Blog

Ibi Minisitiri Biruta yabigarutseho ku wa 4 Werurwe 2025, ubwo habaga igikorwa cyo gusubiza mu buzima busanzwe abagore n'abakobwa 204 bamaze umwaka urenga bagororerwa mu Kigo Ngororamuco cya Gitagata, giherereye mu Karere ka Bugesera.

Ubwo Minisitiri Biruta yasozaga iyi gahunda yo kugorora aba bagore n'abakobwa 204 ku mugaragaro, yabibukije ko bari muri iki kigo kubera imyitwarire mibi, bityo babonye umwanya uhagije wo kwitekerezaho kugira ngo bafate umwanzuro ntakuka wo kuva mu bibi byose bahozemo.

Yagize ati 'Ibikorwa bibi byabarangaga mutaraza hano birashoboka ko mwabireka burundu mubifashijwemo n'aya mahugurwa mumazemo iminsi, ndahamya ko mufite ubumenyi n'ubushobozi by'ibanze byabafasha gutandukana n'imico mibi no gutangira ubuzima bushya.'

Abagorerwaga muri iki kigo bose uko ari 204 bigishijwe imyuga irimo guteka, ubudozi, gutunganya imisatsi n'ibindi bizabafasha kwiteza imbere n'imiryango yabo.

Umulisa Joseline uri mu basubijwe mu buzima busanzwe yabwiye IGIHE ko yakoreshaga ibiyobyabwenge ariko inyigisho n'inama yagiriwe bigiye kumufasha gukora neza umwuga wo guteka yigishijwe.

Ati 'Nageze hano narakoreshaga ibiyobyabwenge, nari umwari utarifatira umwanzuro, ntaritekerezaho, ariko nahawe inama n'ubukangurambaga butandukanye, nigishwa indangagaciro na kirazira z'umuco nyarwanda kuko nari narazitaye, mu by'ukuri nta mwari w'u Rwanda ukwiriye kwiyandarika.'

Umuyobozi Mukuru w'Ikigo Ngororamuco cya Gitagata, Bahame Hassan yasabye gufasha abasubiye mu buzima busanzwe.

Ati 'Icyo dusaba sosiyete ni ukudakomeza kubabona mu ndorerwamo bari babaziho ya kera, niba yari umujuru, indaya n'ibindi. Bamufate, bamwakire, bamwegere bamenye ko avuye mu mahugurwa, bamube hafi kuko nibatabikora azongera ahure na cya kibazo kuko abona ko sosoyete yamwanze.'

Imibare y'Ikigo cy'Igihugu gishinzwe Igororamuco, NRS igaragaza ko abarenga 7000 kuri ubu bari guhererwa amasomo ku bigo by'igororamuco birimo n'iki cya Gitagata.

Abayobozi basuye ibikorwa bitandukanye abagororwaga bigishijwe

Mu bagorowe harimo n’abagishijwe umwuga wo kudoda

Abagera kuri 204 ni bo basubijwe mu buzima busanzwe nyuma yo kumara umwaka urenga bagororwa

Minisitiri Dr. Vincent Biruta na Umulisa Joseline wahawe impamyabushobozi igaragaza ko yasoje amasomo yigishijwe yo guteka afite amanota meza

Umuyobozi Mukuru w’Ikigo cy'Igihugu gishinzwe Igororamuco, Mufulukye Fred yasabye abagororwaga kwitwara neza muri sosiyete bagiyemo

Umuyobozi Mukuru w'Ikigo Ngororamuco cya Gitagata, Bahame Hassan yasabye Abanyarwanda kwakira neza abamaze kugororwa

Umuyobozi mukuru w’Ikigo cy'Igihugu gishinzwe Igororamuco, Mufulukye Fred na Minisitiri Biruta bari bitabiriye igikorwa cyo gusubiza mu buzima busanzwe abagore n’abakobwa bagororerwaga i Gitagata

Abayobozi bo mu nzego zitandukanye n’abasubijwe mu buzima busanzwe

Hafashwe n’ifoto y’urwibutso

Yabigarutseho mu nama nyunguranabitekerezo yateguwe n'Inteko Ishinga Amategeko ku miterere y'ingengabitekerezo ya Jenoside mu karere, ingaruka zayo n'ingamba zo kuyirwanya, yabaye ku wa 5 Werurwe 2025.

Gen (Rtd) James Kabarebe yagaragaje ko intambara irwanirwa mu Burasirazuba bwa RDC irimo imitwe myinshi igizwe n'ingabo za FARDC, FDLR, SAMIRDC, by'umwihariko hakaba abacanshuro b'Abanyaburayi bahawe ikiraka nyamara bitemewe n'amategeko mpuzamahanga.

Ati 'Nta munsi n'umwe umuryango mpuzamahanga wigeze uvuga ku kibazo cy'abacanshuro muri RDC kandi ari ibintu bitemewe n'umuryango mpuzamahanga. […] ahubwo no kugira ngo bave i Goma bace mu Rwanda bataha na byo bari babirwanyije. Abazungu bari babirwanyije, hari za Ambasade rwose hano zahagurutse ziraduhagurukira ziravuga ziti 'muramenye bariya bantu batavanwa mu nkambi za Monusco ngo bace mu Rwanda bagenda'. Icyo bangaga ni iki? Bangaga kumwara. Bangaga ikimwaro no kubagaragaza.'

Gen (Rtd) Kabarebe yagaragaje ko ibyo bihugu byirinda guseba.

Ati 'Barabapfukiranye ntibigeze bashaka ko bamenyekana n'umunsi n'umwe. Ikindi bangaga kubona ku mupaka w'u Rwanda abasirikare bacu n'Abapolisi basaka uruhu rwera. Iyo abacanshuro baba Abirabura, baba barabemeye baranabavuze ariko kuko bari Abazungu barabahishiriye banga kubavuga n'umunsi n'umwe no kugeza n'uyu munsi ntacyo barigera babavugaho.'

Abacanshuro barenga 280 banyujijwe ku mupaka uhuza u Rwanda na RDC mu mpera za Mutarama 2025 nyuma y'uko bafatiwe ku rugamba n'umutwe wa M23.

Aba bacanshuro bo mu mutwe wa RALF wo muri Romania, bifatanyaga n'Ingabo za Repubulika Iharanira Demokarasi ya Congo mu kurwanya umutwe witwaje intwaro wa M23 kuva mu 2022.

Gen. (Rtd) Kabarebe yatangaje ko abazungu bari bafite ipfunwe ryo kwandagazwa n’inzego z’umutekano z’u Rwanda zibasaka

AGPF yasuye uturere 15 tw'igihugu turimo 11 twegereye imipaka u Rwanda rugabaniraho n'ibindi bihugu.

Senateri Prof. Dusingizemungu Jean Pierre,akaba na Perezida w'Ihuriro ry'Abagize Inteko Ishinga Amategeko rikumira Jenoside, Ipfobya n'Ihakana rya Jenoside yakorewe Abatutsi (AGPF), ubwo yari mu nama nyunguranabitekerezo yateguwe n'Inteko Ishinga Amategeko ku miterere y'ingengabitekerezo ya Jenoside mu karere u Rwanda ruherereyemo, ingaruka zayo n'ingamba zo kuyirwanya, yatangaje ko ibikorwa byo guhohotera abarokotse Jenoside yakorewe Abatutsi byagaragaye cyane muri Kanama kugeza mu Ukuboza 2024 byari bifitanye isano n'ingengabitekerezo ya Jenoside.

Yagaragaje ko basanze ingengabitekerezo ya Jenoside itagaragara ku bantu benshi, hari ibimenyetso 16 basanze bigaragaza ko iki gitotsi hari aho kikigaragara.

Ati 'Ibimenyetso twabonye 16 biraduha gutekereza ko bifitanye isano n'ingengabitekerezo ya Jenoside, 12 byagaragaye ku barengeje imyaka 30, bibiri bigaragara ku basore n'inkumi noneho bitatu bigaragara ku bana bari hagati y'imyaka 12 na 16.'

AGPF yasanze mu turere twegereye imipaka ari ho higanje ibikorwa bigaragaramo ingengabitekerezo ya Jenoside ndetse hari n'abaturage usanga bakorana n'imitwe yayishyize imbere ikorera mu Burasirazuba bwa RDC nka FDLR.

Prof. Dusingizemungu ati 'Hari ikindi twabonye cyane cyane ku mupaka usanga hari abagore bambuka umupaka bakajya gukora icyo badusobanuriye bise 'kwiteza agashinge', ubwo bikaba ari ukujya kwiteza inda mu bantu bo muri FDLR kugira ngo babone icyororo. Ngira ngo ubyumva yakumva icyo bishatse kuvuga.'

Utu turere twegereye imipaka kandi bagaragaje ko turimo abaturage bashobora kuyobywa n'ibiganiro bya by'abantu bakwirakwiza ingengabitekerezo ya Jenoside babinyujije ku mbuga nkoranyambaga.

Ati 'Hari n'uturere twavuzwemo abadukomokamo cyangwa abakomoka hafi yatwo bakora ibikorwa byo gushaka kwigarurira urubyiruko barushora mu macakubiri n'ingengabitekerezo ya Jenoside.'

Yongeyeho ati 'Hari abaturage batuye mu Rwanda bigaragara ko bakivugana n'abari muri FDLR cyangwa abandi barwanya ubuyobozi bw'u Rwanda bakomeje kubacengezamo ingengabitekerezo ya Jenoside.'

Yatanze urugero rwo mu murenge wa Bwisige mu Karere ka Gicumbi, aho abaturage bagaragaje ko hari abantu bakiyoba kubera ibiganiro bya Gen. Habyarimana Emmanuel ukomoka muri ako gace, muri Nyamasheke hakaba abumva Padiri Nahimana na Padiri Rudakemwa Fotunatus bakomoka mu karere ka Rusizi gaturanye na Nyamasheke.

I Ngororero kandi hakomoka abantu benshi bari mu mutwe wa FDLR ku buryo ingengabitekerezo yabo bayigeza no ku batuye muri ako karere.

Mu karere ka Gisagara hari urubyiruko ruhabwa Sim Card zo mu bindi bihugu zitababaruyeho kugira ngo ubutumwa burimo ingengabitekerezo batanga 'babikore bumva ko bikingiye ko batazagerwaho n'ubutabera.”

Muri Nyaruguru hagaragaye umwana w'imyaka 12 wafataga abana bagenzi be akareba mu biganza byabo ababwira ko ari kubarebera niba ari Abatutsi cyangwa Abahutu, ndetse ngo umwarimu yamuhaye ikiganza ngo amurebere ahita yiyamira ngo 'wowe uri mwene wacu ntacyo tuzagutwara.'

Hari kandi umusore w'imyaka 26 wariye inzoka ku manywa y'ihangu avuga ko ngo ayiriye 'nk'uko bazarya Abatutsi.'

Mu Karere ka Nyamagabe kandi basanze hari ahantu hari imibiri y'abishwe muri Jenoside yakorewe Abatutsi bakahubaka inzu, ndetse hari umusaza wamaze imyaka 30 mu nzu adasohoka kubera uruhare yagize muri Jenoside yakorewe Abatutsi.

Prof. Dusingizemungu ati 'Hari abayobozi iyo bumvise amakuru arebana n'ingengabitekerezo ya Jenoside bagerageza kunga abagaragaweho ibimenyetso n'abarokotse Jenoside, hamwe na hamwe usanga bashaka guhishira icyo cyaha kandi ari icyaha gihanwa n'amategeko.'

AGPF igaragaza ko umubare w'abantu basanganye ibimenyetso by'ingengabitekerezo ya Jenoside ari muto ariko nanone ugomba gufatirwa ingamba kugira ngo irandurwe.

Ati 'Ibyo twagiye tubona ni ibitotsi, ni ingaruka z'iyo mitwe ivugwa ishaka kuzana ibikorwa bya Jenoside bivuga ko tugomba kubikurikirana ariko ntabwo ari byinshi.'

Prof. Dusingizemungu yagaragaje ko abaturage benshi bagaragaje ko amahitamo bakora ashingira ku bikorwa byiza babona mu Rwanda aho gushingira ku macakubiri arangwa mu bihugu bituranye n'u Rwanda.

Inteko Ishinga Amategeko y’u Rwanda yagaragaje ko ingengabitekerezo ya Jenoside igomba guhagurukirwa

Byabaye ku wa 3 no ku wa 4 Werurwe 2025, aho mu Polisi yafashe abantu 24 mu Murenge wa Gacurabwenge ndetse n'abandi 11 mu Murenge wa Ngamba bakekwaho ubujura n'ibindi bikorwa bibi.

Umuvugizi wa Polisi mu Ntara y'Amajyepfo, SP Emmanuel Habiyaremye, yabwiye IGIHE ko Polisi yafashe abakekwaho kugira uruhare mu byaha, ati 'Ubu bose bafungiye kuri Sitasiyo ya Polisi ya Rukoma.'

SP Habiyaremye yashimiye abaturage batanga amakuru y'ahavugwa ibyaha, abasaba gukomeza ubwo bufatanye kugira ngo bahashye abanyabyaha babangamira ituze n'umudendezo by'abaturage.

Itegeko riteganya ko umuntu wese uhamijwe n'urukiko iki cyaha ahanishwa igifungo kitari munsi y'umwaka umwe ariko kitarenze imyaka ibiri n'ihazabu itari munsi ya miliyoni 1 Frw ariko itarenze miliyoni 2 Frw.

Uwahamijwe iki cyaha kandi, ashobora gutegekwa gukora imirimo y'inyungu rusange mu gihe cy'amezi atandatu.

Ni ubutumwa bwatanzwe nyuma y'uko RRA ishyikirije abaguzi 80, ishimwe rihwanye na 50% by'ibihano byaciwe abacuruzi batabahaye fagitire za EBM, cyangwa bakabaha izituzuye. Ni ishimwe ryatanzwe hashingiye ku makuru batanze kuri abo bacuruzi.

Ni igikorwa gishingiye ku Iteka rya minisitiri Nº 002/24/03/TC ryo ku wa 08/03/2024 rigena ishimwe rishingiye ku musoro ku nyongeragaciro, ryateganyije ko umuguzi wa nyuma ahabwa ishimwe rya 10% by'umusoro ku nyongeragaciro ugaragara ku nyemezabuguzi yahawe.

Mu gihe asabye inyemezabuguzi ntayihabwe cyangwa agahabwa idahwanye n'amafaranga yishyuye, akabimenyesha ubuyobozi bw'imisoro, ahabwa ishimwe ry'inyongera ringana na 50% by'ibihano byishyuwe kuri iyo nyemezabuguzi.

Umwe mu bitabiriye iyi gahunda, ubwo ishimwe ryatangwaga yakiriye asaga miliyoni 1.9 Frw kubera amakuru yatanze kuri fagitire zitandukanye atahawe, abakozi ba RRA bagaca ibihano abacuruzi bazimwimye.

Yavuze ko nyuma yo kwiyandikisha, yiyemeje ko buri uko ahashye azajya asaba fagitire ya EBM kandi ihwanye n'ibyo ahashye, uwinangiye akamutangira amakuru.

Undi wahawe ishimwe ry'ibihumbi 120,127 Frw, ni uwaguze ibintu agasaba fagitire, ariko agahabwa idahwanye n'amafaranga yishyuye, agatanga amakuru. Kugeza ubu abagera ku 58,000 bamaze kwitabira gahunda y'Ishimwe kuri TVA.

Komiseri Wungirije Ushinzwe Serivisi z'Abasora n'Itumanaho, Uwitonze Jean Paulin, avuga ko Abanyarwanda bose bamaze kubona akamaro k'umusoro batanga, ku buryo abacuruzi bakwiye kubahiriza gutanga fagitire ya EBM nk'uko biteganywa n'itegeko.

Yagize ati 'Tubona abantu bakomeza kuduha amakuru, tunabashimira, tukabakangurira gukomeza kuko uyu musoro ni uwabo, ntabwo wakabaye uribwa n'umuntu wanze gutanga fagitire cyangwa se agatanga iriho amafaranga make.'

Kugira ngo umuntu yinjire mu bahabwa ishimwe kuri TVA, bisaba ko aba yariyandikishije akanze *800# agakurikiza amabwiriza cyangwa akanyura muri sisitemu ya MyRRA. Igihe akeneye gutanga amakuru, ayohereza kuri nimero 0739008010 (WhatsApp), ubundi agahabwa ishimwe rya 50% y'ibihano umucuruzi aciwe.

Uwitonze yakomeje ati 'Abanyarwanda bakomeza kwitabira kuko iyi gahunda ibyiza byayo twese turabibona, nta mpamvu tutakomeza kuyitabira, tukiyubakira igihugu ariko tukabona n'ishimwe ritugarukira.'

Ambasaderi wa Canada mu Rwanda yahamagajwe ku wa 4 Werurwe 2025. Ni nyuma y'amasaha make iki gihugu gishinje u Rwanda kugira Ingabo muri Repubulika Iharanira Demokarasi ya Congo, no gufasha umutwe wa M23.

Canada kandi yashinje u Rwanda kugira uruhare mu bugizi bwa nabi bukorerwa mu Burasirazuba bwa RDC burimo kugaba ibitero ku basivili, ku mpunzi, ku batabazi, ku ngabo z'Umuryango w'Abibumbye n'iz'akarere, ubuhotozi, gushimuta no gufata ku ngufu abagore n'abakobwa. Ibi birego byose nta na kimwe cyigeze gitangirwa ibimenyetso.

Minisiteri y'Ububanyi n'Amahanga yatangaje ko nyuma yo kubona iri tangazo rigereka ibijyanye n'intambara iri muri RDC ku Rwanda, yahisemo guhamagaza Ambasaderi wa Canada kugira ngo atange ibisobanuro.

Mu byo uyu mudipolomate yagaragarijwe harimo uburyo igihugu cye kiri gushinja nkana u Rwanda ibijyanye n'ubwicanyi mu Burasirazuba bwa RDC, mu gihe bizwi neza ko ibi byaha bikorwa na FARDC ndetse n'imitwe yitwaje intwaro ikorana na Guverinoma ya RDC.

Yagaragarijwe kandi ko Canada yirengagije impungenge z'u Rwanda mu bijyanye n'umutekano warwo, ihitamo guhishira amabi ya Guverinoma ya RDC arimo n'ubwicanyi bukorerwa Abanye-Congo b'Abatutsi ku bufatanye n'umutwe wa FDLR wasize ukoze Jenoside mu Rwanda.

U Rwanda rwashimangiye ko rudateze gutezuka ku ntego rwihaye yo kurinda abaturage barwo no gukomeza kubungabunga umutekano w'igihugu.

Ambasaderi wa Canada yahamagajwe nyuma y'amasaha make Guverinoma y'u Rwanda itangaje ko uruhande Canada yafashe ku ntambara yo mu burasirazuba bwa RDC 'ruteye isoni' kandi ko kwegeka ubu bugizi bwa nabi ku Rwanda bitihanganirwa.

Abarimo Rwamucyo Ernest uhagarariye u Rwanda mu Muryango w'Abibumye, bagaragaje ko iyi myitwarire ya Canada ishobora kuba ifitanye isano n'inyungu iki gihugu gifite muri RDC cyane cyane izijyanye n'ubucukuzi bw'amabuye y'agaciro.

Yatangaje ko Canada yafatiye u Rwanda ibi bihano mu gihe umujyi wa Toronto uri kuberamo inama mpuzamahanga yo kubyaza umusaruro amabuye y'agaciro, PDAC 2025.

Uyu mudipolomate yasobanuye ko iyi nama igamije kubungabunga inyungu Canada ifite mu bucukuzi bw'amabuye y'agaciro muri RDC kandi ko itangazo ry'ibi bihano ryahuriranye n'uruzinduko rwa Minisitiri ushinzwe ubucukuzi bw'amabuye y'agaciro wa RDC, Kizito Pakabomba, yagiriye i Toronto.

Yagize ati 'Iri harabika ryabaye mu gihe hari kuba PDAC 2025, ni inama igamije kurengera inyungu nyinshi Canada ifite mu mabuye y'agaciro muri RDC. Rihuriranye no kugera i Toronto kwa Minisitiri wa RDC ushinzwe ubucukuzi bw'amabuye y'agaciro, Kizito Pakabomba, urageza ijambo ku bitabira inama.'

Guverinoma y'u Rwanda isobanura ko ibihano bidashobora gukemura ikibazo cy'umutekano muke mu burasirazuba bwa RDC, ikagaragaza ko imyanzuro yafashwe n'abakuru b'ibihugu byo muri Afurika ari yo yabonekamo ibisubizo.

Muri iyi myanzuro harimo gusaba impande zishyamiraniye mu burasirazuba bwa RDC guhagarika imirwano n'ubushotoranyi ndetse ko haba imishyikirano hagati ya Leta ya RDC n'imitwe irimo M23.

U Rwanda rwahamagaje Ambasaderi wa Canada, Julie Crowley ngo asobanure imyitwarire y'igihugu cye (Iyi foto yafashwe muri Kanama 2024)

Byagarutsweho na Minisitiri w'Uburezi, Nsengimana Joseph kuri uyu wa 4 Werurwe 2025, ubwo yari mu Nteko Ishinga Amategeko y'u Rwanda Umutwe w'Abadepite.

Yavuze ko mu rwego rwo kugabanya ubucucike mu mashuri no gufasha abana kwiga amasaha menshi aho kwiga mu buryo basimburana na bagenzi babo (double shift), hakenewe ibyumba nibura 26.000.

Yagaragaje ko kuva mu 2017 hubatswe ibyumba by'amashuri 27.500 kandi byatanze umusaruro mu kugabanya umubare w'abana mu cyumba cy'ishuri nubwo bitakemuye ikibazo cy'ubucucike cyari gihari.

Ati 'Umuntu arebye ibyumba by'amashuri byubatswe mu myaka ishize, nko guhera mu 2017 byari bigeze ku bihumbi birenga 27 bikaba byaratumye umubare w'abana mu ishuri ugabanuka ndetse n'abiga mu byiciro biragabanuka kuko wasangaga bigera no ku bana mu mashuri abanza yose ariko ubu bisigariye mu mashuri atatu abanza.'

Yongeyeho ati 'Ibi byumba ntabwo byarangije icyo kibazo, no kuba abantu biga basimburana. Burya iyo abanyeshuri biga basimburana baba bafite amasaha 25 gusa yo kwiga mu cyumweru kandi ntahagije.'

Yakomeje ashimangira ko hakenewe kubakwa ayo mashuri mu gukemura ibyo bibazo, anizeza ko mu gihe bitarubakwa hazakomeza gutangwa uburezi bufite ireme.

Ati 'Birasaba ko dukomeza kubaka ibi byumba by'amashuri, tukagenda tureba ko twakemura ibi bibazo duhura nabyo, ariko ntibivuze ko mu gihe bitarakemurwa tutazakomeza kwigisha. Tuzakomeza kandi turebe uburyo twazamura ireme ry'uburezi mu mashuri.'

Umuyobozi Mukuru w'Urwego rw'Igihugu rushinzwe Uburezi bw'Ibanze REB, Dr. Nelson Mbarushimana, yagaragaje ko ibyo byumba by'amashuri byitezweho gutanga umusanzu ukomeye.

Yemeje ko imirimo yo gutangira kubaka ayo mashuri izatangira mu mwaka w'ingengo y'imari wa 2025/2026.

Ati 'Gahunda ya leta ni uko umwana wese ugeze ighe cyo gutangira ishuri aritangira, kuva ku myaka itatu…hashyizweho gahunda yo kugaburira abana ku mashuri, kandi yatumye tugira umubare munini w'abana bagana ishuri.'

Yakomeje ati 'Igihari ni uko mu ngengo y'imari y'umwaka utaha iyubakwa ry'amashuri rizaba ryatangiye kandi rizaba riri ku muvuduko mwiza kugira ngo iki kibazo cy'umubare w'ibyumba by'amashuri bikiri bike kubera ko umubare w'abanyeshuri wiyongereye gikemuke.'

Yashimangiye ko kuba umubare w'abanyeshuri wakwiyongera ari ibintu byiza ku rwego rw'uburezi rw'u Rwanda kandi ko hari gukorwa ibishoboka ngo ibyumba by'amashuri byubakwe vuba.

Ati 'Mu by'ukuri iyo umubare w'abanyeshuri wiyongereye ni ikintu cyiza cyane tugomba kwishimira ari na yo mpamvu Minisiteri y'Uburezi iri gushaka uburyo ibyumba by'amashuri biziyongera dutangiriye mu ngengo y'imari y'umwaka w'amashuri wa 2025/2026.'

Nubwo bimeze bityo ariko haracyari ikibazo cy'abana bata ishuri ndetse n'umubare munini w'abatiga, aho Minisiteri y'Uburezi itangaza ko abarenga miliyoni 1,2 batika cyangwa ngo babe bafite akazi runaka bakora.

Abadepite bibukije Minisiteri ko hashobora kwifashishwa uburyo bwaherukaga kwifashishwa burimo no gukora umuganda ubwo hubakwaga ibyumba by'amashuri 22.505.

MINEDUC yagaragaje ko u Rwanda rukeneye ibindi byumba birenga ibihumbi 26

Minisitiri w’Uburezi, Nsengimana Joseph, yagaragaje ko hakenewe kubakwa ibindi byumba mu kugabanya ubucucike mu mashuri

Kubaka amashuri ageretse ni kimwe mu byitezweho ibisubizo