umusingi, kuko uzaba ari umusingi wigiye hejuru ugereranyije nuko zari zisanzwe zimeze'

Minisitiri w'Ingabo, Juvenal Marizamunda, yasabye abaturage gufata neza ibi bikorwa no kugira uruhare mu iterambere ry'igihugu.

Yabasabye kandi kumva ko iterambere bariharanira nk'abanyarwanda, ntabandi bazabigiramo uruhare, kuko akimuhana kaza imvura ihise, bityo bakwishakamo ibisubizo, ntakidashoboka bashyizemo imbaraga bagashyira hamwe mu kubona ibisubizo birambye.

Biteganyijwe ko inzu 115 zizuzura mu mpera za Mata 2025, izindi 85 zikazarangira mbere y'uko uyu mwaka urangira.

Musanze ni kamwe mu turere dukunda kwibasirwa n’ibiza mu Rwanda

Afurika y'Epfo yohereje ingabo zirenga 2900 mu butumwa bw'Umuryango w'Ubukungu n'Iterambere ry'ibihugu bya Afurika y'Amajyepfo, SAMIRDC.

Izi ngabo zajyanye n'iza Malawi na Tanzania, zisangayo iz'u Burundi zinifatanya na FARDC, Wazalendo n'abacanshuro b'Abanyaburayi ariko M23 ibakubita inshuro, hapfa abasirikare 14 ba Afurika y'Epfo, Goma irafatwa, abasirikare bari bayirimo bazengurukwa na M23.

Ingabo za Afurika y'Epfo zahagaritse imirwano, ihurizo risigara ku kumenya uko zizava mu Burasirazuba bwa Congo, kuko Ikibuga cy'Indebe cya Goma cyangiritse.

Inteko Ishinga Amategeko ya Afurika y'Epfo yamaze iminsi yotsa igitutu Perezida Cyril Ramaphosa ngo acyure ingabo z'igihugu zireke kwicirwa mu mahanga zizira inyungu z'umuntu ku giti cye.

Umuvugizi wa AFC/M23, Lawrence Kanhyuka aherutse kubwira itangazamakuru ko igihe kigeze ngo ingabo za Afurika y'Epfo ziri mu bigo bya MONUSCO zitahe ndetse bagiye kuzireba bakazibwira ko inzira ishoboka zanyuramo ari umupaka w'u Rwanda.

Ati 'Byavuzwe kenshi ko twe twiteguye kubaha inzira bakagenda. Ikibuga cy'indege [cya Goma] ubu ntibyashoboka ko bagikoresha. Hari ibisasu byinshi bigitezemo, n'inzira y'indege yuzuye ibinogo kubera kubera ibisasu byaharashwe.'

'Twababwiye ko bashobora kunyura mu Rwanda bagasubira iwabo. Twe nta kibazo tubifiteho. Twababwiye ko n'ubwo bari kuba mu birindiro bya MONUSCO bagomba gusubira iwabo.'

Amakuru avuga ko aba basirikare bazanyura ku mupaka w'u Rwanda ku wa Kabiri tariki 25 Gashyantare 2025, ari 189 bakomeretse barimo batanu barembye cyane n'abagore babiri batwite. Izi ngabo zageze muri RDC mu mpera za 2023.

Depite Carl Niehaus mu ntangiriro za Gashyantare 2025 yavuze ko u Rwanda rwahaye Afurika y'Epfo inzira yo kunyuzamo imirambo ikayanga ivuga ko byaba ari agasuzuguro.

Ati 'Perezida Kagame yahaye Afurika y'Epfo uruhushya rwo gukoresha inzira yo mu Rwanda, ariko Afurika y'Epfo ibibona nk'agasuzuguro, ihitamo kudakoresha ayo mahirwe.'

Abadepite ba Afurika y'Epfo bashinje Perezida Ramaphosa kohereza ingabo z'igihugu gupfira muri RDC mu nyungu ze, umuryango we n'aba hafi ye bakora mu bucukuzi bw'amabuye y'agaciro, bikavugwa ko yari ari kubaharurira inzira ngo bazajye kuyacukura mu Burasirazuba bwa RDC.

Bibazaga kandi ukuntu mu bihugu 15 bigize SADC ibihugu bitatu ari byo byohereje ingabo gusa, ibindi bigahitamo kwifata.

Abasirikare ba Afurika y’Epfo bakomerekeye muri RDC barwana na M23 bashobora gucyurwa banyuze mu Rwanda

Ku wa Gatanu tariki 10 Mutarama 2025 nibwo ku mbuga nkoranyambaga, hakwirakwiye inkuru z'urukundo rwa Mutesi Jolly na Saidi Lugumi uri mu batunze agatubutse muri Tanzania, ndetse binavugwa ko acuruza imbunda.

Byari nyuma y'ubutumwa bwahererekanyijwe ku mbuga nkoranyambaga z'aba bombi baca amarenga y'urukundo, ariko Mutesi Jolly aza kubyamaganira kure, avuga ko bari binjiriwe n'abatekamutwe bo ku mbuga nkoranyambaga (Hackers) nta mubano udasanzwe bafitanye.

Nyuma, Miss Jolly yongeye kwamagana abantu bakomeje kuvuga inkuru z'uko akundana n'umunyemari wo muri Tanzania, Saidi Lugumi, abinyujije mu butumwa yacishije ku rubuga rwa X, aho yagaragaje ko ibivugwa by'urukundo rwe n'uyu muherwe ari ibihuha.

Ati: 'Ku banyifuriza ineza bose, ndabashimira byimazeyo ku kungirira icyizere aho kunkekera ibindi, no kunyifuriza ibyiza cyane cyane muri ibi bihe by'amagambo yo gukekeranya. Urukundo ni ikintu cyiza cyane, kandi igihe cyose ruzampamagara, nzarwakira ntashidikanya kandi ku bushake bwanjye no mu buryo bunyuze umutima wanjye.'

Nubwo abantu benshi basaga nk'abamaze kubirenza ingoyi, kuri ubu iyi nkuru yongeye kurikoroza ku mbuga nkoranyambaga nyuma y'uko hongeye kuza ikindi gihamya cy'uko hashobora kuba hari umubano udasanzwe hagati y'aba bombi.

Ibi biri kuvugwa hashingiwe ku mashusho yashyizwe ku rubuga rwa Instagram rw'umuhanzikazi Gigy Money uri mu bakomeye muri Tanzania, aho uyu mukobwa yumvikana aririmbira Saidi Lugumi yita 'umuvandimwe we' amwifuriza isabukuru nziza y'amavuko yizihije mu ntangiro za Gashyantare 2025, akanamwita 'umugabo wa Mutesi'.

Muri aya mashusho, Gigy Money asoza kuririmbira uyu mugabo, akamuha impano, agahita agira ati: 'Utanga byinshi, ukwiye imigisha myinshi. Isabukuru nziza mugabo wa Mutesi.'

Aya magamba uyu Gigy Money yakoresheje, yongeye guhagurutsa benshi ku mbuga nkoranyambaga bavuga ko nta kabuza Miss Jolly Mutesi na Lugumi Saidi baba bari mu rukundo ndetse rugeze kure.

Gigy Money yatumye inkuru y’urukundo rwa Mutesi na Saidi yongera kwibazwaho

Ni amashusho yumvikanamo Gigy Money yita Lugumi Saidi umugabo wa Mutesi ubwo yamwifurizaga isabukuru y’amavuko

Hashize igihe gito Miss Jolly ahakanye iby’urukundo rwe n’uyu muherwe wo muri Tanzania

Kuri iki Cyumweru tariki ya 23 Gashyantare 2025 Saa Tanu n’iminota 30 nibwo hatangiye gukinwa Tour du Rwanda ya 2025 itangijwe na Perezida wa Repubilika y’u Rwanda, Paul Kagame na Perezida na Perezida w’impuzamashyirahamwe y’umukino w’amagare ku Isi,UCI,David Lappartient.

Agace k’uyu munsi ari nako ka mbere muri rusange kahagurukuye kuri BK Arena gasoreza mu marembo ya Stade aho abakinnyi ku giti cyabo basiganwe n’ibihe ku ntera y’ibilometero 3,4.

Umukinnyi wabimburiye abandi mu guhaguka ni Nzafashwanayo Jean Claude wo mu ikipe ya Centre Mondial du Cyclisme aho nyuma ye buri munota hahagurukaga umukinnyi kugeza abakinnyi 69 bose barangiye.

Uwakoresheje ibihe bito muri rusange ni Umubiligi Aldo Taillieu wa Lotto Dstny Devo Team aho yakoresheje iminota itatu n’amasegonda 48 ndetse ahita anambara umwenda w’umuhondo.Umunyarwanda waje hafi kuri iki Cyumweru ni Masengesho Vainqueur wa Team Rwanda aho yabaye uwa 31, yasizwe amasegonda 23.

Ku munsi w’ejo ku wa Mbere iri siganwa rizenguruka ibice bitandukanye by’u Rwanda rizakomeza hakinwa agace ka Kabiri ,kakaba kazahagukurikira Rukomo gasorezwe i Kayonza ku ntera y’ibilometero 158. Kazahuguruka Saa Tanu maze gasozwe Saa Munani.

Aldo Taillieu wegukanye agace ka mbere ka Tour du Rwanda ya 2025

Perezida Kagame  na Perezida na Perezida w’impuzamashyirahamwe y’umukino w’amagare ku Isi,UCI,David Lappartient batangiza Tour du Rwanda ya 2025

Nzafashwanayo Jean Claude wahagurutse mbere 

Ni umwe mu mihigo myinshi y'intore zo mu Karere ka Ruhango, aho ziyemeje kugira uruhare mu bikorwa by'ubukorerabushake bigamije guhindura imibereho myiza y'abaturage.

Sibobugingo Ezechiel, akaba intore yo ku mukondo mu zo mu Murenge wa Ntongwe, yabwiye IGIHE ko inkomoko yo kubaka iri soko n'irerero, ari ibiganiro bagize nk'intore bakabona hari ababyeyi bacururiza ku isantere ya Kayenzi, ariko bagakorera ahantu hatanoze ku muhanda batabona aho bikinga izuba n'imvura.

Ati ''Iki gitekerezo twakigejeje ku buyobozi na bwo buragishyigikira bunagishakira ibikoresho n'aho kubaka ibyo bikorwaremezo none bigeze aheza. Abaturage barabyishimiye, cyane cyane abazahacururiza kuko bizahindura imibereho yabo.''

Gakwaya Elysée wo mu Mudugudu wa Nyagatovu, Akagari ka Kayenzi, Umurenge wa Ntongwe wize ubwubatsi mu mashuri yisumbuye, yavuze ko aterwa ishema no kuba ari gutanga umusanzu we ushingiye no ku bumenyi afite mu bwubatsi, akavuga ko ubwo azabona iri soko riri gukorerwamo, azishimira ko hariho uruhare rwe.

Ati 'Nk'urubyiruko, ni iby'agaciro kubaka igikorwaremezo, umurage n'umwana uzankomokaho azareba akabona ko icyo nanjye natanzeho umusanzu, gifite agaciro, ibyazatuma nawe akunda urugerero.''

Abihuriyeho na Uwimana Liliane, wo mu Mudugudu wa Cyeru, Akagari ka Kebero, Umurenge wa Ntongwe, wavuze ko yishimiye kuba na we yaratanze imbaraga ze mu kubaka isoko rizamara igihe kirekire rikorerwamo.

Uwimana yavuze ko urugerero rwamwunguye n'ubundi bumenyi mu bwubatsi, bwiyongera ku bwo yari asanzwe afite bw'ibinyabuzima n'ubutabire, ariko ubu akaba hari bike ari kunguka, agahamya ko urugerero ari n'ikindi gihe cyo kungukira ibishya ku bandi.

Umuyobozi w'Akarere ka Ruhango, Habarurema Valens, avuga ko izi ntore z'Inkomezabigwi ziri kubaka ibikorwa binejeje kandi byitezweho guteza imbere ubuzima bw'abaturage.

Ati ''Ni ibikorwa dushima rwose kandi byihuta, kuko nk'ubu imirimo yo kubaka isoko rya Kayenzi, ubwiherero n'irerero igeze kuri 93% muri rusange.''

Meya Habarurema, akomeza avuga ko agaciro k'imirimo yose yo ku isoko rya Kayenzi ari 25.301.200Frw, mu gihe imirimo y'intore z'inkomezabigwi ifite agaciro ka 3.580.200Frw.

Mu Karere ka Ruhango kose kandi hari ibikorwa byinshi birimo gukorwa n'intore ziri ku rugerero rw'Inkomezabigwi, birimo kubakira abatishoboye, gutunganya imihanda, ubuhinzi, n'ibindi, aho inzu esheshatu z'abatishoboye hakanasanwa 11, ubwihero 70, imirima y'igikoni isaga 500.

Hakozwe kandi imirwanyasuri kuri hegitari 35, hatunganywa imihanda y'imigenderano mu tugari n'imidugudu kuri kilometero 13, hakorwa ibimoteri n'ubukangurambaga mu midugudugu 533 kuri gahunda nyinshi zirimo gusubiza abana ku ishuri, gutanga Mituweli, Ejoheza, kwirinda ibiyobyabwenge, gufasha mu gutanga ibyangombwa by'ubutaka n'ibindi.

Umuyobozi w’Akarere ka Ruhango, Habarurema Valens, yavuze ko Inkomezabigwi zo muri Ntongwe zubatse ibikorwa by’asaga miliyoni 25 Frw

Uwimana Liliane yabwiye IGIHE ko yungukiye byinshi mu rugerero birimo no kumenya iby’ibanze mu bwubatsi

Intore zo mu Murenge wa Ntongwe ziri kubaka isoko rizifashishwa n’abacururizaga ku muhanda

Umubyeyi azajya aza konkereza muri iyi nzu ndetse n’umwana abe yahasinzirira kuko bazashyiramo ibyangombwa birimo n’ibitanda baryamaho

Iri ni irerero rizajya rifasha abana b’ababyeyi bazaba bari gucururiza mu isoko riciriritse rya Kayenzi

Gakwaya Elysés ari gutanga imbaraga ze nk’umufundi mu kubaka ubwiherero bw’isoko rya Kayenzi muri Ntongwe