Blog

Mu miyoborere yegerejwe abaturage, amatora ni yo abaturage bashobora kugaragarizamo ko bishimiye ubuyobozi bwabo cyangwa batabwishimiye kugira ngo batore abandi.

Abagize inzego z'ibanze barimo n'abagize Komite Nyobozi z'uturere [niho abantu benshi baba bahanze amaso] batorerwa manda y'imyaka itanu, bashobora kongera kwiyamamaza ariko ntibarenze manda ebyiri zikurikirana.

Inama y'Abaminisitiri yateranye ku wa 2 Gashyantare 2021, iyobowe na Perezida wa Repubulika, yemeje ko amatora y'inzego z'ibanze asubitswe kubera icyorezo cya COVID-19.

Itegeko ngenga rigenga amatora riteganya ko hashyirwaho iteka rya Minisitiri ufite ubutegetsi bw'igihugu mu nshingano ze rimenyekanisha ko hari inzitizi ntarengwa, ko amatora atakibaye.

Mu gihe inzitizi ntarengwa ibaye itagihari hasohoka irindi teka kugira ngo hategurwe amatora. Ni ukuvuga ko uyu munsi ntawe uzi igihe amatora y'inzego z'ibanze azabera kuko byose bizagenwa n'imiterere ya COVID-19.

Minisitiri w'Ubutegetsi bw'Igihugu, Prof Shyaka Anastase, aherutse kubwira IGIHE ko imiterere y'iki cyorezo iri mu byatumye guverinoma isaba ko yasubikwa ariko mu gihe kizagenza macye hazabaho amatora, abanyarwanda bakitorera abayobozi.

Ati 'Dufite ikibazo cy'ubukana bukabije bwa COVID-19, butatuma dukora amatora cyane ko yose ahera ku mudugudu. Ugasanga rero amatora n'ubwandu tugifite, ntabwo gutekereza kuyakora byaba aribyo. Abayobozi bari basanzwe bariho, bafatanye n'abaturage bajye mu ngamba turwanye COVID-19, nigenza macye hazaba amatora.'

Minisitiri Prof Shyaka avuga ko icyangombwa ari ubuzima kandi bitashoboka ko habaho icyuho cy'aba bayobozi [bose basaga ibihumbi 130], haramutse hafashwe umwanzuro uvuga ngo bahagarike imirimo yabo kuko manda irangiye.

Avuga kandi ko abayobozi badashobora kwibuka ko inshingano zabo ari ugukora neza ntihabeho icyuho kuko uzakora nabi n'ubundi azabihanirwa kuko amategeko azakomeza kubahirizwa nk'uko bisanzwe bibaho.

Ati 'Ntabwo iki gihe ari nka cya kindi uhereza umuntu sheki itanditseho ngo agende yishyirireho amafaranga ashaka. Imiyoborere yacu, ni imiyoborere ishingiye ku muturage, irimo gukurikirana, gukorera mu mucyo ariko abayobozi bakomeze kandi bazahereze inkoni abazabasimbura neza.'

Impaka ku isubikwa ry'amatora!

Imyaka itanu ishize, abayobozi b'inzego z'ibanze bari mu nshingano yaranzwe n'amajya n'amaza kuko n'ubwo hari abishimira ko basoje manda yabo, COVID-19 ibahesheje inyongezo hari abo bimeze ukundi.

Nko muri komite nyobozi z'uturere [Meya na ba visi meya babiri], hari abasoje manda zabo, hari abataramaze kabiri, hari abegujwe ku mpamvu zinyuranye, bamwe bazise bwite, abandi beguzwa kubera imikorere mibi.

Umunyamabanga Mukuru w'Ishyirahamwe ry'Uturere n'Umujyi wa Kigali (RALGA), Ngendahimana Ladislas, yabwiye RBA, ko inyongera yahawe abayobozi b'inzego z'ibanze ari ingaruka z'icyorezo cyaje abanyarwanda batari baracyifuje.

Ati 'Inzego z'ibanze zahuye n'ibibazo bikomeye cyane kugeza aho abanyarwanda bamburwa uburenganzira bwabo bwo kwitorera abayobozi mu gihe kigenwa n'amategeko kandi ubwo burenganzira bakabwamburwa n'icyorezo.'

Ibi ariko, Depite Dr Frank Habineza uyobora Ishyaka riharanira Demukarasi no kurengera Ibidukikije, ntabwo ariko abibona kuko asanga iyi nyongezo itari ngombwa.
Ati 'Njyewe ku giti cyanjye numvaga ko batagombaga kubona iyo nyongezo kubera ko manda y'inzego z'ibanze yaranzwe n'ibibazo byinshi cyane ukwegura gutandukanye kwa ba Meya, za ruswa, serivisi mbi n'ibindi bitandukanye. Njye numva bari kuruhuka tugakoresha amatora y'ikoranabuhanga.'

Dr Habineza avuga ko hari ibindi bihugu byo ku Isi amatora yabaye kandi ingamba zo kwirinda ikwirakwira rya COVID-19, zikubahirizwa ku buryo yumva hanakwifashisha ikoranabuhanga ariko amatora akaba kuko kuyasubika bishobora kuzateza ibibazo.

Ati 'Twarabibonye ko mu bindi bihugu amatora y'ikoranabuhanga ashoboka. Yego kujya inyuma y'umuntu byari kugorana ariko twari gushaka ubundi buryo tukayakora dukoresheje ikoranabuhanga ariko tutabongeje.'

Yakomeje agira ati 'Kuko turabongeje mu kubongeza hazavuka ibindi bibazo, kandi ibyo bibazo bizagorana kurushaho kuko n'ubundi igihe cyabo cyari kirangiye usange n'umwe wari kuzagira amahirwe yo kuba yari kuzayobora ikindi gihe, aya mezi ugasanga amubereye inzitizi yo kutazongera kuyobora.'

Umuyobozi Nshingwabikorwa w'Ihuriro rya Sosiyete Sivile Nyarwanda, Nyemazi Jean Bosco, yavuze ko inyongezo abayobozi b'inzego z'ibanze bahawe ifite ishingiro ahubwo byagakwiye kuba umwanya mwiza wabo wo gutunganya ibyo bari basigaje.

Ati 'Icyo twebwe tubona nk'iyi nyongezo mu nzego z'ibanze, ni ukurangiza ibitari byararangiye kuko haracyari ibibazo bitandukanye by'abaturage bigomba gukemurwa, hari imishinga ikomeza ariko hari n'ibindi bikorwa byagombaga gukomeza gukorwa.'

Yakomeje agira ati 'Twebwe nka Sosiyete sivile tubona ko ari undi mwanya wo kurangiza ibyo bikorwa ariko na none ukaba umwanya ku nzego z'ibanze wo gutegura ihererekanyabubasha kugira ngo na ba bandi bazakurikira baje muri izo nshingano bazabone aho bahera.'

Hari ibyo kwishimira byaranze iyi manda…

Imiyoborere y'inzego zegerejwe abaturage yubakiye kuri politiki yo kwegereza ubuyobozi n'ubushobozi abaturage yemejwe mu 2000. Inzego z'ibanze zifite inshingano ikomeye yo gushyira mu bikorwa gahunda za leta.

RALGA igaragaza ko mu myaka itanu ishize, abayobozi b'inzego z'ibanze bazashimirwa ku kuba barakoze ubukangurambaga hagatorwa Perezida wa Repubulika n'Abagize Inteko Ishinga Amategeko, imitwe yombi.

Ikindi ni uko uburyo bwo kuvugurura imiturire mu nzego zose no kubaka ibyumba byinshi by'amashuri byose byagiye bikorwa bigizwemo uruhare n'abayobozi b'inzego z'ibanze.

Ngendahimana yagize ati 'Hakaza ikindi kintu gikomeye ko muri iyi manda nibwo ikintu kitwa amavunja mu banyarwanda cyacitse. Ibyo ni ibintu byiza cyane mu mibereho myiza y'abaturage.'

Yakomeje agira ati 'Ariko noneho hakaza n'ikintu cyabaye mu mitangire ya serivisi, muri iyi manda nibwo twatangiye gutanga serivisi nyinshi hakoreshejwe ikoranabuhanga harimo na mituweri.'

Avuga ko ibindi bihe bikomeye inzego z'ibanze zagizemo imyitwarire ya gitwari birimo imihindagurikire y'ikirere ndetse n'icyorezo cya COVID-19, ari nacyo gitumye amatora y'ababasimbura ataba.

Dr Habineza avuga ko mu bindi byo kwishimira nk'ibyagezweho n'abayobozi b'inzego z'ibanze ari uguteza imbere ibikorwaremezo birimo imihanda, amavuriro, abaturage bahabwa amazi n'ibindi.

Ati 'Twagiye dusura abaturage hirya no hino, ari imihanda mu turere ndetse n'imihanda minini yarubatswe, twagiye dusanga mu bigo by'amashuri hageze ikoranabuhanga ndetse n'izi gahunda za girinka, hari benshi bahawe inka. Navuga ko bakoze akazi gakomeye.'

RALGA igaragaza ko mu bindi byishimirwa nk'ibyagezweho n'abayobozi b'inzego z'ibanze muri manda ishize ni ukuzamura uruhare rw'abaturage mu bibakorerwa.

Ubushakashatsi bugaragaza ishusho y'uko abaturage babona imiyoborere n'imitangire ya Serivisi mu Nzego z'Ibanze buzwi nka 'Citizen Report Card (CRC) bwakozwe mu 2016-2017 bwagaragaje ko igipimo cyo kwishimira serivisi kiri kuri 70, 9%.

Mu 2020, ubu bushakashatsi bw'Urwego rw'Igihugu rw'Imiyoborere (RGB) bwagaragaje ko Abanyarwanda bafitiye icyizere ubuyobozi bukuru bw'igihugu kurusha izindi nzego mu Rwanda, aho bizera Perezida Kagame ku kigero cya 99,2%.

Ubwo bushakashatsi bugaragaza ko abaturage bizera Inteko Ishinga Amategeko nk'intumwa bitoreye kubahagararira ku kigero cya 92,8%, naho inkiko zibakiranura mu manza bakazizera ku kigero cya 88,7%. Abaturage bizera inzego z'umutekano mu Rwanda zirimo igisirikare n'igipolisi hejuru ya 90%.

Bukomeza bugaragaza ko abaturage bari kuri 71,3% bishimira serivisi bahabwa mu nzego z'ibanze naho 77,17% bishimira uruhare bagira mu bibakorerwa.

Dr Frank Habineza asanga bitari bikwiye ko amatora asubikwa

Umuyobozi Nshingwabikorwa w'Ihuriro rya Sosiyete Sivile Nyarwanda, Nyemazi Jean Bosco, asanga abayobozi b’inzego z’ibanze bakwiye kubyaza umusaruro igihe bongerewe kubera COVID-19

Umunyamabanga Mukuru wa RALGA, Lasildas Ngendahimana, yavuze ko icyorezo cya COVID-19 aricyo cyatumye abaturage batitorera abayobozi

Ni imyigaragambyo yabaye kuwa Gatandatu tariki ya 6 Gashyantare 2021 nyuma yaho umwe mu banyeshuri uturuka mu nkambi ya Nyabiheke yirukanwe azizwa imyitwarire mibi yakunze kumuranga.

Amakuru agera kuri IGIHE ni uko uyu munyeshuri yakunze gusohoka ikigo mu buryo butemewe akanakunda kurwana n'abarimu, kuwa Gatandatu ngo ubuyobozi bw'ishuri bwitabaje Polisi iza kumukura mu kigo kuko yari yanze gusohoka ubwo yasohorwaga abandi banyeshuri batera amabuye imodoka ya Polisi.

Byarangiye Polisi ngo itwaye uyu munyeshuri abandi banga kurya no kuryama ahubwo bamena ibirahure by'amashuri n'aho barara. Ni imyigaragambyo yakomeje ku cyumweru bigeze kuwa mbere abanyeshuri bose banga kwiga kugeza ubwo ubuyobozi bw'Akarere bugirireyo hafatwa umwanzuro wo gufunga iki kigo abanyeshuri bose bagataha.

Umuyobozi w'Akarere ka Gatsibo, Gasana Richard, yabwiye IGIHE ko abanyeshuri bose babaye bagiye mu rugo bakazategereza umwanzuro uzafatwa na Minisiteri y'Uburezi.

Ati ' Nibyo abana batashye ikigo twagifunze, igihe bazamara mu rugo ntitwakimenya kubera ko twabyumvikanye na Minisiteri y'Uburezi ko bagomba gutaha ababigizemo uruhare bagafatwa bagakurikiranwa, hafashwe abanyeshuri 15 bateguye iyo myigaragambyo ubu bari mu maboko ya RIB.'

Meya Gasana yavuze ko kugira iyo myigaragambyo yatewe n'umwana w'umunyeshuri wakundaga gukora amakosa atandukanye mu kigo biba ngombwa ko asezererwa.

Ati 'Nyuma yo kwihanganirwa kenshi no kumutuma ababyeyi kenshi yakomeje kugira amakosa menshi arimo gusohoka mu kigo, rimwe na rimwe akanagaruka yasinze abandi bari mu masomo, kurwanya abarimu, umuvuzeho wese agashaka ko kumurwanya, nibwo komite y'imyitwarire yemeje ko yirukanwa.'

Yakomeje avuga ko nyuma yo kumusezerera hatumweho ababyeyi be banga kuza biba ngombwa ko hitabazwa ubuyobozi bw'Umurenge na Polisi asohorwa ku ngufu, uyu mwana ngo yari yasabye bagenzi be kumushyigikira, ubwo yasohorwaga rero ngo bashatse kumutabara ntibyabakundira kuko yambitswe amapingu.

Meya Gasana yavuze ko abanyeshuri bahise batera imodoka ya Polisi amabuye bayimena ikirahure, banasigara bamena ibirahure by'amashuri bigiragamo. Iby'aho barara ndetse n'ibyo ku biro by'ikigo.

Ati 'Ejo twagiyeyo banze kujya mu ishuri tubabaza uko babyumva batubwira ko bashaka gutaha ngo kuko bayobowe nabi, twaje kubigenzura rero dusanga ni urwitwazo kuko muri icyo kigo abanyeshuri benshi bakirimo ni abaturuka mu nkambi ya Nyabiheke na Gihembe mu banyeshuri 372 abagera kuri 288 ni abanyeshuri b'impunzi.'

Yavuze ko bahise bagisha inama Minisiteri y'Uburezi idusaba kugifunga kuko abanyeshuri bose nta n'umwe wigeze yitandukanya n'imyigaragambyo, leta akaba ariyo yashatse imodoka zicyura abanyeshuri bose aho byarangiye kuri uyu wa kabiri.

Ku babyeyi bafite impungenge z'abana babo bazakora ibizamini bya leta, Meya Gasana yavuze ko ahubwo bakagize impungenge ku myitwarire y'abana babo kuruta uko bagira impungenge ku kuba barangiza ishuri, yavuze ko Minisiteri y'Uburezi ariyo izafata umwanzuro niba iki kigo gifungura cyangwa niba kizafungwa burundu.

Byatangiye ari Zari Hassan utwara abana kwa se, Tanasha Donna none byarangiye Hamisa Mobetto na we amushyiriye umwana babyaranye n’ubwo yari yaravuze ko nta we azajyana.

Ubu umutima w’umuhanzi w’icyamamare muri Afurika, Diamond Platnumz uratuje nyuma y’uko ahuye n’abana be bose bane yabyaye ku bagore batatu ariko akaba nta n’umwe ubana nawe.

Nyuma y’imyaka irenga 2 atabona abana be yabyaranye na Zari Hassan kuko kuva batanduna muri Gashyantare 2018 bari batarahura, mu Gushyingo 2020 uyu mubyeyi yaje kumuzanira abana be baramusuhuza.

Hakurikiyeho umunyakenya Tanasha Donna nawe wamushyiriye umuhungu we babyaranye mu Kwakira 2019 ariko baza gutandukana muri Werurwe 2020, yaje kongera kubona umuhungu we mu mpera za Mutarama 2021 ubwo yari yamusuye.

Dylan, umuhungu yabyaranye na Hamisa Mobetto ni we wari usigaye atarasura se, na we akaba yari kwa Dimond mu mpera z’icyumweru gishize.

Mobetto ashyiriye Diamond umwana nyuma y’uko yari yavuze ko ntawe azajyana bitewe n’ikibazo afitanye na nyina wa Diamond uherutse gutangaza ko ntawe bakeneye kuko umuryango wuzuye kandi Mobetto akaba arimo yihatariza mu muryango wabo.

Dylan mu nzu kwa Diamond iruhande rw’akabati karimo ibikombe se yagiye yegukana

Nyuma yo kubona abana be bose Diamond umutima wasubiye mu gitereko

Babitangaje kuri uyu wa Mbere tariki ya 8 Ugushyingo 2021,nyuma y'aho Umujyi wa Kigali ukuriwe muri gahunda ya Guma mu rugo ibikorwa bitandukanye birimo ubucuruzi n'ibindi bikongera gukora.

Bamwe mu baturage barimo abashoferi, abakora mu nzu zogosha, amahoteli, abakanishi n'abandi, babwiye IGIHE ko igihe bari bamaze badakora cyabagizeho ingaruka.

Manirahari Patrick utwara Coaster mu Mujyi wa Kigali, yavuze ko yari abayeho mu buzima bubi kubera ko hari byinshi yakeneraga akabura uko abigura kuko nta mafaranga yabaga afite.

Ati ' Njye nari mbayeho nabi cyane ku buryo nasaga nk'uwihebye ariko uzi kugira ngo umwana agusabe nk'ikintu cyangwa umugore ukibura kandi ari wowe baba bitezeho buri kintu? Buriya nta kintu kibabaza nk'iyo umwana akwatse ikintu ukakibura cyane cyane iyo wavuye ku kazi nk'uko byambayeho.'

Uwamahoro Aline ucururiza mu nyubako ya CHIC mu mujyi wa Kigali, yavuze ko abana be bari basigaye barya rimwe ku munsi kubera ko nta kazi yari afite.

Ati 'Twari tubayeho nabi cyane kuko abana baryaga rimwe ku munsi nabyukaga nkabaha agakoma noneho ibya saa sita nkabibaha saa cyenda, nijoro nkongera nkabaha igikoma kuko nanjye ndi mu bari barahawe ka kawunga.'

Umucuruzi w'imyenda muri CHIC, Sued Salim, we yavuze ko ubu icyo bashyize imbere ari ukwirinda Covid-19 ku buryo nta yindi Guma mu rugo ibaho kuko ubuzima babayemo batifuza kubusubiramo.

Ati ' Twari tubayeho nabi umuntu yaryaga ari uko yatetse imitwe abeshya abantu ko yenda gupfa kugira ngo arebe ko hari icyo bamuha. Nkanjye hari byinshi nibagiwe kubera ko nta mafaranga nabaga mfite'.

Umutoni Nadia utuye i Nyamirambo wakoraga ibiraka muri Hotel, na we avuga ko yari ahangayikishijwe n'ubuzima yari abayemo muri Guma mu rugo.

Ati ' Urabona natwungwaga n'ibiraka nakoraga muri hoteli ariko nyuma y'aho zigabanyirije abakozi natwe twabaye abashomeri kubona amafaranga cyangwa icyo kurya nk'umuntu witunga byari bigoye cyane kandi wumve ngo cyane bitewe n'uko n'iyi Guma mu rugo yaje mu buryo butunguranye.'

Nubwo aba baturage bagaragaza ko bari babayeho nabi muri Guma mu rugo, bose bishimiye ko umujyi wa Kigali wongeye gusubira mu buzima busanzwe kuko bizabafasha kongera kwisuganya bakiteza imbere.

Sued Salim yavuze ko ubuzima bwo muri Guma mu rugo bwari bugoye cyane

Umutoni Nadia wakoraga muri Hoteli akaza guhagarikwa kubera Covid nawe yemeza ko yari abayeho nabi muri Guma mu rugo

Uwamahoro Aline yavuze ko ubu ingamba ari ukwirinda Covid-19 ku buryo hatazongera kubaho Guma mu rugo