Blog

Aba bakozi bari barahagaritswe n'ubuyobozi bw'Akarere mu gihe cy'amezi atandatu kubera iperereza bakorwagaho ryo kunyereza umutungo wa Leta mu mishinga ijyanye no gukora imihanda y'imigenderano muri gahunda ya VUP. Urukiko rwabagize abere tariki ya 9 Ukuboza 2020.

Byavugwaga ko mu bikorwa byagombaga gukorerwa abaturage hari ibikoresho birimo amabuye n'imicanga byagombaga kubaka ibiraro bito ku mihanda y'imigenderano bitahageze kandi byarishyuwe.

Mu gusubizwa mu kazi habayemo impinduka nyinshi zinyuranye n'imyanya bari basanzwe bakoraho bamwe irahinduka, aho hari bamwe mu bari abakozi bo ku rwego rw'akarere bajyanywe ku rwego rw'umurenge, ndetse abandi bo mu mirenge nabo bahinduriwe imirenge bakoreragamo.

Muri aba bakozi abahinduriwe imyanya harimo, Basabose Alexis wari usanzwe ari Umuyobozi ushinzwe Imiyoborere n'Umutungo mu Karere ka Rutsiro kuri ubu wagizwe umunyamabanga nshingwabikorwa w'umurenge wa Mushubati.

Mu banyamabanga nshingwabikorwa b'imirenge bahinduriwe imirenge bayoboraga harimo Rutayisire Déogratias wari usanzwe ari umunyamabanga Nshingwabikorwa w'umurenge wa Ruhango wagizwe umwere n'urukiko ku ikubitiro ubwo baburanaga ku ifungwa ry'agateganyo ry'iminsi 30 agahita ajyanwa kuyobora umurenge wa Kigeyo.

Ikizihiza Alida wayoboraga umurenge wa Rusebeya kuri ubu yahawe kuyobora Umurenge wa Murunda, aho yasimburanye Ntihinyuka Janvier umukozi wayoboraga umurenge wa Murunda wagiye Rusebeya.

Bisangwabagabo Sylvestre wayoboraga umurenge wa Kivumu, yajyanywe kuyobora umurenge wa Mukura.

Umuyobozi ushinzwe iyubakwa ry'Imihanda, Kamana Jean Marie na Munyamahoro Cyato Justin usanzwe ari umucungamari w'akarere aba bagumye mu myanya yabo.

Abakozi bashinzwe ubutaka mu mirenge aribo Nshizirungu Emmanuel wa Nyabirasi, Sekamana Théophile wa Ruhango, Kagaba J. Baptiste wa Mukura, Murari Richard wa Murunda na Ndagijimana Aloys wa Kivumu bagumye mu mirenge yabo.

Umuyobozi w'akarere ka Rutsiro ayinkamiye Emerance yemeje aya makuru, avuga ko babasubije mu kazi bagendeye ku itegeko rishyiraho sitati rusange igenga abakozi ba Leta.

Ibiro by’Akarere ka Rutsiro

Nyina w’umwe mu bakinnyi ba filime bari bakunzwe cyane muri Tanzania, Steven Kanumba yongeye gushimangira ko ko umuhungu we yishwe n’uwahoze ari umukunzi we, Elizabeth Michael ‘Lulu’.

Imyaka 8 irashize Steven Kanumba yitabye Imana, gusa nyina umubyara ntarakira urupfu rw’umuhungu we.

Mu mashusho yagiye hanze uyu mugore aganira na Wema Sepetu ubwo yari yamutumiye kuri Wema App ahantu yigishiriza guteka, Wema yumvikanye amubaza uwishe umwana we nawe ahita avuga ko ari uwari umukunzi we.

Ati“umuhungu wanjye yarishwe. Uwamwishe? Ni uwari umukunzi we Elizabeth Michael.”

Aya mashusho yashyizwe ku rukuta rwa Instagram n’uwitwa Jay Maudaku, abantu bamwe bagiye basaba uyu mubyeyi kubyibagirwa azakomeza ubuzima, ni mu gihe abandi babona ikibazo mu kibazo Wema yamubajije.

Uwitwa @mercy31.7 ati “ikibazo si uko nyina yavuga uwishe umwana we, ikibazo kuki Wema yamubaza ikibazo nk’icyo?”

@madam.winfridacharles ati“uwo mugore yarababaye ariko kuki Wema amubaza ikibazo nk’icyo?”

Ubwo Kanumba yapfaga, Elizabeth Michael akaba yaraje gufatwa arafungwa azira ko yishe uyu mukinnyi wa filime bakundanye banakora umwuga umwe wo gukina filime, nyuma yaje kurekurwa ubwo haburaga ibimenyetso bifatika bimuhamya icyaha.

Wema Sepetu akaba nawe aherutse gutangaza ko yakuyemo inda 2 za Kanumba.

View this post on Instagram

A post shared by Jay Maudaku 🇹🇿 (@jaymaudaku)

Wema wemeye ko yakuyemo inda za Kanumba, ikibazo yabajije nyina ku rupfu rwe cyateje impaka

Kuri ubu umwana uri munsi y'imyaka 18 ushaka kuboneza urubyaro asabwa kujyana n'umubyeyi we kwa muganga.

Umuryango Nyarwanda wita ku Buzima (Health Development Initiative-HDI) uvuga ko kuba bigisaba abangavu cyangwa ingimbi kujyana n'ababyeyi babo kwaka serivisi zo kuboneza urubyaro bikiri inkomyi muri iyi gahunda.

Hashize igihe kitari gito Leta y'u Rwanda iri kwiga ku kibazo cy'abangavu batwara inda zitateguwe bityo zikabavutsa bumwe mu burenganzira bwabo bw'ibanze burimo no gucikiriza amashuri.

Ubwo yari imbere y'abasenateri mu Ugushyingo 2018, Minisitiri w'Intebe, Dr Edouard Ngirente, yavuze ko hari kwigwa uburyo abangavu bakemererwa kuringaniza urubyaro nka kimwe mu bisubizo byagabanya ubwiyongere bw'inda zitateganyijwe mu rubyiruko.

Ni icyemezo kitavuzweho rumwe cyane ko hari abagishyigikiye n'abatemeranya na cyo.

Urubyiruko na rwo rwakunze kugaragaza ko bishyizwe mu bikorwa byaba inzira nziza yo kugabanya umubare wiyongera umunsi ku munsi w'abangavu bacikiriza amashuri yabo bitewe no guterwa inda bakiri kwiga.

Umuyobozi Mukuru wa HDI, Dr Kagaba Aflodis, avuga ko kuba bigisaba abangavu cyangwa ingimbi kujyana n'ababyeyi babo bikiri imbogamizi muri serivisi zo kuboneza urubyaro ku rubyiruko.

Ati 'Kuba umwana utaragira imyaka 18 asabwa kujyana n'umubyeyi we kwa muganga, bishobora gutanga ishusho itari nziza imbere y'umubyeyi, kuko ashobora gutakariza icyizere umwana we cyane ko imyumvire ya benshi kuri iyi ngingo ikiri hasi.'

'Amategeko aramutse ahindutse, abantu bagahabwa amakuru neza, bagasobanurwa ko uburyo bwo gukumira inda bitareba gusa abashakanye, njyewe mbona byagabanya izi mpungenge.'

Dr Kagaba asanga abiyumvisha ko kuboneza urubyaro ku bangavu byazabashora mu busambanyi cyangwa ingaruka zitari nziza biterwa n'uko ababivuga nta makuru ahagije baba babifiteho.

Ati 'Ni amakuru atari yo. Kubivuga ukundi rero ni uko abantu bataba bafite amakuru ahagije. Ikindi ni uko abaganga babasha kubikora mu buryo butandukanye bagendeye ku kigero cy'imyaka umwana afite.'

Mu busabe bwe agaragaza ko byaba byiza hashyizweho ibigo byihariye bizafasha urubyiruko muri gahunda yo kuboneza urubyaro n'abakozi babihuguriwe mu kurushaho kunoza imitangire y'iyo serivisi.

Umuyobozi Mukuru w'Umuryango ufite mu ntego zawo gufasha urubyiruko kumenya amakuru ajyanye n'ubuzima bw'Imyororokere, Save Generations Organisation, Nyinawumuntu Yvette, na we yatangarije IGIHE itegeko ririho ririmo imbogamizi ku bashaka serivisi yo kuboneza urubyaro.

Ati 'Ibyo byo ni imbogamizi ku bangavu cyane ko kubwira umubyeyi we igikorwa nk'icyo benshi babitinya kubera ko hari amakuru rimwe na rimwe umwana aba yarahishe umubyeyi. Nanone bigendana n'umuco usa n'urigucika wo kuba umubyeyi yaganiriza umwana ubuzima bw'imyororokere.''

Yavuze ko bisaba kubanza kumvisha ababyeyi ko bo ubwabo hari umusanzu bagomba gutanga.

Yagize ati 'Ikibazo kiracyari mu myumvire, umubyeyi niyumva ko kugeza umwana kwa muganga muri serivisi nk'izi z'ubuzima bw'imyororokere ari inshingano ze nk'uko amugenera amafunguro n'ibindi bizarushaho koroha.'

Nyinawumuntu yavuze ko bidakwiye gufatwa nk'igikuba cyacitse kuba umubyeyi ajyana umwana we kwa muganga kwaka serivisi zijyanye n'ubuzima bw'imyororokere.

Ati 'Umubyeyi wese akeneye kumva ko kuganira n'umwana we ku buzima bw'imyororokere mu muryango ari inshingano ze kuko bizatuma umwana atinyuka kumugisha inama kuruta uko yajya kuzishakira ahandi. Ababyeyi nibatinyuke baganire n'abana bizadufasha kugabanya umubare w'abana bahura n'iki kibazo cyo gutinya.'

Yavuze ko guhindura itegeko no kwigisha abafite aho bahurira no gutanga serivisi ku buzima bwimyororokere by'umwihariko ababyeyi ari byo byafasha mu kurushaho kugira imikorere myiza.

Ati 'Twifuza ko itegeko ryahinduka ariko twifuza ko habaho amahugurwa mu ngeri zose, turakora ubukangurambaga kuko umubyeyi akwiye kwita kuri wa mwana, akure yisobanukiwe bizatuma umubyeyi yumva ko no kumuherekeza na yo ari inshingano ye.'

Bamwe mu bangavu n'ingimbi baganiriye na IGIHE bahuriza ku kuba iyi gahunda ari nziza kuri bo ariko bagasanga byagorana kuri bo kuko benshi batatinyuka kubihingutsa mu miryango.

Ishimwe Clémentine w'imyaka 16 yagize ati 'Njyewe mbona gahunda ari nziza. Ikindi yashyiriweho kudufasha ariko biracyagoye kuko twe nk'abana usibye no kwitabira ntiwanabihingutsa mu muryango. Mbona icyaba cyiza ari uko bavuga ngo ushaka kuboneza urubyaro arahabwa serivisi bidasabye urushya rw'umubyeyi.'

Muhire Phocas w'imyaka 17 we yagaragaje ko bikigoranye mu miryango kuganira ku buzima bw'imyororokere.

Ati 'Usibye no kuboneza urubyaro, usanga bikiri ikibazo kuganira ku bijyanye n'imyororokere mu miryango yacu. Serivisi ni nziza pe ariko kuvuga ngo wajyana n'umubyeyi ntibyatworohera na gato, cyane ko bishobora gutuma umubyeyi agutakariza ikizere bitewe n'imyumvire yabo.'

Ku rundi ruhande ariko abanyamadini basanga kuboneza urubyaro atari cyo cy'ibanze ku bangavu ahubwo bakwiye guhugurwa bakigishwa kwirinda.

Ubwo Sr Hélène Nayituriki yaganiraga na IGIHE mu Ukwakira 2020 yavuze ko atumva ukuntu abantu bavuga ko kwifata byananiranye kandi asanga kwigishwa ari ryo pfundo rya byose.

Ati 'Njye mbona ari ubugome buhanitse guha abana bacu ibyo binini cyangwa utwo dukingirizo n'ibindi byose byo kuboneza urubyaro. Ntidukwiye kuvuga ngo byamunaniye kwihangana, nidukore uburyo bwose bitamunanira kuko birashoboka. Umwana iyo ugiye umwigisha ugakora ku buryo umurinda ubuzerezi ntaba ingegera, kumurinda rero birashoboka cyane.'

Raporo ivuga ku burenganzira bwa muntu mu Rwanda ya 2020 igaragaza ko abangavu 11.6% aribo babonye serivisi yo kuboneza urubyaro, nyamara umubare w'abaterwa inda zitateganyijwe ukomeje kwiyongera nkaho kuva muri Mutarama kugeza muri Kanama umwaka ushize, abangavu batewe inda bari 15 656.

Mu Ukuboza 2020, Minisiteri y'Ubuzima yatangaje ko hari ibiganiro biri gukorwa bigamije kurebera hamwe niba abana bari hagati y'imyaka 15 na 18 mu Rwanda bashobora kwemererwa kujya bahabwa serivisi zo kuboneza urubyaro bitabaye ngombwa ko hagishwa inama ababyeyi babo cyangwa ababarera, nk'uko byari bisanzwe bigenda.

Abangavu bashobora kwemererwa gutangira guhabwa serivisi zo kuboneza urubyaro batagishije inama ababyeyi babo

'Fondation Yolande Mukagasana' izanita ku kwimakaza ibikorwa by'ubugeni bitandukanye bijyanye n'amateka ya Jenoside, birimo ibinyuze mu ndirimbo, ikinamico na filime.

Yolande Mukagasana ni we muyobozi mukuru w'uyu muryango, ndetse yanagize uruhare mu ishingwa ryawo.

Yasobanuye ko yagize iki gitekerezo mu rwego rwo gutanga umusansu mu guhangana n'abapfobya Jenoside yakorewe Abatutsi.

Yagize ati 'Ingengabitekerezo ya Jenoside yakorewe Abatutsi iracyagaragara cyane cyane mu banyamakuru no mu mashuri makuru biyobowe n'abasize bakoze Jenoside n'inshuti zabo. Ibi bikorwa cyane binyuze ku mbuga nkoranyambaga bitwaje uburenganzira bwo kuvuga icyo utekereza.''

'Twebwe nk'abiyemeje kurinda no kubungabunga amateka ya Jenoside yakorewe Abatutsi, ntidushobora kwihanganira abapfobya amateka y'Abanyarwanda. Iyi fondasiyo yashinzwe n'abantu banyuranye, harimo Abanyarwanda ndetse n'abanyamahanga b'imyaka itandukanye cyane cyane urubyiruko rufite inyota yo kubaka u Rwanda ruzira amacakubiri. Ni yo mpamvu itazagarukira kuri Jenoside yakorewe Abatutsi gusa, izajya itanga impuruza aho izabona hose hari ibimenyetso byabyara Jenoside.'

Mu zindi ntego za 'Fondation Yolande Mukagasana' harimo gukora ubushakashatsi kuri Jenoside yakorewe Abatutsi, ifatanya n'imiryango n'ibigo byaba ibya Leta cyangwa iby'igenga bifite mu nshingano kubungabunga amateka ya Jenoside.

Izanakoresha ibiganiro n'amahugurwa kuri Jenoside yakorewe Abatutsi, kubungabunga inyandiko no guteza imbere umuco wo gusoma no kwandika ku mateka ya Jenoside.

Mukagasana yakomeje ati 'Tugomba kumenya ko ibidutandukanya bitatugira abanzi, ahubwo ni ubukungu dukwiye kubakiraho dushyize hamwe. Jenoside yakorewe Abatutsi ni amateka y'Abanyarwanda kandi y'ikiremwamuntu muri rusange. Kurwanya ingengabitekerezo n'ihakana bya Jenoside ni ukurwanya urwango n'amacakubiri mu bantu. Niyo mpamvu buri wese akwiye kubigiramo uruhare.'

'Fondation Yolande Mukagasana' yafunguye amarembo kuri buri wese yaba uwo mu gihugu no hanze yacyo wifuza kubungabunga amateka ya Jenoside yakorewe Abatutsi.

Yolande Mukagasana yagizweho ingaruka na Jenoside yakorewe Abatutsi, kuko umugabo we n'abana be bose bishwe muri Mata 1994.

Kuva mu 1995, yatangiye gutanga ubuhamya ku byabaye muri Jenoside yakorewe Abatutsi ahereye i Burayi, aho yamaze imyaka 16 arwanya ipfobya n'ihakana bya Jenoside yakorewe Abatutsi. Yigishaga kandi ubutabera, amahoro no kwihanganirana nubwo yari afite ibikomere bya Jenoside.

Mukagasana yagenze Isi yose atanga ubuhamya bw'ibyabaye mu Rwanda, binamuhesha ibihembo byinshi birimo icya UNESCO ndetse n'icy'Umuryango w'Abayahudi bo muri Amerika.

Yolande Mukagasana yanditse ibitabo birindwi byahinduwe mu ndimi nyinshi ndetse ni yo mpamvu yiyemeje gushyigikira umuco wo gusoma no kwandika ku mateka ya Jenoside yakorewe Abatutsi mu rwego rwo guharanira ko atazibagirana.

Uyu mubyeyi avuga ko 'Nta bumuntu bwabaho hatabayeho kubabarira, nta kubabarira gushoboka hatabayeho ubutabera, nta n'ubutabera bwabaho butarimo ubumuntu.'

Yolande Mukagasana ni umwanditsi wanditse ibitabo birindwi byahinduwe mu ndimi nyinshi

Mukagasana Yolande aganira n’urubyiruko rwo mu Butaliyani ku bijyanye na Jenoside yakorewe Abatutsi

Nyuma yo kuganira bafashe ifoto y’urwibutso